1. მუ შილებე მიღდან მიზანო ხანშამიშულაწკუმა ართო?

 ხანშამიშულაწკუმა ართო შილებე გომრჩქინდან თიშ შიშიქ, ნამდა იეჰოვაშო ულირზმა ვა მაკეთებენა. მართალ რე, ასე შედარებით ნაკლებ ენერგია მიღნა, მარა შემლებნა შაყარელ სიბრძნე დო გამოცდილება ახალგაზრდეფიშ მახვარებელო გეგმიბრინუათ, ნამდა, მუთ შეულებნან ირფელ გაკეთან იეჰოვაშო დო ქიმიოჭირინუან ახალ პასუხიშმგებლობეფს. ართ ბრელ ხანიშ უხუცესიქ თქუ: „მუთ უმოსო მიშეფშჷ ხანშა, თით უმოს ნაკლებიშ კეთება შემლებუდ. ათეშენ მარდულ ვორდჷ, ნამდა კრებას რდეს ახალგაზრდა ჯიმალეფ, მიდგას საქმეშ კეთება შეულებდეს“.

2. მუს გუვარჩიენთ თე სტატიას?

² წოხოლენ სტატიას გარჩიებულ რდჷ, მუ ჯგირობუას მოუღანს ახალგაზრდეფს ხანშამიშულირეფწკუმა დაახლოება. თე სტატიას ქობძირუნთ, მუჭო მეხვარებ ხანშამიშულირეფს თიცალ თვისებეფ, მუნერით რე თანდაბლობა, მოკრძალება, მარდულობა დო ხეგოფაჩილობა, ნამდა იმსახურან ახალგაზრდეფწკუმა ართო, მუთ მთელ კრებას მოუღანს ჯგირობუას.

3. მუჭოთ ფილიპელეფიშ 2:3, 4-ის ჭარჷ, მუ რე თანდაბლობა დო მუჭო შეულებ თის ქრისტიანიშ მოხვარა?

³ ხანშამიშულირეფს ახალგაზრდეფიშ მოხვარა ქაკონან-და, თინეფ თანდაბლეფ ოკო რდან. თანდაბალ პიროვნებას შხვეფ მუშ დუდშე უჯგუშო მიორჩქ (წეკითხით ფილიპელეფიშ 2:3, 4). თი ხანშამიშულირეფს, მით თე თვისებას გიმირჩქინანა, არჩქილენა, ნამდა ხშირ შემთხვევას მუსხირენ ეფექტურ საშვალება არსებენს დანიშნულებაშ შეიოსრულებერო, მუთ ვაწინააღმდეგ ბიბლიურ პრინციპეფს. ათეშენ  თინეფ ველნა, ნამდა საქმე ამდღა ხოლო თეშ იჸუაფ კეთებულ, მუჭოთ თეს მუნეფ ორთუდეს ულირს (ეკლ. 7:10). მართალ რე, თინეფს დიდ გამოცდილება უღნა, მუდგაშ ახალგაზრდეფშა გინოჩამა შეულებნა, მარა არჩქილენა, ნამდა „თე ქვეყნიერება ითირუ“ დო შილებე ცვლილებეფშა აჸუან მიორჩქვანალქ (1 კორ. 7:31).

4. მუჭო გიმირჩქინანა რაიონულ ზედამხედველეფ ლევიანეფიშნერ დამოკიდებულებას?

⁴ თანდაბალ ხანშამიშულირეფს არჩქილენა, ნამდა ულირზმა ვაკეთებენა. მაგალთო, დეფიქრით რაიონულ ზედამხედველეფიშ მაგალითშე. მუჟამსით თინეფ 70 წანას ქიმიოჭირინუანა, ათირუნა დანიშნულება, მუთ შილებე მანგარ რთულ რდას. თინეფშა ხიოლ მოუღუდ ჯიმალეფიშ მოხვარაშ პატის, უჸორდეს თე დანიშნულება დო გურს კინ ელარზნა თე საქმეშ კეთებაშ ძალიერ სურვილ. მარა არჩქილენა, ნამდა უჯგუშ რე, თე საქმეშო ახალგაზრდეფქ იხანდან. თეშნერო რაიონულ ზედამხედველეფ გიმირჩქინანა ლევიანეფიშნერ დამოკიდებულებას, მიდგას 50 წანაშა მეჭირნაფაშ უკულ კარავს სავალდებულო მსახურება ოკო მეუტებდესკო. ხანშამიშულირ ლევიანეფიშ ხიოლ დამოკიდებულ ვარდჷ კონკრეტულ დავალებაშ შესრულებაშა. თინეფ სრულ სარგებელს ღებულენდეს თი საქმეშე, მუდგაშ კეთება შეულებდეს დო ირფელს ორთუდეს ახალგაზრდეფიშ მახვარებელო (რიცხ. 8:25, 26). მართალ რე, ამდღა 70 წანას გინოჩილათირ ჯიმალეფ, მით ულირს რაიონულ ზედამხედველეფო მსახურენდეს, მეტო ვეძირუანა კრებეფს, მარა თინეფ დასურო დიდ კურთხევა რენა მუნეფიშ კრებაშო.

5. მუს გურაფლენთ დანი დო ქეითიშ მაგალითშე?

 ⁵ დეფიქრით ჯიმა დანიშ მაგალითშე, მით 23 წანას მსახურენდჷ რაიონულ ზედამხედველო. მუჟამსით თიქ 70 წანას ქიმიოჭირინუ, მუ დო მუშ ოსურ ქეითი, სპეციალურ პიონერეფო დანიშნეს. მუჭო მიარჩქვანეს თინეფქ თე ახალ დანიშნულებას? დანი იჩიებ, ნამდა ასე უმოსო რე დაკავებულ. თინა ასრულენს მუშ პასუხიშმგებლობეფს კრებას, ოხვარ ჯიმალეფს, ნამდა დენიშნან მომსახურეეფო დო ოგურუანს შხვეფს, მუჭო იქადაგან ხალხიშ შაყარუაშ ადგილეფს დო ციხეეფს. ხანშამიშულირეფ, სრულ დროთ მსახურეფ რეთ დო ვარ, თქვა ბრელ მუდგარენიშ კეთება შეილებნა შხვეფიშ მახვარებელო! ქიდიგურეთ, მუჭო მიღათ ხიოლ თქვან ახალ მდგომარეობაშე, დესახით ახალ მიზნეფ დო ყურადღება თიშა გეგნიღით, მუდგაშ კეთება შეილებნა დო ვართ ხოლო თიშა, მუთ ვეშეილებნა.

6. მუშენ რე გონივრულ, ვორდათ მოკრძალებურეფ? ქიმიჸონით მაგალით.

⁶ მოკრძალებურ პიროვნებას არჩქილე, ნამდა თიშ შესაძლებლობეფ შეზღუდულ რე (იგავ. 11:2). თე თვისება ოხვარ თის, მუშ დუდშე თიზმაშ კეთებას ველდას, მუზმათ ვეშულებ. შედეგო, თინა ვადინუანს ხიოლს დო საქმეს მონდომას ვა დარკენს. მოკრძალებურ პიროვნება შემლებნა შევადარათ შოფერს, ნამდგას ტრანსპორტ ფერდის ეკოჸუნს. თიქ ოკო დოთირუას სიჩქარე, ნამდა გაგრძელას ეკულა. მართალ რე, თინა უმოს წყნარას ეკიშას იჸი, მარა უმოქმედოთ ვეჸუაფ. თეშნერო, მოკრძალებურ პიროვნებას ხოლო უჩქჷ, მუჟამ რე „სიჩქარეშ თირუაშ“ დო გეწყნარაფაშ დრო, ნამდა შეიალებუას მსახურებაშ გაგრძელებაქ დო შხვეფშა მოხვარაქ (ფილ. 4:5).

7. მუჭო გიმირჩქინ ბარზილაიქ მოკრძალებურობა?

⁷ დეფიქრით ბარზილაიშ მაგალითშე, ნამუთ 80 წანერ რდჷ, მუჟამსით მეფე დავითიქ სასახლეს ცხოვრება შეთავაზ. მოკრძალებურ ბარზილაიქ ვემიღ მეფეშ შეთავაზება, მუშენდა არჩქილედ, ნამდა მუშ ასაკიშ გურშენ ბრელ მუთუნ ვაკეთებედ. ათეშენ თიქ მეფე დავითის უწუ, მუშ მანგიორო ახალგაზრდა ქიმჰამი მიდუჸუნაფუდკო (2 სამ. 19:35—37). ბარზილაიცალო, ხანშამიშულირ ქომოლკათას ხოლო ოხიოლ ახალგაზრდეფშა საქმეშ გინოჩამა.

8. მუჭო გიმირჩქინ მეფე დავითიქ მოკრძალებურობა ტაძარიშ მშენებლობაწკუმა დაკავშირებით?

⁸ მეფე დავითიქ ხოლო მოკრძალებურობაშ ჯგირ მაგალით დომტუეს. თის მთელ გურით ოკოდ იეჰოვაშ ტაძარიშ აშენება, მარა, მუჟამსით იეჰოვაქ უწუ, ნამდა თეშ პატის ახალგაზრდა სოლომონს მეჩანდჷ, ქუდაჸუნ თე გადაწყვეტილებას დო მთელ გურით უკინენდჷ ხუჯის მშენებლობას (1 მატ. 17:4; 22:5). დავითი ვა ფიქრენდჷ, ნამდა მუ უმოს შესაფერის იჸუაფუდ თე დანიშნულებაშო, მუშენდა სოლომონი „ახალგაზრდა დო გამოუცდელ“ რდჷ (1 მატ. 29:1). თის არჩქილედ, მშენებლობაშ წარმატება ხემძღვანელიშ ასაკშა დო გამოცდილებაშა ვარინ, იეჰოვაშ კურთხევაშა რდჷ დამოკიდებულ. ხანშამიშულირეფ ხოლო დავითიშ მაგალითის მეჸუნა დო მუჟამსით დანიშნულება ათირუნა, აგრძელენა იეჰოვაშ აქტიურ მსახურებას. თინეფს არჩქილენა, ნამდა იეჰოვა აკურთხენს ახალგაზრდეფს, მით თი საქმეს ორთნა, ნამდგას ულირს მუნეფ ორთუდეს.

9. მუჭო გიმირჩქინ ფილიალიშ კომიტეტიშ ართ წევრიქ მოკრძალება?

⁹ მოკრძალებურობაშ თანამედროვე მაგალითის ირზენს ჯიმა შიგეო. 1976 წანას 30 წანერ რდუნ თეშ, თიქ ფილიალიშ კომიტეტიშ წევრო დენიშნჷ დო 2004 წანაშე ფილიალიშ კომიტეტიშ კოორდინატორო მსახურენდჷ. დროშ მიკულაშ უკულ, თიქ ქიმეხვად, ნამდა ჯვეშობურო ვა უღუდ ძალა დო ვეშულებუდ საქმეშ ჩქარას კეთება. თიქ ქილოც დო დეფიქრჷ, მუშენ იჸუაფუდ  უჯგუშ, თე პასუხიშმგებლობა ახალგაზრდა ჯიმას ნოღვედკო. მართალ რე, შიგეო ასე კოორდინატორ ვა რე, მარა თინა აგრძელენს ფილიალიშ კომიტეტწკუმა თანამშრომლობას. მუჭოთ ბარზილაიშ, მეფე დავითიშ დო შიგეოშ მაგალითეფ ოძირანს, თანდაბალ დო მოკრძალებურ პიროვნება ახალგაზრდეფიშ გამოუცდელობაშა ვარინ, თინეფიშ ძალაშა გინიღანს ყურადღებას. თინა ახალგაზრდეფს თანამშრომლეფო მირჩქინანს დო ვართ ხოლო კონკურენტეფო (იგავ. 20:29).

10. მუნერ დამოკიდებულება უღნა ხანშამიშულირეფს კრებაშ ახალგაზრდეფიშ მიმართ?

¹⁰ ხანშამიშულირეფს ახალგაზრდეფ იეჰოვაშე მეჩამილ ძღვინო მიორჩქუნა დო აფასენა თინეფს. მუჟამსით ძალეფ აკორდუნა, ხანშამიშულირეფ მარდულეფ რენა, ნამდა თინეფ, მიდგას ახალგაზრდულ ძალეფ უღნა, მზათ რენა დო შეულებნა მემსახურან კრებას დო გაგრძელან საჭირო საქმეშ კეთება.

11. მუჭო ოძირანს რუთიშ 4:13—16, ნამდა ახალგაზრდეფშე მოხვარაშ მეღებას ხანშამიშულირეფშა ჯგირობუა მოუღ?

¹¹ ბიბლიურ პერსონაჟ ნაომი ჯგირ მაგალით რე თიშ, მუჭო მიღჷ მარდულობათ ხანშამიშულირქ ახალგაზრდაშე მოხვარა. დუდშე თიქ ქომონჯღურელ ნოსას, რუთის, ელუჩ, დართუკო მუშ ხალხის. მარა, მუჟამსით რუთიქ უწუ, ნამდა ვედიტენდჷ თის დო ბეთლემშა მიდაჸუნუდ, ნაომიქ მიღჷ თიშ მოხვარა (რუთ. 1:7, 8, 18). თენა მართალო დიდ კურთხევა რდჷ ჟირხოლოშო! (წეკითხით რუთიშ 4:13—16). თანდაბლობა გინაჭყვიდირაფუანს ხანშამიშულირეფს, მიაჸუნან ნაომიშ მაგალითის.

12. მუჭო გიმოხანტუნდჷ პავლე მარდულობას?

¹² მოციქულ პავლე მარდულ რდჷ ჯიმალეფიშ მოხვარაშენ. მაგალთო, თიქ მადლობა უწუ ფილიპელ ქრისტიანეფს მუნეფიშ მოჯღონელ საჩუქრეფიშ გურშენ  (ფილ. 4:16). თიქ ტიმოთეშე მეღებულ მოხვარაშენ ხოლო გიმოხანტჷ მარდულობა (ფილ. 2:19—22). თეს გეძინელ, დაპატიმრებულ პავლექ მადლობა უწუ ღორონთის თინეფიშ გურშენ, მიდგაქ თიშ გურიშელაკინშა მორთჷ, მუჟამსით, თინა რომშა გინოჸუნდეს (საქ. 28:15). პავლე აქტიურ პიროვნება რდჷ, ნამუთ ანთასობით კილომეტრის მოგზაურენდჷ ოქადაგებელო დო კრებეფიშ გამანგარებელო. მარა, თინა ვა რდჷ ამაყ დო და დო ჯიმალეფიშ მოხვარას თანდაბლურო ღებულენდჷ.

13. მუჭო შეულებნა ხანშამიშულირეფს, მარდულობა გიმირჩქინან ახალგაზრდეფიშ გურშენ?

¹³ ხანშამიშულირეფ, თქვა კრებაშ ახალგაზრდეფიშ გურშენ მარდულობაშ გიმოხანტუა ბრელნერო შეილებნა. თინეფს ტრანსპორტირებას, ოჸიდირალეფიშ ჸიდირს ვარდა შხვა საჭირო საქმეეფს ქაკონა, ქიმგეხვარან-და, მარდულობათ მიღით მოხვარა დო თენა თქვან მიმართ იეჰოვაშ ჸოროფაშ გიმოხანტუათ მირჩქინით. შილებე შურო ველუდითინ ფერ მეგობრულ ურთიერთობა გავითარათ თე ახალგაზრდეფწკუმა. ირიათო ქიმიაქცით ყურადღება თქვან ახალგაზრდა თანამშრომელეფიშ სულიერო წიმი ულას დო ქუწით, მუნერ ბედნერეფ რეთ თიცალ ახალგაზრდეფიშ ძირაფათ, მით კრებას უმოსიშ კეთებაშა ინჭუაფნა. დრო გეგმურთით თინეფწკუმა თქვან გამოცდილებაშ გაზიარებას. მუჟამსით თაშ მიქციებუთ, იეჰოვას ქაძირანთ, ნამდა მარდულეფ რეთ თი ახალგაზდეფშენ, მით კრებაშა მიჸუნ (კოლ. 3:15; იოან. 6:44; 1 თეს. 5:18).

14. მუჭო გიმირჩქინ მეფე დავითიქ ხეგოფაჩილობა?

¹⁴ მეფე დავითიშ მაგალითშე ხოლო ართ მნიშვნელოვან თვისება — ხეგოფაჩილობა — იძირე, ნამდგაშ გიმორჩქინა ხანშამიშულირეფს ოსაჭირნა. თიქ მუშ ქონებაშე ბრელ მუთუნ შეწირ ტაძარიშ ოშენებელო (1 მატ. 22:11—16; 29:3, 4). მართალ რე, ტაძარ ხალხშო იშენით სოლომონიშ სახელწკუმა იჸუაფუდ დაკავშირებულ, მარა თეს ვა უცილებ დავითშა თეზმა მუდგარენ გუკეთებუდკო თიშ ოშენებელო. მუჟამსით ვა მაღვენუნა ძალა თეოკრატიულ მშენებლობეფშა მონაწილებაშ მიოღებელო, შემლებნა თე საქმეს ჩქინ მდგომარეობა მუზმაშ საშვალებას მარზენან, თიზმა შესაწირავით დუკინათ ხუჯ. თეს გეძინელ, წანეფიშ დინახალე შაყარელ გამოცდილებაშ გაზიარებათ შემლებნა მივეხვარათ ახალგაზრდეფს.

15. მუ ძვირფას ძღვინ გინოჩ პავლექ ახალგაზრდა ტიმოთეს?

¹⁵ დეფიფქრათ პავლე მოციქულიშ ხეგოფაჩილობაშ მაგალითშე. თიქ ტიმოთეს ელუჩ, ნამდა მუწკუმა ართო უმსახურებუდკო მისიონერულ მსახურებას დო ხეგოფაჩილო ოგურუანდჷ თე ახალგაზრდას ქადაგებაშ დო გურაფაშ მეთოდებს (საქ. 16:1—3). პავლეშ გურაფაქ მეხვარ თის, ნამდა სახიოლო ამბეშ ჯგირ მაქადაგებელ დო მაგურაფალ ჸოფედკო (1 კორ. 4:17). ტიმოთე ხოლო პავლეშე დუნაგურეფ მეთოდეფს შხვეფს ოგურუანდჷ.

16. მუშენ გინოჩანდჷ შიგეო მუშ გამოცდილებას შხვეფს?

¹⁶ ამდღა ხანშამიშულირ ჯიმალეფს ვაშქურნა თიშა, ნამდა მეტო ვეგმოდირთუდან იჸი კრებაშო, მუჟამსით ახალგაზრდა ჯიმალეფს მუნეფ ორთუდესინ თი საქმეშ კეთებას ქუდაგურუანა. მაგალთო, შიგეო, ნამუთ ჟიშე მიფშინეთ, წანეფიშ დინახალე ოგურუანდჷ ფილიალიშ კომიტეტიშ ახალგაზრდა წევრეფს. თეს მუშ ქიანაშ სამქადაგებლო საქმეშ წიმი ოულარო ორთუდ. შედეგო, მუჟამსით დროქ ქუდოდირთჷ დო თის მეტო ვეშულებუდ კოორდინატორო მსახურება, თინა ჯგირო გაწაფულ ახალგაზრდა ჯიმაქ დოთირუ. შიგეო 45 წანაშე მეტ ხანს მსახურენდჷ ფილიალიშ კომიტეტის. თინა ამდღარშახ უზიარენს მუშ გამოცდილებას ახალგაზრდა  ჯიმალეფს. თეცალ ჯიმალეფ დიდ კურთხევა რე ღორონთიშ ხალხშო!

17. მუშ გინოჩამა შეულებნა ხანშამიშულირეფს შხვეფშა? (ლუკ. 6:38)

¹⁷ ხანშამიშულირ და დო ჯიმალეფ, თქვა თიშ ცოცხალ მაგალით რეთ, ნამდა იეჰოვაშ რწმენათ დო ართგურობათ მსახურება ცხოვრებაშ არძაშ უჯგუშ შარა რე. თქვან მაგალითით ოძირანთ, ნამდა ბიბლიურ პრინციპეფიშ გურაფა დო ცხოვრებას გიმორნაფა ღირჷ მონდომაშა. გამოცდილებაშე გიჩქნა, მუჭო იკეთებუდ ულირს საქმეეფ, მარა ცვლილებეფშა მერჩქვანაშ საჭიროებას ხოლო ორწყეთ. ხანშამიშულირეფ, მით ამარდე ინათით, თქვა ხოლო ბრელ მუდგარენიშ კეთება შეილებნა. მაგალთო, შხვეფს ქეჩუათ თქვან ხიოლიშ გურშენ, მუთ თე ასაკის იეჰოვაშ გაჩინებაფაქ მოიღეს. ახალგაზრდეფ დაფასენა თქვან გამოცდილება დო ნაგურეფუშ გურშენ მორჩქილაფას. თქვან გამოცდილებას შხვეფს ხეგოფაჩილო გეგნოჩანთ-და, იეჰოვა მანგარო გაკურთხენა (წეკითხით ლუკაშ 6:38).

18. მუჭო შეულებნა ხანშამიშულირეფს დო ახალგაზრდეფს ართიანიშ მოხვარა?

¹⁸ ძვირფას ხანშამიშულირეფ, მუჟამსით ახალგაზრდეფს დეახლოებუთ, შეგალებენა ართიანიშ მოხვარა (რომ. 1:12). არძას უღჷ მუდგარენ ძვირფას, მუთ შხვას ვა უღჷ. ხანშამიშულირეფს სიბრძნე დო წანეფიშ ნაშაყარა გამოცდილება უღნა, ახალგაზრდეფს — ძალა დო ენერგია. მუჟამსით ახალგაზრდა დო ხანშამიშულირ ართო ხანდენა, მუჭოთ მეგობრეფ, თენა განადიდენს ჩქინ მოჸოროფე ზეციერ მუმას დო კურთხევა მოუღ მთელ კრებაშა.