1. Nitubaasa kutaho kigyendererwa ki, twaguma nitwongyera kukura?

TWAGUMA nitukura, nitubaasa kutiina ngu titurikwija kuguma turi ab’omugasho ahari Yehova. N’obu hati turaabe twine amaani makye kukira enyima, nitubaasa kukoresa obwengye n’ebi turabiremu kuhwera abato kutunguura okubaasa kwabo kugira ngu baheebwe obujunaanizibwa busya. Omureeberezi oheereize obwire buraingwa naagira ati: “Ku naatandikire kuremesibwa emyaka ya bukuru, nkaba nyine okushemererwa ahabw’okureeba hariho ab’eishe-emwe abato abatendekirwe kutwara omurimo omu maisho.”

2. Nituza kushwijuma ki omu kicweka eki?

² Ekicweka eky’enyima kyorekire oku abato barikubaasa kugasirwa bairira haihi abakuzire. Omu kicweka eki, nituza kureeba oku emitwarize nk’obucureezi, okumanya obugarukiro, okusiima, n’obufura birikubaasa kuhwera abakuzire kukorera hamwe n’abato, reero ekibiina kyona kikombekwa.

3. Kurugiirira aha Abafilipi 2:3, 4, obucureezi niki, kandi nibubaasa kuhwera buta Omukristaayo?

³ Abakuzire baine kuba abacureezi baaba bari ab’okuhwera abato. Omuntu omucureezi naareeba abandi nk’abarikumukira. (Shoma Abafilipi 2:3, 4.) Abakuzire abaine omutwarize ogu nibamanya ngu hariho emiringo erengire ahari gumwe erikwegamira aha Byahandiikirwe ey’okuhikiirizamu obujunaanizibwa. N’ahabw’ekyo, tibarikuteekateeka ngu buri omwe naija kuguma naakora ebintu nk’oku baabaire nibabikora enyima. (Mub. 7:10) N’obu baraabe baine bingi by’okubagana n’abato, nibamanya ngu “omuhango gw’ensi  egi” niguhinduka, kandi nikibaasa kubeetengyesa kumanyiira embeera nsya.—1 Kor. 7:31.

4. Abarikutaayaayira ebibiina nibooreka bata ngu baine emiteekateekyere nk’ei Abaleevi baabaire baine?

⁴ Abakuzire abacureezi nibamanya ngu ahabw’emyaka ya bukuru, nibaba batakibaasa kukora nk’ebi baabaire nibakora enyima. Teekateeka aha ky’okureeberaho ky’abarikutaayaayira ebibiina. Ku barikuhitsya emyaka 70, nibashabwa kuza omu buheereza busya. Eki nikibaasa kubagumira. Ahakuba kikaba nikibashemeza kuheereza ab’eishe-emwe. Obu n’obuheereza obu baabaire nibakunda, kandi omu mitima yaabo nibaba baine ekihika ky’okuguma omu buheereza obwo. Kwonka nibamanya ngu nikyetengyesa abato kutwara omurimo omu maisho. N’ahabw’ekyo nibagira emiteekateekyere nk’eya Abaleevi omuri Israeli eya ira, abaabaire baine kuhuumura aha mirimo yaabo aha ihema baaheza kuhitsya emyaka 50. Okushemererwa kw’Abaleevi aba kukaba kutarikwegamira aha bujunaanizibwa bw’omuringo ogumwe. Bakaba nibahikiiriza obuheereza bwona obu baaheebwa, barikukora kyona eki barikubaasa kuhwera abato. (Kub. 8:25, 26) Hati, abaabaire nibataayaayira ebibiina n’obu baraabe batakibitaayaayira, kwonka nibahwera munonga omu kibiina eki barikuba barimu.

5. Nooyegyera ki ahari Dan na Katie?

⁵ Yetegyereze eky’okureeberaho kya Dan,  owaabaire naataayaayira ebibiina kumara emyaka 23. Dan ku yaahikize emyaka 70, we n’omukazi we, Katie, bakashabwa kuba baapayoniya ab’omutaano. Mbwenu shi babaasize bata kumanyiira embeera nsya? Dan naagira ngu hati aine bingi by’okukora kukira enyima! Naahikiiriza obujunaanizibwa obu aine omu kibiina kye, naahwera ab’eishe-emwe kutunguuka kuba abaheereza, kandi naatendeka abandi kubuurira omu myanya y’endembo n’omu bihome. Abakuzire yaaba muri omu buheereza obw’obutwire nari mutaburimu, nimubaasa kukora kihango kuhwera abandi. Mu muringo ki? Teeraho kuhinduka n’embeera nsya, taho ebigyendererwa, kandi ta omutima aha bi orikubaasa kukora omu mwanya gw’ebi otarikubaasa kukora.

6. Ahabw’enki n’eky’obwengye kumanya obugarukiro bwawe? Ha eky’okureeberaho.

⁶ Omuntu orikumanya obugarukiro bwe, naamanya okubaasa kwe n’obweremwa bwe. (Enf. 11:2) Eki nikimuhiga kuteegiramu amatsiko maingi kukira aha ki arikubaasa kukora. N’ekirikurugamu, naagumizamu naakora kandi ashemereirwe. Nitubaasa kugyeragyeranisa omuntu orikumanya obugarukiro bwe n’orikuvuga emotoka aha katembo. Naaba aine kutamu giya ey’ahansi kubaasa kugumizamu naatemba akatembo. N’amazima, naija kuba naagyenda mpora, kwonka naija kugumizamu naagyenda omu maisho. Nikyo kimwe, omuntu orikumanya obugarukiro bwe naamanya obu arikuba aine kugyenda mporampora, kugira ngu agumizemu naaheereza Yehova nk’oku arikubaasa.—Fil. 4:5.

7. Baruzilai akooreka ata ngu naamanya obugarukiro bwe?

⁷ Yetegyereze eky’okureeberaho kya Baruzilai, owaabaire aine emyaka 80 obu Omugabe Daudi yaamweta omu kikaari kye. Baruzilai ahabw’okumanya obugarukiro bwe, akeefeerereza omugisha ogu omugabe yaabaire amuhaire. Ahabw’okumanya obweremwa bwe ahabw’emyaka ya bukuru, akagira ngu Kimuhaamu owaabaire akiri muto agyende omu mwanya gwe. (2 Sam. 19:35-37) Nka Baruzilai, abashaija abakuzire nibashemererwa kuha abato omugisha gw’okuheereza.

8. Omugabe Daudi akooreka ata ngu naamanya obugarukiro bwe aha bikwatiraine n’okwombeka hekalu?

⁸ Omugabe Daudi nawe akataho eky’okureeberaho kirungi eky’okumanya obugarukiro bwe. N’omutima gwe gwona, akaba naayenda kwombekyera Yehova enju. Kwonka Yehova ku yaamugambiire ngu omugisha ogu nigwija kuheebwa omutabani Sulemaani, Daudi akaikiriza okucwamu kwa Yehova yaashagika okwombeka n’omutima gwe gwona. (1 Bus. 17:4; 22:5) Daudi akaba atarikuteekateeka ngu niwe ahikire kuhikiiriza obujunaanizibwa obu ahakuba Sulemaani akaba ‘akiri muto, atakahamire.’ (1 Bus. 29:1) Daudi akaba naamanya ngu okwombeka oku kubaasa kugyenda gye, nikirugiirira aha migisha ya Yehova, beitu etari myaka nari okumanya kw’abo abarikureeberera omurimo. Nka Daudi, abakuzire obunaku obu nibagumizamu nibaheereza, nangwa n’obu obujunaanizibwa bwabo bwakuhinduka. Kandi nibamanya ngu Yehova naija kuha emigisha abato abarikukora emirimo ei abakuzire baabaire nibakora.

9. Ow’akakiiko k’Eitaagi akooreka ata ngu naamanya obugarukiro bwe?

⁹ Shigeo ataireho eky’okureeberaho eky’okumanya obugarukiro bwe obunaku obu. Omuri 1976, akatooranwa kuheereza aha Kakiiko k’Eitaagi aine emyaka 30. Omu 2004 akaba Omuhikaanisa w’Akakiiko k’Eitaagi.  Bwanyima akeetegyereza ngu takiine maani g’okukora emirimo ye omu bwire. Akashaba aha bikwatiraine n’enshonga egi kugira ngu ow’eishe-emwe muto ahikiirize obujunaanizibwa obu. Shigeo n’obu araabe atakiri omuhikaanisa, naakigumizamu kuheereza aha Kakiiko k’Eitaagi ako, kandi arikukwatanisa n’abandi. Nk’oku turikureebera aha ky’okureeberaho kya Baruzilai, Omugabe Daudi, na Shigeo, omuntu omucureezi kandi orikumanya obugarukiro bwe tarikuta omutima aha bi abato batarikumanya beitu aha maani gaabo. Tarikubareeba nk’abu arikuhayahayana nabo, beitu nk’abakozi bagyenzi be.—Enf. 20:29.

10. Abakuzire baine miteekateekyere ki aha bato omu kibiina?

¹⁰ Abakuzire nibareeba abato nk’ebiconco kuruga ahari Yehova ebi barikusiima. Amaani g’abakuzire ku garikutuuba, nibashemererwa kureeba ngu hariho abato abeeteekateekire kugumizamu nibahikiiriza obujunaanizibwa obwo omu kibiina.

11. Ebiri omu Ruusi 4:13-16 nibyoreka bita emigisha erikubaasa kuruga omu kwikiriza obuhwezi bw’abato?

¹¹ Naomi n’eky’okureeberaho kirungi eky’abakuzire abaabaire nibasiima obuhwezi bw’abato. Omu kubanza, Naomi akahiga Ruusi omukaamwana efaakazi kugaruka omu bantu be. Kwonka, Ruusi ku yaayangisiriize ngu naayenda kugyenda na Naomi kugaruka Betelehemu, akaikiriza obushagiki bwe. (Rus. 1:7, 8, 18) Kandi ogu ka gwabaire omugisha gw’amaani aha bakazi aba bombi! (Shoma Ruusi 4:13-16.) Obucureezi nibuhiga abakuzire kutooreza eky’okureeberaho kya Naomi.

12. Entumwa Paulo akooreka ata ngu naasiima?

¹² Entumwa Paulo akaba naasiima obuhwezi obu yaatungire. Nk’eky’okureeberaho,  akasiima Abakristaayo omuri Filipi ahabw’ebiconco ebi baamwoherereize. (Fil. 4:16) Akasiima n’obuhwezi obu Timoseo yaamuhaire. (Fil. 2:19-22) Kandi akasiima na Ruhanga ahabw’abantu abaizire kumugaruramu amaani obu yaabaire akomirwe arikutwarwa Rooma. (Byak. 28:15) Paulo akaba ari omushaija w’amaani owaabaire naagyenda mahiro nyingi kubuurira n’okugumya ebibiina. Kwonka, akaba ataine mwetunguuro gw’okwanga kwikiriza obushagiki bw’ab’eishe-emwe na banyaanya.

13. Abakuzire nibabaasa kworeka bata ngu nibasiima abato?

¹³ Abakuzire, nimubaasa kworeka ngu nimusiima abato omu miringo mingi. Baaba nibenda kubahwera omu by’engyenda, okugura ebintu, nari omu byetengo by’omubiri ebindi, mwikirize obuhwezi bwabo mushemereirwe. Mureebe obuhwezi obu nk’omuringo gumwe ogu Yehova arikworeka ngu naabakunda. Nimubaasa kutangaara ahabw’omukago murungi ogu muraagire nabo. Butoosha muteereho kuhwera abakozi bagyenzi baanyu abato kutunguuka omu by’omwoyo, kandi mubagambire ngu nimushemererwa kureeba oku barikutunguuka kutunga obujunaanizibwa obundi omu kibiina. Kandi mube mweteekateekire kumara obwire bwanyu murikubagambira ebi mwarabiremu. Mwakora mutyo, nimwija ‘kusiima’ abato abu Yehova areetsire omu kibiina.—Kol. 3:15; Yoh. 6:44; 1 Tes. 5:18.

14. Omugabe Daudi akooreka ata ngu n’efura?

¹⁴ Omugabe Daudi akataho eky’okureeberaho ky’obufura, kandi ogu n’omutwarize ogundi ogu abakuru baine kugira. Akakora aha by’obugaiga bwe yaahayo kushagika okwombeka hekalu. (1 Bus. 22:11-16; 29:3, 4) Akakora eki n’obu omutabani Sulemaani niwe yaabaire naija kusiimwa ahabw’okwombeka. Twaba tutakiine maani g’okwejumba omu kwombeka ebyombeko by’ekibiina, nitubaasa kugumizamu nitushagika okwombeka oku, turikuhayo nk’oku embeera zaitu zirikutubaasisa. Kandi nitubaasa kuhwera abato kugasirwa omu bi turabiremu kumara emyaka.

15. Ni biconco ki eby’omuhendo ebi entumwa Paulo yaabagaine na Timoseo?

¹⁵ Aha bikwatiraine n’obufura, yetegyereze eky’okureeberaho ky’entumwa Paulo. Akeeta Timoseo kumwegaitaho omu murimo gw’obumiisani, kandi Paulo akaba efura yaamwegyesa obukodyo bwe bw’okubuurira n’okwegyesa. (Byak. 16:1-3) Okutendekwa kwa Paulo kukahwera Timoseo kuba omubuurizi murungi w’amakuru marungi. (1 Kor. 4:17) Kandi na Timoseo akakoresa obukoryo bwa Paulo kutendeka abandi.

16. Ahabw’enki Shigeo yaatendekire abandi?

¹⁶ Abakuzire obunaku obu tibaine kutiina ngu nibaija kuba batakiri b’omugasho baatendeka abato kukora omurimo ogu baabaire nibakora omu kibiina. Nk’eky’okureeberaho, kumara emyaka, Shigeo owaaba yaagambirweho, akaba naatendeka ab’Akakiiko k’Eitaagi abato. Akakora eki ahabw’oburungi bw’omurimo gw’Obukama omu ihanga eri arimu. N’ekyarugiremu, obwire ku bwahikire ow’eishe-emwe owaabaire atendekirwe gye akaba ariho kumuza omu bigyere nk’omuhikaanisa w’akakiiko k’eitaagi. Shigeo na hati naagumizamu kubagana n’ab’eishe-emwe ebi arabiremu omu myaka 45 ei amazire naaheereza aha Kakiiko k’Eitaagi. Abantu nk’abo ka n’ab’omuhendo aha bantu ba Yehova!

17. Kuhikaana na Luka 6:38, abakuzire nibabaasa kuha ki abandi?

 ¹⁷ Imwe ab’eishe-emwe na banyaanyazi-itwe abakuzire muri obuhame oburikureebwa butunu ngu okuheereza Yehova omu bwesigwa kandi mumuhamiireho nikyo kirikukirayo oburungi. Eky’okureeberaho kyanyu kirungi, nikyoreka ngu okwefeerereza kwanyu okw’okugyendera aha misingye ya Baibuli ti kwa busha. Nimumanya oku ebintu byabaire nibikorwa ira, kwonka kandi nimureeba ngu hariho ekyetengo ky’okuhinduka n’embeera eziriho hati. Naimwe abakuzire abaherize kubatizibwa, mwine bingi eby’okuha abandi. Nimubaasa kugambira abandi okushemererwa okurikuruga omu kumanya Yehova waakuzire. Abato nibaija kushemererwa kumanya ebirikubakwataho, n’amashomo agu mwegire. ‘Mwaha’ abandi murikwihirira aha bi murabiremu, Yehova naija kubaha emigisha mingi.—Shoma Luka 6:38.

18. Abakuzire n’abato baakwatanisa hamwe nibabaasa kuhwerahwerana bata?

¹⁸ Imwe abakuzire abakundwa mwirira haihi abato, nimwija kubaasa kugumyana. (Rom. 1:12) Buri omwe aine ekintu ky’omuhendo eki abandi bataine. Abakuzire baine obwengye obu babaasize kutunga kumara obwire buraingwa. Abato baine amaani n’engoga. Abakuzire n’abato banywana kandi bakakora hamwe, nibahimbisisa Tataitwe ow’omu iguru kandi nibaba bari ab’omugasho omu kibiina.