1. Каргун хуӕртӕ ӕма ӕнсувӕрти бон ци ӕй кӕнун?

АРӔХ каргун хуӕртӕ ӕма ӕнсувӕртӕ тухсгӕ фӕккӕнунцӕ, раздӕри бӕрцӕ сӕ бон лӕггадӕ кӕнун ке нӕбал ӕй, уой туххӕй. Куд фулдӕр ӕнзтӕ сӕбӕл фӕццӕуй уотӕ сӕ хъауритӕ дӕр минкъийдӕргӕнгӕ фӕццӕунцӕ. Фал фӕлтӕрдгун ӕнцӕ, уомӕн ӕма царди берӕ цидӕртӕ фӕууидтонцӕ, ӕма сӕ бон ӕй ӕригӕнтти ахур кӕнун, цӕмӕй ӕмбурди фулдӕр ихӕстӕ сӕхемӕ есонцӕ. Берӕ ӕнзтӕ хестӕр нӕлгоймагӕй ка лӕггадӕ кӕнуй, еу уӕхӕн ӕнсувӕр загъта: «Анзӕй-анзмӕ мӕ хъауритӕбӕл ӕфтуйгӕ нӕ цӕуй, фал нӕмӕ хуарз ӕма ес, цӕхуӕндӕр гъуддӕгтӕ баихӕс кӕнун кӕмӕн ӕнгъезуй, уӕхӕн ӕригон ӕнсувӕртӕ».

2. Аци статьяй цӕмӕ ӕркӕсдзиан?

² Айразиккон статьяй базудтан, ӕригон хуӕртӕ ӕма ӕнсувӕртӕ каргунти хӕццӕ ку лимӕн кӕнонцӕ, уӕд син е ци пайда ӕрхӕсдзӕй, уой. Аци статьяй ба базондзиан, каргунтӕ сӕрниллӕг, бонзонгӕ, боззӕрдӕ ӕма рӕдау ку уонцӕ, уӕд син е ӕригӕнтти хӕццӕ ӕмгуст кӕнунмӕ куд ӕнхус кӕндзӕй ӕма е ӕмбурдӕн ци пайда ӕрхӕсдзӕй, уой.

3. Филиппӕгтӕмӕ 2:3, 4 куд финст ӕй, уомӕ гӕсгӕ сӕрниллӕг цӕмӕн гъӕуама уӕн ӕма е цӕмӕй бӕрӕг уодзӕй?

³ Каргун хуӕртӕ ӕма ӕнсувӕртӕ гъӕуама сӕрниллӕг уонцӕ, цӕмӕй сӕ бон уа ӕригӕнттӕн ӕнхус кӕнун. Сӕрниллӕг адӕймаг иннети ӕхецӕй уӕлдӕр февӕруй. (Бакӕсӕ Филиппӕгтӕмӕ 2:3, 4.) Арӕхдӕр ести гъуддаг бакӕнун фенгъезуй цалдӕр мадзалей фӕрци ӕма си еу дӕр Библий уагӕвӕрдти нихмӕ нӕ фӕууй. Уӕхӕн уавӕри сӕрниллӕгдзийнади фӕрци хестӕртӕ уотӕ нӕ сагъӕс кӕндзӕнцӕ, ӕма етӕ куд  ахур адтӕнцӕ, уотӕ кӕнун гъӕуй (Еккл. 7:10). Дзурд дӕр ибӕл нӕййес, каргун хуӕртӕ ӕма ӕнсувӕртӕ фӕлтӕрдгун ӕнцӕ ӕма ӕригӕнттӕн берӕ цидӕртӕ ӕй сӕ бон байамонун. Фал ӕй лӕдӕрунцӕ, «аци дуйнейӕн ӕ хузӕ» ӕййевгӕ ке кӕнуй ӕма сӕ нӕуӕг цӕбӕлдӕрти ахур кӕнун ке гъӕудзӕй (1 Кор. 7:31).

4. Раздӕр районон цӕстӕдаргутӕй ка лӕггадӕ кодта, етӕ рагон Израили левитти хузӕн цӕмӕй ӕнцӕ?

⁴ Каргун хуӕртӕ ӕма ӕнсувӕртӕ сӕрниллӕг ку уонцӕ, уӕд ӕгӕр нӕ тухсдзӕнцӕ, раздӕр сӕ бон цӕйбӕрцӕ адтӕй кӕнун, уойбӕрцӕ ке нӕбал ӕй, уобӕл. Зӕгъӕн, районон цӕстӕдаргутӕбӕл 70 анзи ку исӕнхӕст уй, уӕд сӕ еци лӕггадӕ ниууадзун фӕгъгъӕуй. Е алкӕд ӕнцон нӕ фӕууй, уомӕн ӕма сӕ зӕрдӕмӕ хъӕбӕр цудӕй хуӕртӕ ӕма ӕнсувӕрти федар кӕнун. Еци куст зингзӕрдӕй ӕнхӕст кодтонцӕ, ӕма сӕ бӕргӕ фӕффӕндуй идарддӕр дӕр уотӕ лӕггадӕ кӕнун, фал ӕй фӕллӕдӕрунцӕ, районон куст кӕнунмӕ, фулдӕр хъауритӕ кӕмӕ ес, уӕхӕн ӕригон ӕнсувӕртӕ ке гъӕуй. Раздӕр районон цӕстӕдарӕгӕй ка лӕггадӕ кодта, еци ӕнсувӕртӕ фӕуунцӕ рагон Израили левитти хузӕн. Етӕ дӕр сугъдӕг цатури нӕбал лӕггадӕ кӕниуонцӕ, 50 анзи сӕбӕл ку исӕнхӕст уидӕ, уӕд. Фал син уой фӕсте дӕр ци гъуддӕгтӕ баихӕс кӕниуонцӕ, уони цийнӕгӕнгӕй ӕнхӕст кодтонцӕ, удта ма ӕригон левиттӕн дӕр ӕнхус кодтонцӕ (Ним. 8:25, 26). Гъе уотӕ районон цӕстӕдаргутӕй ка лӕггадӕ кодта, уони бон дӕр нӕбал фӕууй, цалдӕр ӕмбурдемӕн ӕнхус кӕнун, фал ци ӕмбурди ’нцӕ, еци ӕмбурдӕн ба устур агъаз фӕуунцӕ.

5. Дэн ӕма Кэтий хабарӕй цӕбӕл ахур кӕнӕн?

 ⁵ Ӕркӕсӕн Дени хабармӕ. Ден 23 анзи фӕллӕггадӕ кодта районон цӕстӕдарӕгӕй. 70 анзи ибӕл ку исӕнхӕст ӕй, уӕдта сӕ ӕ бийнойнаг Кэтий хӕццӕ иснисан кодтонцӕ сӕрмагонд пионертӕй. Цума син сӕ нӕуӕг уавӕрти куд адтӕй? Ден зӕгъуй, уойбӕрцӕ гъуддӕгтӕ ба, дан, мин некӕдма адтӕй! Игъосун кӕнунӕй уӕлдай ма ӕригон ӕнсувӕртӕн ӕнхус кӕнуй кӕстӕреуӕггӕнӕг ӕнсувӕртӕ исунмӕ. Удта ма ӕмбурди хуӕртӕ ӕма ӕнсувӕрти ахур кӕнуй, берӕ адӕн кӕми фӕууй, уӕхӕн рауӕнти ӕма ахӕстдӕнтти игъосун кӕнун. Нӕ хъазар каргун хуӕртӕ ӕма ӕнсувӕртӕ, фӕнди ӕнхӕстрӕстӕг лӕггадӕ кӕнайтӕ, фӕнди – нӕ, уӕддӕр уин иннетӕн ӕнхус кӕнунмӕ берӕ фадуӕттӕ ес. Мадта уӕ бон ци ӕй кӕнун? Ӕййивддзийнӕдтӕбӕл ахур кӕнтӕ, нӕуӕг нисӕнттӕ ӕвӕретӕ, удта фулдӕр сагъӕс кӕнтӕ, уӕ бон ци ӕй кӕнун уобӕл, уӕ бон ци нӕй, уобӕл нӕ, фал.

6. Бонзонгӕ ун цӕмӕн гъӕуй? Ӕрхӕссӕ цӕветтон.

⁶ Бонзонгӕ адӕймаг, ӕ бон ци ӕй ӕма ци нӕй, уой хуарз фӕллӕдӕруй (Ӕмб. 11:2). Ӕхемӕ раст цӕстӕй фӕккӕсуй ӕма ӕхецӕй ӕгӕр берӕ нӕ фӕййагоруй. Уой фӕрци ӕ бон фӕууй цийнӕгӕнгӕй ӕма зӕрдиагӕй хъиамӕт кӕнун. Бонзонгӕ адӕймаги ӕнгъезуй рабарун, уӕлӕмӕ къолӕбӕл машинӕ ка фӕттӕруй, уӕхӕн адӕймаги хӕццӕ. Цӕмӕй машинӕ ма ниххусса, уой туххӕй ӕй минкъийдӕр скъорӕст байвӕрун гъӕуй. Уотемӕй сабурдӕр цӕудзӕй, фал лӕугӕ ба не ’ркӕндзӕй. Уотӕ ’й бонзонгӕ адӕймаг дӕр фӕллӕдӕруй, минкъий сабурдӕр цӕун кӕми гъӕуй уой, цӕмӕй ӕ лӕггадӕ еугур лӕуд ма ’ркӕна (Фил. 4:5).

7. Верзелий бонзонгӕ лӕг ке адтӕй, е цӕмӕй бӕрӕг ӕй?

⁷ Ӕргъуди кӕнӕн Верзелиййи хабар. 80 анзи ибӕл ку цудӕй, уӕд ӕй паддзах Давид ӕ хӕдзарӕмӕ ӕрбакӕнунмӕ гъавта, цӕмӕй ин уоми лӕггадӕ кодтайдӕ. Фал Верзелий бонзонгӕ лӕг адтӕй ӕма не ’сарази ӕй. Лӕдӕрдтӕй ӕй, уойбӕрцӕ хъауритӕ имӕ ке нӕбал ес, уой ӕма Давидӕн загъта, цӕмӕй ӕ бӕсти Кимгами райстайдӕ, уомӕн ӕма е ӕригондӕр адтӕй (2 Сам. 19:35–37). Каргун ӕнсувӕртӕ дӕр Верзелиййи хузӕн цӕттӕ фӕуунцӕ ӕригӕнттӕн цӕхуӕндӕр гъуддӕгтӕ баихӕс кӕнун.

8. Ковӕндонӕ ка искӕндзӕй, еци гъуддагмӕ Давид ци цӕстӕй ракастӕй, уомӕй бонзонгӕдзийнадӕ куд бавдиста?

⁸ Паддзах Давид ӕхуӕдӕг дӕр бонзонгӕ адӕймаг адтӕй. Хъӕбӕр ӕй фӕндадтӕй Йеговӕн ковӕндонӕ искӕнун. Фал ӕй ку базудта, Йеговӕ еци кадгин гъуддаг Соломонӕн ке баихӕс кодта, уӕд ин ӕ унаффӕбӕл исарази ӕй. Ӕма Давид ковӕндонӕ искӕнунмӕ дуйне ӕрмӕг ӕрцӕттӕ кодта (1 Анз. 17:4; 22:5). Давид уотӕ нӕ сагъӕс кодта, ӕма еци гъуддаг ӕхуӕдӕг хуӕздӕр искӕндзӕй, уомӕн ӕма Соломон ӕригон ӕма ӕвӕлтӕрд ӕй (1 Анз. 29:1). Лӕдӕрдтӕй ӕй, еци гъуддаг Йегови фӕрци ке фӕррӕстмӕ уодзӕй, еци кустӕн разамунд ка дӕтта, уони фӕлтӕрддзийнади фӕрци нӕ, фал. Давиди хузӕн каргун киристӕнттӕ дӕр Йегови гъуддаги зингзӕрдӕй фӕййархайунцӕ, ӕндӕр ести син ку баихӕс кӕнунцӕ, уӕддӕр. Етӕ ’й федарӕй фӕззонунцӕ, ци куст кодтонцӕ, уой син сӕ бӕсти ка кӕнуй, еци ӕригон хуӕртӕ ӕма ӕнсувӕртӕн Йеговӕ ке ӕнхус кӕндзӕй.

9. Филиали комитети ка лӕггадӕ кӕнуй, еу уӕхӕн ӕнсувӕр куд бавдиста, бонзонгӕ ке ӕй, уой?

⁹ Ӕркӕсӕн ма еу бонзонгӕ ӕнсувӕр Сигэой хабармӕ. 1976-аг анзи, 30 анзи ибӕл ку цудӕй, уӕд ӕй иснисан кодтонцӕ филиали комитетмӕ. 2004-аг анзи ба иссӕй филиали комитети координатор. Фал ин фӕстӕдӕр ба  ӕ карӕмӕ гӕсгӕ еци ихӕстӕ ӕнхӕст кӕнун ӕнцон нӕбал адтӕй. Сигэо ӕ тухститӕ Йеговӕн радзурдта ӕма ’й балӕдӕрдтӕй, ӕ ихӕстӕ ӕригон ӕнсувӕртӕн ку ратта, уӕд хуӕздӕр ке уодзӕй. Кӕд Сигэо координатор нӕбал ӕй, уӕддӕр ма филиали комитетӕн устур пайда хӕссуй. Верзелий, паддзах Давиди ӕма Сигэой хабӕрттӕй бӕрӕг ӕй, сӕрниллӕг ӕма бонзонгӕ адӕймаг, ӕригӕнттӕ ӕвӕлтӕрд ке ’нцӕ, уомӕ нӕ кӕсдзӕй, фал син цӕйбӕрцӕ бантӕсдзӕй, уомӕ. Удта уотӕ дӕр нӕ сагъӕс кӕндзӕй, ӕма ин ӕ бунатмӕ гъавунцӕ, фал сӕ нимайдзӕй е ’мкосгутӕбӕл (Ӕмб. 20:29).

10. Каргун киристӕнттӕ ӕригӕнттӕмӕ цӕхуӕн цӕстӕй кӕсунцӕ?

¹⁰ Каргун киристӕнттӕ ӕригӕнтти нимайунцӕ Йегови лӕвӕрттӕбӕл, ӕма си уони туххӕй хъӕбӕр боз ӕнцӕ. Сӕ хъауритӕ минкъийдӕргӕнгӕ ке цӕунцӕ, уомӕ гӕсгӕ ӕригӕнттӕй хъӕбӕр боз ӕнцӕ, сӕхемӕ фулдӕр ихӕстӕ райсунмӕ цӕттӕ ке ’нцӕ, уой туххӕй.

11. Ноемини хабарӕй куд зиннуй, каргун киристӕнттӕ ӕригӕнтти ӕнхусбӕл ке гъӕуама арази кӕнонцӕ ӕма си боз ке гъӕуама уонцӕ, е? (Руф 4:13–16).

¹¹ Ноемини хабарӕй бӕрӕг ӕй, каргун адӕймаг ӕригӕнтти ӕнхусбӕл куд гъӕуама арази кӕна ӕма си боз куд гъӕуама уа, е. Фиццаг Ноемин ӕ киндзӕ Руфи сӕхемӕ сӕ адӕнмӕ ’здӕхун кодта. Фал Руф нӕ бакумдта ӕма имӕ ниллӕудтӕй, ӕз дӕр дӕ хӕццӕ Вифлееммӕ цӕун, зӕгъгӕ. Фӕстагмӕ Ноемин исарази ӕй, ӕма ин куд ӕнхус кодта, уомӕй си хъӕбӕр боз адтӕй (Руф 1:7, 8, 18). Гъе уотемӕй Ноемин ӕма Руфӕн райдӕдта нӕуӕг, цийнӕйдзаг цард! (Бакӕсӕ Руф 4:13–16.) Каргун киристӕнттӕ дӕр сӕрниллӕг ку уонцӕ, уӕд фӕнздзӕнцӕ Ноемини.

12. Апостол Павел боз кӕмӕй адтӕй ӕма цӕй туххӕй?

 ¹² Апостол Павел дӕр хуӕртӕ ӕма ӕнсувӕртӕй хъӕбӕр боз адтӕй, ӕнхус ин ке кодтонцӕ, уой туххӕй. Зӕгъӕн, филиппӕгтӕмӕ финстӕги хуӕртӕ ӕма ӕнсувӕртӕн райарфӕ кодта, ци гъӕуагӕ адтӕй, уой ин ке рарветиуонцӕ, уой туххӕй (Фил. 4:16). Павел Тимофеййӕй дӕр гъе уотӕ боз адтӕй (Фил. 2:19–22). Роми ахӕст ку адтӕй, уӕдта, бафедар кӕнунмӕ имӕ ка ӕрбацудӕй, еци ӕнсувӕрти туххӕй Йеговӕн райарфӕ кодта (Гъуд. 28:15). Павел ӕмбурдтӕ бӕрӕг кӕнгӕй ӕма игъосун кӕнгӕй мингай километртӕ рацудӕй. Е хуӕртӕ ӕма ӕнсувӕрти ӕнхус алкӕддӕр ӕ сӕрмӕ хаста.

13. Каргун киристӕнтти бон куд ӕй бавдесун, ӕригӕнтти туххӕй Йеговӕй боз ке ’нцӕ, уой?

¹³ Каргун хуӕртӕ ӕма ӕнсувӕртӕ, ӕригӕнттӕй боз ке айтӕ, уой бавдесунмӕ уин берӕ фадуӕттӕ ес. Естӕми банхус кӕнун сӕ ку фӕндӕуа, зӕгъӕн, ескумӕ уӕ фӕлласун кенӕ хӕдзари гъуддӕгти банхус кӕнун, уӕд син се ’нхусбӕл арази кӕнтӕ. Се ’нхус син Йегови уарзондзийнадӕбӕл нимайетӕ. Ка ’й зонуй уин еци хуӕртӕ ӕма ӕнсувӕртӕ хуарз ӕмбӕлттӕ исуодзӕнцӕ. Арӕхдӕр син дзоретӕ, ӕмбурди гъуддӕгти куд зингзӕрдӕй архайунцӕ, е уин куд ӕхцӕуӕн ӕй, уой. Уӕ рӕстӕг син ма ’вгъау кӕнтӕ ӕма син дзоретӕ, царди цӕбӕлти исахур айтӕ, уой. Уотемӕй бавдесдзиайтӕ, Йеговӕ еци ӕригон киристӕнтти ӕхемӕ ке ӕрбакодта, уой туххӕй си боз ке айтӕ (Иоан. 6:44; Кол. 3:15; 1 Фес. 5:18).

14. Паддзах Давид рӕдаудзийнадӕ куд бавдиста?

¹⁴ Паддзах Давиди хабарӕй ма каргунтӕ еу ӕхсидзгӕ гъуддагбӕл ахур кӕнунцӕ – рӕдзаудзийнадӕбӕл. Давид ковӕндонӕ искӕнунмӕ хъӕбӕр берӕ ӕхца ӕма ӕрмӕг рахецӕн кодта (1 Анз. 22:11–16; 29:3, 4). Удта еци ковӕндонӕ фиццагидӕр Соломони номи хӕццӕ баст ке уодзӕй, е дӕр ӕй нӕ бауорӕдта. Кӕд уӕмӕ уойбӕрцӕ хъауритӕ нӕбал ес, цӕмӕй нӕ организаций арӕзтадон гъуддӕгти архайайтӕ, уӕддӕр уӕ бон ӕй нисайнӕгтӕй ӕнхус кӕнун. Уомӕй уӕлдай ма берӕ ӕнзти дӕргъи Йеговӕн лӕггадӕ кӕнгӕй берӕ цӕбӕлдӕрти исахур айтӕ, ӕма уӕ бон ӕй ӕригӕнттӕн еститӕ байамонун.

15. Павел Тимофеймӕ рӕдаудзийнадӕ ке бавдиста, е цӕмӕй бӕрӕг ӕй?

¹⁵ Апостол Павел дӕр рӕдау адӕймаг адтӕй. Миссионерӕй ку лӕггадӕ кодта, уӕд Тимофеййи ӕ хӕццӕ райста. Павел ин ӕ рӕстӕг не ’вгъау кодта удта ин игъосун кӕнунмӕ ӕма ахуркӕнуйнӕгтӕ цӕттӕ кӕнунмӕ аллихузи мадзӕлттӕ амудта (Гъуд. 16:1–3). Уой фӕрци Тимофей хъӕбӕр дӕсни игъосунгӕнӕг иссӕй ӕма ӕхе бон дӕр адтӕй, Павелӕй ци базудта, уой иннетӕн амонун (1 Кор. 4:17).

16. Сигэо иннӕ ӕнсувӕрти цӕмӕн ахур кодта?

¹⁶ Абони дӕр каргунтӕ ӕригӕнтти ахур кӕнунцӕ, сӕхуӕдтӕ ке ӕнхӕст кӕнунцӕ, еци ихӕстӕ ӕнхӕст кӕнунбӕл. Етӕ сӕ бунӕттӕн нӕ тӕрсунцӕ, удта уотӕ дӕр нӕ гъуди кӕнунцӕ, ӕма син сӕ ихӕстӕ ӕригӕнттӕ ку ӕнхӕст кӕнонцӕ, уӕд уони ба гъуди дӕр некебал кӕндзӕй. Зӕгъӕн, ӕнсувӕр Сигэо берӕ ӕнзти дӕргъи филиали комитети ӕригондӕр ӕнсувӕрти ахур кодта. Цӕмӕн? Уомӕн ӕма ’й фӕндадтӕй, цӕмӕй Паддзахади гъуддаг идарддӕр дӕр размӕ цудайдӕ. Гъема ӕ бон координаторӕй лӕггадӕ кӕнун ку нӕбал адтӕй, уӕд ӕй ӕндӕр ӕнсувӕр раййивта, дзӕбӕх ке исахур кодта, уӕхӕн ӕнсувӕр. Сигэо филиали комитети 45 анземӕй фулдӕр лӕггадӕ кӕнуй ӕма идарддӕр дӕр ӕригондӕр ӕнсувӕрти ахур кӕнуй. Нӕ организаций уӕхӕн ӕнсувӕртӕ ке ес, е ӕцӕгӕйдӕр Йегови арфӕдзийнадӕ ӕй!

17. Каргун хуӕртӕ ӕма ӕнсувӕрти бон куд ӕй Лукай 6:38 финст дзурдтӕмӕ гӕсгӕ архайун?

 ¹⁷ Нӕ хъазар каргун хуӕртӕ ӕма ӕнсувӕртӕ, сумах уӕ цардӕй ӕвдесетӕ, Йеговӕн лӕггадӕ кӕнунӕй хуӕздӕр ке неци ес. Сумах Библий уагӕвӕрдтӕ хуӕздӕр базонунбӕл берӕ фӕййархайдтайтӕ ӕма цӕргӕ дӕр уонӕмӕ гӕсгӕ кодтайтӕ. Ӕма уӕ цардӕй бӕрӕг ӕй, е дзӕгъӕли ке н’ адтӕй! Сумах ӕй зонетӕ, раздӕр нӕ организаци цӕхуӕндӕр гъуддӕгти ӕндӕрхузи ке архайдта. Фал ӕй лӕдӕретӕ, уавӕртӕ ӕййевгӕ ке кӕнунцӕ ӕма нур рӕстӕг ӕндӕрхузи ке ӕй. Кӕд донаргъуд ӕрӕги райстай, уӕд дӕр дӕ бон ӕй ӕригӕнттӕн ӕнхус кӕнун. Зӕгъӕн, дӕ бон син ӕй радзорун, рӕстдзийнадӕ ке базудтай, е дин дӕ цард куд раййивта ӕма дин цӕйбӕрцӕ цийнӕ ӕрхаста, уой. Царди цӕбӕлти исахур айтӕ, уой иннетӕн ку амонайтӕ, уӕд уин Йеговӕ ӕнӕмӕнгӕй райарфӕ кӕндзӕй. (Бакӕсӕ Лукай 6:38.)

18. Ӕригӕнтти ӕма каргунти бон куд ӕй кӕрӕдземӕн ӕнхус кӕнун?

¹⁸ Ӕригӕнттӕ ӕма каргунтӕ ку лимӕн кӕнонцӕ, уӕд кӕрӕдземӕн хъӕбӕр устур ӕнхус уодзӕнцӕ. Алкӕмӕдӕр си ес, иннемӕ ци нӕййес, е. Зӕгъӕн, хестӕртӕ царди берӕ цидӕртӕ фӕууидтонцӕ ӕма ӕнцӕ фӕлтӕрдгун. Ӕригӕнттӕмӕ ба хъаурӕ фулдӕр ес (Ром. 1:12). Хъӕбӕр ӕхцӕуӕн нин ӕй, ӕригӕнттӕ каргунти хӕццӕ уотид ӕмгуст ке нӕ кӕнунцӕ, фал ма лимӕн дӕр ке кӕнунцӕ, е. Уотемӕй нӕ уӕларвон уарзӕгой Фиди ном кадгин кӕнунцӕ ӕма ӕмбурд федар кӕнунцӕ.