1. Kuyini esingakwenza nxa sesikhulile?

NXA iminyaka ilokhu itshova singakhathazeka ngokuthi asisenelisi ukwenza okunengi ekukhonzeni uJehova njengalapho sisesebatsha. Lanxa singaselawo amandla njengalapho sisesebatsha singasebenzisa ulwazi lenhlakanipho esiyithole eminyakeni eminengi sikhonza uJehova ukuthi sincede abasesebatsha benze okunengi ekumkhonzeni. Omunye umfowethu oselesikhathi eside engumdala wathi: “Ngathi sengingasenelisi ukwenza okunengi ngenxa yokuguga kwangithokozisa ukwazi ukuthi kwakulabafowethu abasesebatsha ababezaqhubeka ngomsebenzi.”

2. Sizaxoxa ngani esihlokweni lesi?

² Esihlokweni esidlulileyo sixoxe ngokuthi abatsha bayancedakala nxa besiba ngabangane balabo asebekhulile. Esihlokweni lesi sizaxoxa ngokuthi ukuthobeka, ukuzehlisa, ukuba ngababongayo kanye lokuba ngabaphanayo kungabanceda njani asebekhulile nxa besebenza ndawonye labasesebatsha, okuzanceda ibandla lonke.

3. Ngokwalokho okutshiwo kuFiliphi 2:3, 4, kutshoni ukuthobeka futhi kungamnceda njani umKhristu?

³ Asebekhulile kumele bathobeke nxa befuna ukuncedisa abasesebatsha. Umuntu othobekileyo ubona abanye bengcono kulaye. (Bala uFiliphi 2:3, 4.) Asebekhulile abathobekileyo bayakwazi ukuthi izikhathi ezinengi umsebenzi othile ungenziwa ngendlela ezitshiyeneyo ezisebenzayo njalo ezingaphikisani lalokho okutshiwo liBhayibhili. Abakhangelelanga  ukuthi abantu bonke benze izinto ngendlela ezazisenziwa ngayo kudala. (UmTshu. 7:10) Lanxa belolwazi olunengi abangalusebenzisa ukunceda abatsha, bayananzelela ukuthi “umumo womhlaba lo uyantshintsha” lokuthi kungadingeka bafunde izindlela ezintsha zokwenza izinto.—1 Khor. 7:31.

4. Ababonisi beziqinti bawalingisela njani amaLevi?

⁴ Asebekhulile abathobekileyo bayananzelela ukuthi abasenelisi ukwenza izinto ababezenza kudala. Ngokwesibonelo, cabanga ngababonisi beziqinti esilabo. Nxa sebeleminyaka engu-70 bayacelwa ukuthi benze eminye imisebenzi yenkonzo. Lokhu kungaba nzima. Babekukholisa ukuncedisa abafowabo labodadewabo. Babewuthanda umsebenzi wabo futhi isifiso sokuqhubeka bewenza silokhu sivutha ezinhliziyweni zabo. Kodwa bayazwisisa ukuthi abafowethu abasesebatsha yibo abangawenza ngcono umsebenzi. Benza njengamaLevi ngesikhathi sama-Israyeli ayemiswa ukwenza imisebenzi okwakukhangelelwe ukuthi ayenze ethabanikeli eseleminyaka engu-50. AmaLevi lawo asekhulile ayethokoza kungelani lomsebenzi ayewuphiwa. Ayekhuthele esenza lokho ayesenelisa ukukwenza njalo encedisa abasesebatsha. (Nani. 8:25, 26) Lamuhla ababonisi beziqinti bathi bengafikisa iminyaka engu-70 bame ukuvakatshela amabandla. Lanxa kunjalo baluncedo kakhulu emabandleni abakuwo.

5. Ufundani kuDan loKatie?

 ⁵ Ake sixoxe ngoDan owayengumbonisi wesiqinti okweminyaka engu-23. Wathi efikisa iminyaka engu-70, yena lomkakhe uKatie bacelwa ukuthi babe ngamaphayona aqakathekileyo. Kubahambela njani emsebenzini omutsha asebewenza? UDan uthi khathesi uselokunengi kokwenza kulakuqala. Wenza imisebenzi yebandla, uncedisa abafowethu ukuthi balalamele ukuba zinceku ezikhonzayo njalo uqeqetsha abanye ukuthi batshumayele endaweni eziphithizelayo lasemajele. Lina eselikhulile lingabanceda kakhulu abanye kungelani lokuthi lisenkonzweni yesikhathi sonke loba hatshi. Lokhu lingakwenza ngokufunda ukujayela izimo ezintsha, ngokuhlela izinto elingazenza njalo ligxile kulokho elenelisa ukukwenza kulokuzihlupha ngalokho elingasenelisi ukukwenza.

6. Kunceda ngani ukuzehlisa? Nika umzekeliso.

⁶ Umuntu ozehlisayo uyavuma ukuthi kulezinto angenelisi ukuzenza. Kazithwalisi nzima ngezinto lezo. Lokhu kuzakwenza ahlale ethokoza njalo ekhuthele emsebenzini awenzayo. Singafanisa umuntu ozehlisayo lomuntu otshova ibhayisikili emqansweni. Umuntu lowo kasoze aqhubeke etshova ngesiqubu abehamba ngaso. Isiqubu singehla kodwa uyabe elokhu esiyaphambili. Umuntu ozehlisayo laye uyakwazi nxa sekumele atshintshe futhi ehlise isiqubu ukuze aqhubeke ekhonza uJehova njalo encedisa abanye.—Flp. 4:5.

7. UBhazilayi watshengisa njani ukuthi uyazehlisa?

⁷ Cabanga ngesibonelo sikaBhazilayi owayeleminyaka engu-80 ngesikhathi iNkosi uDavida imcela ukuthi azokuba ngomunye wabeluleki bakhe. UBhazilayi wayezehlisa yikho wala. Wayekwazi ukuthi kulutshwana ayengakwenza njengoba wayesekhulile yikho wacela ukuthi kuhambe uKhimihami owayesesemutsha. (2 Sam. 19:35-37) Abafowethu asebekhulile labo bazimisele ukutshiyela abasesebatsha imisebenzi.

8. INkosi uDavida yatshengisa njani ukuthi iyazehlisa?

⁸ INkosi uDavida layo yatshengisa ukuthi iyazehlisa sibili. UDavida wayelesifiso sokwakhela uJehova ithempeli kodwa wathi esetshelwe nguJehova ukuthi umsebenzi lowo wawuzakwenziwa nguSolomoni owayesesemutsha wakwamukela lokho njalo wenza konke ayengakwenza elungiselela ukwakhiwa kwethempeli. (1 ImiLan. 17:4; 22:5) UDavida kazange acabange ukuthi nguye owayengawenza ngcono umsebenzi lo njengoba uSolomoni ‘wayesesengumfana njalo esesemutsha.’ (1 ImiLan. 29:1) UDavida wayekwazi ukuthi okwakuzakwenza umsebenzi uphumelele yisibusiso sikaJehova hatshi ubudala kumbe ulwazi lwalabo abakhokhelayo. Lamuhla asebekhulile balingisela uDavida ngokuqhubeka bekhuthele ekukhonzeni uJehova lanxa imisebenzi yabo isitshintshile. Bayakwazi ukuthi uJehova uzababusisa abatsha asebesenza imisebenzi bona ababeyenza.

9. Umzalwane olilunga leKhomithi Yegatsha watshengisa njani ukuthi uyazehlisa?

⁹ Umfowethu uShigeo laye watshengisa ukuthi uyazehlisa. Ngo-1976 eleminyaka engu-30, wabekwa ukuthi abe lilunga leKhomithi Yegatsha. Ngo-2004 waba ngumhleli weKhomithi Yegatsha. Ngokuhamba kwesikhathi wananzelela ukuthi wayengaselamandla ayelawo kudala lokuthi kwasekumthatha isikhathi ukwenza imisebenzi yakhe. Wathandaza ngendaba le wasecabanga ukuthi kunganceda ngani ukutshiyela umfowethu osesemutsha imisebenzi yakhe. Lanxa uShigeo  engasenguye mhleli weKhomithi Yegatsha ulokhu elilunga layo njalo usebenza kuhle labanye bakhe. Okwenziwa nguBhazilayi, iNkosi uDavida loShigeo kusitshengise ukuthi umuntu othobekileyo lozehlisayo kazihluphi ngalokho abasesebatsha abangakwaziyo kodwa uqakathekisa abenelisa ukukwenza. Kababoni njengabantu abancintisana laye kodwa ubabona njengabantu asebenza labo.—Zaga. 20:29.

10. Asebekhulile bababona njani abatsha abasebandleni?

¹⁰ Asebekhulile babona abatsha beyizipho ezivela kuJehova njalo bayabonga ngalokho abakwenzayo. Bona abaselamandla kodwa bayabonga ngokuba labasesebatsha abalamandla, abazimiseleyo njalo abenelisa ukwenza imisebenzi ebandleni lokulincedisa.

11. URuthe 4:13-16 utshengisa njani ukuthi asebekhulile bayancedakala nxa besamukela uncedo abaluphiwa ngabasesebatsha?

¹¹ UNawomi okukhulunywa ngaye eBhayibhilini ngomunye osekhulile owavuma ukuncediswa ngosesemutsha. UNawomi watshela umalukazana wakhe uRuthe owayesefelwe ngumkakhe ukuthi abuyele kibo. Kodwa uRuthe wala ukumtshiya njalo wahamba laye eBhethilehema. Lokhu kwamthokozisa uNawomi futhi walwamukela uncedo ayeluphiwa nguRuthe. (Ruthe. 1:7, 8, 18) Bobabili bancedakala kakhulu! (Bala uRuthe 4:13-16.) Asebekhulile abathobekileyo bayamlingisela uNawomi.

12. Umphostoli uPhawuli watshengisa njani ukuthi ungumuntu obongayo?

¹² Umphostoli uPhawuli wayebonga abazalwane ngoncedo ababemnika lona. Ngokwesibonelo, wabonga amaKhristu eFiliphi ngenxa yezipho ayemthumele zona. (Flp. 4: 16) Watshengisa ukuthi uyabonga ngalokho uThimothi ayemenzele khona. (Flp. 2:19-22) Kanti njalo wabonga uNkulunkulu ngenxa yalabo ababuya bezomkhuthaza ngesikhathi eyisibotshwa esiya eRoma. (ImiSeb. 28:15) Lanxa wayeyindoda ekhutheleyo eyahamba izinkulungwane zamakhilomitha itshumayela njalo iqinisa amabandla, wathobeka wavuma ukuncediswa ngabafowabo labodadewabo.

13. Asebekhulile bangatshengisa njani ukuthi bayabonga ngalokho abakwenzelwa ngabasesebatsha?

¹³ Lina eselikhulile lingatshengisa ngendlela ezitshiyeneyo ukuthi liyabonga ngalokho elikwenzelwa ngabasesebatsha abasemabandleni enu. Vumani nxa befuna ukulincedisa ngokulithwala ngemota, ngokulithengela izinto kumbe ngokulincedisa ngokunye elikudingayo. Khumbulani ukuthi lokho abalenzela khona ngeyinye indlela uJehova atshengisa ngayo ukuthi uyalithanda. Lingacina selingabangane abaseduze kakhulu lalabo abalincedisayo. Hlalani lizama ukuncedisa abangane benu abasesebatsha ukuthi basondele kuJehova. Batsheleni ukuthi kulithokozisa kangakanani ukubabona besenza okunengi ebandleni. Zinikeni isikhathi sokuba labo njalo libaxoxele lokho elihlangane lakho empilweni. Nxa lingenza njalo liyabe litshengisa uJehova “ukuthi lingabantu ababongayo” ngenxa yabatsha abadonsele ebandleni.—Kol. 3:15; Joh. 6:44; 1 Thes. 5:18.

14. INkosi uDavida yatshengisa njani ukuthi iyaphana?

¹⁴ Asebekhulile bangaphinda balingisele iNkosi uDavida ngokuba ngabaphanayo. UDavida wasekela umsebenzi wokwakhiwa kwethempeli ngokunikela ngemali enengi langezinye izinto eziligugu. (1 ImiLan. 22:11-16; 29:3, 4) Wenza konke lokho lanxa udumo lwaluzakuya kuSolomoni indodana yakhe. Nxa singaselamandla okuncedisa emisebenzini yokwakha eyenziwa yinhlanganiso singaqhubeka sisekela imisebenzi le ngokunikela ngemali kusiya ngalokho esikwenelisayo. Kanti njalo singancedisa abasesebatsha ngolwazi esilutholileyo eminyakeni eminengi sikhonza uJehova.

15. Umphostoli uPhawuli watshengisa njani ukuthi uyaphana?

¹⁵ Cabanga ngalokho okwenziwa ngumphostoli uPhawuli. Wacela uThimothi ukuthi ahambe laye emsebenzini wobunali njalo watshengisa ukuthi uyaphana ngokufundisa ijaha leli indlela ayetshumayela layefundisa ngayo. (ImiSeb. 16:1-3) Lokho kwenza uThimothi waphumelela emsebenzini wokutshumayela izindaba ezinhle lowokufundisa. (1 Khor. 4:17) UThimothi wasebenzisa lokho ayekufundiswe nguPhawuli ukuthi laye aqeqetshe abanye.

16. Kungani uShigeo wayeqeqetsha abanye?

¹⁶ Lamuhla asebekhulile abacabangi ukuthi bayabe bengaselancedo nxa bengaqeqetsha abasesebatsha ukuthi benze imisebenzi ababeyenza ebandleni. Ngokwesibonelo, okweminyaka ethile uShigeo esike sakhuluma ngaye waqeqetsha amalunga eKhomithi Yegatsha asesematsha. Wenza lokho ukuze umsebenzi woMbuso elizweni akulo uqhubekele phambili. Yikho kwathi sekumele ame ukuba ngumhleli weKhomithi Yegatsha kwasekulomzalwane owayeqeqetshwe kuhle owayengathatha indawo yakhe. UShigeo useleminyaka edlula 45 elilunga leKhomithi Yegatsha futhi uqhubeka esebenzisa lokho akufundayo ukuncedisa abafowethu abasesebatsha. Abazalwane abanjengoShigeo bayisibusiso sibili ebantwini bakaNkulunkulu!

17. Asebekhulile bangabanikani abanye? (ULukha 6:38)

 ¹⁷ Lina bafowethu labodadewethu eselikhulile liyatshengisa sibili ukuthi ukukhonza uJehova ulokholo njalo uqotho yindlela engcono kakhulu yokuphila. Isibonelo senu sitshengisa ukuthi kuyanceda ukubala iBhayibhili lokusebenzisa lokho elikutshoyo. Liyakwazi ukuthi izinto zazisenziwa njani kudala kodwa liyabona ukuthi kumele lijayele indlela ezintsha zokwenza izinto. Lani eselikhulile elisanda kubhabhathizwa linganceda abanye ngendlela ezinengi. Lingabatshela ngentokozo elibe layo ngokufunda ngoJehova selibadala. Abasesebatsha bazakholisa ukuzwa ngalokho okwenzakale ezimpilweni zenu lalokho elikufundileyo. Nxa ‘lingahlala lisipha abanye’ ulwazi elilalo uJehova uzalibusisa kakhulu.—Bala uLukha 6:38.

18. Abatsha lasebekhulile bangancedisana njani?

¹⁸ Nxa lina eselikhulile lingaba ngabangane labasesebatsha lizasekelana. (Rom. 1:12) Izandla ziyagezana. Asebekhulile balenhlakanipho lolwazi abaluthole eminyakeni eminengi bekhonza uJehova. Abatsha bona balamandla. Nxa abatsha lasebekhulile besebenza ndawonye bemanyene benza uBaba wethu osezulwini adunyiswe njalo bayisibusiso kubo bonke ebandleni.