1. ¿Baʼax maʼalob ka u chʼaʼtukult u beetik le sukuʼunoʼob táan u yantal u jaʼabiloʼoboʼ?

LE KÉEN joʼopʼok u yantal k-jaʼabileʼ maʼ xaaneʼ k-chan chiʼichnaktal tumen k-tuklik maʼ tun páajtal k-meyajtik Jéeoba jeʼex k-beetik kaʼacheʼ. Chéen baʼaleʼ maʼ unaj u tuʼubultoʼoneʼ le naʼat yéetel le experiencia yaantoʼonoʼ jeʼel u páajtal u meyajtoʼon utiaʼal k-áantik le táankelmoʼob u beetoʼob le jejeláas meyajoʼob kʼaʼabéet ichil u kaajal Diosoʼ. Juntúul sukuʼun úuch joʼopʼok u beetik u ancianoileʼ tu yaʼalaj: «Le ka káaj in wuʼuyik yaan baʼaloʼob maʼ tu páajtal in beetkeʼ tin tsʼáaj gracias tiʼ Jéeoba tumen yaan táankelmoʼob preparadoʼob utiaʼal u beetkoʼob le meyajoʼ».

2. ¿Baʼax ken k-il teʼ xookaʼ?

² Teʼ xook máanikoʼ t-ileʼ jach ku bin utsil tiʼ le táankelmoʼob ku biskubaʼob yéetel le máaxoʼob yaan u jaʼabiloʼoboʼ. Teʼ xookaʼ yaan k-ilkeʼ utiaʼal u béeytal u múul meyaj le máaxoʼob yaan u jaʼabiloʼob yéetel le táankelmoʼoboʼ kʼaʼabéet u yantaltiʼob kabal óolal, u reconocerkoʼob yaan baʼax maʼ tu páajtal u beetkoʼob, u tsʼáaikoʼob u graciasil yoʼolal baʼax ku beetaʼal tu yoʼolaloʼob yéetel u compartirkoʼob le baʼax u yojloʼoboʼ wa le baʼax yaantiʼoboʼ.

3. 1) Jeʼex u yaʼalik Filipenses 2:3, 4, ¿bix juntúul máak kabal u yóol? 2) ¿Bix u yáantik máak le kabal óolaloʼ?

³ Le máaxoʼob yaan u jaʼabiloʼob taak u yáantkoʼob le maas táankelmoʼoboʼ kʼaʼabéet u yantaltiʼob kabal óolal.  Le máax kabal u yóoloʼ ku yilik u maasil bey maas importanteʼob ke letiʼeʼ (xok Filipenses 2:3, 4). Le máaxoʼob yaan u jaʼabiloʼob kabal u yóoloʼoboʼ u yojloʼob jejeláas bix jeʼel u beetaʼal junpʼéel baʼaleʼ, le oʼolal maʼatech u páaʼtkoʼob ka beetaʼak tuláakal baʼal jach jeʼex u beetkoʼob letiʼob kaʼachoʼ (Ecl. 7:10). Kex yaʼab experiencia yaantiʼobeʼ u yojloʼobeʼ yaan kʼiineʼ ku kʼexpajal bix u beetaʼal jujunpʼéel baʼaloʼob, tumen le «yóokʼol kaabaʼ táan u kʼexpajal» (1 Cor. 7:31).

4. ¿Baʼaxten k-aʼalikeʼ le superintendenteʼob tiʼ circuitooʼ beyoʼob jeʼex le levitaʼob yaan kaʼach Israeloʼ?

⁴ Le sukuʼunoʼob kabal u yóoloʼoboʼ u yojloʼob yaan meyajoʼob tsʼoʼok u pʼáatal maʼ tu páajtal u beetkoʼob. Jeʼex le superintendente tiʼ circuitoʼoboʼ le kéen u tsʼáa 70 años tiʼobeʼ ku xuʼulul u beetkoʼob le meyaj jeʼeloʼ. Maʼ xaaneʼ maʼ chéen chʼaʼabil u yilkoʼobiʼ tumen tsʼoʼok u suuktal u beetik u circuitoiloʼob yéetel jach uts tu tʼaan u beetkoʼob. Chéen baʼaleʼ ku naʼatkoʼob xaneʼ maas maʼalob ka beetaʼak le meyaj tumen le maas táankelmoʼoboʼ. Letiʼobeʼ beyoʼob jeʼex le levitaʼob yanoʼob kaʼach Israel ku xuʼulul u meyajoʼob teʼ najil reunión le kéen u tsʼáa 50 años tiʼoboʼ, chéen baʼaleʼ láayliʼ jach kiʼimak u yóoloʼobeʼ tumen ku yáantkoʼob le maas táankelmoʼob u beetoʼob le meyajoʼ (Núm. 8:25, 26). Bejlaʼeʼ le sukuʼunoʼob tsʼoʼok u xuʼulul u beetik u  circuitoiloʼoboʼ jach ku yáantajoʼob xan teʼ múuchʼuliloʼob tuʼux ku pʼáatloʼoboʼ.

5. ¿Baʼax ka kanik tiʼ u ejemplo Dan yéetel Katie?

⁵ Koʼoneʼex ilik u ejemplo sukuʼun Dan, letiʼeʼ 23 años tu beetaj u circuitoil. Le ka tu tsʼáaj 70 años tiʼeʼ, letiʼ yéetel Katie, u yataneʼ, tsʼaʼab u beet u precursor especialiloʼob. ¿Bix u bin tiʼob? Daneʼ ku yaʼalikeʼ yaʼab meyaj yaan u beet teʼ múuchʼuliloʼ. Letiʼeʼ táan u yáantik le sukuʼunoʼob utiaʼal ka u beet u siervo ministerialiloʼoboʼ, yéetel táan xan u yáantik uláakʼ sukuʼunoʼob utiaʼal u béeytal u kʼaʼaytajoʼob teʼ cárceloʼoboʼ yéetel teʼ nukuch kaajoʼob tuʼux yaʼab u máan le máakoʼoboʼ. Jeʼex k-ilkoʼ le sukuʼunoʼob yaan u jaʼabiloʼoboʼ jach jeʼel u páajtal u yáantkoʼob u maasil wa ku tsʼáaik u yóol u beetoʼob le meyajoʼob jeʼel u páajtal u beetkoʼob ichil u kaajal Jéeobaoʼ.

6. ¿Baʼaxten yaan u naʼat juntúul máax ku reconocertik yaan baʼax maʼ tu páajtal u beetik? Aʼal junpʼéel ejemplo.

⁶ Juntúul máax ku reconocertik yaan baʼax maʼ tu páajtal u beetkeʼ maʼ tu kíimskuba u beet junpʼéel baʼal minaʼan tu kʼab u beetik (Pro. 11:2). Letiʼeʼ u yojleʼ utiaʼal u seguer u meyajtik Jéeoba yéetel u yáantik u maasileʼ kʼaʼabéet u kʼexik jujunpʼéel baʼaloʼob ichil u kuxtal. Jeʼel u páajtal k-aʼalikeʼ bey jeʼex juntúul chofer táan u naʼakal tiʼ junpʼéel montaña yéetel u cocheeʼ, letiʼeʼ ku yéemsik u velocidad utiaʼal u páajtal u naʼakal jujunpʼíitil (Fili. 4:5).

7. ¿Bix tu yeʼesil Barzilay ku reconocertik yaan baʼax maʼ tu páajtal u beetik?

⁷ Koʼoneʼex ilik u ejemplo Barzilay, letiʼeʼ 80 años yaantiʼ le ka aʼalaʼabtiʼ tumen rey David ka xiʼik tu yéetel utiaʼal ka tsʼaʼabaktiʼ junpʼéel nojoch meyaj. ¿Baʼax tu beetaj? Barzilayeʼ u yojel tsʼoʼok u chʼíijil kaʼachi yéetel yaan baʼaxoʼob maʼ tu páajtal u beetik, le oʼolaleʼ tu lugar u bineʼ tu yaʼalaj wa jeʼel u páajtal u bin Kimam, juntúul máax maas táankelem tiʼ letiʼeʼ (2 Sam. 19:35-37). Bejlaʼa xaneʼ le sukuʼunoʼob yaan u jaʼabiloʼoboʼ kiʼimak u yóoloʼob u pʼatkoʼob jujunpʼéel meyajoʼob tu kʼab le maas táankelmoʼoboʼ.

8. ¿Bix tu reconocertil David yaan baʼaloʼob maʼ letiʼ unaj u beetkiʼ?

⁸ Le rey David xanoʼ tu reconocertaj yaan baʼaloʼob maʼ letiʼ unaj u beetkiʼ. Letiʼeʼ u kʼáat kaʼach u beet junpʼéel naj utiaʼal u adorartaʼal Jéeoba, chéen baʼaleʼ le ka aʼalaʼabtiʼ u hijo kun beetkeʼ maʼ tsʼíikilnajiʼ baʼaxeʼ tu yilaj u yáantik u hijo (1 Cró. 17:4; 22:5). Davideʼ maʼ tu tuklaj wa letiʼeʼ maas jeʼel u tsaʼayal yéetel le meyajoʼ, maʼ xan tu tuklaj wa Salomóneʼ jach táankelem le oʼolal maʼ tu páajtal u beetik (1 Cró. 29:1). U yojel xan kaʼacheʼ utiaʼal u beetaʼal le meyajaʼ chéen kʼaʼabéet u bendición Jéeoba, maʼ tsaaj wa jach yaʼab baʼaloʼob u yojel máakiʼ yéetel mix baʼal xan yaan u yil wa táankelem máak. Jeʼex Davideʼ bejlaʼa xaneʼ le sukuʼunoʼob tsʼoʼok u yantal u jaʼabiloʼoboʼ jach u tsʼaamaj u yóol u meyajtoʼob Jéeoba. Letiʼobeʼ u yojloʼobeʼ Jéeoba kun áantik le sukuʼunoʼob maas táankelmoʼob utiaʼal u beetkoʼob le meyaj ku beetkoʼob kaʼachoʼ.

9. ¿Bix tu yeʼesil sukuʼun Shigeo ku reconocertik yaan baʼaxoʼob maʼ tu páajtal u beetik?

⁹ Koʼox ilik u ejemplo sukuʼun Shigeo. Tu añoil 1976 le yaan 30 años tiʼoʼ tsʼaʼab meyaj ichil junpʼéel Comité tiʼ Sucursal. Tu añoil 2004, tsʼaʼab u beet u coordinadoril  le comitéoʼ. Chéen baʼaleʼ ka máan añoseʼ tu tsʼáaj cuenta maʼ tu páajtal u beetik le meyaj jeʼex kaʼachoʼ tumen táan u bin u pʼáatal minaʼan u muukʼ. Letiʼeʼ orarnaj tiʼ Jéeoba yéetel tu tuklaj maas yaʼab utsil jeʼel u taasik wa ku tsʼaʼabal juntúul sukuʼun maas táankelem u beet le meyajoʼ. Le sukuʼunaʼ kex xuʼul u beetik u coordinadorileʼ láayliʼ ku yáantaj ichil le Comité tiʼ Sucursaloʼ. U ejemplo Barzilay, le rey David yéetel le sukuʼun Shigeooʼ ku kaʼansiktoʼoneʼ le máaxoʼob kabal u yóoloʼob yéetel ku reconocerkoʼob yaan baʼax maʼ tu páajtal u beetkoʼoboʼ maʼ tu chʼíikil u yiloʼob le baʼaxoʼob maʼ u yojel u beet le táankelmoʼoboʼ, baʼaxeʼ maas ku yilkoʼob le baʼaloʼob jeʼel u páajtal u beetkoʼoboʼ yéetel ku múul meyajoʼob tu yéeteloʼob (Pro. 20:29).

10. Le sukuʼunoʼob yaan u jaʼabiloʼoboʼ, ¿bix u yilkoʼob le maas táankelmoʼob yanoʼob teʼ múuchʼuliloʼ?

¹⁰ Le sukuʼunoʼob yaan u jaʼabiloʼoboʼ ku yilkoʼob le táankelmoʼob bey junpʼéel regalo ku taal tiʼ Jéeobaeʼ yéetel ku tsʼáaikoʼob u graciasil yoʼolal le meyaj ku beetkoʼoboʼ. Jeʼex u bin u pʼáatal minaʼan u muukʼoʼobeʼ bey u bin u maas apreciarkoʼob le meyaj ku beetik le táankelmoʼoboʼ tumen beyoʼ ku yáantaʼal tubeel le múuchʼuliloʼ.

11. ¿Bix u yeʼesik Rut 4:13-16 ku bin utsil tiʼ le sukuʼunoʼob ku chaʼik u yáantaʼaloʼoboʼ?

¹¹ Le Bibliaoʼ ku yaʼalikeʼ Noemíeʼ tu chaʼaj u yáantaʼal tumen juntúul x-lóoʼbayan yéetel tu tsʼáaj u diosboʼotikil tiʼ. Ka tsʼoʼok u kíimil u hijoeʼ, Noemíeʼ tu yaʼalaj tiʼ Rut ka suunak tu kaajal, chéen baʼaleʼ  maʼ tu yóotiʼ baʼaxeʼ bin tu yéetel tu kaajil Belén (Rut 1:7, 8, 18). Yoʼolal leloʼ jach bin utsil tiʼ tu kaʼatúulal (xok Rut 4:13-16). Teʼ kʼiinoʼobaʼ le sukuʼunoʼob yaan u jaʼabiloʼob kabal u yóoloʼoboʼ ku yilik u beetkoʼob jeʼex Noemíeʼ.

12. ¿Bix tu yeʼesil Pablo jach ku tsʼáaik u graciasil yoʼolal baʼax ku beetaʼal tu yoʼolal?

¹² Le apóstol Pablooʼ tu tsʼáaj xan u graciasil yoʼolal le áantaj tsʼaʼabtiʼoʼ. Juntéenjeakeʼ tu tsʼáaj gracias tiʼ le sukuʼunoʼob yanoʼob Filiposoʼ tumen túuxtaʼabtiʼ jujunpʼéel baʼaloʼob kʼaʼabéettiʼ (Fili. 4:16). Tsʼoʼoleʼ tu tsʼáaj xan gracias tiʼ Timoteo úuchik u yáantaʼal (Fili. 2:19-22). Le táan u bisaʼal kʼalbil Romaoʼ tu tsʼáaj xan gracias tiʼ Dios tumen jach líiʼsaʼab u yóol tumen le sukuʼunoʼoboʼ (Hech. 28:15). Pabloeʼ juntúul máak jach noʼojaʼan kaʼachi, yaʼab tuʼuxoʼob viajarnaj utiaʼal u kʼaʼaytaj yéetel utiaʼal u líiʼsik u yóol le múuchʼuliloʼoboʼ. Chéen baʼaleʼ kex beyoʼ tu yeʼesaj kabal u yóol tumen tu chaʼaj u yáantaʼal tumen le sukuʼunoʼoboʼ.

13. Le sukuʼunoʼob yaan u jaʼabiloʼoboʼ, ¿bix u yeʼeskoʼob ku tsʼáaikoʼob gracias tu yoʼolal le meyaj ku beetik le táankelmoʼoboʼ?

¹³ Le sukuʼunoʼob yaan u jaʼabiloʼoboʼ yaʼab bix jeʼel u tsʼáaikoʼob u graciasil le baʼax ku beetik le táankelmoʼob yanoʼob tu múuchʼuliloʼoboʼ. Wa ku yaʼalaʼaltiʼob jeʼel u bisaʼaloʼob maan wa utiaʼal u beetkoʼob uláakʼ baʼax kʼaʼabéeteʼ maʼalob ka u chaʼa u yáantaʼaloʼob, tumen lelaʼ junpʼéel bix u yeʼesaʼal yaabilaj tiʼob tumen Jéeoba. Maʼalob xan ka u yaʼaloʼob tiʼ le táankelmoʼoboʼ jach kiʼimak u yóoloʼob tumen ku yilkoʼob bix u tsʼáaik u yóoloʼob u meyajtoʼob Jéeoba. Tsʼoʼoleʼ maʼalob xan ka u jóoʼsoʼob tiempo utiaʼal u tsikbaloʼob tu yéeteloʼob. Kéen u beetoʼob beyaʼ ku tsʼáaikoʼob gracias tiʼ Jéeoba tu yoʼolal le meyaj ku beetik le sukuʼunoʼob maas táankelmoʼoboʼ (Col. 3:15; Juan 6:44; 1 Tes. 5:18).

14. ¿Bix tu yeʼesil David uláakʼ jatsʼuts modos?

¹⁴ Le rey Davidoʼ tu yeʼesaj uláakʼ junpʼéel jatsʼuts modos unaj xan u yeʼesik le sukuʼunoʼob tsʼoʼok u yantal u jaʼabiloʼoboʼ. Letiʼeʼ tu síiaj yaʼab baʼaloʼob utiaʼal u beetaʼal le templooʼ kex u yojel kéen máanak kʼiineʼ yaan u yaʼalaʼaleʼ Salomón beete (1 Cró. 22:11-16; 29:3, 4). Teʼ kʼiinoʼobaʼ le sukuʼunoʼob tsʼoʼok u yantal u jaʼabiloʼob yéetel maʼ tu páajtal u jach binoʼob áantaj tiʼ construcciónoʼ ku yáantajoʼob ikil u tsʼáaikoʼob u donaciónoʼob wa ikil u kaʼanskoʼob tiʼ le maas táankelmoʼob le baʼaxoʼob u yojloʼoboʼ.

15. ¿Baʼax tu kaʼansaj Pablo tiʼ Timoteo?

¹⁵ Apóstol Pabloeʼ tu yeʼesaj xan u yutsil. Letiʼeʼ tu invitartaj Timoteo utiaʼal ka xiʼik kʼaʼaytaj tu yéetel tuláakʼ tuʼuxoʼob. Tu kaʼansajtiʼ bix unaj u kʼaʼaytaj yéetel u kaʼansaj (Hech. 16:1-3). Le baʼaxoʼob tu kanaj Timoteooʼ jach tu yáantaj utiaʼal u kaʼansaj tubeel (1 Cor. 4:17). Ka máan kʼiin xaneʼ Timoteoeʼ tu kaʼansaj tiʼ uláakʼ sukuʼunoʼob le baʼaxoʼob tu kanaj tiʼ Pablooʼ.

16. ¿Baʼaxten tu preparartaj le sukuʼun Shigeo uláakʼ sukuʼunoʼoboʼ?

¹⁶ Teʼ kʼiinoʼobaʼ le sukuʼunoʼob yaan u jaʼabiloʼoboʼ kiʼimak u yóoloʼob ikil u kaʼanskoʼob tiʼ uláakʼ sukuʼunoʼob jujunpʼéel meyajoʼob ku beetaʼal teʼ múuchʼuliloʼ. Le sukuʼun Shigeo t-chʼaʼchiʼitaj teʼ párrafo 9, máan yaʼab años táan u kaʼansik le sukuʼunoʼob maas táankelmoʼob yanoʼob ichil le Comité tiʼ Sucursaloʼ tumen  u yojleʼ yaan u yáantaj utiaʼal u seguer u kʼaʼaytaʼal le Reinooʼ. Bey túunoʼ le ka kʼuch u kʼiinil u xuʼulul u beetik u coordinadorileʼ yanchaj máax beetik le meyajoʼ. Le sukuʼunaʼ tak bejlaʼa ku kaʼansik tiʼ le sukuʼunoʼob maas táankelmoʼob le baʼax tu kanaj ichil le maas tiʼ 45 años joʼopʼok u meyaj teʼ Comité tiʼ Sucursaloʼ. ¿Máasaʼ jach nojoch áantaj ku tsʼáaik ichil u kaajal Jéeoba le sukuʼunoʼob beyaʼ?

17. ¿Baʼax jeʼel u páajtal u beetik le sukuʼunoʼob yaan u jaʼabiloʼob yoʼolal u maasiloʼ? (Lucas 6:38).

¹⁷ Le sukuʼunoʼob tsʼoʼok u yantal u jaʼabiloʼoboʼ ku yeʼeskoʼobeʼ jach ku taasik kiʼimak óolal u meyajtaʼal Jéeoba. Le ejemplo ku tsʼáaikoʼoboʼ ku yeʼesik jach yaʼab utsil ku taasik u beetik máak le baʼax ku yaʼalik le Bibliaoʼ. Tsʼoʼoleʼ letiʼobeʼ kex u yojloʼob bix u beetaʼal jujunpʼéel meyajoʼob ichil u kaajal Jéeobaeʼ wa ku yaʼalaʼal yaan u kʼexpajleʼ ku yilik u beetkoʼob xan beyoʼ. Maʼ xaaneʼ yaan tiʼ le sukuʼunoʼobaʼ maʼ úuch okjaʼanakoʼobiʼ, chéen baʼaleʼ jeʼel u líiʼskoʼob u yóol le múuchʼulil wa ku tsikbaltikoʼob bukaʼaj kiʼimakil u yóoloʼob úuchik u kʼaj óoltikoʼob Jéeobaoʼ. Le sukuʼunoʼob maas táankelmoʼoboʼ jach uts tu tʼaan u yuʼubikoʼob le baʼaxoʼob tsʼoʼok u yúuchultiʼob ichil u kuxtaloʼoboʼ. Wa letiʼob ku yeʼeskoʼob u yutsiloʼob yéetel ku kaʼanskoʼob tiʼ u maasil le baʼaxoʼob u yojloʼoboʼ jach yaan u bendecirtaʼaloʼob tumen Jéeoba (xok Lucas 6:38).

18. ¿Bix jeʼel u múul áantkuba le sukuʼunoʼob yaan u jaʼabiloʼob yéetel le maas táankelmoʼoboʼ?

¹⁸ Wa le sukuʼunoʼob maas yaan u jaʼabiloʼob ku biskubaʼob yéetel le maas táankelmoʼoboʼ jeʼel u múul áantkubaʼobeʼ (Rom. 1:12). Le sukuʼunoʼob yaan u jaʼabiloʼoboʼ jach yaan u naʼatoʼob yéetel yaʼab experiencia yaantiʼob, chéen baʼaleʼ le maas táankelmoʼoboʼ tʼaʼajoʼob yéetel jach yaan u muukʼoʼob. Wa ku múul meyajoʼobeʼ yaan u alabarkoʼob k-Taata yaan teʼ kaʼanoʼ yéetel yaan u yáantkoʼob le múuchʼuliloʼ.