1. Nzoni ye wa la e peut ti gi ti sara na ngoi so ngu ti e akomanse ti gue na li ni?

NA NGOI so ngu ti e akomanse ti gue na li ni, peut-être mbeto ayeke sara e so e peut ti sara kua ti Jéhovah encore mingi ape. Atâa so ngangu ti e ayeke tongana ti so e yeke lani maseka ape, e lingbi ti sara kua na ndara nga na akode ti e ti aidé amaseka ti hinga ti sara akua na yâ ti bungbi ti Jéhovah nga ti yeda na ambeni kua encore. Mbeni ancien atene: “Na ngoi so mbi peut encore ape ti sara akua kue so mbi yeke sara lani ndali ti so mbi ga mbakoro, mbi yeke na ngia so amaseka so alingbi ayeke dä ti sara ni.”

2. Nyen la e yeke bâ na yâ ti article so?

² Na yâ ti article so ahon, e bâ tongana nyen la amaseka abâ nzoni tongana ala ga nduru na ambakoro. Na yâ ti article so, e yeke bâ tongana nyen la asarango ye tongana sarango terê kete, bango terê kete, kiringo singila nga mungo ye na zo apeut ti aidé ambakoro ti sara kua maboko na maboko na amaseka, ye so ayeke sara si congrégation ni kue ayeke wara ye ti nzoni.

3. Ti gue oko na aPhilippien 2:3, 4, zo so asara terê ti lo kete ayeke sara ye tongana nyen? Tongana nyen la a peut ti aidé mbeni Chrétien?

³ Aita so ayeke mbakoro adoit ti sara terê ti ala kete tongana ala ye ti mû maboko na amaseka. Zo so asara terê ti lo kete ayeke bâ amba ti lo tongana azo so ayeke kota ahon lo. (Diko aPhilippien 2:3, 4.) Ambakoro so asara terê ti ala kete ahinga so, na yâ ti aye mingi, gbâ ti anzoni kode ti sarango mbeni  kua ayeke dä so ague oko na Bible. Tongaso, ala yeke ku pëpe ti tene azo kue asara ye tongana ti so ala sara lani (Zo-ti. 7:10). Atâa so ala yeke na aye mingi ti fa na amaseka, ala hinga so “aye so ayeke si na yâ ti dunia so ayeke changé changengo” na so peut-être ala bezoin ti manda afini kode ti sarango aye.—1 aCor. 7:31.

4. Tongana nyen la asurveillant ti circonscription ayeke fa so ala yeke na oko bango ndo so aLévite ayeke na ni lani?

⁴ Ambakoro so asara terê ti ala kete ahinga so, ndali ti ngu ti ala, ala lingbi pëpe ti sara aye mingi tongana ti kozo. Bâ, na tapande, asurveillant ti circonscription ti e. Na ngoi so ala wara ngu 70, a hunda na ala ti sara mbeni kua nde. A peut ti duti ngangu na ala. Ala bâ na nene ni mingi pasa so ala yeke na ni ti sara kua ndali ti aita ti ala. A yeke mbeni kua so ala ye ni mingi, na ala ye mingi ti ngbâ ti sara ni. Me ala comprendre so a bezoin azo so angbâ ngangu ti sara kua so. Ni la ala yeke na oko bango ndo so aLévite so ayeke na Israël ti ândö ayeke na ni, so tongana ala wara ngu 50, a hunda na ala ti zia ti sara kua na tabernacle. A-Lévite so ngu ti ala ague na li ni so ayeke na ngia atâa kua wa la ala yeke sara. Ala sara akua so ala peut ti sara na bê ti ala kue nga ala mû maboko na amaseka (Nom. 8:25, 26). Laso, tongana asurveillant ti circonscription awara ngu 70, ala yeke zia ti sara vizite na acongrégation, me ala yeke mû maboko mingi nga ala yeke kpengba congrégation so a tokua ala dä.

5. Nyen la mo manda na lege ti tapande ti Dan na Katie?

 ⁵ Bâ tapande ti Dan so lo yeke lani surveillant ti circonscription teti ngu 23. Na ngoi so lo wara ngu 70, a hunda na lo na wali ti lo, Katie, ti sara kua ti pionnier spécial. Ala bâ fini kua ti ala so tongana nyen? Dan atene so fadeso lo yeke na aye mingi ti sarango ni ahon ti kozo. Lo yeke bâ lege ti akua ti lo na yâ ti congrégation, lo yeke aidé aita-koli ti duti na asarango ye so a hunda ti ga awakua ti mungo maboko nga lo yeke fa na aita ti fa tënë na ando so azo ayeke gue dä mingi nga na ada ti kanga. Aita so ngu ti ala ague na li ni, atâa ala yeke na yâ ti kua ti ngoi kue wala pëpe, ala peut ti sara aye mingi ti mû maboko na aita. Ala peut ti sara ni tongana nyen? Ala sara achangement alingbi na fini dutingo ti ala, ala gi ti sara afini ye nga ala zia li ti ala na ndö ti ye so ala peut ti sara me pëpe na ndö ti ye so ala peut ti sara ape.

6. Ngbanga ti nyen la a yeke na lege ti ndara ti bâ terê ti mo kete? Mû mbeni tapande ti fa ni.

⁶ Zo so abâ terê ti lo kete ahinga so lo peut ti sara aye kue ape (aProv. 11:2). So lo bâ terê ti lo kete, lo yeke sara gï ye so lo hinga so lo peut ti sara. Ye so asara si lo yeke ngbâ ti duti na ngia nga lo yeke sara kua nzoni. E lingbi ti haka zo so abâ terê ti lo kete na mbeni zo so ayeke kpe na vélo so ayeke monté hoto. Lo yeke ngbâ ti kpe gï na oko loro ape. Ti tâ tënë ni, lo yeke kpe yeke ahon ti kozo, me lo yeke ngbâ ti gue na li ni. Legeoko nga, zo so abâ terê ti lo kete ahinga ngoi wa la lo doit ti sara achangement wala ngoi so lo peut ti sara ye tongana ti kozo ape, tongaso si lo peut ti ngbâ ti sara kua ti Jéhovah nzoni.—aPhil. 4:5.

7. Tongana nyen la Barzillaï afa so lo bâ terê ti lo kete?

⁷ Gbu li na ndö ti tapande ti Barzillaï, so ayeke lani na ngu 80 na ngoi so Gbia David atisa lo ti ga na yangbo ti gbia. So Barzillaï abâ terê ti lo kete, lo ke ye so gbia ahunda na lo. Barzillaï ahinga so lo lingbi ti sara aye mingi pëpe ndali ti ngu ti lo, tongaso lo hunda ti tene a mû Kimham, so ade maseka, na place ti lo (2 Sam. 19:35-37). Tongana ti Barzillaï, aita-koli so ngu ti ala ague na li ni ayeke na ngia ti zia lege na ala so angbâ ngangu ti bâ lege ti akua.

8. Tongana nyen la Gbia David afa so lo bâ terê ti lo kete na ngoi so lo ye lani ti leke temple?

⁸ Gbia David ayeke nga mbeni pendere tapande ti zo so abâ terê ti lo kete. Na bê ti lo kue, lo ye lani ti leke mbeni da ndali ti Jéhovah. Me tongana Jéhovah atene na lo so lo mû pasa so na Salomon so ade maseka, David ayeda na desizion so Jéhovah amû, nga na bê ti lo kue lo mû maboko na kua ni (1 Chron. 17:4; 22:5). David abâ ape so lo la lo peut ti sara kua ni nzoni, ndali ti so Salomon “ade maseka nga ade lo hinga ndo mingi pëpe.” (1 Chron. 29:1). David ahinga so a yeke pëpe ngu ti azo so amû li ni na kua ti lekengo temple wala ye so ala hinga ni la asara si kua ni ahunzi, me a yeke ndali ti so Jéhovah asara tufa na ndö ti kua ni. Tongana ti David, aita so ngu ti ala ague na li ni angbâ ti sara kua ngangu, même na ngoi so kua ti ala achangé. Na ala hinga so Jéhovah ayeke sara tufa na ndö ti aita so angbâ ngangu so ayeke sara kua so ala sara lani.

9. Tongana nyen la mbeni membre ti mbeni Komite ti filiale afa so lo bâ terê ti lo kete?

⁹ Mbeni tapande ti zo so abâ terê ti lo kete ayeke ti Ita-koli Shigeo. Na ngu 1976, na ngoi so lo yeke na ngu 30, lo ga membre ti mbeni Komite ti filiale. Na ngu 2004, lo ga coordinateur ti Komite ti filiale ni. Na pekoni, lo bâ so lo yeke na ngangu encore tongana ti kozo ape  nga ti sara kua ti lo, lo yeke mû ngoi mingi. Lo sambela na ndö ti tënë ni nga lo gbu li ti lo na ndö ti ndani so a yeke nzoni mbeni ita-koli so angbâ ngangu aga coordinateur. Atâa so Shigeo ayeke coordinateur encore ape, lo ngbâ ti sara kua maboko na maboko na tanga ti amembre ti komite ni. Tapande ti Barzillaï, ti Gbia David nga na ti Shigeo afa so zo so asara terê ti lo kete nga lo bâ terê ti lo kete ayeke pensé na aye so amaseka ahinga ahon ti pensé na aye so ala doit ti manda. Lo yeke bâ ala pëpe tongana azo so ayeke sara mandako na lo, me tongana amba ti lo so lo na ala ayeke sara kua.—aProv. 20:29.

10. Bango ndo wa la ambakoro ayeke na ni na ndö ti amaseka na yâ ti congrégation?

¹⁰ Aita so ayeke mbakoro ayeke bâ amaseka tongana mbeni cadeau so alondo na Jéhovah, na ala kiri singila ndali ni. Na ngoi so ngangu ti ambakoro ayeke kiri na gbe ni, ala kiri singila ndali ti so amaseka ayeda na bê ti ala kue ti sara akua ti congrégation nga ala lingbi ti sara ni.

11. Tongana nyen la Ruth 4:13-16 afa so ambakoro ayeke bâ nzoni tongana ala yeda na mungo maboko ti amaseka?

¹¹ Na yâ ti Bible, Naomi ayeke mbeni pendere tapande ti mbeni mbakoro so ayeda na mungo maboko ti mbeni maseka. Na tongo nda ni, Naomi ahunda mingi na kogara ti lo Ruth ti kiri na ndo ti afami ti lo. Me Ruth ake ti zia Naomi, na lo na lo akiri na Bethléhem. Naomi ayeke na ngia mingi so lo na Ruth akiri, nga lo yeda ti tene lo mû maboko na lo (Ruth 1:7, 8, 18). Na ye so ayeke lani nzoni mingi ndali ti ala use kue. (Diko Ruth 4:13-16.) Ambakoro so asara terê ti ala kete ayeke sara ye tongana Naomi.

12. Tongana nyen la bazengele Paul afa so lo kiri singila?

 ¹² Bazengele Paul akiri lani singila so aita amû maboko na lo. Na tapande, lo kiri singila na aChrétien ti Philippe so atokua lani aye na lo (aPhil. 4:16). Lo kiri singila mingi na Timothée so amû maboko lani na lo (aPhil. 2:19-22). Nga, Paul akiri singila na Nzapa ndali ti azo so aga ti kpengba lo na ngoi so a yeke gue na lo na Rome tongana zo ti kanga (Kus. 28:15). Paul ayeke lani mbeni zo so ayeke na ngangu mingi so ayeke voyagé akilomètre saki mingi ti fa tënë nga ti kpengba acongrégation. Me lo sara terê ti lo kete ti yeda na maboko so aita amû na lo.

13. Tongana nyen la ambakoro apeut ti fa so ala kiri singila na Jéhovah ndali ti amaseka?

¹³ Ambakoro, ala peut ti fa so ala kiri singila na Jéhovah ndali ti amaseka ti congrégation ti ala na alege mingi. Tongana amaseka aye ti mû maboko na ala ti gue na mbeni ndo, ti gue ti vo ye na ala wala ti sara na ala mbeni ye so ala bezoin ni, ala yeda na ni na bê ti ala kue. Ala bâ ni tongana mbeni lege so Jéhovah afa ndoye ti lo na ala. Peut-être ala na azo so amû maboko na ala apeut ti ga akota kamarade. Ala gi lakue ti aidé akamarade ti ala so ti duti na kpengba songo na Jéhovah, nga ala tene na ala so ala yeke na ngia mingi ti bâ amaseka so ayeke gi ti sara akua mingi na yâ ti congrégation. Ala yeda na bê ti ala ti mû ngoi ti fa na ala aye so asi na yâ ti fini ti ala. Tongana ala sara tongaso, “ala [yeke] fa singila ti bê ti ala” na Jéhovah ndali ti amaseka so lo ga na ala na yâ ti congrégation.—aCol. 3:15; Jean 6:44; 1 aThes. 5:18.

14. Tongana nyen la Gbia David afa so maboko ti lo awoko?

¹⁴ Na yâ ti tapande ti Gbia David, e bâ mbeni pendere sarango ye so ambakoro abezoin ti duti na ni: mungo ye na zo. Lo mû gbâ ti nginza nga na aye ti mosoro ti lo ndali ti kua ti lekengo temple (1 Chron. 22:11-16; 29:3, 4). Lo sara ni atâa so na pekoni azo airi ni temple ti Salomon. Tongana e yeke na ngangu encore ape ti mû mbage na lekengo ada ndali ti bungbi ti Jéhovah, e lingbi ti ngbâ ti mû maboko na akua so tongana e mû a-offrande alingbi na ngangu ti e. E peut nga ti mû maboko na amaseka ti bâ nzoni na lege ti aye so e manda na yâ ti angu mingi.

15. Aye ti ngangu ngere wa la bazengele Paul amû na Timothée?

¹⁵ Na ndö ti tene ti mungo ye na zo, bâ tapande so bazengele Paul azia. Lo mû lani Timothée na terê ti lo na yâ ti kua ti missionnaire nga lo fa na Timothée so ade maseka akode ti lo ti fango tënë nga ti fango ye (Kus. 16:1-3). Paul afa lani na Timothée ti duti nzoni wafango tënë nga nzoni wafango ye (1 aCor. 4:17). Na pekoni, Timothée asara kua na akode so Paul afa na lo ti fa ye na ambeni zo.

16. Ngbanga ti nyen la Shigeo afa ye na ambeni zo?

¹⁶ Ambakoro ti laso ayeke sara mbeto ape ti bâ so a bezoin ala ape na yâ ti congrégation tongana ala fa akua so ala yeke sara na amaseka. Na tapande, teti angu mingi Shigeo, so e sara tënë ti lo fade, afa ye nzoni na amembre ti Komite ti filiale so angbâ ngangu. Lo sara tongaso ti mû maboko na kua ti Royaume na yâ ti kodro so lo yeke dä. Ye ti peko ni ayeke so na ngoi so lo peut ti sara kua ti coordinateur ape ita so lo fa ye na lo nzoni amû place ti lo. Shigeo ayeke membre ti Komite ti filiale ahon ngu 45 na lo ngbâ ti sara kua na aye so lo manda ti mû maboko na aita-koli so angbâ ngangu. Aita tongana Shigeo a-aidé mingi awakua ti Nzapa.

17. Ti gue oko na Luc 6:38, nyen la ambakoro apeut ti mû na ambeni zo?

 ¹⁷ Ala aita so ayeke mbakoro, ala fa so ti sara na Jéhovah na mabe nga ti duti be-ta-zo na lo ayeke nzoni fason ti vivre. Na lege ti tapande ti ala, ala fa so a yeke nzoni ti hinga amama-ndia ti Bible nga ti sara ye alingbi na ni na yâ ti fini ti e. Ala hinga tongana nyen la a yeke sara ye ândö, me ala bâ nga so ala bezoin ti sara achangement alingbi na aye so asi. Ala ambakoro so awara batême aninga ape, ala yeke nga na aye mingi ti mû na azo; ala peut ti fa na azo ngia so ala wara ti hinga Jéhovah na lâ ti mbakoro ti ala. A yeke nzere na amaseka ti mä aye so asi na ala nga na aye so ala manda. Tongana “ala [yeke] mû ye lakue na azo” na lege so ala sara kua na aye so ala manda lani ti fa ye na azo, Jéhovah ayeke sara tufa mingi na ndö ti ala.—Diko Luc 6:38.

18. Anzoni ye wa la ambakoro nga na amaseka apeut ti wara na mbage ti mba?

¹⁸ Ala ambakoro so e ye ala mingi, tongana ala ga nduru na amaseka, ala peut ti mû maboko na mba (aRom. 1:12). Zo oko oko ayeke na mbeni ye ti ngangu ngere so mba ti lo ayeke na ni ape. Ambakoro ayeke na ndara nga na hingango ye so ala wara ni na yâ ti angu mingi so ahon. Amaseka ayeke na ngangu. Tongana amaseka na ambakoro asara kua legeoko tongana akamarade, ala yeke mû gonda na Babâ ti e ti yayu so aye e mingi nga congrégation ni kue ayeke bâ nzoni dä.