1. A paari noa ˈi, eaha te tahi mau fa ta tatou e nehenehe e haamau?

 A PAARI noa ˈi tatou, e nehenehe tatou e manaˈo aita faahou to tatou e faufaaraa no Iehova. E hiti mai iho â te manaˈo i te mea e te paruparu noa ˈtura tatou. E nehenehe râ tatou e faaohipa i to tatou paari e aravihi no te tauturu i te feia apî ia faaohipa i te reira i roto i te faanahonahoraa a Iehova. Te na ô ra te hoê taeae mea maoro to ˈna riroraa mai ei matahiapo: “I to ˈu iteraa e te paari noa ˈtura vau, aita vau i haapeapea no te mea te vai ra te taeae apî no te amo i te mau hopoia i roto i te amuiraa.”

2. Eaha ta tatou e hiˈopoa i roto i teie tumu parau haapiiraa?

² I roto i te tumu parau na mua ˈtu, ua hiˈopoa tatou e nafea te mau taurearea e faufaahia ˈi i te hiˈoraa o te mau ruhiruhia. I roto i teie tumu parau haapiiraa, e hiˈo mai tatou e nafea ia faatupu i te haehaa, te aau faahaihai, te mauruuru e ta aau horoa noa. E tauturu mai te reira i te mau taeae e tuahine ruhiruhia ia ohipa amui e te mau taurearea a faufaahia ˈtu ai te amuiraa taatoa.

3. Ia au i te Philipi 2:3, 4, eaha te haehaa e e nafea te reira e tauturu ai i te mau Kerisetiano?

³ E hiˈo te hoê taata haehaa ia vetahi ê mai te mea ra mea hau aˈe ratou ia ˈna. (A taio i te Philipi 2:3, 4.) No te tauturu i te mau taurearea, mea titauhia ia faatupu te feia ruhiruhia i te haehaa. Mea haehaa anaˈe ratou, e farii ratou e mea rahi te ravea e te manaˈo Bibilia o te tauturu  ia ratou ia amo i te hopoia. Eita ïa ratou e ani ia vetahi ê ia rave i te mau mea mai ta ratou i matau i te rave. (Koh. 7:10) A tauturu ai te mau taeae e tuahine ruhiruhia i te feia apî, te ite nei ratou e te taui ra te tupuraa o teie nei ao e mea titauhia ia rave ratou i te mau faatanoraa i mua i te mau tupuraa apî.—Kor. 1, 7:31.

4. E nafea te mau tiaau haaati e pee ai i te hiˈoraa o te ati Levi?

⁴ Ma te haehaa, e farii te feia ruhiruhia e no to ratou matahiti rahi, eita ta ratou e nehenehe e rave mai na mua ˈˈe. Teie te tahi hiˈoraa, i te 70raa o te matahiti, e faaea te mau tiaau haaati i ta ratou taviniraa e e tuuhia ratou i roto i te hoê huru taviniraa ê. E nehenehe te reira e riro ei mea fifi no ratou no te mea no ratou, mea faufaa roa tera hopoia e tauturu i te mau taeae. Mea au roa na ratou i tera taviniraa e aita roa ˈtu ratou e hinaaro e vaiiho i ta ratou taviniraa. Tera râ, te taa atoa nei ia ratou, mea tano aˈe na te mau taeae apî e haapao i tera tuhaa. E pee ratou i te hiˈoraa o te ati Levi o tei titauhia ia faaea i te tavini i te sekene i te 50raa o to ratou matahiti. Ua oaoa noa te ati Levi noa ˈtu eaha te mau hopoia i horoahia ia ratou. Ma te itoito, ua tamau noa ratou i te rave i tei maraa ia ratou no te tauturu i te mau taurearea. (Num. 8:25, 26) I teie mahana, te tauturu atoa nei te mau taeae tei tavini na ei tiaau haaati i roto i ta ratou amuiraa.

5. Eaha te haapii mai i te hiˈoraa o Dan raua Katie?

 ⁵ Teie te hiˈoraa o Dan, tei tavini 23 matahiti i roto i te tuhaa haaati. I te 70raa o to ˈna matahiti, ua tonohia raua ta ˈna vahine o Katie ei pionie taa ê. Eaha râ to raua huru i roto i tera tupuraa apî? Te na ô ra Dan: “Mea rahi atu â ta ˈu ohipa i teie nei. E haapao vau i ta ˈu hopoia i roto i te amuiraa, e faaineine au i te mau taeae ia riro ei tavini tauturu e e faaineine atoa vau i te tahi atu ia poro i roto i te mau oire e i te mau fare tapearaa.” Outou te feia ruhiruhia te tavini nei paha ma te taime taatoa, e nehenehe outou e tauturu i te tahi atu. E nafea? A oaoa i roto i ta outou taviniraa apî, a haamau i te mau fa apî e a rave i te mau mea atoa e maraa ia outou.

6. Eaha te faufaaraa ia faatupu i te aau faahaihai? A horoa i te hiˈoraa.

⁶ Ua ite te taeae aau faahaihai i to ˈna mau taotiaraa. (Mas. 11:2) E aau faahaihai anaˈe to te hoê taata, eita o ˈna e titau hau aˈe i ta ˈna e nehenehe e rave. Ia na reira o ˈna, e oaoa o ˈna e e tamau o ˈna i te rohi i roto i te ohipa ta ˈna e rave ra. E nehenehe e faaauhia te taata aau faahaihai i te hoê taata e faahoro ra i to ˈna pereoo i nia i te hoê purumu pauma. E titauhia ia ˈna ia haere mǎrû rii ia ore te pereoo e pohe. Hoê â huru no te hoê taata aau faahaihai. Ua ite o ˈna eaha te taime e haere mǎrû ai ia nehenehe o ˈna e tamau i te tavini ia Iehova e i te tauturu ia vetahi ê.—Phil. 4:5.

7. Eaha te faaite ra e aau faahaihai to Barazilai?

⁷ Teie te hiˈoraa o Barazilai. E 80 matahiti to ˈna i te titauraa te arii Davida ia ˈna no te haere na muri ia ˈna i te aorai i Ierusalema. Aita râ Barazilai i farii i tera titauraa. No to ˈna matahiti paari, ua taa ia Barazilai, mea au aˈe ia rave i te hoê taurearea. No reira o ˈna i parau ai ia rave atu ia Kemehama. (Sam. 2, 19:35-37) Mai ia Barazilai, e oaoa te mau taeae paari i te horoa i te hopoia i te mau taeae apî aˈe.

8. Mea nafea to te arii Davida faaiteraa i te aau faahaihai i te taime a hinaaro ai o ˈna e hamani i te hiero o te Atua?

⁸ E taata aau faahaihai atoa te arii Davida. Ua hinaaro mau o ˈna e hamani i te hiero o te Atua. Ua parau atura Iehova ia ˈna, e ere na ˈna e rave i tera ohipa. Na ta ˈna râ tamaiti o Solomona. Ua farii Davida i te faaotiraa a Iehova e ua turu taatoa o ˈna i ta ˈna tamaiti no te faaineine i te paturaa o te hiero. (Par. 1, 17:4; 22:5) Aita Davida i manaˈo e mea tano aˈe na ˈna e rave i tera ohipa no te mea “mea apî” Solomona e “aita [oia] i ineine” no te amo i tera hopoia. (Par. 1, 29:1) Ua ite Davida e maoti noa te tauturu a Iehova e maraa ˈi tera ohipa. Aita e hiˈoraa te matahiti aore ra te aravihi o te taata e faaohipahia no te rave i te ohipa. Mai ia Davida, e tamau noa te mau taeae ruhiruhia i te tavini ia Iehova ma te itoito noa ˈtu te mau tauiuiraa. Ua papu atoa ia ratou e tauturu Iehova i te mau taeae apî ia amo i ta ratou mau hopoia.

9. Mea nafea te hoê mero o te Tomite amaa i te faaiteraa i to ˈna aau faahaihai?

⁹ Teie te hiˈoraa o te taeae Shigeo. I 1976, ua riro oia ei mero o te hoê Tomite amaa, e 30 matahiti ïa to ˈna i tera taime. I 2004, ua riro oia ei tiaau o taua Tomite ra. A mairi ai râ te mau matahiti, haamata ˈtura to ˈna tino i te paruparu e mea taere rii atoa ia rave o ˈna i ta ˈna ohipa.  Pure atura oia e feruri atura e rave i te hoê taeae apî aˈe no te amo i ta ˈna mau hopoia. Noa ˈtu e ere faahou o ˈna te tiaau, te ohipa noa ra o ˈna e te mau mero o te Tomite amaa. Mai ia Barazilai, Davida e te taeae Shigeo, eita te hoê taata haehaa e te aau faahaihai e haapao i ta te feia apî i ore i ite, e hio râ o ˈna i te mea ta ratou i ite i te rave. E hio ïa o ˈna ia ratou mai te hoa ohipa.—Mas. 20:29.

10. Eaha ta te mau taeae ruhiruhia e faaite i te mau taeae apî aˈe i roto i te amuiraa?

¹⁰ E haafaufaa te mau taeae ruhiruhia i te mau taeae apî aˈe e e haamauruuru atoa ratou no te mau ohipa ta ratou e rave ra. A iti ai to ratou puai, e mauruuru roa te mau taeae ruhiruhia i te fanaˈo i te mau taeae apî itoito no te amo i te mau hopoia i roto i te amuiraa.

11. E nafea te feia ruhiruhia e faufaahia ˈi i te tauturu a te feia apî? (Ruta 4:13-16.)

¹¹ I roto i te Bibilia, e hiˈoraa maitai roa Naomi no nia i te fariiraa i te tauturu a te hoê taata apî aˈe. I te omuaraa, ua faaue Naomi ia Ruta ia hoˈi i roto i to ˈna utuafare. Aita râ Ruta i hinaaro e faarue ia Naomi e haere atura raua i Betelehema. (Ruta 1:7, 8, 18) Ua vaiiho ïa Naomi ia apee e ia tauturu Ruta ia ˈna. Aita roa ˈtu raua i tatarahapa i te faaotiraa ta raua i rave. (A taio i te Ruta 4:13-16.) E turai te haehaa i te feia ruhiruhia ia pee i te hiˈoraa o Naomi.

12. Mea nafea te aposetolo Paulo i te faaiteraa i to ˈna mauruuru?

¹² Ua mauruuru te aposetolo Paulo i te tauturu a to ˈna mau hoa Kerisetiano. Ei hiˈoraa, ua haamauruuru oia i te mau Kerisetiano no Philipi no ta ratou tauturu. (Phil. 4:16) Ua faaite o ˈna i to ˈna  mauruuru ia Timoteo no te tauturu ta ˈna i horoa. (Phil. 2:19-22) E ua haamauruuru Paulo i te Atua no te tauturu ta ˈna i fanaˈo a afaihia ˈi o ˈna i Roma ei mau auri. (Ohi. 28:15) E tavini itoito mau o Paulo tei tere e rave rahi kilometera no te poro e no te faaitoito i te mau amuiraa. E taata haehaa atoa o ˈna o tei farii i te tauturu a to ˈna mau taeae e tuahine.—Eph. 1:15, 16.

13. E nafea te feia ruhiruhia e faaite ai i to ratou mauruuru i te mau taurearea?

¹³ E te mau taeae e tuahine ruhiruhia, ua rau te tumu e haamauruuru ai outou i te mau taurearea i roto i ta outou amuiraa. Mai te peu e hinaaro ratou e afai ia outou i te fare toa aore ra i te taote, eiaha e taiâ i te farii i ta ratou tauturu. A haamanaˈo e ravea tera e faaite ai Iehova i to ˈna here ia outou. E maere paha outou e piri atu â outou i te feia tei tauturu ia outou. E nehenehe outou e tauturu i to outou mau hoa ia faafatata ˈtu â ia Iehova. A ite ai i te mau taurearea e tamau nei i te tavini i roto i te amuiraa, e oaoa roa outou. E nehenehe atoa outou e rave i te taime no te faaite i te mau tupuraa ta outou i farerei i roto i to outou oraraa. Ma te na reira, e haamauruuru outou i te Atua no te mau taurearea i roto i te amuiraa.—Kol. 3:15; Ioa. 6:44; Tes. 1, 5:18.

14. Mea nafea te arii Davida i te faaiteraa i te aau horoa noa?

¹⁴ Teie te tahi atu huru maitai ta te feia ruhiruhia e nehenehe e faatupu maoti te hiˈoraa o te arii Davida, oia hoi, te aau horoa noa. Maoti ta ˈna mau ô, ua turu oia i te paturaa o te hiero. (Par. 1, 22:11-16; 29:3, 4) Ua na reira oia noa ˈtu ua piihia teie paturaa, te hiero o Solomona. I te mea te paari noa ˈtura tatou, eita paha tatou e apiti faahou i te mau paturaa a te faanahonahoraa, e nehenehe râ tatou e turu i te reira maoti te mau ô. E nehenehe atoa tatou e tauturu i te feia apî ia fanaˈo i te aravihi tei noaa ia tatou i te roaraa o te mau matahiti.

15. Eaha te mea faufaa roa ta te aposetolo Paulo i haapii ia Timoteo?

¹⁵ A feruri na i te hiˈoraa o te aposetolo Paulo. Ua titau manihini oia ia Timoteo ia apiti ia ˈna i roto i to ˈna mau tere pororaa ei mitionare. Maoti te aau horoa noa, ua haapii Paulo ia Timoteo i ta ˈna huru pororaa e haapiiraa. (Ohi. 16:1-3) Ua tauturu te faaineineraa a Paulo ia Timoteo ia aravihi atu â no te haapii i te parau apî oaoa i te taata. (Kor. 1, 4:17) E ua faaohipa atoa Timoteo i te huru pororaa e haapiiraa a Paulo no te faaineine ia vetahi ê.

16. No te aha Shigeo i faaineine ai i te tahi atu mau taeae?

¹⁶ Mai ia Paulo, eita te mau taeae ruhiruhia e haapeapea aita anaˈe ratou e nehenehe faahou e amo i te tahi mau hopoia. Ua faaineine hoi ratou i te mau taeae apî aˈe no te amo i ta ratou mau hopoia i roto i te amuiraa. Ei hiˈoraa, i te roaraa o te mau matahiti, ua faaineine Shigeo i te mau taeae apî o te Tomite amaa. Ua na reira oia no te turu i te mau ohipa a te Faatereraa arii i to ˈna fenua. Ia tae i te taime aita o ˈna e nehenehe faahou e amo i tera hopoia, ua ineine aˈena ïa te hoê taeae no te mono ia ˈna. Ua hau i te 45 matahiti to Shigeo taviniraa ei mero o te Tomite amaa e te tamau ra oia i te faaineine i te mau taeae apî no te  amo i tera hopoia. E haamaitairaa rahi te mau taeae mai ia Shigeo i roto i te faanahonahoraa a Iehova!

17. Ia au i te Luka 6:38, e nafea te feia ruhiruhia e nehenehe ai e tauturu ia vetahi ê?

¹⁷ E te mau taeae e tuahine ruhiruhia, te faaite maitai ra to outou hiˈoraa e ta outou taviniraa ia Iehova ma te faaroo e te haapao maitai e, tera te oraraa maitai roa ˈˈe ta outou e nehenehe e fanaˈo. Maoti to outou hiˈoraa, te faaite ra outou e mea maitai ia haapii i te mau faaueraa Bibilia e ia faaohipa i te reira i roto i to outou oraraa. Ua ite outou eaha te mau raveraa na mua ˈˈe. Tera râ, te ite atoa ra outou eaha te faufaaraa ia apee i te mau tauiuiraa. E te mau taeae e tuahine ruhiruhia aita i maoro aˈenei i te bapetizo-raa-hia, mea rahi ta outou e nehenehe e rave no te tauturu ia vetahi ê. E nehenehe outou e faaite i to outou oaoa i te iteraa o vai Iehova e mea nafea ta outou haapiiraa Bibilia i tauturu ia outou i roto i to outou oraraa. Papu, e au roa te mau taurearea ia faaroo i ta outou mau faatiaraa e te mau haapiiraa ta outou i huti mai i te roaraa o to outou oraraa. Ia tamau outou i te faaite i te hiˈoraa maitai, e haamaitai rahi Iehova ia outou.—A taio i te Luka 6:38.

18. E nafea te feia ruhiruhia e te mau taurearea e riro ai ei tauturu no te tahi e te tahi?

¹⁸ E te mau ruhiruhia here e, ia tapiri atu outou i te feia apî, e nehenehe outou e faaitoito te tahi i te tahi. (Roma 1:12) I roto i te amuiraa, e paari rahi to te feia ruhiruhia e mea rahi te haapiiraa ta ratou i huti mai i te roaraa o to ratou oraraa. Area te mau taurearea, e puai to ratou no te amo i te mau hopoia. Ia ohipa amui te mau taurearea e te feia ruhiruhia, e arue ratou ia Iehova a riro atu ai ratou ei haamaitairaa rahi no te amuiraa.