1. Mas edäyarninqa, ¿imata ruranapaqtan churapakashwan?

MAS EDÄYARNINQA, Jehoväta unënöna manana sirwinapaq kaqta pensarmi llakikuntsik. Itsachi unënönatsu kallpantsikqa kan. Tsënö kaptimpis, watakuna pasanqanmannö yachakunqantsiknömi, Jehoväta mas sirwiyänampaq y mas cargukunata chaskiyänampaq jövinkunata yanapëta puëdintsik. Creikoqkunata rikar mëtsika watapana yanapakoq juk wawqim kënö nirqan: “Mas edäyarnin ruranqäkunata rurëta manana puëdirmi, tsë trabäjuta rurayänampaq listu këkaq jövinkunapita alläpa kushikurqä”.

2. ¿Imatataq këchö yachakushun?

² Pasaqchömi yachakurqantsik, edäna wawqi panikunawan amïgu tikraq jövinkunaqa imëkata yachakuyanqanta. Këchömi, edäyashqakuna humildi kayanqan, imakunallata rurëta puëdiyanqanta yarpäyanqan, agradecikoq kayanqan y kuyakoq kayanqan jövinkunawan juntu trabajayänampaq, imanö yanapakunqanta yachakushun.

3. (1) Filipensis 2:3 y 4 ninqannö, ¿imanötan humildi nunaqa? (2) ¿Imanötan juk nunata humildi kanqan yanapan?

³ Jövinkunata edäyashqakuna yanapëta munarqa, humildim kayänan. Humildi kaqkunaqa, wakinkuna mas alli kayanqantam yarpäyan (leyi Filipensis 2:3, 4). Tsënö humildi edäna wawqi panikunaqa, Biblia ninqannö imapis juknöpa rurakëta puëdikanqantam yarpäyan. Tsëmi pëkuna rurayanqannö wakinkuna rurayänantaqa shuyaräyantsu (Ecl. 7:10). Imëkata rurëta yachayaptimpis, kë munduchö pasakuykanqankuna  cambiarëkanqantam yarpäyan y imatapis juknöpana rurayänampaqmi churapakäyan (1 Cor. 7:31).

4. Congregacionkunata watukaqkunaqa, ¿imachötan levïtakunanö pensayan?

⁴ Edäna kaq humildi wawqi panikunaqa, unënö rurëta manana puëdiyanqantam yarpäyan. Congregacionkunata watukaq wawqikunallaman pensarishun. Pëkunaqa, 70 watankunata cumplirirqa, juknöpanam yanapakuyan. Congregacionkunata watukayanqanchö wawqi panikunata kushishqa yanapar y tsëta rurë alläpa gustayaptinmi, juknöpana yanapakuyänampaq kaqqa itsa fäciltsu kanman. Tsënö kaptimpis, tsë cargukunachö mas jövin kaqkuna yanapakuyänampaq kaqtaqa allim entiendiyan. Pëkunaqa, 50 watankunata cumplirirnin Diospa carpa wayinchö yanapakuyta dejaq levïtakunanömi pensayan. Pëkunaqa manam cargunkunarëkurtsu kushishqaqa kayaq, puëdiyanqanmannömi mas jövinkunata kushishqa yanapayaq (Nüm. 8:25, 26). Congregacionkunata manana watukaq wawqikunaqa, kanan kayanqan congregacionchö wawqi panikunatam alläpa yanapayan.

5. ¿Imatataq wawqi Dan y Katie rurayanqampita yachakunki?

⁵ 23 watapa, congregacionkunata watukarnin yanapakoq Dan jutiyoq wawqipita parlarishun. 70 watanta cumpliriptinmi, pëta y Katie jutiyoq warminta precursor  especialna kayänampaq niyarqan. ¿Imanötan yanapakuyanqanchö këkäyan? Danqa congregacionninchö yanapakurnin imëpitapis mas rurëyoq kanqantam nin. Creikoqkunata rikaqkunata yanaparnin kayänampaq, mëtsika nunakuna puriyanqanchö y carcelkunachö yachatsikuyänampaqmi wawqi panikunata yachatsir këkan. Edäyashqana wawqi panikuna, llapan tiempuykikunawan Jehoväta sirwir o puëdiyanqëkimannölla sirwirnimpis, imëkanöpam wakinkunata yanapëta puëdiyanki. Tsëtaqa juknöpana yanapakuyanqëkichö kallpachakur, masta rurayänëkipaq churapakar y rurëta puëdiyanqëkiman yarparninmi rurayanki.

6. ¿Imanirtan llapanta rurëta mana puëdinqantsikta yarpanqantsikqa alli? Willakaramuy.

⁶ Llapanta rurëta mana puëdinqanta yarpaq nunaqa, manam mana puëdinqantaqa rurantsu (Prov. 11:2). Tsënö karmi kushishqa kawakun. Mëyaqlla rurëta puëdinqanta yarpaq nunaqa, biciclëtanwan ëwëkarnin ishkëlla tsakarëkaq qerupa mayuta tsimpanampaq biciclëtampita yarpurir despaciulla tsimpaq nunanömi. Tsënöllam llapanta rurëta mana puëdeq nunaqa, Jehoväta sirwinqanchö y wakinkunata yanapanqanchö mëyaqllana rurëta puëdinqanta cuentachö katsin (Filip. 4:5).

7. ¿Imanötan Barziläiqa mëyaqlla rurëta puëdinqanta rikätsikurqan?

⁷ Barziläi jutiyoq nunapita parlarishun, pëqa 80 watayoqnam karqan gobernakunan wayinchö yanapakunampaq David ninqan witsanqa. Pëqa edäna karnin mana yanapakunampaq kaqta yarparmi, Davidwan ëwarqantsu. Tsëpa rantinqa, Kimham jutiyoq jövinta apanampaqmi nirqan (2 Sam. 19:35-37). Barziläinöllam edäna wawqikunaqa, jövin kaqkuna juk cargukunachö yanapakuyänampaq dejayan.

8. Jehoväpaq juk templuta rurëta munanqanchö, ¿imanötan llapanta rurëta mana puëdinqanta rey David rikätsikurqan?

⁸ Rey Davidpis, llapanta rurëta mana puëdinqantaqa cuentachömi katsirqan. Jehoväpaqmi juk wayita sharkatsita alläpa munarqan, peru jövin wamran Salomon tsë wayita sharkatsinampaq kaqta Jehovä niptinqa, manam piñakurqantsu. Sinöqa, tsë wayita rurayänampaqmi yanapakurqan (1 Crön. 17:4; 22:5). Salomon jövinllaraq kaptin y yachakunan pishiptinraqpis, Davidqa tsë wayita kikin mas alli ruranampaq kaqtaqa manam pensarqantsu (1 Crön. 29:1). Davidqa clärum musyarqan, tsë wayiqa alli rurakänan karqan manam ruratseqnin edäna o yachaq kaptintsu, sinöqa Jehoväpa bendicionnimpitam. Davidnöllam, edäyashqana wawqikunaqa juk cargukunayoqna karnimpis, imëkachö yanapakuyta puëdiyan. Y puntata kayanqan cargunkunachö, kanan këkaq jövinkunata Jehovä bendicinampaq kaqtam musyayan.

9. ¿Imanötan Sucursalta Rikaq juk wawqi llapanta rurëta mana puëdinqanta rikätsikurqan?

⁹ Kanan witsankunapis, llapanta rurëta mana puëdiyanqanta yarpaq wawqikunaqa kayanmi. Jukqa, Shigeu jutiyoq wawqim. 1976 watachö 30 watayoq këkaptinmi, Sucursalta Rikaq kanampaq churayarqan. 2004 watachönam, sucursalta rikaqkuna rurayänanta rikaq kanampaq churayarqan. Mas tiempu pasarinqanchöqa, unënö imatapis rurëta manana puëdinqantam cuentata qokurirqan. Tsëmi Jehoväta mañakurqan, y pë këkanqan carguchö juk jövin yanapakunampaq  kaqtam pensarqan. Kanan witsanqa, manam Sucursalta Rikaqkuna rurayanqanta rikannatsu. Tsënö kaptimpis, Sucursalta Rikaqkunachö yanapakurmi sïguin. Barziläipita, rey Davidpita y Shigeupitaqa yachakuntsik, humildi kaq y llapanta rurëta mana puëdinqanta yarpaqqa, manam jövinkuna yachakuyänanraq pishinqantatsu pensan. Sinöqa imata rurëta puëdiyanqanmanmi yarpan y yanapakoq mayinkunatanö rikarmi chikipantsu (Prov. 20:29).

10. ¿Imanötan edäyashqa kaqkuna jövin kaqkunata rikäyan?

¹⁰ Edäyashqa wawqi panikunaqa, Jehoväpa qarënintanömi jövinkunata rikäyan y imëkata rurayanqampitam agradecikuyan. Kallpankuna wallkayar qallëkuptin, congregacionchö jövinkuna yanapakuyta munar kallpachakuyanqampitam, pëkunata alläpa valorayan.

11. Rut 4:13 a 16 ninqannöpis, ¿ima bendiciontataq chaskiyan mas jövin kaqkuna yanapayänanta dejaq edäna wawqi panikunaqa?

¹¹ Agradecikoq y mas jövin kaqkuna yanapayänanta permiteq nunakunapitaqa, mëtsikaqpaqmi Biblia willakun. Jukqa Noemïmi karqan. Llumtsïnin Rut viudayäriptinqa, Noemïqa familianman kutikunampaqmi nirqan. Peru kutin kutin Belenman ëwayänampaq Rut niptinmi, Noemïqa pëwan ëwananta dejarqan (Rut 1:7, 8, 18). Tsënö rurayanqampitam ishkampis bendicionta chaskiyarqan (leyi Rut 4:13-16). Edäyashqana humildi wawqi panikunaqa, Noemï ruranqannöllam rurayan.

12. ¿Imanötan apostol Pabluqa agradecikoq kanqanta rikätsikurqan?

¹² Apostol Pablupis, yanapayanqampitaqa  alläpam agradecikurqan. Juk kutichöqa, encomiendan apatsiyanqampitam Filïpus markachö wawqi panikunata agradecikurqan (Filip. 4:16). Jina Timoteu yanapanqampitapis agradecikurqanmi (Filip. 2:19-22). Y Römata prësu apëkäyaptin, shumaq parlapar yanapaq wawqi panikunapitam, Diosta agradecikurqan (Hëch. 28:15). Apostol Pabluqa, Diospita yachatsikunampaq y wawqi panikunata yanapanampaqmi, më tsëpa viajashqa karqan. Tsënö karpis, mana orgullösu karmi wawqi paninkuna yanapayänanta dejarqan.

13. Edäyashqa wawqi panikunaqa, ¿imanötan rikätsikuyanman jövinkuna rurayanqampita agradecikuyanqanta?

¹³ Edäyashqa wawqi panikuna, congregacionchö jövin kaqkuna yanapakuyanqampitaqa, tukuynöpam agradecikuyta puëdiyanki. Mëtapis ëwayänëkipaq, rantipakoq ëwayänëkipaq o imachöpis yanapayäshunëkipaq niyäshuptikiqa, kushishqa agradecikuyë. Kuyayäshunqëkita Jehovä tsënö rikëkätsiyäshunqëkiman yarpäyë. Itsapis tsënöpa tsë jövinkunawan mas amïgu këman chäyankiman. Jina Diosta mas sirwiyänampaq jövinkunata imëpis yanapayë. Congregacionchö mas jövinkuna yanapakoq kayanqampita kushikuyanqëkita niyë. Tiempuykikunata rakiyë pëkunata wiyayänëkipaq, y imëkapa pasayanqëkita willayänëkipaq. Tsënö rurarqa, congregacionchö jövinkuna kayanqampita Jehoväta agradecikuyanqëkitam rikätsikuyanki (Col. 3:15; Juan 6:44; 1 Tes. 5:18).

14. ¿Imanötan rey Davidqa alli nuna kanqanta rikätsikurqan?

¹⁴ Rey David qarakoq kanqampitapis, edäyashqa wawqi panikunaqa yachakuyanmanmi. Pëqa, Jehoväpa templunta rurayänampaqmi imëkawan yanapakurqan (1 Crön. 22:11-16; 29:3, 4). Tsë templuta ruranqampita Salomon reqishqa kanampaq kaptimpis, yanapakurqanmi. Edäna karnin, Diosta adoranapaq wayikunata rurëchö yanapakuyta mana puëdirpis, qellënikiwanqa puëdinqëkimannömi yanapakuyta puëdinki. Y kawënikikunachö yachakuyanqëkita, jövin kaqkunata yachatsiyë.

15. ¿Imakunatataq Timoteuta Pablu yachatsirqan?

¹⁵ Apostol Pablupis alli nunam karqan. Juk läduchö yachatsikuyänampaqmi Timoteuta yanaqänampaq nirqan, y nunakunata Diospita imanö parlapänampaq y yachatsinampaqmi yachatsirqan (Hëch. 16:1-3). Pablu tsënö yachatsinqanqa, alli willakuykunata shumaq yachatsikunampaqmi yanaparqan (1 Cor. 4:17). Y Timoteuqa, Pablu yachatsinqannöllam wakinkunata yachatsirqan.

16. ¿Imanirtan Shigeu wawqiqa wakinkunata yachatsirqan?

¹⁶ Kanan witsan edäyashqa wawqikunaqa, imëkatam jövinkunata yachatsiyan. Manam mantsayantsu, pëkuna yanapakuyanqan cargukunachö mas jövin kaqkunana yanapakuyänantaqa. Nuëvi kaq pärrafuchömi, wawqintsik Shigeupaq parlarqantsik. Pëqa watakuna pasanqanmannömi, Sucursalta Rikaqkunapita mas jövin kaqkunata imëkata yachatsirqan. Tsëtaqa rurarqan, yanapakunqan nacionchö wawqi panikuna Diospita mas yachatsikurnin sïguiyänampaqmi. Tsëmi sucursalta rikaqkuna rurayanqanta rikaq këta manana puëdiptinqa, yachatsiyanqan wawqi tsë carguchö yanapakur qallëkurqan. Shigeuqa, Sucursalta Rikaqkunawan 45 watapitapis mas yanapakunqanchö yachakunqantaqa, wakin jövinkunatapis yachatsirninmi sïguin. Diosta sirweqkunachö,  Shigeu wawqinö kaqkunaqa alläpam yanapakuyan.

17. Lücas 6:38 ninqannö, ¿imanötan edäyashqakunaqa wakinkunata yanapëta puëdiyan?

¹⁷ Edäyashqana wawqi panikuna, qamkunaqa allim musyayanki Jehoväman confiakur y pëllata sirwirnin mas kushishqa kawakunqantsiktaqa. Imanö kawayanqëkim rikätsikun, Bibliachö këkaq consëjukuna ninqannö kawakuy mas alli kanqanta. Mëtsika watakunapana yanapakurmi, unë witsankuna imapis imanö rurakanqanta alli musyayanki. Tsënö kaptimpis, kanan witsankuna imapis juknöpana rurakanqantaqa yachakuyta procurëkäyankim. Y edäna tsëllaraq bautizakushqa kaqkunaqa, Jehoväta reqiyanqëkipita imanir kushishqa kayanqëkitam wakinta willëta puëdiyanki. Jövinkunataqa, imakunapa pasayanqëkita wiyëqa alläpam gustanqa. Yachakuyanqëkipita wakinkunata yachatsiyaptikiqa, Jehoväqa bendiciyäshunkim (leyi Lücas 6:38).

18. ¿Imanötan edäna kaqkuna y jövin kaqkuna yanapanakuyan?

¹⁸ Edäna kaq wawqi o pani jövin kaqkunaman mas witiptinqa, ishkankunam yanapanakuyanqa (Rom. 1:12). Edäna kaqkunaqa, watakuna pasanqanmannömi imëkata yachakuyashqa y jövin kaqkunaqa imatapis rurayänampaqmi kallpayoq kayan. Jövin kaqkuna y edäna kaqkuna shumaq trabajayaptinqa, congregacionpaqmi juk bendicion cuenta kayan y Teytantsik Jehovätam alabayan.