1-2. Baibel be edena bamona mareremarere karana ia perovetalaia?

LAGANI 2015 ai, Nepal dekenai ia vara tano mareremarere amo idia roho mauri taudia haida idia gwau: “Haraga momokani sitoa bona ruma gunadia idia moru.” “Taunimanima ibounai idia gari . . . momo idia gwau unai be miniti rua lalonai ia vara. To, lau dekenai unai be nega daudau lalonai ia vara bamona.” Bema oi dekenai unai bamona gari gauna ta ia vara, do oi laloaboio diba lasi.

² To, hari mareremarere idauna ta ia vara noho. Lagani momo lalonai Iehova ese tanobada ibounai ia hamarerea noho. Peroveta tauna Hagai ese unai mareremarere ia herevalaia. Ia gwau: “Tuari oreadia edia Iehova be inai bamona ia hereva: ‘Daudau lasi lalonai, lau ese guba, tanobada, davara bona tano do lau hamarerea lou.’”​—Hag. 2:6.

3. Hagai ese ia herevalaia mareremarere karana be edena dala ai tano mareremarere amo ia idau?

³ Hagai ena peroveta herevana be tano mareremarere korikorina ia herevalaia lasi, badina tano marere ese dika sibona ia havaraia. To, ia perovetalaia mareremarere karana ese gau namodia ia havaraia. Iehova ia gwau: “Lau ese bese iboudiai do lau hamarerea bona edia dava bada kohudia be inai ruma lalonai do idia vareai mai, bona lau ese hairai amo do lau hahonua.” (Hag. 2:7) Hagai ena nega ai idia noho taudia dekenai, unai hereva ena anina be dahaka? Bona iseda nega ai ena anina be dahaka? Ita ese unai henanadai edia haere do ita herevalaia, bona hari bese idauidau hamarerea gaukarana ita durua dalana do ita dibaia danu.

4. Dahaka dainai Iehova ese ena taunimanima dekenai Hagai ia siaia?

⁴ Iehova ese peroveta tauna Hagai dekenai mai anina bada gaukarana ta ia henia. To unai gaukara ia do henia lasi neganai,  ia vara gauna mani ita laloa. Lagani 537 B.C.E. ai, Iuda taudia be Babulonia amo Ierusalema dekenai idia giroa lou, bona Hagai danu be idia ida ia lao. Unai abidadama taudia be Ierusalema dekenai idia ginidae neganai, karaharaga dubu helaga idia haginia matamaia. (Esr. 3:8, 10) To daudau lasi murinai, dagedage idia davaria dainai, idia lalomanoka bona unai gaukara idia hadokoa. (Esr. 4:4; Hag. 1:1, 2) Unai dainai, lagani 520 B.C.E. ai, Iehova ese Hagai ia hamaoroa Iuda taudia do ia durua, unai amo idia goada lou bona dubu haginia gaukarana do idia hagugurua. *​—Esr. 6:14, 15.

5. Dahaka dainai Hagai ena hereva ese Dirava ena taunimanima ia hagoadaia bada?

⁵ Peroveta tauna Hagai ena hereva ese Iuda taudia ia hagoadaia Iehova idia abidadama henia totona. Mai gari lasi ida inai hereva be lalomanoka Iuda taudia dekenai ia gwauraia: “Iehova ma ia gwau: ‘Umui taunimanima ibounai e, umui goada bona umui gaukara.’ Tuari oreadia edia Iehova ia gwau: ‘Lau be umui ida lau noho.’” (Hag. 2:4) Inai hereva “tuari oreadia edia Iehova” ese Iuda taudia ia hagoadaia bada. Iehova be aneru tuari orea badana ia biagua, unai dainai Iuda taudia idia kwalimu totona Ia dekenai idia tabekau be namo.

6. Hagai ese ia perovetalaia hamarerea karana amo dahaka namo ia vara?

⁶ Iehova ese Israela taudia dekenai Hagai ia siaia, bona ia hamaorodia bese ibounai do ia hamarerea. Unai hereva ese dubu idia haginia lalomanoka taudia ia hagoadaia, badina Iehova ese unai nega ena basileia badana, Parasa, do ia hadikaia ore. Unai ese dahaka namo do ia havaraia? Gau ginigunana be, Dirava ena taunimanima be dubu haginia gaukarana do idia haorea. Bona Iuda lasi taudia be idia ida unai dubu helaga dekenai Iehova do idia tomadiho henia. Oibe, Hagai ena hereva ese Dirava ena taunimanima ia hagoadaia bada!​—Sek. 8:9.

7. Hari dahaka hamarerea gaukarana ita karaia noho? Herevalaia.

⁷ Hari, ita dekenai Hagai ena peroveta herevana ena anina be dahaka? Iehova be tanobada besedia ia hamarerea lou noho, bona ita danu be unai gaukara ita durua noho. Mani inai ita laloa: Lagani 1914 ai, Iehova ese Iesu Keriso be Iena guba Basileia ena King ai ia halaoa. (Sal. 2:6) Unai amo “idau bese edia nega,” eiava Iehova ena king ta ia lohia lasi negana ia ore. Tanobada ena lohia taudia dekenai unai be sivarai dikana. (Luka 21:24) Iehova ena taunimanima ese unai idia lalopararalaia dainai, lagani 1919 amo idia hahedinaraia Dirava ena Basileia sibona ese taunimanima ia durua diba. Unai “Basileia ena sivarai namona” idia harorolaia gaukarana ese tanobada ibounai ia hamarerea noho.​—Mat. 24:14.

8. Salamo 2:1-3 hegeregerena, tanobada besedia be Basileia ena sivarai idia kamonai neganai, dahaka idia karaia?

⁸ Taunimanima be unai sivarai idia kamonai neganai, dahaka idia karaia? Momo idia ura lasi. (Salamo 2:1-3 duahia.) Tanobada besedia be idia badu bona Iehova ese ia abia hidi King idia dadaraia. Idia abia dae lasi Dirava ena Basileia sivaraina be “sivarai namona.” Oibe, gavamani haida ese iseda haroro gaukara idia taravatua! Ena be lohia taudia haida idia gwau idia be Dirava idia tomadiho henia, to idia ura lasi edia lohia dagina idia rakatania. Iesu ena negai ia vara hegeregerena, hari danu lohia taudia ese Iehova ena Horoa Tauna idia dadaraia,  bona ena taunimanima idia dagedage henia.​—Kara 4:25-28.

9. Sivarai namona idia dadaraia besedia dekenai, Iehova ena hereva be dahaka?

⁹ Iehova ena hereva be dahaka sivarai namona idia dadaraia besedia dekenai? Salamo 2:10-12 dekenai ia gwau: “Vadaeni, umui king taudia e, umui laloa namonamo, tanobada ena hahemaoro taudia e, umui hamaoromaoroa totona idia henia sisiba umui abia dae. Mai gari ida Iehova umui hesiai henia, bona mai moale ida, ia umui matauraia. Natuna umui abia dae, Dirava do ia badu garina bona umui do ia haorea, badina Dirava ena badu do ia vara haraga. Dirava be edia heau mauri gabuna ai idia halaoa taudia ibounai be idia moale.” Iehova be unai bamona taudia dekenai nega ia henia edia lalona idia haidaua bona Iena Basileia idia abia dae totona. To, nega be ia ore noho. Ita be inai nega oromana ena “dina gabedia ai” ita noho. (2 Tim. 3:1; Isa. 61:2) Unai dainai, taunimanima ese hereva momokani idia dibaia bona Iehova do idia tomadiho henia totona, disisen idia karaia haraga be namo.

10. Edena dala ai Hagai 2:7-9 ese ia herevalaia hamarerea gaukarana ese taunimanima ia durua?

¹⁰ Hagai ese ia perovetalaia hamarerea gaukarana be taunimanima haida ia durua noho. Hagai ia gwau, unai gaukara dainai ‘bese iboudiai edia dava bada kohudia [kudou-maoro taudia unai] do idia mai,’ Iehova idia tomadiho henia totona. * (Hagai 2:7-9 duahia.) Isaia bona Mika danu idia peroveta “dina gabedia” ai unai do ia vara.​—Isa. 2:2-4; Mika 4:1, 2.

11. Tadikaka ta be Basileia ena sivarai ia kamonai neganai, dahaka ia karaia?

¹¹ Iseda hedikwota dekenai ia gaukara tadikaka ta ladana Ken be sivarai namona ia kamonai neganai, ia karaia gauna mani ita laloa. Lagani 40 gunanai Basileia ena sivarai ia kamonai negana ia do laloatao noho. Ken ia gwau: “Nega ginigunana Baibel amo  hereva momokani lau kamonai neganai, lau moale badina lau diba ita be inai nega oromana ena dina gabedia ai ita noho. Lau laloparara Dirava ena lalonamo bona mauri hanaihanai lau abia totona, namona be inai tanobada dikana lau rakatania bona Iehova ena kahanai do lau gini. Karaharaga egu lalona lau hadaia unai do lau karaia bona Iehova dekenai lau gurigurilaia. Oibe, Dirava ena Basileia goadana dekenai lau heau lao, badina ia be do ia moru diba lasi.”

12. Hari, edena dala ai Iehova ena lauma dubuna be hairai amo ia honu?

¹² Ia hedinarai goevagoeva Iehova be ena taunimanima ia hanamoa noho. Inai dina gabedia ai, Ia idia tomadiho henia taudia edia namba ia bada daekau noho. Lagani 1914 ai, ita be 5,000 mai kahana sibona. Hari, iseda namba be 8 milioni mai kahana bona lagani ta ta ai, milioni momo ese Memorial totona ita idia bamoa. Unai dala amo, tanobada ai Iehova ena lauma dubuna​—unai be Iena tomadiho dalana goevana​—be bese iboudiai edia “dava bada kohudia” amo ia honu. Bona unai taudia be edia mauri idia haidaua bona kara matamata idia hahedinaraia dainai, Iehova ena ladana idia hanamoa.​—Efe. 4:22-24.

13. Hari idia vara noho gau namodia ese edena peroveta hereva ma haida ia hagugurua? (Rau 1 ena laulau itaia.)

¹³ Idia vara gaudia ese peroveta herevadia ma haida, hegeregere Isaia karoa 60 idia hagugurua noho. Unai karoa ena siri 22 ia gwau: “Namba maragina be tausen ai do ia lao, bona bese maragina be bese goadana ai do ia lao. Lau, Iehova, ese nega korikori ai unai do lau karaia haraga.” Taunimanima momo herea be Iehova tomadiho henia taudia ai idia lao dainai, gau namona ta ia vara. Unai taudia be edia diba idauidau idia mailaia bona mai edia ura ibounai ida “Basileia ena sivarai namona” idia harorolaia noho. Unai dainai, Isaia ia gwau bamona, Iehova ena taunimanima be “bese idauidau edia milika” eiava diba idia gaukaralaia noho. (Isa. 60:5, 16) Unai tatau bona hahine namodia edia heduru amo, haroro gaukara be tano 240 ai idia karaia bona Baibel buka bona magasin be gado 1,000 mai kahana ai idia halasia noho.

14. Hari, taunimanima ese dahaka disisen idia karaia be namo?

¹⁴ Inai tanobada ena dokona ai, hamarerea gaukarana ese taunimanima ia doria disisen ta idia karaia totona. Idia be Dirava ena Basileia ena kahanai eiava tanobada ena gavamani do idia abidadama henia? Ibounai ese unai mai anina bada disisen do idia karaia. Ena be Iehova ena taunimanima ese gavamani edia taravatu idia badinaia, to politikol karadia amo idia gini siri. (Roma 13:1-7) Idia diba unai Basileia sibona ese taunimanima edia hekwakwanai ibounai do ia haorea. Bona unai Basileia be inai tanobada ena lasi.​—Ioa. 18:36, 37.

15. Apokalupo bukana ese dahaka hahetoho badana ia perovetalaia?

¹⁵ Apokalupo bukana ese inai nega ena dokona ai, Dirava ena taunimanima edia abidadama do ia tohoa gauna ta ia herevalaia. Unai hahetoho ese ita dekenai hisihisi bona dagedage bada do ia havaraia. Tanobada ena gavamani ese ita do idia doria idia ita tomadiho henia totona, bona idia ita dadaraia neganai ita do idia dagedage henia. (Apok. 13:12, 15) Idia ese ‘taunimanima ibounai, ladana maragi bona ladana bada taudia, taga taudia bona ogogami taudia, ura kwalimu taudia bona igui hesiai taudia idia oda henia edia imana idibana eiava edia baguna ai maka do idia atoa.’ (Apok. 13:16) Idaunegai, hesiai taudia dekenai maka idia atoa, unai amo idia hahedinaraia idia be daika ese ia biagua. Unai hegeregerena, hari inai negai taunimanima do idia ura ibounai do idia hahedinaraia idia be daika ena kahanai idia gini. Bona edia lalohadai bona kara amo do idia hahedinaraia idia be tanobada ena gavamani idia badinaia.

16. Dahaka dainai Iehova dekenai iseda badinaia karana ita hagoadaia haraga be namo?

¹⁶ Unai maka do ita abia bona inai politikol oreadia do ita durua, a? Unai maka idia dadaraia taudia be dagedage do idia davaria. Apokalupo bukana ma ia gwau: “Tau ta be gau ta ia hoia eiava ia hoihoilaia diba lasi, to maka ia abia tauna sibona.” (Apok. 13:17) To, Apokalupo 14:9, 10 ena hereva hegeregerena, Dirava ena taunimanima idia diba unai maka idia abia taudia be Dirava ese do ia hadikaia ore. Unai dainai, idia ese unai maka idia dadaraia, bona laulau dalanai edia imana ai inai idia torea, “Lau be Iehova ena.” (Isa. 44:5) Hari be nega namona Iehova dekenai iseda badinaia karana ita hagoadaia totona. Unai amo Iehova be mai moale ida do ia gwau ita be iena!

17. Iehova be do ia haheauka hanaihanai, a?

¹⁷ Inai dina ginigabedia ai, Iehova be ia haheauka bada. Ia ura lasi ta do ia mase. (2 Pet. 3:9) Ia ese ibounai dekenai nega ia henia idia helalo-kerehai bona abia hidi maorona idia karaia totona. To, Dirava be do ia haheauka hanaihanai lasi. Mose ena negai Farao dekenai ia vara bamona, Dirava ena Basileia idia dadaraia taudia be dika bada do idia davaria. Iehova ese Farao ia hamaoroa: “Bema lau ura, lau ese egu imana amo oi bona emu taunimanima dekenai gorere dikana lau henia diba, bona inai tanobada amo oi do lau kokia vadaeni. To oi lau hamasea lasi ena badina be inai: Oi dekenai egu siahu do lau hahedinaraia bona egu ladana be tanobada ibounai dekenai do idia gwauraia.” (Eso. 9:15, 16) Dokonai bese ibounai do idia diba Iehova sibona be Dirava momokanina. (Ese. 38:23) Edena dala ai unai do ia vara?

18. (a) Hagai 2:6, 20-22 ese ia herevalaia hamarerea karana ena anina be dahaka? (b) Edena bamona ita diba Hagai ena peroveta herevana be vaira negai do ia guguru?

 ¹⁸ Hagai 2:6, 20-22 duahia. Hagai ia mase bona lagani momo murinai, aposetolo Paulo ese Heberu Keristani taudia ia tore henia, bona ia hahedinaraia unai hereva be gabeai do ia guguru. Paulo ia gwau: “Hari [Dirava] ia gwauhamata, ia gwau: ‘Lau ese tanobada sibona do lau hamarerea lasi, to guba danu do lau hamarerea lou.’ Inai hereva ‘lou’ ese ia hahedinaraia, Dirava ese ia hamarerea vadaeni gaudia do ia kokia, unai gaudia be Dirava ese ia havaraia lasi. Vadaeni ia hamarerea lasi gaudia be do idia noho.” (Heb. 12:26, 27) Unai siri ese ia herevalaia hamarerea karana be Hagai 2:7 ese ia perovetalaia gauna amo ia idau. Anina be Iehova ena lohia siahuna idia dadaraia taudia be, Farao bamona, Iehova ese do ia hadikaia ore.

19. Dahaka do idia hamarerea lasi, bona edena bamona unai ita diba?

¹⁹ Dahaka do idia hamarerea diba lasi? Paulo ma ia gwau: “Ita be idia hamarerea diba lasi Basileia do ita abia dainai, namona be hebogahisi hereadaena do ita abia noho, unai amo mai gari bona hemataurai ida Dirava ese ia moalelaia dalanai hesiai gaukara helagana ita karaia diba.” (Heb. 12:28) Oibe, hamarerea karana ginigabena ia ore murinai, Dirava ena Basileia sibona do ia gini noho!​—Sal. 110:5, 6; Dan. 2:44.

20. Taunimanima ese dahaka disisen idia karaia be namo? Bona edena dala ai do ita durudia?

²⁰ Nega be lasi! Taunimanima be disisen ta do idia karaia: Bema inai tanobada ena mauri dalana idia badinaia noho, do idia mase. To, bema Iehova idia tomadiho henia bona iena ura idia karaia totona edia mauri dalana idia haidaua, mauri hanaihanai do idia abia. (Heb. 12:25) Iseda haroro gaukara amo, taunimanima ita durua inai mai anina bada disisen idia karaia totona. Namona be kudou-maoro taudia momo ita durua Dirava ena Basileia ena kahanai idia gini totona. Bona hanaihanai iseda Lohiabada Iesu ena hereva do ita laloatao, ia gwau: “Basileia ena sivarai namona be tanobada ibounai dekenai do idia harorolaia, bese ibounai idia kamonai totona, unai murinai dokona do ia ginidae.”​—Mat. 24:14.