1. Eaa tetai akakoroanga meitaki ta tatou ka akanoo me ruaine mai tatou?

ME RUAINE tatou, penei ka manata mai tatou e kare a Iehova e taangaanga maata akaou ia tatou. E tika, kua iti mai to tatou maroiroi mei to mua ana, inara ka rauka rai ia tatou i te taangaanga i to tatou kite e te pakari no te akamaroiroi i te au mapu kia tavini maata atu ia Iehova. Karanga tetai tangata pakari kua roa te tavini anga, “Te kite anga au e kare e rauka akaou iaku i te akono i tetai au apainga, kua mataora au e kua tereniia tetai taeake mapu kia rave i te reira.”

2. Eaa ta tatou ka uriuri i roto i teia atikara?

² Kua uriuri te atikara i mua ake akapeea te au mapu e puapingaia ai me akaoaoa atu ratou ki te au taeake pakarikari. I roto i teia atikara, ka kite mai tatou akapeea te tu akaaka, te tu tau, te tu akameitaki, e te tu oronga me tauturu i te aronga pakarikari kia angaanga kapiti ki te au mapu, kia puapingaia te putuputuanga.

3. Ia Philipi 2:3, 4, eaa te tu akaaka e akapeea te reira me tauturu i tetai Kerititiano?

³ Ka akaari te aronga pakarikari i te tu akaaka me ka inangaro ratou i te tauturu i te au mapu. Ka manako ua rai te tangata tu akaaka e e meitaki atu tetai ke iaia. (E tatau ia Philipi 2:3, 4.) Kua kite te aronga pakarikari tei akaari i te tu akaaka, e e maata te au ravenga meitaki no te akono i tetai apainga tei rotai ki te au kaveinga Pipiria. No reira, kare ratou e anoano i te katoatoa kia aru i ta ratou i rave  i mua ana. (Kohe. 7:10) Noatu e maata ta ratou ka rauka i te apii ki teia uki ou, kua mārama ratou e “te ngaro ke nei oki te tu o teianei ao” e ka anoanoia rai ratou kia taui ki te au ravenga ou.​—1 Kori. 7:31.

4. Akapeea te au akaaere kotinga me akaari i te tu ta te ngati Levi i akaari?

⁴ Ka mārama te aronga pakarikari tu akaaka e kare e rauka akaou ia ratou i te tavini mei to mua ana. Ei akaraanga, akamanako ana i te au akaaere kotinga. Me tae ratou ki te 70 mataiti, ka orongaia tetai apainga ke kia ratou. Kare teia i te mea māmā. E mataora ana ratou i te tavini i to ratou au taeake. E apainga akaperepere teia na ratou e te vai ra to ratou inangaro maata no te rave i teia angaanga. Inara kua mārama ratou e ka anoanoia te au taeake mapu kia akono i teia apainga. No reira ka akaari ratou i te tu ta te ngati Levi o Iseraela i akaari. Me tae ratou ki te 50 mataiti, ka akamutu ta ratou tavinianga i ko i te tapenakara. Kua mataora ua te ngati Levi pakarikari noatu eaa te apainga ka orongaia kia ratou. Kua rave maroiroi ratou i teia au apainga, e kua tereni katoa i te au taeake mapu. (Nume. 8:25, 26) I teia tuatau, me tae te au akaaere kotinga ki te 70 mataiti, kare ratou e atoro akaou i te au putuputuanga tukeke, mari ra ka rauka ia ratou i te tauturu e te akamaroiroi i ta ratou uaorai putuputuanga.

5. Eaa taau ka apii mai mei te akaraanga o Dan e Katie?

 ⁵ Akamanako i te akaraanga o Dan, tei tavini ana ei akaaere kotinga no tetai 23 mataiti. Te taeanga tona mataiti ki te 70, kua tavini aia e tana vaine ko Katie ei painia takake. Akapeea raua i te akatano anga ki teia turanga ou? Karanga a Dan e kua maata atu tana angaanga i teianei! Ka rave aia i tana apainga i roto i te putuputuanga, ka tauturu i te au taeake kia riro ei tavini tauturu, ka tereni i tetai ke no te tutu aere ki te ngai e maata te tangata e i roto i te are auri. E te aronga pakarikari, me te tavini tamou ra kotou e me kare, ka rauka rai ia kotou i te tauturu i tetai ke. Akapeea? E akatano ki toou turanga ou, akanoo i tetai akakoroanga ke, e kia akamou ki runga i taau ka rauka i te rave.

6. Eaa i meitaki ei kia akaari i te tu tau? Akatutu mai.

⁶ Ka akakeu te tu tau i tetai tangata kia kore e manako e e maata atu tana ka rauka i te rave. Te ka tupu, ka mataora aia e ka tavini maroiroi ua atu rai. Ka akaaite tatou i tetai tangata tau, ki tetai tangata e akaoro ra i tona motoka ki runga i te maunga. Ka anoanoia aia kia taui i te gear o te motoka ki raro mai kia tae aia ki runga. Te tika, penei ka aere marie ua aia, inara ka tere rai aia ki mua. Mei te reira rai, ka kite tetai tangata tau i te tuatau “kia taui i te gear” kia rauka ua rai iaia i te tavini ia Iehova.​—Phili. 4:5.

7. Akapeea a Barezilai te akaarianga i te tu tau?

⁷ Akamanako ana i te akaraanga o Barezilai, e 80 ona mataiti te pati anga te Ariki ko Davida iaia ki roto i te are ariki. No to Barezilai tu tau, kare aia i āriki i te patianga a te ariki. Kua kite a Barezilai e kare ona maroiroi no tona tu ruaine, e kua karanga e ko te taeake mapu ko Kimihama te ka tau kia aere. (2 Samu. 19:35-37) Mei ia Barezilai rai, kia oronga te au taeake pakarikari i te apainga ki te au mapu.

8. Akapeea a Davida te akaarianga i te tu tau no te patu anga i te iero?

⁸ Kua akaari katoa te Ariki ko Davida i te tu tau. E ākā inangaro tona i te patu i te are o Iehova. Inara, te akakiteanga a Iehova e ka orongaia teia tikaanga kia Solomona, kua āriki a Davida i ta Iehova ikianga e kua turu i te reira ma te ngakau katoa. (1 Para. 17:4; 22:5) Kare a Davida i manako ana e koia tei tau no teia angaanga no te mea te “vai ou ua nei [a Solomona] e te pakari kore.” (1 Para. 29:1) Kua kite a Davida e ka patuia te iero, no te mea ka akameitaki a Iehova i te reira, kare no te mataiti e te tu kite karape o te tangata te ka arataki. Mei ia Davida rai, kia tavini maroiroi ua atu rai te aronga pakarikari noatu ka taui ta ratou apainga. E kua kite ratou e ka akameitaki a Iehova i te au mapu te ka akono i te apainga ta ratou i rave i mua ana.

9. Akapeea tetai taeake o te Kumiti Betela te akaari anga i te tu tau?

⁹ Ko te taeake ko Shigeo tetai akaraanga no te tu tau i teia tuatau. I te 1976, e 30 ona mataiti, kua patiia aia kia tavini ki runga i te Kumiti Betela. I te 2004, kua ikiia aia ei taeake tauturu no te Kumiti Betela. Kua kite mai aia i muri mai e kare aia e maroiroi akaou ana e kua ngatā iaia i te rave meitaki i tana angaanga. Kua pure aia no runga i te reira e kua manako  e e meitaki atu na tetai taeake mapu e akono i teia apainga. Noatu kare koia te taeake tauturu, te tavini maroiroi nei rai a Shigeo ki runga i te Kumiti Betela. Mei te akaraanga o Barezilai, te Ariki ko Davida, e Shigeo, ko te tangata tu akaaka e te tau, ka akamou aia ki runga i te tu maroiroi o te au mapu e kare ki runga i to ratou tu pakari kore. Kare aia e tarere atu kia ratou, mari ra ka angaanga kapiti ei au oa angaanga.​—Mase. 20:29.

10. Eaa te manako o te aronga pakarikari no te au mapu i roto i te putuputuanga?

¹⁰ Ka akameitaki te aronga pakarikari ia Iehova no te au mapu tana i oronga mai. Ia ratou e ruaine atura, ka akameitaki te aronga pakarikari i te au mapu tei taangaanga i to ratou maroiroi kia tavini i roto i te putuputuanga.

11. Akapeea a Ruta 4:13-16 te akaarianga mai i te akameitakianga ka rauka me ārikiia te tauturu a te au mapu?

¹¹ Ko Naomi tetai akaraanga meitaki i roto i te Pipiria no tetai ruaine tei āriki i te tauturu a tetai mapu. Muri ake te mate anga te tamaiti a Naomi, kua akakite aia kia Ruta kia oki ki tona kopu tangata. Inara, kua inangaro a Ruta i te aru ia Naomi ki Betelehema, e kua āriki a Naomi i ta Ruta tauturu. (Ruta 1:7, 8, 18) E kua akameitakiia teia nga vaine! (E tatau ia Ruta 4:13-16.) Ka akakeu te tu akaaka i te aronga pakarikari kia aru i te akaraanga o Naomi.

12. Akapeea te apotetoro ko Paulo te akaarianga i te tu akameitaki?

¹² Kua mareka a Paulo i te au taeake tei tauturu iaia. Ei akaraanga, kua akameitaki aia i te au Kerititiano i Philipi no te au apinga ta ratou i oronga  kiaia. (Phili. 4:16) Kua akameitaki aia ia Timoteo no tana tauturu. (Phili. 2:19-22) E kua akameitaki a Paulo i te Atua no te au taeake tei aere mai i te akamaroiroi iaia te apainaia anga aia ki Roma ei mou auri. (Anga. 28:15) E taeake maroiroi a Paulo i te tutu aere ki te au enua mamao e kua akamaroiroi aia i te au putuputuanga. Noatu ra, e tu akaaka tona e kua āriki aia i te tauturu a tona au taeake e te au tuaine.

13. Akapeea te aronga pakarikari me akaari i te tu akameitaki no te au mapu?

¹³ E te aronga pakarikari, e maata te au ravenga i te akaari i toou tu akameitaki no te au mapu i roto i te putuputuanga. Me ka inangaro ratou i te tauturu ia koe, te apai ia koe ki te toa, e te rave i tetai ua atu angaanga, e āriki i ta ratou tauturu. E akamaara, te akaari maira a Iehova i tona aroa na roto ia ratou. Penei ka riro mai ratou ei au oa meitaki noou. Ka rauka ia koe i te tauturu ua rai ia ratou kia akavaitata atu kia Iehova, e kia akakite koe i toou rekareka no te au mapu e tavini maroiroi ra i roto i te putuputuanga. E akapou i tetai taime no te akakite kia ratou i te au tupuanga meitaki taau i kite mai. Me pera koe, ka “mareka” koe ia Iehova no tei akavaitata mai i te au mapu ki roto i te putuputuanga.​—Kolo. 3:15; Ioa. 6:44; 1 Tesa. 5:18.

14. Akapeea te Ariki ko Davida te akaarianga i te tu oronga ua?

¹⁴ Ka kite mai tatou i tetai akaou tu manea mei te akaraanga o te Ariki ko Davida te ka rauka i te aronga pakarikari i te akaari​—te tu oronga ua. E maata tana moni i oronga no te tauturu i te patu anga i te iero. (1 Para. 22:11-16; 29:3, 4) Kua rave aia i teia noatu ka aere te akameitakianga no teia angaanga ki tana tamaiti ko Solomona. Me kare o tatou maroiroi akaou kia piri ki roto i te angaanga patu are akamorianga, ka rauka ia tatou i te oronga i te au moni tauturu tei tau ki to tatou turanga. E ka rauka ia tatou i te apii i te au mapu i te au mea puapinga ta tatou i mou mai i roto i teia angaanga.

15. Eaa te au mea meitaki ta te apotetoro ko Paulo i apii kia Timoteo?

¹⁵ No te tu oronga ua, e akamanako ana i te akaraanga o te apotetoro ko Paulo. Kua pati aia ia Timoteo kia aru iaia ki roto i te angaanga mitinari, e kua apii a Paulo i tana au ravenga no te tutu aere e te apiianga ki teia taeake mapu. (Anga. 16:1-3) Kua tauturu a Paulo ia Timoteo kia karape i te tutu aere i te nuti meitaki. (1 Kori. 4:17) I reira, kua taangaanga a Timoteo i ta Paulo i apii kiaia no te tereni atu i tetai ke.

16. Eaa te tumu i tereni ei a Shigeo i tetai ke?

¹⁶ Kare te aronga pakarikari e mataku me kare ratou e taangaanga akaouia me ka tereni ratou i te au mapu kia akono i te au apainga ta ratou i rave ana. Ei akaraanga, i te au mataiti i aereia mai, kua tereni a Shigeo, tei taikuia i mua ana, i te au taeake mapu i runga i te Kumiti Betela. Kua rave aia i teia no te tauturu i te angaanga o te Patireia i te ngai e tavini ra aia. Tei tupu, i te tuatau kare e rauka akaou iaia kia tavini ei taeake tauturu, kua rauka mai tetai taeake tau meitaki i te mono iaia. Kua tavini a Shigeo ei taeake i runga i te Kumiti Betela no tetai 45 mataiti e kua tauturu aia i te au taeake mapu i runga i te Kumiti. E akameitakianga teia ki te iti tangata o te Atua!

17. Ia Luka 6:38, eaa ta te aronga pakarikari ka rauka i te oronga ki tetai ke?

 ¹⁷ Kua riro kotou e te au taeake e te au tuaine pakarikari ei akapapuanga e ko te tavini tiratiratu ia Iehova te oraanga meitaki rava atu. Kua akaari mai to kotou akaraanga i te puapinga o te apii e te taangaanga i te au kaveinga Pipiria. Kua kite kotou akapeea te angaanga i te raveia anga i te taime mua, e te au tauianga ka anoanoia i teia tuatau. Te aronga pakarikari koi papetitoia ua ake nei, e maata ta kotou ka rauka i te oronga; e akakite i te mataora o te apii anga ia Iehova i to kotou ruaine anga. Ka mataora te au mapu i te akarongo i ta kotou i na roto ana e te au apiianga tei mou mai. Me “oronga” koe i taau i kite mai, ka akameitaki maata a Iehova ia koe.​—E tatau ia Luka 6:38.

18. Akapeea te aronga pakarikari e te au mapu me tauturu i tetai e tetai?

¹⁸ Me akavaitata atu te aronga pakarikari ki te au mapu, ka tauturu kotou i tetai e tetai. (Roma 1:12) E apinga puapinga ta tetai i rauka mai e kare i rauka ake i tetai. Kua rauka i te aronga pakarikari te tu kite e te karape i roto i to ratou oraanga. Tei te au mapu te maroiroi e te ririnui. Me angaanga taokotai te aronga pakarikari e te au mapu, ka akakakā ratou i te ingoa o to tatou Metua i te rangi e ka puapingaia te katoatoa i roto i te putuputuanga.