1-2. Ụma nya ọ-hụ́ jigi-jigi oyina ọlọmwụ ịHagayị à tị́ ya kọ ka jị lụka nyahị?

“Ẹ-ẸPWỤ nya iminiti ịmanyị-ịmanyị, ebe ị-kpa ihi ra bala ẹpwa inyogo dọmwụ nyọka kpụ beji.” “Ugbodu gu ọng myị́ ọng wuu ene . . . Angịnyị lụmẹ-lụmẹ ya nyori ọpyị ọ-hụ́ jigi-jigi ọọwa nyị tata lala iminiti imiiye. Am tị lẹ, ọ lam lala o-ri nyị tata gụ́ ọọwa yẹẹyẹẹ.” Angịhyẹ ịlẹ kị bé bwu ẹpwụ nya ọpyị ọ-hụ́ jigi-jigi ọlẹ kọ họ ịị Nepal la ẹka nya 2015 à ya ẹlẹwẹ lẹ. Kori ká ẹla ọ-la uhi-uhi ọlịịwẹ á họ tang, á ka deeri nyamwụ ẹnẹnẹhẹ ka.

² Ma, ọlẹẹlẹẹ, ụma nya ọ-hụ́ jigi-jigi ọhẹ tị wẹẹ họ kọ tị ba e-epweji lee ẹpwụma ookpokpo kem ka. IJihova à wẹẹ hụ́ ẹpwụma ịla odehe ọlẹ wuu jigi-jigi lẹ, ọ tị la ẹka lụmẹ-lụmẹ kọ wẹẹ họ ịnyị lẹ. Ọlọmwụ ịHagayị ya ẹla neeji u-uhye nya ọ-hụ́ jigi-jigi ọwẹ. Ọ da omyi ẹla nya iJihova ju yẹkẹẹ: “Ụka kọ nọ chẹẹ, m̀ ka hụ́ uhye-ọgba bala odehe tụ Ihu ịtụka jigi-jigi.”​—Hag. 2:6.

3. Ányị ọ-hụ́ jigi-jigi ọlẹ ká ịHagayị chabwọ à tị́ datị hi ọpyị o-hụ́ jigi-jigi ọlam?

³ Ọ-hụ́ jigi-jigi ọlẹ ká ịHagayị chabwọ á ri ọpyị ọ-hụ́ jigi-jigi ọlẹ kọ kaa kpa ayịreji ọtata kem warị ka. Ọkọkọ nya ọọwa, ọ-hụ́ jigi-jigi ọọwa kaa họ ang ịnyịịla. IJihova lịlọmwụ yẹkẹẹ: “M̀ ka hụ́ ẹpwụma datị-datị wuu jigi-jigi. Ọọwa, ị ka tụ ang-ụdụ nyaa wuu tuu wẹ ẹgẹlẹ lẹ, m̄ ka yaa myị Ube nyam ọlẹ lẹlẹ.” (Hag. 2:7) Ányị ọmwụ ọyẹyẹ ọwẹ à tị́ da angịlẹ kị hịhị lụka nya ịHagayị ụbwọ? Ányị ọ tị́ ka jẹ́-ẹ dahị ahị ụbwọ alẹ? Ahị ka ya ẹla u-uhye nya ọwẹwẹ nya ịtọ ẹla ịwẹ. Ahị ka myịmyị-ị̀ jẹ́ ang u-uhye nya abwọlẹ kahị ka la ụbwọ ẹ-ẹpwụ nya ẹpwụma ọ-hụ́ jigi-jigi alẹ.

4. Ịyẹ tị́ du ká iJihova du ọlọmwụ ịHagayị ẹrụ tọ angịnyị nyamwụ?

⁴ IJihova ya ụkụrwọ o-ju apyobwuna ọhẹ ha ọlọmwụ ịHagayị  nyọka họ. Kụ irya nya ẹla ọlẹ kọ họ ene nya ọọwa wẹẹ. Ọ lala o-ri ịHagayị nyị juwa ẹ-ẹpwụ nya ala iJuu ịlẹ kị nyà bwu ịBabịlọn wẹ iJerusalẹm la ẹka 537 ene nya ọmama nya ịKịrayịsị. Nyọlẹ ká angị la ọmyịmyị ịwẹ pwụ iJerusalẹm bwaa, ị dọmwụ nya itiwe nya ube nya iJihova lẹlẹ. (Ẹsịr. 3:8, 10) Ma lụka o-kpii, ẹla otolujwo ọhẹ tị họ. Ọkịlẹtụ kpaa enyi lẹ, ị hwabwọ la ụkụrwọ nya ube ọnwụ́nwụ ọọlajị nya ọtụpyịpyị lẹlẹ. (Ẹsịr. 4:4; Hag. 1:1, 2) Ịnyị à dudu lẹ ká iJihova byi ịHagayị la ẹka 520 ene nya ọmama nya ịKịrayịsị, nyị da ala iJuu ịwẹ ụbwọ kị ka la ila ọchịchị myịmyị bala ọ-ka gwaa gbịla nyọka nwụ́ ube ịgọgọ ọọwa pwụ ocheju lẹlẹ. *​—Ẹsịr. 6:14, 15.

5. Ịyẹ tị́ du ká ẹla ọlẹ ká ịHagayị ya ka jẹ́-ẹ ju angịnyị nya Ohe ọhụ?

⁵ Ụkụrwọ ọlẹ ká Ọhe ya ha ịHagayị ri ọ-ka họ ká ala iJuu ịwẹ ka la ọmyịmyị ẹ-ẹga nya iJihova ịnyị. Ọlọmwụ ọwẹ kpa ugbodu ojuju ya ẹla je ala iJuu ịlẹ ká ọkịlẹtụ kpụ enyi wẹ yẹkẹẹ: “Am [iJihova] Agụgụ tị jam byinu anụ iSerubabẹlụ bala iJochuwa bala anụ alọpyị ọlẹ wuu ya ọkịlẹtụ ā kpụnụ enyi kpong-kpong ka. Anụ kịnyaa lụkụrwọ ọhọhọ mẹ. M̀ juwa tanụ.” (Hag. 2:4) Ọlẹ ká Ohe Oluhye wụrụ ịlọmwụ nya “[iJihova] Agụgụ” wẹẹ, o dudu kị ka la ahị ọ-dahile. IJihova la ọngịrị u-uhye nya iru nya alegu-ẹrụ ịlẹ kị ri ọgẹwụ ịtụka-ịtụka, lẹ ala iJuu ịwẹ baba kị ka dahịhilọọ nyọka la ịlahị ọkaka.

6. Ịyẹ à tị́ ka họ chajị nya ọ-hụ́ jigi-jigi ọlẹ ká ịHagayị ya neeji?

⁶ IJihova du ịHagayị ẹrụ kaka byi ala iJuu nyori ọwa nyị ka hụ́ ẹpwụma ọnyị myị́ ọnyị jigi-jigi. Ọmwụ ọyẹyẹ ọwẹ ya ahị ọ-dahile ha ala iJuu ịlẹ ká ọkịlẹtụ ọ-kpụ enyi hwaa abwọ la ọ-nwụ́ ube ịgọgọ. Ọ myịmyị mẹjẹ nyori iJihova ka hụ́ iPechiya, kọ ri ẹpwụma ọlẹ kọ kpa ọngịrị nya odehe ọla ụka ọọwa ụ-ụbwọ jigi-jigi. Ịyẹ à tị́ ka họ bwula ọ-hụ́ jigi-jigi ọọwa? Ọhọhẹ, angịnyị nya Ohe Oluhye ka jẹ́-ẹ nwụ́ ube ịgọgọ pwụ ocheju. Ọọwa lẹ, angịlẹ kị ri ala iJuu ka, à ka yẹ julaa gbịgba ha iJihova ụ-ụwa u-ube ịgọgọ ọlẹ kị ma nwụ́ wẹ lẹlẹ. Ẹla ọwẹ ri ọhụ ojuju ọtụka ha angịnyị nya Ohe!​—Sẹk. 8:9.

7. Ụkụrwọ nya ọ-hụ́ jigi-jigi oyina ahị tị́ la ụbwọ ẹ-ẹpwụ nyamwụ alẹ? Dọọ wụlẹ wẹẹ.

⁷ Ọmwụ ọyẹyẹ nya ịHagayị tị́ la etu oyina hahị alẹ? IJihova myịmyị wẹẹ hụ́ ẹpwụma ọnyị myị́ ọnyị jigi-jigi, ahị tị la ụbwọ ẹ-ẹpwụ nya ụkụrwọ ọọwa alẹ. Kụ irya nya ẹla ọlẹ wẹẹ: La 1914, iJihova ya iJisọsị ri Adịrahụ nya Ịpyị-Adịrahụ Nyamwụ ọla epwoohe. (Eje. 2:6) Ọlẹ ká Ịpyị-Adịrahụ ọọwa yeji ri oja ọtịpyọ ha angịkpeji nya odehe ọlẹ. Ọ mẹjẹ nyori ‘ụka nya eji ogbegbe nya ala iJentayịlị’​—kọ ri ụka ọlẹ ká ọngọ kpeji ọhẹ-lọhẹ á ji kọ ku ọmwakpa nya iJihova kpangga ka​—họ jịra, lee ọ-chịpwụrụ kam lẹ. (Luk. 21:24) Chajị nya ọọwa, anchẹ nya iJihova kaa ya je ọng myị́ ọng, ọgụgụụgụ bwu ẹka nya 1919, nyori Ịpyị-Adịrahụ nya Ohe kem nya-à ka chị akama nya angịnyị ehe eju myị́ lẹ. “Ẹrụ ọnyịịla chajị nya Ịpyị-Adịrahụ nya Ohe Oluhye” ọ-kpa pyẹ juwa hụ́ odehe wuu jigi-jigi ịlẹhị lẹ.​—Mat. 24:14.

8. Jaabwọ ká ụpwụ nya Eje Ọnyịịla 2:1-3 ya, ányị iru nya ẹpwụma à tị́ kaa yẹ ẹla ọlẹ kahị wẹẹ ya?

⁸ Ányị angịnyị à tị́ kaa họ u-uhye nya ẹla ọlẹ kahị wẹẹ ya jaa? Ẹpwụma lụmẹ-lụmẹ á kaa ye myị ka. (Wa Eje Ọnyịịla 2:1-3.) Alẹpwụma wuu ju agbama lẹ. Ị pwa la ọ-ka ye Ọngọkpeji ọlẹ ká iJihova chụ myị. Ị́ yẹ ẹla nya Ịpyị-Adịrahụ ọlẹ kahị wẹẹ ya jaa lala “ẹrụ ọnyịịla” ka. Angịkpeji ịhyẹ dọmwụ kaa hile ụkụrwọ nya ẹrụ ọnyịịla ọ-kpa pyẹ! Nanana nyori angịkpeji  ịla ẹpwụma ịwẹ kaa ya nyori ịwa nyị kaa gbịgba ha Ohe, ị́ tịtọ nyọka tụụbwọ hi ọngịrị nyaa ka. Lẹ, jaabwọ kọ la ẹ-ẹga nya angịkpeji ịlụka nya iJisọsị, angịkpeji ịla alẹ kaa tụ́ Ọngọlẹ ká iJihova ya ida wụ́ pyịpyị bala ọ-gba mịla angịlẹ kị wẹẹ bọọ jẹ kpẹẹkpẹẹ.​—Ụkụr. 4:25-28.

9. Ányị iJihova à tị́ wẹẹ họ nyọka da ẹpwụma ịlẹ kị myị ye ẹla nya Ịpyị-Adịrahụ myị ka ụbwọ?

⁹ Ányị iJihova à tị́ wẹẹ họ ẹ-ẹga nya ẹpwụma ịlẹ kị kaa ye ẹla nyahị myị ka? Eje Ọnyịịla 2:10-12 wẹ yẹkẹẹ: “Lẹẹlẹ, anụ ịdịrịhụ, anụ kpa ẹla ọjẹjẹ hu ịlọnụ ẹkpẹ mẹ. Anụ alegbeju nya alodehe, anụ chị ịlọnụ ega-à wẹ mẹ. Anụ kpa uhi ojuju myị ẹrụ ha [iJihova.] Anụ hiri ịlọnụ kpẹẹ ha ọnyị-adịrahụ nya Ohe Oluhye, ó-ri ịnyị ka agbama nyamwụ ka wuru jahị danụ. Ọ ka tanụ ayịreji lụka ọmwaa. Ikẹjẹ-awụrụ nyamwụ ka wuleji lụka ọkpahị ju ka myị. Angị kpa ịlaa kaka kpịbaa ẹ-ẹga nyamwụ aalẹ, angịịwa pyẹ̀ẹẹ lẹ!” IJihova ri ọlọnahị, lẹ ọ ya ụka da haa nyọka cheje ọnyịịla. Ị ka jẹ́-ẹ yẹ irya nyaa da bala ọ-ka ye Ịpyị-Adịrahụ nya iJihova myị. Ma, ụka á hi lụmẹ kaka. Ahị jam hịhị “lụka ohyẹẹkpẹ” nya odehe ọlẹ lẹ. (2 Tim. 3:1; Ayị. 61:2) Ọ ju agaga lẹẹlẹẹ gụ́ olene nya angịnyị ọ-ka jẹ́ ẹlịlẹhị bala ọ-ka chụ nyọka gbịgba ha iJihova.

10. Ang ọnyịịla oyina ụpwụ nya ịHagayị 2:7-9 à tị́ ya kọ ka họ ọọlajị nya ọ-hụ́ jigi-jigi ọwẹ?

¹⁰ Angịhyẹ wẹẹ họ ang ọnyịịla ọọlajị nya ọ-hụ́ jigi-jigi ọlẹ ká ịHagayị yẹ ọmwụ neeji. O byihi nyori ọ-hụ́ jigi-jigi ọwẹ nyị dudu ká angị la ọkịlẹtụ ọnyịịla, kị ri ‘ang-ụdụ nya ẹpwụma ịdatị-datị wẹẹ tụ́ tuu’ wẹ ẹpwụ nya ịgba ọgbagba nya iJihova. * (Wa ịHagayị 2:7-9.) Ayịsaya bala ịMayịka ịnyịnyị yẹ ọmwụ neeji nyori nyị ka lịnyị la “ụka ohyẹẹkpẹ.”​—Ayị. 2:2-4; May. 4:1, 2.

11. Ịyẹ ọọnahị ọlẹng ọhẹ à tị́ họ ụka ọlẹ kọ wo ẹla nya Ịpyị-Adịrahụ nya Ohe?

¹¹ Kụ irya nya ẹla ọlẹ ká ọọnahị Ken, kọ kaa họ ụkụrwọ e-egbeju ẹpwa ọla odehe wuu lẹẹlẹẹ, họ ụka kị ya ẹlịlẹhị joo wẹẹ. Ọ kpịtịya yẹẹyẹẹ  nya ụka ọhọhẹ ọlẹ kọ wo ẹla u-uhye nya ẹlịlẹhị nya Ịpyị-Adịrahụ lala ẹka 40 kẹkpẹ wẹẹ. Ken yẹkẹẹ: “Ụka ọhọhẹ ọlẹ kam wo ẹlịlẹhị bwu ẹpwụ nya Omyi Ẹla nya Ohe, m̀ chị ọkẹkẹnị nyori ahị jam hịhị ụ-ụka ohyẹẹkpẹ nya odehe ọlẹ lẹ. M̀ yẹ nyori kori ká Ohe á ka jẹ́-ẹ yem myị bala am ọ-ka la ọhịhị ọmyịmyị-ka aalẹ, m̀ baba nyọka kpehe bwu ẹpwụ nya odehe ọlẹ kọ ju ọ-dahịhilẹ ka bala ọ-ka dayị giri-giri o-oye nya iJihova. M̀ raabwọ ha iJihova lẹ, m họ ịnyị lẹlẹ. M̀ pẹhi odehe da kẹkpẹ lẹ, m rụnyẹ ka ẹga ọlẹ kam ka ye ewu ọ-chị ke nya Ịpyị-Adịrahụ nya Ohe ọlẹ kọ ka hụ́ kpiki kaka lẹlẹ”

12. Ányị ube ịgọgọ nya iJihova à tị́ wẹẹ myị̀ la ogbo la ahyẹẹnụ ihyẹẹkpẹ ịlẹ?

¹² Ọ la gede-gede nyori iJihova wẹẹ wahị kụrụ angịnyị nyamwụ. Lụka nya ahyẹẹnụ ihyẹẹkpẹ ịlẹ, ahị yẹ jaabwọ ọlẹ ká iru nya angịnyị wẹẹ dọmwụ nyọka gbịgba họọ lẹ. La 1914, ahị angịnyị ụnọ ịmanyị-ịmanyị à kaa gbịgba họọ lẹ. Ọlẹẹlẹẹ uku ineku nya angịnyị wẹẹ gbịgba ha iJihova la ila ọchịchị lẹ, uku ịmanyị tị́ nya angịkịla tị kaa yẹ julahị ẹka ọnyị myị́ ọnyị nyọka kpịtịya nya igu nya iJisọsị. Bwula ụgbẹyị ọwẹ, ụpa ọla odehe nya ube ịgọgọ nya olegu nya iJihova, kọ ri ụgbẹyi nya ịgba ọgbagba ocheri-cheri ọlẹ kọ hu nọ, wẹẹ myị̀ la “ang-ụdụ,” kị ri angịnyị bwu ẹpwụma ịdatị-datị. Ẹnyị nya iJihova kaa la ogbo ịnyịnyị bwula ang ọlẹ ká angịwẹ yẹda ẹ-ẹpwụ nya ọhịhị nyaa jaabwọ kị wẹẹ hu abwẹla onyeewe da kụrụ.​—Efe. 4:22-24.

13. Ọmwụ ọyẹyẹ ịkịla iyina à tị́ họ jịra bwula iru ojuju nya angị gbịgba ha iJihova? (Yẹ ifoto ọla ẹbẹ nya ọgbanyẹ.)

¹³ Ẹla ịkpịpyọ-kpịpyọ ịlẹ kị wẹẹ họ ri ọ-họ jịra nya ọmwụ ọyẹyẹ ịkịla lala ịlẹ kị juwa ụ-ụpwụ nya Ayịsaya egbeju 60. Ọgba 22 nyamwụ yẹkẹẹ: “Ọdọdẹpwa ọbyẹhị gụ wuu ka yẹ ka ri epwoja ọnyọọngịrị ọtụka. Am a ri [iJihova] lẹ, ụka kọ pwụ ẹnụtụrụ ọọwa lẹ m̄ ka họọ jịra i-ijata lẹ.” Chajị nyọlẹ ká angịnyị lụmẹ-lụmẹ wẹẹ dọmwụ nyọka gbịgba ha iJihova wẹẹ, ang ọnyịịla-ọnyịịla ọhẹ wẹẹ họ. “And-ụdụ,” lee angịnyị ịịwa kaa warị la ang ọjẹ́jẹ ụma ọhẹ lee ọkịla bala ọ-nwụlanọ nyọka ya “ẹrụ ọnyịịla chajị nya Ịpyị-Adịrahụ nya Ohe Oluhye.” Chajị nya ọọwa, anchẹ nya iJihova jẹ́-ẹ kpa ang ọjẹ́jẹ ọlẹ ká Ayịsaya chabwọ nyamwụ lala “enyi ẹmẹ nya epwoja” họ ụkụrwọ. (Ayị. 60:5, 16) Bwula ụbwọ ọdada nya aanahị alẹng bala  anyang ịnyịịla ịwẹ, ahị wẹẹ kpa ẹrụ ọnyịịla pyẹ ẹ-ẹpwụ nya ẹpwụma 240 bala ọ-họ apwụ nyahị la ìja gụ́ 1,000.

14. Eje nya ẹlịyẹ angịnyị à tị́ la ka chị lẹẹlẹẹ?

¹⁴ Lụka nya ahyẹẹnụ ihyẹẹkpẹ ịlẹ, ọ-hụ́ jigi-jigi nya ẹpwụma wẹẹ tụ́ angịnyị tutu nyọka cheje nya ẹla ọhẹ. Ị ka myị-ị̀ chẹkpẹ ju Ịpyị-Adịrahụ nya Ohe, lee ị tị́ ka ya ahị ọ-dahịhile nyaa nịrọ eji ọkpakpa nya alodehe ọlẹ? Eje nya ẹla ọkpọnchị à wẹ ká ọng myị́ ọng ka chị lẹ. Ịlẹhị lẹ, anchẹ nya iJihova kaa ju ihi nya ehile nya igomenti ọla ẹpwụma ọlẹ kị ji, ị́ tị kaa ya ụbwọ ju ẹla nya upe nya odehe ọlẹ kpong-kpong ka. (Rom. 13:1-7) Ị jẹ́ nyori Ịpyị-Adịrahụ nya Ohe kem nya-à ri ang ọlẹ kọ ka jẹ́-ẹ myị́ akama nya angịnyị ehe lẹ. Ịpyị-Adịrahụ ọọwa á tị ri ụpa nya odehe ọlẹ ka.​—Jọn. 18:36, 37.

15. Ányị ụpwụ nya Ọwụrụụ-wụrụ à tị́ mẹjẹ nyori angịnyị nya Ohe Oluhye ka la ọmayẹ u-uhye nya o-godayị giri-giri nyaa?

¹⁵ Ụpwụ nya Ọwụrụụ-wụrụ ya jehi nyori angịnyị nya Ohe Oluhye nyị ka la ọmayẹ lụka nya ahyẹẹnụ ihyẹẹkpẹ u-uhye nya o-godayị giri-giri nyaa. Ọmayẹ ọọwa ka kpa akama bala ịtụpyịpyị wẹ ẹga nyahị. Eji ọkpakpa nya odehe ọlẹ ka ya ahị nyị gbịgba ha ịwa bala ọ-tụ́ angịlẹ kị pwa la ọ-chẹkpẹ jwaa pyịpyị. (Ọwụ. 13:12, 15) Ị ka họ kị ka “juwa da ịna . . . ba ụpwụriri lee itochi nya ọng myị́ ọng wuu, tụ́ angịlẹ kị ri angị ichiche bala angịtụka wẹwẹ lee alụdụ bala ikpehika wẹwẹ lee angịlẹ kị la ịlaa lee angịlẹ kị ri anyịhị riri wuu ịnyịnyị.” (Ọwụ. 13:16) Lụka nya alene, ị kaa gu anyịhị ịna ọlẹ kọ ka jẹ́-ẹ hịlẹ ẹnẹnẹhẹ ka, nyọka jẹ́ ọngọlẹ kọ laa. Ụ-ụgbẹyị ọlịnyịnyị alẹ, angịnyị ka yahị guru nyori ọng myị́ ọng nyị ka mẹjẹ nyori ọngọlẹ ị-ịlẹ ị chẹkpẹ ju lẹ. Ị ka tịtọ ká angịnyị wuu ka mẹjẹ bwula irya ọkụkụ bala abwẹla nyaa nyori ị ri alụpa nya upe ọhẹ bala ọ-chẹkpẹ jwaa.

16. Ịyẹ tị́ du kọ ju agaga ẹ-ẹpwụ nyọka ju o-godayị giri-giri nyahị ẹ-ẹga nya iJihova ọngịrị lẹẹlẹẹ?

¹⁶ Ahị ka ye ang ẹjẹẹ nya ịna ọwẹ myị bala ọ-mẹjẹ nyori ahị chẹkpẹ ju igomenti nya angịnyị ehe? Angịlẹ kị pwa la o-ye ịna ọọwa ka la akama bala ọtụpyịpyị. Ụpwụ nya Ọwụrụụ-wụrụ da ẹla ọọwa wụlẹ nyori: “Ọngọngọhẹ nyị́ ka kpa ihi ra ka lee ọ-ra ang bwu ụbwọ nya ọngọkịla kpong-kpong kaka. Kẹnẹ-kẹne ó-ri kịị nyị́ chị ọngọọwa ịna nya iyo nya ọgbanyẹ ọọwa ene lẹ mẹ ịnyị!” (Ọwụ. 13:17) Ma angịnyị nya Ohe Oluhye tị jẹ́ ang ọlẹ ká Ohe ka họ angị la ịna ọlẹ ká ụpwụ nya Ọwụrụụ-wụrụ 14:9, 10 ya ẹla rụ́. Ọkọkọ nyọka ye ịna ọọwa lẹ, ọ ka lala o-ri nyị da ba ịlaa nyori, “Ahị ri nya [iJihova].” (Ayị. 44:5) Ọlẹẹlẹẹ à ri ụka ọlẹ kahị ka maga nyọka ju o-godayị giri-giri nyahị ọngịrị ẹ-ẹga nya iJihova lẹlẹ. Kori kahị họ ịnyị, iJihova ka chị ọkẹkẹnị nyọka ya nyori ahị ri ịnyamwụ!

17. Ẹlịyẹ ahị tị́ baba nyọka kpịtịya ẹ-ẹga nya ọhụ ọ-da pịlẹ nya iJihova?

¹⁷ IJihova mẹjẹ nyori ọ dọhụ pịlẹ yẹẹyẹẹ ẹ-ẹpwụ nya ahyẹẹnụ ihyẹẹkpẹ ịlẹ lẹ. Ọ́ tịtọ ká ọngọngọhẹ ka ta ayịreji ka. (2 Pit. 3:9) Ọ ya iwe da ha ọng myị́ ọng nyọka yẹda bala o-cheje nyọka gbịgba họọ. Ma ọhụ ọ-da pịlẹ nyamwụ tị la ọbaba. Angịlẹ kị nyẹẹkpẹ da iwe ọwẹ ka yẹ ịlaa ẹ-ẹpwụ nya iwe-ahụrụ ọlala ịnya iFero ọla ahyẹẹnụ nya iMosisi. IJihova byi iFero yẹkẹẹ: “Ịnọ m̀ dọmwụ ka kpa ụbwọ ọngịrị nyam yẹng bala angịnyị nyang akama bwula ẹdụrụ ọlẹ kọ ka tanụ wuu ayịreji gbanggbang myị lẹ. Ma m̀ tị yẹng chịng juwa hịhị, chajị kam ka chị ọngịrị nyam ehe mẹjẹng bala chajị ká ẹnyị nyam ka rụ ohi yịrị odehe ọlẹ wuu yịrị.” (Ehe. 9:15, 16) Ẹpwụma ọnyị myị́ ọnyị ka wẹ ka jẹ́ nyori iJihova kem à ri Ohe nyịlẹhị lẹ. (Isi. 38:23) Ányị ọ tị́ ka bwu lịnyị?

18. (a) Ụma nya ọ-hụ́ jigi-jigi ọkịla oyina ụpwụ nya ịHagayị 2:6, 20-22 à tị́ chabwọ? (b) Ányị ahị tị́ họ kahị jẹ́ nyori omyi ẹla nya ịHagayị ọwẹ ka họ jịra ị-ịlahị?

 ¹⁸ Ẹka lụmẹ-lụmẹ nyọlẹ ká ịHagayị gbu kpá, ọlẹrụ ịPọlụ da ụpwụ du kịla angịnyị nya ịKịrayịsị ịla iHiburu nyori omyi ẹla ọla ụpwụ nya ịHagayị 2:6, 20-22 nyị ka la ọ-họ jịra ị-ịlahị wẹẹ. (Wọọ.) ỊPọlụ yẹkẹẹ: “Lẹẹlẹẹ lẹ, ọwa ayịdang tị myịmyị myị ọnụ yẹkẹẹ: ‘Am Ohe Oluhye ka myịmyị-ị̀ hụ́ odehe ọlẹ jigi-jigi lẹ. Ma ugbẹnyị lẹ, odehe ọlẹ ụbwọọmwụ kem kaka, m ka hụ uhye-ọgba nya epwoohe jigi-jigi ịnyịnyị kpịlọ lẹ.’ Ẹla ọlẹ ká Ohe Oluhye ya wẹ ẹ-ẹgẹwẹ yẹkẹẹ, ‘M̀ ka myịmyị hụ́ lẹ’ wẹẹ, ọọwa mẹjẹ gede-gede yẹkẹẹ, ang ilodehe ịlẹ . . . kị kaa hụ́ jigi-jigi myị́ wuu wẹẹ, ọ ka tụ ang ịịwa kịnyaa, chajị ká ang . . . ịlẹ kị ka jẹ́-ẹ hụ́ jigi-jigi myị́ kaka, ụbwaa kem, a ka hi lẹ.” (Hib. 12:26, 27) Ọ-hụ́ jigi-jigi ọwẹ datị hi ọlẹ kị gu ẹnyị ụ-ụpwụ nya ịHagayị 2:7. Etu nya ọ-hụ́ jigi-jigi ọwẹ ri, angịlẹ kị pwa la ọ-ka ye eji ọkpakpa nya iJihova myị lala iFero, ka ta ayịreji gboyi myị́ oyi.

19. Ịyẹ à tị́ ka hụ́ jigi-jigi ka? Ahị tị́ họ ányị kahị jẹ́?

¹⁹ Ịyẹ à tị́ ka hụ́ jigi-jigi lee ọ-tụ́ kịnyaa ka? ỊPọlụ kịnyaa la ọ-yẹkẹẹ: “Anụ cheri kahị juwa ji Ohe Oluhye obe ọgwọgwụ chajị nyọlẹ kahị wẹẹ ka ju ka ẹpwụ nya ịpyị adịrahụ nyamwụ ọlẹ kọ ka jẹ́-ẹ hụ́ jigi-jigi kpong-kpong kaka mẹ. Anụ cheri kahị juwa gbịgba ha Ohe Oluhye la ọgụ ọlẹ ká Ohe Oluhye ka yehi ẹ-ẹpwụ nya uhi bala ihi ojuju ẹ-ẹga nya Ohe Oluhye yẹẹyẹẹ mẹ.” (Hib. 12:28) Ee, ụka ká ọhụ nya ọ-hụ́ jigi-jigi ọwẹ á kpụba kpa lẹ, Ịpyị-Adịrahụ nya Ohe kem à ka hi jam lẹlẹ. Ọ ka yeji giri-giri!​—Eje. 110:5, 6; Dan. 2:44.

20. Eje nya ẹlịyẹ angịnyị à tị́ ka chị pyii? Ányị ahị tị́ ka jẹ́-ẹ daa ụbwọ?

²⁰ Ụka á ji nya ọ-kpa bịrị ka! Angịnyị ka chụ pyii kori kị ka kịnyaa la ọ-chẹkpẹ ju ụgbẹyị nya ọhịhị ọlẹ ká odehe ọlẹ myị ju, kọ ka kpaa ka ẹpwụ nya ayịreji, lee kori kị ka maga nyọka nwụ ọhịhị nyaa rịrị pwoku irya nya Ohe chajị kị ka yé ọhịhị o-gboyi myị́ oyi. (Hib. 12:25) Bwula ẹrụ ọnyịịla ọ-kpa pyẹ nyahị, ahị ka jẹ́-ẹ da angịnyị ụbwọ nyọka cheje u-uhye nya ụpa ọlẹ kị ka ji ẹ-ẹpwụ nya ẹla ọkpọnchị ọwẹ. Ahị kịnyaa la ọ-da angị la ọkịlẹtụ ọnyịịla ụbwọ nyọka ji oye nya Ịpyị-Adịrahụ nya Ohe mẹ. Ahị kpịtịya nya omyi ẹla nya Ọngọlahị iJisọsị ọlẹ kọ yẹkẹẹ: “Ị ka kpa ẹrụ ọnyịịla chajị nya ịpyị-adịrahụ nya Ohe Oluhye ọlẹ kaka ya pyẹ ẹ-ẹga myị́ ẹga nya odehe ọlẹ wuu. Chajị kọ ka ri ang nya ibeenu ha alepwoja myị́ epwoja wuu ene ká ọmyịmyị nya odehe ọlẹ ka pwu eji” mẹ.​—Mat. 24:14.