1. ¿Tlenon uelis tikchiuaskej tla itiueuentsintitiuej?

IJKUAK tiueuentsintitiuej, kanaj tomojtiaj pampa tiknemiliaj ika xok más uelis titlapaleuiskej ipan ikalpan Jehová. Melauak, kanaj aman xok tikojtikej ijkon ken ijkuak titelpokamej katkaj, san ika, tlen ika itikmatij niman tlen tiuelij uelis tikinpaleuiskej telpokamej para chikauak makitekichiuilikan Jehová. Ijkon ken okijto se tokniuj akin youejkauj tlapaleuiya ken tlayekanketl: “Ijkuak onikitak ika xok más nikojtik katka, oniktlasojkamachili Jehová pampa nemiyaj telpokamej akin ueliskiaj kichiuaskiaj tekitl tlen nejua nikchiuaya”.

2. ¿Tlenon tikitaskej ipan yejuin tlamachtijli?

² Ipan okse tlamachtijli, otikitakej ika ijkuak telpokamej nouikaj imiuan akin iuejueyimej melak kinpaleuiya. Ipan yejuin tlamachtijli, tikitaskej ika tla tokniuan akin iuejueyimej yolyemankej, kasikamatij ika xnochi ueli kichiuaj, tetlasojkamachiliaj niman kuelitaj kitemakaskej tlen kipiyaj, uelis kinpaleuis san sekan matekitikan imiuan telpokamej. Niman yejon kipaleuis nochi tlanechikojli.

3. a) Ken kijtoua Filipenses 2:3, 4, ¿tlenon kichiua akin yolyemanki? b) ¿Kenon techpaleuis tla tiyolyemankej?

³ Tokniuan akin iuejueyimej, noneki yolyemankej yeskej tla kinekij kinpaleuiskej tokniuan akin telpokamej. Akin yolyemanki, kimatstika ika oksekimej más uejueyixtokej xijkon ken yejua (xpoua Filipenses 2:3, 4). Tokniuan ueuentsitsintin akin yolyemankej kimatstokej ika onka miyek ken uelis nochiuas se tekitl. Yejua ika, yejuamej xkichiaj ika oksekimej makichiuakan itlaj ijkon ken yejuamej kichiuayaj (Ecl. 7:10). Maski tokniuan akin iuejueyimej miyek tlen ikimatij, kimatstokej ika nochi nopatlatiuj. Niman noijki kasikamatij ika noneki kipatlaskej seki tlen kichiuayaj (1 Cor. 7:31).

4. ¿Kenon tlayekankej ipan circuito kichiuaj ijkon ken levitas?

⁴ Tokniuan ueuentsitsintin akin yolyemankej, kasikamatij ika xok uelis kichiuaskej miyek tekitl. San matontlanemilikan intech tokniuan tlayekankej ipan circuito. Ijkuak yejuamej kajxiltiaj 70 xiuitl, kinpatiliaj intekiyo. Kanaj kemantika yejon ouijtika kitaj, pampa ijkon kuelitayaj kinpaleuiskej imikniuan. Yejuamej melak kinpaktiaya niman kitlasojtlayaj tekitl tlen kipiayaj. San ika, yejuin tokniuan kasikamatij ika yejuin tekitl noneki kichiuaskej tokniuan akin más telpokamej. Tokniuan tlayekankej ipan circuito kichiuaj ijkon ken levitas akin nemiyaj Israel. Ijkuak levitas kajxiltiayaj 50 xiuitl, xok nonekiya tekitiskej ipan tabernáculo. Yejuamej  yolpakiyaj maski xok kichiuayaj tekitl tlen kipiayaj. Ika inyojlo, kichiuayaj tlen ueliyaj niman kinpaleuiayaj levitas akin más telpokamej katkaj (Núm. 8:25, 26). Maski aman tokniuan akin otlapaleuijkaj ken tlayekankej ipan circuito xok kintlajpalouaj tlanechikoltin, melak tepaleuiyaj niman teyolchikauaj ipan tlanechikojli kampa nemij.

5. ¿Tlenon tiueli itech tokniuj Dan niman Katie?

⁵ Tokniuj Dan otlapaleui 23 xiuitl ken tlayekanketl ipan circuito. San ika, ijkuak okajxilti 70 xiuitl, yejua iuan isiuauj, Katie, okintlalijkej ken precursores especiales. ¿Kenon nomachiliaj aman? Dan kijtoua ika chikauak tekititika ipan tlanechikojli kampa nemij. Kinyolchikaua tokniuan manochiuakan tlapaleuijkej ipan tlanechikojli, kinmachtijtika kenon tenojnotsaskej kampa tojlan nojuitilo niman ipan cárceles. Tla tejua itiueuentsin niman chikauak tiktekichiuilia Jehová noso ka, uelis tikinpaleuis oksekimej. ¿Kenon? Tla timokojtilia kuajli tikchiuas motekiyo tlen aman tikpiya, tla tikita tlenon más uelis tikchiuas ipan ikalpan toTajtsin niman tla tikchiua nochi tlen tiueli.

6. ¿Kenon tepaleui tla tikasikamatij ika xnochi ueli tikchiuaj? Xkijto se neskayotl.

⁶ Akin kasikamati ika xnochi ueli kichiua, xkichiua tlen kimati ika xuelis. Yejon kiyolpaktia niman kipaleuiya kuajli makichiua itekiyo (Prov. 11:2). Akin kasikamati ika xnochi ueli kichiua yeskia ken yakaj akin kinejnemiltia icarro ipan tepetl. Kasikamati ika tla kineki ika icarro matlejkotiuj, noneki yolik kinejnemiltijtias. Noijki ijkon, akin kasikamati ika xnochi ueli kichiua kimati ika noneki kipatlas ken kitekichiuilia Jehová niman ijkon ok uelis kinpaleuis oksekimej (Filip. 4:5).

7. ¿Kenon okiteititi Barzilái ika kasikamatiya ika xnochi ueliya kichiuaya?

⁷ Matikitakan tlen ipan onochiuj Barzilái. Ijkuak kipiaya 80 xiuitl, tekiuaj David okijli makipaleuiti kampa yejua tekiuajtiya. Yejuin tlakatl okasikamat ika xok ueliskia kichiuas miyek tlemach, ika yejon, okijli tekiuaj David ika xiuan yaskia. Barzilái kasikamatiya ika pampa iueuentsin katka, xok más ueliskia tepaleuis. Yejua ika, okijli tekiuaj David makuika Kimham, akin más telpochtli katka (2 Sam. 19:35-37). Ijkon ken Barzilái, tokniuan akin iuejueyimej yolpakij ijkuak kitaj ika akin más telpokamej kichiuaj tekitl tlen yejuamej kichiuayaj.

8. ¿Kenon okiteititi David ika kasikamatiya ika xnochi ueliya kichiuaya?

⁸ Tekiuaj David, noijki okiteititi ika kasikamatiya ika xnochi ueliya kichiuaya. Yejua, ika nochi iyojlo kinekiya kichijchiuas se kajli kampa kiueyichiuaskiaj Jehová. San ika, ijkuak Jehová okijli ika Salomón kichijchiuaskia, David xonoyolkoko niman okipaleui itelpoch (1 Crón. 17:4; 22:5). David xokinemili ika, pampa Salomón ok telpochtli katka niman xmás itlaj kimatiya, xueliskia kichijchiuaskia on kajli (1 Crón. 29:1). David kimatstoya ika maski san akinon tlachijchiuaskia, Jehová kipaleuiskia. Ijkon ken David, tokniuan akin iueuentsitsintin nokojtiliaj kuajli kichiuaskej intekiyo, maski xok san no yejua tlen kipiyaj. Niman kimatstokej ika Jehová kinteochiuas telpokamej akin kichiuaj tekitl tlen yejuamej kichiuayaj.

9. ¿Kenon okiteititi Shigeo ika kasikamati ika xnochi ueli kichiua?

⁹ Ipan yejuin tonaltin, noijki nemij tokniuan akin kiteititiaj ika kasikamatij ika xnochi  ueli kichiuaj, ken tokniuj Shigeo. Ipan 1976, ijkuak kipiaya 30 xiuitl, opeuj tlapaleuiya ipan Grupo akin tlayekana ipan se Sucursal. Ipan 2004, yejua opeuj kiyekana tekitl ipan yejuin grupo. Sakin, okitak ika yejua iueuentsin katka niman ika xok ueliya totoka kichiuaya itekiyo. Ijkuakon, okitlajtlatouili Jehová nochi tlen kimachiliaya niman okinemili ika más kuajli yeskia tla yejon tekitl kichiuas se tokniuj akin más telpochtli. Maski aman xok yejua kiyekana tekitl, ok kinpaleuiya tokniuan akin nemij ipan yejon grupo. Tlen okichiujkej Barzilái, tekiuaj David niman Shigeo techititia ika tla tiyolyemankej niman tikasikamatij ika xnochi ueli tikchiuaj xtiknemiliskej ika akin telpokamej xuelis kichiuaskej se tekitl, yej tikitaskej tlen kuajli kichiuaj. Niman noijki techpaleuis maka matikintlauelitakan (Prov. 20:29).

10. ¿Kenon tokniuan akin iuejueyimej kimitaj tokniuan akin telpokamej?

¹⁰ Tokniuan akin iuejueyimej kimitaj telpokamej ken se itetlayokolil Jehová niman melak kitlasojkamatij tlen kichiuaj. Pampa tokniuan akin iuejueyimej xok más kojtikej, kitlasojkamatij ika nemij tokniuan telpokamej akin kinektokej kichiuaskej seki tekitl ipan tlanechikojli.

11. ¿Kenon Rut 4:13-16 kiteititia ika akin iuejueyimej melak kinpaleuiya ijkuak kitlasojkamatij tlen kichiuaj telpokamej?

¹¹ Biblia kiteneua Noemí, se siuakaualtsintli akin okiteititi ika kuelitaya tetlasojkamachilis niman okinokauili makipaleui yakaj akin más ichpochtli. Sakin ika itelpoch Noemí omik, okijli isiuamon Rut manokuepa imiuan ichanejkauan. San ika, ijkuak Rut  miyekpa okijli ika iuan yaskia hasta Belén, Noemí okikauili iuan mauiya (Rut 1:7, 8, 18). Tlen opanok okipaleui Rut niman Noemí (xpoua Rut 4:13-16). Ijkuak tokniuan akin iuejueyimej kichiuaj ijkon ken Noemí, kiteititiaj ika yolyemankej.

12. ¿Kenon okiteititi apóstol Pablo ika tetlasojkamachiliaya?

¹² Apóstol Pablo noijki kiteititiaya ika kitlasojkamatiya ijkuak kipaleuiayaj. Sejpatipan, okintlasojkamachili tokniuan akin chantij Filipos pampa okipaleuijkej (Filip. 4:16). Noijki, melak okitlasojkamat tlen Timoteo okichiuj ipampa (Filip. 2:19-22). Niman melak okitlasojkamachili toTajtsin pampa, ijkuak kontsakuaskiaj Roma, sekimej tokniuan okiyolchikauatoj (Hech. 28:15). Maski Pablo miyekan yotenojnotska niman yokinyolchikaujka tlanechikoltin, xonoueyimat niman okinokauili makipaleuikan.

13. ¿Kenon uelis kiteititiskej akin iuejueyimej ika kitlasojkamatij tlen kichiuaj telpokamej?

¹³ Nokniuan akin inenuejueyimej, onka miyek tlen uelis ika nenkiteititiskej ika nenkitlasojkamatij tlen kichiuaj tokniuan telpokamej akin nemij ipan nemotlanechikol. Tla yejuamej mechijliaj ika kinekij mechuikaskej kampa nemontlakouaskej noso kampa itlaj nenkonchiuaskej, xmokauilikan mamechpaleuikan. Xkitakan ika ijkon Jehová mechititijtika ika mechtlasojtla. Kanaj ijkon uelis kualtsin peuas nemouikaskej imiuan telpokamej. Nochipa xkitakan kenon uelis nenkinpaleuiskej más machikaui intlaneltokil. Xkimijlikan ika nenkitlasojkamatij pampa yejuamej nokojtilijtokej chikauak tlapaleuiskej ipan tlanechikojli. Xxelokan tiempo niman ijkon imiuan nemonojnotsaskej. Tla ijkon nenkichiuaj, nenkititiskej Jehová ika nenkitlasojkamachiliaj pampa kinpiya telpokamej ipan ikalpan (Col. 3:15; Juan 6:44; 1 Tes. 5:18).

14. ¿Kenon okiteititi tekiuaj David ika kuelitaya kitemakas tlen kipiaya?

¹⁴ Tekiuaj David okiteititi ika kuelitaya kitemakas tlen kipiaya, niman tokniuan akin iuejueyimej noijki uelis ijkon kichiuaskej. Yejua okitemakak miyek tlen ika nochijchiuaskia iteopan toTajtsin (1 Crón. 22:11-16; 29:3, 4). David ijkon okichiuj maski kimatstoya ika yejuin kajli kichijchiuaskia itelpoch, Salomón. Tla tejua itiueyi niman xok ueli tontlapaleuiya kampa kinchijchiuaj kaltin kampa tikueyichiuaj toTajtsin, uelis titlapaleuis ika motomintsin hasta kampa tiueli. Niman xkinpaleui telpokamej ika nochi tlen tejua itikmati.

15. ¿Tlenon okichiuj apóstol Pablo?

¹⁵ Apóstol Pablo noijki okiteititi ika kuelitaya kitemakas tlen kipiaya. Yejua okijli Timoteo iuan matenojnotsati niman okititi kenon uelis más kuajli tenojnotsas niman temachtis (Hech. 16:1-3). Yejon okipaleui Timoteo más kuajli matemachti (1 Cor. 4:17). Niman Timoteo okinmachti oksekimej nochi tlen Pablo yokititijka.

16. ¿Tleka Shigeo okinmachti oksekimej?

¹⁶ Tokniuan akin iuejueyimej xnomojtiaj kinmachtiskej oksekimej telpokamej para kichiuaskej tekitl tlen yejuamej kichiuayaj ipan tlanechikojli. Tokniuj Shigeo, akin otikteneujkej ipan párrafo 9, okinmachti sekimej telpokamej akin nemiyaj ipan Grupo akin tlayekana ipan se Sucursal. Ijkon okichiuj pampa kinekiya kuajli manochiua tekitl ipan país kampa yejua tlapaleuiya. Ijkuak okitak ika yejua xok ueliskia kiyekanas tekitl ipan yejon grupo, inemiya se tokniuj  akin ueliskia kichiuaskia itekiyo. Pampa Shigeo ikipiya ipantsin 45 xiuitl ipan Grupo akin tlayekana ipan se Sucursal ok kinmachtijtika telpokamej. Kuajli tikmatstokej ika tokniuan akin kichiuaj ijkon ken Shigeo, melak tlapaleuiyaj ipan ikalpan toTajtsin.

17. Ken kijtoua Lucas 6:38, ¿kenon uelis tlapaleuiskej akin iuejueyimej?

¹⁷ Nokniuan akin inenuejueyimej, nemejuamej nenkiteititiaj ika san tla tiktekichiuiliaj Jehová niman itech timelajkanemij, kuajli tinemiskej. Tlen nenkichiuaj, kiteititia ika melak tepaleui tla tomachtiaj iTlajtol toTajtsin niman tikchiuaj tlen ompa tiuelij. Pampa youejkauj ika nenkitekichiuiliaj toTajtsin nenkimatij kenon yeuejkaui nochiuaya se tekitl, san ika, nemokojtilijtokej nenkichiuaskej ken aman techtlajtlanilia ikalpan toTajtsin. Tla tejua kemach otimoapolakti, noijki uelis titlapaleuis. ¿Kenon? Tla tikimijlia telpokamej kenon mitsyolpaktia pampa otikixmat Jehová maski itiueyi. Akin telpokamej kuelitaskej kikakiskej tlen mopan yonochiuj niman nochi tlen yotiuel. Tla tejua tikimijlia oksekimej tlen yotiuel niman tikinmachtia, Jehová melak mitsteochiuas (xpoua Lucas 6:38).

18. ¿Kenon uelis nopaleuiskej tokniuan akin iuejueyimej niman telpokamej?

¹⁸ Ijkuak tokniuan akin iuejueyimej tlajtlajtouaj imiuan akin telpokamej, uelis san sekan nopaleuiskej (Rom. 1:12). Nochimej kipiyaj itlaj tlen tepaleui. Pampa tokniuan akin iuejueyimej youejkauj yonenkej kipiyaj más tlamachilistli niman miyek tlen youelkej. Niman telpokamej kojtikej. Ijkuak tokniuan akin telpokamej niman akin iuejueyimej san sekan tekitij ken amigos, kiteititiaj ika kitlakaitaj toTajtsin niman melak tlapaleuiyaj ipan tlanechikojli.