1. Te wi kon moro owru, dan fa wi kan horibaka gi na organisâsi fu Yehovah?

TE WI kon moro owru, dan kande wi e frede taki wi no man du so furu moro gi Yehovah leki fosi. Kande wi no abi so furu krakti moro leki fosi, ma wi kan gebroiki na ondrofeni nanga a koni di wi kisi fu yepi yonguwan fu horibaka gi Yehovah en organisâsi èn fu teki moro frantwortu na den tapu. Wan brada di de owruman omeni yari kaba taki: „Di mi bigin firi taki mi no ben man du so furu moro fu di mi kon owru, dan mi ben breiti taki yongu brada ben de di ben man teki a wroko abra.”

2. San wi o luku na ini na artikel disi?

² Na artikel fosi a wan disi, sori fa yonguwan e kisi wini te den e kon leri sabi den owruwan moro bun. Na ini na artikel disi wi o si fa den owru brada nanga sisa o man wroko moro bun nanga den yonguwan te den abi sakafasi, te den abi warderi, èn te den lobi gi trawan sani. A sani disi o tyari blesi kon gi a heri gemeente.

3. San wan Kresten di abi sakafasi o du, soleki fa Filipisma 2:3, 4 e sori? Fa a fasi dati kan yepi en?

³ Owrusma musu abi sakafasi efu den wani yepi yonguwan. Wan sma di abi sakafasi e si trawan moro hei leki ensrefi. (Leisi Filipisma 2:3, 4.) Owruwan di abi sakafasi e frustan taki nofo tron difrenti fasi de fa yu kan du wan wroko, sondro taki yu e pasa den wet fu Bijbel. Dati meki den no e fruwakti taki ala sma e du sani na a srefi fasi fa  den ben gwenti du sani fosi (Preik. 7:10). Aladi den sabi furu sani di den kan leri den yonguwan, toku den e frustan taki son leisi den musu leri du sani tra fasi, fu di „sani na grontapu e kenki”.​—1 Kor. 7:31.

4. Fa kring-owruman e teki na eksempre fu den Leifisma?

⁴ Owru brada nanga sisa di abi sakafasi sabi taki o moro den e kon owru, o moro den no o man du den sani di den ben gwenti du fosi. Luku na eksempre fu den kring-owruman fu wi. Te den kon abi 70 yari, dan na organisâsi e aksi den fu du tra wroko. A sani dati kan muilek gi den. Den ben lobi a grani di den ben abi fu dini den brada nanga sisa fu den. Den ben lobi a wroko di den ben e du èn den wani du a wroko dati ete. Ma den e frustan taki a moro bun te yongu brada e du a wroko dati. Dati meki den e teki na eksempre fu den Leifisma na ini owruten Israel. Te den man dati ben abi 50 yari, dan den ben musu tapu nanga a wroko di den ben e du na a tabernakel. Den owru Leifisma dati ben breiti fu du awinsi sortu wroko den ben e kisi fu du. Iniwan wroko di den ben e kisi den ben e du fayafaya èn den ben e du ala san den man fu yepi den yonguwan (Num. 8:25, 26). Na ini a ten disi, den brada di ben e dini leki kring-owruman fosi, de wan blesi gi a gemeente aladi den no e du a kringwroko moro.

5. San yu e leri fu na eksempre fu Dan nanga Katie?

 ⁵ Luku na eksempre fu Dan, di ben e dini leki kring-owruman 23 yari langa. Di Dan kon abi 70 yari, dan en nanga en wefi Katie ben musu go dini leki spesrutu pionier. Fa den feni a nyun wroko fu den? Dan e taki dati now a abi moro fu du leki fosi. A abi en gemeente frantwortu, a e yepi den brada fu tron dinari na ini a diniwroko, èn a e leri trawan fa fu preiki na ini bigi foto èn na strafu-oso. Efu yu na wan owru brada noso sisa, dan yu kan du furu fu yepi trawan, awinsi yu de na ini a furuten diniwroko noso yu na wan gewoon preikiman. Fa yu kan du dati? Leri fu de koloku na ini a situwâsi fu yu, pruberi fu du nyun sani, èn luku san yu man du na presi fu luku san yu no man du moro.

6. Fu san ede a bun fu sabi san yu man du èn san yu no man du? Gi wan eksempre.

⁶ Wan sma di abi sakafasi sabi san a man du èn san a no man du (Odo 11:2). A no o fruwakti tumusi furu fu ensrefi. Dati meki a o de koloku na ini a situwâsi fu en èn a o tan wroko tranga. Wi kan agersi so wan sma nanga wan man di e rèi wan wagi go na tapu wan bergi. A musu poti a versnelling moro lagi fu man tan rèi go na tapu a bergi. Kande a o abi fu rèi moro safri, ma o tan go na fesi. Na so a de tu taki wan sma di abi sakafasi, sabi o ten a no man du so furu moro. Na so a o man tan dini Yehovah èn a o man tan yepi trawan.​—Fil. 4:5.

7. Fu san ede Barsilai na wan bun eksempre gi wi?

⁷ Luku na eksempre fu Barsilai. A ben abi 80 yari di Kownu David aksi en fu kon wroko gi en. Ma fu di Barsilai ben sabi taki a ben owru kaba, meki a taigi a kownu taki a no ben o man. A taigi David fu teki Kimham na presi fu en fu di Kimham ben moro yongu (2 Sam. 19:35-37). Neleki Barsilai, owru brada breiti fu gi yonguwan na okasi fu teki a wroko fu den abra.

8. Fa Kownu David sori sakafasi di a ben wani bow a tempel?

⁸ Kownu David ben abi sakafasi tu. A ben de fayafaya fu bow wan oso gi Yehovah, ma di Yehovah taigi en taki a yongu man Salomo ben o kisi a grani fu du a wroko disi, dan David lespeki a bosroiti di Yehovah teki èn a horibaka gi a wroko disi nanga en heri ati (1 Kron. 17:4; 22:5). David no ben feni taki a ben o man du a wroko moro bun, fu di Salomo ’ben yongu ete èn a no ben abi ondrofeni’ (1 Kron. 29:1). David ben moro owru èn a ben abi moro ondrofeni. Ma a ben sabi taki a no den sani disi ben o meki a bow-wroko ben o waka bun. Na Yehovah ben o blesi a wroko. Neleki David, owru brada nanga sisa na ini a ten disi e tan wroko gi Yehovah, awinsi den e kisi tra wroko fu du. Den sabi taki Yehovah o blesi den yonguwan di e du a wroko di den ben e du fosi.

9. Fa wan brada fu wan Bijkantoro Komte sori taki a abi sakafasi?

⁹ Wan moi eksempre na ini a ten disi, na a di fu wan brada di nen Shigeo. Na ini 1976, di a ben abi 30 yari, a tron wan brada fu a Bijkantoro Komte. Na ini 2004, a tron fesiman fu a Bijkantoro Komte. Bakaten a kon si taki a no ben abi so furu krakti moro èn a no ben man du en wroko so bun moro. A begi Yehovah  fu a tori disi fu di a ben feni taki a ben o moro bun fu meki wan moro yongu brada teki a wroko fu en abra. Aladi Shigeo no de fesiman fu a Bijkantoro Komte moro, toku a de na ini a Bijkantoro Komte ete. Soleki fa den eksempre fu Barsilai, Kownu David, nanga Shigeo e sori, wan sma di abi sakafasi no e luku nomo taki den yonguwan no abi ondrofeni, ma a e luku san den man du. A no o strei nanga den, ma a o si den leki sma di e wroko makandra nanga en.​—Odo 20:29.

10. Fa owru brada nanga sisa e si den yonguwan na ini a gemeente?

¹⁰ Owru brada nanga sisa e si den yonguwan leki kado fu Yehovah èn den breiti nanga den. Te owruwan e kon swaki, dan den breiti taki den yonguwan di abi moro krakti de klariklari fu yepi a gemeente èn fu teki a wroko fu den abra.

11. Fa Rut 4:13-16 e sori taki owrusma kan kisi blesi te den de klariklari fu teki a yepi fu yonguwan?

¹¹ Wan moi eksempre na ini Bijbel, na a di fu Naomi, wan owru uma di ben breiti nanga a yepi di a ben kisi fu wan moro yongu uma. Di Naomi en manpikin dede, dan a taigi Rut, a wefi fu en manpikin, fu drai go baka na en eigi pipel. Ma Rut no ben wani libi Naomi en wawan èn a drai go baka na Betlehem makandra nanga en. Naomi ben breiti srefisrefi taki Rut ben go nanga en èn taki a yepi en (Rut 1:7, 8, 18). A san disi tyari wini kon gi ala tu uma. (Leisi Rut 4:13-16.) Owrusma di abi sakafasi e teki na eksempre fu Naomi.

12. Fa na apostel Paulus sori taki a ben de nanga tangi?

 ¹² Na apostel Paulus ben breiti nanga a yepi di a ben kisi. Fu eksempre, a ben taigi den Kresten na ini Filipi tangi taki den ben seni sani gi en (Fil. 4:16). A ben sori warderi gi a yepi di Timoteyus ben gi en (Fil. 2:19-22). Èn Paulus ben taigi Gado tangi tu taki den brada nanga sisa ben kon gi en deki-ati di den ben e tyari en go na Rome leki strafuman (Tori 28:15). Paulus waka dusundusun kilometer fu preiki èn fu gi den gemeente deki-ati. Toku a ben abi sakafasi èn a teki a yepi di a ben e kisi fu den brada nanga sisa fu en.

13. Fa owru brada nanga sisa kan sori warderi gi den yonguwan?

¹³ Efu yu na wan owru brada noso sisa, dan difrenti fasi de fa yu kan sori warderi gi den yonguwan na ini yu gemeente. Efu den wani rèi tyari yu no na wan presi, efu den wan tyari yu go na wenkri, noso efu den wani du wan tra sani gi yu, dan teki a yepi fu den. Si a yepi dati leki wan fasi fa Yehovah e sori lobi gi yu. Kande yu o tron mati srefi fu den sma di e yepi yu. Pruberi ala ten fu yepi den yonguwan fu kon moro krosibei na Yehovah. Taigi den taki yu breiti fu si fa den e meki muiti fu du moro na ini a gemeente. Meki ten gi den èn fruteri den fu den sani di yu ondrofeni na ini yu libi. Te yu e du dati, dan yu e ’sori taki yu de nanga tangi’ taki Yehovah hari den yonguwan kon na ini a gemeente.​—Kol. 3:15; Yoh. 6:44; 1 Tes. 5:18.

14. Fa Kownu David sori taki a ben lobi gi sma sani?

¹⁴ Kownu David ben abi wan tra prenspari fasi di owru brada nanga sisa musu abi tu. Den musu lobi gi trawan sani. Kownu David ben gebroiki bun furu fu en eigi moni nanga gudu fu horibaka gi a bow-wroko fu a tempel (1 Kron. 22:11-16; 29:3, 4). A du disi aladi na en manpikin Salomo ben o kisi a nen taki a bow a tempel. Awinsi wi no abi furu krakti moro fu teki prati na bow-wroko fu na organisâsi, toku wi kan tan gi bijdrage so furu leki wi man fu horibaka gi den bow-wroko disi. Wi kan yepi den yonguwan te wi e sori den san wi leri na ini den yari di pasa.

15. Sortu moi sani na apostel Paulus leri Timoteyus?

¹⁵ Luku na eksempre fu na apostel Paulus. Fu di a ben lobi du bun gi trawan, meki a aksi Timoteyus fu go du zendelingwroko makandra nanga en èn a sori a yonguman disi fa fu preiki èn gi sma leri (Tori 16:1-3). A leri di Paulus gi Timoteyus, yepi Timoteyus fu tron wan bun preikiman èn leriman fu a bun nyunsu (1 Kor. 4:17). Timoteyus gebroiki a leri di a ben kisi fu Paulus fu yepi trawan.

16. Fu san ede Shigeo leri trawan san a ben sabi?

¹⁶ Owruwan na ini a ten disi no frede taki a gemeente no o abi den fanowdu moro te den e leri yonguwan fu du a wroko di den ben e du fosi. Fu eksempre, na ini den yari di pasa Shigeo di wi ben kari kaba, ben leri wan tu yongu brada fu a Bijkantoro Komte fa fu du a wroko fu den. A du disi fu horibaka gi a Kownukondre wroko na ini a kondre pe a e dini. Di a no ben man de fesiman fu a Bijkantoro Komte moro, dan wan brada di ben kisi bun leri, ben kan teki a wroko fu en abra. Moro leki 45 yari langa, Shigeo dini na ini a Bijkantoro Komte èn a e gebroiki  den sani di a leri fu yepi den yongu brada.

17. San owruwan kan gi trawan? (Lukas 6:38)

¹⁷ Un owru brada nanga sisa na libilibi buweisi taki a moro bun fasi fu libi na fu dini Yehovah fayafaya èn nanga un heri ati. Na eksempre fu unu e sori taki a bun fu kon sabi Bijbel gronprakseri èn fu gebroiki den na ini unu libi. Un sabi taki sani ben e du tra fasi na ini a ten di pasa, ma unu e si tu taki a de fanowdu fu fiti unsrefi na nyun situwâsi. Den owruwan di dopu no so langa pasa kan de wan bigi yepi tu gi a gemeente. Un kan fruteri den yonguwan tu fa un breiti taki un leri sabi Yehovah na ini unu owrudei. Yonguwan o warderi en taki un fruteri den den ondrofenitori fu unu èn den sani di un leri. Te unu abi a gwenti fu gi sma sani noso fu leri den san unu sabi, dan Yehovah o gi unu furu blesi. Leisi Lukas 6:38.

18. Fa owruwan nanga yonguwan kan yepi makandra?

¹⁸ Un lobi-ati owruwan, te unu e du muiti fu tron mati fu den yonguwan, dan unu o man yepi makandra (Rom. 1:12). Ala sma abi wan sani di wan trawan no abi. Fu di den owruwan de na libi wan pisi ten kaba, meki den abi koni nanga ondrofeni. Den yonguwan abi krakti èn den de fayafaya. Te den yonguwan nanga den owruwan e wroko makandra leki mati, dan sma o prèise wi lobi-ati hemel Papa èn den o de wan blesi gi ala sma na ini a gemeente.