1-2. Was fer xutere hot te profeet Axeu profetisiirt teet in unser taache pasiire?

“IN PLOOS phaar minute, hon ti kexefte pletse un alte kepaye aan kefang samer fale.” “Ale kaar hon pang kexpiirt. (...) Fiile hon kesaat tas es 2 minute ketauert hot, awer fer mich hots aus kesiin tas es haufe xtune waare.” Tas sin ti wërter fon etliche woo een eyertxutere iwerleept hon, woo in Nepal pasiirt is in 2015. Wëns tuu soo een sort xreklich situatsyoon mit mache teest, tsiimlich sicher teest tuu tas net soo laycht ferkese.

² Awer, in tiise moment, een aner sort xutere is am pasiire. Es petreft net ploos een xtat orer lant, awer al ti natsyoone, un tas pasiirt xon fiile yoore. Te profeet Axeu hot xon foer heyer kesaat tas tiise xutere pasiire teet. Tee hot kexrip: “Soo saat Yeehoowa fom militeer: ‘Noch een mool — in een khorts tsayt — xiitele ich ti himele, ti eyert, tas meer un tas troke lant.’” (Axeu 2:6)

3. Warom khene mer saan tas tas xutere woo Axeu pexrip hot, is anerste wii een eyertxutere?

³ Een eyertxutere pringt ploos fernichtung. Awer tas xutere woo te profeet Axeu pexrip hot, is anerste: tas pringt kuute resultaate. Te aychne Yeehoowa saat: “Ich tuun ti kanse natsyoone xiitele, un ti weyertliche tinge fon ale natsyoone tuun rin khome; un ich tuun tiise haus mit hërlichkheet fol mache.” (Axeu 2:7) Was hot tiise profetsii petayt fer tii woo in Axeu sayn taache keleept hon? Un was petayt tiise profetsii fer uns hayt? Wole mer ti antwort fer tiise frooche fine un siin was is unser teel in tiise aarwayt woo ti natsyoone hayt xiitelt.

4. Warom hot Yeehoowa te profeet Axeu tsu sayn folek kexikt?

⁴ Yeehoowa hot Axeu een wichtich aarwayt kep. Awer, kuk mool was pasiirt is eep eyer tiise flicht kriit hot. In  537 F.K., etliche yuute woo ketswung waare in Papiloon leepe keen, sin fon tat fat kang un sin retuer tsu Yeruusalem khom. Tsiimlich sicher, waar te profeet Axeu tswixich tiise krup kewees. Een tsayt noo tiise troye krup fon Yeehoowa sayn tiiner tsu Yeruusalem khom is, hon se aan kefang Yeehoowa sayn haus — te thempel — uf paue. (Ëst. 3:8, 10) Awer klaych, is was trauriches pasiirt. Etliche layt woo um se rom kewoont hon, hon sich keeche tëne kextelt. Tes weeche, sin ti yuute oone muut kep un hon noo kelos te thempel paue. (Ëst. 4:4; Axeu 1:1, 2) Tan, in 520 F.K., hot Yeehoowa Axeu kexikt ti yuute helfe noch mool flaysich wëre un te thempel fërtich paue. * (Ëst. 6:14, 15)

5. Warom hot Axeu sayn pexeet tsiimlich sicher Yeehoowa sayn folek uf kemuut?

⁵ Te opjetiiw fon Axeu sayn pexeet waar tas folek sayn klaape aan Yeehoowa ferxtërke. Mit koraaj, hot te profeet fer tas folek woo oone muut waar kesaat: “‘Sayt xtark, teyer al, layt fon tiise lant — saat Yeehoowa — un xaft. Wayl ich sin mit aych’, saat Yeehoowa fom militeer.” (Axeu 2:4) Tsiimlich sicher, hon ti wërter “Yeehoowa fom militeer” ti yuute uf kemuut. Yeehoowa fiirt een kroos militeer fon engele; tan, wën ti yuute welte ti aarwayt fërtich pringe, miste se uf Yeehoowa traue.

6. Was teet pasiire weeche tas xutere woo Axeu profetisiirt hot?

⁶ Yeehoowa hot Axeu kexikt fer ti yuute saan tas eyer teet al ti natsyoone xiitele. Ti yuute woo oone muut waare un woo noo kelos hate te thempel paue, sin uf kemuut kep weeche tiise pexeet. Tiise noorichte hot tëne ti sicherheet kep tas Yeehoowa teet Përsya xiitele, woo een mechtich xtark natsyoon aan tiise tsayt waar. Was teet weeche tiise xutere pasiire? Eyerst, teet Kot sayn folek te thempel fërtich paue. Noo heyer, teete soo kaar tii woo net yuute waare, pay Kot sayn folek khome fer Tëm aan peete in tëm naye thempel. Kewis, waar tiise noorichte aarich ufmuutich fer Kot sayn folek kewees. (Sak. 8:9)

7. In was fer aarwayt, woo ti natsyoone xiitelt, helfe mer mit? Lee tas aus.

⁷ Was petayt Axeu sayn profetsii fer uns hayt? Xon noch mool is Yeehoowa ti natsyoone am xiitele. Awer yets, hon mer een teel too tepay. Tenk traan: in 1914, hot Kot sayn Raych aan kefang im himel rechiire un Yeehoowa hot Yeesus wii Kheenich in kesetst. (Psal. 2:6) Tas waar een xlecht notisye fer ti rechiirente fon te welt. In tiise yoer, sin “ti pextimte tsayte fon te natsyoone” rom kang. In anere wërter: ti tsayt woos khee rechiirente waar woo Yeehoowa representiirt hot, is tsum ën kang. (Luk. 21:24) Weeche tas — hauptseechlich fon 1919 aan —, macht Kot sayn folek fer ti layt pekhant tas Kot sayn Raych is ti eensich hofnung fer ti mënxe. Tas preetich fon te “kuute notisye fom Raych” is ti kans welt am xiitele. (Mat. 24:14)

8. Tëm noo Psalm 2:1-3, wii hon ti meyerste natsyoone sich aan kextelt foer tas pexeet fom Raych?

⁸ Wii xtele sich ti layt aan foer tiise pexeet? Ti meyerste nëme tas net aan. (Lees Psalm 2:1-3.) * Ti natsyoone sin unruych. Tii wole net aan nëme te Rechiirente woo Yeehoowa in  kesetst hot. Fer tëne, ti noorichte fom Raych woo mer preetiche sin net “kuute notisye”; etliche rechiirente hon soo kaar unser preetich aarwayt ferpoot. Fiile fon tëne saan tas se Kot tiine, awer tii wole net sayn autoriteet uf kepe. Soo wii ti rechiirente in Yeesus sayn taache, tsayche se tas se keeche Yeehoowa sayn Kesalpte sin wën se sayn troye nookeener atakiire. (Aph. 4:25-28)

9. Was is Yeehoowa sayn antwort fer ti nekatiiw aanxtelung fon te natsyoone?

⁹ Was is Yeehoowa sayn antwort fer ti nekatiiw aanxtelung fon te natsyoone? Te Psalm 2:10-12 saat: “Un yets, teyer kheeniche, tsaycht ferninftichkheet; lost aych korikiire, teyer richter fon te eyert. Tiint Yeehoowa mit tiif respekt un frayt aych mit tsiitere. Eert te soon; wën net, kept Kot pees un teyer tuut im weech xtërpe, wayl Sayn wuut keet xnel aan. Froo sin al tii woo xuts aan Tëm fine.” Yeehoowa is kuut un kept tëne een tsayt fer te richtich ëntxlus mache. Tii khene noch sayn ketanke ënere un Yeehoowa sayn Raych aan nëme. Awer ti tsayt woos noch kept is khorts. Meyer sin in te “letste taache” fon tiise welt am leepe. (2 Tim. 3:1; Isa. 61:2) Yets — mee wii noch nii —, mise ti layt ti woerheet lërne un ëntxlise Yeehoowa tiine.

10. Was fer kuut aanxtelung hon etliche ketsaycht weeche tas xutere woo in Axeu 2:7-9 pexrip is?

¹⁰ Etliche layt hon een kuut aanxtelung weeche tas xutere woo Axeu profetisiirt hot. Tee saat uns was te resultaat fon tiise xutere is: “ti weyertliche tinge [eerliche layt] fon ale natsyoone” tuun khome fer Yeehoowa aan peete. * (Lees Axeu 2:7-9.) * Isaiias un Mikeyas hon aach foer raus kesaat tas soo was teet in te “letste taache” pasiire. (Isa. 2:2-4, noote; Mik. 4:1, 2, noote)

11. Was hot een pruuter kemacht wii eyer tas pexeet fom Raych keheert hot?

 ¹¹ Kuk mool wii tiise pexeet, woo ti eyert xiitelt, Ken petrof hot, een pruuter woo hayt in te haupst sets tiint. Tee khan sich noch kuut traan tenke tas eyerste mool woo eyer ti noorichte fom Raych keheert hot, unkefeer 40 yoore tsurik. Tee saat: “Wii ich tas eyerste mool ti woerheet fon Kot sayn Wort keheert hon, hon ich kelërnt tas mer in te letste taache fon tiise welt am leepe sin. Tas hot mich aarich froo kelos! Ich hon ferxtan tas, fer Yeehoowa kefale un tas eewiche leepe kriin, praucht ich fon tiise welt, woo am wakle is, aus rayse un fest uf Yeehoowa sayn sayt plaype. Ich hon klaych ëntxlist tas mache, un ich hon tas fer Yeehoowa im kepeet kesaat. Ich hon ti welt hiner kelos un ti xuts aan kenom fon Kot sayn Raych, woo khan net kexiitelt wëre.”

12. Torich tiise letste taache, wii wërt Yeehoowa sayn kaystlich thempel fol hërlichkheet?

¹² Es is taytlich tas Yeehoowa is sayn folek am seechne. Torich tiise letste taache, ti numer layt woo Yeehoowa aan peete tuun, hot net noo kelos se wakse. In 1914 waare mer ploos een pisye mee wii 5.000, awer hayt sin mer mee wii 8 milyoone; un milyoone anere layt tuun yeetes yoer tas Aantenke mit uns fayre. Soo, ti eyertliche hoofe fon Yeehoowa sayn kaystlich thempel — es wil saan, ales was Yeehoowa macht tas mer khene Tëm in een phuer aat aan peete — wëre fol mit te “weyertliche tinge fon ale natsyoone”. Noch etwas woo eer fer Yeehoowa sayn naame pringt, sin ti ënerunge woo tiise layt mache wën se ti nay personaliteet aan tsiie. (Ëfe. 4:22-24)

13. Was fer profetsiie sin am sich erfiile weeche ti ferkreesung in te numer layt woo Yeehoowa tiine? (Kuk tas pilt am aanfang fom piichelche.)

¹³ Tas ales was am pasiire is, erfiilt aach anere profetsiie, wii tii fon Isaiias 60:22: “Te kleen wërt tausent; un te kleener, een xtark natsyoon. Ich selepst, Yeehoowa, tuun tas in te richtich tsayt ferxnele.” Wayl fiile layt fange aan Yeehoowa tiine, etwas wunerliches pasiirt. Tiise “weyertliche tinge”, orer layt, pringe mit sich unerxiitliche apiliteete un te wunx fer ti “kuute notisye fom Raych”  preetiche. Tes weeche, khan Yeehoowa sayn folek tiise apiliteete penutse, woo Isaiias wii “milich fon te natsyoone” pexrip hot. (Isa. 60:5, 16) Mit te hilef fon tiise weyertliche mëner un fraae, preetiche mer in 240 lënter un mer mache puplikatsyoone aan mee wii 1.000 xprooche.

14. Was fer ëntxlus mise ti layt yets mache?

¹⁴ In tiise letste taache, weeche tas xutere fon te natsyoone, mise ale kaar een ëntxlus mache: Kot sayn Raych uner xtitse orer aan te rechiirente fon te welt traue. Yeehoowa sayn Tsayer tuun ti kesetse aan heere fon te rechiirung im lant woo se woone; awer tii tuun sich net in te politik rin mexe. (Rom. 13:1-7) Tii wise tas Kot sayn Raych is net teel fon te welt un tas ploos tas Raych khan ti propleeme fon te mënxe wërklich resolwiire. (Yoo. 18:36, 37)

15. Iwer was fer kroos proopt fon leaaliteet xprecht tas puuch fon Apokalipsis?

¹⁵ Tas puuch fon Apokalipsis saat tas ti leaaliteet fon Kot sayn folek wërt keproopt in te letste taache. Tan, khene mer xon waarte tas mer xroo keyacht un uner trikt wëre. Ti rechiirunge fon tiise welt tuun uns xike tëne aan peete un tuun aach yachte tii woo wole net tëne pay xteen. (Apo. 13:12, 15) Tii tuun “ale layt tswinge — kleene un kroose, rayche un aarme, fraye un sklaawe — fer een mark in te rechts hant orer uf te xtën kriin.” (Apo. 13:16) In te friirixe tsayte, waare ti sklaawe mit een mark in keprënt fer se tsayche tsu weem se keheert hon. In te selwich aat, tuun ti layt hayt tsu taach waarte tas ale een mark kriin — es wil saan: tas se torich sayn ketanke un aktsyoone tsayche tas se tsu te rechiirunge keheere un tas se tëne pay xteen.

16. Warom is es aylich unser leaaliteet tsu Yeehoowa yets ferxtërke?

¹⁶ Un meyer? Tuun mer tiise mark aan nëme un ti rechiirunge pay xteen? Tii woo wole net ti mark kriin, mache xwiirichkheete un kefoore mit. Tas puuch fon Apokalipsis leet aus “tas nimant khaafe orer ferkhaafe khan, ploos tee woo ti mark hot”. (Apo. 13:17) Awer, Kot sayn tiiner wise was tuut Yeehoowa mache mit tëne woo ti mark hon. (Apo. 14:9, 10) Tan, xtats tiise mark aan nëme, is es wii wën Kot sayn tiiner in sayn hant xraype teete: “Keheert tsu Yeehoowa.” (Isa. 44:5) Yets is ti tsayt fer uns sicher sin tas unser leaaliteet tsu Yeehoowa xtark is. Wëns soo is, tuut Yeehoowa froo saan tas mer tsu tëm keheere!

17. Was thërfe mer net ferkese iwer Yeehoowa sayn ketult?

¹⁷ Yeehoowa tsaycht fiil ketult torich tiise letste taache, wayl tee wil net hon tas yemant fernicht wërt. (2 Phe. 3:9) Tee kept tsayt fer ale kaar sich peroye un ëntxlise tëm tiine. Awer sayn ketult halt net fer imer. Tii woo wole net Kot sayn Raych pay xteen, tuun een eenlich situatsyoon mit mache wii Faraoo sayns, in Mooses sayn taache. Yeehoowa hot fer Faraoo kesaat: “Ich hët khene xon ti hant aus xtreke fer tich un tayn folek mit een xroo phest trefe, un tuu teest fon te eyert fernicht wëre. Awer es waar kraat weeche tas tas ich tich lepeentich kelos hon: fer tich mayn macht tsayche un tas mayn naame uf te kans eyert pekhant wërt.” (Eeks. 9:15, 16) Am ën, mise al ti natsyoone erkhëne tas ploos Yeehoowa te woere Kot is. (Ese. 38:23) Wii tuut tas pasiire?

18. (a) Was fer aner sort xutere is in Axeu 2:6, 20-22 pexrip? (b) Wii wise mer tas Axeu sayn wërter tuun sich in te futuer erfiile?

¹⁸ Haufe yoore noo Axeu sayn toot, hot te aphostel Phaul fer ti hepreeyxe kriste kexrip  tas ti wërter fon Axeu 2:6, * 20-22 * teete een erfiilung in te futuer hon. (Lees.) Phaul hot kexrip: “Yets, hot eyer ferxproch: ‘Noch een mool, xiitele ich, net ploos ti eyert, awer aach te himel.’ Ti wërter ‘noch een mool’ tsayche tas ti tinge woo kexiitelt sin — ti tinge woo kemacht sin — wëre fernicht, tas ti tinge woo net kexiitelt sin, plaype tuun.” (Hep. 12:26, 27) Tiise xutere is anerste wii tas xutere fon Axeu 2:7, wayl tas too petayt eewich fernichtung fer tii woo, soo wii Faraoo, wole net Kot sayn recht fer se rechiire aan nëme.

19. Was wërt net kexiitelt un wii wise mer tas?

¹⁹ Awer was wërt net kexiitelt orer fernicht? Phaul hot wayter kexrip: “Tes weeche, wayl mer een Raych kriin tuun woo khan net kexiitelt wëre, wole mer wayter unfertiint kuutheet kriin; torich tii, khene mer haylich tiinst tsu Kot kepe tëm noo was Tëm kefalt, mit tiif respekt un eer.” (Hep. 12:28) Wën te xtaap setst noo tëm letste xutere, ploos Kot sayn Raych wërt net kexiitelt — tas playpt fest fer imer! (Psal. 110:5, 6; Tan. 2:44)

20. Was fer ëntxlus mise ti layt mache un wii khene mer tëne helfe?

²⁰ Meyer khene khee tsayt ferliire! Ti layt mise ëntxlise: wën se raus suuche tiise welt wayter pay xteen, wëre se fernicht; awer wën se raus suuche Yeehoowa tiine un ti neetich ënerunge mache fer tëm kefale, kriin se eewiche leepe. (Hep. 12:25) Torich ti preetich aarwayt, khene mer ti layt helfe tiise wichtich ëntxlus mache. Tan, wole mer uns aan xtrenge fer noch anere weyertliche layt helfe Kot sayn Raych pay xteen. Un wole mer imer in unser khop hale ti wërter fon unser Hër Yeesus: “Tiise kuute notisye fom Raych wëre uf te kans pewoont eyert kepreeticht, tsum tsaye fer ale natsyoone; un tan khomt tas ën.” (Mat. 24:14)