1. So lașio obiectivo daisaras te șioas amenghe ando timpo so phuriuvas?

ANDO timpo so phuriuvas, daștil-pe te avel amenghe dar că ci mai daisaras te cheras sa cadea de but anda o Iehova sar cărdeam atunci cana samas mai tărne. Si ciaces că daștil te avel amen mai țâra zuralimos sar mai anglal, tha daisaras te folosisaras amaro goghiaverimos hai i experiența cai chideam-le, caște ajutisaras codolen mai tărne te folosisaren pengo zuralimos caște cheren mai but buchia andi organizația le Iehovaschi. Iech phral cai si phuro de congregație de mai but timpo phenel: „Cana începosardem te simțosarav că ci mai daisardem te cherav sa cadea de but sar mai anglal anda codoia că phurilem, somas bucurime te dichav că sas phrala tărne califichime, cai daștinas te cheren mai dur i buchi”.

2. So va dichaia ande cado articolo?

² Ando articolo cai nachlea, deam duma anda sar le tărne țârden miștimata cana pașion codolendar mai phure. Ande cado articolo, va avela te dichas sar i umilința, i modestia, i recunoștința hai i generozitatea daștin te ajutin codolen mai phure te cheren buchi ande iech than codolența mai tărne, hai sar anel cadaia miștimata sea la congregațiache.

3. Cadea sar phenel-pe ando Filipeni 2:3, 4, so si i umilința hai sar daștil te ajutil-ame?

³ Codola mai phure trebun te sicaven umilința dacă camen te ajutin codolen mai tărne. Iech manuș cai silo umilo dichel le coaveren că sile mai bare lestar. (Citisar Filipeni 2:3, 4.) Codola mai phure cai sicaven cadai calitatea, hachiaren că butivar si mai but moduri biblico ande save daștin te aven  cărde mișto le buchia. Cadea că, von ci ajucăren-pe ca savore te cheren le buchia cadea sar cărde-le von mai anglal. (Ecl. 7:10) Chiar cana silen mai but experiența cai daștil te ajutil codolen mai tărne, von den penghi sama că „i scena cadala lumeachi si ando paruimos” hai că trebul te sichion sar te cherel le buchia ande neve situații. (1 Cor. 7:31)

4. Sar sicaven le supraveghetori de circumscripție iech atitudinea cadea sar sicade vi le leviți?

⁴ Codola mai phure cai sile umili den penghi sama că, anda codoia că phurile, ci mai daștin te cheren sa cadea de but sar cherenas iech data. Te gândisaras-ame co exemplo le supraveghetorengo de circumscripție. Cana arăsăn ca 70 bărșa si lenghe dini iech nevi repartiția. Cadaia daștil te avel iech zumaimos anda lende anda codoia că slujisarde pherde bucuria penghe phralenghe. Sas iech repartiția cai von iubisarde-la, hai i dorința te aven folosime mai dur ande cado modo încă thabol zurales ande lengo ilo. Tha, von hachiaren că trebun vasta mai tărne caște cheren mai dur i buchi. Von sile sar le leviți anda o Israelo purano, cai cana arăsănas ca 50 bărșa sas lenghe phendo te mechen pengo servicio co tabernacolo. Lenghi bucuria ci sas phangli catar iech baro privilegio. Mai but, von dine sea penghi zor andal privilegii cai daștinas te aven len mai dur, hai cărde sea so daisarde caște ajutin codolen mai tărne. (Num. 8:25, 26) Aghies, codolen cai sas-le supraveghetori de circumscripție silen sa codoi  atitudinea. Chiar cana ci mai slujin ande mai but congregații, von sile iech ciaci binecuvântarea anda i congregația ande savi sile.

5. So daisaras te sichioas anda o exemplo le phralesco Dan hai lesca rromniaco, Katie?

⁵ Te dichas o exemplo ieche phralesco po anav Dan, cai slujisardea sar supraveghetoro de circumscripție 23 bărșa. Cana o Dan arăslea co 70 bărșa, vo hai leschi rromni, Katie, sas-le numime pionieri speciali. Sar arachle von bucuria ande penghi nevi repartiția? O Dan phenel că siles mai but buchi te cherel acana sar niciechdata! Vo lel sama te cherel mișto pesche responsabilități andi congregația, ajutil le phralen te aven pregătime caște aven numime slujitori auxiliari hai sicavel averen sar te șion mărturia andel bare foruri hai andel phandaimata. Tumen cai san mai phure, indiferento că san ando servicio cu timp integral sau nici, daștin te cheren but buchia caște ajutin averen! Sar exemplo, daștis te sichios te araches bucuria ande chi nevi repartiția, te șios tuche neve obiectivea hai chi goghi te așel ca le buchia cai daștis te cheres-le na codolende cai ci daștis.

6. Sostar daisaras te phenas că sam goghiaver cana sicavas modestia? Cheren iech ilustrarea.

⁶ Iech manuș modesto jianel save si lesche limitea. (Prov. 11:2) I modestia cherel-les te na ajucărel pestar mai but sar daștil te cherel. Cadea, vo va așela bucurime hai va cherela mai dur sea so daștil. Daisaras te phenas anda iech manuș cai si modesto că si sar varecon cai conducil iech mașina pe iech drom cai jial caring opre. O șoferii trebul te paruvel ca iech viteza mai țâni caște daștil te jial mai dur caring opre. Si ciaces, daștil-pe că va jiala mai locăs, tha va jiala mai dur. Sa cadea, iech manuș cai silo modesto jianel cana si o timpo te cherel paruimata hai te „mechel-la mai locăs” caște cherel mai dur buchi ando servicio le Iehovasco hai te ajutil averen. (Filip. 4:5)

7. Sar sicadea o Barzilai modestia?

⁷ Te gândisaras-ame co exemplo cai mechlea-les o Barzilai, cai sas les 80 bărșa cana o rege David achardea-les te cherel partea andai bar regalo. Pherdo modestia, o Barzilai ci camlea te acceptil i oferta le regeschi. Vo jianelas că ci daștil te mai cherel but buchia anda codoia că sas-lo phuro, cadea că, vo phendea te jial ande lesco than iech murș mai tărno po anav Chimham. (2 Sam. 19:35-37) Cadea sar o Barzilai, le murșa mai phure sile bucurime te mechen codolen mai tărne te cheren buchi ando servicio le Iehovasco.

8. Sar sicadea o rege David modestia ande soste priveal o vazdimos le templosco?

⁸ Vi o rege David sicadea modestia hai mechlea amenghe iech lașio exemplo. Vo camlea anda sea o ilo te vazdel iech chăr le Iehovasche. Tha, o Iehova phendea lesche că cado privilegio va avela dino le tărnesche Solomon. O David acceptisardea le Iehovaschi decizia hai dea anda sea o ilo pesco ajutorii caște avel cărdo cado proiecto. (1 Cron. 17:4; 22:5) O David ci pachiaia că vo avelas mai lașio caște vazdel o templo anda codoia că o Solomon sas-lo „tărno hai ci sas-les experiența”. (1 Cron. 29:1) O David jianglea că o succeso ande cado proiecto de construcție încărelas catar i binecuvântarea le Devleschi, na catar le bărșa sau i experiența codolenghi cai avelas te cheren-les. Cadea sar o David, codola mai phure de aghies cheren buchi mai dur ando servicio le Iehovasco chiar cana lenghi repartiția paruvel-pe. Mai but, von jianen că o Iehova va binecuvântila codolen mai tărne cai cheren i buchi cai von cherenas-la iech data.

9. Sar sicadea iech jeno anda o Comiteto iecha filialaco modestia?

 ⁹ Iech exemplo anda amare ghiesa cai sicadea modestia, si iech phral po anav Shigeo. Ande 1976, cana sas-les 30 bărșa, vo sas-lo numime te slujil ando Comiteto iecha filialaco. Ande 2004, vo arăslo o coordonatoro le Comitetosco la filialaco. Pala iech timpo, vo dea peschi sama că ci mai siles o zuralimos fizico caște cherel mișto peschi buchi. Vo rughisardea-pe anda cadai buchi hai gândisardea-pe sostar avelas mai mișto ca iech phral mai tărno te avel ande lesco than. Chiar cana ci mai silo o coordonatoro, o Shigeo slujil mai dur ando Comiteto la filialaco. Cadea sar dichleam anda o exemplo cai mechlea-les o Barzilai, o rege David hai o phral Shigeo, iech manuș cai silo umilo hai modesto ci va gândila-pe ca le buchia cai le tărne mai trebun te sichion-le tha codolende cai jianen te cheren-le mișto. Vo ci va dichela len sar rivali, tha sar colegi savența cherel buchi ande iech than. (Prov. 20:29)

10. Sar trebulas te dichen codola mai phure le tărnen andai congregația?

¹⁰ Codola mai phure dichen codolen mai tărne sar cadouri le Iehovastar, anda save sile recunoscători. Ando timpo so lengo zuralimos cărdiol mai țâno, codola mai phure sile recunoscători că codolen cai silen o zuralimos le tărnimasco camen hai daștin te cheren buchi caște slujin andi congregația.

11. Sar sicaven le versetea anda Rut 4:13-16, că codolen mai phure silen miștimata cana, pherde recunoștința, mechen codolen tărne te ajutin-le?

¹¹ Andi Biblia arachas vi o șucar exemplo cai mechlea-les i Naomi anda codola cai sile mai phure. Pherdi recunoștința, voi mechlea ca iech tărni te ajutil-la. Co începuto, i Naomi phendea pesca boreache, cai sas-li  phivli, te jial parpale ca laco poporo. Cu sea cadala, cana i Rut phendea că ci va mechela-la hai că va jiala laia parpale ando Betleemo, voi mechlea-la te ajutil-la. (Rut 1:7, 8, 18) Cadaia andea bare miștimata le duie jiuvleanghe! (Citisar Rut 4:13-16.) I umilința va cherela codolen mai phure te len-pe pala o exemplo cai mechlea-les i Naomi.

12. Sar sicadea o apostolo Pavel peschi recunoștința?

¹² O apostolo Pavel sas-lo recunoscătorii anda o ajutorii cai primisardea-les. Sar exemplo, vo mulțimisardea le creștinenghe anda Filipi anda le buchia materialo cai bișalde-le lesche. (Filip. 4:16) Vo mai sicadea peschi recunoștința anda o ajutorii cai dea-les lesche o Timotei. (Filip. 2:19-22) O Pavel mulțumisardea le Devlesche vi anda codola cai avile te zuriaren-les ando timpo so sas-lo îngărdo ca Roma te avel phandado. (Fap. 28:15) Chiar cana o Pavel sas iech manuș pherdo viața, cai phirelas șăla kilometri caște predichil hai te zuriarel le congregații, vo ci sas-lo prea baricano caște na mechel le phralen hai le pheian te ajutin-les.

13. Sar daștin codola mai phure te sicaven penghi recunoștința caring codola tărne?

¹³ Codola mai phure daștin te sicaven penghi recunoștința caring codola mai tărne andai congregația ande mai but moduri. Cana codola tărne camen te îngăren tumen la mașinaia, te chinen tumenghe haben sau te len sama pe aver buchia cai trebun tumen, pherde recunoștința, mechen-le te ajutin tumen. Na bâstren că prin lengo ajutorii o Iehova sicavel că iubil tumen. Mai but, daștin te arăsăn te aven pașă amala codolența cai ajutin tumen. Vi tumen daștin te ajutin tumare tărne amalen cana phenen lenghe chichi de bucurime san te dichen sar camen te cheren mai but andi congregația. Cheren tumenghe timpo te phenen lenghe le buchia prin save nachlean ande tumari viața. Cana cheren cadea, va avela te „sicaven recunoștința” le Iehovasche anda codola tărne, cas vo țârdea-le andi congregația. (Col. 3:15; Ioan 6:44; 1 Tes. 5:18)

14. Sar sicadea o rege David peschi generozitatea?

¹⁴ Anda o exemplo le regesco David arachas iech aver calitatea zurales importanto cai trebul te sicaven-la codola mai phure: i generozitatea. Vo dea anda pesco barvalimos but love hai cuci buchia caște avel vazdino o templo. (1 Cron. 22:11-16; 29:3, 4) Vo cărdea cadaia chiar cana o merito anda cado proiecto avelas te avel lesche șiavesco, o Solomon. Cana ci mai si amen o zuralimos fizico te las partea ca le proiectea de construcții teocratico, daisaras te ajutisaras mai dur te cheren-pe cadal proiectea cana cheras donații pala amari situația. Mai but, daisaras te ajutisaras codolen mai tărne te țârden miștimata anda amari experiența cai chideam-la andel bărșa cai nachle.

15. So cuci buchia sicadea o apostolo Pavel le Timoteos?

¹⁵ Gândisaren tumen sar sicadea vi o apostolo Pavel generozitatea. Vo cărdea le Timoteos te jial leia andi buchi misionaro, hai pherdo generozitatea o Pavel sicadea cadale tărne murșes sar te predichil hai sar te sicavel averen. (Fap. 16:1-3) Cadaia ajutisardea le Timoteos te avel iech sicaitorii mai lașio. (1 Cor. 4:17) Pala codoia, vi o Timotei folosisardea mai dur so phendea lesche o Pavel caște sicavel averen.

16. Sostar sicadea o Shigeo averen?

¹⁶ Codola mai phure de aghies ci daran că ci va mai avena folosime dacă sicaven codolen mai tărne te cheren i buchi cai von  cherenas-la andi congregația. Sar exemplo, andel bărșa cai nachle, o Shigeo, anda savo deam duma mai anglal, sicadea le phralen mai tărne anda o Comiteto la filialaco. Vo cărdea cadaia anda i buchi le Regatoschi anda o them ande savo slujilas. Cadea că, cana avilea o timpo hai vo ci mai daisardea te avel o coordonatoro, iech phral mișto sicado daisardea te avel ande lesco than. O Shigeo cherel partea anda o Comiteto iecha filialaco de 45 bărșa hai aghies vo folosil mai dur so sichilea caște ajutil le phralen mai tărne. Le phrala sar o Shigeo sile iech ciaci binecuvântarea anda o poporo le Devlesco!

17. Cadea sar phenel-pe ando Luca 6:38, sar daștin codola mai phure te ajutin averen?

¹⁷ Tumen phrala hai pheia mai phure, sicaven claro că o fapto te slujisaras le Iehovasche pherde pachiamos hai loialo si o mai lașio modo viațaco! Prin tumaro exemplo, sicaven că meritil o eforto te sichioas le principii biblico hai te aplichisaras-le ande amari viața. Jianen andal buchia prin save nachlean sar cărde-pe le buchia mai anglal, tha dichen vi o fapto că aghies le buchia paruven-pe hai că trebun cărde ande aver modo. Vi tumen, cai san mai phure hai boldean tumen na de but timpo, daștin te ajutin averen ande but feluri. Sar exemplo, daștin te zuriaren averen cana phenen lenghe ce bucurime san chiar cana prinjiandean le Iehovas mai târzio andi viața. Codola mai tărne va avena zurales bucurime te așunen le buchia prin save nachlean hai le lecții cai sichilean-le. Dacă va dena vi averen anda tumaro baro prinjanimos cai chidinean-les andel bărșa cai nachle, o Iehova va dela tumen bare miștimata. (Citisar Luca 6:38.)

18. So miștimata si vi codolen phure hai vi codolen tărne cana ajutin-pe iech averes?

¹⁸ Ando timpo so tumen, cuci phralale mai phure pașion codolendar mai tărne, le duien va avela tumen miștimata. (Rom. 1:12) Fiesaves anda tumende si tumen vareso cuci cai le coaveres nai-les. Codolen mai phure silen goghiaverimos hai experiența cai chidine-le andel bărșa cai nachle hai codolen mai tărne silen zuralimos. Cana codola tărne hai codola phure cheren buchi ande iech than sar amala, von așaren amare Dades cerisco iubitorii hai sile iech binecuvântarea anda sea i congregația.