1. Улуг назылыг акы-угбалар боттарынга кандыг сорулганы салып ап болур?

НАЗЫ-ХАР улгадырга, кижиниң харык-шинээ кызыгаарлыг апаар. Ынчангаш улуг назылыг акы-угбаларывыс ооң мурнунда дег хөй бараалгап шыдавас апарганы дээш аажок муңгараар. Ынчалза-даа оларның дуржулгазы хөй. Олар ооң-биле үлежир болза, аныяк-өскеннерге күчү-күжүн сайзырадып база чыышка оон-даа хөй даалгалар алырынга дузалажып болур. Аңаа хамаарыштыр хөй чылдар дургузунда удуртукчу бооп бараалгап келген акывыс мынча дээн: «Кижиниң назыны улгадырга берге боор, ынчалза-даа, аас-кежик бооп, ажылды дагзып болур аныяк-өскеннер бар боорга, өөрүүр-дүр мен!»

2. Бо статьяга чүнү сайгарар бис?

² Аныяк-өскеннер улуг назылыг улус-биле аралажыр болза, кайы хире ажык-дузалыг боорун эрткен статьяга көрген бис. А бо статьяга улуг назылыг акы-угбаларга аныяктар-биле кады ажылдажырынга биче сеткил, хире шаан миннири, өөрүп четтиргенин илередири болгаш беримчелиг чорук канчаар дузалап болурун база бо бүгү бүдүн чыышка кандыг ажык-дуза эккээрин сайгарар бис.

3. Филипчилерге 2:3, 4-тен алырга, биче сеткил дээрге чүл ол база ол биске чүге чугула?

³ Бир эвес улуг назылыг акы-угбалар аныяктарга дузалажыксап турар болза, биче сеткилдиг болуру чугула. Биче сеткил дээрге өскелерни бодундан өрү көөрү-дүр. (Номчуптуңар: Филипчилерге 2:3, 4.) Даалгаларны чедиишкинниг  аңгы-аңгы аргалар-биле кылып болур, олар библейжи дүрүмнерни хажытпайн турар. Ынчалза-даа улуг назылыг улуска шупту чүвени оларның чаңчыккан аайы-биле кылыры албан эвес деп чүүлдү билип алырынга биче сеткил дузалаар (Эккл. 7:10). Чугаажок, оларның аныяк дуңмаларынга дамчыдып болур дуржулгазы эңмежок. Ындыг-даа бол, олар бо делегейниң байдалы үргүлчү өскерлип турар, ынчангаш чаа байдалдарга чаңчыгып өөренир херек деп билип турарлар (1 Кор. 7:31).

4. Кожуун хайгааракчылары левиттерге чүзү-биле дөмей?

⁴ Биче сеткилдиг улуг назылыг улус, аныяанда дег, хөйнү кылып шыдавазын билип турар. Чижээ, кожуун хайгааракчылары 70 хар чеде бергеш, эргий кезиир бараалгалын каар ужурга таваржыр. Ол берге бооп болур, чүге дизе олар өске акы-угбалар дээш сагыш човаар даалгазын аажок үнелеп чораан болгай. Олар бараалгалынга дыка ынак база ам-даа ону күүседир күзели сеткилинде хып чоруур. Ынчалза-даа эргий кезиир бараалгалга күжү хөй аныяк акылар тааржыр деп, олар дыка эки билип турар. Мооң-биле кожуун хайгааракчылары чораан акылар бурунгу Израильге чурттап турган левиттерге дөмей. Левиттер база 50 хар чеде бергеш, ыдыктыг өргээ майгынынга ажылдавас турган. Оларның өөрүшкүзү бир-ле даалгадан хамаарышпас турган: олар аныяк левиттерге дузалап, кандыг-даа даалга алгаш өөрүп чораан (Сан. 8:25, 26). Ооң-биле дөмей, кожуун хайгааракчызы чораан акылар база хары угда хөй чыыштар дээш сагыш човавас  апарган-даа болза, амгы үеде бараалгап чоруур чыыжынче үлүүн киирип турарлар.

5. Дэн биле Кэтиниң чижээ силерни чүү чүвеге өөредип турар?

⁵ 23 чыл ишти кожуун хайгааракчызы чораан Дэн дээр акывыстың чижээн көрээлиңер. Ол 70 харлыг апаарга, ону кадайы Кэти-биле тускай эгелекчилер кылдыр томуйлап каан. Чаа даалгазынга олар өөрени берген бе? «Мындыг чай чок черле турбаан мен» — деп, Дэн чугаалаан. Бодунуң дорт хүлээлгелерин күүседиринден аңгыда, акыларга чыыштың дузалакчылары апаарынга дузалажып турар. Оон аңгыда, ол суртаалчыларны хөй улус чыылган черлерге болгаш кара-бажыңнарга канчаар суртаалдаарын өөредип турар. Хүндүлүг улуг назылыг акы-угбаларывыс, долу бараалгавайн-даа турар болзуңарза, дөмей-ле өскелерге дузалажыр аргаларыңар бар. Кандыг? Өскерлиишкиннерге чаңчыгарын кызыңар, чаа сорулгалардан салып база кылып шыдаар чүүлдериңерже кичээнгейиңерни угландырыңар.

6. Хире шаан билири чүге мерген угаанныг? Чижектен чугаалаңар.

⁶ Хире шааңар миннип чоруңар (У. ч. 11:2). Ооң ачызында кижи бодунга бедик негелделер салбайн, бодунуң кылып шыдаар чүүлүн билир боор. Ол чүүл аңаа өөрүшкүлүг артарынга база оон-даа улаштыр кызымак бараалгаарынга дузалаар. Хире шаан билир кижини кадыр дөңче халдып үнүп бар чыдар чолаачыга дөмейлеп болур. Машина өшпезин дизе, чолаачы биче скоростьче суптар. Ийе, машина оожум халдып эгелээр, ынчалза-даа ол доктаавас боор. Ооң-биле дөмей, биче сеткилдиг кижи Иеговага бараалгалын соксатпас дээш, доора уткалыг чугаалаарга, скоростьту кажан солуптарын билир боор (Флп. 4:5).

7. Верзеллий хире шаан билип турарын канчаар көргүскен?

⁷ Верзеллийниң чижээн сактып кээлиңер. Кажан ол 80 харлыг турда, Давид хаан аңаа: «Мээң-биле кады чорувут, Иерусалимге чуртта, сени мен хандырар мен» — дээн. Ынчалза-даа Верзеллий хире шаан миннип, ойталаан. Ол назы-харының дөгүй бергенин билгеш, бодунуң орнунга Кимгамны сүмелээн (2 Хаан. 19:35—37). Верзеллий ышкаш улгады берген акылар даалгаларны аныяктарга бүзүреп турар.

8. Бурганның өргээзин тударынга хамаарыштыр Давид хаан хире шаан канчаар миннинген?

⁸ Давид хаан боду база хире шаан миннип чораан. Ол Бурганның өргээзин дыка тудуксап турган. Ынчалза-даа Давид ындыг алдар-хүндүнү Иегова аныяк Соломонга берген деп билип кааш, ол шиитпирни сеткилинден деткээн. Оон ол тудуг ажылынга улуг үлүүн киирген (1 Чыл. 17:4; 22:5). «Соломон аныяк болгаш дуржулгазы чок, ынчангаш мен ону кылыр мен» деп, ол черле бодаваан (1 Чыл. 29:1). Давид ол тудугнуң чедиишкини ону кылып турар улустуң назы-харындан азы дуржулгазындан эвес, а Иеговадан хамааржыр деп билип турган. Давидти өттүнүп, улуг назылыг акы-угбалар даалгазы өскерли-даа бээрге, Иеговага улаштыр бараалгап чоруур. Оларның кылып чораан ажылын кылып турар аныяктарны Иегова йөрээр деп, олар чигзинмес.

9. Салбыр комитединде бараалгап турар бир акывыс хире шаан канчаар миннип чоруур?

⁹ Сигэо дээр акывыс хире шаан билири-биле чараш үлегерни көргүскен. 1976 чылда ол 30 харлыг турда, ону бир салбыр комитединге бараалгаар кылдыр томуйлап каан. А 2004 чылда ол салбыр комитединиң башкарыкчызы апарган. Ынчалза-даа каш чыл эрткенде назы-харының улгатканындан ол харыысалгалыг даалганы күүседири аңаа нарын апарган деп, Сигэо билип каан.  Ол Иеговага дүвүрелдерин чугаалап бергеш, мээң орнумга аныяк кижи ажылдаар болза эки-дир деп боданган. Сигэо ол ажылын күүсетпейн барган-даа болза, дөмей-ле салбыр комитединге улуг дузаны көргүзүп чоруур. Верзеллий, Давид хаан болгаш Сигэонуң чижээнден көөр болза, биче сеткилдиг болгаш хире шаан билир кижи аныяктарның дуржулга чогунче эвес, а оларның күштүг талаларынче кичээнгейин угландырар. Оларны ол адааннажыр кижилери кылдыр эвес, а кады ажылдажыр эштери кылдыр көөр (У. ч. 20:29).

10. Улуг назылыг акы-угбалар аныяктарга кандыг хамаарылгалыг?

¹⁰ Улуг назылыг акы-угбалар аныяк-өскеннерни Иегованың белээ кылдыр көөр. Хүнден хүнче оларның күжү эвээжеп бар чыдар болгаш, күштүг аныяктар чыышта болгаш суртаал ажылында хөй даалгаларны ап турар боорга, ол дээш четтиргенин илередип турарлар.

11. Улуг назылыг улус аныяктарның дузазын өөрүп четтирип хүлээп алыр ужурлуг деп, Ноеминниң үлегери канчаар көргүзүп турар? (Руф 4:13—16).

¹¹ Улуг назылыг кижи аныяктарның дузазын өөрүп четтирип хүлээп алырынга хамаарыштыр эки үлегерни Ноемин көргүскен. Эгезинде Ноемин дулгуяк арткан керни Руфту бодунуң чонунче дедир чоруптарын ээрежип дилеп турган. Ынчалза-даа ол Ноемин-биле кады Вифлеемче чоруур деп быжыг шиитпирлеп алган. Руфтуң деткимчезин ол өөрүп четтирген хөөн-биле хүлээп алган (Руф 1:7, 8, 18). Шак ынчаар ол ийи херээжен кижиге чаа өөрүшкүлүг чуртталга эгелээн. (Номчуптуңар: Руф 4:13—16.) Биче сеткил улуг назылыг улусту Ноеминни өттүнеринче оттурар.

12. Павел элчин кымга өөрүп четтиргенин илередип чораан база чүге?

 ¹² Павел элчин акы-угбаларның дузазы дээш өөрүп четтиргенин илередип чораан. Чижээ, ол акша-хөреңги талазы-биле аңаа дузалашкан чыышка өөрүп четтиргенин филипчилерге чагаазынга бижээн (Флп. 4:16). Оон аңгыда, Тимофейниң көргүскен дузазын ол аажок үнелеп турган (Флп. 2:19—22). А кажан Павелди Римде хоругдалче аппар чыдырда, ону деткиир дээш келген акы-угбаларны көргеш, ол Бурганга өөрүп четтиргенин илереткен (Аж.-ч. 28:15). Павел элчин аажок ажыл-ишчи кижи турган. Ол чыыштарның болгаш суртаал ажылының дугайында сагыш човаар дээш муң-муң километрлерни эртип чораан. Ындыг-даа бол, ол өске акы-угбаларның дузазын хүлээвес мен деп өрү көрдүнмейн турган.

13. Улуг назылыг улус аныяктар дээш, Иеговага өөрүп четтиргенин канчаар илередип болур?

¹³ Эргим улуг назылыг акы-угбалар, чыыжыңарда аныяктар дээш, Иеговага өөрүп четтиргениңерни илередир аргалар дыка хөй. Бир эвес олар силерни чедирип каарын, бир-ле чүүлдү садып бээрин азы бажың ажылынга дузалажырын сүмелеп турар болза, ону хүлээңер. Оларның сагыш човаашкынынга Иегованың силерге көргүзүп турар ынакшылынга ышкаш хамаарылгалыг болуңар. Безин аныяк дуңмаларывыс силерниң чоок өңнүктериңер апарып болур. Оларның Бурган-биле харылзаазынга хамаарыштыр база шын сеткилиңерден сонуургалды илередиңер. Чыыштың ажыл-херээнге болгаш суртаалга үндүрүп турар күжениишкиннерин көөрү силерге база өөрүнчүг-дүр деп оларга үргүлчү чугаалаңар. Олар-биле аралажыр үени үндүрүп, дуржулгаңар-биле үлежиңер. Шак ынчаар Иегованың чыышче хаара туткан аныяк-өскеннери дээш, Аңаа өөрүп четтиргениңерни көргүзер силер (Ин. 6:44; Кол. 3:15; 1 Фес. 5:18).

14. Давид хаан беримчелиг чорукту канчаар көргүскен?

¹⁴ Давид хаанның үлегеринден улуг назылыг улус беримчелиг чорукка база өөренип ап болур. Давид өргээни тударынга өнчү-хөреңгизинден улуг өргүлдү берген (1 Чыл. 22:11—16; 29:3, 4). Ол өргээ бир-ле дугаарында бодунуң оглу Соломоннуң ады-биле таныттынгыр боор деп биле тура-ла, дөмей-ле дузазын каткан. Силерниң база организацияның тудуг проектилеринге киржир күжүңер чок-даа болза, ону эки тура-биле кылган өргүлдериңер-биле деткип болур силер. Оон ыңай хөй чылдар дургузунда чыып алган дуржулгаңарны аныяк-өскеннер-биле үлежип болур силер.

15. Тимофейге хамаарыштыр Павел беримчелиг чорукту канчаар көргүскен?

¹⁵ Павел элчин база беримчелиг кижи чораан. Ол миссионер аян-чоруунга Тимофейни кады чоруурун сүмелээн. Павел үезин харамнанмайн, суртаалдаар болгаш өөреникчилер белеткээр ажылга ону өөредип турган (Аж.-ч. 16:1—3). Ооң ачызында Тимофей мергежилдиг суртаалчы апарып, Павелден билип алган билиглерин өскелерге өөредип турган (1 Кор. 4:17).

16. Сигэо чүге аныяктарны өөредип турган?

¹⁶ Амгы үеде улуг назылыг акы-угбалар «аныяктарны кылып чораан ажылымга өөредип каар болзумза, моон соңгаар ажык чок апаар мен» деп бодавайн турар. Чижээ, Сигэо салбыр комитединде аныяк дуңмаларын хөй чылдар дургузунда өөредип келген. Чүге? Ол Чагырга ажылының уламчылаарын күзеп турган. А кажан аңаа хүлээлгелерин күүседири берге апаарга, ооң орнунга эки өөренип алган акый ажылдай берген. Сигэо 45 чыл ишти салбыр комитединде бараалгап, арга-дуржулгазын аныяк дуңмаларынга дамчыдып чоруур. Бурганның чонунда шак  ындыг акылар бар болганы дыка өөрүнчүг-дүр!

17. Улуг назылыг акы-угбалар Лука 6:38-те сөстерниң аайы-биле канчаар алдынып болур?

¹⁷ Эргим улуг назылыг акы-угбалар, силер чуртталгаңар-биле Иеговага бердинген бооп бараалгаарындан артык чугула чүве чок деп бадыткаан силер. Библейжи дүрүмнерни хандыр шинчилеп, ооң аайы-биле чурттаар дээш, улуг күжениишкиннерни үндүрген силер. Ону кылыры чугула деп силерниң үлегер-чижээңер көргүзүп чоруур. Организацияда бир-ле чүүлдү ооң мурнунда канчаар кылып турганын көрген болгай силер. Ынчалза-даа үе чаңгыс черге турбас база чаа-чаа аргаларны ажыглап өөренир херек деп дыка эки билип турар силер. Безин чоокта чаа сугга суктуруп алган улуг улустуң аныяктар-биле үлежир чүүлдери бар. Мындыг хүндүткелдиг назыныңарда Иегованың дугайында алыс шын чуртталгаңарны канчаар өскертипкенин база хөй чылдар дургузунда чүү чүвеге өөренип алганыңарны оларга билип алыры артык эвес. Бир эвес силер улуг дуржулгаңар-биле үлежир болзуңарза, Иегова силерни элбээ-биле йөрээр. (Номчуптуңар: Лука 6:38.)

18. Улуг назылыг акы-угбалар биле аныяктар бот-боттарынга канчаар дузалажып болур?

¹⁸ Улуг назылыг-даа, аныяк-даа улустуң күштүг талалары бар. Улгады берген улустуң хөй чылдар дургузунда чыып алган дуржулгазы болгаш мерген угааны бар, а аныяктар күштүг болгаш эрес боор. Кажан олар аралажып чугаалажырга, бот-боттарынга улуг деткимче-дир (Рим. 1:12). Оларның кады ажылдап, эдержип чоруурун көөрү дыка-ла аянныг-дыр. Шак ынчаар олар дээрде Адавысты алдаржыдып, чыыштың чаңгыс аай чоруун быжыктырып турар!