1. Loko hi ya hi guga i mpsini leswi hi faneleke hi tinyimisela ku swi yentxa?

LOKO hi ya hi guga hi nga ha chava, hi pimisa swaku Yehovha a nga ta hi tirhisa hintamu ku fana ni khale. I ntiyiso swaku loko hi ya hi kula ntamu wa hina wu ya wu pumbeka, kambe leswi hi nga ni malembe ya manyingi na hi tirhela Yehovha hi nga tirhisa wutlharhi la hina swaku hi pfuna majovhem kuva ma yentxa mintirho ya yinyingi ya lisima ka nhlengeletanu ya yena. Makwerhu mun’wana lweyi se i nga khale na a li doda a te: “Loko ni ya ni kula swi ni tsakisile ku vona swaku a ku ni majovhem lawa a ma ta yentxa mintirho abandleni.”

2. Hi ta vona yini ka djondzo leyi?

² Ka djondzo leyi nga hundza, hi vone swaku hi mhaka muni swi li swa lisima kuva majovhem ma bula ni vamakwerhu lava se va nga guga. Ka djondzo leyi hi ta vona 3 wa swilo leswi vamakwerhu lava se va nga guga va faneleke va va na swona, ku nga ku tiveka hansi, ku khensa ni ku pfuna van’wana. Swilo leswi swi nga pfuna vamakwerhu lava se va nga guga kuva va tirhisana kahle ni majovhem swaku bandla hinkwalu li pfuneka.

3. Hi ku ya hi Vafilipiya 2:3, 4, i yini ku tiveka hansi, naswona makwerhu lweyi se a nga guga a nga swi kombisisa ku yini swaku wa tiveka hansi?

³ Vamakwerhu lava se va nga kula hi ntanga va fanele va tiveka hansi swaku va pfuna vamakwerhu lava nga majovhem. Munhu lweyi a tivekaka hansi a vona van’wana na va li va lisima ku tlula yena. (Lerha Vafilipiya 2:3, 4.) Vamakwerhu lava se va nga guga va nga kombisa swaku va tiveka hansi hi tindlela ta tinyingi. Mintirho ya yinyingi bandleni yi nga ha yentxiwa hi tindlela ta ku hambana, kambe yi fanele yi yentxiwa hi ku ya hi leswi Bibele li swi vulaka. Se makwerhu lweyi a tivekaka hansi a nga ta nyimela swaku swilo swi yentxiwa hi ndlela leyi yena a nga yi tolovela. (Ekl. 7:10) Hambileswi makwerhu lweyi se a nga guga a nga ni swilo swa swinyingi leswi a nga swi djondzisaka van’wana, loko a tiveka hansi a ta pfumela ku titwananisa ni ku txintxa ka swiyimu “hikusa xiyimu xa misava leyi xa txintxa.” — 1 Kor. 7:31.

4. Vadjikelezi va va tekelelisa ku yini Valevhi?

 ⁴ Vamakwerhu lava va nga guga naswona va tivekaka hansi, va swi twisisa swaku a va swi koti ku yentxa mintirho yin’wana leyi a va yi yentxa khale. Hi xikombiso loko vadjikelezi va tlhanganisa 70 wa malembe, va rhambiwa swaku va ya yentxa mintirho yin’wana. Phela ku txintxa koloko, van’wana ku nga ha va karhatela hikusa a va wu rhandza hintamu ntirho wa vona wa ku yendzela mabandla va tlhela va pfuna vamakwerhu. Hambileswo loko va tlhanganisa malembe lawa, va swi twisisa swaku ntirho wa vona wu fanele wu yentxiwa hi vamakwerhu lava ntanga ya vona yi va pfumelelaka. Phela vamakwerhu lava va xi tekelela kahle xikombiso xa Valevhi, hikusa loko Mulevhi a tlhanganisa 50 wa malembe, a a fanele a nyima ku yentxa mintirho atabernakela hileswi a nga kula. Kambe Valevhi lava a va nyima ku yentxa mintirho ya tabernakela, a va tama va tsaka hi ku yentxa mintirho yin’wana va tlhela va pfuna lava a va ha li majovhem. (Tinhl. 8:25, 26) Ni namuntlha, vamakwerhu lava va nga nyima ku va vadjikelezi va yentxa leswi fanaka. Hambileswi vamakwerhu lava va kalaka va nga ha yendzeli mabandla ya manyingi, va ma pfuna hintamu mabandla lawa va nga ka wona.

5. U djondza yini ka xikombiso xa Dan na Katie?

⁵ A hi voneni xikombiso xa makwerhu Dan. Makwerhu lweyi a hete 23 wa malembe na a li mudjikelezi. Kambe nkama lowu a nga tlhanganisa 70 wa malembe, yena ni nsati wa yena Katie, va rhambiwe swaku va va vapfuli va ndlela va ku hlawuleka. Va swi kotise ku yini ku titwananisa ni ntirho lowu wa nyuwani? Makwerhu Dan a yentxa mintirho ya yinyingi abandleni,  naswona a pfuna vamakwerhu swaku va va vapfunisi va bandla, a tlhela a pfuna vamakwerhu swaku va wu yentxa kahle ntirho wa ku chumayela a madoropeni ni madjele. Swi nga na mhaka swaku hi wini ntirho lowu vamakwerhu lava se va nga kula va wu yentxaka ka nhlengeletanu ya Yehovha, va nga va pfuna hintamu van’wana hi ku titwananisa ni ku txintxa loku ku nga kona, ni hi ku pimisa hi mintirho yin’wana leyi va nga yi yentxelaka Yehovha va tlhela va tsaka hi leswi va kotaka ku swi yentxa.

6. Hi mhaka muni swi li swa lisima ku tiveka hansi? Nyikela xikombiso.

⁶ Munhu lweyi a tivekaka hansi wa pfumela swaku a hi hinkwaswu leswi a kotaka ku swi yentxa. (Swi. 11:2) Leswi a tivekaka hansi, a nga tshameli ku lava ku yentxa swilo leswi a kalaka a nga swi koti. Se leswo swi mu yentxa a tsaka a tlhela a lava ku tirha hi matimba. Munhu lweyi a tivekaka hansi a nga fanisiwa ni munhu lweyi a fambisaka movha ka xitaratu lexi nga ni swikhele. I ntiyiso swaku swi nga ha lava a famba hi kutsongokutsongo kambe a nga ta nyima. Ku fana ni leswi munhu lweyi a fambisaka movha a faneleke a txintxa mafambiselo ya yena loko a khaluta hi ka swikhele, munhu lweyi a tivekaka hansi wa swi twisisa swaku a nga fanelanga a sindzisa swaku swilo swi yentxiwa hi ndlela leyi a nga yi tolovela, kambe minkama yin’wana a fanele a txintxa ndlela leyi a swi yentxaka hi yona swilo leswaku a tama a tirhela Yehovha.  — Filp. 4:5.

7. Barizilayi a swi kombisise ku yini swaku a a tiveka hansi?

⁷ Pimisa hi xikombiso xa Barizilayi. Nkama na a ni 80 wa malembe, hosi Davhida a mu rhambile swaku a ya tirhela ka yindlo ya wuhosi. Kambe leswi a a tiveka hansi, a nga pfumelanga ku ya tirha ka yindlo ya wuhosi hikusa a a swi tiva swaku ntanga ya yena a yi nga ha mu pfumeleli ku yentxa mintirho hinkwayu leyi lavekaka. Kambe a yentxe swaku Kimihama lweyi a a li jovhem a ya pfaleta ndhawu ya yena. (2 Sam. 19:35-37) Hilani ku fanaka, vamakwerhu lava se va nga guga va tsaka loko va vona majovhem ma yentxa mintirho leyi vona a va yi yentxa hambileswi a va yi rhandza.

8. Hosi Davhida a swi kombisise ku yini swaku a tiveka hansi loko a lave ku yaka tempele?

⁸ Hosi Davhida na yena a hi vekele xikombiso xa xinene xa ku tiveka hansi. A a swi lava hintamu ku yakela Yehovha tempele. Kambe Yehovha a vule swaku Solomoni hi yena a a fanele a yaka tempele. Hi ku tiveka hansi Davhida a pfumele leswi Yehovha a nga swi vula, naswona a yentxe hinkwaswu leswi a nga swi kota kuva a pfunisa ku yakeni ka tempele. (1 Tikro. 17:4; 22:5) Davhida a nga zanga a pimisa swaku n’wana wa yena Solomomi a a nga ta swi kota ku yaka tempele hi mhaka leswi a a li mutsongo. (1 Tikro. 29:1) Phela Davhida a a swi tiva swaku hi Yehovha lweyi a a ta yentxa swaku ntirho wa ku yaka tempele wu famba kahle, ku nga li wutivi kumbe wutlharhi la vanhu lava a va ta wu kongomisa. Hi ku tekelela Davhida, vamakwerhu lava se va nga guga va tama va tirhela Yehovha hi ku hiseka, hambiloko va nga yi yentxi mintirho leyi a va yi yentxa khale, naswona va swi tiva swaku Yehovha a ta katekisa majovhem lawa ma yentxaka mintirho leyi vona a va yi yentxa khale.

9. Makwerhu Shigeo a swi kombisise ku yini swaku a tiveka hansi?

⁹ Munhu mun’wana lweyi a hi vekelaka xikombiso xa kahle hi makwerhu Shigeo. Nkama lowu a nga tlhanganisa 30 wa malembe hi 1976, va mu veke swaku a va mun’we wa vamakwerhu va Comissão la Filiyali. Se hi 2004, a ve mutlhanganisi wa vamakwerhu va Comissão la Filiyali. Hi ku famba ka nkama a vone swaku a a nga li na ntamu wa ku tama a yentxa ntirho lowu a a wu yentxa. Shigeo a khongelile hi mhaka leyi, a  gama a vona swaku a swi ta yampsa loko a ko vekiwa makwerhu mun’wana lweyi a nga jovhem swaku a mu pfaleta ka ntirho wa yena. Hambileswi makwerhu Shigeo a kalaka a nga a ha li mutlhanganisi wa Comissão la Filiyali, a tama a tirha na a tsakile ka Comissão la Filiyali. Hilani hi nga swi vona hi kona ka xikombiso xa Barizilayi, xa hosi Davhida ni xa makwerhu Shigeo, munhu lweyi a tivekeka hansi a vona swilo swa swinene leswi majovhem ma kotaka ku swi yentxa, handle ka ku vona ntsena leswi ma faneleke ma swi djondza. Funtshi munhu lweyi a tivekeka hansi, a nga ta phikizana ni majovhem kambe a ta tinyimisela ku tirhisana na wona. — Swi. 20:29.

10. Vamakwerhu lava se va nga guga va ma vonisa ku yini majovhem?

¹⁰ Vamakwerhu lava nga guga va vona majovhem na ma li vanhu va lisima lava Yehovha a nga hi nyika wona. Naswona va yi khensa hintamu mintirho leyi yentxiwaka hi majovhem. Hambiloko va ya va hela ntamu, va tsaka hi ku tiva swaku a mabandleni ya vona ku ni majovhem lawa ma nga ni ntamu ni ku tinyimisela ka kunene ka ku yentxa mintirho leyi lavekaka.

11. Rhuti 4:13-16 yi swi kombisisa ku yini swaku i swa lisima ku pfumela ku pfuniwa hi vamakwerhu lava nga majovhem?

¹¹ Ka Bibele, Nawomi i xikombiso xa xinene xa munhu lweyi a nga kota ku khensa hambileswi se a a gugile. Hi xikombiso Nawomi a pfumele ku pfuniwa hi Rhuti hambileswi Rhuti a a li mutsongo ka yena. Ku sunguleni, Nawomi a byele Rhuti swaku a tlhelela ka maxaka ya yena. Kambe loko Nawomi a vona swaku Rhuti a a sindzisa ku tlhela na yena aBetlehema a pfumelile hikusa a a swi tiva swaku a a ta mu pfuna. (Rhuti 1:7, 8, 18) Phela kuva va tlhele xikan’we swi va pfunile hintamu! (Lerha Rhuti 4:13-16.) Vamakwerhu lava se va nga guga naswona  va tivekaka hansi va xi tekelela kahle xikombiso xa Nawomi.

12. Mupostolo Pawulo a swi kombisise ku yini swaku a a khensa?

¹² Mupostolo Pawulo a a khensa hileswi a a pfuniwa hi van’wana. Hi xikombiso, a khense hintamu hi mhaka leswi vamakwerhu va Filipiya va nga mu pfuna hi leswi a a swi lava. (Filp. 4:16) A tlhele a khensa hileswi a nga pfumiwa hi Timotiyu. (Filp. 2:19-22) Naswona Pawulo a mu khense hintamu Yehovha hileswi a nga tirhisa vamakwerhu swaku va mu tiyisa nkama na a khomiwile a yisiwa Roma. (Mint. 28:15) Hambileswi Pawulo a nga yentxa mintirho ya yinyingi a tlhela a yendza a ya ka tindhawu ta tinyingi swaku a ya chumayela a tlhela a tiyisa mabandla, a nga zanga a tibyela a pimisa swaku a nga swi lavi ku pfuniwa hi vamakwerhu.

13. Vamakwerhu lava va nga guga va swi kombisisa ku yini swaku va ma khensa majovhem lawa va nga na wona bandleni?

¹³ Loko se u li makwerhu lweyi a nga guga, u nga kombisa swaku wa ma khensa majovhem ya bandla la wena hi tindlela ta tinyingi. Hi xikombiso majovhem wolawu ma nga ha ku nyika boleya, ma ku xavela swilo, kumbe ma ku pfuna ni hi tindlela tin’wana. Se pfumela ku pfuniwa u tlhela u ma khensa hi swoleswo. Loko ma ku pfuna, swi voni ku li Yehovha lweyi a ku kombaka swaku wa ku rhandza. Loko u yentxa leswo u ta va munghanu wa mukulu wa vamakwerhu lava ku pfunaka. Minkama hinkwayu pfuna majovhem swaku ma tama ma li vanghanu va Yehovha. Va byele swaku u tsaka hintamu loko u vona majovhem ma tinyimisela ku yentxa mintirho abandleni. Minkama hinkwayu va byele leswi nga ku yentxekela ka wutomi la wena, loko u yentxa leswo u ta kombisa swaku wa mu khensa Yehovha hi leswi a nga yentxa swaku ku va ni majovhem abandleni. — Kol. 3:15; Yoh. 6:44; 1 Tes. 5:18.

14. Hosi Davhida a swi kombisise ku yini swaku wa nyikana?

¹⁴ Xikombiso xa hosi Davhida xi hi komba swaku i swa lisima kuva vamakwerhu lava va nga guga va pfuna van’wana. Hosi Davhida a nyikele swilo swa swinyingi ni male ya yinyingi kuva swi pfunisa ku yakeni ka tempele. (1 Tikro. 22:11-16; 29:3, 4) A yentxe leswo hambileswi a a swi tiva swaku vanhu a va ta hlaya swaku i tempele ya Solomoni. Na hina swi nga yentxeka hi nga na matimba ya ku pfunisa ka ku yaka tiyindlo leti hi nga ta gandzela Yehovha ka tona, kambe hi nga ha nyikela hi male swaku hi pfunisa hi ku ya hi swiyimu swa hina. Hi nga ha tlhela hi tirhisa wutlhari leli hi nga li kuma ka mintirho ya Yehovha swaku hi pfuna majovhem.

15. I yini leswi mupostolo Pawulo a nga djondzisa Timotiyu?

¹⁵ Tlhela u pimisa hi xikombiso xa mupostolo Pawulo. A rhambe Timotiyu swaku va famba xikan’we ka ntirho wa wumisiyonariyu. Hi ku swi rhandza, Pawulo a byele Timotiyu tindlela leti a a ti tirhisa swaku a chumayela ni ku djondzisa. (Mint. 16:1-3) Leswi Pawulo a nga swi djondzisa Timotiyu swi mu pfune kuva mudjondzisi wa kahle wa mahungu ya ku tsakisa. (1 Kor. 4:17) Na yena Timotiyu a tlhele a djondzisa van’wana leswi Pawulo a nga mu djondzisa swona.

16. Hi mhaka muni makwerhu Shigeo a trenare van’wana?

¹⁶ Vamakwerhu lava nga guga a va tivoni na vo luza loko va trenara majovhem ka mabandla ya vona. Hi xikombiso, makwerhu Shigeo, lweyi hi nga vulavula hi yena, a hete malembe ya manyingi na a djondzisa vamakwerhu lava a va ha li majovhem, lava a va li ka Comissão la Filiyali swaku va wu yentxa kahle ntirho wa vona. Funtshi a yentxe leswo hikusa a a swi tiva swaku  a swi ta pfunisa ka ntirho wa ku chumayela ka tiko leli a va tirhela ka lona. Lexi tsakisaka, hi leswaku loko makwerhu Shigeo a nyimile ku va mutlhanganisi wa vamakwerhu va Comissão la Filiyali, se a ku ni vamakwerhu lava a va ta mu pfaleta. Makwerhu Shigeo a ni 45 wa malembe ni ku tlula na a tirha ka Comissão la Filiyali, naswona a tama a djondzisa majovhem hi wutivi leli a nga na lona. Phela vamakwerhu va ku fana ni lweyi va va pfuna hintamu vanhu va Yehovha!

17. Hi ku ya hi Luka 6:38, i yini leswi vamakwerhu lava nga kula va nga swi yentxaka swaku va pfuna van’wana?

¹⁷ N’wina vamakwerhu se mi nga guga, mi swi tiva kahle swaku kuva munhu a tsaka ka wutomi la yena a fanele a tirhela Yehovha hi ku tshembeka. Xikombiso xa n’wina xi swi komba kahle swaku swi pfuna hintamu ku djondza Bibele ni ku hanya hi leswi li swi djondzisaka. Hambileswi mi swi tivaka leswi swilo a swi yentxisiwa xiswona khale, mi tinyimisele ku titwananisa ni swiyimu leswi nga kona swoswi. Na n’wina vamakwerhu lava se mi nga guga ma ha ku tsakamisiwaka, ku ni minchumu ya yinyingi leyi mi nga yi yentxelaka Yehovha. Majovhem ma ta tsaka loko mi ma byela hi leswi mi nga titwisa xiswona loko mi tive Yehovha hambileswi se mi nga vakulu. Loko mi hanya hi ku nyika mi tlhela mi pfuna majovhem hi wutlharhi leli mi nga na lona, Yehovha a ta mi katekisa hintamu.  — Lerha Luka 6:38.

18. Majovhem ni vamakwerhu lava se va nga guga va nga pfunisana ku yini?

¹⁸ Loko majovhem ni vamakwerhu lava se va nga guga va va vanghanu, hinkwavu va ta pfuneka. (Rom. 1:12) Hi xikombiso, vamakwerhu lava se va nga guga va ni wutlharhi naswona va tiva minchumu ya yinyingi leyi va nga yi djondza ka malembe lawa na va tirhela Yehovha. Kasi majovhem ma ni ntamu wa ku yentxa swilo. Se loko majovhem ni vamakwerhu lava nga guga va tirhisana va tlhela va va vanghanu, va ta pfuna vamakwerhu bandleni naswona va ta dzunisa Yehovha Papayi wa hina.