1-2. Uporofete musinke ga pumbire Hagayi ou una kuhoroka mosiruwo setu?

NONKANGO edi nadi ka kwama ko, kuna kara edi va uyungire vantu vamwe ava va parukire apa lya horokere ekankamo lyevhu mosirongo saNepal mo-2015. Awo kwa tanta asi: “Yitora nomatungo ganare, kwa tamekere kugwa monominute tupu dongandi. Nkenye ogu kwa piyaganene. Ano sinzi sovantu kwa uyungire asi ekankamo olyo kwa gusire tupu nominute mbali.” Ngano asi nove ya ku horokera yuma yokufana ngoso, ove ngano kapi ngo divara sihorokwa oso.

² Nye nampili ngoso, pwa kara ekankamo eli lina kuhoroka moyirongo yoyinzi neina. Jehova kuna ku kankamesa nomuhoko nadinye domouzuni ntani age kwa yirugana nomvhura dononzi. Muporofete Hagayi yige ga pumbire uporofete ou. Age kwa tjenge eyi ga uyungire Jehova asi: “Kapisi siruwo ko sosire, makura ngani kankamese eguru nevhu, sirongo nefuta.”—Hag. 2:6.

3. Ngapi omu ekankamo eli ga fatwilire Hagayi lya lisiga nekankamo lyevhu?

³ Ekankamo eli ga fatwilire Hagayi, lya lisiga nekankamo lyevhu eli ali zonagura tupu yininke. Nye ekankamo eli ga fatwilire Hagayi, kureta yitundwamo yoyiwa. Jehova mwene kwa uyungire asi: “Ngani kankamesa nomuhoko nadinye, emona lyawo ngava li reta omu, ano ntembeli ngazi zura ugawo.” (Hag. 2:7, NW) Yisinke wa tente uporofete ou kovantu ava va parukire mosiruwo saHagayi? Ntani yisinke au tanta mosiruwo setu? Ta tu ka zogera malimbururo komapuro ogo ntani natu ka lironga omu nose neina tuna ku lihameka mo mekankamo olyo.

4. Morwasinke Jehova ga tuminine muporofete Hagayi kovantu vendi?

⁴ Jehova kwa pere muporofete Hagayi sirugana somulyo. Gazadareni ko tupu kweyi ya horokere komeho Jehova a mu pe sirugana oso. Ayo kumoneka asi Hagayi nage kwa kere gumwe gwava va ka tundire mounkwate waBabironi va ze ko Jerusarema, momvhura 537 komeho a wize Jesus pevhu. Konyima tupu zapa va ka sikire moJerusarema, vakareli wovalimburukwi vaJehova kwa ka tamekere kudika ntembeli. (Esir. 3:8, 10) Nye koyili yoyidona eyi ya horokere konyima tupu zapa va tamekere kudika ntembeli. Awo kwa hagekere kudika ntembeli morwa vantu womomukunda kwa va rwanesere. (Esir. 4:4; Hag. 1:1, 2) Yipo nye, momvhura 520 komeho a wize Jesus pevhu, Jehova kwa tanterere Hagayi yipo a vatere Vajuda pokuvakorangeda va kare noupampi nokumanesa kudika ntembeli. *—Esir. 6:14, 15.

5. Morwasinke mbudi zaHagayi za karerere zekorangedo kovantu vaKarunga?

⁵ Sitambo sombudi zaHagayi kwa kere sokunkondopeka epuro lyoVajuda. Hagayi kwa tanterere Vajudambudi ezi za tundire kwa Jehova. Age kwa tanterere Vajuda ava va guvire asi: “Nye ntaantani, kareni nomupampi namuvenye. Ruganeni yirugana, morwa ame neni na kara.” (Hag. 2:4) Nonkango odo nampo da hengagwidire Vajuda. Mokumona asi Jehova ga kara nombunga zonene zo vakwayita vemeguru, Vajuda va hepere kuhuguvara mwendi yipo yi va tompoke.

6. Mauwa musinke za vhulire kureta mbudi ezi ga uyungire Hagayi?

⁶ Jehova kwa tumine Hagayi a tware mbudi koVajuda, noku ka va tantera asi Jehova nga kankamesa nomuhoko nadinye. Emoneko lina kwa korangedere Vajuda ava va dompere nomutjima nokuhageka kutunga ntembeli. Ntani alyo kwa likidire hena asi Jehova nga kankamesa epangero lyaPeresiya eli lya kere nononkondo dononene posiruwo sina. Yitundwamo musinke ya kere morwa ekankamo lina? Sokuhova, vantu vaKarunga va vhulire kumana kutunga ntembeli. Ntani nampili vantu ava va dilire ku kara asi Vajuda, nawo va ya tamekere ku karera Jehova kontembeli ezi va tungwilire. Mbudi zina kwa korangedere unene vantu vaKarunga.—Sak. 8:9.

7. Sirugana musinke sokukankamesa nomuhoko tuna kurugana neina? Faturura.

⁷ Yisinke au tanta uporofete waHagayi momazuva getu? Jehova simpe kuna ku kankamesa nomuhoko neina ntani nose kuna kulihameka mo mosirugana oso. Gazadareni ko kositwa esi: Mo-1914, Jehova kwa horowere Jesus Kristusa a kare Hompa goUhompa wemeguru. (Epis. 2:6) Apa wa tamekere kupangera Uhompa ou, azo kwa kere mbudi zondona kovapitisili womapangero gepevhu. Eyi kwa tente asi ‘siruwo sovapagani sa ya hege.’ Esi kwa kere siruwo esi pwa dilire ku kara mupangeli ogu ga karera po Jehova. (Ruk. 21:24) Yipo nye, kutundilira mo-1919, vantu vaJehova kwa tamekere kutantera ko wopeke asi Uhompa waKarunga yiwo welike ngau ya gusa po maudigu govantu. Sirugana esi sokuzuvhisa “Mbudi zongwa ezi zoUhompa” kwa kankamesa uzuni naunye.—Mat. 24:14.

8. Kuliza noMapisarome 2:1-3, ngapi omu sinzi sonomuhoko adi tara mbudi zetu?

⁸ Ngapi omu vantu ava tara mbudi ezi a tu zuvhisa? Sinzi sawo kunyoka ku zi tambura. (Resa Episarome 2:1-3.) Mbudi ozo kwa handukisa nomuhoko. Awo kunyoka ku tambura  mupangeli ogu ga horowora Jehova. Awo kapi ava tara mbudi ezi a tu zuvhisa asi “mbudi zongwa.” Mapangero gamwe kwa silika sirugana setu sokuzuvhisa. Nampili ngomu sinzi sovapangeli ava uyunga asi awo kukarera Karunga, nye kapi va hara ku siga unankondo wawo wokupangera. Ngwendi moomu tupu vapangeli womosiruwo saJesus ngava mu hepeke, vapangeli va neina nawo kunyoka kutambura Jesus pokuhepeka varongwa vendi.—Yirug. 4:25-28.

9. Ngapi omu Jehova ana kuvatera nomuhoko nampili ngomu da nyoka kutambura mbudi zendi?

⁹ Nampili ngomu nomuhoko da nyoka kutambura mbudi zaJehova, yisinke ana kurugana ko Jehova mokuvavatera? Episarome 2:10-12 kwa gava elimbururo asi: “Purakeneni kwange, kareni nonondunge, one ohompa; sigeni va mu korangede, one vapangeli vepevhu! Ruganeneni HOMPA noutjirwe, one mu hafe oku tomu kankama! Ncumiteni Muna, neisi a handuka makura mu dongonokere monzira; yeeyi ehandu lyendi kuhwama usimbu. Verago vava ava vanda mwendi!” Jehova kwa kara nonkenda ntani kugava siruwo kovantu owo yipo va tulise po etokoro lyewa. Awo kuvhura kulitjindja nokutambura upangeli waJehova. Nye nampili ngoso, siruwo sisesu sina hupuko. Ose kuna kuparuka “pomazuva gopouhura” gouzuni woyininke yoyidona. (2 Tim. 3:1; Jes. 61:2) Sirugana esi, sina kara nongenderera unene yipo vantu va lironge usili nokukarera Jehova.

10. Kuliza naHagayi 2:7-9, ngapi omu vantu va gwanena mo uwa mosirugana sekankamo eli ga pumbire Hagayi?

¹⁰ Vantu vamwe kwa gwanena mo uwa mekankamo eli ga pumbire Hagayi. Age kwa tente asi ekankamo olyo lyonomuhoko ngali ninkisa “emona lyawo” [vantu wonomutjima donongwa] va tameke kukarera Jehova. * (Resa Hagayi 2:7-9.) Jesaya naMika nawo kwa pumbire asi yininke oyo yiyo ngayi horoka “pomazuva gopouhura.”—Jes. 2:2-4; Mika 4:1, 2.

11. Yisinke ga rugene munazinyetu gumwe apa ga zuvhire sikando sokuhova kuhamena mbudi zoUhompa?

¹¹ Tu zeni tu ka tare omu mbudi zekankamo  lyonomuhoko za kundamene munazinyetu Ken, ogu a rugana komberewa zonene zoNombangi daJehova. Age simpe kudiworoka sikando sendi sokuhova, apa ga zuvhire mbudi zoUhompa nomvhura 40 da kapita. Ken kwa uyunga asi: “Ame kwa hefe apa na zuvhire sikando sange sokuhova usili womoNonkango daKarunga asi ose kuna kuparuka pomazuva gopouhura. Ame nayi dimbwilire asi mokuninka asi ni ka gwane mwenyo gwanarunye, na hepere kuligusa ko kouzuni yipo ni hame kwaJehova. Yipo na kanderere kwaJehova nokurugana eyi na tokwere. Konyima ame kwa tokwere kudira ku kwatesa ko yininke yomouzuni nokuhama kepangero lyaJehova eli ngali dira kuhaga po.”

12. Ngapi omu ntembeli zaJehova zopampepo va zi yererepeka pomazuva aga gopouhura?

¹² Yosili, Jehova kwa twikira kutungika vantu vendi. Pomazuva aga gopouhura, ose kuna kumona sivaro sovantu omu sina kuligwederera sava va na ku karera Jehova. Mo-1914, vakareli vaJehova kwa kere tupu wovasesu. Nye ngesi sivaro sovakareli vaJehova sina pitakana mamiliyona ntantatu ntani mamiliyona govantu kulipakerera nose pomurarero gwaHompa. Monkedi zangesi, ntembeli zopampepo zaJehova ezi za fanekesa ewapaiko lyoukareli wendi wousili, kuna zura mo “emona lyonomuhoko nadinye,” eyi kutanta asi vantu wonomutjima donongwa. Edina lyaJehova kwa li yererepeka hena apa vantu owo ava tura po malitjindjo meparu lyawo nokudwara muntu gomupe.—Efe 4:22-24.

13. Mokumona asi sivaro sovantu vaJehova sa ligwederera, mauporofete musinke hena gamwe ga sika mo? (Tara efano lyopontunda)

¹³ Mokumona asi vantu kwa ku karera Jehova, eyi kwa ninkisa hena mauporofete gamwe ga sikilire mo, pasihonena uporofete ou wa kara mwaJesaya 60. Jesaya 60:22 kwa uyunga asi: “Nepata lyeeli lyenunu lyesupi ngali nenepa tali nkondopa ngwendi muhoko. Apa ngasi sika mo siruwo, ngani yi ninka yi horoke usimbu eyi. Ame nyame HOMPA!” Koyili hena yininke yimwe yoyiwa yina kuhoroka morwa sinzi sovantu kwa tameka kukarera Jehova. Vantu owo va kara nomaudivi gokulisiga-siga ntani awo va kara neharo lyokulihameka mosirugana sokuzuvhisa “mbudi zongwa  zoUhompa.” Ngoyitundwamo, vantu vaKarunga kuvhura kuruganesa udivi wawo. (Jes. 60:5, 16) Nevatero lyovantu owo, sirugana sokuzuvhisa kuna kusirugana moyirongo yokusika po 240 ntani kuna kutoroka yimbapiratjangwa momaraka gokupitakana po-1000.

14. Etokoro musinke va hepa kutura po ngesi vantu?

¹⁴ Ngomu uhura wouzuni una kuhedera pepi, ekankamo eli lyonomuhoko kuna kuninkisa vantu va ture po etokoro. Va hepa kutokora nsene asi tava kwatesa ko Uhompa waKarunga ndi mapangero gouzuni ou. Ano eli kuna kara etokoro eli ga hepa kutura po nkenye gumwe. Nampili ngomu vakareli vaJehova ava limburukwa noveta domosirongo esi va tunga, nye awo kapi ava lihameke momaupolitika. (Rom. 13:1-7) Awo va yi diva asi Uhompa waKarunga yiwo welike ngau gusa po maudigu govantu. Uhompa owo kapi wa hamena kouzuni ou.—Joh. 18:36, 37.

15. Eheteko musinke va tumbura mobuke zEhororo, eli ngava ligwanekera nalyo vantu vaKarunga?

¹⁵ Buke zEhororo kututantera eheteko eli ngava li gwanekera nalyo vakareli vaJehova pomazuva gopouhura. Eheteko olyo ngali ninkisa va tu rwanese nokutuhepeka unene. Mapangero gouzuni ou ngaga rwanesa ukareli wetu ntani ngava hepeka vantu ava ngava nyoka kuvakwatesa ko. (Ehor. 13:12, 15) Awo ngava ninka “vantu navenye, ava va fumana nava va dira kufumana, nongawo novahepwe, ava va manguruka nava va dira kumanguruka, va va ture yidiviso komawoko gawo gokorulyo ndi poyipara yawo.” (Ehor. 13:16) Vapika vanare ngava va tura yidiviso mokulikida asi kwalye ga hamena mupika ogo. Mokulifana naneina, nkenye muntu ngava ndindira ko kwendi ayi likide asi kwalye ga hamena. Awo ngava ndindira ko kwa nkenye gumwe ayi likide momagazaro nomoyirugana yendi asi kwa hamena koupolitika ntani kuukwatesa ko.

16. Morwasinke yina karere nomulyo tu limburukwe Jehova unene?

¹⁶ Ose ngatu tambura sidiviso sopasifanekeso nokukwatesa ko maupolitika ndi? Ava ngava nyoka kutambura sidiviso oso, ngava ligwanekera nomaudigu ntani ngava kara mosiponga. Buke zEhororo kwa tanta asi: “Kwato ogu na randa ndi a randese, nsene kapi ga kara nosidiviso.” (Ehor. 13:17) Nye vantu vaKarunga va diva eyi nga rugana Karunga kwava va kara nosidiviso esi va tumbura mEhororo 14:9, 10. Mevango lyokutambura sidiviso oso, awo ngava litjanga pasifanekeso pomawoko gawo asi “Ame gwaHOMPA.” (Jes. 44:5) Esi kuna kara siruwo sokulimburukwa unene Jehova. Nsene tu yirugana ngoso, Jehova nga hafa nokuuyunga asi ose kwa hamena kwendi!

17. Yisinke twa hepa kudiworoka kuhamena elididimiko lyaJehova?

¹⁷ Jehova kwa likida elididimiko lyenene pomazuva gopouhura. Age kapi ga hara asi ngapa ka zonauke nampili gumwe. (2 Pet. 3:9) Age kwa pa vantu navenye mpito zokulitezurura yipo va mu karere. Age kapi nga twikira kundindira dogoro narunye. Ava ngava nyoka kukwatesa ko Uhompa waKarunga, ngava ligwanekera noyitundwamo ngwendi eyi ya horokerere Farawo momazuva gaMosesa. Jehova kwa tanterere Farawo asi: “Yeeyi apa ngesi nkare ni gonone kuwoko kwange koge, ni ku toone novantu woge ni mu zone po nehamba, ove ngano kuna ku kombo ko kontunda zevhu. Nye eyi nina ku sigire po yeeyi asi, ni ku likide nonkondo dange asi edina lyange ngava li zuvhise mouzuni mudima.” (Ex. 9:15, 16) Yirongo nayinye ngayi diva asi Jehova yige Karunga gosili. (Hes. 38:23) Ngapi omu ngayi horoka eyi?

18. (a) Ekankamo musinke hena limwe va faturura mwaHagayi 2:6, 20-22? (b) Ngapi omu tuna yi diva asi nonkango daHagayi ngadi ka sikilira mo hena komeho?

 ¹⁸ Konyima zonomvhura dononzi kutunda apa ga fire Hagayi, mupositoli Paurusa kwa tjangerere Vakriste woVahebeli mokulikida asi nonkango edi da kara mwaHagayi 2:6, 20-22, da kara nesikiliromo lyokomeho. (Resa.) Paurusa kwa tjenge asi: “Age kwa tumbwidira asi: Ame kapi ngani nyunganga hena tupu evhu lyelike, nye neguru nalyo. Nkango “hena,” kulikida asi yininke eyi ava nyunganga, eyi ga dira kurugana Karunga, ngava ka yi gusa po yipo yininke eyi ava dili kunyunganga ngayi twikire kukara po.” (Heb. 12:26, 27) Ekankamo eli lya lisiga neli va tumbura mwaHagayi 2:7. Alyo kutanta asi vantu ava ava dili kukwatesa ko upangeli waJehova ngwendi Farawo, ngava va zonagura po narunye-narunye.

19. Yisinke ngava dira kunyunganga ntani ngapi omu tuna yi diva eyi?

¹⁹ Yisinke ngava dira kukankamesa ndi eyi ngava dira kugusa po? Paurusa kwa tente hena asi: “Mokumona asi ngatu ka za moUhompa ou ava dili kunyunganga, tu twikireni kugwana nkenda zaKarunga zonene, yeeyi kupitira mwazo ose kuvhura kukarera Karunga netjirokarunga nefumadeko lyenene.” (Heb. 12:28) Konyima zekankamo eli lyokuhulilira, Uhompa waKarunga yiwo welike ngau ka kara po. Awo ngau karerera po dogoro narunye.—Epis. 110:5, 6; Ndan. 2: 44.

20. Etokoro musinke va hepa kutura po vantu ntani ngapi omu natu va vatera?

²⁰ Siruwo sisupi sina hupuko. Vantu va hepa kutura po etokoro. Nsene va tokora ku kwatesa ko uzuni ou, ngava va zonagura po, ano nsene va tokora kukarera Jehova nokukwama nompango dendi, ngava gwana mwenyo gwanarunye. (Heb. 12:25) Nsene tu twikira kuzuvhisa, ose ngatu vatera vantu yipo va ture po etokoro lyomulyo. Tu twikireni kuvatera vantu wovanzi, yipo va kwatese ko Uhompa waKarunga. Ntani tu diworokeni nkenye apa nonkango daHompa gwetu Jesus edi ga uyungire asi: “Mbudi zongwa ezi zoUhompa waKarunga, yizo tanko ngava hova kuzuvhisa mouzuni mudima, zi kare umbangi konomuhoko nadinye ntani nye ngau wiza uhura.”—Mat. 24:14.