1. Which better thing we fit plan to do as we de old?

AS WE de old, we fit de fear say we no go too dey important to Jehovah again like when we dey young. Na true say our body fit no strong like before, but we fit use the sense and experience wey we don get to teach young people how to support Jehovah’s organization and accept more work. One elder wey don serve for long time talk say, “When I no get power to do reach as I de do before because of old age, I happy say young brothers dey wey fit do the work.”

2. Wetin we go talk about for this topic?

² The article before this one talk about how people wey never old go gain when they make friend with our old people. For this topic, we go see say when old people dey humble, they no do pass their power, them dey happy say they get young people around them, and they get open hand, this one fit help them work well with young people. And this one go be blessing for the whole congregation.

3. With wetin Philippians 2:3, 4 talk, wetin e mean for person to dey humble, and how this one fit help the person?

³ Old people must dey humble if they want help young people. When person dey humble, e go accept say other people dey important pass-am. (Read Philippians 2:3, 4.) If old person dey humble, e go know say plenty ways dey to do something the way Bible support and the thing go still work. So, they no go expect say everybody go do things the way they do-am before. (Eccl. 7:10) They fit help young people when they tell them the things wey they don learn.  But they still know say “the way things be for this world de change,” and they fit need to learn new ways to do things.—1 Cor. 7:31.

4. How circuit overseers de show say they get the kind character wey the Levites get?

⁴ When person dey humble e go know say as e de old, e no go fit do reach as e de do before. For example, think about our circuit overseers. When they reach 70 years, they go receive another assignment. This one fit hard. Them de get joy as them de help their brothers and sisters. They love their assignment, and they for really like to continue for that work. But they understand say e better make young brothers do that work. So, they get the kind character wey Levites get that time for Israel. The Levites de stop their work for tabernacle when they don reach 50 years. This Levites wey don old no stop to get joy even when their assignment change. They use all their power do wetin they fit do and help young people. (Num. 8:25, 26) Today, na true say former circuit overseers no de visit different-different congregation, but them de do their best to help and encourage brothers and sisters for the congregation wey them dey.

5. Wetin you learn from the example of Dan and Katie?

⁵ Make we talk about the example of Dan. Dan serve as circuit overseer for 23  years. E wife name na Katie. When Dan reach 70 years, they say make the two of them go serve as special pioneer. How they don de enjoy their new assignment? Dan talk say e never busy reach the way e dey busy now! E de do different-different work for congregation, e de help brothers qualify as ministerial servant, and e de train other people to sabi preach for city and for prison. Our dear old people, whether wuna dey full-time service or wuna no dey, wuna fit do plenty things to help people. How wuna fit do this one? Learn to enjoy your new condition, get new plans, and put your mind for things wey you fit do instead of things wey you no fit do.

6. Why e good make person no do pass e power? Give one example.

⁶ E good make person know where e power reach. (Prov. 11:2) If person know where e power reach, e no go push e self to do wetin e no fit do. Because of this one, e go dey happy and continue to work hard. Person wey no de do pass e power be like person wey de drive motor climb hill. The driver need to put the gear for low gear so that e fit continue to climb the hill. The truth be say, e fit no de move fast, but e go continue to move go front. For the same way, person wey no de do pass e power know when to “change gear” and slow down, so that e fit continue to serve Jehovah and help other people.—Phil. 4:5.

7. How Barzillai show say e no de do pass e power?

⁷ Think about the example of Barzillai. E dey 80 years when King David talk say make e come be one of e advisers. Because Barzillai know where e power reach, e no accept-am. Barzillai know say e no go fit do plenty things because of e age. So e talk say make Chimham wey be young man, go instead. (2 Sam. 19:35-37) Like Barzillai, old brothers dey happy to allow young brothers care for the work.

8. How King David show say e know where e suppose do reach when e be want build the temple?

⁸ King David na another fine example of person wey show say e know where e suppose do reach. E really want build house for Jehovah. But when Jehovah tell David say na young Solomon go do the work, David accept wetin Jehovah decide and David use all e heart support the work. (1 Chron. 17:4; 22:5) David no feel say e be the person wey better pass to do the work because Solomon “dey young and e no get experience.” (1 Chron. 29:1) David know say the work go succeed because Jehovah go bless the work, no be because of the age or the experience of people wey go direct the work. Like David, old people today de continue to work hard for Jehovah even when their assignment change. And they know say Jehovah go bless the young people wey de do the work wey them de do before.

9. How one Branch Committee member show say e no de do pass e power?

⁹ For our time, one brother wey e name na Shigeo show say e no de do pass e power. For 1976, when e dey 30 years, they say make e be Branch Committee member. For 2004, e become Branch Committee coordinator. After, e see say e no dey strong as e dey before, and e no de do the work fast as e de do-am before. E pray about the matter, and think about why e go better make young brother be the coordinator. Now, Shigeo no be Branch Committee coordinator, but e continue to  work well with other Branch Committee members. As we don see for the example of Barzillai, King David, and Shigeo, when person dey humble and e no de do pass e power, e no go put e mind for the things wey young people need to learn. Instead, e go put e mind for the things wey they don already know. E go see them as people wey e de work with, no be as people wey de drag position.—Prov. 20:29.

10. How old people de see young people for congregation?

¹⁰ Old people de see young people for congregation as gift from Jehovah and them dey happy for the things wey this young people de do. As old people power de come down, them dey happy say they get young people wey dey ready, and wey fit do the work and help congregation.

11. How Ruth 4:13-16 show say old people go gain when they accept help from people wey never old?

¹¹ For Bible, Naomi na really better example of old person wey dey happy to accept help from young person. After Naomi pikin die, Naomi encourage Ruth wey be e daughter-in-law make e go back to e own people. But Ruth no gree leave Naomi, and e follow Naomi go Bethlehem. Naomi really dey happy to accept help and support from Ruth. (Ruth 1:7, 8, 18) And that one na really blessing for the two women! (Read Ruth 4:13-16.) When old people dey humble, they go follow the example wey Naomi show.

12. How apostle Paul show say e dey happy for the help wey e receive from people?

¹² Apostle Paul really dey happy for the help wey e receive. For example, e thank the brothers for Philippi for the gifts wey e receive from them. (Phil. 4:16) Timothy  help Paul, and Paul show say e dey happy for the help. (Phil. 2:19-22) When them de carry Paul go Rome as prisoner, people come encourage Paul and e thank God for them. (Acts 28:15) Paul na strong man wey de make things happen. E travel long distance to preach and to make congregations strong. Even with that one, e dey humble and accept help from e brothers and sisters.

13. How old people fit show say them dey happy to get young people?

¹³ Old people, wuna fit show for different-different ways say wuna dey happy for the young people wey wuna get for congregation. If they want help you with transportation, they want help you buy something, or do other things wey you need, make you accept their help and thank them. See that kind help as one way wey Jehovah de use show you say e love you. The kind strong friendship wey wuna go get fit surprise you. Make you de always try to help your young friends to dey tight with Jehovah more, and tell them say you really dey happy to see young people de try to do more to help congregation. And dey ready to spend time with them, and tell them about the things wey don happen for your life. When old people do this one, them de show say they “value the good” wey Jehovah do for them as e give them young people wey e don draw come congregation.—Col. 3:15; John 6:44; 1 Thess. 5:18.

14. How King David show say e get open hand?

¹⁴ The example of King David show us another important character wey old people need to show, wey be to get open hand. David contribute big money and other better-better things from e own pocket to support the work wey they want do to build the temple. (1 Chron. 22:11-16; 29:3, 4) E do this one even though say people go praise Solomon as the person wey build the temple. When we no too strong for body again to do construction work for Jehovah’s organization, we fit continue to support this work with the money wey we de contribute, as we fit. And we fit help young people to gain from the things wey we don learn for all the years wey we don live.

15. Which better-better gift apostle Paul give Timothy?

¹⁵ Think about the example wey apostle Paul show us about open hand. Paul tell Timothy to come join-am do missionary work. And Paul no hide the things wey e know from this young man. E teach Timothy the different-different ways wey e de use preach and teach. (Acts 16:1-3) Paul train Timothy to sabi preach and teach people the good news. (1 Cor. 4:17) Then Timothy use the training wey e receive from Paul to train other people.

16. Why Shigeo train other people?

¹⁶ Old people today no de fear say they no go dey important again for congregation if they train young people to do the work wey them de do before. For example, for many years, Shigeo wey we talk about before, train some young Branch Committee members. E do this one so that e go fit support the Kingdom work for the country wey e de serve. Because of this one, when time reach for Shigeo to stop to serve as coordinator, another brother wey they train well don dey to continue from where Shigeo stop. Shigeo don be Branch Committee member for more than 45 years now, and e continue to use  the things wey e don learn to help young brothers. Brothers like this one de really help servants of God!

17. With wetin dey Luke 6:38, wetin old people fit give other people?

¹⁷ Our old brothers and sisters, wuna example de show say the best way wey person fit live e life, na to serve Jehovah well with faith. Wuna example don show say e good for us to learn wetin Bible talk and use the things wey we learn for our life. Wuna don see how we de do things before-before, but wuna still see say wuna need to change and follow new way. Our old people wey just baptize, wuna fit still help people for many ways. Wuna fit tell them the joy wey wuna get to know Jehovah for wuna life for this time. Our young people go enjoy to hear about the things wey wuna don experience and wey wuna don learn. If wuna de use the things wey wuna don learn to train people, this one go show say wuna “de give,” and Jehovah go really bless wuna.—Read Luke 6:38.

18. How old people and people wey never old fit help each other?

¹⁸ Our dear old people, when wuna de make friend with people wey never old, wuna go fit de support each other. (Rom. 1:12) Each person get important thing wey the other person no get. Old people get sense and experience wey they don gain for life. Young people get power. When young and old people work together as friends, them de bring praise to our Papa for heaven wey love us, and they go be blessing to everybody for congregation.