1. Patinonga teciita vasharuka, tinodikana kuva no cido co kuitenyi?

PATINONGA tecikura tingatanga kurangarira kuti Jehovha aazotishandisizve inga zvaaita kare. Izvokadi kuti wari aticinazve simba rotainga naro pakutanga. Asi nguva iyi yakatiita kuti tive no uzivi no kukwanisa kuzwisisa zviro. Ngo kudaro, itusu tingashandisa uzivi uwu kuti tibeserevo majaha kuti akwanise kuitavo mabasa amweni. Hama imweni inoshanda inga mukuru yakati: “Pandakazwisisa kuti andicaikwanisazve kuita zviro inga manera ondaiita kare, ndakadakara maningi ngo kuziva kuti mu ungano mainga no majaha akawanda aizokwanisa kuita basa rondaiita.”

2. Tinozovonenyi pa musoro uno?

² Pa musoro wakaperaya takavona kuti ngenyi zvaushoni maningi majaha ave no ushamwari waushoni no hama no hambzaji jaavasharuka. Pa musoro uwu, tinozovona mugariro murongomuna jinodikana kukhombijwa ngo vasharuka. Mugariro jondhojo nga iji: Kujidodokesa, kuva mundhu anotendera zvaari, kuva anobongesera no kukova. Mugariro iji jinozobesera vasharuka kuti vashande pamwepo no majaha no vasikane. Izvi zvinozobesera ungano yese kamare.

3. Mukuzwirana no Vafiripi 2:3, 4, zvinonangenyi kujidodokesa? Hama kana hambzaji yaamusharuka ingakhombijisa kudini kujidodokesa?

³ Kuti vasharuka vabesere majaha no vasikane, ivona vanodikana kujidodokesa. Mundhu anojidodokesa ndi wiya anovona vamweni inga vakuru kupinda iyena. (Verenganyi Vafiripi 2:3, 4.) Vasharuka vangakhombija mugariro uwu mu njira jakasiyana-siyana. Inga muezaniso, mabasa mazinji anoitwa mu ungano angaitwa mu njira jakasiyana-siyana, njira jese iji jinozwirana no zvinonanga Bhaibheri i jinoshanda ushoni. Vasharuka vanojidodokesa avaimiri kuti vandhu vese vaite mabasa mu njira yo vaiita kareko. (Mucumaeri 7:10) Pikija  kuti vano zivo yakawanda kuti vakovane no majaha no vasikane, vasharuka vanojidodokesa vanoziva kuti “zviri kuitika mu nyika ino zviri kucinja.” Ngo iyo ndava, kangaije zvingadikana kuti ivona vajije zviro zvipsa.—1 VaKorinte 7:31.

4. Vavonereri vo ndharaundha vanotatijisa kudini mugariro wakatojana no wo varevhi?

⁴ Vasharuka vanojidodokesa vanoziva kuti pavanonga vecikura, kangaije avazokwanisi kuita zvovaiita kare. Inga muezaniso, vavonereri vedu vo ndharaundha, pavanova no makumanomwe o makore vanokokwa kuti vaende koita mabasa amweni akasiyana. Kuno vaya vakaita cinjo iyi kangaije vangatovona kuti zvinonesa maningi. Ngokuti ivona vaidakara maningi ngo kushandira hama javo. Kuda kwavo kuvhakacira ungano kwakavanga maningi mu mwoyo mwavo. Pikija zvakadaro, ivona vanozwisisa kuti basa iri rinodikana kuitwa ngo hama jiciri majaha. Hama iji jinotatija mugariro wakaezana no wakakhombijwa ngo Varevhi mu Iziraeri yo kare. Varevhi pavaiita makumashanu o makore ivona vaidikana kuima kushanda mu tabherinakeri. Asi mudakaro wo Varevhi ava aucaivha pa basa rovaiita. Mukusiyana, ivona vaibatikana pa kuita mabasa ovaikwanisa no kuita zvese zvaivaikwanisa kuti vabesere majaha. (Bziverengo 8:25, 26) Izvi ndizvona zviri kuitikavo kuna vaya vakasiya kushanda inga vavonereri vo ndharaundha. Pikija kuti ivona avacavhakaciri no kuvangisa ungano zinji, ivona vanovangisira kuti vabesere ungano yovari kushandiraro.

5. Ngozvapi zvamajija ngo muezaniso wa hama Dhani na hambzaji Katia?

 ⁵ Vonanyi muezaniso wa hama Dhani, ivona vakashanda inga muvonereri wo ndharaundha ko makumaviri na matatu o makore. Hama Dhani povakava no makumanomwe o makore, ivona no mukaji wavo Katia, vakagajwa kuti vashande inga mapiyona anosisira. Ivona vakaitenyi kuti vave no mudakaro pa basa rovakagajwari? Hama Dhani vakananga kuti ivona vakabatikana maningi kupinda kare. Ivona vanoita mabasa ovakagajwa mu ungano, vanobesera hama kuti jive vabeseri vo ungano, vanojijisa vamweni kuti vacumaere mu ndau jakazara vandhu no kucumaera vandhu vari mu kadheya. Imwimwi hama jaavasharuka, azvinenyi dangani muri kushanda mu nguva yakazara kana kuti haiwa, mungaita zvizinji kuti mubesere vamweni. Mungazviitisa kudini? Ejanyi kurovejana no mugariro wamunawo, gajanyi zvido zvamunoda kukwanirisa no kubatikana pa zviya zvamunokwanisa kuita kuciripi zvamucikakwanisi.

6. Ngenyi zvaushoni kuva mundhu anotendera zvaari? Ezanisiranyi.

⁶ Mundhu anotendera zvaari ndi wiya anoziva panogumira simba rake. (Mazwi Akangwara 11:2) Ngo kuva kwake mundhu anotendera zvaari, iyena aaveteveri kuita zvizinji kupinda zvaanokwanisa. Inga muviyo, iyena anoramba wakadakara no kubudirira. Kuva mundhu anotendera zvaari kungaezaniswa no mundhu ari kuvhutha karu pa dundhu. Kuti akwanise kukhwira pa dundhuro iyena angadikana kucinja magiya. Cimwenizve, iyena angadikana kuifambisa padoko padoko, asi anozoenderera mberi no hwendo. Ngo maitiro ondhoo, mundhu anotendera zvaari anodikana kuziva nguva yaanodikana “kuita cinjo” kuti aenderere mberi ecibudirira mu basa ra Jehovha.—Vafiripi 4:5.

7. Bharzirai wakakhombijisa kudini kuti wainga mundhu anotendera zvaari?

⁷ Amborangariranyi muezaniso wa Bharzirai. Paainga no makumasere o makore iyena wakakokwa ndi Mambo Dhavhidhi kuti aende koshanda pa banje ra mambo. Ngo kuva kwake mundhu anotendera zvaari, Bharzirai wakaramba mukoka wa mambo. Iyena wakazwisisa kuti ngo ndava yo mupira wake aacaizokwanisa kuita zvimweni. Ngo kudaro, Bharzirai wakakumbira kuti Kimaa, uwo wainga mujaha aende pa ndau yake. (2 Samueli 19:35-37) Inga zvakaitwa ndi Bharzirai, hama jaavasharuka jinodakara maningi ngo kupa majaha mabasa okuita.

8. Mambo Dhavhidhi wakakhombijisa kudini kuva mundhu anotendera zvaari paaida kuvaka themberi?

⁸ Mambo Dhavhidhi wakakhombijavo muezaniso wakanaka wo kuva mundhu anotendera zvaari. Ciro cimwe caaida maningi, cainga co kuvakira themberi kuna Jehovha. Asi Jehovha wainga wakamuvhunja kuti basa iri ro kuvaka raizoitwa ndi mwana wake Soromona. Dhavhidhi wakatendera zvakanangwari ndi Jehovha, perapo wakaita zvese zvaaikwanisa kuti abesere basa iri ro kuvaka. (1 Kronike 17:4; 22:5) Davhidhi aazivi kurangarira kuti ndiyena waizokwanisa ushoni kuita basa iri, zvecivoneka kuti mwana wake Soromona wainga “mudoko” no acina uzivi hwakawanda. (1 Kronike 29:1) Dhavhidhi waiziva kuti basa iri ro kuvaka raizobudirira basi ngo makomborero a Jehovha kuciripi ngo mupira kana ngo kuziva kwa vaya vari kutungamirira basero. Mukutevejera Dhavhidhi, nyamasi uno hama jaavasharuka jinoenderera mberi jecivangisira pikija pajinocinjwa basa ravaiita. Ivona vanoziva kuti Jehovha anokomborera majaha ari kuita basa ravaiita kareko.

9. Hama imwe yaishanda inga umwe wo vo Komisau yo Firiari yakakhombijisa kudini kuva mundhu anotedera zvaari?

 ⁹ Muezaniso wo mazuva ano wo mundhu wakakhombija mugariro wo kutendera zvaari ngo wa hama Serjho. Mu gore ro 1976, povainga no makumatatu o makore ivona vakagajwa kuti vave umwe anoshanda pa Komisau yo Firiari. Mu gore ro 2004 ivona vakagajwa kuti vashande inga murongi wo Komisau yo Firiari. Pakufamba ko nguva ivona vakazwisisa kuti avacaengepizve no simba rovainga naro kareko, ipovaiita basa ravo avacaikasikazve inga zvovaiita kare. Ngo kudaro, hama Serjho vakaita mukumbiro ngo pamusoro pazvo, vakavona kuti zvainga zvakanaka kuti hama imweni iciri mujaha igajwe kuti iite mabasa ovaiitaya. Wari hama Serjho avaripi kushanda inga murongi, asi vari kwenderera mberi vecishanda inga umwe wo Komisau yo Firiari. Inga zvotavona pa muezaniso wa Bharzirai, Mambo Dhavhidhi na hama Serjho, vandhu vanojidodokesa no vanotendera zvavari avasotesesi uzivi uno majaha asi vanosotesesa kuvangisira kwavanoita. Ivona avapsaki kuphikizana no majaha aya, asi vanovavona inga vashandi doni.—Mazwi Akangwara 20:29.

10. Vasharuka vanodikana kuvona kudini majaha mu ungano?

¹⁰ Vasharuka vanovona majaha inga zvipo zvinovha kuna Jehovha. Ivona vanobongesera maningi ngo zvese zvavanoita mu sangano rake. Simba ravo parinopunguka padoko ngo padoko, ivona vanodakara ngo kuziva kuti mu ungano muno majaha ano simba no kuzvipira pa kuita basa riri rese rinodikana.

11. Rute 4:13-16, inokhombijisa kudini kuti zvaushoni kubongesera besero ro majaha?

¹¹ Mu Bhaibheri Naomi wakava muezaniso waushoni wo musharuka wakakhombija  kubongesera. Iyena wakatendera besero ro nyamwana yake Rute, yainga mudoko maningi kupinda iyena. Pakutanga Naomi wakavhunja Rute kuti ahwirire ku nyika yake. Asi Rute paakananga kuti anoda basi kwenda na Naomi ku Bheterehema, iyena wakatendera besero ra Rute. (Rute 1:7, 8, 18) Aya akava makomborero makuru maningi kuno vanakaji ava! (Verenganyi Rute 4:13-16.) Vasharuka vanojidodokesa vanotevejera muezaniso wa Naomi.

12. Mupostori Pauro wakakhombijisa kudini kuva mundhu anobongesera?

¹² Mupostori Pauro waibongesera maningi ngo besero raaipuwa. Inga muezaniso, iyena wakabongesera maningi hama jo ku Firipo ngo zvipo zvovakamutumira. (Vafiripi 4:16) Iyena wakabongeseravo ngo besero raakaashira kuvha ka Timoti. (Vafiripi 2:19-22) Pauro wakabongesera maningi Mwari ngo kuvangiswa ngo hama paainga ecisungwa kwenda Roma. (Mabasa o Vapostori 28:15) Pauro wainga mundhu ano simba wakaita hwendo ko makiromita akawanda kuti acumaire no kuvangisa hama. Pikija zvakadaro, iyena aacaijikuja no kujivona inga kuti aadikani kuashira besero ro hama no hambzaji jake.

13. Vaya vaavasharuka vangabongesera kudini majaha?

¹³ Kudari maamusharuka, imwimwi mungakwanisa kubongesera majaha ari mu ungano mwenyu ngo njira jakasiyana-siyana. Inga muezaniso, vamweni vavo vangatomubesera ngo kumupa bhureya, komutengera zviro kana kutoita zviro zvimweni kuti vamubesere. Ngo kudaro, tenderanyi besero ravo. Vonanyi besero rondhoro inga citatijo co rudo hwa Jehovha kwamuri. Izvo zvingamuita kuti muve no ushamwari hwakavanga no mundhu wamubeseraro. Nguva jese, beseranyi shamwari jenyu kuti jive no ushamwari hwakavanga na Jehovha. Vavhunjenyi kuti imwimwi munodakara maningi ngo kuvona majaha veciita zvizinji mu ungano. Kudari zvecikwanisika vavhunjenyi zvakamuitikira mu upenyu. Mukaita izvi, munozova ‘mundhu anobonga’ Jehovha ngo majaha ari mu ungano.—Vakorose 3:15; Johani 6:44; 1 Vatesaronika 5:18.

14. Mambo Dhavhidhi wakakhombijisa kudini kuti wainga mundhu anokova?

¹⁴ Muezaniso wa Mambo Dhavhidhi unokhombija mugariro umweni unosisira unodikana kuva no vasharuka, kukova. Kuti abesere kuvakwa ko themberi, Dhavhidhi wakapa mare no zviro zvimweni zvakawandisisa kuti abesere basa iri. (1 Kronike 22:11-16; 29:3, 4) Iyena wakaita izvi pikija ecizviziva kuti themberi iyi yaizovakwa ndi mwana wake Soromona. Mu nguva jedu jino, zvingaita kuti itusu aticina simba kuti tibesere kuvakwa ko nyumba jinoshandiswa ngo sangano ra Jehovha. Pikija zvakadaro, itusu tingabesera pa mabasa aya ngo kuita mupiro, mukuzwirana no mugariro jedu. Cimwenizve, tingatovhunja majaha zvotakajija pa mabasa ese aya pa makore akapinda.

15. Ngozvapi zviro zvinosisira zvakajijisa mupostori Pauro kuna Timoti?

¹⁵ Tecibhuya ngo pamusoro po kukova, vonanyi basi muezaniso wakasiiwa ndi mupostori Pauro. Iyena wakakoka Timoti kuti vashande vese mu basa ro umisiyonario. Ngo kukova kwese, Pauro wakajijisa Timoti manera aaicumaera no kujijisa. (Mabasa o Vapostori 16:1-3) Kujijisa kwakaitari Pauro, kwakaita kuti Timoti ave mucumaeri waushoni wo masoko akanaka no mujijisi. (1 VaKorinte 4:17) Timoti wakashandisa zvaakajijiswari ndi Pauro kuti abesere vamweni.

16. Ngenyi hama Serjho vakajijisa vamweni?

¹⁶ Vasharuka nyamasi uno avarangariri kuti ivona avazosisiri mu ungano kudari vakajijisa  majaha kuti vaite mabasa amweni. Inga muezaniso, hama Serjho vanangwaya pakutanga vakapeja makore akawanda vecijijisa hama jaigajwa kuti jishande pa Komisau yo Firiari. Ivona vakaita izvi ngokuti vaizviziva kuti zvaizobesera basa ro Umambo mu nyika yo vaishandiraro. Inga muviyo, poyakaguma nguva yo kuti ivona avacaikwanisazve kushanda inga murongi wo Firiari, painga paano hama yakanasa kujijiswa kuti iite basa rondhoro. Hama Serjho vari kwenderera mberi vecivhunja majaha zvovakajija pa makore anokwana kuita makumarongomuna na mashanu vecishanda inga umwe wo Komisau yo Firiari. Hama jakadari inga hama iyi i makomborero ku vandhu va Mwari.

17. Mukuzwirana na Ruka 6:38, vasharuka vangapa cinyi majaha?

¹⁷ Imwimwi hama no hambzaji jaavasharuka munonasa kukhombija kamare kuti upenyu unodakajisa maningi patinoshandira Jehovha no rutendo hwese no takagondeka. Muezaniso wenyu unokhombija kuti zvinosisira maningi kushandisa ndhungamiriro jo Bhaibheri mu upenyu hwedu. Imwimwi munonasa kuziva manera zviro zvaiitwa kare, asi munovonavo kuti munodikana kuita zviro ngo manera mapsa. Pikija imwimwi vasharuka makabhabhatijwari wari mungaitavo zvakawanda. Imwimwi mungavhunja majaha mudakaro wamunawo ngo kuziva Jehovha. Majaha anozodakara maningi ngo kuziva zvomakajija mu upenyu. Kudari ‘mukapa’ vamweni no kuvavhunja zvakamuitikira, munozoashira makomborero akawanda maningi.—Verenganyi Ruka 6:38.

18. Majaha no vasharuka vangabesana kudini?

¹⁸ Kudari majaha no vasharuka vakava no ushamwari ivona vanozokwanisa kubesana. (Varoma 1:12) Majaha ano zviro zvokuti vasharuka avana i vasharuka vanavo zviro zvokuti majaha aana. Inga muezaniso, vasharuka vano uzivi no zviro zvakavaitikira mu upenyu hwavo, kuveni majaha ano simba. Majaha no vasharuka pavanoshanda vese mu ungano ivona vanokuja Baba wedu vano rudo vo kudenga, vovazve makomborero ku hama no hambzaji jese mu ungano.