1-2. Nyigbanhunhun ci Agai nu mɔ yɛajɔ le mìwo hwenuɔ?

LE EXWE 2015 mɛɔ, nyigban hunhun le Népal. Mɛɖewo ciwo yí ci agbe nu mɔ: “Le minici ɖewo gblamɛɔ, fiɔsewo koɖo exɔ xoxuiwo tɔ juinjuin.” “Mɛshiamɛ vɔnkɔ . . . Amɛ sugbɔ nu mɔ nyigbanhunhun lɔ wa minici amɛve han. Nyɛŋbui mɔ daɖo te o.” Nɔ eo ji yí enudovɔnvɔnnamɛ cɛ jɔ doɔ, taŋfuin daŋlɔbe gbeɖe o.

² Ele ahan gan, hwenu cɛ ci mɛ mìleɔ, nyigban ɖeka hunhunkɔ yí denyi jugan alo eju ɖeka mɛ yɔ o. Yehowa yí hunhunkɔ jukɔn ciwo yí le xexeɛ pleŋ mɛ gbɛ, ewa exwe sugbɔ yɛ yí ele enu cɛ wakɔ. Jukɔnwo hunhunhun cɛ nu yí nyɔnuɖɛtɔ Agai xo nu so. Éŋwlɛ mɔ: “Nyɔ cɛ yí Yehowa ahwakɔnwo tɔ nu ke: ‘Egbekpɔtɔ zeɖeka yí dajinjin o yí nahunhun jeŋkwi, nyigban, axu koɖo nyigban gbali.’”—Agai 2:6, NWT.

3. Lé nyigbanhunhun ci nu Agai xo nuxu so to akpo nɔ nyigbanhunhun ŋtɔŋtɔ doɔ?

³ Denyi nyigbanhunhun ŋtɔŋtɔ ci yí danahɛn nu nu yí Agai xokɔ nuxu so o. Ewaɖeɔ, enunywiwo tonɔ so nyigbanhunhun cɛ mɛ. Yehowa ŋtɔ nu nɔ mì mɔ: “Nahunhun jukɔnwo pleŋ yí wowo nuveviwo ava; eyi nana ŋcikɔkɔɛ aɖɔ axwe cɛ mɛ.” (Agai 2:7, NWT) Gɔnmɛsese ci yí le nyɔnuɖɛ cɛ nu nɔ mɛ ciwo yí le agbe le Agai hwenuɔ? Yí gɔnmɛsese ci yí le nu nɔ mì gbɛɔ? Mìakpɔ ɖoŋci nɔ nyɔbiɔse cɛwo yí agbekpla lé mìawɛ ado alɔ jukɔnwo hunhunhundɔ lɔ le egbɛ mɛ.

4. Nyi yí taɖo Yehowa dɔ enyɔnuɖɛtɔ Agai ɖaɖa Yi jukɔn gbɔɔ?

⁴ Yehowa ɖo dɔ vevi ɖeka nɔ Agai. Bu tamɛ kpɔ so enu ci yí jɔ doŋkɔ nɔ ŋɛdu cɛ nu. Le exwe 537 D. Y. mɛɔ, Ʒuifu ɖekawo so le hwashigbe mɛ le Babiloni yí yikɔ Ʒerusalɛmu. Ewa mɔ Agai can le wo mɛ. Ci woɖo axwe dejinjin ɔ, Yehowa sɛntɔ egbejinɔtɔwo tɔ Yehowa xwe ci yí nyi gbedoxɔ lɔ cucu. (Ezra 3:8, 10) Vɔ dejinjin o cukaɖa ɖeka va. Yumɛcici na yí wogbɔjɔ yí mi gbedoxɔ lɔ cucu. (Ezra 4:4; Agai 1:1, 2) Eyi taɖo le exwe 520 D. Y. mɛɔ, Yehowa dɔ Agai mɔ yɛ le do zo lanmɛ nɔ Ʒuifu lɔwo nɔ woaɖe gbɔ nɔ gbedoxɔ lɔ. *—Ezra 6:14, 15.

5. Nyi yí taɖo Agai ŋɛdu lɔ ado ŋsɛn Mawu mɛwoɔ?

⁵ Tajinu ci yí le Agai ŋɛdu lɔ nu yí nyi mɔ ado ŋsɛn Ʒuifuwo xɔse do Yehowa nu. Enyɔnuɖɛtɔ lɔ sɔ dɔngbegbe nu nɔ Ʒuifu ciwo yí gbɔjɔ mɔ: “Yehowa nu mɔ: ‘Mísɛnŋ, míwo ciwo pleŋ yí le eju lɔ mɛ keŋ ayi edɔ lɔ ji. Ðo ŋle koɖo mí,’ Yehowa ahwakɔnwo tɔ yí nui.” (Agai 2:4, NWT) Nyɔgbe “Yehowa ahwakɔnwo tɔ” ado ŋsɛn Ʒuifuwo sugbɔ. Yehowa kpa acɛ do mawudɔlawo hwakɔn gangan ji, eyi taɖo Ʒuifuwo ɖo aɖoŋ do nu nɔ woji mɔ enuwo amlɛ nɔ yewo.

6. Nyi yí ato so jukɔnwo hunhunhun ci nu Agai xo nuxu so mɛɔ?

⁶ Yehowa dɔ Agai mɔ yɛ le nu nɔ Ʒuifuwo mɔ yejikɔ ahunhun jukɔnwo pleŋ. Ŋɛdu cɛ ci yí so Yehowa gbɔ do ŋsɛn Ʒuifu ciwo yí cukɔ gbedoxɔ lɔ mɔ Yehowa ahunhun Pɛsi ci yí kpa acɛ do xexeɛ pleŋ ji hwenɔnu. Nɔ éhunhun acɛkpakpa cɛ ɖe, nyi yí ato so mɛɔ? Ŋkɔtɔ, adɔ yí Mawu mɛwo aɖe gbɔ nɔ gbedoxɔ lɔ cucu. Evetɔ, ana yí Amɛmanyiʒuifuwo can abɔdo wo nu le Yehowa sɛnsɛn koɖo gbedoxɔ lɔ cucu mɛ. Ŋɛdu cɛ do ŋsɛn Mawu mɛwo sugbɔ!—Zak. 8:9.

7. Nyigbanhunhundɔ ci yí mìdokɔ alɔ le egbɛ mɛɔ? Ðe mɛ.

⁷ Gɔnmɛsese ci yí le Agai nyɔnuɖɛ lɔ mɛ nɔ mì le egbɛ mɛɔ? Yehowa gbehunhunkɔ jukɔnwo pleŋ yí mìwakɔ ɖe le edɔ cɛ mɛ. Bu nyɔ cɛ kpɔ: Le exwe 1914 mɛɔ, Yehowa ɖo Yesu yí enyi jeŋkwi mɛ Fyɔɖuxu lɔ Fyɔ. (Eha. 2:6) Ci Fyɔɖuxu cɛ tɔ acɛ kpakpaɔ, denyi eŋɛnywi nɔ xexeɛ mɛ cɛkpatɔwo o. Ecɛ dasɛ mɔ ‘jukɔnwo gaxoxo’ lɔ vɔ. Yi gɔnmɛ nyi mɔ hwenu ciwo mɛ yí Yehowa degbeɖo acɛkpakpa ɖe le nyigban ji yí esɔ yi fɔ ɖo te, vaɖo vɔvɔnu. (Luiki 21:24) Eyi taɖo so keke exwe 1919 mɛɔ, Yehowa mɛwo nunɔ nɔ amowo pleŋ mɔ Mawu Fyɔɖuxu ɖekɛ kpaŋ yí ahwlɛn agbetɔwo gan. ‘Fyɔɖuxu ŋɛnywi’ dradra lɔ hunhun xexe lɔ pleŋ.—Mt. 24:14.

8. Sɔ koɖo Ehajiji Wema 2:1-3 ɖe, lé jukɔn sugbɔtɔ wanɔ nu do ŋɛdu cɛ nu doɔ?

⁸ Lé amowo wanɔ nu do ŋɛdu lɔ nu doɔ? Sugbɔtɔ gbenɔ ŋɛdu cɛ. (Hlɛn Ehajiji Wema 2:1-3.) Jukɔnwo tɔ dɔmɛzi dodo. Wogbe mɔ yewodaxɔ mɛ ci Yehowa sɔ ɖo Fyɔ o. Wodekpɔnɔ Fyɔɖuxu ŋɛdu ci mìdrakɔ mɔ yɛnyi “eŋɛnywi” o. Ŋtɔkpu can ɔ, acɛkpakpa ɖewo ɖonɔ te mìwo kunuɖeɖedɔ lɔ! Acɛkpatɔ sugbɔ nunɔ mɔ yewole Mawu sɛnkɔ, gan wodeji mɔ yewoami acɛ kpakpa do amowo ji o. Eyi taɖo shigbe acɛkpatɔ ciwo yí le  Yesu hwenu nɛɔ, acɛkpatɔ egbɛtɔwo can fɔnnɔ gu do Amɛshiaminɔ Yehowa tɔ ji yí jenɔ yi dokplɔtɔ egbejinɔtɔwo ji.—Edɔ. 4:25-28.

9. Ci jukɔnwo dewa nu nywiɖe do ŋɛdu lɔ nu ɖe, lé Yehowa nu nɔ woɔ?

⁹ Ci jukɔnwo dewa nu nywiɖe do ŋɛdu cɛ nu ɖe, lé Yehowa nu nɔ woɔ? Ehajiji Wema 2:10-12 ɖo ŋci mɔ: “Eyi, míwo efyɔwo, mí nya ŋunu. Míwo amɛkplɔtɔwo pleŋ, mí kpla kplakpla cɛ. Mí na bubu [Yehowa] koɖo vɔnvɔn sugbɔ. Mí dasɛ mɔ mí do ji do Mawu Vi nu. Nɔ́ mí de wa ahan ɔ, Á do dɔmɛzi yí a trɔn mí. Amɛ ciwo yí kando Tɔhonɔ ji le jijɔ mɛ. Vɔ, amɛ kpɛtɛwo ɖo a wa blɛu. Tɔhonɔ le gbesɔsɔ yí a dasɛ Yi dɔmɛzi dodo.” Yehowa sɔ xomɛvu na gamɛ wo nɔ woasɔ gbeta nywi. Woatɛnŋ awa trɔtrɔ yí akplɔ Yehowa Fyɔɖuxu lɔ do. Vɔ gamɛ yikɔ. Mìle agbe “le ŋkeke vɔvɔwo mɛ” nɔ xexe cɛ. (2 Tim. 3:1; Ezai 61:2) Eʒan kpata ɖɛyɛ sɔwu sa mɔ amowo ajeshi nyɔnɔnwi lɔ yí asɔ gbeta asɛn Yehowa.

10. Lé amowo wa nu nywiɖe do nyigbanhunhundɔ ci nu Agai 2:7-9 xo nuxu soɔ?

¹⁰ Mɛɖewo wa nu do nyigbanhunhundɔ ci nu Agai xo nuxu so nywiɖe. Énu enu ci yí ato so nyigbanhunhundɔ cɛ mɛ yí mɔ, “jukɔnwo pleŋ nuveviwo [alo ejinywitɔwo] ava” sɛn Yehowa. * (Hlɛn Agai 2:7-9; NWT.) Ezai koɖo Mishe can nu ɖɛ mɔ ecɛ ajɔ le ‘ŋkeke vɔvɔwo mɛ.’—Ezai 2:2-4; Mis. 4:1, 2.

11. Ŋkɔtɔ ci nɔviŋsu ɖeka se Fyɔɖuxu ŋɛdu lɔ ɖe, lé ewa nu doɔ?

¹¹ Bu tamɛ kpɔ so enu ci nɔviŋsu Ken ci yí sumɔkɔ yɛ le mìwo Dɔwaxugan xexeɛ mɛ pleŋ tɔ wa ci ese ŋɛdu dojijɔnamɛ cɛ. Ékpɔtɔ ɖoɖoɔ ŋwi ŋkɔtɔ ci ese Fyɔɖuxu ŋɛdu lɔ nywiɖe, ewa exwe 40 yɛ. Ken nu mɔ: “Ŋkɔtɔ ci ŋse nyɔnɔnwi ci le Mawu Nyɔ lɔ mɛɔ, ŋkpɔ jijɔ sugbɔ ci ŋkpla  mɔ mìle agbe le ŋkeke vɔvɔwo mɛ nɔ xexe cɛ. Ŋvamɔŋje mɛ mɔ gbɔxwe anyi nu akpe nɔ Mawu yí nakpɔ agbe mavɔɔ, ŋdeɖo asɔ xexe cɛ ci mɛ enuwo trɔkɔ le gbɛmɛgbɛmɛ sɔ wa exlɔ o, vɔ ŋɖo anɔ Yehowa gbɔ goguiɖe. Zeɖekaɔ, ŋdo gbe ɖaɖa nɔ Yehowa yí so le xexe lɔ mɛ. Ŋmi enu dodo xexe lɔ nyɔwo mɛ yí vale Mawu Fyɔɖuxu lɔ ci yí aglɔn ta nɔŋ kpaxwe, ɖo ŋnya mɔ wodavahunhun yɛ o.”

12. Le ŋkeke vɔvɔwo mɛ ɖe, lé Yehowa gbɔngbɔn mɛ gbedoxɔ lɔ ɖɔ koɖo yi ŋcikɔkɔɛ doɔ?

¹² Eze petii mɔ Yehowa cukɔ shi nɔ yi mɛwo. Le ŋkeke cɛwo mɛɔ, mìkpɔ mɔ amɛ sugbɔ vatɔ sinsin. Le exwe 1914 mɛɔ, amɛ kotokun ɖewo kpoŋ yí mìnyi. Egbɛɔ, mìwu miliɔn amɛnyi yí sɛnkɔ Mawu koɖo ezolelanmɛ yí xweshiaxweɔ, amɛ miliɔn sugbɔ buwo vanɔnɔ ju koɖo mì le Eŋwiɖoɖo lɔ hwenu. Le emɔ cɛ nuɔ, gbadenu nɔ Yehowa gbɔngbɔn mɛ gbedoxɔ alo toto ci ewa nɔ sumɔsumɔ kɔkɔɛ lɔ ɖɔ koɖo “jukɔnwo pleŋ nuveviwo.” Gbesɔ kpe niɔ, nɔ amɛ yoyu lɔwo trɔ wowo gbenɔnɔ yí do amɛnyinyi yoyu lɔɔ, ehɛnnɔ kanfukanfu vɛ nɔ Yehowa.—Efe. 4:22-24.

13. Yehowa sɛntɔwo gbɔsusu ci yí na nyɔnuɖɛ buwo vakɔmɛɔ? (Kpɔ foto ci yí le akpa lɔ ji.)

¹³ Egbɔsusu gangan cɛwo na yí nyɔnuɖɛ buwo vakɔmɛ, ɖeka le Ezai eta 60 mɛ. Kpukpui 22 nɔ eta cɛ nu mɔ: “Xomu hwɛhwɛ a va trɔsun akɔta gangan. Xomu hwɛhwɛ a va trɔsun jukɔn ŋsɛntɔnɔ. Nɔ́ gamɛ lɔ nyɔ ɔ, Enyɛ Tɔhonɔ Na ɖeblɛ a va. Na dɔ yí enu hunnɔwo a jɔ doji.” Ci amɛ sugbɔ tɔ Yehowa sɛnsɛn ɔ, enudojijɔnamɛ ɖeka jɔkɔ. ‘Enuvevi’ cɛwo hɛnnɔ wowo nujikpekpe vovovowo va yí lɔn faa dranɔ “Fyɔɖuxu ŋɛnywi lɔ.” Ecɛ wɛ mɔ Yehowa mɛwo zankɔ enujikpekpe cɛwo ci Ezai yɔ mɔ “jukɔnwo nɔshu.” (Ezai 60:5, 16, NWT) To ŋsu koɖo nyɔnu vevi cɛwo kpekpedonu mɛɔ, woɖekɔ kunu le eju 240 mɛ yí wakɔ wemawo do egbe ciwo yí wu 1 000 mɛ.

14. Gbeta ci amowo ɖo asɔ le kakacɛ mɛɔ?

¹⁴ Le ŋkeke vɔvɔ cɛwo mɛɔ, jukɔnwo hunhunhundɔ lɔ ʒinkɔ amowo ji nɔ woasɔ  gbeta ɖeka. Woalɔn anɔ godu nɔ Mawu Fyɔɖuxu lɔa, alo woakando xexeɛ mɛ cɛkpakpawo ji? Gbeta vevi cɛ yí kpanŋkɔ mɛshiamɛ. Nyɔnɔnwi enyi mɔ Yehowa mɛwo wanɔ do eju ciwo mɛ wole sewo ji, vɔ wodedonɔ nu ejunyɔwo mɛ ɖeeɖe o. (Rɔm. 13:1-7) Wonya mɔ Mawu Fyɔɖuxu lɔ ɖekɛ kpaŋ yí akpɔ agbetɔ cukaɖawo gbɔ. Fyɔɖuxu cɛ deso xexe cɛ mɛ o.—Ʒan 18:36, 37.

15. Shigbe lé Enyɔdasɛ wema nui nɛ ɖe, lé woado egbejinɔnɔ Mawu mɛwo tɔ kpɔ doɔ?

¹⁵ Enyɔdasɛ wema dre lé woado egbejinɔnɔ Mawu mɛwo tɔ kpɔ do le ŋkeke vɔvɔwo mɛ. Dodokpɔ cɛwo ahɛn yumɛcici sɛnŋsɛnŋwo va mì ji. Xexe cɛ mɛ cɛkpatɔwo aji mɔ mìasumɔ yewo, woaci yumɛ nɔ mɛ ciwo yí gbe mɔ yewodanɔ godu nɔ wo o. (Enyɔ. 13:12, 15) “[Woatɛdo] amɛwo pleŋ ji, vihwɛ koɖo amɛshinshin, dɔkunɔwo koɖo wamɛnɔwo, amɛvovo koɖo hwashiwo, nɔ wo a xɔ jeshidu do wowo ɖushi gbecinu koɖo ŋgonu.” (Enyɔ. 13:16) Le sasa hwenuɔ, wowanɔ jeshi do hwashiwo nu keŋ asɔ dasɛ mɛ ci tɔ wonyi. Ahanke le egbɛ mɛɔ, woaji mɔ mɛɖekamɛɖeka axɔ jeshidu do alɔ alo ŋgonu le kpɔwɛnyɔnunu mɛ. Woaji mɔ mɛɖekamɛɖeka le dasɛ politiki kpaxwe ci ji ele to susu koɖo yi nuwanawo mɛ.

16. Nyi yí taɖo eʒan kpata mɔ mìado ŋsɛn egbejinɔnɔ mìwo tɔ nɔ Yehowa le kakacɛ mɛɔ?

¹⁶ Mìalɔn axɔ kpɔwɛ jeshidu cɛ yí anɔ godu nɔ xexeɛ mɛ cɛkpakpawoa? Mɛ ciwo yí agbe mɔ yewodaxɔ jeshidu cɛ ado go cukaɖawo yí wowo gbe aɖo afɔku mɛ. Enyɔdasɛ wema ɖe mɛ mɔ: “Mɛ ɖe da tɛnŋ xwle enu alo a sa enu jeshidu lɔ maɖo o.” (Enyɔ. 13:17) Vɔ shigbe lé Enyɔdasɛ 14:9, 10 nui nɛɔ, Mawu mɛwo nya enu ci Mawu jikɔ avacu koɖo mɛ ciwo yí ɖo jeshidu lɔ. Mawu mɛwo dalɔn axɔ jeshidu lɔ o, ale shigbe mɔ woŋwlɛ do wowo lɔwo nu mɔ “ŋ nyi [Yehowa] tɔ” nɛ. (Ezai 44:5) Hweyɛnu yí ele mɔ mìana egbejinɔnɔ mìwo tɔ nɔ Yehowa asɛnŋ. Nɔ mìwɛ ahan ɔ, eji ajɔ Yehowa yí anu mɔ mìnyi ye tɔ ye!

17. Nyi mìɖo aɖo ŋwi so Yehowa ʒinxododo nuɔ?

¹⁷ Yehowa dokɔ ʒinxo sugbɔ le ŋkeke vɔvɔ cɛwo mɛ. Deji mɔ mɛɖekɛ agu o. (2 Piɛ 3:9) Éhun mɔ nɔ mɛshiamɛ nɔ atrɔ ji mɛ yí asɔ gbeta keŋ asin. Vɔ Yehowa ʒinxododo ɖo sɛnxu. Mɛ ciwo yí gbe mɔ yewodanɔ godu nɔ Mawu Fyɔɖuxu lɔ akpɔ alɔzu ci hanwo Faraɔn kpɔ le Moizi hwenu. Yehowa nu nɔ Faraɔn mɔ: “Ŋ tɛnŋ zan Anyi hlɔnhlɔn yí a do edɔ̀ ci yí a ɖe eo koɖo ao mɛwo so xexe cɛ mɛ. Vɔ, Ŋ sɔ eo daɖo elɛ do enu ɖeka ŋci. Ŋ sɔ eo daɖo elɛ yí a tɛnŋ dasɛ Anyi hlɔnhlɔn nɔ eo. Eyi, amɛwo le xexe lɔ pleŋ mɛ a kplanu so Ŋ nu!” (Hun. 9:15, 16) Jukɔnwo pleŋ avanya mɔ Yehowa ɖekɛ yí nyi Mawu adodwi lɔ. (Eze. 38:23) Lé ecɛ ajɔ doɔ?

18. (a) Jukɔnwo hunhunhun alɔkpa bu ci nu Agai 2:20-22 xo nuxu soɔ? (b) Lé mìwɛ yí nya mɔ Agai nyɔwo agbejɔ le esɔ mɛɔ?

¹⁸ Ci Agai ku exwe sanŋdi nɛniɖe goduɔ, apotru Pɔlu ŋwlɛ nu ɖaɖa Kristotɔ Ebretɔwo mɔ enyɔ ciwo yí le Agai 2:20-22 mɛ agbejɔ le esɔ mɛ. (Hlin.) Pɔlu ŋwlɛ mɔ: “Evyɛ ɔ, É tagbe mɔ, ‘Na gbe hunhun nyigban ke. Vɔ, Na gbe hunhun jeŋkwi can hɛnnɛ.’ Gɔnmɛ sese nɔ ‘Na gbe hunhun enu’ dasɛ . . . mɔ enushanu ci yí wo wa ɔ, wo a trɔn. Enu hunnɔwo nyi enu ciwo yí wo a tɛnŋ hunhun. Enu ciwo  yí wo da tɛnŋ hunhun ɖekɛwo yí a kpɔtɔ li.” (Ebre. 12:26, 27) Nyigbanhunhun cɛ to akpo nɔ nyigbanhunhun ci nu Agai 2:7 xo nuxu so. Nyigbanhunhun cɛ dasɛ mɔ mɛ ciwo yí le shigbe Faraɔn nɛ yí gbe mɔ yewodaxɔ gbe mɔ Yehowa yí je akpa acɛɔ, woagu wo gbijigbiji.

19. Nyi wodahunhun ɔ, yí lé mìwɛ yí nyaɔ?

¹⁹ Nyi wodahunhun ɔ, yí nyi wodaɖe siɔ? Pɔlu yi nyɔ lɔ ji mɔ: “Mì ɖo a do akpe do mìwo fyɔju ci mɛ wo da tɛnŋ hunhun o. Mì ɖo a do akpe, yí a sɛn Mawu le emɔ ci yí akpe ni ji. Mì ɖo a sin koɖo bubu koɖo vɔnvɔn.” (Ebre. 12:28) Ɛɛ, nɔ wohunhun jukɔnwo kpɛtɛkpɛtɛɔ, Mawu Fyɔɖuxu lɔ ɖekɛ kpaŋ yí acuin. Akpɔtɔ anɔ fini ele mahwanmahwan!—Eha. 110:5, 6; Dan. 2:44.

20. Gbeta ci amowo ɖo asɔɔ, yí lé mìakpedo wo nu doɔ?

²⁰ Mìdeɖo agu gamɛ o! Amowo ɖo asɔ gbeta ɖeka: nɔ womɔ xexe lɔ do yewoakplɔɔ, woagu wo. Vɔ nɔ wosɔ gbeta mɔ yewoasɛn Yehowa yí wa trɔtrɔwo le yewo gbe mɛ keŋ awa yi droɔ, woakpɔ agbe mavɔ. (Ebre. 12:25) Nɔ mìɖekɔ kunu nɔ amowoɔ, mìatɛnŋ akpedo wo nu nɔ woasɔ gbeta vevi cɛ. Le vamɛ mɔ mìakpedo amɛ sugbɔ nu nɔ woasɔ gbeta yí anɔ godu nɔ Mawu Fyɔɖuxu lɔ. Le vamɛ hɛnnɛ mɔ mìaɖonɔ ŋwi mìwo Xwetɔ Yesu nyɔ cɛwo gashiagamɛ. Émɔ: “Wo a dra Mawu fyɔju ŋɛnywi lɔ le xexe lɔ pleŋ mɛ, yí a sɔ ɖe kunu nɔ jukɔn lɔwo pleŋ. Hwehunnɔnu yí vɔvɔɛnu lɔ a va ɖo.”—Mt. 24:14.