1-2. Myihtoi Hagi gaw ya aten hta byin wa na gara ashun ai lam hpe tau hkrau tsun da ai kun?

“ATEN kadun mi laman, nta dingsa ni, gat seng ni run mat wa ai.” “Masha law law grai kajawng mat ai. . . . Minit 2 daram sha na tim, grai na ai ngu shadu kau ai.” Dai gaw, 2015 ning Nipaw hta byin ai nnang nawn kaw na lawt wa ai ni a ga ni re. Ndai zawn mabyin hpe tinang hkrum yang aloi sha malap kau lu na n re.

² Ya aten hta masha ni gaw, kaga ashun ai lam langai hpe hkrum nga ai. Mare langai, mungdan langai hta n-ga, mungdan yawng hta ashun wa ai gaw, shaning grai na sai. Dai lam hpe myihtoi Hagi ndai hku tau hkrau tsun da ai: “Zaw nawng zaw wa up ai Yehowa ning nga ai: Gade n na yang, sumsing lamu hte ginding aga hpe, nammukdara hte hkarang hpe, ngai bai ashun na nngai.”​—Hag 2:6.

3. Hagi tsun ai ashun ai lam hte nnang nawn gaw gara hku shai ai kun?

³ Hagi tsun ai ashun ai lam gaw, jahten shaza lam sha byin shangun ai nnang nawn hte n bung ai sha, kaja ai akyu ni lu shangun ai. Yehowa ndai hku tsun ai: “Maigan amyu ni mahkra [masha amyu baw yawng, NWT] hpe mung, ngai ashun na nngai; maigan amyu ni mahkra a hpu htum ai baw sa du nna, ngai gaw ndai Nta hpe hpung shingkang hte jahpring na nngai.” (Hag 2:7) Hagi aten na masha ni a matu ndai myihtoi ga gaw hpa lachyum rai kun? Dai ni aten na anhte a matu gaw hpa lachyum rai kun? Dai ga san ni hpe ndai sumhpa hta bawngban na re. Dai ni aten masha amyu baw yawng hpe ashun ai hta, anhte gara hku shang lawm nga ai hpe chye lu na re.

4. Yehowa gaw shi amyu masha ni hpang de myihtoi Hagi hpe hpa majaw sa shangun ai kun?

⁴ Yehowa gaw myihtoi Hagi hpe ahkyak ai bungli langai shangun ai. Shingdu labau hpe myit yu ga. B.C. 537, Babelon kaw nna Yerusalem de bai wa ai Yuda masha ni hta Hagi mung lawm na masa nga ai. Yerusalem de du nna kade n na yang, Yehowa hpe sadi dung ai ni gaw nawku htingnu hpe gawgap ai. (Ezr 3:8, 10) Raitim, kade nna yang myit daw wa ai. Ninghkap ai lam ni hkrum ai majaw, gawgap lam jahkring kau ai. (Ezr 4:4; Hag 1:1, 2) Dai majaw, nawku htingnu gap ngut hkra n-gun jaw na matu, B.C. 520 hta Hagi hpe Yehowa lit jaw ai. *​—Ezr 6:14, 15.

5. Hagi a shiga gaw Karai a masha ni hpe hpa majaw n-gun lu shangun ai kun?

⁵ Hagi tsun ai shiga gaw, Yehowa hpe kamsham ai myit nangkang shangun ai. Hagi gaw nden marai rawng let, myit daw nga ai Yuda masha ni hpe ndai hku tsun ai: “Mung masha ni mahkra e, n-gun da ting nna, bungli galaw mu, . . . ngai nanhte hte rau rai nga nngai; hkum hkrit myit, nga nna Zaw nawng zaw wa up ai Yehowa tsun ai.” (Hag 2:4-5) “Zaw nawng zaw wa up ai Yehowa” ngu ai ga si gaw grai n-gun lu shangun ai. Yehowa kaw lamu kasa hpyen dap law law nga ai majaw, Yuda ni awng dang lam lu mayu yang, Karai Kasang hpe kamhpa ra ai.

6. Hagi tsun ai ashun ai lam a majaw hpa byin wa ai kun?

⁶ Yehowa gaw masha amyu baw yawng hpe ashun na lam tsun na matu, Hagi hpe shangun ai. Dai shiga gaw, myit daw nga ai Yuda ni hpe n-gun lu shangun ai. Dai aten hta mungkan a n-gun ja dik htum mungdan Persi hpe Yehowa ashun sana lam tsun ai majaw re. Dai ashun ai lam a majaw, hpa byin ai kun? Shawng nnan, nawku htingnu hpe ngut hkra gawgap lu na. Dai hpang, bai gawgap ai nawku htingnu hta nawku ai lamang kaw Yuda masha n re ai ni mung rau nawku wa na. Karai a masha ni a matu grai n-gun lu hpa re.​—Zeh 8:9.

7. Dai ni aten na gara ashun ai bungli hta anhte shang lawm nga ai kun?

⁷ Hagi a myihtoi ga gaw dai ni aten na anhte a matu hpa lachyum rai kun? Masha amyu baw yawng hpe Yehowa kalang bai ashun nga sai. Ndai kalang hta anhte mung lawm ai. Myit yu ga: 1914 hta, Yehowa gaw sumsing Mungdan a Hkawhkam hku nna, Yesu Hkristu hpe aya tang da sai. (Shk 2:6) Mungdan gawgap sai ngu ai shiga gaw, mungkan ningbaw ni a matu n kaja ai shiga re. Yehowa a malai uphkang ai du ni n nga ai aten ladaw re ai “maigan amyu ni a nhtoi” htum mat sai ngu ai lachyum re. (Luk 21:24) Dai majaw, Karai a Mungdan sha, masha ni a matu myit mada lam langai re ai ngu, 1919 kaw nna Karai a amyu masha ni ndau shana wa ai. Dai “mungdan a kabu gara shi ga” hkaw tsun ai lam gaw mungkan ting hpe ashun wa ai.​—Mat 24:14.

8. Shakawn 2:1-3 hku nga yang, masha law malawng gaw shiga hpe gara hku bai htang ai kun?

⁸ Dai shiga hpe masha ni gara hku bai htang ai kun? Law malawng gaw n hkap la ai. (Shakawn 2:1-3 hpe hti u.) Masha ni masin pawt wa ai. Yehowa aya tang da ai Uphkang Du hpe n hkap la ai. Anhte hkaw tsun ai Mungdan shiga hpe “kabu gara shiga” ngu nna n sawn la ai. Asuya nkau gaw hkaw tsun bungli hpe pyi pat shingdang wa ai. Mungdan uphkang du law law gaw, Karai  hpe nawku ai ngu tsun tim, tinang a ahkang aya hpe gaw asum n kam hkam ai. Yesu aten na uphkang du ni zawn sha, dai ni aten na uphkang du ni mung sadi dung ai sape ni hpe gasat ai hku nna, Yehowa Namman Chya Da Ai Yesu hpe ninghkap ma ai.​—Kas 4:25-28.

9. Masha amyu baw ni n hkap la ai hpe Yehowa gara hku bai htang ai kun?

⁹ Masha amyu baw ni n hkap la ai hpe Yehowa gara hku bai htang ai kun? Shakawn 2:10-12 hta ndai hku mahtai jaw da ai: “Hkawhkam ni e, hpaji daw mu, Ga ntsa tara agyi ni e, sharin achyin la mu. Yehowa hpe hkungga lara ai hte daw mu, Hkrit gari ai hte kabu gara nga mu. Dai kasha hpe pup mu: shing n rai yang, shi masin pawt nna nanhte lam e hten bya ai hkrum na myit dai: . . . shi masin alawan pawt bu na ra ai: Shi hta shingbyi ai ni nlang hte gaw, a lu ma ai.” Ninghkap ai ni jaw ai hku dawdan lu na matu, Yehowa ahkaw ahkang jaw da ai. Shanhte myit galai shai nna, Yehowa a Mungdan hpe hkap la mai ai. Raitim, aten nau n nga sai. Ndai mungkan a “hpang jahtum na nhtoi ni” hta anhte asak hkrung nga ai. (2 Tm 3:1; Esa 61:2) Dai majaw, tengman ai shiga ni hpe chye hkra galaw nna, jaw ai hku lata na matu ahkyak ai.

10. Hagi 2:7-9 hta tsun da ai ashun ai bungli hpe masha nkau gara hku bai htang ai kun?

¹⁰ Hagi tau hkrau tsun ai ashun ai lam hpe masha nkau gaw kaja ai hku bai htang ai. Ndai ashun ai lam a majaw, ‘maigan amyu ni mahkra [masha amyu baw yawng, NWT] a hpu htum ai baw sa du na.’ Lam mi hku tsun yang, myit dingman ai masha ni Yehowa hpe nawku na matu du sa wa na ngu Hagi tsun wa ai. * (Hagi 2:7-9 hpe hti u.) Esaia hte Mihka mung, “hpang jahtum na nhtoi ni hta” byin wa na dai zawn mabyin a lam tau hkrau tsun da ai.​—Esa 2:2-4; Mik 4:1, 2.

11. Mungdan shiga hpe shawng nnan na ai shaloi hpunau langai gara hku bai htang ai kun?

¹¹ Mungkan Ginjaw rung hta magam gun ai hpunau Ken hpe, ndai ashun ai shiga gaw  gara hku akyu jaw wa ai hpe yu yu ga. Lai wa sai 40 ning daram hta, shawng nnan mungdan shiga na lu ai aten hpe shi naw matsing nga ai. Shi ndai hku tsun ai: “Chyum Laika tengman lam hpe shawng nnan na ai shaloi, ndai mungkan a jahtum aten hta asak hkrung nga ai hpe chye lu ai majaw grai kabu ai. Karai a myiman lu na matu, htani htana asak lu na matu, mungkan hte tsan tsan nga ra ai, Yehowa maga ngang ngang tsap ra ai ngu ai lam ni hpe chye wa ai. Akyu hpyi nna kalang ta hkan galaw wa ai. Mungkan hpe kau da nna, ngang grin ai Karai Mungdan a makawp maga lam npu hta shingbyi wa ai.”

12. Jahtum aten laman, Yehowa a ginding aga nawku htingnu gaw hpa ni hte hpring wa ai kun?

¹² Yehowa gaw shi a masha ni hpe shaman chyeju jaw nga ai gaw dan dawng nga ai. Jahtum nhtoi ni laman, nawku ai masha ni grai law htam wa ai. 1914 hta, masha gaw hkying lam daram sha naw re. Ya, Yehowa hpe nawku nga ai masha gaw wan 8 jan sai. Shaning shagu masha wan law law gaw Myit Dum Poi lung ma ai. Dai hku nna, Yehowa a ginding aga nawku htingnu re ai tengman ai nawku dawjau ai lam hta, masha amyu baw yawng kaw na “hpu htum ai” arai ni hte hpring wa ai. Shanhte gaw gawng shingyan ningnan hpe bu hpun wa ai majaw, Yehowa a amying shagrau hkrum wa ai.​—Ehp 4:22-24.

13. Ndai mabyin ni gaw myihtoi ga gara hpe naw hpring tsup shangun ai kun? (Makawp sumla hpe yu u.)

¹³ Myit kahpra hpa ndai mabyin ni gaw, kaga myihtoi ga ni hpe hpring tsup shangun ai. Ga shadawn, Esaia 60:22 hta: “Ma kaji langai mi gaw, masha hkying mi, grau kaji ai wa gaw, n-gun atsam rawng ai amyu, tai na ra ai: ngai Yehowa gaw aten du jang, dai hpe shadut na nngai” ngu tsun da ai. Tengman ai nawku dawjau lam de masha law law du wa ai majaw akyu lu nga ai. Dai zawn, hpu htum ai arai ni re ai manu dan ai masha ni hta, atsam ningja ni, kungkyang ai lam ni amyu myu nga ai. Shanhte gaw, “Mungdan kabu gara shiga” hpe sharawng awng let hkaw tsun nga ai. Akyu hku nna, Yehowa a masha ni gaw, Esaia tsun ai zawn, “maigan amyu ni a chyu” chyu nga ai. (Esa 60:5, 16) Dai manu dan ai num, la ni a karum shingtau lam hte mungdan 240 hta hkaw tsun bungli galaw nga nna, amyu ga 1,000 jan hte laili laika ni dip shapraw nga ai.

14. Masha ni gaw gara dawdan lam hpe ya aten hta jahkrat ra ai kun?

¹⁴ Jahtum aten hta, ashun ai bungli gaw masha ni hpe dawdan lam jahkrat na matu shadut ya nga ai. Karai a Mungdan hpe madi shadaw na kun? (sh) Mungkan asuya ni hpe kamhpa na kun? Ndai gaw masha shagu dawdan ra na lam re. Yehowa a masha ni gaw, tinang nga ai mungdan hta jahkrat da ai upadi ni hpe hkan sa tim, mung masa lam hta tsep kawp lapran nga ai. (Rom 13:1-7) Karai a Mungdan sha, masha ni a manghkang ni hpe hparan ya lu ai hpe chye da ai. Dai Mungdan gaw ndai mungkan hte n seng ai.​—Yhn 18:36, 37.

15. Shingran laika hta sadi dung ai lam hte seng nna gara zawn chyam dinglik lam hpe tsun da ai kun?

¹⁵ Jahtum nhtoi hta, Karai a amyu masha ni a sadi dung ai lam chyam dinglik hkrum na ngu Shingran laika hta tsun da ai. Dai chyam dinglik lam a majaw, laja lana shadut hkrum ai lam ni nga wa na re. Asuya ni gaw shanhte hpe nawku na matu, madi shadaw na matu tsun wa na re. N madat ai ni hpe gaw zingri zingrat na re. (Shr 13:12, 15) Dai hta n-ga, “kaji kaba, sahti kunmi, matsan mayan ni, shanglawt ni hte mayam ni nga manga hte gaw, tinang a hkra lata hta, shing n rai, tinang a lahtan hta, masat dingsat shakap shangun na” re. (Shr 13:16) Moi prat na mayam ni hpe kadai madu ai lam chye hkra, masat dingsat shakap ya ma ai. Dai ni aten hta mung, anhte hta ga shadawn masat dingsat nga na matu masha ni myit mada ai. Lam mi hku tsun yang, gara mung masa hpung shang re ai, kadai hpe madi shadaw ai ngu ai hpe myit masin kaw na mung, galaw ai lam hte mung, madun shangun mayu ai.

16. Ya aten gaw Yehowa a ntsa tawn ai anhte a sadi dung ai lam nangkang ra na aten hpa majaw rai kun?

¹⁶ Masat dingsat n shakap ai ni gaw mayak mahkak ni, shoihpa ni hkrum na re. Dai majaw, masat dingsat shakap ai hpe hkap la nna, asuya ni hpe madi shadaw na kun? “Masat dingsat, n kap ai wa kadai mung, arai mari na hte dut na ahkang n lu” ai ngu Shingran laika hta tsun da ai. (Shr 13:17) Raitim, Shingran 14:9, 10 hta tsun da ai hte maren, masat dingsat shakap da ai ni hpe Karai Kasang hpa galaw na hpe anhte chye ai. Dai majaw, dai masat dingsat shakap hkam na malai, “Yehowa a masha” ngu ai masat dingsat hpe sha, lata kaw shakap da na re. (Esa 44:5) Ya aten gaw, Yehowa a ntsa tawn ai anhte a sadi dung ai lam ngangkang ra na aten re. Rai yang, Yehowa gaw anhte hpe shi madu ai lam kabu gara let ndau shana na re.

17. Yehowa a myit galu ai lam hte seng nna hpa hpe dum ra ai kun?

¹⁷ Hpang jahtum nhtoi hta, Yehowa a myit galu ai lam hpe mu lu ai. Karai Kasang gaw kadai hpe mung hten bya n hkrum shangun mayu ai. (2 Pe 3:9) Myit malai lu na matu, jaw ai dawdan lam ni jahkrat lu na matu, yawng hpe ahkaw ahkang jaw da ai. Raitim, Karai a myit galu ai lam gaw shadawn sharam nga ai. Dai ahkaw ahkang hpe nyet kau ai ni gaw, Mawshe prat na Hpara-u zawn byin na re. Hpara-u hpe Yehowa ndai hku tsun ai: “Nye a lata ngai sharawt nna, nang hpe mung, na a amyu masha ni hpe mung ana ahkya hte ari jaw ma de taw gaw, ndai ga ntsa na nang htum mat na nit dai: Rai ti mung nye a ningsam nang hta dan lu na hte, nye a amying ningsang ga ningtsa ting hta kajai gumhkawng nga u ga, ngu nna sha ngai nang hpe sharawt da sa de ai.” (Pru 9:15, 16)  Yehowa chyu sha tengman ai Karai re ai lam masha amyu baw yawng chye wa na re. (Eze 38:23) Gara hku byin wa na kun?

18. (a) Hagi 2:6, 20-22 hta, gara ashun ai lam hpe tsun da ai kun? (b) Hagi a ga ni htawm hpang hta hpring tsup wa na ngu ai hpe gara hku chye lu ai kun?

¹⁸ Hagi a prat lai nna, shaning law law na ai hpang, kasa Pawlu gaw, Hagi 2:6, 20-22 hta lawm ai ga ni gaw, htawm hpang hta naw hpring tsup ra ai lam hpe ka wa ai. (Hti u.) “Ya tawn da ai ga ndat chyawm gaw, Ginding aga hpe sha n rai, sumsing lamu hpe mung ngai lang mi naw anawn shangun dat na we ai, . . . Lang mi naw, nga ai ga a lachyum gaw, n shamu n shamawt lu ai arai ni gaw dinggrin a nga nga u ga, shamu shamawt lu ai arai ni hpe, galaw da ai arai ni hpe zawn, yeng kau na.” (Heb 12:26, 27) Hagi 2:7 hta tsun da ai ashun ai lam hte n bung ai sha, ndai ashun ai lam gaw, Yehowa a awm dawm ahkang hpe Hpara-u zawn ahkyak n shatai ai ni a matu, htani htana htenza mat na hpe tsun ai re.

19. Gara gaw grin nga na kun? Anhte gara hku chye lu ai kun?

¹⁹ Gara lam gaw n ashun ai sha, grin nga na kun? “N shamu n shamawt lu ai mungdan lu ga ai majaw, anhte gaw hkungga lara nna agam ai myit hte Karai Kasang sharawng awng ai hku daw jau lu hkra, chyeju dum chye ai myit rawng nga ga” ngu nna Pawlu matut tsun ai. (Heb 12:28) Ndai hpang jahtum ashun ai lam ngut ai hpang, Karai a Mungdan gaw n shamu ai sha, grin nga na re. Dai shara kaw sha matut agrin nga na re.​—Shk 110:5, 6; Dan 2:44.

20. Masha ni gaw gara hpe lata ra na kun? Shanhte hpe anhte gara hku karum ya lu ai kun?

²⁰ Aten n nga sai. Mungkan n-gun jaw nga ai prat hkrun lam hpe matut madi shadaw nna jahten hkam na kun? (sh) Karai Kasang ra sharawng ai hte maren asak hkrung nna htani htana asak la na kun? ngu ai hpe masha ni lata ra sana re. (Heb 12:25) Ndai ahkyak ai lam hta, gara maga tsap na ngu ai hpe dawdan lu hkra hkaw tsun ai hku nna masha ni hpe anhte karum ya lu ai. Karai Mungdan maga tsap wa lu hkra manu dan ai masha law law hpe karum ya ga. “Dai mungdan a kabu gara shi ga gaw, masha amyu baw shagu a matu mara sakse tai lu u ga, mungkan ting hta e hkaw dan lu na rai nga ai; dai hpang e dai jahtum ai gaw du na ra ai” ngu ai Madu Yesu a ga hpe ayan dum nga ga.​—Mat 24:14.