1. Amezir ki nou vinn vie, ki lobzektif nou kapav fixe?

AMEZIR ki nou vinn vie, kitfwa nou per tansion nou nepli itil pou Zeova, parey kouma avan. Mem si nou nepli ena lafors kouma avan, nou kapav servi sazes ek lexperyans ki nou’nn gagne, pou ansegn bann zenn pou zot vinn pli itil dan lorganizasion Zeova ek pou zot aksepte plis responsabilite. Enn frer ki ansien depi plizir lane, dir: “Kan mo ti nepli kapav fer parey kouma avan akoz mo laz, mo ti kontan ki ti ena bann zenn frer kalifie ki ti kapav fer travay-la.”

2. Ki nou pou examine dan sa lartik-la?

² Dan lartik avan, nou ti trouve kouma bann zenn kapav gagn bann bienfe kan zot fer kamarad ar bann Kretien aze. Dan sa lartik-la, nou pou trouve kouma bann kalite kouma limilite, modesti, rekonesans, ek zenerozite kapav ed bann Kretien aze pou travay ansam ar bann zenn Kretien. Kan zot fer sa, lasanble an-antie pou gagn bann benediksion.

3. Dapre Filipien 2:3, 4, ki ete limilite, ek kouma sa kalite-la kapav ed enn Kretien?

³ Bann Kretien aze bizin ena limilite si zot anvi ed bann zenn. Enn kikenn ki ena limilite, li konsider lezot kouma pli siperyer ki li. (Lir Filipien 2:3, 4.) Kan bizin fer enn travay, bann Kretien ki ena limilite konpran ki ena diferan fason fer, ki an-akor avek Labib. Alor, zot pa atann ki tou dimounn fer travay-la parey kouma zot. (Ekle. 7:10) Zot kapav partaz zot lexperyans avek bann zenn. Zot kone ki “sa lemonn la, . . . li pa pou res lontan,” ek ki zot bizin adapte zot ar bann nouvo fason fer.​—1 Kor. 7:31.

4. Kouma bann responsab sirkonskripsion montre ki zot ena mem latitid ki bann Levit?

 ⁴ Bann Kretien aze ki ena limilite, zot rekonet ki amezir ki zot vinn vie, zot nepli kapav fer otan ki avan. Anou pran lexanp nou bann responsab sirkonskripsion. Bann responsab sirkonskripsion ki gagn 70 an, avek limilite zot kit sa servis-la ek zot aksepte enn lot form servis. Sa kapav bien difisil pou zot parski zot kontan servi zot bann frer ek ser. Zot kontan zot servis, ek zot ankor ena dezir pou servi dan sa fason-la. Me zot konpran ki li pli bon ki bann zenn asim sa responsabilite-la. Zot montre ki zot ena mem latitid ki bann Levit dan ansien Izrael, ki ti bizin aret servi dan tabernak kan zot ti gagn 50 an. Lazwa sa bann Levit-la pa ti depann lor privilez ki zot ti ena. Zot ti kontign fer zot best pou Zeova ek zot ti kontign ed bann zenn. (Nonb 8:25, 26) Azordi, kan bann responsab sirkonskripsion gagn 70 an, zot nepli vizit plizir lasanble, me zot enn vre benediksion dan lasanble kot zot al servi.

5. Ki nou kapav aprann ar lexanp Dan ek Katie?

⁵ Anou pran lexanp Dan, ki ti servi kouma responsab sirkonskripsion pandan 23 an. Kan Dan ti gagn 70 an, li ek so madam, Katie, ti al servi kouma pionie spesial. Kouma zot ti adapte zot ar zot nouvo sitiasion? Dan dir ki azordi li pli okipe ki avan! Li ena so bann responsabilite dan lasanble, li ed bann frer pou  ranpli bann kondision pou vinn asistan ministeryel, ek li form bann frer ek ser pou prese dan bann gran lavil ek bann prizon. Nou bann frer ek ser aze, ki zot dan servis aplintan ouswa non, zot kapav fer boukou pou ed lezot. Kouma zot kapav fer sa? Adapte zot ar zot nouvo sitiasion, fixe zot bann nouvo lobzektif, ek konsantre zot lor seki zot kapav fer olie ki zot konsantre zot lor seki zot pa kapav fer.

6. Kifer li inportan ki nou ena modesti, ek donn enn lexanp pou explik sa?

⁶ Enn kikenn ki ena modesti, li rekonet so bann limit. (Prov. 11:2) Li aksepte ki, pli li vinn vie, plis li pou ena bann limit. Akoz sa, li ere ek li kontign travay dir. Nou kapav konpar enn kikenn ki ena modesti ar enn kikenn ki pe roul enn loto lor enn lamonte. Pou ki li kapav fer sa lamonte-la, li pou bizin retrograd so masinn, setadir re-met lor premier ouswa segonn. Li vre ki li pou avans pli dousman, selman li pou kontign avanse. Dan mem fason, enn kikenn ki ena modesti, li kone kan li bizin fer bann sanzman ek ralanti, pou ki li kapav kontign servi Zeova ek ed lezot.​—Fil. 4:5, NW.

7. Kouma Barzilai ti montre ki li ti ena modesti?

⁷ Anou pran lexanp Barzilai. Li ti ena 80 an kan David ti invit li pou form parti dan lakour rwayal. Me avek modesti, Barzilai ti refize. Li ti kone ki li ti ena bann limit akoz so laz, ek li ti propoz David pou servi enn pli zenn zom dan so plas. Sa zom-la ti apel Kimam. (2 Sam. 19:35-37) Parey kouma Barzilai, bann frer aze kontan les bann zenn frer asim bann responsabilite.

8. Kouma Lerwa David ti montre ki li ti ena modesti kan li ti anvi konstrir tanp?

⁸ Lerwa David osi enn bon lexanp konsernan modesti. Li ti vremem anvi aranz enn lakaz pou Zeova. Kan Zeova ti dir li ki se Salomon ki ti pou fer sa travay-la, David ti aksepte desizion Zeova ek li ti soutenir sa proze-la avek tou so leker. (1 Kro. 17:4; 22:5) David pa ti panse ki li ti pli kalifie pou fer sa travay-la parski Salomon ti “zenn ek li pena lexperyans.” (1 Kro. 29:1) David ti kone ki sa proze-la ti pou reisi, parski sa pa ti depann lor laz ouswa lexperyans sa dimounn ki ti pou diriz sa proze-la, me sa ti depann lor benediksion Zeova. Parey kouma David, azordi bann Kretien aze kontign travay dir pou Zeova mem kan zot responsabilite sanze. Anplis, zot kone ki Zeova pou beni travay ki bann zenn fer, travay ki zot zot ti pe fer avan.

9. Kouma enn manb Komite Biro Nasional ti montre modesti?

⁹ Anou get enn lexanp modern konsernan modesti. An 1976, Shigeo ti ena 30 an kan li ti vinn enn manb Komite Biro Nasional, ek an 2004, li ti vinn kordinater sa komite-la. Plitar, li ti realize ki li ti nepli ena lafors kouma avan ek ki li ti pe pran boukou letan pou fer so travay. Li ti priye Zeova konsernan sa sitiasion-la ek li ti reflesi kouma sa ti pou pli bon si enn pli zenn frer ti vinn kordinater. Azordi, Shigeo nepli kordinater Komite Biro Nasional, me li ankor touzour enn manb sa komite-la ek li pe kontign soutenir bann frer sa komite-la. Lexanp Barzilai, Lerwa David, ek Shigeo montre ki enn dimounn ki ena limilite ek modesti, li pa panse ki bann zenn mank lexperyans. Okontrer, li fixe so latansion lor  kapasite ki bann zenn ena. Li konsider bann zenn kouma bann konpagnon travay, pa kouma bann rival.​—Prov. 20:29.

10. Ki latitid bann Kretien aze bizin ena anver bann zenn Kretien?

¹⁰ Bann Kretien aze konsider bann zenn kouma bann kado Zeova ek zot bien rekonesan pou tou bann travay ki bann zenn fer. Amezir ki zot lafors diminie, bann Kretien aze bien rekonesan anver bann zenn parski bann-la dispoze pou asim bann responsabilite dan lasanble.

11. Kouma Rut 4:13-16 montre ki bann Kretien aze gagn bann bienfe kan zot aksepte led bann ki pli zenn?

¹¹ Dan Labib, ena enn zoli lexanp ki montre kouma bann Kretien aze gagn bann bienfe kan zot aksepte led bann ki pli zenn. Sa lexanp-la se Noemi. Apre lamor so garson, Noemi ti ankouraz so belfi Rut pou retourn dan so fami. Me Rut ti refiz kit Noemi, ek li ti al Betleem ansam avek li. Noemi ti bien kontan ki Rut ti al avek li, ek li ti aksepte ki Rut ed li. (Rut 1:7, 8, 18) Ek sa ti enn gran benediksion pou toulede madam! (Lir Rut 4:13-16. *) Bann Kretien aze ki ena limilite, zot swiv lexanp Noemi.

12. Kouma lapot Pol ti montre so rekonesans?

¹² Lapot Pol ti bien rekonesan ki bann  frer ti ed li. Par exanp, li ti remersie bann Kretien dan lasanble Filip pou bann kado ki zot ti avoy li. (Fil. 4:16) Li ti rekonesan anver Timote parski Timote ti ed li. (Fil. 2:19-22) Ek Pol ti remersie Zeova pou bann frer ek ser ki ti ankouraz li kan li ti pe al Rom kouma enn prizonie. (Zist. 28:15) Pol ti enn kikenn ki ti bien aktif, ek li ti vwayaz plizir milye kilomet pou prese ek ankouraz bann frer ek ser. Kanmem sa, li ti ena limilite ek li ti aksepte ki lezot ed li.

13. Kouma bann Kretien aze kapav montre zot rekonesans anver bann zenn?

¹³ Frer ek ser aze, to kapav montre to rekonesans anver bann zenn dan plizir fason. Par exanp, kan bann zenn dispoze pou amenn twa kitpar, pou al fer shopping pou twa, ouswa pou fer lezot kitsoz ki to bizin, to kapav aksepte zot led. Pa bliye ki kan zot ed twa, se enn fason ki Zeova pe montre twa so lamour. Anplis, to kapav vinn zot bon kamarad. To kapav osi ed zot pou vinn pli pros ar Zeova, ek to kapav dir zot kouma to kontan kan to trouv bann zenn pe fer plis pou servi Zeova. Fode pa to ezite pou pas letan avek zot ek rakont zot to bann zoli lexperyans. Kan to fer sa, to pou montre to “rekonesans” anver Zeova pou bann zenn ki Li’nn atir ver Li.​—Kol. 3:15; Zan 6:44; 1 Tes. 5:18.

14. Kouma Lerwa David ti montre ki li ti zenere?

¹⁴ Dan lexanp Lerwa David, nou trouv enn lot kalite inportan ki bann Kretien aze bizin manifeste, setadir zenerozite. David ti donn boukou larzan ek boukou dibien personel pou soutenir konstriksion tanp. (1 Kro. 22:11-16; 29:3, 4) Li ti fer sa, mem si se Salomon ki ti pou gagn pli boukou laglwar ar konstriksion tanp. Si nou nepli ena lafors pou partisip dan bann proze konstriksion, nou kapav soutenir sa bann proze-la par nou bann donasion. Ek nou kapav osi ed bann zenn gras-a lexperyans ki nou’nn gagne pandan plizir lane.

15. Ki bann kado ki ena valer Pol ti donn Timote?

¹⁵ Lapot Pol osi enn bon lexanp konsernan zenerozite. Li ti invit Timote pou akonpagn li dan so travay misioner, ek avek zenerozite, li ti montre Timote kouma pou prese ek ansegne. (Zist. 16:1-3) Gras-a formasion Pol, Timote ti prese ek ansegn bonn nouvel dan enn fason efikas. (1 Kor. 4:17) Apre sa, Timote ti servi seki Pol ti ansegn li pou form lezot.

16. Kifer Shigeo ti form lezot frer?

¹⁶ Azordi, bann Kretien aze form bann zenn pou fer travay ki zot ti pe fer avan, ek zot pa per tansion zot nepli itil dan lasanble. Par exanp, pandan plizir lane, Shigeo, ki nou ti mansione avan, ti form bann manb Komite Biro Nasional ki pli zenn. Li ti fer sa parski li ti anvi soutenir travay Rwayom Bondie dan pei kot li pe servi. Gras-a sa, enn frer ki ti bien forme, ti kapav ranplas li kouma kordinater. Sa fer plis ki 45 an ki Shigeo enn manb Komite Biro Nasional ek li pe kontign servi seki li finn aprann pou ed bann ki pli zenn. Bann frer kouma Shigeo, zot vremem enn benediksion pou bann serviter Bondie!

17. An-akor avek seki Lik 6:38 dir, ki kitsoz bann Kretien aze kapav donn lezot?

¹⁷ Bann frer ek ser aze, zot bann lexanp vivan ki montre ki, pli bon lavi ki kapav ena se servi Zeova avek lafwa ek fidelite. Par zot lexanp, zot montre nou ki li vo lapenn  fer zefor pou aprann bann prinsip Labib ek pou aplik sa bann prinsip-la dan nou lavi. Zot ena lexperyans ek zot kone kouma bann kitsoz ti fer dan lepase, me zot trouve osi ki zot bizin adapte ar bann nouvo sitiasion. Bann Kretien aze ki’nn fek pran batem, zot osi zot ena boukou pou partaze. Mem si zot pa tro lontan dan laverite, zot kapav partaz bann lazwa ki zot inn gagne pou konn Zeova. Bann zenn pou kontan ekout zot bann lexperyans ek bann leson ki zot finn aprann. Si zot pran labitid pou “done,” setadir servi zot lexperyans pou form lezot, Zeova pou donn zot boukou benediksion.​—Lir Lik 6:38.

18. Kouma bann Kretien aze ek bann zenn kapav ed sakenn zot kamarad?

¹⁸ Frer ek ser aze, kan zot vinn pli pros avek bann zenn, zot pou kapav soutenir sakenn zot kamarad. (Rom. 1:12) Ki nou vie ouswa zenn, nou tou nou ena bann kalite ek bann kapasite ki lezot pena. Bann Kretien aze ena sazes ek lexperyans ki zot finn gagne avek letan. Ek bann zenn ena lenerzi ek lafors. Kan bann zenn ek bann Kretien aze travay ansam kouma bann kamarad, zot donn laglwar nou Papa Zeova ek zot enn benediksion pou tou dimounn dan lasanble.