1-2. Musisi gwa nyabachi omulebi Hagai aderhaga gwakahikire?

“MU MINITI migeke, amabutike, n’enju zizibu-zibu za mira zahwanza kuhena.” “Buli muntu aliyubahire bwenene . . . Bantu banene baliderhere oku ogola musisi gwamalaga miniti ebiri ntya. Ku nyono, akola kalibonekene nka kasanzi kanene bwenene.” Ebyola bili binwa bantu baguma bayokokaga omusisi gwageraga omu chihugo che Nepal omu mwaka gwa 2015. Nka wamagera omu bintu biyubahisize nk’ebyola, orhakafa wabiyibagire.

² Aliko zene, rhuli rhwachibonera obwindi buko b’omusisi, gurhali gwashaganya vile nguma changwa chihugo chiguma chonyine. Yehova aly’ashaganya amashanja moshi m’oku gulu, amanajira ntyo mu myaka minene. Omulebi Hagai abaga alebere oku bilolere ogola musisi. Ayandika ntya: “Yehova w’oburungu aderhere ntya, kandi mu kasanzi kageke nashuba kushaganya embingu n’egulu, enyanja n’obudaka.’”​—Hag. 2:6.

3. Nka gurhe omusisi Hagai ashambere gurhali kuguma n’omusisi nya musisi?

³ Omusisi Hagai ashambere gurhali musisi nya musisi guharabisa konyine ebintu. Aliko omusisi Hagai ashambere, guli gwarhuma ebintu binja byarhengerera. Yehova yenyine arhubwirire ntya: “Nji nashaganya amashanja moshi, n’ebintu by’akamaro byoshi by’amashanja moshi by’aja mw’eyila nju; kandi nayunjuza eyila nju obukuze.” (Hag. 2:7) Bichi obola bulebi bwalishondere kuderha ku balala balilamire omu mango ma Hagai, na bichi bwakarhuyigiriza nerhu zene? Rhwaganira oku bishubizo by’ebyola bibazo, kandi rhwamenya okuntu rhwakarhabala oku kasi k’okushaganya amashanja zene.

4. Bulagurhe Yehova arhumaga omulebi Hagai oku bantu bage?

⁴ Yehova alihere omulebi Hagai akasi k’akamaro k’okukola. Rhanga owaze oku byahikaga embere w’ahola. Omu mwaka gwa 537 M.K.Y., echigusho ch’Abayahudi chagaluka e Yerusalemu chirhenga buhungiro omu Babiloni na Hagai aliri haguma nabo. Bachihika e Yerusalemu, abola bakozi bimana ba Yehova barhondera kuyumbaka enju ya Yehova, k’okuderha ehekalu. (Ezr. 3:8, 10) Aliko oku harhanaza legama, ebintu bibihire byarhengerera. Bavunika omurhima banayumanza akasi k’okuyumbaka ehekalu bulala abandi bantu balilamire mw’eyola eneo baliri babapinga. (Ezr. 4:4; Hag. 1:1, 2) Bobola omu mwaka gwa 520 M.K.Y., Yehova abwira Hagai arhabale Abayahudi bagwarhe obushiru, bagenderere kuyumbaka ehekalu mpaka bayimale. *​—Ezr. 6:14, 15.

5. Bulagurhe oburhumwa bwa Hagai bwakahebere omurhima abantu ba Mungu?

⁵ Oburhumwa bwa Hagai bwalibugenderere kukomeza obwemere bw’Abayahudi mu Yehova. Obushiru b’oyola mulebi bwamushunika abwire Abayahudi balibavunikire omurhima ntya: “‘Mukomere mwabo bantu boshi b’omu chihugo, ntyo ku Yehova aderhere, munakole. Bulala ndi haguma nenyu, intyo ku Yehova w’oburungu aderhere.” (Hag. 2:4) Echinwa “Yehova w’oburungu” chikwanene kuba chakuheba omurhima. Yehova arhambwire echigusho chinene ch’oburungu bwa bamalayika, bobola Abayahudi balikenere bamulangalire akaba balonzeze bahikire omuhigo gwabo.

6. Bichi omusisi Hagai alebaga gwakalerhere?

⁶ Yehova alirhumire Hagai abwire Abayahudi oku akashaganyize amashanja moshi. Bunola bulebi bwalikomeze Abayahudi balibavunikire omurhima n’okuleka kuyumbaka ehekalu. Obola bulebi bwaliyerekene oku akala ashaganya e Perse yaliri yarhegeka egulu lyoshi mu amola mango. Bichi ogola musisi gwaligwalerha? Ech’oburhanzi, olubaga lwa Mungu lwalilukwanene lumale kuyumbaka ehekalu. Kandi, chiro n’abarhali Bayahudi baliri babakulikira omu kuharamya Yehova omu kushuba yumbaka ehekalu. Obola burhumwa bwaliri bwakuhira omurhima bwenene oku bantu ba Mungu!—Zek. 8:9.

7. Kasi kahe k’okushaganya rhwakarhabalako zene? Ofasiriye.

⁷ Bichi obulebi bwa Hagai burhuyigirize zene? Kandi Yehova ali ashaganya amashanja moshi, rhunali rhwarhabala kw’akola kasi. Owaze kw’echila: Omu mwaka gwa 1914, Yehova ashimika Yesu Kristu nka Mwami w’Obwami bwage bw’embingu. (Zb. 2:6) Okushimikwa k’obola Bwami gwaliri mwazi gugayisize oku bakulu ba linola gulu. K’okuderha oku “akasanzi kahirirweho oku mashanja” kali kamahwa. Omu bindi binwa, kaliri kasanzi eyi nta mwami waliri warhambula omu zino lya Yehova walichiliho. (Lu. 21:24) Eju y’eyola mpanvu, ahanene kurhangira mwaka gwa 1919, olubaga lwa Yehova lwarhondera kubwira buli muntu oku Obwami bwa Mungu bonyine b’obulangalire oku bantu. Okola kuhubiri “emyazi minja y’Obwami” kwashaganya egulu lyoshi.​—Mat. 24:14.

8. Nk’oku olwandiko lwa Zaburi 2:1-3 luyerekene, nka gurhe banene omu mashanja balibarhola obula burhumwa?

⁸ Nka gurhe abantu balibarhola obola burhumwa? Banene barhali babuyemera. (Osome Zaburi 2:1-3.) Amashanja malubire. Malahire kuyemera eyi Yehova ashimikire nka  Murhegesi. Marhali mabona ok’oburhumwa b’Obwami rhunahubiri nk’eli “myazi minja.” Na ntyo, marhegesi maguma malahize akasi k’okuhubiri! Na chiro akaba marhegesi manene b’amola mashanja banaderha oku bali bakolera Mungu, barhalonzeze kulekana n’amarhegesi mabo. Nk’oku abarhegesi b’omu siku za Yesu baliri bajira, abarhegesi ba mu zinola siku bali bapinga Abashigwa ba Yehova omu kurhera abanafunzi bage bimana.​—Mdo. 4:25-28.

9. Nka gurhe Yehova ali achihangana kurhabala amashanja marhayemerere oburhumwa b’Omwami?

⁹ Gurhe Yehova ajirire oku bilolere okuntu amashanja mali malahira obola burhumwa? Olwandiko lwa Zaburi 2:10-12 lushubize ntya: “Bobunola zene, mwe bami, muyerekane obwengehe, muyemere ehano, mwe bazuzi b’oku gulu. Mukolere Yehova n’obuba, munagwarhe omwishingo eyi munali mwadirhimana. Mukenge omugala, akaba arhali ntyo Mungu abayunvira oburhe n’okubalimbula, bulala oburhe bwage bunazuka juba-juba. Abagwerhe omwishingo bali balala banamulibirhira.” Yehova aba mwinja anahere abola bantu akasanzi k’okuchishoga echintu chinja bakajira. Bachigwerhe akasanzi k’okuhindamula amawazo mabo n’okuyemera Obwami bwa Yehova. Aliko, nta bisanzi binene bayorhene. Rhulamire omu “siku zizinda” za linola gulu libi. (2 Ti. 3:1; Isa. 61:2) Zene, mali mango abantu bakwanene kujira juba-juba bamenye okuli n’okuchishoga kukolera Yehova.

10. Bantu baguma bahe bayerekene oku bayemerere akasi k’okushaganya kayerekenwe omu Hagai 2:7-9?

¹⁰ Bantu baguma bali bayerekana oku bayemerere akola kasi k’okushaganya Hagai alebaga. Arhubwirire oku akola kasi k’okushaganya kakarhumire “ebintu by’akamaro byoshi [abantu b’emirhima minja] by’amashanja moshi byakayinjire” kuharamya Yehova. * (Osome Hagai 2:7-9.) Isaya na Mika, bombi baliderhere oku ebyola byakahikire “omu siku zizinda.” ​—Isa. 2:2-4, mahugulo m’eshishi.; Mik. 4:1, 2, mahugulo m’eshishi.

11. Gurhe mwene-werhu muguma alijirire amango ayunva burhanzi oburhumwa b’Obwami?

¹¹ Lolaga gurhe obula burhumwa b’okushaganya amashanja bwalihumire ku mwene-werhu muguma oyirikirwe Ken, oli wakolera oku biro byerhu bikulu. Achiyibukire bwinja amango ayunva burhanzi oburhumwa b’Obwami, hamagera myaka 40 ntya. Ken aderhere ntya: “Amango nyunva burhanzi okuli kurhengere omu Chinwa cha Mungu, nalisimire bwenene kumenya oku rhulamire omu siku zizinda za linola gulu libi. Yi Mungu anyemera na ngwarhe akalamo k’esiku n’amango, byalimpemere ndekane n’elila gulu lirhafumbamire n’okuchishwekera oku lunda lwa Yehova. Nasalira eju y’echola, nanajira ntyo juba-juba. Naleka egulu, nanalibirhira omu bulanzi b’Obwami bwa Mungu burhakashaganywa chiro n’akatyu.”

12. Nka gurhe ehekalu lya Yehova lye kiroho lili lyayunjula obukuze mu zinola siku zizinda?

¹² Bibonekene bwinja oku Yehova ali agisha olubaga lwage. Mu zinola siku zizinda, rhuli rhwabona okuntu oluganjo lwa balala bali bamuharamya luli lwayushuka. Omu mwaka gwa 1914, rhwaliri bihumbi bigeke byonyine. Zene, rhukala rhurhalukire miliyoni 8 m’abantu bali baharamya Mungu n’obushiru, n’amandi mamiliyoni m’abantu bali baba haguma nerhu oku Lwibuko. Kugerera echola, ebibuga by’embuga by’ehekalu ly’ekiroho lya Yehova; k’okuderha omupango g’obuharamye buchere, lili yayunjula “ebintu by’akamaro by’amashanja moshi.” Ezino lya Yehova lili lyahabwa obukuze kugerera ebintu abola bantu bali bahindamula amango bali bachihangana kugwarha oborhere buhyahya.​—Efe. 4:22-24.

13. Okuyushuka kw’abali baharamya Yehova, kuli kwayeneza bwindi bulebi buhe? (Olole efoto eli oku chiganda.)

¹³ Amola maja-mbere masimisize mali mayeneza amandi malebi nk’obulebi buli omu chitabu cha Isaya sura ya 60. Omustari gwa 22 gw’eyola sura guderhere ntya: “Omudorho nj’aba chihumbi, n’omuntu w’ehali y’eshishi nj’aba shanja ligwerhe emisi. Nyono Yehova nyenyine, nji najira echola juba-juba omu kasanzi kakwanene.” Bulala bantu banene bali  bahwanza kuharamya Yehova, chintu chilebe chikwirire bwenene chili charhengerera. Ebyola “bintu by’akamaro,” k’okudeha abantu b’emirhima minja, bali bayinja n’obufundi bulengene, banagwerhe enyorha y’okurhabala oku kasi k’okuhubiri “emyazi minja y’Obwami.” Bobola olubaga lwa Yehova lwakakolesa obola bufundi Isaya ayirikaga “marha m’amashanja.” (Isa. 60:5, 16) Abola balume n’abakazi b’akamaro bali barhabala oku kasi k’okuhubiri kali kakolwa mu bihugo 240 n’okukula ebitabu mu ndimi zirhalukire 1 000.

14. Bichi abantu bakwanene kuchishoga zene?

¹⁴ Mu kanola kasanzi kazinda, okushaganywa kw’amashanja kuli kwashunika abantu bachishoge eby’okujira. Ka baja oku lunda b’Obwami bwa Mungu changwa bahira obwizere bwabo omu burhegesi bw’abantu bwa linola gulu? Byahema buli muguma werhu achishoge chiguma mw’ebyola. Chiro akaba abakozi ba Yehova bakengere amarhegeko m’oburhegesi bwe chihugo balamiremo, barhachiheba chiro n’ehityu omu bilolere epolitike y’elila gulu. (Ro. 13:1-7) Bamenyere oku Obwami bwa Mungu bonyine bunji bwamala ebibazo by’abantu. Obola Bwami chirhali chigabi ch’egulu.​—Yoh. 18:36, 37.

15. Nka gurhe echitabu cha Ufunuo chiyerekene okw’abantu bimana bageregezwa?

¹⁵ Echitabu cha Ufunuo chiderhere ok’obwimana bw’abantu ba Mungu bwageregezwa omu siku zizinda. Echola chigeregezo chagenderera kurhulerhera obupinzani na malibuko manene. Amarhegesi ma linola gulu mahema rhumaharamye n’okulibuza balala boshi balahire kuja oku lunda lwamo. (Ufu. 13:12, 15) Maseza “abantu boshi abadorho n’abakulu, abachire n’abakene, abantu bali huru n’abaja, yi boshi bahirwa kw’echimanyiso oku kukobo kwabo k’okulyo changwa oku malanga mabo.” (Ufu. 13:16) Abaja b’omu mango ma mira, baliri bahirwa kw’echimanyiso chirhakarhenga chiyerekene nd’oli abakolesa. Konakuguma zene, abantu boshi bali bawaza oku bakwanene kuyerekana lunda luhe baliko. Balibalonza buli muguma ayerekane olunda aliko kugerera ebinwa byage n’omu bijiro.

16. Bulagurhe bili bya juba-juba zene rhukomeze obwimana bwerhu ku Yehova?

¹⁶ Ka rhwayemera echola chimanyiso n’okuyerekana oku rhuli oku lunda lw’amala marhegesi m’egulu? Balala bali balahira kuhirwa kw’echimanyiso bahurana ebibazo n’obuhanya. Echitabu cha Ufunuo chiyerekene ntya: “Nta muntu yeshi-yeshi ogulage changwa kuguza olekere olala ogwerhe echimanyiso yenyine.” (Ufu. 13:17) Aliko abantu ba Mungu bamenyere bichi Mungu nj’ajirira balala bagwerhe echimanyiso chiyerekenwe omu Ufunuo 14:9, 10. S’ahubwe ahali h’okugwarha echola chimanyiso, kweri nji bayandika oku maboko mabo oku “Bali ba Yehova.” (Isa. 44:5) Zene, kakasanzi kano k’okuyerekana kweri ok’obwimana bwerhu ku Yehova bukomere. Akaba ntyo ku bili, Yehova nj’agwarha obusime b’okuderha oku rhuli bage!

17. Bichi rhukwanene kuyibuka oku bilolere okulembera kwa Yehova?

¹⁷ Yehova ayerekene oku ali wakulembera bwenene mu zinola siku zizinda. Arhalonzeze chiro na muntu n’omuguma alimbulwe. (2 Pe. 3:9) Ahere abantu boshi orozo l’okuhungama n’okuchishoga kumukolera. Aliko okulembera kwage kugwerhe obuzinda. Balala bali balahira kuja oku lunda l’Obwami, nji bahikirwa na bilala byahikiraga Farao omu siku za Musa. Yehova abwira Farao ntya: “Kugera hanola singa mira nalambwire okuboko kwani kw’emisi  n’okukushurha epigo likalihire woyo n’abantu bawe, nawe wakabere wakulirwe oku gulu mira. Aliko akaba nakulekere ogenderere kulama yi nkuyereka emisi yani, yi n’ezino lyani liyamamazwa oku gulu lyoshi.” (Kut. 9:15, 16) Amashanja moshi nji mahikira kumenya oku Yehova ye Mungu w’okuli. (Eze. 38:23) Nka gurhe ebyola nji byajirika?

18. a) Gwindi musisi gwa nyabachi guganirirwe omu Hagai 2:6, 20-22? b) Nka gurhe rhumenyere oku ebinwa bya Hagai nji byashuba kuyenera omu mango mayinjire?

¹⁸ Enyuma wa myaka minene Hagai afire, entumwa Paulo ayandikira Abakristu b’Abaebrania ebinwa bili mu Hagai 2:6, 20-22 byakayenere amango mayinjire. (Osome.) Paulo ayandika ntya: “Kandi nashuba kushaganya arhali egulu lyonyine si n’embingu nayo. Bobola echinwa ‘kandi’ chiyerekene okukulwaho kw’ebintu byashaganyizwe, ebintu byakolwaga, y’ebintu birhashaganyizwe bibera.” (Ebr. 12:26, 27) Ogula musisi gurhali kuguma n’oguganirirwe omu Hagai 2:7, ogula musisi nji gwaharabisa loshi balala bali kuguma na Farao bali balahira oku arhali Yehova ye kwanene kurhegeka.

19. Bichi birhakashaganywa na nka gurhe rhumenyere echola?

¹⁹ Bichi nji birhashaganywa changwa kukulwaho? Paulo ayongerere ntya: “Bulala nji rhwahabwa Obwami burhakashaganywa, rhujage rhwagenderera kuhaabwa olukogo lurhakwanenwe lurhuma rhwagala kukolera Mungu akasi kachesibwa omu bulyo buyemererwe omu kuyubaha Mungu n’okumukenga.” (Ebr. 12:28) Amango omusisi g’obuzinda gwamala kugera, Obwami bwa Mungu bonyine bu nji burhashaganywa. Nji bwabera buyumangire buzira kushaganywa!​—Zb. 110:5, 6; Dan. 2:44.

20. Bichi abantu bakwanene kuchishoga na nka gurhe rhwakabarhabala?

²⁰ Nta kasanzi kachiliho k’okuheza! Abantu bakwanene kuchishoga: Akaba bachishogere kugenderera kubera oku lunda lwa linola gulu, nji balimbulwa. Akaba bamachishoga kukolera Yehova, n’okuhindamula ebintu bahemerwe kuhindamula omu kalamo kabo yi bajira obulonza bwage, nji bapata akalamo k’esiku n’amango. (Ebr. 12:25) Kugerera akasi kerhu k’okuhubiri, rhwakarhabala abantu barhole ogola muhigo gw’akamaro. Rhujage rhwarhabala bantu banene b’akamaro bwenene baje oku lunda l’Obwami bwa Mungu. Kandi, rhugendererage kubika omu bwenge ebila binwa Waliha werhu Yesu aderhaga: “Ogula mwazi gwinja g’Obwami nji gwahubiribwa omu gulu lyoshi lilamirweko yi buba buhamirizi oku bantu b’amashanja moshi, n’enyuma y’ahola obuzinda bwanayinja.”​—Mat. 24:14.