1. Yumanyi yitwatela kufuukulahu kwila chitunakukula?

CHITUNAKUKULA, tunateli kutiya woma netu, hiyanateli kutuzatisha kudi Yehova neyi chitwazatileña hitwadiña atwansiku. Hela chakwila hitukweti ñovu neyi yitwadiña nayu hitwadiña atwansiku, tunateli kuzatisha maana niyuma yitunadizi kukwasha atwansi kulonda ayizatisheña mukuloñesha kwaYehova. Mukulumpi wumu wunashimbuli walumbulwili nindi: “Chinatachikili kukañanya kuzata neyi chinazatileña, nelukili nami kudi amanakwetu ashikahu anateli kuzata nyidimu yinazatileña.”

2. Yumanyi yitukuhanjekahu muchinu chibaaba?

² Chibaaba chinafumihu, chashimwini yuma yinateli kudizilaku atwansi neyi adikundaña nawakulumpi. Muchinu chibaaba, tukumona yilwilu yidi neyi kudikehesha, kudizoza kusakilila nikuhana chichinateli kukwasha antu akula dehi kuzatila hamu nawatwansi kulonda chipompelu chiyileñaku hambidi.

3. Kwesekeja naAFwilipi 2:3, 4, kudikehesha hichumanyi, nawa kunateli kumukwasha ñahi mukwaKristu?

³ Atushinakaji atela kwikala adikehesha hakwila akwasheña atwansi. Muntu wadikehesha wamonaña akwawu nindi amubadika. (Tañenu AFwilipi 2:3, 4.) Amanakwetu niahela akula dehi akweti ichi chilwilu, eluka nawu kakavulu munateli kwila chuma munjila jamboka-mboka kwesekeja nachahosha Bayibolu nichidi owu mudimu. Hiyakuhwelelaña antu ejima kwila yuma neyi chiyelileñawu wenaku. (Mukwa. 7:10) Hela chakwila eluka yuma yayivulu yatela kulejawu  atwansi, eluka nawu “yuma yamukaayi yinakuhimpika” nawa kudi njila jajiha jakwililamu yuma.—1 Kor. 7:31.

4. Ankoñi añinza amwekeshaña ñahi yilwilu yoyimu neyi yadiña nawaAlevi?

⁴ Amanakwetu adikehesha akula dehi, neyi hiyakushinakaja elukaña nawu hiyanateli kuzata neyi chiyazatileñawuku. Chakutalilahu, toñojokenu hadi ankoñi añinza. Neyi anashikiji yaaka 70, ayilejaña kutachika kuzata mudimu wacheñi. Chumichi chinateli kuyikalila. Atiyileña kuwaha kukalakela amanakwawu. Dimudimu wakeñeliwu nankashi nawa akeñaña kutwalekahu kuzata iwu mudimu. Ilaña, eluka nawu chikuwaha neyi amanakwetu achidi atwansi azata iwu mudimu. Amwekeshaña muchima wowumu neyi wadiña nawaAlevi muIsarela, alejeliwu nawu neyi anashikiji yaaka 50 atela kuleka mudimu wazatileñawu hatabanaka. Awa Alevi adiña namuzañalu hichikweti muloña namudimu wazatileñawuku. Azatileña nañovu jawu jejima kulonda akwashi atwansi. (Kuch. 8:25, 26) Makonu neyi ankoñi añinza anashikiji yaaka 70 alekaña kwendela yipompelu yayivulu, ilaña akwashaña nikukolesha chipompelu mwekalawu.

5. Yumanyi yimunadizili kudi manakwetu Dan nimuhela Katie?

⁵ Talenu chakutalilahu chamanakwetu Dan, wadiña nkoñi wañinza hadi yaaka 23. Chashikijiliyi manakwetu Dan yaaka 70,  yena niñodindi Katie ayihimpili kwikala apayiniya adimena. Ichi azataña ñahi naniwu mudimu wayinkawu? Manakwetu Dan wahosheli nindi ichi adi nanyidimu yayivulu nankashi. Wakamenaña nyidimu yamuchipompelu, kukwasha amanakwetu kulonda ashikihu kwikala ankoñi akuzatila nikukwasha amanakwetu amakwawu kulonda ashimwineña munyisumba nimutuleya. Enu amanakwetu niahela munashinakaji hela chakwila mudi mumudimu wampinji yejima hela nehi, munateli kuzata nañovu kukwasha amanakwetu. Munateli kwila ñahi mwenimu? Ilukenu chidi chihandilu chenu hanoyu mpinji, imikenu yikonkwanyi nawa shenu muchima hayuma yimukutwesha kwila bayi yimukukañanyaku.

6. Chalemenadi kwikala adizoza? Lumbululenu.

⁶ Muntu wadizoza welukaña mwakumina ñovu jindi. (Yish. 11:2) Chineli wadizoza, hafwilaña yuma yikukañanya kuzatayiku. Watwalekañahu kwikala namuzañalu nawa wazataña nañovu. Muntu wadizoza tunateli kumwesekeja namuntu wunakwendesha motoka kwakanduka. Neyi ñendeshi nakukeña kukanduka, watela kuholola magiya mugiya yanyanya kulonda yatweshi kukanduka. Wukwendaña chovu-chovu, ilaña motoka yikutwalekahu kukanduka. Munjila yoyimu, muntu wadizoza welukaña mpinji “yakuholola magiya” kulonda yatwalekihu kukalakala mudimu waYehova.—Fwili. 4:5.

7. Bazilayi wamwekesheli ñahi kudizoza?

⁷ Talenu chuma cheliliyi Bazilayi, wadiña nayaaka 80 hampinji yamutambikiliwu kudi Mwanta Davidi nindi yenzi yashakameña kuchipañu. Hamuloña wakudizoza, Bazilayi wakaanini mutambi wamwanta. Bazilayi welukili nindi wukutwesha wanyi kuzata muloña wawushinakaji, dichi wahosheli nindi mukwenzi weyala Chimihami yayi mwiluña dindi. (2 Sam. 19:35-37) Kufwana Bazilayi, atushinakaji awamayala etejaña anyikwenzi kuzata nyidimu yazatileñawu.

8. Mwanta Davidi wamwekesheli ñahi kudizoza hampinji yakeñeleñayi kutuña tembeli?

⁸ Mwanta Davidi niyena wadiña wadizoza. Wakeñeleña chikupu kutuña itala daYehova. Ilaña chelili Yehova yamuleji nindi mukwenzi Solomoni diyi wukatuña tembeli, Davidi wetejeli mwafuukwiliyi Yehova nawa wakwashili iwu mudimu namuchima windi wejima. (1 Kushi. 17:4; 22:5) Davidi watoñojokeli wanyi nindi yena diyi washikililimu kuzata iwu mudimu muloña wakwila Solomoni “wuchidi kansi kanda apami.” (1 Kushi. 29:1) Davidi welukili nindi tembeli akuyituña muloña Yehova wakiswilileña iwu mudimu, hichikweti muloña nayaaka hela yuma yayivulu yelukayi muntu wunakulombolaku. Kufwana Davidi, nimakonu antu akula dehi atwalekañahu kumukalakela Yehova hela chakwila mudimu wawu wunahimpiki. Nawa eluka nawu Yehova wukuyikiswila atwansi anakuzata nyidimu yazatileñawu.

9. Membala wumu wamuKometi yaMutayi wamwekesheli ñahi nindi wadizoza?

⁹ Nimakonu manakwetu Shigeo wamwekesheli nindi wadizoza. Mu 1976, hadiñayi nayaaka 30, amutondeli kukalakela muKometi yaMutayi. Mu 2004 wekalili nloñeshi waKometi yaMutayi. Chimwahitili mpinji, wamweni nindi wukutwesha wanyi kuzata iwu mudimu muloña wakukula. Walombelelihu nawa watoñojokeli nindi chikuwaha neyi manakwetu wuchidi mukwenzi yekala nloñeshi. Hela chakwila chayinu mpinji hinloñeshi waKometi yaMutayi wanyi,  manakwetu Shigeo natwalekihu kuzatila hamu nawakwawu amembala amuKometi yaMutayi. Neyi chitunamoni muchakutalilahu chaBazilayi, Mwanta Davidi nimanakwetu Shigeo, muntu wadikehesha nawa wadizoza washaña maana hañovu jikwetiwu atwansi bayi hakubula kwiluka nyidimuku. Wadibechaña nawu wanyi, ilaña wayimonaña nindi hiyakwakukalakala hamu nindi.—Yish. 20:29.

10. Antu akula dehi atela kutoñojokañadi hadi atwansi adi muchipompelu?

¹⁰ Antu akula dehi atoñojokaña nawu atwansi hiyawana yakufuma kudi Yehova nawa ayisakililaña hanyidimu yazatañawu. Neyi ñovu jawu hijikuya nakumana, antu akula dehi eluka nawu kudi atwansi adi nañovu anakukeña kuzata nyidimu muchipompelu nawa anakuzata nañovu.

11. Luti 4:13-16 yinalumbululi ñahi yuma yayiwahi yafumañamu neyi chakwila antu akula dehi eteja kuyikwashaku kudi atwansi?

¹¹ Nyawomi himuntu ashimunawu muBayibolu watela kwimbujolawu antu akula dehi wetejeli kumukwashaku kudi kansi. Hakusambila Nyawomi wamulejeli mukuwindi Luti kufunta kudi antaña jindi. Hela chochu, chelili Luti yamukakeli Nyawomi nindi wukufunta nindi kuBetelemi, Nyawomi wetejeli. (Luti 1:7, 8, 18) Nawa chuma cheliliyi chayikwashili wejima wawu. (Tañenu Luti 4:13-16.) Neyi antu akula dehi ekala adizoza akumwimbujolaña Nyawomi.

12. Kapostolu Pawulu wamwekesheli ñahi kusakilila?

¹² Kapostolu Pawulu watiyileña kuwaha chiyamukwashileñaku kudi amanakwindi.  Chakutalilahu, wayisakilili akwaKristu amuFwilipi hayuma yamutemesheleliwu. (Fwili. 4:16) Nawa wasakilili cheñi chamukwashiliwu kudi Timotewu. (Fwili. 2:19-22) Cheñi, Pawulu wamusakilili Nzambi hamuloña wawantu enjili nakumukolesha hampinji yayileñayi kuRoma neyi muntu akasawu. (Yilw. 28:15) Pawulu wadiña muntu wakola nawa wendeleña maluña amalehi kuya nakushimwina nikukolesha yipompelu. Hela chochu, wadiña wadizoza nawa wetejeleña kumukwashaku kudi amanakwindi niahela.

13. Antu akula dehi anateli kumwekesha ñahi nawu asakililaña hakwikala nawatwansi?

¹³ Enu amanakwetu niahela mwakula dehi munateli kumwekesha nenu mwayisakililaña atwansi adi muchipompeli chenu munjila jajivulu. Neyi anakukeña nawu ayikwashiku munsañu jañendelu, kuya nakulanda yuma hela muyuma yikwawu, itejenu. Anukenuña nenu chinakuyikwashawu hinjila yimu munakumwekeshelayi Yehova nindi wayikeña. Mukwikala amabwambu chikupu nawantu anakuyikwasha. Mpinji yejima, yikwashenuña amabwambu jenu kuswina kwakwihi naYehova. Nawa yilejenuña nenu munakutiya kuwaha hakumona atwansi chinakushikahu kuzata nyidimu muchipompelu. Nawa ikalenuña nampinji yakuyilejaku yuma yimunamoni mukuhanda kwenu. Neyi mwilaña mwenimu ‘mukumwekeshaña kusakilila’ kudi Yehova hakuyinka atwansi akokelayi muchipompelu.—Kol. 3:15; Yow. 6:44; 1 Tes. 5:18.

14. Mwanta Davidi wamwekesheli ñahi muchima wakuhana?

¹⁴ Mwanta Davidi wadiña nachilwilu chikwawu chalema chatela kwimbujolañawu antu akula dehi, chilwilu chakuhana. Wahanini mali niyuma yayivulu kulonda akwashi kutuña nachu tembeli. (1 Kushi. 22:11-16; 29:3, 4) Wahanini hela chakwila mwanindi Solomoni diyi wayili mpuhu. Hela chakwila chayinu mpinji hitukweti ñovu yakutuñaku, tunateli kutwalekahu kukwasha iwu mudimu kuhitila mukuhana yawana kwesekeja nahanakumini ñovu jetu. Nawa tunateli kukwasha atwansi kuhitila mukuyilejaku yuma yituneluki hadi yaaka yayivulu.

15. Yawananyi yalema yamudizishiliwu Timotewu kudi Pawulu?

¹⁵ Kutalisha hakuhana toñojokenu hachuma cheliliyi kapostolu Pawulu. Wamusendeli Timotewu mumudimu wawumishonali nawa Pawulu wamudizishili iwu mukwenzi weyala jinjila jakushimwinamu nikutañisha. (Yilw. 16:1-3) Pawulu wamudizishili Timotewu kwikala mukwakushimwina wamuwahi wansañu yayiwahi. (1 Kor. 4:17) Timotewu niyena, wazatishili yuma yamudizishiliwu kudi Pawulu kudizishaku akwawu.

16. Muloñadi manakwetu Shigeo chadizishiliyi antu amakwawu?

¹⁶ Antu akula dehi atoñojokaña wanyi nawu akuleka kuyizatisha, neyi adizisha atwansi nyidimu yazatileñawu muchipompelu. Chakutalilahu, hadi yaaka yayivulu, manakwetu Shigeo itwashimuna, wadizishili amamembala aMukometi yaMutayi achidi akwenzi. Wayidizishili kulonda akwashi mudimu waWanta mwituña mwakalakelañayi. Nawa chashikili mpinji, kwadiña manakwetu wadizishiliwu kuzata mudimu wazatileñayi wakwikala nloñeshi. Manakwetu Shigeo natwalekihu kukalakala neyi Membala waMukometi yaMutayi hadi yaaka kubadika ha 45 nawa natwalekihu kuzatisha yuma yadiziliyi kukwasha amanakwetu atwansi. Amanakwetu  adi neyi manakwetu Shigeo akwashaña antu jaNzambi.

17. Kwesekeja naLuka 6:38, chumanyi chatela kuhanawu antu akula dehi?

¹⁷ Enu amanakwetu niahela mwakula dehi munakumwekesha nenu kumukalakela Yehova nachikuhwelelu nikwikala ashinshika dichuma chachiwahi muchihandilu. Yuma yimwelaña yamwekeshaña nawu chalema nankashi kudiza yishina yamuBayibolu nikuyizatisha muchihandilu chenu. Hadi yaaka yinahitihu, muneluki chimwazatileña kunyima, ilaña muneluki cheñi nenu mwatela kuhimpa kwesekeja nachidi yuma. Ninenu akulumpi munapapatishewi katataka mukweti yuma yayivulu yakwila. Munateli kulejaku antu kumwiluka Yehova chikunayikwashi kwikala namuzañalu muchihandilu chenu. Atwansi akutiya kuwaha neyi muyilejañaku yuma yimweluka niyimunadizi. Neyi ‘muhanaña’ kuhitila mukuzatisha yuma yimunadizi nikulejaku antu, Yehova wukuyikiswila nankashi.—Tañenu Luka 6:38.

18. Akulumpi niatwansi anateli kudikwasha ñahi wumu namukwawu?

¹⁸ Enu akulumpi neyi mudikundaña nawatwansi, mukudikoleshaña wumu namukwawu. (Rom. 1:12) Muntu himuntu wukweti chuma chabula kwikala namukwawu. Akulumpi akweti maana niyuma yayivulu yinadiziwu muchihandilu chawu. Atwansi akweti ñovu. Neyi atwansi niakulumpi azatilaña hamu neyi amabwambu, akuletaña kalemesha hadi Tata yetu wamwiwulu nawa akukolesha chipompelu chejima.