1-2. Wetin prɔfɛt Egay bin se go apin insay wi tɛm?

 “INSAY shɔt tɛm, di shɔp dɛn ɛn di ol bildin dɛn bigin fɔ fɔdɔm.” “Ɔlman bin fred . . . Bɔku pipul dɛn se i apin fɔ lɛk tu minit. To mi, i tan lɛk i apin fɔ lɔng tɛm.” Na dɛn wɔd dɛn ya di wan dɛn we bin sev na wan atkwek we bin apin na Nepal insay di ia 2015 bin tɔk. If bad tin lɛk dat bin apin to yu, i nɔ go izi fɔ mek yu fɔgɛt am.

² Bɔt rayt naw, i pas wan siti ɔ kɔntri we de shek difrɛn we. Jiova de shek ɔl di neshɔn dɛn na di wɔl, ɛn i dɔn de du dis fɔ lɔng tɛm. Di prɔfɛt Egay bin tɔk bɔt dat. I bin rayt se: “Dis na wetin Jiova we gɛt bɔku bɔku sojaman dɛn se, ‘Wan mɔ tɛm ɛn i nɔ go te igen, a go shek di ɛvin ɛn di wɔl ɛn di si ɛn di dray land.’”—Egay 2:​6, NWT.

3. Aw di shek we Egay tɔk bɔt difrɛn frɔm rial atkwek?

³ Di shek we Egay bin tɔk bɔt nɔto rial atkwek, we de fɔ pwɛl nɔmɔ. Bɔt na wan we de mek gud tin dɛn apin. Jiova insɛf sɛf tɛl wi se: “A go shek ɔl di neshɔn dɛn, ɛn di valyu tin dɛn na ɔl di neshɔn dɛn go kam insay, ɛn a go fulɔp dis os wit glori.” (Egay 2:​7, NWT) Wetin dis prɔfɛsi bin min fɔ di wan dɛn we bin de insay Egay in tɛm? Ɛn wetin i min fɔ wi tide? Wi go tɔk bɔt di ansa dɛn to dɛn kwɛstyɔn dɛn ya. Dɔn bak, wi go lan aw wi go ɛp fɔ shek di neshɔn dɛn tide.

4. Wetin mek Jiova bin sɛn prɔfɛt Egay to In pipul dɛn?

⁴ Jiova bin gi prɔfɛt Egay wan impɔtant wok fɔ du. Tink bɔt wetin bin apin bifo dat. I go mɔs bi se Egay na bin wan pan di pipul dɛn we bin de na ɛgzayl na  Babilɔn, bɔt we ritɔn bak na Jerusɛlɛm insay di ia 537 Bifo Krays. Jɔs afta we dɛn bin rich na Jerusɛlɛm, Jiova dɛn in fetful savant dɛn de bin bigin fɔ bil in os, ɔ tɛmpul. (Ɛzra 3:​8, 10) Bɔt i nɔ te, sɔntin bin apin we bin mek dɛn at pwɛl. Dɛn at bin pwɛl ɛn dɛn lɛf fɔ bil di tɛmpul bikɔs di ɔda pipul dɛn na di eria bin de agens dɛn. (Ɛzra 4:​4; Egay 1:​1, 2) So insay di ia 520 Bifo Krays, Jiova bin tɛl Egay fɔ ɛp di Ju pipul dɛn fɔ gɛt zil bak ɛn ɛnkɔrej dɛn fɔ dɔn fɔ bil di tɛmpul. *—Ɛzra 6:​14, 15.

5. Wetin mek Egay in mɛsej go mɔs dɔn ɛnkɔrej Gɔd in pipul dɛn?

⁵ Egay in mɛsej na bin fɔ ɛp di pipul dɛn fɔ mek dɛn gɛt fet pan Jiova. Di prɔfɛt bin gɛt maynd fɔ tɔk dɛn wɔd dɛn ya to di Ju pipul dɛn we dɛn at bin pwɛl. I bin se: “Jiova se, ‘Ɔl di pipul dɛn na di land unasɛf gɛt maynd ɛn una wok.’ Jiova we gɛt bɔku bɔku sojaman dɛn se, ‘A de wit una.’” (Egay 2:​4, NWT) Di wɔd dɛn “Jiova we gɛt bɔku bɔku sojaman dɛn” go mɔs dɔn ɛnkɔrej dɛn. Jiova gɛt bɔku bɔku sojaman dɛn we na enjɛl dɛn we de ɔnda am, so di Ju dɛn bin nid fɔ abop pan am fɔ mek dɛn go ebul fɔ dɔn di wok.

6. Wetin go apin bikɔs ɔf di shek we Egay bin tɔk bɔt?

⁶ Jiova bin sɛn Egay fɔ tɛl di Ju pipul dɛn se I go shek ɔl di neshɔn dɛn. Dis tin we Jiova sho Egay bin ɛnkɔrej di Ju pipul dɛn we dɛn at bin dɔn pwɛl ɛn we bin dɔn stɔp fɔ bil di tɛmpul. Dis vishɔn bin sho se Jiova go shek Pashia, we na bin di wɔl pawa da tɛm de. Ɛn wetin go apin we Jiova go shek Pashia? Fɔs, Gɔd in pipul dɛn go dɔn fɔ bil di tɛmpul. Dɔn, ivin di wan dɛn we nɔto Ju go jɔyn dɛn fɔ wɔship Jiova na da tɛmpul de we dɛn dɔn bil bak. Da mɛsej de bin rili ɛnkɔrej Gɔd in pipul dɛn.—Zɛk. 8:​9.

7. Us wok we wi go ɛp fɔ du tide? Ɛksplen.

⁷ Wetin Egay in prɔfɛsi min fɔ wi tide? Wan mɔ tɛm, Jiova de shek ɔl di neshɔn dɛn, ɛn dis tɛm wi de ɛp fɔ du da wok de. Tink bɔt dis: Insay 1914, Jiova bin mek Jizɔs Krays di Kiŋ na In Kiŋdɔm we de na ɛvin. (Sam 2:​6) Na bin bad nyuz fɔ di gɔvmɛnt dɛn na di wɔl, we da Kiŋdɔm de bigin fɔ rul. I min se “di tɛm we dɛn gi di neshɔn dɛn” dɔn dɔn, dat min se di tɛm we no rula nɔ bin tinap fɔ Jiova dɔn dɔn. (Lyuk 21:​24) Fɔ da rizin de, mɔ frɔm di ia 1919, Jiova in pipul dɛn dɔn de tɛl ɔlman se na Gɔd in Kiŋdɔm na di wangren op fɔ mɔtalman. Dis prichin bɔt di “gud nyuz bɔt di Kiŋdɔm” dɔn shek di wan ol wɔl.—Mat. 24:​14.

8. Akɔdin to Di Sam Dɛm 2:​1-3, wetin bɔku neshɔn dɛn dɔn du we dɛn yɛri dis mɛsej?

⁸ Wetin pipul dɛn dɔn du we dɛn yɛri dis mɛsej? Bɔku pan dɛn nɔ de lisin to dis mɛsej. (Rid Di Sam Dɛm 2:​1-3.) Di neshɔn dɛn dɔn vɛks. Dɛn nɔ want di Rula we Jiova dɔn pik. Dɛn nɔ de si di Kiŋdɔm mɛsej we wi de prich as “gud nyuz.” Infakt, sɔm gɔvmɛnt dɛn dɔn ivin ban di prichin wok. Pan ɔl we bɔku pan di rula dɛn na dɛn neshɔn dɛn ya se  dɛn de sav Gɔd, dɛn nɔ want fɔ lɛf di pawa we dɛn gɛt. So jɔs lɛk di rula dɛn we bin de insay Jizɔs in tɛm, di wan dɛn we de tide de agens di Wan we Jiova Dɔn Anɔynt bay we dɛn de atak in fetful disaypul dɛn.—Akt 4:​25-28.

9. Di neshɔn dɛn nɔ want fɔ lisin to di Kiŋdɔm mɛsej, so aw Jiova de tray fɔ ɛp dɛn?

⁹ Wetin Jiova de du we i si se bɔku neshɔn dɛn nɔ lɛk dis mɛsej? Di Sam Dɛm 2:​10-12 ansa se: ‘Lɛ dɛn we na kiŋ biev lɛk udat dɛn gɛt sɛns; lɛ di jɔj dɛn na di wɔl tek kɔrɛkshɔn. Gɛt fred we yu de sav PAPA GƆD [“Jiova,” NWT], ɛn we yu gladi sɛf, du am wit fred. Put yusɛf dɔŋ bifo PAPA GƆD in bɔypikin mek i nɔ vɛks ɛn dɔnawe wit yu, bikɔs i kin vɛks ɛnitɛm. I go fayn fɔ ɔl udat de go to Am fɔ mek I kɔba dɛn.’ Jiova na gud Gɔd, ɛn i de gi dɛn chans fɔ lɛ dɛn disayd fɔ du di rayt tin. Dɛn go stil ebul fɔ chenj dɛn maynd ɛn gri mek Jiova in Kiŋdɔm rul dɛn. Bɔt, bɛtɛ tɛm nɔ lɛf igen. Wi de na “di las dez” fɔ lɛ dis wɔl dɔn. (2 Tim. 3:​1; Ayz. 61:​2) I ɔjɛnt naw pas ɛni ɔda tɛm fɔ lɛ pipul dɛn no di trut ɛn disayd fɔ sav Jiova.

10. Us fayn tin Egay 2:​7-9 (NWT) tɔk se go apin we Gɔd go shek di neshɔn dɛn?

¹⁰ Sɔm pipul dɛn gladi fɔ dis shek we Egay bin dɔn tɔk se Gɔd go shek ɔl di neshɔn dɛn. I tɛl wi se we Gɔd go shek ɔl di neshɔn dɛn, dat go mek “di valyu tin dɛn [pipul dɛn we want fɔ lan bɔt Gɔd] na ɔl di neshɔn dɛn go kam” fɔ wɔship Jiova. * (Rid Egay 2:​7-9, NWT.) Ayzaya ɛn Mayka bin dɔn tɔk se dis kayn tin go apin “insay di las dez.”—Ayz. 2:​2-4, NWT; Mayk. 4:​1, 2, NWT.

11. Wetin wan brɔda bin du di fɔs tɛm we i yɛri di Kiŋdɔm mɛsej?

¹¹ Tink bɔt wetin wan brɔda we nem Kɛn, we de sav na di wɔl ɛdkwata bin du we i yɛri da wɔndaful mɛsej de. Na  lɛk 40 ia dɔn pas frɔm we i bin yɛri di Kiŋdɔm mɛsej fɔ di fɔs tɛm, ɛn i stil mɛmba klia wan wetin bin apin da tɛm de. Kɛn se: “Di fɔs tɛm we a yɛri di trut na Gɔd in Wɔd, a bin gladi fɔ lan se wi de na di las dez na dis wɔl. A bin si se fɔ lɛ Gɔd gladi fɔ mi, ɛn fɔ lɛ a gɛt layf we go de sote go, a fɔ mek shɔ se a nɔ de pat na dis wɔl we nɔ go kam wit bɛtɛ fɔ wi, ɛn a nɔ fɔ ɛva kɔmɔt biɛn Jiova. Wantɛm wantɛm, a bin mekɔp mi maynd fɔ du dat, ɛn a pre to Jiova bɔt dat. A stɔp fɔ sɔpɔt dis wɔl ɛn gri kwik kwik wan fɔ lɛ Gɔd in Kiŋdɔm we go de sote go, protɛkt mi.”

12. Aw Jiova in spirichwal tɛmpul dɔn fulɔp wit glori insay dis las dez?

¹² Wi de si klia wan se Jiova dɔn de blɛs in pipul dɛn. Insay dis las dez, wi dɔn si we bɔku pipul dɛn dɔn stat fɔ wɔship am. Insay 1914, i bin pas 5,000 Jiova Witnɛs dɛn we bin de. Naw, i dɔn pas et milyɔn pipul dɛn we de wok tranga wan fɔ wɔship Gɔd, ɛn bɔku ɔda pipul dɛn kin jɔyn wi ɛni ia fɔ di Mɛmorial. Dis de mek Jiova in spirichwal tɛmpul, we na in arenjmɛnt fɔ wɔship am di rayt we, de fulɔp wit “di valyu tin dɛn na ɔl di neshɔn dɛn.” Dɔn bak, we dɛn pipul dɛn ya de chenj dɛn layf ɛn gɛt nyu abit dɛn, dat de briŋ prez to Jiova in nem.—Ɛfi. 4:​22-24.

13. We bɔku pipul dɛn de kam fɔ wɔship Jiova, us ɔda prɔfɛsi dɛn dɔn kam tru? (Luk di pikchɔ na di frɔnt pej.)

¹³ Dɛn fayn tin dɛn ya we de apin dɔn mek ɔda prɔfɛsi dɛn kam tru, lɛk di wan we de na Ayzaya chapta 60. Vas 22 na da chapta de se: “Di las wan go bi [wan tawzin], ɛn di wan we smɔl pas ɔl go bi wan big big neshɔn; mi na PAPA GƆD [“Jiova,” NWT]; we di tɛm rich, a go mekes du am.” Bikɔs bɔku pipul dɛn de kam fɔ wɔship Jiova, wan wɔndaful tin de apin. Dɛn “valyu tin dɛn” ya, ɔ pipul dɛn, sabi du difrɛn difrɛn tin dɛn, ɛn dɛn gladi fɔ prich di “gud nyuz bɔt di Kiŋdɔm.” So dat dɔn mek Jiova in pipul dɛn ebul fɔ yuz dɛn tin dɛn de we dɛn sabi du, we Ayzaya kɔl di  “neshɔn dɛn milk.” (Ayz. 60:​5, 16) Dɛn man ɛn uman dɛn ya we gɛt valyu, de ɛp fɔ prich di gud nyuz na 240 kɔntri dɛn, ɛn dɛn de mek wi pɔblikeshɔn dɛn insay pas 1,000 langwej dɛn.

14. Wetin pipul dɛn go nid fɔ disayd naw?

¹⁴ Insay dis las dez, di prichin wok we de shek di neshɔn dɛn de fos pipul dɛn fɔ disayd wetin dɛn fɔ du. Fɔ se dɛn go sɔpɔt Gɔd in Kiŋdɔm ɔ dɛn go abop pan di gɔvmɛnt dɛn na dis wɔl? Dis na tin we ɔlman gɛt fɔ disayd fɔ insɛf. Pan ɔl we Jiova in pipul dɛn de obe di lɔ dɛn we di gɔvmɛnt dɔn put na di kɔntri we dɛn de, dɛn nɔ de put an pan ɛnitin we gɛt fɔ du wit pɔlitiks na dis wɔl. (Rom. 13:​1-7) Dɛn no se na Gɔd in Kiŋdɔm nɔmɔ go sɔlv mɔtalman in prɔblɛm dɛn. Da Kiŋdɔm de nɔ de na dis wɔl.—Jɔn 18:​36, 37.

15. Us big tɛst we di Baybul buk we nem Rɛvɛleshɔn tɔk bɔt?

¹⁵ Di Baybul buk we nem Rɛvɛleshɔn tɔk se insay di las dez, dɛn go tɛst di we aw Gɔd in pipul dɛn de biɛn Am. Da tɛst de go mek pipul dɛn de agens wi ɛn du bad bad tin dɛn to wi. Di gɔvmɛnt dɛn na dis wɔl go tawa se paopa wi fɔ wɔship dɛn, ɛn dɛn go mek di wan dɛn we nɔ gri fɔ sɔpɔt dɛn, sɔfa. (Rɛv. 13:​12, 15) Dɛn go “fos ɔlman—di kɔmɔn wan dɛn ɛn di wan dɛn we gɛt ay pozishɔn, di wan dɛn we jɛntri ɛn di wan dɛn we po, di wan dɛn we na slev ɛn di wan dɛn we nɔto slev—fɔ mek dɛn mak dɛn na dɛn raytan ɔ na dɛn fɔɛd.” (Rɛv. 13:​16) Dɛn bin de mak slev dɛn trade fɔ sho udat gɛt dɛn. Semweso, pipul dɛn tide go ɛkspɛkt se ɔlman fɔ sho udat dɛn de sɔpɔt. Dɛn go want ɔlman fɔ sho se dɛn de sɔpɔt di gɔvmɛnt dɛn bay di we aw dɛn de tink ɛn di tin dɛn we dɛn de du.

16. Wetin mek i ɔjɛnt naw fɔ lɛ wi du di tin dɛn we go mek wi kɔntinyu fɔ de biɛn Jiova?

¹⁶ Fɔ se wi go gri fɔ tek dis mak ɛn sɔpɔt di gɔvmɛnt dɛn na dis wɔl? Di wan dɛn we nɔ gri fɔ tek di mak go gɛt bɔku prɔblɛm dɛn, ɛn dɛn layf go de pan denja. Di Baybul buk we nem Rɛvɛleshɔn ɛksplen se: “Nɔbɔdi nɔ ebul fɔ bay ɔ sɛl pas di wan we gɛt di mak.” (Rɛv. 13:​17) Bɔt Gɔd in pipul dɛn no wetin Gɔd go du to di wan dɛn we gɛt di mak we Rɛvɛleshɔn 14:​9, 10 tɔk bɔt. Dɛn nɔ go tek da mak de. Bifo dat, i go tan lɛk se dɛn rayt dɛn wɔd dɛn ya na dɛn an: “PAPA GƆD [“Jiova,” NWT] in yon.” (Ayz. 44:​5) Na naw wi fɔ mek shɔ se wi rili de biɛn Jiova. If wi du dat, Jiova go gladi fɔ se wi na in yon.

17. Wetin wi nid fɔ mɛmba bɔt di peshɛnt we Jiova de peshɛnt?

¹⁷ Insay dɛn las dez ya, Jiova dɔn sho se i rili peshɛnt. I nɔ want fɔ dɔnawe wit ɛnibɔdi. (2 Pit. 3:​9) I dɔn gi ɔlman di chans fɔ ripɛnt ɛn disayd fɔ sav am. Bɔt i nɔ go kɔntinyu fɔ peshɛnt sote go. Di tin we go apin to di wan dɛn we nɔ gri fɔ sɔpɔt Gɔd in Kiŋdɔm, go fiba wetin bin apin to Fɛro insay Mozis in tɛm. Jiova bin tɛl Fɛro se: ‘A bin fɔ dɔn put sik pan yu ɛn yu pipul dɛn we bin fɔ mek una day kɔmɔt na di wɔl. Bɔt a nɔ mek una day bikɔs a gɛt mi rizin. A wan sho una mi pawa so dat pipul dɛn  ɔlsay na di wɔl go yɛri bɔt mi.’ (Ɛks. 9:​15, 16) Ɔl di neshɔn dɛn go gɛt fɔ no se Jiova na di wangren tru Gɔd. (Izi. 38:​23) Aw dis go apin?

18. (a) Us ɔda kayn shek we Egay 2:​6, 20-22 tɔk bɔt? (b) Aw wi no se di tin we Egay tɔk go apin tumara bambay?

¹⁸ Lɔng tɛm afta Egay day, apɔsul Pɔl bin rayt to di Ibru Kristian dɛn se di tin we Egay 2:​6, 20-22 tɔk bɔt go gɛt fɔ apin tumara bambay. (Rid.) Pɔl rayt se: “Naw i dɔn prɔmis se: ‘A nɔ go jɔs shek di wɔl igen, bɔt a go shek ɛvin bak.’ Di wɔd ‘igen’ de sho se dɛn go pul di tin dɛn we dɛn shek, di tin dɛn we dɛn bin dɔn mek, so dat di tin dɛn we nɔ shek go lɛf.” (Ibru. 12:​26, 27) Dis shek we apɔsul Pɔl tɔk bɔt, difrɛn frɔm di wan we Egay 2:​7 tɔk bɔt. Dis wan min se di wan dɛn we tan lɛk Fɛro, we nɔ gri se na Jiova gɛt di rayt fɔ rul, nɔ go de igen bikɔs Jiova go dɔnawe wit dɛn sote go.

19. Wetin dɛn nɔ gɛt fɔ shek, ɛn aw wi no dat?

¹⁹ Wetin dɛn nɔ gɛt fɔ shek ɔ pul kɔmɔt? Pɔl kɔntinyu fɔ tɔk se: “Bikɔs wi go gɛt Kiŋdɔm we dɛn nɔ ebul shek, lɛ wi kɔntinyu fɔ gɛt Gɔd in spɛshal gudnɛs, we go mek Gɔd gri fɔ mek wi du oli wok fɔ am ɛn sho se wi de rili fred am.” (Ibru. 12:​28) Afta di las shek, na Gɔd in Kiŋdɔm nɔmɔ go tinap. Na in wan go kɔntinyu fɔ de sote go.—Sam 110:​5, 6; Dan. 2:​44.

20. Wetin pipul dɛn fɔ disayd, ɛn aw wi go ɛp dɛn?

²⁰ Bɛtɛ tɛm nɔ lɛf igen. Pipul dɛn fɔ disayd wetin dɛn go du: If dɛn disayd fɔ kɔntinyu fɔ sɔpɔt dis wɔl, Gɔd go dɔnawe wit dɛn. If dɛn disayd fɔ sav Jiova ɛn chenj dɛn layf so dat dɛn go du wetin i want, dɛn go gɛt layf we go de sote go. (Ibru. 12:​25) Di prichin wok de mek wi ɛp pipul dɛn fɔ disayd fɔ du dis impɔtant tin. Lɛ wi ɛp bɔku ɔda pipul dɛn we gɛt valyu fɔ mek dɛn go disayd fɔ sɔpɔt Gɔd in Kiŋdɔm. Ɛn lɛ wi mɛmba ɔltɛm wetin wi Masta Jizɔs bin tɔk. I bin se: “Dɛn go prich dis gud nyuz bɔt di Kiŋdɔm na di wan ol wɔl so dat ɔl di neshɔn dɛn go gɛt chans fɔ yɛri, dɔn di ɛnd go kam.”—Mat. 24:​14.