1. Yoolakelela taani yaphaama nnaphwanelaahu otikitherya vaavaa nnuuluvalaahu?

VAAVAA nnuuluvalaahu akhweya nnamukhala awoova wi haniweryaka opaka sincipale ntakhara Yehova hiihaa ntoko neerelaahu nri amiravo. Naamwi nihirino ikuru ntoko naaryaahuno nri amiravo, nnanwerya opharihela miruku ni mavyakelo yaawo nihusenryaahu wi naahusihe amiravo ophariheleya mmarehereryo a Yehova ni waakhela mirici mikina. Mutokweene omalinhe elukuluku yincipale ooloca, “Vaavaa koonnaaka wi nkaawerya opaka sincipale ntoko keerelaaka nthowa na iyaakha saka, kaahithamalela vancipale woona wi yaakhalavo anna oophwanelela yaawo yaari amiravo wi ephareke muteko yoola.”

2. Tiheeni nnahaalaahu othokororya mmwaha yoola?

² Mmwaha ovirale noothokororya ti mwawiihai anna yaawo ari amiravo eneeraaya ephure vaavaa anapakaaya onthamwene ni anna awuuluvala. Mmwaha yoola, nnahaala woona ti mwawiihai mikhalelo ntoko wiiyeviha, ophimelela, othamalela, ni ovaha inahaalaaya waakhaviherya awuuluvala olapa vamoha ni amiravo, yeerihaka wi muloko okhale wawiiwanana.

3. Mwawiiwanana ni Filipi 2:3, 4, wiiyeviha tiheeni, nave oni waakhaviherye hai Akristu?

³ Anna awuuluvala anaphwanela okhala awiiyeviha wakhala wi annachuna waakhaviherya amiravo. Muchu awiiyeviha onnawoona akina okhala oompwaha. (Mwaalakhanye Filipi 2:3, 4.) Awuuluvala anooniherya mukhalelo yoola anniiwexexa wi muchu onanwerya opaka echu ekina mmikhalelo soohiyanahiyana wakhala wi iho sinniiwanana ni yeeyo Piipiliya onaloceiye nave tho sinnaphariheleya muteko. Mwawiihiiha,  awo hanaweherya wi muchu ori oothene apakeke ichu mmukhalelo yeeraaya khalai. (Ekle. 7:10) Wakhala wi anachuna waaleela yaweereya yoochuneya amiravo amutano, awo anaphwanela osuwela wi “mukhalelo wa elapo yeela onnatorokeya” nave akhweya onamuchuneya ohuserya weera ichu mmikhalelo mivyaani.—1 Kor. 7:31, TNM.

4. Ti mwawiihai ooweherya a ekulucu anooniheryaaya mukhalelo woolikana ni wa Alevi?

⁴ Awuuluvala yaawo ari awiiyeviha annasuwela wi vaavaa anuuluvalaaya, heweryaka opaka sincipale ntoko yeerelaaya. Ntoko yootakiherya, muthokororye vooloca sa ooweherya ahu a ikulucu. Vaavaa anaakhwanihaaya iyaakha 70, awo annavekiwa wi yapake murici mukina woohiyana. Nla nnanwerya okhala nikacamiho. Awo yaanasiveliwa vancipale waakhaviherya annaya. Ola waari murici yoowo waasivela vancipale, nave annachuna vancipale ophariheliwa mmuteko yoola. Nyenya anniiwexexa wi ti yaphaama wi anna yaawo eri amiravo ephariheliwe mmuteko yoola. Awo annooniherya mukhalelo woolikana ni Alevi a mu elukuluku ya Aisarayeli, yaawo yaahiya orumeela mu tapernaakulu yaakhwaniha iyaakha 50. Alevi yaala awuuluvala yaanahakalala moohipwacha murici taani yaavahiwaaya. Awo yaanapaka ichu soothene yaaweryaaya mwamvai, yaakhaviheryaka amiravo. (Nam. 8:25, 26) Olelo, vaavaa ooweherya a ekulucu anaakhwanihaaya iyaakha 70, awo annamaala oxekurya miloko  mincipale, nyenya annavaha nikhaviheryo ntokweene ni nlipiho mmiloko seiho anarumeelaayawo.

5. Tiheeni munahuseryaanyu orweela wa yootakiherya etikitheryiwe ni Dan vamoha Katie?

⁵ Muthokororye yootakiherya ya Dan, yoowo aarumeela ntoko ooweherya a ekulucu mu iyaakha 23. Vaavaa Dan aakhwaninheiye iyaakha 70, owo ni amwaariye, Katie, yaahithanliwa wi yaarumeele ntoko mapiyoneero a vameekhaaya. Ti mwawihai awo anapuhaaya murici aya muvyaani? Dan ooloca wi vano onnakhala ooweiwa opwaha khalai! Owo onnakhapelela mirici sawe mmulokoni, onnaakhaviherya anna wi ephwanelele okhala arummwa oorumeela, nave onnaavyakiha akina wi ewerye olaleerya ipooma itokotoko ni mukariposo. Anna awuuluvala, moohipwacha waakhanle wi eri mmuteko wa elukuluku yoothene naari hooye, ananwerya waakhaviherya akina. Mwawiihai? Muhuserye osiveliwano mikhalelo sanyu mivyaani, mutikitherye soolakelela ivyaani, nave mutikitheryeye mwa yeeyo munaweryaanyu opaka ohiya mwa yeeyo muhinaweryaanyu opaka.

6. Ntakhara heeni ti yamiruku okhala oophimelela? Mphwanaphwanihe.

⁶ Muchu oophimelela onnasuwela okotakota wawe. (Masi. 11:2) Nthowa nawi toophimelela owo hanaweherya sincipale wa yoowo mukhateiye opwaha seiho onaweryeiye opaka. Ntoko yookhumelela, owo onnakhala oohakalala nave onnatitelela opaka yeeyo onaweryeiye. Muchu oophimelela nnanwerya omulikanyiha ni muchu oneeciha moota mu nipuro nookacamiha. Mulipa aweeciha onaphwanela ovukula ochimaka wa moota wi awerye weeca mu nipuro noothitimana. Mweeparipari, owo onahaala weecihaka vakhaani vakhaani nyenya ahihin’ye weeciha. Moolikana, muchu oophimelela onnasuwela elukuluku ya opaka matorokelo ni weeraka ichu vakhaani vakhaani wi atitelele omurumeela Yehova ni waakhaviherya akina.—Fil. 4:5.

7. Ti mwawiihai Parsilayi oonihenryeiye ophimelela?

⁷ Moone yootakiherya ya Parsilayi, yoowo aarino iyaakha 80 vaavaa Mwene Tavite anwompeiye wi apake makupa a emusi awe. Ophimelela wa Parsilayi waamweeriha okhooca yoovaha ya mwene. Asuwelaka okotakota wawe nthowa na iyaakha sawe, Parsilayi aaveka wi mmiravo Kimehami aye mu nipuro nawe. (2 Sam. 19:35-37) Ntoko Parsilayi, anna awuuluvala annahakalala waavaha amiravo ikari sa orummwa.

8. Ti mwawiihai Mwene Tavite oonihenryeiye ophimelela vooloca sa otekiwa wa empa ya Muluku?

⁸ Mwene Tavite tho yootakiherya yaphaama ya okhala oophimelela. Ni murima awe woothene owo aanachuna oteka empa ya Yehova. Nyenya vaavaa Yehova aamuleenleiye wi ekari yeela yaahaala okhala ya mwanawe Solomoni, Tavite aaheemererya yoolakelela ya Yehova nave aahikhaviherya muteko yoola ni murima awe woothene. (1 Math. 17:4; 22:5) Tavite huupuwenle wi Solomoni haari oophwanelela oteka empa ya Muluku, woona wi owo aari ‘mmiravo nave haakhovelenle ophara muteko.’ (1 Math. 29:1) Tavite aanasuwela wi okhumelela phaama mmuteko yoola waahaala oweryeya ni mareeliho a Yehova, ohiya nthowa na iyaakha naari mavyakelo a yaale yaahoolela. Emutakiheryaka Tavite, anna awuuluvala olelo annatitelela wiilipixerya, moohipwacha otorokeya wa mirici saya. Nave awo annasuwela wi Yehova onahaala waareeliha anaamiravo yaawo anapaka miteko seiho awo yaapakaaya.

9. Ti mwawiihai munna mmoha a Nikhuuru na Efiliyale oonihenryeiye ophimelela?

 ⁹ Yootakiherya emoha ya mmahiku ahu vooloca sa okhala oophimelela ti ya munna awiichaniwa Shigeo. Mu 1976, vaavaa aareiyeno iyaakha 30, owo aathanliwa orumeela mu Nikhuuru na Efiliyale. Mu 2004 owo aahikhala muhooleli a Nikhuuru na Efiliyale. Ohoolo waya owo aahoona wi haarino ikuru nave haahaala owerya waakhwaniherya muteko awe. Owo aahivekela vooloca sa yeeyo nave aahuupuwelela mukhalelo waahaalaaya okhala waphaama omuthanla munna yoowo ori mmiravo wi akhale muhooleli. Naamwi ahaari muhooleli, Shigeo aahititelela orumeela ntoko mukhaviheryi a Nikhuuru na Efiliyale. Ntoko noonnaahu mu sootakiherya sa Parsilayi, Mwene Tavite, ni Shigeo, muchu awiiyeviha ni oophimelela hanatikitheryeya pahiru mu ohikhalano mavyakelo wa amiravo, nyenya mu ikuru saya. Owo hanawoona awo ntoko amwiicani, nyenya anamuteko akhwaawe.—Masi. 20:29.

10. Ti mwawiihai anna awuuluvala anaphwanelaaya owoonaka amiravo mmulokoni?

¹⁰ Anna awuuluvala anawoona amiravo ntoko samahala soorweela wa Yehova seiho anaphwanelaaya othamalela. Vaavaa ikuru saya sinavukuwaaya, anna awuuluvala annathamalela owoona amiravo yaawo arino ikuru echunaka ophara muteko ni orumeela mmulokoni.

11. Ti mwawiihai Ruthi 4:13-16 onooniheryeiye wi awuuluvala annaphura vaavaa aneemereryaaya nikhaviheryo na amiravo?

¹¹ Mpiipiliyani, Nowemi yootakiherya yaphaama ya awuuluvala yoowo aathamalela ni weemererya nikhaviheryo noorweela wa mmiravo. Vaavaa mwanawe aakhwileiye owo aahimuceenyerya pwiyamwana awe Ruthi wi akookele wa amusi awe. Nyenya vaavaa Ruthi aakhonceiye omuhiya Nowemi akookelaka  o Petelehemu, owo aaheemererya nikhaviheryo na Ruthi. (Rut. 1:7, 8, 18) Nave nla naari nreeliho wa ooweeli! (Mwaalakhanye Ruthi 4:13-16.) Wiiyeviha onahaala waaceenyerya awuuluvala ochariha yootakiherya ya Nowemi.

12. Ti mwawiihai murummwa Paulo oonihenryeiye othamalela wawe?

¹² Murummwa Paulo aanathamalela nikhaviheryo nenlo aavahiweiye. Ntoko yootakiherya, owo aahaathamalela Akristu o Filipi wa samahala soomwiilini seiho yaamurumihenlaaya. (Fil. 4:16) Owo aahooniherya othamalela wa nikhaviheryo nenlo Timóteo aamvanheiye. (Fil. 2:19-22) Nave Paulo aahimuthamala Muluku nthowa na yaale yaarwiile omulipiha vaavaa owo aakeriheweiye o Roma ntoko mulipa oophariwa. (Saw. 28:15) Paulo aahikhalano ikuru nave aaneeca mikwaha soorakama ayaaka olaleerya ni olipiha miloko. Naamwi hiiha, owo aari awiiyeviha nave aaneemererya nikhaviheryo na anna ni arokora awe.

13. Ti mwawiihai anna awuuluvala eneeraaya yooniherye othamalela ntakhara amiravo?

¹³ Awuuluvala, ananwerya wooniherya othamalela wa amiravo mmuloko aya mmikhalelo soohiyanahiyana. Wakhala wi awo annachuna wookhaviheryaani moorweela wa woovahaani poleya, woothumelaani ichu, naari soothowa ikina soomwiilini, muthamalele ni mweemererye nikhaviheryo naya. Muupuwele wi nikhaviheryo naya yawooniherya ya osivela wa Yehova ntakhara nyuwaano. Munanwerya okhalano onthamwene woolipa ni yaawo anookhaviheryaani. Ilukuluku soothene, mwaakhaviherye asinthamwene anyu yaawo ari amiravo okhalano onthamwene woolipa ni Yehova, nave mwaaleele mukhalelo muryaanyu oohakalala owoona amiravo epakaka sincipale wi ekhaviherye muloko. Nave mmaliheke elukuluku yincipale mwaaleelaka saweereya sa okumi anyu. Wakhala wi munneerano yeela munahaala wooniherya wi ‘munnamuthamalela’ Yehova ntakhara amiravo yaawo aaruuhaleiye mmulokoni.—Kol. 3:15; Yoh. 6:44; 1 Tes. 5:18.

14. Ti mwawiihai Mwene Tavite oonihenryeiye mahala?

¹⁴ Ninnaphwanya mu yootakiherya ya Mwene Tavite mukhalelo mukina woochuneya yoowo anna awuuluvala anaphwanelaaya wooniherya—mahala. Owo aahivaha ikhorowa sincipale wi akhaviherye otekiwa wa empa ya Muluku. (1 Math. 22:11-16; 29:3, 4) Owo aaheerano yeela naamwi asuwelaka wi empa eyo yaahaala wiichaniwaka empa ya Solomoni. Waakhanle wi hinni niwerye okhaviherya mmuteko wa oteka mmarehereryo a Yehova, nnanwerya otitelela okhaviherya miteko seiha moorweela wa sooveleela sahu mwawiiwanana ni mikhalelo sahu. Nave nnanwerya waakhaviherya anna yaawo ari amiravo wi ephure orweela wa saweereya naaryaahuno moovira wa iyaakha.

15. Samahala taani soochuneya murummwa Paulo aamvanheiye Timóteo?

¹⁵ Muupuwele yootakiherya ya wooniherya mahala etikitheryiwe ni murummwa Paulo. Owo aahinwopa Timóteo wi yaalape vamoha mmuteko woomisiyonaario, nave Paulo mwa mahala aahimuhusiha owo mukhalelo wa olaleerya ni ohusiha. (Saw. 16:1-3) Paulo aahimuvyakiha Timóteo okhala mulaleeryi ni muhusiha a michaka saphaama. (1 Kor. 4:17) Voocharela, Timóteo aahipharihela mahusiho a Paulo wi aavyakihe akina olaleerya ni ohusiha.

16. Ntakhara heeni Shigeo aahaavyakiha akina?

¹⁶ Anna awuuluvala olelo hanuukhuwa wi herwa tho ephariheliwa wakhala wi aahaavyakiha amiravo ophara muteko yoowo awo  yaapharaaya mmulokoni. Ntoko yootakiherya, moovira wa iyaakha, Shigeo, yoowo oromoliwe mmwaha yoola, ohaavyakiha amiravo a mu Nikhuuru na Efiliyale. Owo oheerano yeela wi akhaviherye muteko wa Omwene mu elapo yeeyo owo onarumeeleiyewo. Ntoko yookhumelela, vaavaa owo aahihaaleiye orumeelaka ntoko muhooleli, munna yoowo aamuvyakinheiye aamuraceela. Shigeo oorumeela ntoko mmoha a Nikhuuru na Efiliyale opwaha iyaakha 45 nave onnatitelela opharihela yeeyo ohusenryeiye wi aakhaviherye anna yaawo ari amiravo. Anna ntoko Shigeo nikhaviheryo neeparipari wa achu a Muluku!

17. Mwawiiwanana ni Luka 6:38, tiheeni anna awuuluvala eneeraaya ewerye waavaha akina?

¹⁷ Nyuwaano anna ni arokora awuuluvala mohoona wi omurumeela Yehova moororomeleya mukhalelo waphaama wa okumi. Moorweela wa yootakiherya anyu, munnooniherya wi ti yaphaama ohuserya malakiheryo a Mpiipiliyani ni opharihela yaawo mu okumi anyu. Nyuwaano moosuwela orweela wa yaweereya anyu mukhalelo ichu seeriwaayano khalai, nyenya tho mohoona ochuneya waya wiikhoveleliha ni mikhalelo mivyaani. Nyuwaano awuuluvala mpatisiwe hiihaanoru mookhalano tho sincipale wi mvahe. Munanwerya waaleela akina mukhalelo omusuwela Yehova oweerinhaayaani okhala oohakalala hiihaano mu okumi anyu. Anna yaawo ari amiravo annasiveliwa owiriyana saweereya sanyu ni mahusiheryo yaawo muhusenryaanyu. Wakhala wi nyuwaano ‘munnavaha’ moorweela wa opharihela mahusiheryo yaawo muhusenryaanyu mu okumi anyu wi mwaavyakihe akina, Yehova onamooreelihaani vancipale.—Mwaalakhanye Luka 6:38.

18. Ti mwawiihai awuuluvala ni amiravo eneeraaya ekhaviheryane mukina ni mukhwaawe?

¹⁸ Vaavaa anna oosiveliwa awuuluvala anapakaaya onthamwene ni amiravo, awo anahaala okhaviheryana mukina ni mukhwaawe. (Aro. 1:12) Muchu ti muchu ookhalano echu yasisapo yeeyo mukina ohireiyeno. Awuuluvala aakhalano miruku ni saweereya seiho aphwannyaaya moovira wa elukuluku. Anna ari amiravo aakhalano ikuru. Vaavaa amiravo ni awuuluvala analapaaya vamoha ntoko asinthamwene, awo annaruuhela ncicimiho wa Tiithi ahu oosivela a wirimu nave muloko woothene onnareelihiwa.