1. Re ka ipeela pakane efe ge re dutše re tšofala?

GE RE dutše re tšofala re ka nyamišwa ke gore re ka se sa kgona go hlankela Jehofa go swana le mathomong. Ke nnete gore re ka se sa ba le matla go swana le mathomong eupša re ka ipeela pakane ya gore re diriše bohlale le phihlelo yeo re nago le yona go thuša bafsa go dira sohle seo ba ka se kgonago dikabelong tšeo ba di fiwago ka mokgatlong. Ngwanabo rena yo mongwe yo abilego mogolo ka nako e telele o itše: “Ge ke be ke thoma go lemoga gore ga ke sa kgona go dira dilo tšeo ke bego ke di dira ka baka la botšofadi, ke ile ka leboga gore ka phuthegong go be go na le bana babo rena ba bafsa bao ba ka kgonago go dira modiro woo ke bego ke o dira.”

2. Re tlo boledišana ka’ng sehlogong se?

² Sehlogong se se fetilego re kwele gore bafsa ba ka holega ge ba ka gwerana le batšofadi ka phuthegong. Mo sehlogong se re tlo kwa gore dika tša go swana le boikokobetšo, boipoetšo, go leboga le go fana di ka thuša bjang bafsa le batšofadi gore ba dirišane le gore seo se ka thuša phuthego bjang.

3. Go ya ka Bafilipi 2:3, 4, boikokobetšo ke’ng, gona seka se se ka thuša bjang Mokriste?

³ Batšofadi ka phuthegong ba swanetše go ba le boikokobetšo ge e ba ba nyaka go thuša bafsa. Motho yo a nago le boikokobetšo o lebelela ba bangwe ba mo feta ka bogolo. (Bala Bafilipi 2:3, 4.) Batšofadi bao ba nago le boikokobetšo ba a tseba gore go na le ditsela tše dintši tšeo di dumelelanago le mangwalo tša go dira selo se itšego. Ka baka leo, ga ba nagane  gore motho yo mongwe le yo mongwe o tla dira dilo ka tsela yeo ba bego ba di dira ka yona nakong e fetilego. (Mmo. 7:10) Le ge ba na le dilo tše dintši tšeo ba ithutilego tšona tšeo ba ka di rutago bafsa ba a lemoga gore boemo bja lefase le bo a fetoga. Ka gona go bohlokwa gore ba ithute mekgwa e mefsa ya go dira dilo.—1 Bakor. 7:31.

4. Balebeledi ba tikologo ba bontšha bjang gore ba lebelela dilo ka tsela yeo Balefi ba bego ba di lebelela ka yona?

⁴ Batšofadi bao ba ikokobeditšego ba a lemoga gore ge ba dutše ba tšofala ba ka se kgone go dira dilo ka tsela yeo ba bego ba di dira mathomong. Ka mohlala, nagana ka balebeledi ba rena ba tikologo. Ge ba e ba le mengwaga e 70 ba fiwa kabelo e nngwe. Go ka direga gore ga go bonolo gore ba amogele kabelo yeo e mpsha. Ba be ba thabela go thuša bana babo bona le dikgaetšedi e bile ba rata kabelo ya bona. Le gona dipelo tša bona di sa kganyoga gore ba tšwele pele ka kabelo yeo. Eupša ba kwešiša gore go hlokega gore bafsa ba dire mošomo woo. Le gona ba lebelela dilo go swana le kamoo Balefi ba mehleng ya kgale ba bego ba di lebelela ka yona. Ba be ba laetšwe gore ge ba be ba fihla mengwageng e 50 ba se sa hlankela taberenakeleng. Eupša Balefi bao ba be ba thabela kabelo le ge e le efe yeo ba bego ba e fiwa. E bile ba be ba dira sohle seo ba ka se kgonago go thuša bafsa gore ba dire dikabelo tša bona. (Num. 8:25, 26) Lehono le ge bana babo rena bao e bego e le balebeledi ba tikologo ba se sa etela diphuthego  tše dintši, eupša ba tšwela pele ba thuša diphuthego tšeo ba lego go tšona le go di kgothatša.

5. O ithuta’ng mohlaleng wa Dan le Katie?

⁵ Nagana ka mohlala wa Dan yoo a feditšego mengwaga e 23 e le molebeledi wa tikologo. Ka morago ga gore Dan a be le mengwaga e 70, yena le mosadi wa gagwe Katie ba ile ba hwetša kabelo ya gore e be babulamadibogo ba ba kgethegilego. Ba dirile’ng gore ba tlwaelane le kabelo ya bona e mpsha? Dan o re gona bjale o dula a swaregile kudu! O dira dikabelo tša gagwe tšeo a di filwego ka phuthegong, o thuša bana babo rena go swanelega go ba bahlanka ba bodiredi e bile o tlwaetša ba bangwe go bolela ditaba tše dibotse ditoropong tše dikgolo le dikgolegong. Lena bana babo rena le dikgaetšedi bao ba tšofetšego, le ka dira dilo tše dintši go thuša ba bangwe go sa šetše gore le tirelong ya nako e tletšego goba ga go bjalo. Le ka dira seo bjang? Tlwaelanang le maemo a lena a mafsa, le ipeele dipakane tše difsa le gona le dule le naganne ka seo le ka kgonago go se dira go e na le go nagana ka seo le ka se kgonego go se dira.

6. Ke ka baka la’ng e le gabohlale gore re be le boipoetšo? Nea mohlala.

⁶ Motho yo a nago le boipoetšo o a tseba gore go na le dilo tšeo a ka se kgonego go di dira. (Die. 11:2) Ka ge a na le boipoetšo a ka se dire dilo tšeo a tsebago gore di tlo mo palela. Ka baka leo o tlo šoma ka thata e bile o tlo dula a thabile. Re ka swantšha motho yo a nago le boipoetšo le motho yo a otlelago koloi moo go namelelago. Mootledi o swanetše go iša kere fase gore koloi e tšwele pele e sepela. Ke nnete gore koloi yeo e ka se kitime eupša e tlo sepela ganyenyane. Ka mo go swanago, motho yo a nago le boipoetšo o a tseba gore ke neng moo a swanetšego go iša kere fase gore a kgone go dula a hlankela Jehofa le go thuša ba bangwe.—Bafil. 4:5.

7. Barasilai o ile a bontšha bjang gore o be a na le boipoetšo?

⁷ Nagana ka mohlala wa Barasilai yoo a bego a na le mengwaga e 80 ge Kgoši Dafida a be a mo kgopela gore a tle a šome ka mošate. Ka ge Barasilai a be a na le boipoetšo ga se a ka a dumela. Le gona ka ge a be a tšofetše, o be a tseba gore go na le dilo tšeo a ka se kgonego go di dira. Ka gona o ile a kgopela gore lesogana leo le bitšwago Kimehama e be lona le yago go šoma mošate legatong la gagwe. (2 Sam. 19:35-37) Go swana le Barasilai, bana babo rena bao ba tšofetšego ba thabela gore bafsa ba dire mešomo ya ka phuthegong yeo bona ba se sa kgonago go e dira.

8. Kgoši Dafida o ile a bontšha bjang gore o na le boipoetšo ge Jehofa a be a mo kgopela gore a se ke a aga tempele?

⁸ Kgoši Dafida le yena o re beetše mohlala o mobotse kudu wa go ba le boipoetšo. O be a nyaka go agela Jehofa ntlo ka pelo ya gagwe ka moka. Eupša ge Jehofa a be a mmotša gore modiro woo o be o tlo dirwa ke Solomone, Dafida o ile a dumelelana le phetho yeo ya Jehofa gomme a thekga modiro woo wa go agiwa ga tempele ka pelo ya gagwe ka moka. (1 Dikor. 17:4; 22:5) Dafida ga se a ka a nagana gore ke yena a bego a swanelega go dira modiro woo ka gobane Solomone e be e sa le yo “mofsa e bile [a] sa tekateka” goba a se na phihlelo. (1 Dikor. 29:1) Dafida o be a tseba gore modiro woo wa go agwa ga tempele o be o tlo atlega ka ge Jehofa a o šegofatša, e sego ka baka la ge bao ba bego ba tlo o etelela pele ba godile e bile ba na le phihlelo. Go swana le Dafida, batšofadi lehono ka phuthegong ba tšwela pele ba hlankela Jehofa le ge dikabelo tša bona di fetoga. Le gona ba a tseba gore Jehofa  o tlo šegofatša bafsa bao ba dirago modiro woo ba bego ba o dira.

9. Ngwanabo rena yo mongwe yoo a bego a hlankela Komiting ya Lekala o bontšhitše bjang gore o na le boipoetšo?

⁹ Re na le mohlala o mongwe wa ngwanabo rena Shigeo yoo a ilego a bontšha gore o na le boipoetšo. Ka 1976 ge a be a na le mengwaga e 30 o ile a kgethwa gore a hlankele Komiting ya Lekala. Ka 2004 o ile a ba molomaganyi wa Komiti ya Lekala. Ka morago o ile a lemoga gore ga a sa na matla ao a bego a na le ona a go dira modiro wo a bego a o dira le go o fetša kapejana. O ile a rapela ka bothata bjoo gomme a bona gore go kaone ge ngwanabo rena wa mofsa a ka šoma mošomo woo. Le ge Shigeo a se sa hlankela bjalo ka molomaganyi, eupša o sa hlankela Komiting ya Lekala. Bjalo ka ge re bone mohlaleng wa Barasilai, wa Kgoši Dafida le wa Shigeo, ngwanabo rena yoo a ikokobeditšego le yo a nago le boipoetšo ga a nagane feela ka dilo tšeo bana babo rena ba bafsa ba šetšego ba kgona go di dira, eupša o nagana le ka matla ao ba nago le ona. A ka se ba lebelele ba phadišana le yena eupša o tla ba lebelela e le bašomi gotee le yena.—Die. 20:29.

10. Batšofadi ba lebelela bafsa ba ka phuthegong bjang?

¹⁰ Batšofadi ba lebelela bafsa e le dimpho tšeo di tšwago go Jehofa le go leboga seo ba se dirago. Ge bana babo rena bao ba tšofetšego ba felelwa ke matla, ba leboga gore ka phuthegong go na le bafsa bao ba nago le matla bao ba ikemišeditšego go dira mešomo yeo ba se sa kgonago go e dira ka phuthegong.

11. Ruthe 4:13-16 e bontšha bjang ditšhegofatšo tšeo batšofadi ba ka di hwetšago ge e ba ba dumelela bafsa ba ba thuša?

¹¹ Naomi yoo go bolelwago ka yena ka Beibeleng ke mohlala o mobotse kudu wa motšofadi yoo a ilego a amogela thušo yeo a bego a e  newa ke mofsa. Mathomong Naomi o ile a kgopela ngwetši ya gagwe Ruthe yoo le yena e bego e le mohlologadi gore a boele ga gabo. Eupša Ruthe o ile a gapeletša go sepela le Naomi ge a be a boela Bethlehema. Ge ba fihla moo, Naomi o ile a dumela gore Ruthe a mo thuše. (Ruthe 1:7, 8, 18) Ka baka leo, Ruthe le Naomi ba ile ba šegofatšwa kudu! (Bala Ruthe 4:13-16.) Go ba le boikokobetšo go tla thuša batšofadi gore ba ekiše mohlala wa Naomi.

12. Moapostola Paulo o bontšhitše bjang gore o be a leboga?

¹² Moapostola Paulo o be a leboga thušo yeo bana babo ba bego ba mo nea yona. Ka mohlala, o ile a leboga Bakriste ba Filipi bao ba bego ba mo romela dimpho. (Bafil. 4:16) O ile a bontšha gape gore o a leboga ka morago ga gore Timotheo a mo thuše. (Bafil. 2:19-22) Le gona Paulo o ile a leboga Modimo ka batho bao ba ilego ba tla ba mo kgothatša ge a be a golegilwe gomme a išwa Roma. (Dit. 28:15) Paulo o be a na le mafolofolo. Le gona o ile a sepela maeto a matelele gore a yo bolela ditaba tše dibotse le go matlafatša diphuthego. O be a ikokobeditše e bile a amogela thušo yeo bana babo le dikgaetšedi ba bego ba mo nea yona.

13. Batšofadi ba ka bontšha bjang gore ba leboga bafsa?

¹³ Lena batšofadi, le ka bontšha bafsa ba ka phuthegong gore le a ba leboga ka ditsela tša go fapafapana. Ka mohlala, ge ba ithaopela go le thuša ka go le nametša dikoloi tša bona, go yo le rekela dilo tše itšego goba go le direla dilo tše dingwe, amogelang thušo ya bona ka diatla tše pedi. Gopolang gore ge ba le thuša, ye ke tsela e nngwe yeo Jehofa a le bontšhago gore o a le rata. Le gona, le ka feleletša le le bagwera ba bagolo ba bafsa bao ba le thušago. Dulang le thuša bagwera ba lena bao e lego bafsa gore ba be le segwera se sebotse le Jehofa, le go ba botša gore le thabela go ba bona ba dira tšwelopele gabotse ka phuthegong. Le gona ikemišetšeng go fetša nako le bona le go ba botša ka diphihlelo tša lena. Go dira bjalo go tla bontšha gore le leboga Jehofa ka bafsa bao a ba gogetšego ka phuthegong.—Bakol. 3:15; Joh. 6:44; 1 Bathes. 5:18.

14. Kgoši Dafida o ile a bontšha bjang gore o be a fana?

¹⁴ Kgoši Dafida o re beetše mohlala o mongwe o mobotse kudu ka go bontšha seka seo batšofadi ba swanetšego go se bontšha, e lego go fana. O ile a ntšha tšhelete e ntši kudu le mahumo a gagwe go thekga modiro wa go aga tempele. (1 Dikor. 22:11-16; 29:3, 4) O ile a dira se le ge tempele yeo e bego e tlo agiwa e be e tlo bitšwa tempele ya Solomone. Ge re se sa na matla a go ba gona ge go agiwa meago ya mokgatlo, re ka tšwela pele re thekga modiro woo ka go ntšha meneelo kamoo re ka kgonago ka gona. Le gona re ka thuša bafsa gore ba holwe ke phihlelo yeo re nago le yona.

15. Moapostola Paulo o ile a nea Timotheo dilo dife tše bohlokwa?

¹⁵ Mohlala o mongwe wa motho yo a bego a rata go fana ke wa moapostola Paulo. O ile a kgopela Timotheo gore a sepele le yena ge a be a yo ruta batho ditaba tše dibotse dinageng tše dingwe. Le gona, o ile a mmontšha gore a ka dira eng gore a kgone go botša ba bangwe ditaba tše dibotse le go ba ruta. (Dit. 16:1-3) Paulo o ile a tlwaetša Timotheo gore a be le bokgoni bja go botša batho ditaba tše dibotse le go ba ruta. (1 Bakor. 4:17) Le gona Timotheo o ile a diriša seo Paulo a bego a mo rutile sona go tlwaetša ba bangwe.

16. Ke ka baka la’ng Shigeo a ile a tlwaetša ba bangwe?

¹⁶ Lehono batšofadi ga ba tšhoge gore ba ka tla ba lebelelwa ba se sa le bohlokwa ge e ba ba ka tlwaetša bafsa mošomo woo ba bego ba o dira ka phuthegong. Ka mohlala, Shigeo yoo  re boletšego ka yena pejana, o feditše mengwaga e mentši a tlwaetša bana babo rena ba bafsa bao ba hlankelago Komiting ya Lekala. O dirile seo ka gobane a nyaka go thekga modiro wa go bolela ditaba tše dibotse nageng yeo a lego go yona. Ge nako e dutše e eya, ngwanabo rena yoo a tlwaeditšwego gabotse o ile a kgethwa gore e be molomaganyi wa komiti ya lekala legatong la gagwe. Shigeo o šomile Komiting ya Lekala ka mengwaga e fetago e 45 gomme o sa tšwela pele a diriša seo a ithutilego sona go thuša bana babo rena ba bafsa le go ba tlwaetša. Bana babo rena ba go swana le Shigeo ba tloga ba thuša batho ba Modimo!

17. Go ya ka Luka 6:38, batšofadi ba ka nea ba bangwe eng?

¹⁷ Lena bana babo rena le dikgaetšedi bao ba tšofetšego, le a re bontšha gore ga go na seo se phalago go hlankela Jehofa ka go botega e bile re na le tumelo. Mohlala wa lena o re bontšha gore re tlo holega ge re ka ithuta melao ya motheo ya Beibele le go e diriša. Le a tseba kamoo dilo di bego di dirwa ka gona nakong e fetilego eupša gona bjale le bona bohlokwa bja gore le fetoge le maemo. Le lena batšofadi bao e sego kgale le kolobeditšwe le na le dilo tše dintši tšeo le ka thušago ba bangwe ka tšona. Ka mohlala, le ka ba botša kamoo go tseba Jehofa le šetše le tšofetše go dirilego gore le thabe. Bafsa ba tla thabela go kwa diphihlelo tša lena le dilo tšeo le ithutilego tšona. Ge e ba le ka ‘tlwaela go abelana’ le ba bangwe phihlelo yeo le nago le yona, Jehofa o tlo le šegofatša kudu.—Bala Luka 6:38.

18. Bafsa le batšofadi ba ka thušana bjang ka phuthegong?

¹⁸ Lena batšofadi, ge le ka šomišana le bafsa le tlo kgona go thekgana. (Baroma 1:12) Batšofadi ba na le dilo tšeo ba kgonago go di dira tšeo bafsa ba sa di kgonego, le bafsa ba na le dilo tšeo ba kgonago go di dira tšeo batšofadi ba sa di kgonego. Ka mohlala, batšofadi ba na le bohlale le phihlelo tšeo ba di hweditšego mengwageng yeo e fetilego, mola bafsa ba na le matla le mafolofolo. Ge bafsa le batšofadi ba dirišana gotee e bile e le bagwera ba tla hola phuthego e bile ba tla dira gore Tatago rena wa legodimong a tumišwe.