1-2. Ifa ewe chchech ewe soufós Akai a erá epwe fis lón ach ei fansoun?

IEI alon ekkóch iir mi manawewu seni eú chechchechin fénú mi fis lón Nepal lón ewe 2015: “Lón chék fitu minich, ekkewe imw watte minen lóóm ra poputá le tatiw. Meinisin ra chék rúké . . . Chómmóng aramas ra erá eli a fis ren chék ruu minich. Nge me rei, usun a kon ttam.” Ika a fis ngonuk ena sókkun mettóch mi eniwokkus, neman esap fókkun name sonuk.

² Iwe nge iei, a fiffis eú sókkun chchech lón chómmóng telinimw are fénú. Jiowa a kan áchechcha meinisin ekkewe mwúún fénúfan. A fen féfféri ena ren fite fite ier. Ewe soufós Akai a fen oesini usun ena mettóch. A makkeei: “Iei alon ewe Samol mi Unusen Manaman, ‘Mürin fansoun mochomoch üpwe achechasefäli läng me fanüfan, pwal matau me fanüpwas.’”​—Ak. 2:6.

3. Ifa usun ewe chchech Akai a fós usun a sókko seni wesewesen eú chchechin fénú?

³ Ewe chchech Akai a fós usun esap usun eú wesewesen chchechin fénú mi atoto tatakkis. Nge a fen efisi minne mi múrinné. Iei pwisin alon Jiowa ngenikich: “Üpwe amwökütükütü mwün fanüfan meinisin, wöür meinisin epwe tori ei leni, üpwe pwal aurala ei Imwenfel ren ling.” (Ak. 2:7) Met weween ena oesini ngeni chókkewe iir mi manaw lón fansoun Akai we? Me met weween ngenikich lón ei fansoun? Sipwe pwóróus wóón pélúwen ekkena kapas eis, me sipwe pwal káé ifa usun sipwe álillis lón ena angangen amwékútúkútú ekkewe mwú lón ei fansoun.

4. Pwata Jiowa a tiinaaló ewe soufós Akai ngeni Néún kewe aramas?

⁴ Jiowa a ewisa ngeni ewe soufós Akai eú wis mi fókkun aúchea. Ekieki met a fis me mwen ena. Ese mwáál Akai i emén me lein chókkewe iir mi liwiniti Jerusalem lón ewe ier 537 mwen Kraist, seni ar eoló lón Papilon. Ekiseló chék mwirin án néún Jiowa kana chón angang mi tuppwél wareiti Jerusalem, ra poputááni kaúún imwen Jiowa we, are ewe imwenfel. (Esr. 3:8, 10) Nge ekiseló chék mwirin ena, och mettóch mi elichippúng a fis. Ra úkútiw le aúetá ewe imwenfel pokiten ra niwokkus ren án chón oputer ú ngeniir. (Esr. 4:4; Ak. 1:1, 2) Ina minne, lón ewe ier 520 mwen Kraist, Jiowa a ewisa ngeni Akai an epwe ló álisi ekkewe chón Jus le tinikkensefál le áwesaaló angangen ewe imwenfel. *​—Esr. 6:14, 15.

5. Met popun alon Akai we a alúkúlúkú néún Kot kewe aramas?

⁵ Minne Akai a uwei ngeni ekkewe chón Jus, a apéchékkúla ar lúkúlúk wóón Jiowa. Fán pwora, ena soufós a atoura alon Jiowa ngeni ekkena chón Jus mi lichippúng: “Oupwe apworachokemi, . . . ämi aramasen ei fanü meinisin. Oupwe angang, pun ngang üpwe etikemi.” (Ak. 2:4) Ese mwáál alon Jiowa kana a fókkun alúkúlúkúúr. A wor án Jiowa watteen mwichen soufiu lón láng fán an emmwen. Ina popun, a lamot án ekkena chón Jus repwe lúkúlúk wóón I ren ar repwe sópwéch.

6. Met epwe fis ren án Akai we oesini usun ewe angangen amwékútúkútú ekkewe mwú?

⁶ Jiowa a tiinaaló Akai pwe epwe ereni ekkewe chón Jus pwe epwe amwékútúkútú meinisin ekkewe mwú. Kúnaian na a alúkúlúkú ekkewe chón Jus mi lichippúng me úkútiw le aú ewe imwenfel. A pwal pwári pwe Jiowa epwe amwékútúkútú ewe mwúún Persia, ewe mwú mi nemeni chómmóng mwú lón ena atun. Iwe met mwirilóón ena angangen áchechcha ekkena mwú? Akkomw, néún Kot kewe aramas repwe áwesi kaúún ewe imwenfel. Mwirin, pwal mwo nge ekkewe esap iir chón Jus repwe fitiir le fel ngeni Jiowa lón ena imwenfel mi kaúsefál. Ena pwóróus a fókkun apéchékkúla néún Kot kewe aramas!​—Sek. 8:9.

7. Ifa ewe angangen áchechcha mwúún fénúfan sia tongeni álillis lón, lón ei fansoun? Áweweei.

⁷ Met weween án Akai we oesini fán itach lón ei fansoun? Jiowa a pwal áchechchasefáli ekkewe mwú meinisin, nge lón ei atun sia álillis lón ena angang. Ekieki ei pwóróus. Lón ewe 1914, Jiowa a seikaatá Jesus Kraist an epwe Kingen ewe Mwú lón láng. (Kölf. 2:6) Poputáán ena nemenem lón láng a ina eú pwóróus mi eletipechou ngeni ekkewe sounemenemen fénúfan. A wewe ngeni pwe “fansoun än chon lükün Israel nemenem” a wes. Ina ewe atun ese wor sounemenem mi tupuni Jiowa. (Luk. 21:24) Ina popun, ákkáeúin seni ewe ier 1919, néún Jiowa kewe aramas ra afalafala ngeni meinisin pwe an we chék Mwú, ina ewe ápilúkúlúk fán iter. Ena angangen afalafala “Pworausen Manau usun ewe Mwün Kot,” a fen áchechcha unusen fénúfan.​—Mat. 24:14.

8. Met meefien lape ngeni chón ekkewe mwú ren ewe pwóróus sia uwei ngeniir me ren Kölfel 2:1-3?

⁸ Met meefien aramas ren ena pwóróus sia uwei? Lape ngeniir, rese mochen etiwa. (Álleani Kölfel 2:1-3.) Ekkewe mwú ra song. Rese mochen etiwa ewe Sounemenem Jiowa  a fen seikaatá. Rese ekieki pwe pwóróusen ewe Mwú sia afalafala, ina eú “Pworausen Manau.” Nge ekkóch mwú ra pwal mwo nge pinei ewe angangen afalafal. Inaamwo ika chómmóng me lein ekkena sounemenem ra erá pwe ra angang ngeni Kot, nge rese mochen fangetááni ar péchékkúlen nemenem. Ekkewe sounemenem lón ei fansoun ra usun ekkewe sounemenem lón fansoun Jesus we. Ra ú ngeni néún Jiowa we mi kepit ren ar eriáfféwú chókkewe mi tuppwél le tapweló mwirin.​—Föf. 4:25-28.

9. Met Jiowa a féri ngeni chón ekkewe mwú rese mochen etiwa ewe pwóróus sia uwei?

⁹ Met Jiowa a féri ngeni chón ekkewe mwú rese mochen etiwa ewe pwóróus sia uwei? Kölfel 2:10-12 a erá: “Iei mine ämi kana king, oupwe tipachemela, ämi sounemenem won fanüfan, oupwe miritila. Oupwe angang ngeni ewe Samol mi Lapalap fän niuokus, oupwe pwapwa fän chechech. Oupwe mitiri ewe nau pwe esap song, nge ämi ousap mäfeiengau. Pun a müttir fis an song. Ra feiöch ir meinisin mi eäni i lenien op.” Jiowa a kirekiréch me mut ngeniir fansoun ar repwe eáni kefil mi atoto manaw. Ra chúen tongeni siwili ar ekiek me filatá ika repwe etiwa án Jiowa we Mwú. Iwe nge, ese chúen naf fansoun pokiten sia manaw lón “ekewe ränin lesopolan” ei ótót. (2 Tim. 3:1; Ais. 61:2) A fókkun atapwalapwal án aramas repwe silei ewe enlet me filatá le angang ngeni Jiowa.

10. Ifa ewe mettóch mi múrinné a fis Akai 2:7-9 a áweweei usun, seni ewe angangen amwékútúkútú mwúún fénúfan?

¹⁰ Ekkóch aramas ra etiwa ewe angangen amwékútúkútú mwúún fénúfan ewe ewe soufós Akai a oesini usun. A erenikich pwe iei met epwe fis ren ena angang, “wöür meinisin [chókkewe mi letipwenechar] epwe tori ei leni” pwe repwe fel ngeni Jiowa. * (Álleani Akai 2:7-9.) Aisea me Mika ra pwal oesini pwe epwe fis ena lón ekkewe “fansoun sopolan.”​—Ais. 2:2-4; Mik. 4:1, 2.

11. Met emén Chón Kraist mwán a féri atun a kerán rong pwóróusen án Kot we Mwú?

 ¹¹ Iei pwóróusen emén Chón Kraist mwán itan Ken, mi angang lón ewe ofesilap lón New York atun a kerán rong ewe pwóróus mi ámmeseik. A unusen chemeni atun a kerán rong pwóróusen ewe Mwúún Kot lón ina epwe 40 ier a ló. Iei alon: “Atun ua kerán rong ewe enlet seni án Kot we Kapas, ua fókkun pwapwa le silei pwe sia manaw lón ekkewe ránin lesópwólóón ei ótót. Ua weweiti pwe ren án Kot epwe pwapwa rei me ai upwe kúna ewe manaw esemuch, a lamot ai usap pekini ei fénúfan mi núkúnúkúngaw me upwe úppós le nóm wóón pekin Jiowa. Ua iótek ngeni Jiowa me ina met ua féri. Ua úkútiw le álisatá mwékútúkútún ei fénúfan me mwittir etiwa ewe túmún fán án Kot we Mwú, ewe Mwú ese tongeni mwékút.”

12. Ifa usun án Jiowa we imwenfel lón pekin ngún a ur ren ling atun ekkeei ránin lesópwólóón?

¹² A fókkun ffat pwe Jiowa a ekkefeiéchú néún kewe aramas. Sia kúkkúna lón ekkeei ránin lesópwólóón lalapólóón chóchóón chókkewe iir mi fel ngeni. Lón ewe 1914, kich úchék fitengeréú. Nge iei, a tori lap seni walu million chókkewe iir mi achocho le feffel ngeni Kot, me a pwal wor fite million ra fitikich iteiten ier le féri Áchechchemen Málóón Jesus we. Ren ena wewe, kiánin án Jiowa we imwenfel lón pekin ngún mi wewe ngeni kókkótun ewe fel mi enlet, a ur ren ‘wöün meinisin’ mwúún fénúfan. Iten Jiowa we a pwal lingeló atun chókkana ra féri siwil lón manawer me ákkeáni ekkewe napanap mi fé.​—Ef. 4:22-24.

13. Pwal ikkefa ekkóch oesini ra pwénútá ren ekkewe mettóch mi amwarar ra fiffis? (Ppii ewe sasing wóón péén.)

¹³ Ekkewe mettóch mi amwarar ra fis, ra apwénúetá pwal ekkóch oesini, usun chék ewe mi mak lón Aisea sópwun 60. Wokisin 22 a apasa: “Ewe mi tekison leimi epwe wiliti eu cho, nge ewe mi kis epwe wiliti eu mwü mi pöchökül. Ngang ewe Samol mi Lapalap, üpwe müttir apwönüetä ai pwon lon fansoun üa filätä.” Pokiten a chóchchómmóngóló chókkewe mi poputá le fel ngeni Jiowa, a pwal fis och mettóch mi amwarar. Chókkana iir mi wewe ngeni ‘wöü,’ ra sipeéch lón chómmóng mettóch, me ra tipemecheres le afalafala  “ewe Pworausen Manau usun ewe Mwün Kot.” Mwirilóón, néún Jiowa kana aramas ra tongeni áeá tufichiir kana, ewe Aisea a áweweei pwe iir usun “wöün ekewe mwü.” (Ais. 60:5, 16) Ren álillisin ekkena mwán me fefin mi aúchea, ewe angangen afalafal a tori 240 fénú me a kawor néúch kewe puk lón lap seni 1,000 fós.

14. Ifa ewe kefil a lamot án aramas repwe filatá lón ei fansoun?

¹⁴ Lón ei fansoun sópwólóón, ewe angangen amwékútúkútú ekkewe mwú a efisi án aramas repwe filatá met repwe féri. Itá repwe álisatá ewe Mwúún Kot, are repwe lúkúlúk wóón ekkewe mwúún fénúfan? Ina eú kefil a lamot án meinisin repwe féri. Ikaamwo néún Jiowa kewe aramas ra álleasochisi allúkún ewe mwú ra nóm ie, nge rese fókkun angolong lón mwékútúkútún politics. (Rom 13:1-7) Ra silei pwe ewe Mwúún Kot chék, ina ewe epwe enletin ataweei án aramas kewe osukosuk. Ena Mwú ese pop seni ei fénúfan.​—Joh. 18:36, 37.

15. Ifa ewe watteen sóssótun tuppwél ewe puken Pwärätä a áweweei?

¹⁵ Ewe puken Pwärätä a áweweei eú sóssótun tuppwél néún Kot kewe aramas repwe kúna lón ekkewe ránin lesópwólóón. Ena sóssót epwe sópwósópwóló me epwe atoto watteen koput me riáfféúmwáál wóóch. Ekkewe mwúún fénúfan repwe mochen ach sipwe unusen peni mwúúr kewe me repwe eriáfféwú chókkewe rese mochen álisiiretá. (Pwär. 13:12, 15) Repwe “pöchökül ngeni aramas meinisin, ngeni ekewe aramas lap me ekewe aramas kis, ekewe chon pisekisek me ekewe chon wöüngau, ekewe chon ngas me ekewe amanau pwe repwe eäni eu asisil won pöüifichiir ika won chamwer.” (Pwär. 13:16) A wor eú esissil wóón ekkewe slave lón fansoun lóóm mi pwári ika ié néúr masta. A pwal ina usun lón ei fansoun, aramas ra mochen án meinisin repwe pwári ika ié ra álisatá. Ra mochen án meinisin repwe pwári lón ar ekiek me féffér pwe ra chóni me álisatá mwékútúkútún mwúún fénúfan.

16. Pwata a atapwalapwal ach sipwe alapaaló ach tuppwél ngeni Jiowa lón ei fansoun?

¹⁶ Itá sipwe etiwa ena esissil lón kapas áwewe me álisatá ekkewe mwúún fénúfan? Chókkewe rese mochen eáni ena esissil repwe kúna riáfféú me tolong lón feiengaw. Iei met ewe puken Pwärätä a apasa: “Esap wor eman a tongeni kamö och ika amömö are esap eäni ei asisil.” (Pwär. 13:17) Nge néún Kot kewe aramas ra silei met epwe féri ngeni chókkewe iir mi eáni ewe esissil mi mak lón Pwärätä 14:9, 10. Rese mochen etiwa ena esissil, nge usun itá ra makkeetiw wóón péúr, “ngang nöün ewe Samol mi Lapalap.” (Ais. 44:5) Iei ewe fansoun ach sipwe nochchei an epwe lapóló ach tuppwél ngeni Jiowa. Ika sia féri ena, iwe Jiowa epwe pwapwa le erá pwe kich néún!

17. Met a lamot sipwe chemeni usun án Jiowa mosonottam?

¹⁷ Jiowa a fen pwári watteen an mosonottam lón ekkeei ránin lesópwólóón. Ese mochen án emén epwe péútmwááliló. (2 Pet. 3:9) A fen awora ngeni meinisin fansoun ar repwe aier me filatá le angang ngeni. Nge a aúkúk an mosonottam. Epwe fis ngeni chókkewe rese mochen álisatá Mwúún Kot we minne a fis ngeni Farao lón fansoun Moses we. Iei alon Jiowa ngeni Farao: “Üa fen tongeni aitiela pei o afeiengauok me noum kewe aramas ren mätter, pwe manauemi epwe müchüla me won fanüfan. Nge üa mwüt ngonuk pwe kopwe manau tori ikenai, pwe üpwe  pwäri ngonuk ai manaman, pwe itei epwe föüla won unusen fanüfan.” (Eks. 9:15, 16) Iwe, ekkewe mwú meinisin repwe silei pwe Jiowa i chék ewe Kot mi enlet. (Is. 38:23) Ifa usun epwe fis ena?

18. (a) Pwal ifa ewe eú angangen áchechcha fénúfan Akai 2:6, 20-22 a áweweei usun? (b) Ifa usun sia silei pwe alon Akai kewe repwe pwénúetá lón mwachkkan?

¹⁸ Fitepúkú ier mwirin málóón Akai, aposel Paulus a mak ngeni ekkewe chón Ipru Chón Kraist pwe minne a mak lón Akai 2:6, 20-22, epwe pwénútá lón fansoun mwer. (Álleani.) A makkeei: “Iei a pwon, ‘Pwal fän eu üpwe achechecha fanüfan, nge sap fanüfan chök pwe pwal läng.’ Ewe kapas ‘pwal fän eu’ a pwärätä pwe ekewe mettoch mi för repwe chechech o morola, pwe ekewe mettoch resap tongeni chechech repwe nonomola.” (Ipru 12:26, 27) Ena angangen áchechcha fénúfan a sókko seni ewe mi mak lón Akai 2:7, pún ena angangen áchechcha fénúfan a wewe ngeni pwe chókkewe mi usun Farao rese mochen etiwa án Jiowa pwúúng le nemenem, repwe máfóchófóch.

19. Met ewe esap tongeni mwékút, me pwata sia silei?

¹⁹ Ifa ewe mettóch ese wor met a tongeni áchechcha are amwékútú? Aposel Paulus a erá: “Ousipwe kilisou, pun sia mwüni eu mwü esap tongeni siwil. Ousipwe kilisou o fel ngeni Kot fän suföl me menin lon eu lapalap i epwe pwapwa ren.” (Ipru 12:28) Mwirin ewe sáingoon angangen áchechcha fénúfan, Mwúún Kot we chék epwe nónnóm. Epwe chék nónnóm lón leenian!​—Kölf. 110:5, 6; Tan. 2:44.

20. Ifa ewe kefil a lamot án aramas repwe féri, me ifa usun sia tongeni álisiir?

²⁰ Esap iei ewe atun sipwe olusaaló fansoun! A lamot án aramas repwe filatá met repwe féri. Ika repwe filatá le sópweló le penaatá ei fénúfan, repwe ninniiló. Ika ra filatá le angang ngeni Jiowa me ekkesiwili manawer ren ar repwe féri letipan, iwe repwe kúna manaw esemuch. (Ipru 12:25) Ewe angangen afalafal a tongeni álisi aramas lón ena kefil mi aúchea. Amwo sipwe álisi chómmóng ekkena aramas mi aúchea ar repwe filatá le álisatá ewe Mwúún Kot. Amwo sipwe chechchemeni alon ach we Samol Jesus ei: “Aramas repwe afalafalafeili ewe Pworausen Manau usun ewe Mwün Kot won unusen fanüfan, pwe epwe eu minen pwärätä ngeni aramas meinisin. Mürin epwapw tori fansoun sopolan.”​—Mat. 24:14.