1, 2. Ka luwuyeri ánhingichuni le lunbei lasuseredun lidan wadaani?

“LIDAN fiu minutu, aba tagululudun burí chapu tuma burí binadu muna íñutu aban tárigiñe aban”. “Wagagounga burí gürigia lau aban lanarime tueirin anigi [...]. Ariñagatiña saragu gürigia fiúrügüñein lan minutu lidura, anhein au laganóun nun lǘntima lan”. Ítara liña giñe hariñagun hádangiñe gürigia ha esefurubaña lídangiñe hárabaganali le ánhingichubalin ageiraü Nepal lidan irumu 2015. Lun hamuga wásügürün lídangiñe aban sügǘ libe lira hénrengubei hamuga woun wabulieiduni.

² Uguñe weyu, sun wagía wawinwanduña amu luwuyeri lánhingichuniwa ubóu, aban ánhingichuni le mámarügü lidan aban uburugu lasusereda ni lidan aban ageiraü. Lánhingichuñein Heowá sun néchani ubouagu, ani barǘ hali saragu irumu adügei. Ítara liña lariñaguni Bungiu liyumulugugiñe Ahéu: “Málühali anhein adadagaragüda nan sielu luma ubóu, barana luma múa le derebugubei” (Ahéu 2:6).

3. Ida liña amu lan adadagaragüdüni le uágubei layanuhan Ahéu luéi hárabaganali?

³ Amu ánhingichuni le uágubei layanuhan Ahéu lugundun barüti saragu buiti mítaranti kei hárabaganali le anügübei saragu günringuaü. Heowá guánarügü ariñagubei: “Nadadagaragüdübaña sun néchanigu, ábame hayabin lau harisin, ábame tabuinchun nitenpulun lau uéiriguni” (Ahéu 2:7). Ka mini lubéi profesía le houn gürigia ha awinwandubaña lidan lidaani Ahéu? Ani ka mini lubéi woun uguñe weyu? Wóunabubei álügüdahani le lídanbei aturiahani le ani warihibei giñe ida luba lan wídehan lidan hadadagaragüdüniwa néchanigu.

4. Ka uagu lóunahei Heowá profeta Ahéu?

⁴ Aba líchugun Heowá aban dasi súdiniti lun Ahéu. Ariha waméi ka lan uagu. Másiñati Ahéu lan aban hádangiñe gürigia ha agiribudubaña Babilóniagiñe lun Herusaléun lidan irumu 537 lubaragiñe lidaani Kristu. Murusun dan lárigiñe hachülürün lubúeingu Bungiu úaraguatiña ha aba hábununi tugudina ténpulu to luban Heowá (Ésüd. 3:8, 10). Ma lirun, aba hagagibudagun luma óuchawaguni, aba labürühan harüna ani aba hígiruni wadagimanu (Ésüd. 4:4; Ahéu 1:1, 2). Ligíati, lidan irumu 520 lubaragiñe lidaani Kristu, aba líchuguni Heowá dasi lun Ahéu lun líchugun dǘgüdaguaü houn gürigia luma lun línchahaniña agumuchoun ténpulu * (Ésüd. 6:14, 15).

5. Ka meha uagu ru lubéi uganu le líchugubei Ahéu dǘgüdaguaü houn lumutuniña Bungiu?

⁵ Le meha lébunabei uganu le líchugubei Ahéu lun meha lederebudagüdüni hafiñen huríu luagu Heowá. Lau ganigi aba lariñaguni profeta le dimurei le houn ha ábürühabaña harüna: “Gaguraasun huma huguya lílana fulasu. Huádigimarida ladüga anahein huma” (Ahéu 2:4). Másiñati ru lan dimurei “Suntigabafu”, saragu dǘgüdaguaü houn. Anhein meha busén habéi lun buidu lan lidin houn mosu meha hafiñerun luagu Heowá, le gámabei saragu míñunu ánheligu.

6. Kaba meha ladüga ánhingichuni le uágubei layanuhan Ahéu?

⁶ Aba lariñagun Heowá lun Ahéu ladadagaragüdübaña lan sun néchanigu lidan amu igaburi. Lidan arufudúni le chóurugüda lumuti houn ha ígirubalin haransehanu ténpulu lánhingichaali lan Heowá ageiraü Pérüsia, ageiraü le gabafutimabei ubouagu dan ligía. Kaba meha lanüga ánhingichuni le? Luagu le aban oubaü hagumuchubei meha lumutuniña Bungiu haransehanu ténpulu. Luagu le ábaya oubaü, hóundaraguba meha gürigia ha mama huríu lun háhuduragun lun Heowá tidan ténpulu to aransehouboun. Chóuruti uganu lan meha ligía aban lan uganu lánina dǘgüdaguaü houn lumutuniña Bungiu (Sak. 8:9).

7. Ka dasi wadügübei lidan lagumuhóun dan le?

⁷ Ka mini lubéi profesía le lariñagubei Ahéu uguñe weyu? Ábanya wéiyaasu lánhingichuñanu Heowá néchanigu, ani lidan dan le wídehaña úara lidan hánhigichuniwa néchanigu. Samina wamá luagu le: Lidan irumu 1914, aba líchuguni Heowá Hesusu lun ligía lan urúei lidan Larúeihan Bungiu (Sal. 2:6). Houn gumadimatiña ubouagu, aban luriban uganu lagumeserun Larúeihan Bungiu. Mini lan lira gúnfulihali “lan hadaani néchanigu”, gumuha harúeihani gumadimatiña ubóu (Luk. 21:24). Lidan sun le, hau lumutuniña Heowá ariñaga houn gürigia, lúmagiñe irumu 1919 luágurügüñein lan Larúeiha Bungiu gayara lan hemenigidun gürigia. Hingí laali dasi lánina lapurichihóun “uganu buiti le luáguti larúeihan Bungiu” sun ubóu (Mat. 24:14).

8. Según Sálumu 2:1-3, ida liña hóunabun saragu hádangiñe néchanigu lun uganu le?

⁸ Ida liña hóunabun gürigia lun uganu le? Hiibe agei gürigia wuribati hóunabun lun uganu le (aliiha huméi Sálumu 2:1-3). Chagagu haña néchanigu ibidiñeti houn kaba lan hadüga. Máhatiña lun hánharun lun urúei le írida laalibei Heowá. Mafiñentiña luagu “uganu buiti le luáguti larúeihan Bungiu” le wapurichihabei. Ani añahein burí gumadimatiña máhaaña lun burí wapurichihan. Íbini saragu lan hádangiñe gumadimatiña ha ariñagatiña  heseriwiduña lan lun Bungiu, máhatiña hígiruni habafu ni hagumadihan. Ítara kei meha lidan lidaani Hesusu, uguñe weyu ebedaaguatiña lun urúei le lanúadirubei Heowá ani éibaaha hamutiña lubúeingu Heowá ha úaraguabaña (Adü. 4:25-28).

9. Ida liña lóunabun Heowá dan le larihini luriban hóunabun néchanigu?

⁹ Ida liña lóunabun Heowá dan le larihini luriban hóunabun néchanigu? Ariñagati Sálumu 2:10-12: “Guentoti aganba humá, huguya urúeigu hama agumadihatiña ubouagu; furendei huméi arufudahani le buidu! Ru humá uéiriguni lun Aburemei lau ugundani luma inebesei bulugua humá adadagareina ligibugiñe, gáñidügüliñein, ábameti hóunwegun ǘmada, ladüga ménrengunti lun lagañidun. Fuleseiwatiña ha afiñebaña luagu!”. Buiti ligaburi Heowá ruti dan houn ebedaagutiña ha lun hasansiruni hagaburi luma lun hánharun lun Larúeihan. Agumuchagueina liña dan. Ani wawinwanduña lidan “lagumuhóun dan” (2 Tim. 3:1; Isa. 61:2). Sügǘ luéi amu dan megei hamuti gürigia hasubudiruni inarüni luma lun hanúadirun houdin luéigiñe lóubadina Heowá.

10. Según Ahéu 2:7-9, kaba asusereda ladüga lubuidun hóunabun gürigia lun ánhingichuni?

¹⁰ Luwuyeri ánhingichuni le úagubei layanuhan Ahéu ligía ánhingichuni le lunbei ladügün buiti houn fiu gürigia. Afuranguagüda lumuti le lunbei lanügüni ánhingichuni le,“ábame hayabin lau harisin [o irisini, mini lan dimurei le, hayabiba lan gürigia ha harumabaña anigi] ábame tabuinchun nitenpulun lau uéiriguni” lun háhuduragun lun Heowá. (aliiha huméi Ahéu 2:7-9). * Ariñaga lumuti giñe Isaíasi luma Mikeasi lasusereduba lan lira lidan “lagumuhóun dan” (Isa. 2:2-4; Mik. 4:1, 2).

11. Ka ladügübei aban íbiri dan le laganbunbalin luagu furumiñeti wéiyaasu uganu luáguti Larúeiha Bungiu?

¹¹ Ariha waméi ida liña lan lánhingiruni lubuidun uganu le aban íbiri gíriti Ken, le eseriwidubei tidan Áfisi Hani Gefentiña luagu Heowá  to Arihiboun lau Apurichihani lidan sun Ubóu. Sügühali kei burí 40 irumu lúmagiñe laganbun íbiri le luagu Larúeihan Bungiu luagu furumiñeti wéiyaasu, gama lumoun, aritagua lágili kamá hamuga wurinouga. Ariñagati: “Dan le naganbunbalin inarüni tuáguti Lererun Bungiu, gúndaatina lau nasubudiruni wawinwanduña lan lidan lagumuhóun dan. Gunfuranda numuti lun lan lagundaarun Bungiu nau luma lun neresibiruni ibagari magumuchaditi, lunti lan náfuridun lídangiñe lagübüri ubóu le luma lun nidin luéigiñe lóubadina Heowá. Aba nafurieidun lau lóufudagun. Aba nígiruni ubóu le nanagangiñe aba nárügüdün luagu Larúeihan Bungiu le siñabei lánhingichun”.

12. Ida liña tabuinchun litenpulun Bungiu lau uéiriguni lidan lagumuhóun dan le?

¹² Furanguti larihin labiniruñanu lan Heowá lumutuniña. Ariha wamuti lidan lagumuhóun dan le, haganwounduña lan gürigia ha áhuduragubaña lun Heowá. Lidan meha irumu 1914 fiurügüñadiwa meha milu. Ani guentó lóugiñehadiwa widü míñunu, lubúeingu Bungiu adügei dasi le ani sagü irumu hóundaragun saragu míñunu wamóun lun waritaguni Ladinerun Aburemei. Ítara liñati, labuichagüdünun irisini le hani néchanigu tibürürün litenpulun Heowá to yaaboun ubouagu, to arufudubalin sun le ladügübei lun gayara lan wáhuduragun lun lau lubudubu. Asansiruni le hadügübei gürigia ha da le hadaürün aban iseri igaburi ruti giñe uéiriguni lun liri Heowá (Efe. 4:22-24).

13. Ka amu profesía agunfulirubalin sügǘ burí le? (Ariha humoun iyawaü to luáguboun tidan garüdia).

¹³ Gúnfuliti giñe sügǘ burí le ámuya profesía, kei burí le lídanbei Isaíasi kapítulu 60. Ariñagati bérusu 22: “Ha míbebañaha, hóustaruba milu; bianraü gürigia ha, ábanbaña óunwenbu néchani. Au Aburemeibei, nadügüba lun lasuseredun furese, danme lachülürün dan ligía”. Adügati hebelurun sun gürigia ha hamoun lumutuniña Bungiu, lun lasuseredun aban katei buiti: irisini gebegiti le barüti ámuñegueinarügü iyaraani lúmagua luma lubuidun igaburi lun hóundarun hamoun ha apurichihabalin “uganu buiti luáguti Larúeihan Bungiu”. Adügati le lun hayusuruni lumutuniña Bungiu iyaraani le hawagubei le uágubei layanuha Isaíasi, le ítarabei kamá hamuga “lubuidun agei heigin” (Isa. 60:5, 16). Lau hídehan wügüriña luma  hídehan würiña gebegitiña ha, lapurichihóuña lidan 240 ageiraü luma fulasu, ani tadügǘña agumeiraguagüdüni lidan lóugiñe 1.000 iñeñein.

14. Ka lunbei hanúadiruni gürigia uguñe weyu? (Ariha humóun iyawaü to luáguboun tidáü garüdia).

¹⁴ Lidan lagumuhóun dan le, adügati hánhingichuniwa néchani lúntima lan hanúadirun sun gürigia kaba lan uéigiñe óubadinaü houdin: “hídehaba san luma Larúeihan Bungiu, o hafiñeruba hawagu gumadimatiña ha yáabaña ubouagu? Lau sun gaganbadi hamá lubúeingu Bungiu lun lilurudun ageiraü le ñein lubéi hawinwanda, mádaraguntiña houngua lidoun katei lánina polítika (Rom. 13:1-7). Subudi hamuti le lan láranibei turobuli le ubouagubei Larúeihan lan Bungiu, ani mama ubouaguna Larúeiha Bungiu (Huan 18:36, 37).

15. Ka lanarime óuchawaguni lánina úaraguni uágubei tayanuhan líburu to gíriboun Arufudúni?

¹⁵ Afuranguagüdawati tidan líburu to gíriboun Arufudúni lidan lanme lagumuhóun dan lóuchawaguba lan hafiñen lumutuniña Bungiu. Mini lan lira wasigiruba lan asufurira lanarime éibaahouni ani háluahaba lan hararamuni weseriwidun lun Bungiu. Hadügüdaruba urúeigu ubouaguna lun weseriwidun houn ani heibahabaña ha amahaduntiña heseriwidun houn (Aruf. 13:12, 15). Ani hadügüba giñe “lun sun lan gürigia wéinamuhaña, ñǘbürigiña, rísitiña, gudemetiña, idamuni, mama idamuni lun lichugún aban makü luagu háhabu le hóunwenren o luagu lan herebe ” (Aruf. 13:16). Lidan meha binadu dan, rúwati meha aban makü hawagun idamuni lun lasubudiruniwa kátaña lan haburiñabaña. Ítarameme, lidan wadaani agurabuwati giñe lun ñein lan aban kamá hamuga makü luagu hahabun gürigia o hereberugu. Lidan amu dimurei, agurabuwati harufudun sun gürigia ubouagu luagu le hadügübei luma luagu le hasaminarubei luagu luéigiñeñanu lan hóubadina urúeigu ubouaguna.

16. Ka uagu mosu lubéi wederebudagüdüni úaragua wamá lun Heowá lau lóufudagun?

¹⁶ Ánheinti wagía kaba wadüga? Wánharuba san lun makü le, ani ru wameime wídehan houn gumadimatiña ubouaguna? Ha lúnbaña hamahadun lun makü le hagagibudaguba dandu luma denchaü kei luma lénrengunga. Sigitu líburu Arufudúni ariñaga úati “ni aban gayaraati lagañeihan ni kata ni lalugurahan anhein ua lumakün mónsturu” luagu (Aruf. 13:17). Gama lumoun, subudi hamuti lubúeingu Bungiu le lunbei ladügüni Bungiu houn ha láubaña makü le (Aruf. 14:9, 10). Ligíati, ha manügübalin makü ligía ítara haña kamá hamuga bürüwañu liña luagu hahabun: “Lumegen Bungiu” (Isa. 44:5). Anihán dan lun wachoururuni úaraguabadiwa lan lun Heowá le tímatimaati. Ánhawa adügei ítara, gúndaabei lau lariñagun lánigu wamá.

17. Ka lunbei waritaguni luagu luguraasun Heowá?

¹⁷ Arufudaali Heowá saragu gaguraasuni lidan lagumuhóun dan le. Ani mabusenrunti lun leferidirun ni aban hádangiñe gürigia (2 Fe. 3:9). Ru hali saragu chansi houn sun gürigia lun hasakürihan luma lun hanúadirun buidu. Gama lumoun gébehati luguraasun. Ha amaharubaña lun chansi le hadariraguba houngua kei ladariragun faraón lungua lidan lidaani Moisesi. Ariñagati Moisesi lun urúei ehiptuna: “Gayaraati hamugatia larufuduni lubafu bun, lau lasufuriragüdünibu hau sun bumutuniña láurügü aban igei, ani gumuguaadibu hamuga ubouagugiñe gama lumoun lígirunbalibu lun babagaridun, lun barihini lubafu, luma lun lasubudiraguagüdün lungua lidan sun ubóu” (Afu. 9:15, 16). Lidan lagumuhóun dan hasubudirubei néchanigu luagu Heowarügüñein lan  Bungiu inarüniti (Ese. 38:23). Ida luba lasuseredun le?

18. a) Ka amu luwuyeri ánhingichuni uágubei layanuhan Ahéu 2:6, 20-22? b) Ida liña wasubudiruni ámuñegüba lan lagunfulira dimurei le lariñagubei Ahéu?

¹⁸ Saragu sígulu lárigiñe lounwen Ahéu, arufuda lumuti meha apostolu Pábulu lau lídehan Bungiu dimurei lan le wadarirubei lidan Ahéu 2:6, 20-22 lagunfuliruba lan ámuñegü (aliiha huméi). Abürühati Pábulu: “Ánheinti guentó lariñahare: ‘Nadadagaragüdayabei mámarügü ubóu, íbini giñe sielu’. Dan le lariñagun ‘nadadagaragüdayabei’, mini lan luagu lagidarúba lan burí katei le márügüdünbei luagu ebu derebuguti, ábame lerederun le siñabei lánhingichuniwa” (Ebü. 12:26, 27). Amu luéi ánhingichuni le íridunbei lidan Ahéu 2:7, ánhingichuni le, mini lan hagünrinchawagun lun sun dan ha amaharubaña hasubudiruni Heowá lan garichabei lun larúeiha, ítara kei lasuseredun lun faraón.

19. Kaba magünrinchawagun ani ida liña wasubudiruni?

¹⁹ Kaba mánhingichun o kaba magidarun? Sigiti Pábulu ariñaga: “Arúeihani le líchugubei Bungiu woun siñati lánhingichun. Ru wamá lubeiti eteingiruni lun Bungiu luagu lira, hudugua wamá lun lau inebesei luma gúnfuli keisi labusenrun” (Ebü. 12:28). Danme lásügürün lagumuhóun óunwenbu ánhingichuni, Larúeihanrügüba Bungiu eredera rara sin lánhingichuniwa (Sal. 110:5, 6; Dan. 2:44).

20. Ka lunbei hanúadiruni gürigia, ani ida luba wíderaguniña?

²⁰ Úati dan lun leferidirun. Mosu hanúadirun gürigia kaba lan uéigiñe óubadinaü houdin. Wasigiruba san áyeihei ligaburi hawinwandun gürigia ha línchahaña ubóu le, le lunbei lágunrinchawagun? O wadügüba asansiruni le mégeiwabei lun gayara lan wánwinwandu según lugundan Bungiu luma lun weresibirun ibagari magumuchaditi? (Ebü. 12:25). Lau lapurichihóuniwa wíderaguaña gürigia lun hadügüni anúadiruni le súdinitimabei. Ligíati, sigí wama ídeha lun lidin katei le gebegitimabei luéigiñe lóubadina Larúeiha Bungiu. Ani gabaroun waméi súnwandan, dimurei le lariñagubei Wabureme Hesusu: “Lapurichihóuba uganu buiti le luáguti larúeihan Bungiu lidan sun ubóu lun lasubudirúniwa lidan sun fulasu; ligíaalimeti lagumuchun ubóu” (Mat. 24:14).