1. O ā sini e mafai ona tatou faatutūina a o faasolo ina tatou matutua?

A O FAASOLO ina tatou matutua, atonu e tatou te popole ina neʻi itiiti lo tatou aogā iā Ieova e lē pei o le taimi a o tatou talavou. E ui ua itiiti lo tatou malosi i le taimi lenei, ae e mafai ona faaaogā le atamai ma tomai o loo iā i tatou e fesoasoani ai i talavou ina ia avea o ni ē e aogā i le faalapotopotoga a Ieova ma talia nisi tiute tauave. Ua faapea mai se uso ua leva ona auauna o se toeaina: “Ina ua lē toe tele ni mea e mafai ona ou faia ona o loʻu tulaga matua, na ou matuā lotofaafetai ona ua iai uso talavou agavaa e faia tiute tauave i le faapotopotoga.”

2. O le ā o le a tatou talanoaina i lenei suʻesuʻega?

² Na talanoaina i le suʻesuʻega ua mavae auala e maua ai e talavou aogā pe a faauō atu i uso ma tuafāfine matutua. Ae i lenei suʻesuʻega, o le a tatou talanoaina ai auala e fesoasoani ai le lotomaulalo, faamaulalo, lotofaafetai ma le agalelei i uso ma tuafāfine matutua e galulue faatasi ai ma talavou, ina ia maua ai e le faapotopotoga atoa faamanuiaga a Ieova.

3. I le Filipi 2:3, 4 o le ā e uiga i ai le lotomaulalo, ma e faapefea ona fesoasoani i se Kerisiano?

³ E tatau ona lotomaulalo uso ma tuafāfine matutua, pe afai e latou te mananaʻo e fesoasoani i talavou. O le tagata lotomaulalo e manatu e sili atu isi i lo o ia. (Faitau le Filipi 2:3, 4.) O uso ma tuafāfine matutua lotomaulalo, e latou te iloa  e masani lava e lē tasi se auala faale-Tusi Paia ma aogā e taulima ai se tofiga. E tatau la ona iā i latou se vaaiga paleni i le auala na latou taulima ai mea i le taimi ua tuanaʻi. (Fai. 7:10) E ui e matuā tāua le faasoa atu o lo latou poto masani i talavou, ae e latou te iloa ʻo loo suia le tulaga o mea a lenei lalolagi’ ma atonu e tatau ona latou faamasani i auala fou e fai ai mea.​—1 Kori. 7:31.

4. Ua faapefea ona faaalia e ovasia matagaluega uiga na faaalia e le ʻau sā Levī?

⁴ E iloa e uso ma tuafāfine matutua lotomaulalo, ua faatapulaa mea e mafai ona latou faia i le taimi lenei. O se faataʻitaʻiga, seʻi mātau a tatou ovasia matagaluega. Pe a 70 o latou tausaga, e valaaulia i latou e amata i se isi faaeaga ma e ono avea ma luʻi lenā mea. E tāua iā i latou le faaeaga o le auauna i o latou uso. O se faaeaga na latou fiafia i ai, ma e latou te naunau e galulue pea i lenā faaeaga. Peitaʻi, e latou te iloa e manaʻomia talavou e latou te faia lenā galuega. O lea, e latou te faaalia ai uiga na faaalia e tagata sā Levī i Isaraelu anamua, o ē na lē mafai ona toe auauna i le faleʻie paia ina ua taʻi 50 o latou tausaga. E leʻi faalagolago le olioli o tagata matutua sā Levī i se faaeaga patino. Na latou faaaogā atoatoa faaeaga na latou maua e fesoasoani ai i talavou. (Nu. 8:25, 26) I aso nei, e ui e lē o toe auauna i latou na avea ma ovasia matagaluega i ni faapotopotoga se tele, ae ua avea i latou o ni faamanuiaga i faapotopotoga ua tofia i ai i latou.

5. O le ā e te aʻoaʻoina mai i le faaaʻoaʻoga a Dan ma Katie?

 ⁵ Seʻi o tatou iloiloina le faaaʻoaʻoga a Dan, na auauna o se ovasia matagaluega mo le 23 tausaga. Ina ua 70 tausaga o Dan, na tofia ai i laʻua ma lana avā o Katie o ni paeonia faapito. Na faapefea ona la faamasani i lo la tofiga fou? Ua faapea mai Dan, ua sili atu lona pisi i le taimi lenei nai lo o se isi lava taimi. O loo ia faatinoina ona tiute tauave i le faapotopotoga, fesoasoani i uso ina ia agavaa o ni auauna o le faiva, ma toleni isi e molimau atu i nofoaga e tumutumu ai tagata, ma falepuipui. Uso ma tuafāfine matutua, e tele mea e mafai ona tou faia e fesoasoani ai i isi e tusa po o tou auauna faataimi atoa pe leai. E faapefea? Ia taumafai e faamasani i se suiga fou, ia faatutū ni sini fou, ma ia uaʻi atu i mea e mafai ona e faia nai lo o mea e lē mafai ona e faia.

6. Aiseā e atamai ai ona faamaulalo? Ia faataʻitaʻi.

⁶ O le tagata faamaulalo e na te faailoa mai mea e gata ai lona mafai. (Faata. 11:2) O le faamaulalo e uunaʻia ai o ia e fetuutuunaʻi mea e na te ausia e fua i mea e mafai ona ia faia. O le faia faapea, o le a tumau ai pea lona fiafia ma lona galue mamafa. E mafai ona tatou faatusaina se tagata faamaulalo, i se tagata o loo aveina se taavale i se aʻega. E tatau i le ave taavale ona sui i le kia maulalo, ina ia faaauau ai pea ona aʻe le taavale i le aʻega. O le mea moni e ui o le a lemū le alu o le taavale, ae e alu pea i luma le taavale. E faapena foʻi se tagata faamaulalo, e na te iloa le taimi e “sui ai i le kia maulalo,” ina ia faaauau ai pea ona auauna iā Ieova ma fesoasoani i isi.​—Fili. 4:5.

7. Na faapefea ona faaalia e Pasili le faamaulalo?

⁷ Ia mātau le faaaʻoaʻoga a Pasili. Na valaaulia o ia e le tupu o Tavita e la te nonofo i lona maota ina ua 80 ona tausaga. O le faamaulalo o Pasili na ia teena ai le manaʻo a le tupu. Na iloa e Pasili mea e lē mafai ona ia toe faia ona ua matua lona soifua, o lea na ia fautuaina ai lana auauna tane talavou o Kimeama ina ia nofo i le maota o le tupu o Tavita. (2 Samu. 19:35-37) E fiafia foʻi uso matutua e avatu le avanoa i uso talavou e auauna ai iā Ieova.

8. Na faapefea ona faaalia e le tupu o Tavita le faamaulalo e faatatau i le fausiaina o le malumalu?

⁸ Na faaalia foʻi e le tupu o Tavita se faaaʻoaʻoga mataʻina o le faamaulalo. Na matuā naunau o ia e fausia se fale mo Ieova. Ae ina ua fetalai Ieova o le a fausia e lona atalii o Solomona se fale mo ia, na talia e Tavita le faaiʻuga a Ieova ma na ia lagolagoina ma le lotoatoa le galuega. (1 No. 17:4; 22:5) E leʻi manatu Tavita e sili atu lona agavaa mo le galuega ona e ʻlaʻitiiti ma e lē lava le poto masani’ o Solomona. (1 No. 29:1) Na iloa e Tavita e faalagolago le taulau manuia o le galuega i le faamanuia a Ieova, ae e lē o le matutua po o le poto masani o i latou e taʻimua. E faaaʻoaʻo uso ma tuafāfine matutua i aso nei iā Tavita, e ala i le galulue mamafa pea e ui ua suia o latou tofiga. E latou te iloa, o le a faamanuia e Ieova talavou o loo faia galuega na latou faia muamua.

9. Na faapefea ona faaalia e se sui o se Komiti o se Lālā le faamaulalo?

⁹ O se tasi o faaaʻoaʻoga lelei o le faamaulalo i aso nei, o se uso e igoa iā Shigeo. I le 1976 ina ua 30 ona tausaga, na tofia ai o ia e auauna o se sui o se Komiti o se Lālā. I le 2004, na tofia ai o ia o se sooupu o le Komiti o lenā Lālā. Mulimuli ane, na ia iloaina e lē o toe gafatia e lona malosi ona faia le tele o galuega, ma e umi se taimi o ona faia se galuega.  Na ia tatalo ma manatunatu loloto i aogā e tatau ai ona avatu i se uso talavou tiute tauave na ia faia. E ui e lē o toe auauna Shigeo o se sooupu, ae o loo faaauau pea ona ia galue mamafa o se sui o le Komiti o lenā Lālā. E pei ona tatou aʻoaʻoina mai i le faaaʻoaʻoga a Pasili, le tupu o Tavita ma Shigeo, o se tagata lotomaulalo ma faamaulalo e taulaʻi atu i tomai o loo i talavou, nai lo o le leai o so latou poto masani. E lē vaai iā i latou o ni tagata faatautavā, ae o ni ē e latou te galulue faatasi.​—Faata. 20:29.

10. O le ā le manatu e ao ona iai i uso ma tuafāfine matutua e faatatau i talavou o le faapotopotoga?

¹⁰ E manatu uso ma tuafāfine matutua o talavou o ni meaalofa mai iā Ieova, ma e latou te lotofaafetai ona o mea ua latou faia. A o faasolo ina mou atu le malosi o uso ma tuafāfine matutua, e latou te talisapaia le malosi o loo i talavou ma lo latou agaga faataulaga e faia so o se galuega ma auauna mo le faapotopotoga.

11. E faapefea ona faaalia mai i le Ruta 4:13-16, faamanuiaga e maua mai i le talia ma le lotofaafetai o le fesoasoani a talavou?

¹¹ O Naomi o loo taʻua i le Tusi Paia, o se faaaʻoaʻoga mataʻina o se tagata matua na talia ma le lotofaafetai le fesoasoani mai i se talavou. I le taimi muamua, na tauanau e Naomi Ruta e toe foʻi i lona aiga ina ua maliu lana tama lea na nonofo ma Ruta. Peitaʻi, na faatauanau atu pea Ruta iā Naomi ina ia la ō faatasi i Peteleema, ma na talia e Naomi le fesoasoani a Ruta. (Ruta 1:7, 8, 18) Maʻeu se faamanuiaga na maua e Ruta ma Naomi! (Faitau le Ruta 4:13-16.) O lea la, o le lotomaulalo e uunaʻia ai uso ma tuafāfine matutua e faaaʻoaʻo iā Naomi.

12. Na faapefea ona faaalia e le aposetolo o Paulo le lotofaafetai?

 ¹² Na matuā lotofaafetai le aposetolo o Paulo i le fesoasoani na ia maua mai i uso ma tuafāfine. O se faataʻitaʻiga, na ia faafetai i Kerisiano i Filipi mo meaalofa na auina atu iā te ia. (Fili. 4:16) Na ia lotofaafetai foʻi i le fesoasoani a Timoteo. (Fili. 2:19-22) Na faafetai foʻi Paulo i le Atua mo uso ma tuafāfine na ō atu e faalaeiau iā te ia a o auina atu o ia o se pagota i Roma. (Galu. 28:15) O Paulo o se tagata malosi e faitau afe maila na malaga ai e talaʻi ma faamalosiau i faapotopotoga. Ae na lotomaulalo o ia e talia le fesoasoani mai uso ma tuafāfine.

13. E faapefea ona faaalia e uso ma tuafāfine matutua le lotofaafetai mo talavou?

¹³ Uso ma tuafāfine matutua, e tele auala e mafai ona outou faaalia ai le lotofaafetai mo talavou i la outou faapotopotoga. Ia talia ma le lotofaafetai la latou fesoasoani pe a ofo atu e feaveaʻi oe i lana taavale, fai faatau, pe e fai nisi mea o loo e manaʻomia. Ia e vaai i na fesoasoani e mai iā Ieova. O le faia faapea, o le a māfana ai la outou mafutaga. Ia faaalia pea le naunau moni i le tuputupu aʻe faaleagaga o a outou uō talavou, ma ia taʻu atu iā i latou lou fiafia tele i lo latou aapa atu mo isi faaeaga e fesoasoani ai i le faapotopotoga. Ia faaalu se taimi e faamatala ai mea na tutupu i lou olaga iā i latou. O le faia faapea, e faaalia ai lou lotofaafetai iā Ieova ona o talavou ua ia tosina mai i le faapotopotoga.​—Kolo. 3:15; Ioa. 6:44; 1 Tesa. 5:18.

14. Na faapefea ona faaalia e le tupu o Tavita le limafoaʻi?

¹⁴ E tatou te maua i le faaaʻoaʻoga a Tavita le isi uiga tāua e manaʻomia ona faaalia e uso ma tuafāfine matutua, o le limafoaʻi. Na foaʻi e le tupu ni ʻoa ma ni tupe se tele, e lagolagoina ai le fausia o le malumalu. (1 No. 22:11-16; 29:3, 4) Na ia faia faapea, e ui lava o le a taʻua e tagata le malumalu o le malumalu o Solomona. Pe a tatou lē toe maua le malosi e galulue ai i faugāfale, e mafai ona tatou lagolagoina pea na galuega e ala i a tatou foaʻi tauofo. E tatou te faasoa atu i talavou le poto masani ua tele tausaga o tatou aʻoaʻoina, ina ia latou maua ai aogā.

15. O ā meaalofa tāua na faasoa atu e le aposetolo o Paulo iā Timoteo?

¹⁵ Seʻi o tatou iloiloina le faaaʻoaʻoga a le aposetolo o Paulo e faatatau i le limafoaʻi. Na valaaulia e Paulo Timoteo i le galuega faamisionare, ma na faaalia e Paulo le limafoaʻi e ala i le faamatala atu i lenei tane talavou o ana metotia e talaʻi ma aʻoaʻo ai. (Galu. 16:1-3) Na matuā aogā iā Timoteo toleniga a Paulo ina ia agavaa ai i le talaʻia o le tala lelei. (1 Kori. 4:17) Mulimuli ane, na faaaogā foʻi e Timoteo metotia a Paulo e toleni ai isi.

16. Na faapefea ona toleni e Shigeo isi?

¹⁶ E fiafia uso ma tuafāfine matutua i aso nei, e toleni talavou e faia galuega sa masani ona latou faia i le faapotopotoga, ma e latou te lē popole pe e toe faaaogā i latou. O se faataʻitaʻiga o Shigeo lea na taʻua muamua, e tele tausaga o ia toleniina uso talavou o le Komiti o le Lālā. Na ia faia faapea ina ia fesoasoani ai i manaʻoga o le Malo i le atunuu na ia auauna ai. O lea, ina ua lē mafai e le uso ona toe auauna o se sooupu o le Komiti o le Lālā, ae ua iai se uso ua uma ona toleni lelei e suitulaga iā te ia. Na faaauau pea ona faasoa atu e Shigeo i uso talavou le poto masani na ia maua mai i le 45 tausaga lea na auauna ai o se Komiti o le Lālā. O se matuā faamanuiaga i tagata o le Atua uso e pei o Shigeo.

17. E tusa ai ma le Luka 6:38, o le ā e mafai e uso ma tuafāfine matutua ona foaʻi atu i isi?

 ¹⁷ Uso ma tuafāfine matutua, ua outou faamaonia o le auala sili ona lelei e ola ai o le auauna faamaoni ma faatuatua iā Ieova. E faamaonia i a outou faaaʻoaʻoga, e matuā aogā le aʻoaʻoina o mataupu silisili o le Tusi Paia ma faatatau i o tatou olaga. Ua outou masani i le auala na faia ai mea i le taimi ua teʻa, ae ua outou iloa foʻi e manaʻomia ona faamasani i suiga fou. E tele auala e mafai ona fesoasoani ai uso ma tuafāfine matutua e leʻi leva ona papatiso i isi. Ia taʻu atu i talavou lou fiafia tele, ona ua e aʻoaʻoina e faatatau iā Ieova i lenei taimi o lou olaga. E fiafia talavou e faalogologo atu i mea na tutupu i lou olaga ma lesona na e aʻoaʻoina mai ai. Pe a e “foaʻi atu pea” e ala i le faaaogā o lesona na e aʻoaʻoina mai i le olaga e toleni ai isi, o le a matuā faamanuia Ieova iā te oe.​—Faitau le Luka 6:38.

18. E faapefea i uso ma tuafāfine matutua ma talavou ona fesoasoani le tasi i le isi?

¹⁸ Pe a vavalalata atu uso ma tuafāfine pele ua matutua i talavou, o le a mafai ai ona lagolagosua le tasi i le isi. (Roma 1:12) E tofu uma i tatou ma se mea tāua e lē o maua e isi. O loo iai i tagata matutua le atamai ma le poto masani na latou maua mai i le tele o tausaga, ae o loo iai i talavou le malosi. Pe a galulue soosootauʻau talavou ma uso ma tuafāfine matutua o ni uō, e latou te viiviia ai lo tatou Tamā alofa i le lagi. Maʻeu le avea o i latou uma o se faamanuiaga i le faapotopotoga!