1. Waut kjenn wie doonen, wan wie ella woaren?

WAN wie ella woaren, dan sent wie veleicht een bät beduat, daut wie nich mea woaren soo väl fa Jehova doonen kjennen aus ea. Veleicht es daut soo, daut wie nich mea de Krauft haben waut ea. Oba wie kjennen doawäajen onse Weisheit un Erfoarunk brucken, om de junge Menschen uttolieren, daut dee mea fa Jehova siene Organisazion doonen kjennen un jratre Veauntwuatunk äwanämen. Een Brooda, waut aul lang Eltesta es, säd mol: “Aus ekj späad, daut ekj wäajen mien Ella nich mea wudd soo väl doonen kjennen aus ea, wia ekj dankboa, daut doa junge Breeda wieren, waut met dise Oppgowen wiedamoaken kunnen.”

2. Waut woa wie en disen Artikjel seenen?

² En dän väajen Artikjel hab wie jeseenen, woo de junge Menschen daut toom gooden es, wan dee Frind met de Elre woaren. En disen Artikjel woa wie seenen, woo de Elre fein met de junge Menschen toopschaufen kjennen, wan dee deemootich, bescheiden, dankboa un friejäwrich sent, un woo de gaunze Vesaumlunk daut kaun togood komen.

3. Waut sajcht Filippa 2:3-4 doaräwa, waut een deemootja Christ doonen woat, un woo kaun dän daut halpen?

³ De Elre motten deemootich sennen, wan see de Jinjre halpen wellen. Een deemootja Mensch talt aundre emma fa hecha aus sikj selfst (läs Filippa 2:3-4). Elre, waut deemootich sent, weeten, daut eena eene Oppgow foaken opp eene veschiedne Wajch doonen kaun, onen daut  de Schreft doa waut jäajen sajcht. Doawäajen velangen dee von aundre nich, daut dee Sachen krakjt soo doonen sellen, aus see daut emma jedonen haben (Liera 7:10). Dee kjennen de junge Menschen halpen, wan see dee von daut vetalen, waut see selfst jelieet haben. Dee weeten oba uk, daut sikj en “dise Welt” haustich waut endren kaun un daut eena Sachen nu veleicht aundasch doonen mott (1. Kor. 7:31).

4. Woo haben de Kjreisoppsechtasch biejlikj soone Enstalunk aus de Leviten ieeschtemma?

⁴ Deemootje elre Breeda kjennen vestonen, daut see nu nich mea soo väl doonen kjennen aus ea. Räd wie biejlikj mol äwa de Kjreisoppsechtasch. Wan dee ieescht 70 Joa sent, kjrieen dee eene aundre Oppgow. Daut es secha nich leicht fa dee. Dee jleichen daut sea, äare Breeda un Sestren opp dise Wajch to deenen. Dee leewen dise Oppgow un wudden jleichen, dee wieda to doonen. Oba dee kjennen uk vestonen, daut daut bäta es, wan de jinjre Breeda dise Oppgow doonen. Dee haben biejlikj soone Enstalunk aus de Leviten ieeschtemma en Israel, waut jewesse Oppgowen en daut Aunbädungszelt nich mea doonen kunnen, wan dee 50 Joa wieren. Dee äare Freid honk nich doavon auf, waut vonne Oppgow dee hauden. Dee deeden flietich, waut see kunnen, un holpen de Jinjre (4. Mo. 8:25-26). Breeda, waut 70 Joa sent, kjennen nich mea  aus Kjreisoppsechta aundre Vesaumlungen besieekjen, oba dee sent een groota Säajen fa dee Vesaumlunk, wua see nu sent.

5. Waut lia wie von Dan un Katie äa Biespel?

⁵ Besee wie ons Dan sien Biespel, waut 23 Joa Kjreisoppsechta wia. Aus hee 70 Joa wia, worden siene Fru Katie un hee Sondapionieren. Woo jeit dee daut nu en äare niee Omstend? Dan sajcht, daut hee nu soo drock es aus noch kjeenmol ea. Hee kjemt siene Oppgowen en de Vesaumlunk no un halpt aundre Breeda, daut see kjennen Deenstaumthelpa woaren, un lieet aundre ut, en groote Städa un em Jefenkjnis to prädjen. Jie elre Breeda, aus jie em Voltietdeenst sent ooda nich, jie kjennen väl doonen, om aundre to halpen. Woo? Paust junt aun june niee Omstend aun, nämt junt Sachen väa, waut jie doonen wellen, un kjikjt dolla no daut, waut jie nu doonen kjennen, aus no daut, waut jie nich doonen kjennen.

6. Wuarom es daut weis, bescheiden to sennen? Jeff een Biespel.

⁶ “De Bescheidne” kjanen äare Jrensen (Spr. 11:2, JHF). Wäajen dee bescheiden sent, woaren dee von sikj selfst nich mea velangen, aus dee doonen kjennen. Soo kjennen dee äare Freid hoolen un wieda flietich sennen. Wie wudden eenen bescheidnen Mensch kjennen met eenen vejlikjen, waut met sien Foatich oppem Boajch noppfoat. Daut dee opp dän Boajch noppkjemt, mott de Foara sien Foatich en een läajret Jia moaken. Secha woat dee nu sachta foaren, oba dee woat veraunkomen. Soo es daut uk met soonen, waut bescheiden es. Dee weet, wanea hee soo to sajen en een läajret Jia moaken mott, daut hee Jehova wieda deenen kaun un aundre halpen (Filip. 4:5, NW).

7. Woo wees Barsillai, daut hee bescheiden wia?

⁷ Denkj wie mol äwa daut Biespel von Barsillai no. Hee wia 80 Joa, aus de Kjennich David säd, daut hee kunn oppem Kjennichshoff sennen. Oba wäajen Barsillai bescheiden wia, deed hee daut nich. Hee wist, daut hee wäajen sien Ella aul nich mea soo väl doonen kunn, un doawäajen säd hee, daut Kimham, een junga Maun, en siene Städ kunn (2. Sam. 19:36-38). Soo aus Barsillai freien de elre Breeda sikj, wan de jinjre Breeda jewesse Oabeiten doonen kjennen.

8. Woo wees de Kjennich David, daut hee bescheiden wia, aus de Tempel jebut wort?

⁸ De Kjennich David wia uk sea bescheiden. Hee haud dän grooten Wensch, daut hee Jehova wull een Hus buen. Oba aus Jehova säd, daut nich hee dän Tempel buen wudd, oba de junga Salomo, wia hee doamet envestonen un unjastett dit Woakj soo goot, aus hee kunn (1. Chr. 17:4; 22:5). David docht nich, daut daut bäta sennen wudd, wan hee dän Tempel buen wudd, bloos wäajen Salomo “junk un onerfoaren” wia (1. Chr. 29:1). David wist, daut daut Buwoakj von dän Tempel nich von daut Ella ooda von de Erfoarunk aufhonk, oba von Jehova sienen Säajen. Soo aus David sent uk de elre Breeda fa wieda flietich, wan dee nu uk aundre Oppgowen haben. Un dee weeten uk, daut Jehova de Jinjre säajnen woat, waut nu dee Oabeit doonen, waut see ea deeden.

9. Woo wees een Brooda vom Betelkommitee, daut hee bescheiden wia?

⁹ Een Brooda, waut Shigeo heet, es uk  een goodet Biespel fa bescheiden sennen. Aune 1976, aus hee 30 Joa wia, wort hee Poat von een Betelkommitee. Aune 2004 wort hee dan de Plona von daut Betelkommitee. Met de Tiet wort hee dan en, daut hee nich mea de Krauft haud waut ea un daut am daut lenja dieed, siene Oppgow notokomen. Hee bäd äwa dise Sach un docht doaräwa no, wuarom daut wudd bäta sennen, wan een jinjra Brooda de Plona von daut Kommitee wort. Nu es Shigeo nich mea de Plona, oba hee es doawäajen wieda Poat von daut Betelkommitee un schauft doa fein met de Breeda toop. Waut hab wie von Barsillai, dän Kjennich David un Shigeo jelieet? Daut een deemootja un bescheidna Mensch nich soo sea doano kjikjt, waut de junge Menschen noch lieren motten, oba waut dee aul doonen kjennen. Dee woat de Jinjre nich aus siene Jäajna talen, oba aus siene Metoabeida (Spr. 20:29).

10. Woo denkjen de elre Breeda äwa de jinjre Breeda?

¹⁰ De Elre seenen de Jinjre aus een Jeschenkj von Jehova un doafäa sent dee sea dankboa. Wan de Elre seenen, daut äare Krauft nolat, sent dee sea froo, daut doa Jinjre un Stoakjre sent, waut de Oabeit von de Vesaumlunk doonen kjennen un wellich reed sent, doa mettohalpen.

11. Woo wiest Rut 4:13-16, daut Elre daut togood kjemt, wan dee de Jinjre äare Help aunnämen?

¹¹ Noomi von de Bibeltiet es uk een goodet Biespel doafäa, woo Elre de Help von de Jinjre aunnämen kjennen. Ieeschtlich wull Noomi, daut äare Schwieedochta Rut, waut eene Wätfru wia, trigj no äa Volkj gonen sull. Oba aus Rut doaropp  bestunt, daut see met Noomi toop wull no Betlehem gonen, neem see de Help von Rut aun (Rut 1:7-8, 18). Un beid Frues worden sea doafäa jesäajent! (Läs Rut 4:13-16.) Deemootje elre Breeda woaren Noomi äa Biespel wellich nodoonen.

12. Woo wees de Apostel Paulus, daut hee dankboa wia?

¹² De Apostel Paulus wia dankboa fa de Help, waut siene Breeda un Sestren am jeewen. Biejlikj dankt hee de Christen en Filippi doafäa, daut see am em tieteljen utjeholpen hauden (Filip. 4:16). Hee wees siene Dankboakjeit uk fa de Help, waut Timotäus am jeef (Filip. 2:19-22). Un Paulus dankt uk Gott fa deejanje, waut am Moot toospruaken, aus hee aus Jefangna no Room must (Apj. 28:15). Paulus wia sea stoakj un hee reisd dusende Kilomeeta, om aundre to prädjen un om de Vesaumlungen Moot tootospräakjen. Oba hee wia deemootich un neem de Help von siene Breeda un Sestren aun.

13. Woo kjennen de Elre äare Dankboakjeit fa de Jinjre wiesen?

¹³ Jie Elre haben väle Mäajlichkjeiten, woo jie june Dankboakjeit fa de Jinjre en de Vesaumlunk wiesen kjennen. Wan dee junt biejlikj wellen metem Foatich metnämen ooda fa junt enkjeepen ooda aundre Sachen fa junt doonen, dan seet daut aus eenen Bewies doafäa aun, daut Jehova junt leeft. Jie woaren veleicht goode Frind met dee woaren, waut junt halpen. Vesieekjt emma, june jinjre Frind to halpen, daut dee Jehova noda komen kjennen, un sajcht dee, woo schaftich jie sent, daut de Junge mea en de Vesaumlunk doonen wellen. Un nämt junt uk Tiet fa dee un vetalt dee Erfoarungen, waut jie aul jemoakt haben. Wan jie daut doonen, dan kjenn jie Jehova june Dankboakjeit wiesen fa de Jinjre, waut hee no sien Volkj jetrocken haft (Joh. 6:44; Kol. 3:15; 1. Tess. 5:18).

14. Aun waut wia to seenen, daut de Kjennich David friejäwrich wia?

¹⁴ Von dän Kjennich David kjennen de Elre noch waut wichtjet lieren. Dee wia sea friejäwrich un jeef een deel Jelt un aundre wieetvolle Sachen toom dän Tempel buen (1. Chr. 22:11-16; 29:3-4). Hee deed daut, wan hee uk goot wist, daut sien Sän Salomo de mieeschte Iea fa dit Buwoakj kjrieen wudd. Wan wie selfst nich mea jenuach Krauft haben toom bie daut Buwoakj metmoaken, dan wudd wie kjennen Gowen jäwen, om daut soo goot aus mäajlich to unjastetten. Un wie kjennen daut, waut wie en ons Läwen aul jelieet haben, brucken toom de Jinjre halpen.

15. Waut fa wieetvollet lieed de Apostel Paulus Timotäus?

¹⁵ De Apostel Paulus wia uk sea friejäwrich. Hee neem dän jungen Timotäus met opp siene Prädichtreisen un lieed dän wellich, woo hee fein prädjen un aundre lieren kunn (Apj. 16:1-3). Wiels Paulus am soo fein utlieed, wort Timotäus selfst een gooda Liera (1. Kor. 4:17). Un Timotäus kunn aundre dan daut lieren, waut hee von Paulus jelieet haud.

16. Wuarom lieed Shigeo aundre ut?

¹⁶ De elre Breeda woaren nich beduaren, daut see nich mea to brucken sent, wan see jinjre Breeda fa dee Oabeit utlieren, waut see selfst emma fa de Vesaumlunk jedonen haben. Shigeo, wua wie ea von räden, lieed biejlikj met de Joaren de  jinjre Breeda von daut Betelkommitee ut. Hee deed daut, wiels hee wist, daut daut wudd goot sennen fa daut Kjennichrikjswoakj en dit Launt. Un aus hee dan nich mea selfst de Leida von daut Betelkommitee sennen kunn, wia doa aul een aundra Brooda, waut fein doafäa utjelieet wia. Un wiels Shigeo aul äwa 45 Joa Poat von daut Betelkommitee es, kaun hee daut, waut hee doa jelieet haft, brucken toom de jinjre Breeda halpen. Soone Breeda aus hee sent en Gott sien Volkj sea wieetvoll!

17. Woo kjennen de elre Breeda daut doonen, wua Lukas 6:38 von rät?

¹⁷ Jie elre Breeda un Sestren sent een Bewies doafäa, daut et nuscht bätret jeft, aus aun Jehova to jleewen un am tru to deenen. Jun Läwen bewiest, daut sikj daut loont, de biblische Gruntsauzen kjanen to lieren un dee uk notokomen. Jie weeten, woo Sachen ea jedonen worden, oba jie weeten uk, daut eena daut nu eenjemol aundasch doonen mott, wäajen de Omstend sikj jeendat haben. Jie Elre, waut noch nich lang jedeept sent, sent uk sea wieetvoll fa aundre. Jie kjennen dee weeten loten, woo schaftich jie sent, daut jie Jehova nu kjanen jelieet haben. De Jinjre woaren daut väl räakjnen, wan jie dee von daut vetalen, waut jie aul beläft un jelieet haben. Jehova woat junt sea säajnen, wan jie aundre doaderch waut jäwen, daut jie dee met daut halpen, waut jie aul jelieet haben (läs Lukas 6:38).

18. Wuarom es daut goot, wan de Jinjre un de Elre fein toopschaufen?

¹⁸ Wan jie leewe elre Breeda goode Frind met de Jinjre woaren, dan woa jie junt omzajcht unjastetten kjennen (Reem. 1:12). Jieda eena haft waut wieetvollet, waut de aundra nich haft. De Elre haben väl Weisheit un Erfoarunk un de Jinjre haben väl Krauft. Wan de Jinjre met de Elre aus Frind toopschaufen, dan ieren dee onsen leeftoljen himlischen Voda un sent een Säajen fa de gaunze Vesaumlunk.