1, 2. Бизим дөврүмүзлә бағлы һансы мәҹази силкәләнмә пејғәмбәрлик олунуб?

 «БИР нечә дәгигә ичиндә мағазалар, көһнә биналар јерлә јексан олду. Һамыны тәлаш бүрүмүшдү... Ҹамаат дејирди ки, зәлзәлә һарадаса ики дәгигә чәкиб, амма мәнә бир өмүр кими ҝәлмишди». Бу, 2015-ҹи илдә Непалда баш вермиш зәлзәләдә сағ галмыш бир нәфәрин сөзләридир. Әҝәр сизин башыныза белә бир дәһшәтли һадисә ҝәлибсә, чәтин ки ону унудасыныз.

² Амма бизим јашадығымыз бу дөврдә башга нөв зәлзәлә баш верир. Бунун нәтиҹәсиндә тәкҹә бир шәһәр, јахуд бир өлкә јох, бүтүн «халглар силкәләнир» вә бу, узун мүддәтдир ки давам едир. Бу силкәләнмәнин баш верәҹәји һагда Һәггај пејғәмбәрлик етмишди. О јазмышды: «Ордулар Аллаһы Јеһова дејир: “Аз галыб, јери вә ҝөјү, дәнизи вә гуруну бир дә силкәләјәҹәјәм”» (Һәг. 2:6).

3. Мәҹази силкәләнмә һәгиги зәлзәләдән нә илә фәргләнир?

³ Һәггај һәгиги зәлзәләдә баш верән вә мәһвдән башга бир шеј ҝәтирмәјән силкәләнмәдән данышмыр. Онун данышдығы силкәләнмә ҝөзәл нәтиҹәләр ҝәтирир. Јеһова дејир: «Бүтүн халглары силкәләјәҹәјәм. Халгларын ләл-ҹәваһири ҝәләҹәк вә Мән бу еви әзәмәтлә долдураҹағам» (Һәг. 2:7). Бу пејғәмбәрлик Һәггајын дөврүндә јашајан инсанлар үчүн һансы әһәмијјәти дашыјырды? Бәс бизләр үчүн һансы мәнаны кәсб едир? Бу мәгаләдә бу суалларын ҹавабыны тапаҹағыг. Һәмчинин өјрәнәҹәјик ки, «халгларын силкәләнмәси» ишинә биз неҹә төһфә верә биләрик.

4. Јеһова Һәггај пејғәмбәри халгынын јанына нәјә ҝөрә ҝөндәрди?

⁴ Јеһова Һәггај пејғәмбәрә ваҹиб бир тапшырыг вермишди.  Ҝәлин бундан өнҹә баш верән һадисәләрә нәзәр салаг. Бөјүк еһтимал ки, Һәггај ерамыздан әввәл 537-ҹи илдә Бабилдән Јерусәлимә гајыдан әсирләрин арасында иди. Вәтәнә чатандан сонра чох кечмәмиш бу садиг инсанлар голларыны чирмәләјиб Јеһованын евинин, мәбәдин тәмәлини гојду (Үзр. 3:8, 10). Амма чох кечмәмиш вәзијјәт писләшди. Мүгавимәтлә үзләшдикләри үчүн онларын әлләри ишдән сојуду вә тикинтини дајандырдылар (Үзр. 4:4; Һәг. 1:1, 2). Она ҝөрә дә ерамыздан әввәл 520-ҹи илдә Јеһова Һәггаја бујурду ки, халгын шөвгүнү аловландырсын вә онлары мәбәдин тикинтисини битирмәјә тәшвиг етсин * (Үзр. 6:14, 15).

5. Нәјә әсасән демәк олар ки, Һәггајын сөзләри Аллаһын халгыны үрәкләндирмишди?

⁵ Һәггајын бәјан етдији хәбәр јәһудиләрин Јеһоваја иманыны мөһкәмләндирмәк үчүн иди. Пејғәмбәр ҹәсарәтлә руһдан дүшмүш јәһудиләрә нөвбәти сөзләри дејир: «Јеһова бәјан едир: “Еј мәмләкәт әһли, мәрд олун вә ишләјин!” Ордулар Аллаһы Јеһова бәјан едир: “Мән сизинләјәм!”» (Һәг. 2:4). Шүбһәсиз ки, «ордулар Аллаһы Јеһова» ифадәси онлары үрәкләндирмишди. Ахы Јеһованын әмри алтында мәләкләрдән ибарәт нәһәнҝ орду вар. Она ҝөрә дә јәһудиләр иши баша чатдырмаг үчүн Јеһоваја бел бағламалы идиләр.

6. Һәггајын пејғәмбәрлик етдији силкәләнмәнин нәтиҹәсиндә нә баш верәҹәкди?

⁶ Јеһова Һәггаја бујурмушду ки, бүтүн халгларын мәҹази мәнада силкәләнәҹәјини бәјан етсин. Бу пејғәмбәрлик тикинтидән әлләри сојујан јәһудиләри үрәкләндирди ки, Јеһова Фарс империјасыны, һәмин дөврдә чохлу халглары өз табелијинә салан бу гүдрәтли һөкумәти силкәләјәҹәк. Бәс бунун нәтиҹәсиндә нә олаҹагды? Әввәла, Аллаһын халгы мәбәдин тикинтисини баша чатдыраҹагды. Даһа сонра һәтта гејри-јәһудиләр дә онлара гошулуб бәрпа олунмуш мәбәддә Јеһоваја ибадәт едәҹәкди. Бу, Аллаһын халгы үчүн чох руһландырыҹы хәбәр иди! (Зәк. 8:9).

7. Бу ҝүн биз һансы силкәләнмә ишиндә иштирак едирик? Изаһ един.

⁷ Һәггајын пејғәмбәрлији бу ҝүн бизим үчүн һансы мәнаны кәсб едир? Јеһова јенә дә бүтүн халглары силкәләјир, амма бу дәфә бу ишдә биз иштирак едирик. Ҝәлин дүшүнәк. 1914-ҹү илдә Јеһова Иса Мәсиһи сәмави Падшаһлығынын Падшаһы тәјин етди (Зәб. 2:6). Падшаһлығын гурулмасы дүнја һөкумәтләри үчүн бәд хәбәр иди. Бу о демәк иди ки, «халглара верилән вахт», башга сөзлә, Јеһованы тәмсил едән һөкмдарын олмадығы дөвр сона чатыб (Лука 21:24). Бундан ирәли ҝәләрәк, хүсусилә дә 1919-ҹу илдән бәри Јеһованын халгы Падшаһлығын бәшәријјәтин јеҝанә үмид јери олдуғуну бәјан едир. «Падшаһлыг һаггындакы бу мүждә» бүтүн дүнјаны силкәләјир (Мәт. 24:14).

8. Зәбур 2:1—3 ајәләринә әсасән, әксәр халглар тәблиғ етдијимиз хәбәрә неҹә јанашыр?

⁸ Бәс инсанлар буна неҹә мүнасибәт ҝөстәрир? Әксәријјәт бу хәбәри гәбул етмир. (Зәбур 2:1—3 ајәләрини охујун.) Халглар вурнухур, онлар Јеһованын мәсһ етдији Һөкмдары гәбул етмирләр. Ајдындыр ки, онлар Падшаһлыг һагда тәблиғ етдијимиз хәбәрин «мүждә» олдуғуну дүшүнмүрләр. Һәтта бәзи һөкумәтләр  өз әразиләриндә тәблиғ фәалијјәтимизи гадаған едиб! Бу халгларын башчыларынын чоху Аллаһа ибадәт етдикләрини иддиа етсәләр дә, өз сәлаһијјәтләриндән ваз кечмәк истәмирләр. Биринҹи әсрдәки кими, бу ҝүн дә һөкмдарлар Исанын садиг давамчыларына һүҹум едирләр, бунунла онлар Исаја, Јеһованын мәсһ етдијинә гаршы чыхмыш олурлар (Һәв. 4:25—28).

9. Јеһова халгларын мәнфи мүнасибәтинә неҹә јанашыр?

⁹ Јеһова халгларын бу ҹүр мәнфи мүнасибәтинә неҹә јанашыр? Зәбур 2:10—12 ајәләри бу суала ҹаваб верир: «Инди, еј падшаһлар, дүшүнүн, еј јер үзүнүн һакимләри, ағлынызы башыныза јығын, Јеһовадан горхун вә Она хидмәт един, Онун өнүндә титрәјәрәк севинин. Оғула еһтирам ҝөстәрин ки, Аллаһ гәзәбләнмәсин, сиз дә ҝетдијиниз јолда мәһв олмајасыныз, чүнки Онун гәзәби гәфил алышар. Нә хошбәхтдир Она пәнаһ ҝәтирәнләр!» Хејирхаһ Аллаһ Јеһова бу әлејһдарлара дүзҝүн гәрар вермәләри үчүн мүәјјән гәдәр вахт верир. Һәлә ки онларын фикирләрини дәјишиб, Јеһованын Падшаһлығыны гәбул етмәк имканлары вар. Амма онлара верилән вахт битмәк үзрәдир, чүнки биз «ахырзаманда» јашајырыг (2 Тим. 3:1; Әшј. 61:2). Инди инсанларын һәгигәти билиб, дүзҝүн гәрар вермәләри һеч вахт олмадығы гәдәр тәҹилидир.

10. Һәггај 2:7—9 ајәләриндә силкәләнмә ишинә мүсбәт мүнасибәтлә бағлы нә дејилир?

¹⁰ Һәггајын пејғәмбәрлик етдији мәҹази силкәләнмәјә бәзи инсанлар мүсбәт гаршылыг верир. Һәггај демишди ки, бу силкәләнмәнин нәтиҹәсиндә «халгларын ләл-ҹәваһири», јәни сәмими гәлбли инсанлар Јеһоваја ибадәт едәҹәк *. (Һәггај 2:7—9 ајәләрини охујун.) Һәм Әшија, һәм дә Микә пејғәмбәр «заманын сонунда» белә бир шејин баш верәҹәјини  пејғәмбәрлик етмишди (Әшј. 2:2—4; Мик. 4:1, 2).

11. Бир гардаш илк дәфә Падшаһлыг һагда хәбәри ешидәндә буна неҹә јанашмышды?

¹¹ Ҝәлин ҝөрәк баш идарәдә хидмәт едән Кен адлы гардаш халглары силкәләјән хәбәри ешидәндә буна неҹә јанашмышды. Хош хәбәри илк дәфә ешитдији вахтдан тәхминән 40 ил кечсә дә, о, һәмин дөврү јахшы хатырлајыр. Кен дејир: «Аллаһын Кәламы һагда һәгигәти илк дәфә ешидәндә елә севинирдим ки, биз бу шәр дүнјанын сонунда јашајырыг. Баша дүшдүм ки, Аллаһын разылығыны газанмаг вә әбәди һәјат мүкафатыны алмаг үчүн бу дүнјанын ишләринә гарышмамалыјам вә гәти шәкилдә Јеһованын тәрәфини тутмалыјам. Јеһоваја дуа етдим вә дәрһал бу аддымы атдым. Бу дүнјадан ајрылыб, сарсылмаз олан Аллаһын Падшаһлығына пәнаһ апардым».

12. Ахырзаманда Јеһованын мәбәди әзәмәтлә неҹә долур?

¹² Ачыг-ајдын ҝөрүнүр ки, Јеһова халгындан разыдыр. Ахырзаман әрзиндә Она ибадәт едән инсанларын сајынын неҹә артдығыны ҝөрүрүк. 1914-ҹү илдә сајымыз ҹәми бир нечә мин иди. Инди исә Аллаһын сәккиз милјондан чох фәал хидмәтчиси вар. Үстәлик, һәр ил Иса Мәсиһин өлүмүнү анма мәрасиминдә бизимлә бирҝә милјонларла инсан иштирак едир. Бу јолла Јеһованын руһани мәбәдинин (пак ибадәт үчүн тәшкил етдији гурулуш) јерүзү һәјәти «халгларын ләл-ҹәваһири» илә долур. Һәмчинин бу инсанлар јени шәхсијјәтә бүрүндүкҹә Јеһованын ады уҹалыр (Ефес. 4:22—24).

13. Башга һансы пејғәмбәрликләр јеринә јетир? (Үз габығындакы шәклә бахын.)

¹³ Әлдә олунан бу мөһтәшәм наилијјәтләр сајәсиндә диҝәр пејғәмбәрликләр дә јеринә јетир. Мәсәлән, Әшија 60-ҹы фәсилдә гејд олунан пејғәмбәрлик. 22-ҹи ајәдә јазылыб: «Ән кичијиндән мин нәфәр, ән балаҹасындан гүдрәтли халг төрәјәҹәк. Мән Јеһова вахты јетишәндә бу иши сүрәтләндирәҹәјәм». Инсанларын һәгиги ибадәтә ахышмасы сајәсиндә һејрәтамиз бир шеј баш верир. Бу «ләл-ҹәваһирләр» Јеһованын халгына гошуларкән Падшаһлыг һагда  мүждәни бәјан етмәк әзми илә јанашы, мүхтәлиф баҹарыглары вә габилијјәтләри илә ҝәлирләр. Нәтиҹәдә, Јеһованын халгы Әшија пејғәмбәрин «халгларын сүдү» адландырдығы бу баҹарыглардан фајдалана билир (Әшј. 60:5, 16). «Ләл-ҹәваһир» олан бу киши вә гадынларын көмәји илә 240 өлкәдә тәблиғ иши ҝедир вә 1000-дән чох дилдә нәшрләр дәрҹ олунур.

14. Һал-һазырда инсанлар һансы гәрары вермәлидир?

¹⁴ Јашадығымыз ахырзаманда «халглары силкәләјән» хәбәрин тәблиғи инсанлары гәрар гаршысында гојур. Онлар Аллаһын Падшаһлығынын тәрәфини тутаҹаглар, јохса дүнја һөкумәтләринә бел бағлајаҹаглар? Бу гәрары һәр кәс вермәлидир. Јеһованын хидмәтчиләри јашадыглары өлкәнин ганунуна табе олсалар да, бу дүнјанын сијаси ишләриндә тамамилә битәрәфдирләр (Ром. 13:1—7). Онлар билир ки, јалныз Аллаһын Падшаһлығы бәшәријјәтин проблемләрини һәлл етмәјә гадирдир. Аллаһын Падшаһлығы исә бу дүнјадан дејил (Јәһ. 18:36, 37).

15. «Вәһј» китабында һансы ҝүҹлү сынагдан данышылыр?

¹⁵ «Вәһј» китабында Аллаһын халгынын ахырзаманда сәдагәтинин сынанмасы һагда јазылыб. Бу сынаг өзү илә шиддәтли тәгибләр ҝәтирмәјә давам едәҹәк. Бу дүнјанын сијаси системи бундан сонра да биздән там сәдагәт тәләб етмәјә вә онлары дәстәкләмәјәнләри тәгиб етмәјә давам едәҹәк (Вәһј 13:12, 15). Онлар «бүтүн инсанлары — кичикләри вә бөјүкләри, варлылары вә касыблары, азадлары вә гуллары сағ әлләринә вә ја алынларына нишан гојдурмаға» мәҹбур едәҹәк (Вәһј 13:16). Гәдим дөврдә гуллара кимә аид олдуғуну ҝөстәрән дамға вурулурду. Ејнилә бизим дөврүмүздә дә һәр кәсдән әлләринә вә алынларына мәҹази нишаны гојдурмалары ҝөзләниләҹәк. Онларын һәм фикирләри, һәм дә әмәлләри сијаси системә мәхсус олдугларыны вә ону дәстәкләдикләрини ҝөстәрәҹәк.

16. Нәјә ҝөрә инди Јеһоваја сәдагәтимизи мөһкәмләндирмәк олдугҹа ваҹибдир?

¹⁶ Биз һөкумәтләрә сәдагәти ҝөстәрән бу мәҹази нишаны гәбул едәҹәјик? Бу нишандан имтина едәнләр чәтинликләрлә вә тәһлүкәләрлә үзләшәҹәкләр. «Вәһј» китабында даһа сонра дејилир: «Үзәриндә бу вәһши һејванын нишаны... олмајан адам алгы-сатгы едә [билмәз]» (Вәһј 13:17). Амма Аллаһын халгы бу нишана саһиб оланларын агибәтини билир (Вәһј 14:9, 10). Она ҝөрә дә Аллаһын халгы бу нишаны дашымајаҹаг. Онларын әлиндә, бир нөв, «Јеһоваја мәхсусам» нишаны олаҹаг (Әшј. 44:5). Инди Јеһоваја сәдагәтимизин мөһкәмлијинә әмин олмаг вахтыдыр. Онда Јеһова бөјүк мәмнунијјәтлә Она мәхсус олдуғумузу бәјан едәҹәк!

17. Јеһованын сәбри илә бағлы нәји унутмамалыјыг?

¹⁷ Јеһова ахырзаманда бөјүк сәбир ҝөстәрир. О, һеч кәсин мәһв олмасыны истәмир (2 Бут. 3:9). О, һәр кәсә төвбә едиб дүзҝүн гәрар вермәк үчүн вахт вериб. Амма Онун сәбринин һәдди вар. Бу фүрсәти дәјәрләндирмәјәнләр Муса пејғәмбәрин дөврүндә јашајан фиронун ҝүнүнә дүшәҹәк. Јеһова фирона демишди: «Истәсәјдим, чохдан әлими галдырыб сәни дә, халгыны да азара салар, көкүнүзү јер үзүндән кәсәрдим. Амма сәни она ҝөрә сағ сахладым ки, сәнә ҝүҹүмү ҝөстәрим вә бүтүн дүнја адымы ешитсин» (Чых. 9:15, 16). Сонда бүтүн халглар биләҹәк ки, Јеһова  вар олан јеҝанә Аллаһдыр (Һизг. 38:23). Бу неҹә баш верәҹәк?

18. а) Һәггај 2:6, 20—22 ајәләриндә башга һансы силкәләнмәдән сөһбәт ҝедир? б) Һәггајын сөзләринин ҝәләҹәкдә дә јеринә јетәҹәјини һарадан билирик?

¹⁸ Һәггај 2:6, 20—22 ајәләрини охујун. Һәггајдан әсрләр сонра јашајан һәвари Булус Аллаһдан илһам алараг гејд етмишди ки, бу сөзләр ҝәләҹәкдә дә јеринә јетәҹәк. Булус јазмышды: «О, белә вәд едир: “Бир дә силкәләјәҹәјәм, өзү дә тәк јери јох, ҝөјү дә силкәләјәҹәјәм”. “Бир дә” ифадәси ҝөстәрир ки, Аллаһ тәрәфиндән јарадылмамыш, силкәләнән шејләр јох едиләҹәк. Беләҹә, силкәләнмәмиш шејләр галаҹаг» (Ибр. 12:26, 27). Бу силкәләнмә Һәггај 2:7 ајәсиндә јазылан силкәләнмәдән фәргләнир. Бу силкәләнмә заманы о кәсләр ки, фирон кими, Аллаһын һакимијјәт сүрмәјә һаггы чатдығыны гәбул етмир, әбәдилик мәһв олаҹаг.

19. Нә силкәләнмәмиш галаҹаг вә буну һарадан билирик?

¹⁹ Нә силкәләнмәјәҹәк, башга сөзлә, јох едилмәјәҹәк? Булус сөзүнә давам едир: «Силкәләнмәз бир Падшаһлыг алаҹағымызы биләрәк, ҝәлин бундан сонра да Аллаһын лүтфүнү алаг, ахы биз бу лүтф сајәсиндә, горху вә дәрин еһтирамла Аллаһа Онун бәјәндији тәрздә гуллуг едә биләрик» (Ибр. 12:28). Бәли, сонунҹу силкәләнмә битәндән сонра јалныз Аллаһын Падшаһлығы силкәләнмәмиш галаҹаг. О, јериндә сарсылмаз дураҹаг! (Зәб. 110:5, 6; Дән. 2:44).

20. Инсанлар һансы сечими етмәлидир вә биз бу саһәдә онлара неҹә көмәк едә биләрик?

²⁰ Инди вахт итирмәк олмаз! Инсанлар сечим етмәлидир: ја онлар бу дүнјанын ашыладығы һәјат тәрзини дәстәкләмәјә давам едиб, мәһвә уғрајаҹаглар, ја да һәјат тәрзләринин Аллаһа мәгбул олмасы үчүн лазыми дәјишикликләр едиб, әбәди һәјата говушаҹаглар (Ибр. 12:25). Тәблиғ етмәклә инсанлара бу мүһүм гәрары вермәкдә көмәк едирик. Ҝәлин әлимиздән ҝәләни едәк ки, даһа чох «ләл-ҹәваһир» Аллаһын Падшаһлығынын тәрәфини тутсун. Һәмчинин Ағамыз Иса Мәсиһин сөзләрини јадда сахлајаг: «Падшаһлыг һаггындакы бу мүждә халгларын һамысына шәһадәт олсун дејә, бүтүн јер үзүндә тәблиғ едиләҹәк вә сон о вахт ҝәләҹәк» (Мәт. 24:14).