1. ¿Toni uelis tikixtaliskej tikchiuaskej keman timochiujtiuij tixiuejkej?

KEMAN timochiujtiuij tixiuejkej, xa tikmouiliaj maj amo semi ueli tiktekitilikanok Jiova kemej achto tikchiuayaj. Maski xa amo semi tichikaujkejok, uelis tikinpaleuiskej tokniuan akin ayamo xiuejkej ika tein tikmatij uan ika tein ueli tikchiuaj. Nejon kinpaleuis maj okachi tapaleuikan itech inechikol Jiova uan maj ueli kiselikan okseki tekimej. Se tokniuj takat akin miak xiujmejya tayekankej, kijtoj: “Keman nikmachilij ke amo ueliaok nikchiuaya miak taman porin nixiuejya, niktasojkamatik maj moajsinij tokniuan takamej akin ayamo xiuejkej akin ueliskia kichiuaskej tekit tein onkaya”.

2. ¿Toni tikitaskej itech nejin tamachtilis?

² Itech tamachtilis 35, tikitakej ke tokniuan akin ayamo xiuejkej kinpaleuia komo kitemouaj kuali mouikaskej iniuan tokniuan akin xiuejkejya. Itech nejin tamachtilis tikitaskej ke komo tokniuan akin xiuejkejya yolyemankej, kiajsikamatij ke amo nochi ueli kichiuaj, motasojkamatij uan kiuelitaj temakaskej tein kipiaj kinpaleuis maj kuali tekitikan iniuan tokniuan akin ayamo xiuejkej, uan nejon kinpaleuis nochin tokniuan itech nechikol.

3. 1) Kemej kinextia Filipenses 2:3, 4, ¿toni kijtosneki yolyemanilis? 2) ¿Keniuj yolyemanilis kipaleuia se tokniuj?

³ Komo tokniuan akin xiuejkejya kinekij kinpaleuiskej akin ayamo xiuejkej moneki yeskij yolyemankej. Akin yolyemanik kinemilia ke oksekin okachi ueyichiuanimej ke yejua (xikonixtajtolti Filipenses 2:3, 4). Keman tokniuan akin xiuejkejya yolyemankej, kiajsikamatij ke miakpa onkak miak taman kemej  uelis se kichiuas teisa tein amo kitapanauilia tein Biblia kijtoua. Yejua ika amo kichiaj maj nochin kichiuakan teisa kemej yejuan achto kichiuayaj (Ecl. 7:10). Maski kimatij miak taman tein uelis kinnextiliskej oksekin, no kimatij ke “tein panoua itech taltikpak mopatatok” uan ke xa monekis kichiuaskej teisa kemej axkan mochiua (1 Cor. 7:31, TNM).

4. ¿Keniuj tanemiliaj kemej levitas tokniuan akin takalpanouayaj itech nechikolmej?

⁴ Tokniuan akin xiuejkejya akin yolyemankej, kiajsikamatij ke ijkon kemej panouaj xiujmej amo ueli kichiuajok miak taman kemej achto. Kemej neskayot, keman tokniuan akin takalpanouaj itech nechikolmej kiajxitiaj 70 xiujmej, kinmakaj okse tekit. Xa ouij kinkisa amo takalpanoskejok itech nechikolmej porin semi kinyolpaktiaya ijkon kinpaleuiskej tokniuan. Semi kipatiuitayaj kichiuaskej nejon tekit uan kiuelitaskiaj kisentokaskej kichiuaskej, sayoj ke kiajsikamatij ke axkan okachi kuali maj kichiuakan tokniuan takamej akin ayamo xiuejkej. Yejuan tanemiliaj kemej levitas akin monekia kikauaskej tekit tein kipiayaj itech tabernáculo keman kiajxitiayaj 50 xiujmej. Nejon levitas yolpakiaj ika tein yeski tekit tein ueliskia kichiuaskej satepan, uan ika yolpakilis kichiuayaj nochi tein ueliaj uan kinpaleuiayaj akin ayamo xiuejkej katkaj (Núm. 8:25, 26). Itech nejin tonalmej, maski tokniuan akin takalpanouayaj itech nechikolmej amo kichiuajok nejon tekit, semi kinpaleuiaj uan kinyolchikauaj tokniuan itech nechikol kampa yetokej.

5. ¿Toni mitsonmachtia ininneskayo Dan uan Katie?

 ⁵ Maj tikitakan ineskayo Dan, akin 23 xiujmej takalpanoj itech nechikolmej. Keman kiajxitij 70 xiujmej, yejua uan inamik, Katie, kinixtalijkej kemej precursores especiales. ¿Keniuj momachiliaj ika tekit tein axkan kipiaj? Dan kijtoua ke kichiua miak tataman tekimej: kichiua tekit tein kipia itech nechikol, kinpaleuia tokniuan takamej maj ueli mochiuakan tapaleuianij itech nechikol uan kinmachtia oksekin keniuj tanojnotsaskej itech uejueyi altepemej kampa ika miakej panouaj uan itech cárceles. Tokniuantsitsin akin nanxiuejkejya, komo nankitekitilijtokej Jiova miak tonalmej oso amo, uelis semi nankinpaleuiskej oksekin. ¿Keniuj? Ximochikauakan nanyolpakiskej ika tekit tein axkan nankipiaj, xikixtalikan nankichiuaskej okseki taman uan itech xitanemilikan tein kemaj ueli nankichiuaj.

6. ¿Keyej moneki tikajsikamatiskej ke amo nochi ueli tikchiuaj? Xikonijto se neskayot.

⁶ Akin kiajsikamati ke amo nochi ueli kichiua amo mochikaujkauia kichiuas tein amo ueli, uan yejua ika yolpaki uan kisentoka tekiti (Prov. 11:2). Kemej yeskia se taltikpaknenkej akin pankistiuj itech se tepet. Komo kineki ajsis hasta ikuapan tepet, moneki okachi yolik ojtokas. No ijkon, akin kiajsikamati ke amo nochi ueli kichiua kimati kemanian kemej yeskia moneki yas okachi yolik. Nejon kipaleuis maj kisentoka kitekitili Jiova uan maj kisentoka kinpaleui oksekin (Filip. 4:5).

7. ¿Keniuj kinextij Barzilái ke kiajsikamatia ke amo nochi uelia kichiuaya?

⁷ Maj tikitakan tein kichiuak Barzilái, akin kipiaya 80 xiujmej keman tekiuaj David kiyoleuak maj iuan yani ichan uan maj mochiuani semej akin kiyolmajxitiayaj. Barzilái kiajsikamatia ke amo nochi uelia kichiuaya uan yejua ika amo kinekik yas iuan tekiuaj. Kijtoj ke kemej xiuejya katka amo ueliaok kichiuaya miak taman, uan yejua ika kiluij tekiuaj maj kiuikani Kimham, se takat akin ayamo xiuej katka (2 Sam. 19:35-37). Ijkon kemej kichiuak Barzilái, tokniuan takamej akin xiuejkejya ika yolpakilis kinkauiliaj seki tekimej tokniuan takamej akin ayamo xiuejkej.

8. ¿Keniuj kinextij tekiuaj David ke kiajsikamatia ke amo nochi uelia kichiuaya keman kinekia kichijchiuas templo?

⁸ Tekiuaj David no kinextij ke kiajsikamatia ke amo nochi uelia kichiuaya. Keman kinekia kichijchiuilis Jiova se kali, yejuatsin kiluij ke kiixtalijka maj telpoch Salomón kichijchiuiliskia. David kitakamatik uan peuak kichiua miak taman tein tapaleuiskia keman peuaskia tekit (1 Crón. 17:4; 22:5). Amo kinemilij ke yejua kinamikia kichiuas nejon tekit porin Salomón telpochok katka uan ayamo kimatia miak taman (1 Crón. 29:1). David kimatia ke xiujmej tein kipiaskiaj akin kiixyekanaskiaj tekit oso tein kimatiaj kichiuaskej amo yejua tein tapaleuiskia maj kuali kisani tekit, ta kimatia ke kuali kisaskia porin Jiova kintatiochiuijtoya. Ijkon kemej David, tokniuan takamej akin xiuejkejya kisentokaj kitekitiliaj Jiova maski mopatas tekit tein kichiuayaj. Uan kimatij ke Jiova kintatiochiuis tokniuan takamej akin axkan kichiuaj tekimej tein achto yejuan kichiuayaj.

9. ¿Keniuj se tokniuj takat akin monotsa Shigeo kinextij ke kiajsikamati ke amo nochi ueli kichiua?

⁹ Itech nejin tonalmej, se tokniuj takat akin monotsa Shigeo no kinextij ke kiajsikamati ke amo nochi ueli kichiua. Itech xiuit 1976, keman kipiaya 30 xiujmej, kiixtalijkej kemej semej taixyekananij itech se Comité de Sucursal. Itech xiuit 2004, mochiuak taixyekankej itech nejon comité. Keman panokajya seki xiujmej kiitak ke amo semi kipiayaok chikaualis  uan ke amo ijsiujkaok tekitia. Yejua ika kitataujtij Jiova uan itech tanemilij keyej semi tapaleuiskia komo se tokniuj takat akin ayamo xiuej kiixpataskia. Axkan Shigeo kisentoka itech Comité de Sucursal sayoj ke amo yejuaok taixyekankej. Tein kichiuak Barzilái, tekiuaj David uan Shigeo techmachtia ke akin kiajsikamati ke amo nochi ueli kichiua uan yolyemanik kiita tein ueli kichiuaj takamej akin ayamo xiuejkej, amo tein amo ueli kichiuaj. Amo kinemilia ke kiixnamikij, ta kinita kemej akin iniuan tekiti (Prov. 20:29).

10. ¿Keniuj tokniuan akin xiuejkejya kinitaj tokniuan akin ayamo xiuejkej?

¹⁰ Tokniuan akin xiuejkejya kinitaj tokniuan akin ayamo xiuejkej kemej netetayokolilmej tein Jiova kinmakak uan semi kitasojkamatij tein kichiuaj. Kemej amo semi kipiajok chikaualis, kitasojkamatij maj tokniuan akin ayamo xiuejkej uan chikaujkej kinekikan kichiuaskej tekimej tein onkak itech nechikol.

11. ¿Keniuj kinextia Rut 4:13-16 ke akin xiuejkejya kinpaleuia keman mokauaj maj akin ayamo xiuejkej kinpaleuikan?

¹¹ Noemí se kuali neskayot tein moajsi itech Biblia porin keman katka xiuejya kinextij ke motasojkamatia keman kikauak maj se ichpoch kipaleuiani. Noemí yekinika kiluij Rut maj mokepani iniuan ichankauan satepan ke momikilij inamik, akin katka iokichpil Noemí. Sayoj ke keman Rut kiluij ke amo kikauaskia, ta ke iuan yaskia hasta Belén, Noemí mokauak maj kipaleui (Rut 1:7, 8, 18). Uan nejon semi kinpaleuij nochin omen (xikonixtajtolti Rut 4:13-16). Tokniuan akin xiuejkejya akin yolyemankej kichiuaj kemej Noemí.

12. ¿Keniuj kinextij tatitanil Pablo ke motasojkamatia?

¹² Tatitanil Pablo no kitasojkamatik maj tokniuan kipaleuianij. Se tonal kintasojkamatilij  tokniuan akin nemiaj Filipos porin kititanilijkaj seki taman (Filip. 4:16). Uan no, kinextij ke kitasojkamatia maj Timoteo kipaleuiani (Filip. 2:19-22). Uan kitasojkamatilij Dios porin seki tokniuan kiyolchikauatoj keman kiuikayaj Roma kampa kitsakuaskiaj (Hech. 28:15). Pablo kipiaya miak chikaualis: uejka yajka kiteixmatiltito iTajtol Dios uan kinyolchikauato tokniuan itech nechikolmej. Maski ijkon, kikauak maj tokniuan kipaleuianij porin katka yolyemanik.

13. ¿Keniuj uelis kinextiskej tokniuan akin xiuejkejya ke kitasojkamatij tein kichiuaj tokniuan akin ayamo xiuejkej?

¹³ Tokniuantsitsin akin nanxiuejkejya, onkak miak taman kemej uelis nankinextiskej ke nankitasojkamatij tein kichiuaj tokniuan akin ayamo xiuejkej itech namonechikol. Komo namechiluiaj ke komo moneki uelis namechuikaskej kansaika, ke uelis namouan yaskej keman nantakouatiuij oso ke uelis namechpaleuiskej itech okseki taman, xikauakan maj namechpaleuikan. Xikitakan ininnepaleuil kemej se taman kemej Jiova namechnextilia ke namechtasojta. Xa nejon kichiuas peua kuali ximouikakan. Uan no xiktemokan nankinpaleuiskej maj okachi kuali mouikakan iuan Jiova. Xikiniluikan ke semi namechyolpaktia nankiitaskej ke tokniuan akin ayamo xiuejkej itech nechikol mochikaujtokej okachi tapaleuiskej. Uan xikixtalikan iniuan nanmosentiliskej uan nankintapouiskej tein nankipanouanij. Keman nankichiuaskej nejin, nankinextiskej ke nankitasojkamatiliaj Jiova maj moajsikan tokniuan akin ayamo xiuejkej itech nechikol (Col. 3:15; Juan 6:44; 1 Tes. 5:18).

14. ¿Keniuj kinextij tekiuaj David ke kiuelitaya kitemakas tein kipiaya?

¹⁴ Tekiuaj David kiuelitaya kitemakas tein kipiaya. Nejin okse taman tein no moneki kichiuaskej tokniuan akin xiuejkejya. David kitemakak miak tomin uan okseki taman porin satepan kichijchiuaskiaj templo uan kinekia tapaleuis (1 Crón. 22:11-16; 29:3, 4). Tapaleuij maski satepan taltikpakneminij kijtoskiaj ke Salomón kichijchiuak templo. Komo tionxiuejya uan amo ueli tiontapaleuiaok keman mochijchiuaj kalmej kampa tikueyichiuaj Jiova, uelis tikonsentokas tiontapaleuis ika tomin hasta kampa tejuatsin tionuelis. Uan xikonpaleui tokniuan akin ayamo xiuejkej ika nochi tein tionmomachtiani itech xiujmej tein tikontekitiliani Jiova.

15. ¿Toni kimachtij Pablo Timoteo?

¹⁵ Tatitanil Pablo no kiuelitaya kitemakas tein kipiaya. Kiyoleuak telpoch Timoteo maj iuan yani keman tanojnotsato itech okseki altepemej uan kimachtij keniuj kiteixmatiltis iTajtol Dios uan keniuj tamachtis (Hech. 16:1-3). Tein Pablo kimachtij kipaleuij maj kuali kiteixmatiltiani iTajtol Dios uan maj kuali tamachtiani (1 Cor. 4:17). Uan satepan Timoteo no kinmachtij oksekin tein Pablo kimachtijka.

16. ¿Keyej Shigeo kinmachtij oksekin?

¹⁶ Tokniuan takamej akin xiuejkejya amo kinemiliaj ke amo tapaleuiskejok komo kinmachtiaj tokniuan takamej akin ayamo xiuejkej keniuj kichiuaskej tekimej tein yejuan kichiuaj itech nechikol. Kemej neskayot, Shigeo, akin ika titajtojkej itech párrafo 9, kinmachtijtiaya keniuj kichiuaskej tekit okseki tokniuan takamej akin no yetoyaj itech Comité de Sucursal uan ayamo xiuejkej katkaj. Kichiuak nejon porin kinekia tapaleuis maj kisentokani mochiuani tekit itech altepet kampa tapaleuijtok. Nejon semi tapaleuij, porin keman monekik kikauas tekit kemej taixyekankej itech comité, moajsia se tokniuj takat akin ueliskia kiixpatas. Panouaya 45 xiujmej moajsi itech Comité de Sucursal  uan kisentoka kinmachtia tokniuan takamej akin ayamo xiuejkej nochi tein momachtiani itech nejon xiujmej. Tokniuan takamej kemej Shigeo semi tapaleuiaj itech inechikol Dios.

17. ¿Toni uelis temakaskej tokniuan akin xiuejkejya? (Lucas 6:38).

¹⁷ Tokniuantsitsin akin nanxiuejkejya, namejuan nankinextiaj ke nochipa se kitekitilis Jiova uan se takuaujtamatis iuan, yejua tein okachi kuali tein uelis se kichiuas. Nankinextiaj ke amo nenkaj se kiixmatis tein Biblia tamachtia uan se kichiuas. Nankimatij keniuj mochiuaya seki taman itech inechikol Jiova ne uejkauj, sayoj ke no nankiitaj ke moneki nantatakamatiskej keman mopata seki taman. Uan komo sekin yankuixtok namoauijkej, no uelis semi nantapaleuiskej porin uelis nankintapouiskej oksekin keyej semi namechyolpaktia nankiixmatiskej Jiova itech nejin tonalmej. Tokniuan akin ayamo xiuejkej semi kinyolpaktis kikakiskej tein nankipanouanij uan tein nanmomachtianij. Komo nanmomattokej nankinpaleuiskej oksekin ika nochi tein nankimatij, Jiova semi namechtatiochiuis (xikonixtajtolti Lucas 6:38).

18. ¿Keniuj uelis mosenpaleuiskej tokniuan akin xiuejkejya uan akin ayamo xiuejkej?

¹⁸ Komo tokniuan akin xiuejkejya kitemouaj kuali mouikaskej iniuan tokniuan akin ayamo xiuejkej, uelis mosenpaleuiskej (Rom. 1:12). Akin xiuejkej kimatijya uan uelijya miak taman uan akin ayamo xiuejkej kipiaj chikaualis, uan nochi nejon semi kipia ipatiuj. Keman akin ayamo xiuejkej uan akin xiuejkejya kuali mouikaj uan sentekitij kiueyitaliaj toTajtsin Jiova uan semi tapaleuiaj itech nechikol.