1-2. Amchea disam vixim Haggai provadian kitem boroun dovorlam?

2015 VORSA, Nepal-ant ek bhuimkamp zalo. Tea bhuimkampantlean salvar zalole thodde lok oxem sangtale: “Soglo lok bhielo . . . To bhuimkamp fokot donuch minttancho aslo mhunn lok sangtale, punn mhaka zalear to kabaruch zaina oxem dislem.” Ani thodde mhunnttale: “Thoddeach minttam bhitor dukanam ani porneo bilddingo kosllon kabar zaleo.” Tumi oslea bhirankull poristhiticho fuddo kel’lo zalear tumi tem sompeponnim visorchimnant.

² Aiz fokot ekuch xar vo raxttr nhoi, punn hea prithumer aslolim soglim raxttram eka bhuimkampant zata toxim haltat. Hem ek veglle torechem halovop zaun asa, jem Jehova zaitea vorsam thaun korta. Hea vixim Haggai provadian adim fuddem boroun dovorlam. Tannem boroilem: “Sorvsoktivont Sorvespor oxem sangta: matxea vellan, sorg ani prithum, doria ani suki zomin Hanv thorthoraunk vetam.”—Hag. 2:6.

3. Haggai-an sanglolem thorthoravop vo haloxem korop eka bhuimkampa poros vegllem mhunn ami kiteak mhunnonk zata?

³ Haggai uloitalo tem thorthoravop vo haloxem korop eka bhuimkampa poros vegllem zaun asa. Tem fokot nisonnttonuch haddina punn tacho boro porinnam-ui zata. Karonn Haggai 2:7-ant, Jehova oxem sangta: “Sogllim raxttram foddfoddaitolom ani sogllea raxttranchim bhanddaram vhanvun ietolim, ani hem Dev-mondir mhoimen bhortolom.” (Hag. 2:7) Tor Haggai-achea disamnim him utram koxim purnn zalim, amchea disamnim tim koxim purnn zatat ani hea kamant ami koso bhag gheunk zata tem ami hea lekhant polloitolim.

4. Jehova Devan, Haggai provadiak kitem korunk dhaddlo?

⁴ Haggai-an sondex porgottunk suru kel’lo tednam thoinchi poristhiti koxi asli tem atam ami polloum-ia. 537 K.X.A-ant koidi aslole visvaxi Judev, Babilona thaun Jeruzaleant porot aile tednam tannim rokddench Jehovachem mondir porot bandunk buniad ghatli. (Ezra 3:8, 10) Tednam ghoddie Haggai pasun tanche borabor aslo. Punn uprant tankam virodh ailo tednam niraxi zaun tannim hem kam bond dovorlem. (Ezra 4:4; Hag. 1:1, 2) Tor 520 K.X.A-ant, hea niraxi zal’lea lokank urba diunk ani tannim bond dovorlolem kam porot suru korunk Jehova Devan, Haggai provadiak dhaddlo. *—Ezra 6:14, 15.

5. Haggai-achea sondexantlean niraxi zal’lea Judevank dhir kiteak mell’llo astolo?

⁵ Apleacher aslolo bhavarth ghott korunk Jehova Devan Haggai provadiak niraxi zal’lea Judevank ho sondex diunk dhaddlo. Tor Haggai provadian dhiran tankam oxem sanglem: “Desantlea sogllea loka, tumchem kalliz ghott dhorat! uloita to Sorvespor! Vavrak lagat! Tumchea sangata hanv asam – uloita to Sorvsoktivont Sorvespor!” (Hag. 2:4) Hea utrantlean tea Judevank khorench dhir mell’llo astolo. Jehovachea odhikara khal ainzanchi ek vhodd fouz asa dekhun tannim hem korunk Jehovacher patieun ravonk zai aslem.

6. Jehova Dev soglim raxttram haloxim kortolo tednam tacho porinnam kitem zatolo mhunn Judevank kollon ailem?

⁶ Jehova Devan, Haggai provadiak dil’lea sondexant to eka orthan soglim raxttram foddfoddaitolo vo haloxim kortolo mhunn sanglem. Tor tea tempa voilea choddxea desancher razvottki choloitolea Persiechea raxttrak Jehova Dev haloxem kortolo mhunn Judevank kollon ailem. Hea vorvim, tim Devmondir bandpachem kam korun sompoitolim ani tem bandun zalea uprant her raxttrantle lok tanchea sangata Jehovachi bhokti kortole mhunn tankam khatri mell’lli. Ho sondex aikon tankam khorench dhir mell’llo astolo.—Zek. 8:9.

7. Aiz Jehova amkam uzar korun soglim raxttram koso foddfoddaita? Somzaiat.

⁷ Haggai-achi bhasaunni amchea disamnim koxi purnn zata? Hea vixim chintat. 1914-nt, Jehova Devan Jezuk aplea sorginchea Rajeacho Raza nemlo. (St. 2:6) Ani tednam “videxiancho kall” somplo. (Lukas 21:24) Videxiancho kall mhunnche to kall, jednam Jehovacho prothinidi mhunn konnuch raza naslo. Tor Devachem Raj suru zalam hem sonvsarachea razank ek bori khobor nasli. Punn 1919-a thaun Jehovache Sakxi soglea lokank, fokot Devachench Raj boreponn haddunk xokta mhunn porgottit asat. Tor “sorginchea Rajeachem xubhvortoman” porgott korchea kamant amkam uzar korun, Jehova ak’khea sonvsarak foddfoddaita.—Mt. 24:14.

8. Stotr 2:1-3-a pormonnem, ami porgott’ttat ti bori khobor aiz choddxim raxttram koxi lekhtat?

⁸ Punn aiz choddxe lok Devachea Rajeachi bori khobor ani tea Rajeachea Razak nakartat. (Stotr 2:1-3 vachat.) Ani zoxem Jezuchea disamnim tannim Devachea Makhloleacho virodh kelo, toxench aiz pasun raxttram ragar zaun Devachea visvaxi sevokancher akromonn kortat ani tanchea kamacher bondi haddttat. (Itihas 4:25-28) Tea bhair, ami porgott’ttat tem Devachem Raj ek ‘bori khobor’ mhunn te lekhinant. Ani te apunn Devachi bhokti kortat mhunn dakhoitat punn aplo odhikar soddun diunk te toiar nant.

9. Jehova bori khobor aikonant toslea raxttrank kosli sondhi dita?

 ⁹ Raxttram hea toren vagtat mhunn Jehova Dev kitem kortolo tea vixim amkam Stotr 2:10-12-nt vachunk melltta. Thoim mhunntta: “Atam, razamno, somzun gheiat; sonvsarachea razkarbhariamno, chotraien cholat. Sorvesporachi seva korat, Tachem bhem dhorat, ani thorthorun Taka paiam poddat. Na zalear, Tacho krodh choddun tumi morxat: karonn Tacho rag sottkorn pett’ta. Taka xeronna ietat tim sogllim subhagi.” Tor hanga sanglam toxem, Jehova doiall aslolean to hea raxttrank mon bodlunk ani aplem Raj apnnaunk sondhi dita. Punn lokamnim hem ugddas dovrunk zai ki vell khub unno asa karonn ami “nimannea disamnim” jietat. (2 Tim. 3:1; Iz. 61:2) Tor tannim rokddench sot zannam zaun Jehovachi seva korchi goroz asa.

10. Haggai 2:7-9-ant sanglolea pormonnem, soglim raxttram foddfoddailolean kitem boro porinnam zata?

¹⁰ Jehovan soglim raxttram foddfoddailolean vo haloxim kelolean ek boro porinnam pasun zata. Haggai provadian sanglem toxem, “sogllea raxttranchim bhanddaram vhanvun ietolim.” Hacho orth, khaltea kallzache lok Jehovachi seva korunk fuddem sortolim. * (Haggai 2:7-9 vachat.) Ani nimannea disamnim oxem zatolem mhunn Izaias ani Mika provadian pasun sanglolem.—Iz. 2:2-4; Mik. 4:1, 2.

11. Eka bhavak Devachea Rajeacho sondex aikonk mell’llo tednam tannem kitem kelem?

¹¹ Hea vixim amkam Bhav Ken-achem udharonn asa zo amchea mukhel ofisant seva korta. 40 vorsam poilim taka Devachea Rajeacho sondex aikonk mell’llo tednam tannem kitem kelem tea vixim to sangta: “Hanv sot xiklom tednam ami nimannea disamnim ravtat hem zannam zaun hanv khuxal zalo. Punn Devachi maniotai ani sasnik jivit mellonk hanvem hea sonvsaracho bhag zaunk zaina mhunn mhaka kollon ailem. Tor  hanvem magnnem kelem ani beginuch nas zauncho aslolea hea sonvsarak tenko diunchea bodlek sasnak togta tea Devachea Rajeak tenko diunk suru kelem.”

12. Xevottachea disamnim Jehovachem otmik mondir mhoimen koxem bhorlam?

¹² Khorench, Jehovachea otmik devmondirant “sogllea raxttranchim bhanddaram” vhanvun aileant. (Devachem otmik mondir mhunnttlear khori bhokti korunk Devan prithumer keloli manddavoll.) Hem ami kiteak mhunnonk zata? Karonn 1914-nt, Devachi seva kortole fokot thoddech hozar lok asle. Punn Jehovan besanv ghatlam dekhun aiz hea xevottachea disamnim, 80 lak’kham poros chodd lok Jehovachi seva korit asa ani toxench lak’khamnim lok, dor vorsak Jezuchea mornnachea Ugddas Disak hajir zatat. Itlench nhoi, zaito lok aplea sobhavant bodlav kortat. Hem soglem Jehovak mhoima haddtta.—Ef. 4:22-24.

13. Haggai-achi bhasaunni purnn zata toxi anik khoincheo bhasaunneo purnn zaun ietat? (Masikachem fuddlem chitr polloiat.)

¹³ Haggai-achi bhasaunni purnn zata toxi herui bhasaunneo purnn zaun ietat. Zoxem, Izaias 60:22-ant sanglolim him utram: “Tumche modlim jim konn odik lhan asat, tanche thaun upzotole hozar; soglleam-von osokt asat tanche thaun nipzotolem bollvont raxttr. Iukt vell pavlo mhonnttoch, Hanv, Sorvespor, vegim-vegim hem sogott ghoddun haddtolom.” Teach bhaxen, Izaiasan sanglolem ki Jehovache lok “raxttranchem dud” pietolim. (Iz. 60:5, 16) Tor hi bhasaunni pasun koxi purnn zata? Jehovachi seva korunk ietat tim “raxttranchim bhanddaram” vo khaltea kallzachea lokank khub kola asa. Toxench, “sorginchea Rajeachem xubhvortoman” porgott korunk te ap-khuxen vavurtat. Hea vorvim aiz 240 desamnim porgottnnechem kam cholta ani 1,000 poros chodd bhasamnim prokaxonam chap’pachem kam chalu asa.

14. Aiz dor eklean khoincho mhotvacho nirnnoi gheunk zai?

¹⁴ Aiz ami xevottachea kallar jietat ani Jehova Dev porgottnechea kama udexim soglim raxttram foddfoddaita vo haloxim korta. Tor Devachea Rajeak tenko ditolim vo  hea sonvsarachea sorkarank tenko ditolim, ho mhotvacho nirnnoi dor eklean gheunk zai. Jehovache visvaxi sevok hea sonvsarachea sorkarank khaltim ravtat tem khorem punn tim rajkaronnant bhag ghenant. (Rom. 13:1-7) Karonn fokot Devachench Raj munxakullak boreponn haddunk xokta ani tem Raj hea sonvsarachem bhag nhoi mhunn tim zannant.—Juanv 18:36, 37.

15. Prokasovnni pustokant sanglolea bhaxen, Jehovachi seva kortat tanchea visvaxiponnachi porikxa koxi zatoli?

¹⁵ Tor hea nimannea disamnim Jehovachi seva kortat tanchea visvaxiponnachi porikxa zatoli mhunn amkam Prokasovnni pustokant sanglolem asa. Tea vellar, hea sonvsarantle sorkar apli bhokti korunk Jehovachea sevokancher dobhav ghaltole ani tim toxem korunk toiar nant zalear te tankam khub dhumallo ditole. (Prok. 13:12, 15) “Lhanank toxem vhoddank, girestank toxem goribank, nagrikank toxem gulamank, hankam soglleank aplea uzvea hatar vo kopalar ek xik’ko marunk” te boll kortole. (Prok. 13:16) Zoxem adlea tempar, ek chakor konnacho tem kollonk, tacher sodanch urta toslo ek xik’ko martale teach bhaxen amchea chintnamnim ani korneamnim ami sonvsarachea sorkaranche bhag asat ani tankam tenko ditat mhunn dakhoun diunk te amcher dobhav ghaltole.

16. Ami aiz Jehova lagim amchi ixttagot kiteak ghott korunk zai?

¹⁶ Ho xik’ko ghenant tankam zaitea oddchonneancho ani trasancho fuddo korcho poddttolo. Zoxem Prokasovnnichem pustok amkam fuddem sangta: “Xik’ko aslea bogor konnakuch vikunk vo viktem gheunk rojia nasli.” (Prok. 13:17) Tor haka lagon, ami to xik’ko gheun amchem visvaxiponn hea sonvsarachea sorkarank ditolim kai? Na! Karonn Prokasovnni 14:9, 10-nt, Jehova xik’ko ghetlolea lokancho kitem kortolo tem ami zannant. Tor ami ho xik’ko ghenant tednam ami amchea hathar, “Hanv Sorvesporacho” oxem boroil’lea bhaxen zatolem. (Iz. 44:5) Punn tea vellar ami visvaxi ravtolim zalear ami aiz Jehova lagim amchi ixttagot ghott korunk zai. Ani oxem kelem zalear, Jehova Dev khuxalkaien ami tachim mhunn vollkhon ghetolo!

17. Jehovachea pasiensa vixim ami kitem ugddas dovrunk zai?

¹⁷ Jehova Devak konnachoch nas zal’lo naka. Tea pasot, to nimannea disamnim pasiens dakhoit asa. (2 Ped. 3:9) Punn lokank tanchem jivit bodlunk ani apli seva korunk to sodankall sondhi diuncho na. Karonn jim konn Devachea Rajeak tenko dinant tanchi poristhiti Faraoh bhaxenuch zatoli. Jehovan Faraoh-k sanglem: “Hanvem tujer ani tuje porjecher khast launk mhozo hat ubarlolo zalear, tumi prithume voilim nanch zatolim aslim. Punn mhoji podvi tuka dakhounk, ani akhe prithume-ver mhojem nanv gazunk, hanvem tuzo jiv vattaila.” (Sutt. 9:15, 16) Tor Faraoh bhaxen soglea raxttrank Jehovach khoro Dev mhunn manun gheunchem poddttolem. (Ez. 38:23) Hem koxem zatolem tem ami polloum-ia.

18. (a)Haggai 2:6,20-22-ant anik koslea foddfoddaupa vo thorthoraupa vixim sanglolem asa? (b) Haggai-achim utram fuddarak ghoddon ietolim mhunn ami kiteak mhunnonk zata?

¹⁸ Hea bhasaunne vixim, Haggai 2:6,20-22-ant vachunk melltta. (Vachat.) Punn hi bhasaunni somzonk Apostl Paulun zaitea vorsam uprant tea vixim kitem boroilem tantuntlean amkam modot zata. Tannem oxem boroilem: “Atam Tannem oxi bhas dil’li asa: Hanv anink ekdam prithumuch nhoi punn ak’khi srixtti kampoitolom. Anink ekdam hea  utranchi somzonni oxi: kampoil’leo vostu, teo rochloleo dekhun, nanch zatoleo, ani kampunk zainant teo vostu oxeoch urtoleo.” (Heb. 12:26, 27) Tor hea utrantlean amkam kollon ieta ki haloil’leo vo kampoil’leo vostu nanch zatoleo. Tem mhunnttlear, Haggai 2:7-ant sanglolea foddfoddaupa bhair anik ek torechem halovop vo foddfoddavop zaunchem asa, zaka thorthoravop oxem-i mhunnttlam. Tea vellar, Faraoh bhaxen Jehovachea razvottkek tenko dinant toslea lokank Jehova sasnak nas kortolo.

19. Kitem sasnak urtolem, ani ami hem koxim zannant?

¹⁹ Dev aplea Rajeacho nas korchona punn tem sasnak urtolem. (St. 110:5, 6; Dan. 2:44) Ani hea vixim Apostl Paulun amkam fuddem sanglem. Tannem mhunnttlem: “Amkam kampounk zaina toslem raj dil’lem asa. Dekhun dhinvaxi zaum-ia ani, adoran ani bhoktin, Devak manta te bhaxen Taka bhozum-ia.”—Heb. 12:28.

20. Lokamnim koslo tharav korunk zai, ani ami tankam koxi modot korunk xoktat?

²⁰ Anink vell uronk na! Nisonnttonak pavoita tea sonvsarachea vatten choltolim vo sasnachea jivitak pavoita tea Jehovachea vatten choltolim tem lokamnim atanch tharaunk zai. (Heb. 12:25) Tor amchea porgottnne udexim zata titlea lokank Devachea Rajeak tenko diunk ami modot korum-ia. Ani Jezu Kristachim him utram sodanch ugddas dovrum-ia: “Ani sotachi sakxi sogllea porzank mellche khatir hem Sorginchea Rajeachem Xubhvortoman ak’khea sonvsarant porgott zatolem. Ani tea uprant xevott ietolo.”—Mt. 24:14.