1. Ngumuphi umgomo lesingatibekela wona njengobe sikhula?

NJENGOBE sikhula, kungenteka sesabe kutsi angeke sisakhona kumentela lokunyenti Jehova njengasesikhatsini lesendlulile. Nanobe sesite emandla lebesinawo ngesikhatsi sisebasha, singasebentisa kuhlakanipha kanye nemakhono lesiwatfolile kuze sifundzise labasebasha kutsi babe lusito enhlanganweni yaJehova futsi bente imisebenti leminyenti. Lomunye umzalwane losekanesikhatsi lesidze angulomdzala welibandla watsi: “Ngesikhatsi ngingasakhoni kwenta loko lebengikwenta ngaphambili ngenca yekukhula, ngajabula ngekutsi bebakhona bazalwane labasebasha lebebakulungele kwenta umsebenti.”

2. Sitawucoca ngani kulesihloko?

² Sihloko lesendlulile besikhuluma ngekutsi labasebasha bangazuza njani nababa bangani balasebakhulile. Kulesihloko, sitawufundza ngekutsi kutfobeka, kubonga kwephana kanye nekwati kutsi kunetintfo lesingeke sikhone kutenta, kungabasita njani lasebakhulile kutsi basebentisane nalabasebasha lokungasita lonkhe libandla.

3. Ngekusho kwembhalo waKubaseFiliphi 2:3, 4, kuyini kutfobeka, futsi kungamsita njani umKhristu?

³ Lasebakhulile kufanele batfobeke nangabe bafuna kusita labasebasha. Umuntfu lotfobekile utsatsa labanye njengalabakhulu kunaye. (Fundza KubaseFiliphi 2:3, 4.) Lasebakhulile labatfobekile bayati kutsi kunetindlela letehlukene tekwenta intfo futsi letivumelana neliBhayibheli tiphindze  tiphumelele. Ngako abalindzeli kutsi wonkhe muntfu ente tintfo ngendlela lebebatenta ngayo kadzeni. (Shu. 7:10) Nanobe banelwati lolunyenti labangalwendlulisela kulabasha, bayati kutsi “simo salelive siyashintja,” nekutsi kungahle kudzingeke bafundze tindlela letinsha tekwenta tintfo.—1 Khor. 7:31.

4. Babonisi betigodzi banasiphi simo sengcondvo lesifana nesemaLevi?

⁴ Lasebakhulile labatfobekile bayati kutsi njengobe bakhula babese abasakhoni kwenta lokunyenti kunangaphambili. Cabanga ngesibonelo sebabonisi betigodzi. Nasebaneminyaka lengu-70, babese bacelwa kutsi bente lomunye umsebenti. Loko kungahle kube matima. Bebasijabulela sabelo sabo. Bebasitsandza futsi basenesifiso sekuchubeka bawenta lomsebenti. Kodvwa bayati kutsi kuncono kakhulu kutsi lomsebenti wentiwe bazalwane labasebasha. Banesimo sengcondvo lesifana nesemaLevi aka-Israyeli, ngobe nakaneminyaka lengu-50, bekubese kudzingeka kutsi ayekele kwenta umsebenti ethendeni lekukhontela. Bewajabula ngisho nobe enta muphi umsebenti. Bewenta konkhe langakhona kukwenta futsi bewasita nalabasebasha. (Num. 8:25, 26) Lamuhla, ngisho nobe labazalwane labake baba babonisi betigodzi bangasawavakasheli emabandla, kodvwa balusito emabandleni labakuwo.

5. Yini loyifundzako kuDan nakuKatie?

⁵ Cabanga ngesibonelo saDan, lowaba  ngumbonisi wesigodzi iminyaka lengu-23. Ngesikhatsi Dan aba neminyaka lengu-70, yena nemkakhe, Katie, bacelwa kutsi babe ngemahlahlandlela lakhetsekile. Bachuba njani esabelweni sabo lesisha? Dan utsi akake abe matasa ngalendlela! Wenta imisebenti yelibandla, asite bazalwane kutsi bafanelekele kuba tinceku letisebentako, aphindze aceceshe labanye kuze bashumayele emadolobheni lamakhulu nasemajele. Nine lesenikhulile, ngisho nobe nisemsebentini wasikhatsi sonkhe nobe cha, kunyenti leningakwenta kuze nisite labanye. Kanjani? Tivumelanise nesimo lesisha, utibekele imigomo lemisha, futsi unake kakhulu loko lokhona kukwenta kunaloko longakhoni kukwenta.

6. Fanekisa kutsi kuhle ngani kuvuma kutsi kunetintfo longeke ukhone kutenta.

⁶ Umuntfu lovumako kutsi kunetintfo langakhoni kutenta akalindzeli kwenta lokungetulu kwemandla akhe. Nakenta njalo, utawuhlala ajabulile futsi achubeke asebenta kamatima. Ufanana nemuntfu loshayela imoto endzaweni leyenyukelako. Lona loshayelako kudzingeka afake ligiya lelincane kuze atochubeka enyuka lomcansa. Kuliciniso kutsi kungenteka lemoto ihambe kancane, kodvwa itawuchubeka ihamba. Ngendlela lefanako, umuntfu lovumako kutsi kunetintfo langeke akhone kutenta, uyati nasekusikhatsi sekwenta lushintjo futsi “afake ligiya lelincane” kuze atochubeka akhonta Jehova asite nalabanye.—Fil. 4:5.

7. Bhazilayi wakhombisa njani kutsi bekavuma kutsi kunetintfo bekangeke akhone kutenta?

⁷ Cabanga ngesibonelo saBhazilayi, lobekaneminyaka lengu-80 ngesikhatsi iNkhosi Davide imcela kutsi ayohlala esigodlweni. Bhazilayi akazange asemukele lesicelo senkhosi. Ngenca yekutsi Bhazilayi bekavuma kutsi kunetintfo langeke akhone kutenta, watsi akuhambe lijaha lelinguKhimhamu esikhundleni sakhe. (2 Sam. 19:35-37) NjengaBhazilayi, lasebakhulile bayakujabulela kuvumela bazalwane labasebasha kutsi bente imisebenti.

8. INkhosi Davide yakhombisa njani kutsi iyavuma kutsi kunalebeyingeke ikhone kukwenta ngesikhatsi ifuna kwakha lithempeli?

⁸ INkhosi Davide nayo yavuma kutsi bekunetintfo lebeyingeke ikhone kutenta. Beyifuna ngenhlitiyo yayo yonkhe kwakhela Jehova indlu. Kodvwa ngesikhatsi Jehova atjela Davide kutsi lomsebenti bewutawentiwa nguSolomoni lobekamncane ngaleso sikhatsi, wasemukela lesincumo saJehova futsi wawusekela ngenhlitiyo yakhe yonkhe lomsebenti. (1 Khr. 17:4; 22:5) Davide akazange acabange kutsi nguye lobekangawenta kahle lomsebenti ngobe Solomoni ‘bekasemncane futsi ete lwati lwetintfo.’ (1 Khr. 29:1) Bekati kutsi kuphumelela kwalomsebenti bekutawuya ngekutsi Jehova uyawubusisa hhayi ngeminyaka nobe lwati lwalabo labaholako. NjengaDavide, lasebakhulile lamuhla bayachubeka benta umsebenti waJehova ngisho nobe tabelo tabo tishintja. Bayati kutsi Jehova utababusisa labasebasha labenta umsebenti lebebawenta.

9. Lelinye lilunga leKomidi Yeligatja lakhombisa njani kutsi liyavuma kutsi kunetintfo lelingeke likhone kutenta?

⁹ Sibonelo salamuhla ngumzalwane Shigeo, naye lowavuma kutsi bekunetintfo labengeke akhone kutenta. Nga-1976, nakaneminyaka lengu-30, wacelwa kutsi abe lilunga leKomidi Yeligatja. Nga-2004, waba ngumchumanisi weKomidi Yeligatja. Ngekuhamba kwesikhatsi wabona kutsi besekete emandla kunangaphambili nekutsi besekutsatsa sikhatsi kutsi acedze umsebenti wakhe. Wathantaza  ngalendzaba futsi wacabangisisa ngekutsi bekungaba kahle ngani kutsi umzalwane losemusha abe ngumchumanisi. Nanobe Shigeo angasasuye umchumanisi, kodvwa solo ulilunga leKomidi Yeligatja futsi uyabambisana nalamanye emalunga alekomidi. Njengobe sibonile esibonelweni saBhazilayi, seNkhosi Davide nesaShigeo, umuntfu lotfobekile nalovumako kutsi kunetintfo langeke akhone kutenta, unaka emandla alabasebasha kunekunaka kutsi kusenalokunyenti lokufanele bakufundze. Ubatsatsa njengetisebenti lakanye nato kunekutsi acabange kutsi bancintisana naye.—Taga 20:29.

10. Lasebakhulile bativa njani ngalabasebasha ebandleni?

¹⁰ Lasebakhulile batsatsa labasebasha njengetipho letivela kuJehova futsi bayabonga ngemisebenti labayentako. Njengobe emandla ancipha, lasebakhulile bayabonga ngekutsi labasha bayafuna kusebenta futsi banawo emandla ekwenta kanjalo, basite nelibandla.

11. Umbhalo waRuthe 4:13-16 ukhombisa njani kutsi lasebakhulile bayazuza nabemukela lusito kulabasebasha?

¹¹ LiBhayibheli likhuluma ngaNawomi losibonelo lesihle salosakhulile lowakujabulela kusitwa ngulosemusha. Ekucaleni, Nawomi wacela Ruthe lobekangumakoti wakakhe futsi angumfelokati kutsi abuyele emndenini wakubo. Kodvwa ngesikhatsi Ruthe ala kubuyela emndenini wakubo futsi afuna kuhamba naye eBetlehema, Nawomi wavuma. (Rut. 1:7, 8, 18) Loko kwabasita bobabili labafati! (Fundza Ruthe 4:13-16.) Kutfobeka kutawenta lasebakhulile balingise sibonelo saNawomi.

12. Umphostoli Pawula wakhombisa njani kutsi uyabonga?

 ¹² Umphostoli Pawula wabonga ngelusito lalutfola. Nasi sibonelo, wawabonga emaKhristu aseFiliphu ngetipho lamtfumelela tona. (Fil. 4:16) Wambonga naThimothi ngekutsi bekamsitile. (Fil. 2:19-22) Waphindze wabonga Nkulunkulu ngalabo labeta batomkhutsata ngesikhatsi asiboshwa futsi ayiswa eRoma. (Imis. 28:15) Pawula bekanemdlandla futsi bekahamba libanga lelidze ayoshumayela aphindze acinise emabandla. Nanobe kunjalo, bekatfobekile futsi bekalwemukela lusito kubazalwane nakubodzadze.

13. Lasebakhulile bangakhombisa njani kutsi bayabonga ngalabasebasha?

¹³ Nine lesenikhulile, tinyenti tindlela leningakhombisa ngato kutsi niyababonga labasebasha labasemabandleni enu. Nangabe bafuna kukusita ngekwekuhamba, ngekukuyela etitolo, nangaletinye nje tintfo lotidzingako, lwemukele lusito lwabo. Khumbula kutsi loku kungulenye indlela Jehova lakhombisa ngayo kutsi uyakutsandza. Kungenteka ube ngumngani lomkhulu walabo labakusitako. Hlale wetama kubasita kutsi basondzelane naJehova futsi ubatjele kutsi ujabula kangakanani ngekubona labasha bafuna kwenta umsebenti lomnyenti ebandleni. Kulungele kucitsa sikhatsi nabo ubacocela ngalokwentekile ekuphileni kwakho. Nawenta njalo, ‘utawukhombisa kutsi uyabonga’ kuJehova ngalabasebasha labadvonsele ebandleni.—Khol. 3:15; Joh. 6:44; 1 Thes. 5:18.

14. INkhosi Davide yakhombisa njani kutsi iyephana?

¹⁴ Esibonelweni seNkhosi Davide, sifundza ngalobunye buntfu lobubaluke kakhulu lasebakhulile lokufanele babe nabo—kwephana. Davide wanikela ngemali yakhe nangetintfo letiligugu kuze asekele umsebenti wekwakha lithempeli. (1 Khr. 22:11-16; 29:3, 4) Wakwenta loko ngisho nobe bantfu bebatawubita lelithempeli ngekutsi laSolomoni. Nangabe sesite emandla ekwakha takhiwo tenhlangano, singayisekela lemisebenti ngekutsi sinikele ngalesingakhona kunikela ngako. Singaphindze sisite labasebasha ngelwati lesilutfolile kuyo yonkhe leminyaka.

15. Pawula wamentela ini Thimothi?

¹⁵ Cabanga ngesibonelo sekwephana lesabekwa ngumphostoli Pawula. Wamema Thimothi kutsi ahambe naye njengobe bekenta umsebenti wekuba sitfunywa selivangeli, futsi wafundzisa lelijaha tindlela tekushumayela netekufundzisa. (Imis. 16:1-3) Loko kwasita Thimothi kutsi aphumelele ekusakateni tindzaba letimnandzi. (1 Khor. 4:17) Ngendlela lefanako, naThimothi wasebentisa loko lakufundza kuPawula kuze aceceshe labanye.

16. Kungani Shigeo acecesha labanye?

¹⁶ Lasebakhulile lamuhla abesabi kutsi angeke basaba lusito nangabe bacecesha labasebasha kutsi bente imisebenti lebebayenta ebandleni. Nasi sibonelo, kuleminyaka lendlulile, Shigeo, lesike sakhuluma ngaye, bekacecesha emalunga eKomidi Yeligatja lasemasha. Loko wakwenta kuze umsebenti waJehova uchubekele phambili kulelive lakulo. Umphumela waloko waba kutsi ngesikhatsi angasakhoni kuchubeka angumchumanisi, bekakhona umzalwane loceceshwe kahle lobekangenta lomsebenti. Shigeo sewube lilunga leKomidi Yeligatja iminyaka lengetulu kwalengu-45, futsi uyachubeka asebentisa lwati lwakhe kuze asite bazalwane labasebasha. Bazalwane labafana naShigeo basibusiso kubantfu baNkulunkulu!

17. Ngekuvumelana naLukha 6:38, yini lasebakhulile labangayipha labanye?

 ¹⁷ Nine bazalwane nabodzadze lesenikhulile, nisibonelo sekutsi kukhonta Jehova ngekukholwa nangekwetsembeka kuyindlela lencono kakhulu yekuphila. Ngesibonelo senu, niyakhombisa kutsi kuhle kutsi sifundze timiso letiseBhayibhelini futsi sitisebentise ekuphileni kwetfu. Niyati kutsi tintfo betentiwa njani esikhatsini lesendlulile, kodvwa niyasibona nesidzingo sekuvumelana netimo letinsha. Nine lesenikhulile lenisandza kubhajatiswa, ningabacocela labasebasha kutsi kunijabulise njani kwati Jehova senikhulile. Labasebasha batawujabula nanibacocela ngalokwentekile ekuphileni kwenu nangaloko lenikufundzile. Jehova utanibusisa kakhulu nangabe ‘nichubeka nipha labanye,’ ngekusebentisa tifundvo lenititfolile ekuphileni kuze nibaceceshe.—Fundza Lukha 6:38.

18. Bangasitana njani lasebakhulile nalabasebasha?

¹⁸ Nangabe nine lesenikhulile lesinitsandzako nisondzelana nalabasebasha, nitawukhona kusitana. (Rom. 1:12) Nonkhe ninalokutsite leningasitana ngako. Kuyo yonkhe leminyaka baphila, lasebakhulile batfole kuhlakanipha nelwati. Labasebasha banemandla. Nangabe lasebakhulile nalabasebasha basebenta kanye kanye, badvumisa Babe wetfu lonelutsandvo wasezulwini, futsi basibusiso kulo lonkhe libandla.