1. Mang e ba fel’ ni ngad nameged u nap’an ni gad ra pilibthir i yan?

NAP’AN ni gad ra pilibthir i yan, ma rayog ni ngad lemnaged ndabkiyog ni nge fanaydad Jehovah ni bod rogon ni i fanaydad u nap’an ni kab gel fithik’ i dowdad. Yugu aram rogon nda ki gel fithik’ i dowdad ni bod rogon e ngiyal’ ni kab fel’ yangardad, machane rayog ni ngad fanayed e gonop nge salap rodad ni ngad filed ngak e piin nib bitir ngodad rogon nrayog ni ngan fanayrad u lan e ulung rok Jehovah mu kur yoornaged boch e maruwel ni yad be rin’. I yog reb e walag ni ke n’uw nap’an ni ke mang reb e piilal ni gaar, “Nap’an ni taw ko ngiyal’ ndabkiyog ni nggu rin’ e maruwel ni ug rin’ kafram ni bochan e kug pilibthir, mug felfelan’ ngay ya bay boch e walag ni pumoon ni kab bitir ngog nrayog ni ngar rin’ed e pi maruwel ney.”

2. Mang e gad ra weliy ko re article ney?

² Fa binem e article e be weliy rogon angin nra yib ngak e piin kab gel fithik’ i dowrad ni faan yad ra m’ag fager ko pi walag ni kar pilibthirgad. Biney e article e gad ra guy riy ni faanra ba sobut’an’ e piin pilibthir, ma yad manang e gin ngar musgad riy, ma yad ma pining e magar u lanin’rad, ma yad ba gol, ma aram e rayog ni ngar maruwelgad e piin kab gel fithik’ i dowrad u taabang me yib angin ko ulung ni ga’ngin.

3. Mang e sobut’an’ nrogon ni be yog e Filippi 2:3, 4? Uw rogon nrayog ni nge ayuweg e re n’ey reb e Kristiano?

³ Piin pilibthir e thingar ra sobut’naged lanin’rad ni faanra yad baadag ni ngar ayuweged e piin kab gel fithik’ i dowrad. Be’ nib sobut’an’ e manang ni ka bay boch e girdi’ nib ga’ farad ngak ara bay boch ban’en nrayog rorad ndabiyog rok. (Mu beeg e Filippi 2:3, 4.) Pi pilibthir ni bay e re fel’ngin ney rorad  e yad manang ni boor kanawoen nrayog ni ngan rin’ reb e maruwel riy miki yan i aw nib puluw ko n’en be yog e Bible. Ere darur lemnaged ni gubin e girdi’ ni ngaur rin’ed ban’en ni bod rogon ni ur rin’ed kafram. (Ekl. 7:10) Yugu aram rogon ni boor ban’en nrayog ni ngar filed ko piin nib bitir ngorad, machane yad manang ni “be thil rarogon e re fayleng ney i yan.” Ere rayog nib t’uf ni ngar filed rogon i rin’ boch ban’en u reb e kanawo’ nib thil.​—1 Kor. 7:31, NW.

4. Uw rogon ni ma folwok e pi walag ni pumoon ni yad ma lekag e ulung ko pi Levite?

⁴ Piin yad ba sobut’an’ e nap’an ni yad ra pilibthir i yan ma yad manang ndabkiyog ni ngar rin’ed boch ban’en ni bod kafram. Am lemnag e pi walag ni pumoon ni yad ma lekag e ulung. Nap’an nra gaman 70 e duw rorad, ma yima yog ngorad ni ngar rin’ed reb e maruwel nib thil. Ma re n’ey e rayog ni nge mo’maw’ ngorad. Ba gel e felfelan’ ni ur ted u nap’an ni yad be ayuweg pi walagrad. Ri yad baadag e maruwel ni yad be rin’. Machane yad manang ni kab fel’ ni nge mang piin kab gel e rrin’ed e re maruwel nem. Yad ra rin’ e re n’ey, ma aram e yad be folwok ko pi Levite u Israel kakrom nnap’an nra gaman 50 e duw rorad, mi yad tal ko pigpig u tabernacle. Pi Levite nem e demtrug e maruwel ni kan pi’ ngorad, ma ka yad be par ni yad ba felfelan’. Yad ma rin’ urngin e tin rayog rorad u fithik’ e pasig, maku yad ma ayuweg e piin nib bitir ngorad. (Num. 8:25, 26) Ku arrogon e ngiyal’ ney ni pi walag ni ur lekaged e ulung kafram e yugu aram rogon ndakurur lekaged e ulung e chiney, machane kab ga’ e  ayuw nge athamgil ni yad be pi’ ko ulung ni yad be pigpig riy.

5. Mang e kam fil rok Dan nge Katie?

⁵ Am lemnag e n’en ni rin’ Dan ni i lekag e ulung u lan 23 e duw. Nap’an ni gaman 70 e duw rok, min dugliyrow Katie ni ppin rok ni ngar mangew special pioneer. Uw rogon ni yow be rin’ e maruwel ni ka fin nni pi’ ngorow u fithik’ e felfelan’? Ke yog Dan ni boor ban’en ni be rin’ e chiney ko kafram! Ma rin’ e maruwel rok u lan e ulung, ma ma ayuweg e pi walag ni pumoon ni nge bung rogorad ni ngar manged boch e ministerial servant, maku ma fil ko pi walag rogon ni ngar machibgad u lan e mach ngu kalbus. Gimed e pi walag ni kam pilibthirgad e demtrug ko ki gimed be pigpig u polo’ e tayim romed fa danga’, ma ka rayog ni ngam ayuweged e pi walag. Ni uw rogon? Mu felfelan’gad ko tin be yag ni ngam rin’ed, mi gimed nameg boch ban’en nib thil, mi gimed lemnag e tin rayog ni ngam rin’ed ko bin ngaum lemnaged e tin ndabkiyog romed.

6. Mang fan nib fel’ ni nge nang be’ e gin nge mus riy? Mu susunnag.

⁶ Be’ ni manang e gin nge mus riy e manang e tin ndabiyog rok. (Prov. 11:2) Bochan e re n’ey, ma der ma lemnag ni nge rin’ boch ban’en ndabiyog rok. Ere ma par nib felfelan’ ma be maruwel nib gel. Rayog ni ngan taarebrogonnag be’ ni manang e gin nge mus riy ngak be’ ni be yan u karrow ma be farthog e karrow rok nga talang. Ba t’uf ni nge thilyeg e giya ko fare karrow ya nge dabi tal u nap’an ni be farthog nga talang. Riyul’ nsana ra sagaal fare karrow, machane dabi tal. Ere ku arrogon be’ ni manang e gin nge mus riy ni manang e ngiyal’ ni nge thilyeg boch ban’en u rarogon me lichnag e tin be rin’ ya nge yag ni ulul ko pigpig ni be tay ngak Jehovah miki ayuweg yugu boch e girdi’.

7. Uw rogon ni dag Barzillai ni manang e gin nge mus riy?

⁷ Mu lemnag e n’en ni rin’ Barzillai u nap’an ni yog David ni Pilung ngak ni nge un nga tafen e pilung u nap’an ni ke gaman 80 e duw rok. I siyeg e n’en ni ognag e en pilung ngak. Manang ni bay boch ban’en ndabkiyog ni nge rin’ ni bochan e ke pilibthir. Ere aram fan ni yog ni nge mang Chimham e ir e un ni bochan e kab pagel. (2 Sam. 19:35-37) Pi walag ni pumoon ni kar pilibthirgad e yad ba felfelan’ ngay ni ngar paged e pi walag ni ka yad ba pagel ni ngar rin’ed boch e maruwel ni bod e n’en ni rin’ Barzillai.

8. Uw rogon ni dag David ni Pilung ni manang e gin nge mus riy ni yugu aram rogon ni baadag ni nge toy fare tempel?

⁸ David ni Pilung e ki dag e kanawo’ nib manigil nrayog ni ngan folwok riy u rogon ni ngan nang e gin ngan mus riy. Ri baadag ni nge toy reb e naun ni fan ngak Jehovah. Machane nap’an ni yog Jehovah ni Solomon e ir e nge rin’ e re maruwel nem, me m’agan’ ko n’en ke dugliy Jehovah me pi’ e ayuw u rogon nrayog rok u nap’an ni yibe kunuy mam’en e re tempel nem ni ngan toy. (1 Kron. 17:4; 22:5) De lemnag David ni ir e ba fel’ ni nge rin’ e re maruwel nem ni bochan e Solomon e “dawori ilal ma dawori yoor ban’en ni ke nang rogon.” (1 Kron. 29:1, BT) Manang ni yira toy e re tempel nem nge yan i m’ay ni bochan e be tow’athnag Jehovah e maruwel ni yibe rin’, ma gathi bochan yangaren ara salap ko piin yad be yarmiy rogon e maruwel ni yibe tay. Pi walag ni kar pilibthirgad e ngiyal’ ney e mus ni faanra ke thil e maruwel rorad, ma ka yad ba pasig ko pigpig ni yad be tay ngak Jehovah ni bod e n’en ni rin’ David. Ma yad manang nra tow’athnag Jehovah e piin ka yad ba gel ni yad be rin’ e maruwel ni ur rin’ed kafram.

9. Uw rogon ni dag reb i girdien e Branch Committee ni manang e gin nge mus riy?

⁹ Bay reb e walag ni pumoon e ngiyal’ ney ni  ka nog Shigeo ngak ni dag ni manang e gin nge mus riy. Nap’an e duw ni 1976 ni ke gaman 30 e duw rok min dugliy ni nge mang girdien reb e Branch Committee. Nap’an e duw ni 2004, me mang coordinator ko re Branch Committee nem. Boch nga tomuren me nang ni bay boch ban’en ndabkiyog ni nge rin’, mab n’uw nap’an mfini mu’nag e maruwel rok ni bochan e ke thil gelngin ko kafram. I yibilay murung’agen e re n’em, me lemnag fel’ngin ni faanra pag reb e walag ni kab pagel ni nge mang ir e nge rin’ e re maruwel nem. Yugu aram rogon ni ka gathi ir e coordinator, machane ka be ulul ni ngaur maruwelgad e tin ka bay i girdien e Branch Committee u taabang. N’en ni rin’ Barzillai, nge David ni Pilung, nge Shigeo e be micheg ni be’ nib sobut’an’ ma manang e gin nge mus riy e ma lemnag e n’en ni manang e piin nib bitir ngak ko bin ni kemus ni nge lemnag e n’en nib t’uf ni ngan fil ngorad. Ma tayrad ni yad boch e girdi’ ni yad be maruwel u taabang ma gathi yad be tagenging ngorad.​—Prov. 20:29.

10. Uw rogon e piin kab gel fithik’ i dowrad u lan e ulung u wan’ e piin kar pilibthirgad?

¹⁰ Piin kar pilibthirgad e yad ma sap ngay ni piin kab gel fithik’ i dowrad e yad boch e tow’ath ni ke yib rok Jehovah, ma yad ma pining e magar ko tin be yag ni ngar rin’ed. Nap’an nra meewar fithik’ i dowrad i yan ma yad ba felfelan’ ngay ni piin kab gel fithik’ i dowrad e ba m’agan’rad ngay maku rayog rorad ni ngar rin’ed e maruwel nib t’uf ni ngan rin’ mar ayuweged e ulung.

11. Uw rogon ni be dag e Ruth 4:13-16 ni faanra pag e piin kar pilibthirgad e piin kab bitir ngorad ni ngar ayuweged yad, ma ra yib angin ngorad?

¹¹ Naomi e ir reb e pilibthir ni bay murung’agen u Bible ni m’agan’ ngay ni nge pag be’ ni kab bitir ngak ni nge ayuweg. Tomuren ni yim’  ba pagel ni fak Naomi, me yog ngak Ruth ni leengin e re pagel nem ni nge sul nga tafen. Machane nap’an ni yog Ruth ni nge un ngak u nap’an ni nge sul nga Bethlehem, me pag ni nge un ngak me m’agan’ ngay ni nga i ayuweg. (Ruth 1:7, 8, 18) Ma re n’ey e ri yib angin ngorow ni yow l’agruw! (Mu beeg e Ruth 4:13-16.) Sobut’an’ e ir e ra k’aring e piin kar pilibthirgad ni ngar folwokgad rok Naomi.

12. Uw rogon ni dag apostal Paul ni be pining e magar?

¹² Apostal Paul e ba felfelan’ ko ayuw ni i pi’ e pi walag ngak. Bod ni pining e magar ko pi Kristiano u Filippi ko tow’ath nra pied ngak. (Fil. 4:16) Ki pining e magar ko ayuw ni pi’ Timothy ngak. (Fil. 2:19-22) Ngemu’ miki pining e magar ngak Got ni bochan e pi walag nra bad ra pied e athamgil nga laniyan’ u nap’an ni yibe fek i yan nga Roma nib kalbus. (Acts 28:15) Paul e ir be’ nib pasig ni bokum biyu’ e mayel ni i milekag riy ni be machib ma be pi’ e athamgil nga laniyan’ e walag ko pi ulung i yan. Yugu aram rogon mab sobut’an’ me m’agan’ ko ayuw ni i pi’ e pi walag ngak.

13. Uw rogon ni nge dag e piin pilibthir ni yad be pining e magar ni bochan e pi walag ni ka yad ba gel?

¹³ Gimed e piin pilibthir e boor e kanawo’ nrayog ni ngam daged riy ni gimed be pining e magar ni bochan e pi walag u lan e ulung romed ni ka yad ba gel. Faanra yad baadag ni ngar feked gur nga bang, ara ngar ayuweged gur ko chuway’ rom, ara yugu boch ban’en nib t’uf rom, ma nge m’agan’um ko ayuw ni kar ognaged ngom. Dab mu pagtalin ni ayuw ni yad be pi’ ngom e aram reb e kanawo’ ni be dag Jehovah riy ni gab t’uf rok. Rayog ni nge chugur e tha’ u thilmed e piin yad ma ayuwegem. Gubin ngiyal’ ni ngam ayuweg e pi fager rom ni nge chugur e tha’ u thilrad Jehovah, ma gog ngorad gelngin e felfelan’ ni ga be tay ni ga be guy e piin kab gel fithik’ i dowrad ni yad be yoornag e tin yad be rin’ ni fan ko ulung. Ma nge m’agan’um ngay ni ngam tay e tayim ni fan ngorad, mu kum weliy ngorad e pi n’en ni ka i buch rom. Ga ra rin’ e re n’ey, ma aram e ga ra ‘pining e magar’ ngak Jehovah ni ke pow’iy e piin kab gel fithik’ i dowrad nga lan e ulung.​—Kol. 3:15; John 6:44; 1 Thess. 5:18.

14. Uw rogon ni dag David ni Pilung ni ir be’ nib gol?

¹⁴ N’en ni rin’ David ni Pilung e be dag ni ku reb e fel’ngin nib t’uf ni nge yag ngak e piin pilibthir e aram e ngaur golgad. Boor e salpiy nge machaf ni pi’ ni fan ko fare tempel ni yira toy. (1 Kron. 22:11-16; 29:3, 4) I rin’ e re n’ey ni yugu aram rogon ni Solomon e ir e yira yog ni ke toy e re tempel nem. Faanra dabkiyog u gelngidad ni ngad uned i toy boch e naun ni fan ko ulung rok Jehovah, maku rayog ni ngad ululgad ngad pied e salpiy ni ayuw ni fan ko pi maruwel ney u rogon nrayog rodad. Ku rayog ni ngad ayuweged e piin nib bitir ngodad ni nge yib angin ngorad e salap ni ke yag ngodad u lan e pi duw ni kad pigpiggad riy.

15. Mang boch e tow’ath nib manigil ni pi’ apostal Paul ngak Timothy?

¹⁵ Am lemnag e n’en ni rin’ apostal Paul nrayog ni ngan folwok riy. I pining Timothy ni nge un ngak ko milekag ni i tay ni be machib, miki fil ngak rogon ni nge machib ma be fil ban’en ko girdi’. (Acts 16:1-3) N’en ni fil ngak Timothy e ayuweg ni nge salap u rogon ni nge machibnag fare thin nib fel’. (1 Kor. 4:17) Ngemu’ miki fanay Timothy e pi n’em ni nge skulnag yugu boch e girdi’.

16. Mang fan ni skulnag Shigeo yugu boch e walag?

¹⁶ Pi walag e ngiyal’ ney ni kar pilibthirgad e darur magargad nri chey ma dabkiyog ni ngan fanayrad u lan e ulung ni bochan e kar skulnaged e piin nib bitir ngorad ni ngar rin’ed boch e maruwel ni ur rin’ed kafram. Shigeo ni faan kan weliy murung’agen e boor e duw ni i skulnag  e pi walag ni girdien e Branch Committee ni yad bbitir ngak. I rin’ e re n’ey ya nge yag ni ayuweg e maruwel ni yibe rin’ ni fan nga Gil’ilungun Got ko re nam ni be pigpig riy. Angin ni yib riy e nap’an ndaki yag ni nge mang coordinator, ma bay reb e walag ni pumoon ni kan skulnag nrayog ni nge rin’ e re maruwel nem. Ke pag 45 e duw ni ke pigpig Shigeo ni ir bang ko Branch Committee, ma ka be ulul ni nge fanay e tin ke fil ni nge ayuweg e pi walag ni pumoon ni yad bbitir ngak. Riyul’ ni pi walag ney e rib ga’ e ayuw ni yad ma pi’ ko girdi’ rok Got!

17. Mang e rayog ni nge pi’ e piin pilibthir ngak yugu boch e girdi’ nrogon ni bay ko Luke 6:38?

¹⁷ Gimed e pi walag ni kam pilibthirgad e mich riy ni bin th’abi fel’ kanawoen e yafos ni nge mel’eg be’ e aram e nge pigpig ngak Jehovah u fithik’ e michan’ nge yul’yul’. Kam daged u daken e ngongol romed nib fel’ ni ngad filed e pi kenggin e motochiyel u Bible ma gad fol riy. Gimed manang rogon e pi n’en un rin’ kafram, machane ki gimed manang nib t’uf ni ngam thilyeged rogon ni gimed be rin’ boch ban’en ya nge m’ag ko pi n’en ni be thilthil. Gimed e piin pilibthir ni ka fin mu uned ko taufe e ka boor e kanawo’ nrayog ni ngam ayuweged yugu boch e girdi’ riy. Rayog ni ngam weliyed ngorad gelngin e felfelan’ ni kam ted e chiney ni kam nanged Jehovah. Ra felfelan’ e piin kab gel fithik’ i dowrad ni ngar rung’aged murung’agen e pi n’en ke buch romed nge boch ban’en ni kam filed. Faanra “mu golgad ngak e girdi’” ni aram e ngam fanayed e pi n’en kam filed ni ngam skulnaged yugu boch e girdi’, ma rra tow’athnagmed Jehovah.​—Mu beeg e Luke 6:38.

18. Mang ayuw e rayog ni nge pi’ e piin pilibthir nge piin kab gel fithik’ i dowrad ngorad?

¹⁸ Gimed e piin pilibthir e faan gimed ra chugurnagmed ngak e piin kab gel fithik’ i dowrad, ma aram e rayog ni ngaum ayuweged gimed. (Rom. 1:12) Ra bigimed ma bay fel’ngin ndariy rok yugu be’. Piin pilibthir e bay e gonop nge salap ni ke yag ngorad u n’umngin nap’an e yafos rorad. Ma piin kab bitir ngorad e kab gel fithik’ i dowrad. Ere nap’an nra maruwel e piin kab gel fithik’ i dowrad nge piin pilibthir u taabang nib fel’ thilrad, ma aram e yad ra pining e sorok ngak e Chitamangidad ni bay u tharmiy me yib angirad ko ulung.