1. ¿Tlen uelis timokuayejyekoskej tikchiuaskej ijkuak yitipeuaj tikpiaj miak xiuitl?

 IJKUAK yitipeuaj tikpiaj miak xiuitl, xamo timomojtiskej porque timokuayejyekoskej ayakmo uelis okachi kuali tiktekichiuiliskej Jehová ken achto. Yitikmatij ayakmo tiyetoskej tichikauakej pero tlen yitikmatij uan tlen otimomachtijkej uelis tikinmititiskej telpokamej uan ichpokamej para okachi kuali ma kitekichiuilikan Jehová. Se tokni tlen yikipia miak xiuitl uan tlayekanki okijto: “Ijkuak yonikpiaya miak xiuitl ayakmo ueli onikchiuaya miak tlamantli. Onimotlasojkamatki porque katej telpokamej tlen uelis kichiuaskiaj tlen ne ayakmo ueli nikchiua”.

2. ¿Tlen timomachtiskej?

² Itech okse tlamachtil otikitakej akinmej ayamo kipiaj miak xiuitl kinpaleuia tla mouikaj iuan tokniuan tlen yikipiaj miak xiuitl. Itech nin tlamachtil tikitaskej tokniuan tlen yikipiaj miak xiuitl tla yolyamankej uan kajsikamatij ayakmo nochi ueli kichiuaj, kimatij motlasojkamatiskej uan kitemakaj tlen kipiaj. Non kichiuas kuali ma kitechiuilikan Jehová telpokamej uan ichpokamej uan nochtin tokniuan tlen inmiuan monechikouaj.

3. (1) Ijkon ken kijtoua Filipenses 2:3, 4, ¿ken uelis tikteititiskej tiyolyamankej? (2) ¿Ken techpaleuia tla tiyolyamankej?

³ Tokniuan tlen yikipiaj miak xiuitl moneki yetoskej yolyamankej tla kineki kinpaleuiskej telpokamej uan ichpokamej. Akin yolyamanki kajsikamati oksekimej okachi kuali itlaj kichiuaj (xiktlajtolti Filipenses 2:3, 4). Tokniuan tlen ijkon kipiaj inyelis kajsikamatij tlen yejuan  okichiuayaj okse tlamantli uelis mochiuas. Ik non, amo kinmiluiaj oksekimej tokniuan ma kichiuakan ijkon ken yejuan okichiuayaj (Ecl. 7:10). Maski kimatij miak tlamantli tlen uelis kinmachtiskej oksekimej tokniuan, kimatij “tlen onka itech nin tlaltikpak mopatlati”, ik non, kajsikamatij axkan moneki tlapaleuiskej okse tlamantli (1 Cor. 7:31, TNM).

4. ¿Ken kichiuaj tlayekankej itech circuito ijkon ken levitas?

⁴ Tokniuan tlen yikipiaj miak xiuitl uan yolyamankej kajsikamatij ayakmo ueli kichiuaj miak tlamantli ken achto okichiuayaj. Ma tikitakan tlen kinpanoua tlayekankej itech circuito. Ijkuak kajxitiaj 70 xiuitl kinmakaj okse tekitl, xamo axkan kitaj oui porque okinpaktiaya yetoskej tlayekankej itech circuito. Ika nochi inyolo okinpaktiaya kichiuaskej non tekitl uan axkan ok kinekiskiaj ijkon kichiuaskej pero kajsikamatij axkan moneki kichiuaskej telpokamej. Yejuan mokuayejyekouaj ken omokuayejyekouayaj levitas. Ijkuak okajxitiayaj 50 xiuitl ayakmo otlapaleuiayaj itech tabernáculo. Yejuan oyolpakiayaj maski san tlen tlamantli okinmiluiayaj ma kichiuakan uan okinpaleuiayaj telpokamej (Núm. 8:25, 26). Axkan maski miakej tokniuan tlen okatkaj tlayekankej itech circuito ayakmo kichiuaj non tekitl, kinpaleuiaj uan kinyolchikauaj tokniuan tlen inmiuan monechikouaj.

5. ¿Tlen techmachtia tlen okichijkej tokniuan Dan uan Katie?

 ⁵ Ma tikitakan tlen okipanok se tokni tlen itoka Dan, ye okatka tlayekanki itech circuito 23 xiuitl. Ijkuak okajxiti 70 xiuitl, ye uan isiua tlen itoka Katie okinmiluijkej yetoskiaj precursores especiales. ¿Ken katej axkan tokniuan? Dan okijto axkan okachi kipiaj miak tekitl kanin monechikoua. Kinpaleuia tokniuan ma mochiuakan siervos ministeriales uan kinpaleuia oksekimej ma tetlapouikan kanin miakej kintsakuaj uan kanin miakej panouaj. Tokniuan tlen yinankipiaj miak xiuitl tla ialtepe Jehová onamechmakak se tekitl noso amo ok uelis nankinpaleuiskej oksekimej tokniuan. San ximokuayejyekokan tlen uelis nankichiuaskej.

6. ¿Tleka tiyetoskej tiixtlamatkej tla tikajsikamatij ayakmo nochi ueli tikchiuaj? Xikyekijto.

⁶ Akin amo moueyineki kajsikamati ayakmo nochi uelis kichiuas (Prov. 11:2). Amo mokuayejyekoua tlen ayakmo uelis kichiuas, san kichiua tlen kema ueli uan yolpaki. Akin kajsikamati ayakmo nochi ueli kichiua, yetoskia ken ijkuak ikaj tlejkoua itech se tepetl, tla kineki ipan ajsiti moneki yolik yas. Noijki ijkon akin kajsikamati ayakmo uelis kichiuas miak tlamantli kimati moneki “yas yolik” para kitekichiuilijtos Jehová uan ok kinpaleuijtos tokniuan (Filip. 4:5).

7. ¿Ken okiteititi Barzilái okajsikamatiaya ayakmo nochi uelis kichiuaskia?

⁷ Ma tikitakan tlen okipanok se tlakatl tlen omotokayotiaya Barzilái. Ijkuak okipiaya 80 xiuitl tekiua David okiyole ma tlapaleui itech iTekiuajkayo. Okajsikamatki ken okipiaya miak xiuitl ayakmo uelis kichiuaskia miak tlamantli. Ik non, okijto Kimham akin okatka telpochtli uelis ipatka tlapaleuiskia (2 Sam. 19:35-37). Ijkon ken Barzilái tokniuan tlen yikipiaj miak xiuitl kinkauiliaj telpokamej okachi ma tlapaleuikan itech tlanechikol.

8. ¿Ken okiteititi David okajsikamatiaya ayakmo uelis kichiuaskia miak tlamantli?

⁸ Tekiua David okiteititi okajsikamatiaya ayakmo uelis kichiuaskia miak tlamantli. Ye okinekiaya kichijchiuas kali kanin kiueyichiuaskiaj Jehová. Pero ijkuak okilui kichijchiuaskia telpochtli Salomón, David okikak tlen ye okilui uan okipaleui Salomón (1 Crón. 17:4; 22:5). David amo omokuayejyeko ye okachi okimatiaya kichijchiuas non kali uan Salomón amo porque okatka telpochtli (1 Crón. 29:1). Okimatiaya kuali kichijchiuaskia Salomón porque Jehová tlateochiuaskia uan amo porque kichijchiuaskiaj telpokamej noso akinmej okimatiayaj kichiuaskej miak tlamantli. Ijkon ken David, tokniuan tlen yikipiaj miak xiuitl ok tlapaleuiaj maski ayakmo ueli kichiuaj tlen achto okichiuayaj uan kimatij Jehová kinteochiuas.

9. ¿Ken okiteititi se tokni okajsikamatiaya tlen ayakmo uelis kichiuaskia?

⁹ Ma tikitakan tlen okipanok se tokni tlen itoka Shigeo. Itech 1976 ijkuak okipiaya 30 xiuitl okiluijkej ma tlapaleui iuan tokniuan tlen otlayekanayaj itech se kali Betel. Itech 2004 okiluijkej ma kinyekana nonmej tlayekankej. Satepan okitak ayakmo okatka chikauak uan itlaj ayakmo totoka okichiuaya, okitlatlaujti Jehová uan okilui tlen okimachiliaya. Uan omokuayejyeko okachi tlapaleuiskia se telpochtli tla kichiuaskia non tekitl tlen ye okichiuaya. Axkan ayakmo kinyekana  akinmej tlayekanaj itech Betel pero ok inmiuan poui uan ok tlapaleuia. Tlen okichijkej Barzilái, tekiua David uan tokni Shigeo, techmachtia tla tiyolyamankej uan tikajsikamatij tlen ayakmo ueli tikchiuaj, amo timokuayejyekoskej telpokamej amo uelis kichiuaskej miak tlamantli uan ma timokuayejyekokan tlen ueli kichiuaj. Ijkon tikinmitaskej ken tokniuan tlen techpaleuia uan amo tikinnexikolitaskej (Prov. 20:29).

10. ¿Ken kinmitaj tokniuan tlen yikipiaj miak xiuitl telpokamej tlen inmiuan monechikouaj?

¹⁰ Tokniuan tlen yikipiaj miak xiuitl kinmitaj telpokamej uan ichpokamej ken se tetliokolil tlen Jehová okinmakak. Uan motlasojkamatij porque sapanoua tlapaleuiaj. Yejuan kajsikamatij ayakmo chikauakej pero kinpatioitaj telpokamej porque chikauakej uan ueli kinpaleuiaj tokniuan tlen inmiuan monechikouaj.

11. Ijkon ken kijtoua Rut 4:13-16, ¿ken kinpaleuia tokniuan tlen yikipiaj miak xiuitl ijkuak kintlasojkamatiliaj telpokamej uan ichpokamej?

¹¹ Biblia kijtoua Noemí yokipiaya miak xiuitl, ye okimatiaya motlasojkamatis uan okikauili se ichpochtli ma kipaleui. Ijkuak oixpoliuik ikone Noemí okilui isiuamon tlen omotokayotiaya Rut ma mokopa iuan ifamilia. Ijkuak Rut okilui miak uelta iuan yaskia hasta Belén Noemí okikauili iuan ma uia (Rut 1:7, 8, 18). Uan ijkon ome sapanoua omopaleuijkej (xiktlajtolti Rut 4:13-16). Tokniuan tlen yikipiaj miak xiuitl uan yolyamankej kichiuaj ijkon ken Noemí.

12. ¿Ken okiteititi apóstol Pablo okimatiaya motlasojkamatis?

¹² Apóstol Pablo omotlasojkamatki  porque okipaleuijkej. Se tonal okintlasojkamatili tokniuan tlen ochantiayaj Filipos porque okipaleuijkej (Filip. 4:16). Noijki okitlasojkamatili Timoteo porque ye noijki okipaleui (Filip. 2:19-22). Uan okitlasojkamatili toTajtsin Dios porque tokniuan okiyolchikauatoj ijkuak soldados okiuikayaj Roma (Hech. 28:15). Pablo okatka chikauak uan uejka onejnenki para tetlapouiskia uan kinyolchikauaskia tokniuan pero amo omoueyineki uan okinkauili ma kipaleuikan.

13. ¿Tokniuan tlen yikipiaj miak xiuitl ken uelis kiteititiskej kintlasojkamatiliaj telpokamej uan ichpokamej?

¹³ Tokniuan tlen yinankipiaj miak xiuitl namejuan uelis nankiteititiskej nanmotlasojkamatij tlen kichiuaj telpokamej uan ichpokamej. Tla yejuan kinekij namechuikaskej ijkuak nantlakouatiuij uan nankichiuaskej okseki tlamantli, xikinkauilikan ma namechpaleuikan. Xikajsikamatikan Jehová ijkon kiteititia namechtlasojtla. Xamo noijki ijkon nanpeuaskej inmiuan nanmouikaskej. Noijki xikinpaleuikan ma mouikakan iuan Jehová. Xikinmiluikan nanyolpakij porque nankitaj mochijchikauaj kinpaleuiskej tokniuan tlen inmiuan monechikouaj. Ximajxilikan uan xikintlapouikan ken yonankitekichiuilijkej Jehová. Ijkuak ijkon nankichiuaskej nankititiskej nankitlasojkamatiliaj Jehová porque katej telpokamej uan ichpokamej kanin nanmonechikouaj (Col. 3:15; Juan 6:44; 1 Tes. 5:18).

14. ¿Ken okiteititi tekiua David okipaktiaya kitemakas tlen okipiaya?

¹⁴ Tokniuan tlen yinankipiaj miak xiuitl namejuan noijki uelis nankichiuaskej ken David, ye okipaktiaya kitemakas tlen okipiaya, okitemakak miak tlamantli para oksekimej kichijchiuaskiaj teokali (1 Crón. 22:11-16; 29:3, 4). David okitemakak miak tlamantli maski miakej kijtoskiaj Salomón okichijchi teokali. Tla tejuatsin yitikpiaj miak xiuitl uan ayakmo ueli titlapaleuia kanin kinchijchiuaj kalmej para monechikoskej tokniuan, uelis titlapaleuis ika motomin. Xikintlapoui telpokamej ken yimiak xiuitl yotikchi miak tlamantli para okachi kuali tiktekichiuilis Jehová.

15. ¿Ken okipaleui Pablo Timoteo?

¹⁵ Apóstol Pablo noijki okipaktiaya kitemakas tlen okipiaya. Okiyole Timoteo iuan ma tetlapouiti itech okseki altepemej uan okititi ken omonekiaya tetlapouis uan tlamachtis (Hech. 16:1-3). Ik non, Timoteo kuali okichi non tekitl (1 Cor. 4:17). Tlen Pablo okimachti Timoteo okipaleui ma kinmachti oksekimej.

16. ¿Tleka tokni Shigeo okinmachti oksekimej?

¹⁶ Miakej tokniuan tlen yikipiaj miak xiuitl amo mokuayejyekouaj ayakmo tlapaleuiskej tla kinmachtiaj telpokamej uan kinkauiliaj ma kichiuakan tlen achto yejuan okichiuayaj. Ma tikitakan ken kichiuaj, tokni Shigeo tlen itech yotimotlapouijkej itech párrafo 9, miak xiuitl okinpaleui telpokamej tlen tlapaleuiaj iuan akinmej tlayekanaj itech kali Betel. Ijkon otlapaleui para oksekimej ma kitekichiuilikan Jehová. Ijkuak ye ayakmo okinyekanaya tlayekankej yokatka okse tokni tlen uelis kichiuaskia non tekitl. Shigeo okinmachti tokniuan ken yotlapaleui 45 xiuitl iuan tlayekankej tlen katej ompa Betel. Tokniuan tlen kipiaj inyelis ijkon ken tokni Shigeo se tetliokolil tlen Jehová techmaka.

17. Ijkon ken kijtoua Lucas 6:38, ¿tokniuan tlen yikipiaj miak xiuitl ken uelis kinpaleuiskej telpokamej uan ichpokamej?

 ¹⁷ Tokniuan tlen yinankipiaj miak xiuitl namejuan yonankiteititijkej okachi kuali tla nochipa tiktlakamatij Jehová. Noijki yonankiteititijkej okachi kuali tiyetoskej tla timomachtiaj uan tikchiuaj tlen kijtouaj principios bíblicos. Yiuejkika onanmomachtijkej ken omonekiaya nankichiuaskej seki tlamantli. Pero axkan nankajsikamatij ialtepe Jehová kijtoua moneki nankichiuaskej okse tlamantli uan namejuan ijkon nankichiuaj. Tla yikin onanmoapolaktijkej, uelis nankinmiluiskej oksekimej tleka sapanoua nanyolpakij onankixmatkej Jehová axkan ijkuak yinankipiaj miak xiuitl. Telpokamej uan ichpokamej yolpakiskej ijkuak non kikakiskej uan noijki ijkuak kikakiskej tlen onanmechmati tlen yonamechpanok. Tla nankinmachtiaj nochi tlen namejuan yinankimatij, Jehová namechteochiuas miak (xiktlajtolti Lucas 6:38).

18. ¿Ken uelis mopaleuiskej tokniuan tlen yikipiaj miak xiuitl uan akinmej amo?

¹⁸ Tokniuan tlen yikipiaj miak xiuitl tla motlapouiaj iuan telpokamej uan ichpokamej, moyolchikauaskej (Rom. 1:12). Yomomachtijkej miak xiuitl, ik non, kimatij miak tlamantli uan telpokamej uan ichpokamej chikauakej. Ik non, ijkuak inmiuan mopaleuiaj san sekan kiueyichiuaj Jehová. Uan noijki kinpaleuiaj tokniuan tlen inmiuan monechikouaj.