1-2. Ogurumelihiwa baani namavuhulela Ajewu asorihiliye wihina werege wereya malabo ala apeeno?

“MUDHIDHI vang’no, maloja ni perediyu dhakale wambela obwanyuwa ninga mapapeli.” Athu atene yera ogurumela . . . “Athu amodhaya wera yamanle mutala minli. Mbwenye vamentoni vaaga yakala ninga enna wereya malabo amatene.” Ndha dhowoga dhaathu amodha yaafwanyiwe oddiginyeya wa elabo wereye elabo yoNepal yaka ya 2015. Akala onofwanyiwaga ethu ninga yela yowopiha, podi wera kunadduwala.

² Malabo ehu, nnakalawo mudhidhi wogurumelihiwa. Ogurumelihiwa wula kunereya luwani emodha obe naari elabo emodha baahi, mbwenye malogo amatene yapele elabo enna ogurumelihiwa yaka dhowinjhivadhene. Namavuhulela Ajewu wera ogurumelihiwa wula werege wereya malabo yala apeeno. Oliye ohuleba: “Yehova Mulugu aanyakoddo anawoga ayi: ‘Ginohogolowela owoga dila yanabili — mohulegela — ginere ogurumeliha elabo yodhulu, yavati, niya ni thaya yowumma.’”​—Ageu 2:6.

3. Mwahaya bwaddi nigawoga wi ogurumelihiwa wamalogo kahiyo wimodhave ni oddiginyeya wa elabo?

³ Ogurumeliha wisorihile namavuhulela Ajewu, kahi wimodhave woddiginyeya elabo onagujhula dhithu dhatedhene. Mbwenye ogurumelihiwa wula winodhana mareeliho. Mwinyene Yehova ohunaddela egi: ‘Ginere wagurumeliha malogo amatene, dhego dhathima dha malogo; ni ginere odhaliha nyumba ela waara.’ (Ageu 2:7) Yovuhulela ela yaapatha addi athu ansaka nenne na Ajewu? Ki peeno enanipatha addi? Nnere wawakula makoho ala ni nnere ohudhera iyo nnavolowa vaavi mabasa ala owagurumeliha malogo.

4. Mwahaya bwaddi Yehova adhe amurumege namavuhulela Ajewu vaari va nlogo naaye?

⁴ Namavuhulela Ajewu ahivahiwa mabasa athima ni Yehova. Kabeni noone yereyile ahinathi wakela mutholo ola. Ajewu ni athu amodha yahikanna ofuru wohogolowela oJeruzale ekumaga oBabiloniya yaka ya 537 mudhidhi wehu ohunafiye. Ofiyawene adhaari ala oororomeleya a Mulugu, omutibela alisersi anyumba ya Yehova. (Esd. 3:8, 10) Mudhidhi vang’no, opadduwa ethu yowukula vanlubale. Amwiddani amodha wambela wakwerebeyiha wihina ehiye omaga tempulu. (Esd. 4:4; Ageu 1:1, 2) Yaka ya 520 mudhidhi wehu ohunafiye, Yehova onvaha mutholo mmodha Ajewu, wakongomedhe ni walibihe wihina ehogolowele omaga tempulu. *​—Esd. 6:14, 15.

5. Mwahaya bwaddi muthenga adhilena Ajewu wahilibiha nlogo na Mulugu?

⁵ Muthenga wa Ajewu, wadhela wihina olibihe nroromelo yanniwana ni Yehova. Nuuliba murima, Ajewu owoga ni nlogo nne namanle okwerebeya egihina: “‘Atene nyu mulogo wa murudda yola mukale akopolo,’ anawoga di Yehova, ‘ni mulabe nuuviheya.’ Miyo gili ni nyu anawoga di Yehova Mulugu aanyakoddo.” (Ageu 2:4) Madhu owi ‘Mulugu aanyakoddo’ podi wera yahilibiha mulogo. Vamentoni va Yehova vihikala muthithi ni muthithi waanyakoddo angero enamwiwelela oliye. Yaafunaga wihina dhewa dhaweddele pama, Ajudewu yere ofwanelela omwiwelela Yehova.

6. Ogurumeliha Ajewu asorihiliye wadhena mareeliho baani?

⁶ Yehova omuruma Ajewu wihina awaddele maJudewu wi ere wagurumeliha malogo amatene. Muthenga ola wahalibiha vanlubale Ajudewu yamanle okwerebeya yahile omaga tempulu; ola waali muthenga wororomeleya Yehova awogiliye wihina ere wagurumeliha akudda Persiya. Mudhidhi yole akudda Persiya banna kopolo yolamulela elabo yatene, ni yanna malogo ohiya-iyana. Yereye nimakalelo baani? Vobajha, nlogo na Mulugu nere owedha omariha omaga tempulu. Yindo naarive ole ahaali muJudewu, ere witaganyihedha naaliwa wihina emwebedhege Yehova mu tempulu yaavenyihedhiwe. Mwebaribarene muthenga wa Ajewu wahilibiha nlogo na Mulugu!​—Zac. 8:9.

7. Mabasa baani nnaparihu peeno enaagurumeliha malogo?

⁷ Yovuhulela ya Ajewu peeno enatapulela ddi? Dila yanabili, Yehova anna wagurumeliha malogo, mbwenye dila ela yanabili nihiyoya nihilupelamo. Kubuwela ayi, yaka ya 1914, Omwene wa Mulugu wambela othonga odhulu Yehova omutikithera Yesu wihina akale mwene a Omwene wa Mulugu. (Sal. 2:6) Ola waali muthenga anamaholela gereja yoniliwa ninga woopiha mbani. ‘Mudhidhi wamalogo’ wahimala wakwanela. Ni madhu mamodha, nsaka nahanna namathonga asogoleliwa ni Yehova nahimala. (Luc. 21:24) Bumwahaya, thabwathabwa obajha yaka ya 1919, nlogo na Yehova wambela walaleya malogo amatene wodhela Omwene wa Mulugu wihina sijhehero yaathu avelaboni yavati. Olaleyiwa ‘wamuthenga ola wapama wOmwene’ onna wagurumeliha malogo obajha nsaka nenne.​—Mat. 24:14.

8. Mowiwanana ni Salmos 2:1-3, athu owinjhiva yiiwa muthenga wOmwene enakala aavi?

⁸ Athu yiiwa muthenga ola enakala aavi? Owinjhiva kinadhiveliwa (Omwileri Salmos 2:1-3.) Malogo eri othuwathuwene. Aliwa  kinaafuna namathonga asakuliwe ni Mulugu. Aliwa enoona wi muthenga nnalaleyihu wOmwene kahiyo ‘muthenga wapama.’ Mwebaribarene, anamathonga amodha ehifiyera wakoddiha mabasa oolaleya! Naarive anamathonga ala owinjhiva ewogaga wi nnomulabela Mulugu, aliwa kinafuna ohiya dhoorela dhewa ni onamathonga enniwana. Vowindo ninga anamathonga ansaka na Yesu, aliwa enotonyihedha wihina enomuharahara muthikitheliwi a Yehova mwaha wowaharahara adharaaye oororomeleya.​—Atos 4:25-28.

9. Yehova anera ddi naarive malogo yahirumedhaga muthengaya?

⁹ Yowakula ya Yehova siivi wodhela ala ehinafuna muthenga ola? Salmos 2:10-12 onowakula: ‘Vano nyu amwene, monihe wi muli athotho; murumedhe osumululiwa, nyu anamatoriha avelaboni yavati. Mmwebedhe Yehova ni woova ni muhagalale mugurumelaga. Mmurihe mwaana wihina Mulugu ahinyanyuwe ni wihina muhukwe mudila, mwaha wi kanarusa onyanyuwa. Oohagalala biyaale enathawela woliye.’ Mwaha wodhivela, Yehova anna wavaha mudhidhi amwiddani ala wihina esaddule mubuwelo wewa ni erumeedhe Omwene wa Mulugu. Mbwenye mudhidhi onna ogwaddeya. Peeno nnakalawo ‘malabo ookuthula’ omakuthulo wa dhithu dhatedhene. (2 Tim. 3:1; Isa. 61:2) Sowaguveya athu orumedha ebaribari ni osakula ethu yapama.

10. Ageu 2:7-9, anihina ogurumelihiwa wamalogo wadhena dhithu baani dhapama?

¹⁰ Athu amodhaya enorumedha muthenga wogurumeliha asorihile namavuhulela Ajewu. Ajewu onosoriha ethu enadhana muthenga ola wogurumeliha: ‘Dhego dhathima, [obe athu apama] amalogo amatene’ yerege omwebedha Yehova. * (Omwileri Ageu 2:7-9.) Anamavuhulela amodha, ninga Izayiya ni Mikeya, ehisoriha dhopadduwa dholigana ni dhendha, ‘malabo ookuthula.’​—Isa. 2:2-4, nota noobajha; Miq. 4:1, 2, nota noobajha.

11. Ddibila enre ddi nuwiwa dila yobajha muthenga wOmwene?

 ¹¹ Motajhiha, kasugwa empadduwele ddibila Ken, peeno analaba sede enlubale. Dhihivira yaka 40 avuruwaniliye muthenga ola wOmwene dila yobajha, mbwenye peeno onowubuwela makalelo aarigiye nuvuruwana dila yobajha. Oliye onosoriha egi: “Miyo nuvuruwana ebaribari ya Madhu a Mulugu dila yobajha, gahihagalala vanlubale mwaha wonona wi nnakalawo malabo ookuthula wa elabo ela yabure. Miyo gihonelamo wihina, negi nenyiwe ni Mulugu ni naakele egumi yohimala, yohoweleya girabele elabo ela ni giikome wihina gikale epaddi ya Yehova. Vano miyo olobela gilobaga nikavihero, teto miyo werana ethu gathomilimi. Miyo onyanyala elabo ela vano wiikoma wihina geeddege muMweneni mwa Mulugu. Omwene yola wahinadha ogujhuliwa.”

12. Malabo ala ookuthula, nthaddo noomuzimuni na Yehova nnadhala addi nthithimiho naaye?

¹² Kananganyedha wihina Yehova anna oreeliha nlogo naaye. Malabo ala ookuthula athu enamwebedha Mulugu enna wenjhedhedheya. Yaka ya 1914, naali mwana nikuru vang’no. Mbwenye peeno, nihikwaranya 8 miyhoji, ni matxikwi ni matxikwi aathu enowitaganyihedha ni iyo wihina nimulabele Mulugu ni nubuwele okwa wa Kiristu. Vowindo, nthaddo na Yehova noomuzimuni velaboni yavati, obe nere makalelo egerendhiye webedha webaribari muhumala odhaala ‘dhego dhathima amalogo amatene.’ Eyo mwebaribarene enomuthithimiha Yehova. Mbwenye ethu emodha enathithimiha ndina na Yehova bimasadduwo enerana muthithi ni muthithi waathu wihina eware emuthu exa.​—Efé. 4:22-24.

13. Wenjhedhedheya waathu enamwebedha Yehova winakwaneliha dhovuhulela baani? (Osugwe fotu yavakapani.)

¹³ Dhatedhene ndo dhinadha dhipadduwaga dhinna wakwaneliha dhovuhulela dhimodha, ninga yovuhulela ela enafwanyeya va Isaías kapitulu 60. Versu 22 yakapitulu yela enihina: ‘Nlogo ning’no nnere ofiyedha txikwi; teto nikuru ning’no nnere okala nooliba. Miyo, Yehova ginere wakwanihedha wafiya mudhidhi.’ Mwaha athu owinjhiva enamwebedha Mulugu wenjhedhedheya, enopadduwa ethu yootikiniha. Dhadhaaga mmulogoni mwa  Yehova ‘dhego thathima’ dhinodhana thotho ni dhithu dhinaadiwa, nihidduwalaga mabasa enapariwa oolaleya a ‘muthenga wapama wOmwne.’ Izayiya ohithana thotho ndha dhili muwari mwa nikuru na Yehova ninga ‘mukaka wamalogo.’ (Isa. 60:5, 16) Nnikavihero naalobwana ni ahiyana athotho, mabasa oolaleya enopariwa dhilabo dhowakwana 240 ni enotapuleliwa malivuru adhiwogelo dhowakwana mil.

14. Yothoma baani athu enafwaneleliwa werana ovanene?

¹⁴ Malabo ala ookuthula mwaha Yehova wagurumeliha malogo, athu enowiwaddihedha osakula ethu-sithu. Obe akala enere okavihera Omwene wa Mulugu obe enaaroromelege anamathonga a elabo ela. Ela yothoma enlubale enafwanelela elabo yatene werana ovanene. Hee iyo nnowawiwelela anamathonga. Ninga adhaari a Yehova nnowawiwelela malamulo aanamathonga, mbwenye kanakala epaddi yelabo newene kannivolosiha mpulitikani ya elabo ela. (Rom. 13:1-7) Mbwenye nihinona wi makathamiho athu enaamale wadha Omwene wa Mulugu. Omwene ola kunakosa epaddi ya elabo ela yabure.​—João 18:36, 37.

15. Livuru na Apocalipse nnasoriha wehiwa baani wanroromelo onakalewo?

¹⁵ Livuru na Apocalipse nnasoriha negi, malabo ookuthula nroromelo naadhari a Mulugu nnere wehiwa. Oharahariwa wehu winaakale winlubale. Anamathonga enerege oniwaddihedha wihina nawebedhege obe naakaviherege, teto aliwa enere omuharahara mwamakalelo abure yole anaakodde. (Apo. 13:12, 15) Oliye onere ‘wawaddihedha athu atene, apogo ni anamwani, oorela ni oohawa, adhaari ni ale ehili adhaari, wihina yakele sinale nlada neemara obe vakoveni.’ (Apo. 13:16) Malabo amundduli adhaari yovahiwa sinale wihina anoniwe muthu baani yamulabiwa. Mwamakalelo mamodhave, malabo apeeno anamathonga enerege wawaddihedha athu atene wihina ekanne sinale obe naari kadda muthu atonyihedhege baani anamukaviheriye. Mbwenye bumubuwelo obe naari dhowera dhaathu dhinaatonyihedhe wihina aliwa enakavihera epaddi ya pulitika.

16. Ekaleleddi yapama opendda nroromelo ninnihuna ni Yehova?

¹⁶ Ki iyo? Nnere orumedha wakela sinale ela? Nnere wakavihera anamathonga? Anakoodde werana ndo anere omorela vangovini ni anere okanna makathamiho owinjhiva. Livuru na Apocalipse nnasoriha wihina kaavo anagulege obe naari anaagulihege ahili yole anna sinale. (Apo. 13:17) Mbwenye adhaari a Mulugu ehinona ethu baani Yehova anafuniye wawerana ale enaakele sinale ele enasorihiwa va Apocalipse 14:9, 10. Bumwahaya ohiya orumedha sinale ela aliwa enere oleba mmadani: ‘Gili a Yehova.’ (Isa. 44:5) Vano ola mudhidhi wowipenda akala mwebaribarene nnomuroromela Yehova. Akala nere hee, Yehova anere othika muru mwaha wokala epaddi yaye.

17. Ethu baani nihinafwanelelihu oddiwala wodhela ojhedhiha wa Yehova?

¹⁷ Malabo ala ookuthula Yehova annojhejhiha. Oliye kanafuna newene muthu mmodha ogujhuliwa. (2 Ped. 3:9) Oliye anna wavaha ofuru athu atene wothwaruwa ni osakula ethu yapama. Mbwenye ojhedhiha wa Yehova ohukanna manddile. Anakoodda ofuru wa Yehova ananivahiye anere wiweka vang’vini moligana ni Farawo, malabo a Moses. Yehova omwaddela Farawo egi: ‘Miyo gahafunege wugujhula we ni athwayo, ni kopolo dhaaga gere odhana  mulili wowopiha guugujhulenani, ni geere wutolosani atene elabo yela. Mbwenye, guhileni ofiyera ovanene mwaha wi: Ginafuna guutonyihedheni kopolo dhaaga wihina ndina naaga nnoniwe elabo yatene yavati.’ (Êxo. 9:15, 16) Malabo amatene enere onona wihina Yehova diri Mulugu eebaribari. (Eze. 38:23) Eyo enaapadduwe addi?

18. (a) Ageu 2:6, 20-22, anawoga ogurumelihiwa baani? (b) Nnonne addi wihina Madhu enafwanyeya va Ajewu enere wakwanela osogolo?

¹⁸ Vigamanle yaka dhowinjhivadhene Ajewu nuukwa, murumiwi Pawulo ahivetheliwa wasoriha Madhu enafwanyeya va Ageu 2:6, 20-22 wihina yere wakwanela osogolo. (Omwileri.) Pawulo oleba: “Ovanene oliye ohupaganya: ‘Dila biili ginere ogurumeliha elabo yavati ni elabo yodhulu.’ Madhu enawoga ‘dila yanabili’ enoniha ovenyihiwavo wa dhithu dhinafuna ogurumelihiwa, dhithu dhisasanyiwe wihina dhihalevo dhithu dhihinaagurumelihiwe.” (Heb. 12:26, 27) Mbwenye ogurumelihiwa wula wihiyana ni wule wisorihiwe va Ageu 2:7; wula winatapulela wihina ale eli ninga Farawo, enakodda onamathonga wa Yehova kinadha ekalawo.

19. Yahinaagurumelihiwe ddiniyani, ki nnonne aavi?

¹⁹ Ethu baani yahinaagurumelihiwe obe naari yahinaagujhuliwe? Pawulo onosorihave egi: ‘Woona wi nohakela Omwene ohunagurumelihiwa, nidhowegeve nakelaga opama wohinifwanelela, onanikavihera wapara mabasa ootaleleya eniwanana ni efunelo ya Mulugu nuwoova vamodha ni nthithimiho.’ (Heb. 12:28) Omakuthulo wogurumelihiwa wula, vano dhithu dhatedhene dhakurumuwa, Omwene wa Mulugu bunaahale wowimeleene txithi malabo amatene!​—Sal. 110:5, 6; Dan. 2:44.

20. Yothoma baani athu enafwaneleliwa werana, ki nnakavihere aavi?

²⁰ Kanijhele mudhidhi ebewene! Athu enoofwanelela othoma: akala enaharege mweddelo wa elabo ela obe enerege wilibihera wihina yeregena efunelo ya Mulugu. Yothoma yobajha podi omuthukulela muthu otolosiwa; mbwenye yothoma yanabili podi omuthukulela muthu wakela egumi yohimala. (Heb. 12:25) Wodhela mabasa oolaleya, iyo podi wakavihera athu osakula ethu yapama. Nnerege okaviherave dhego ndha dhathima wihina dhikaviheregeve Omwene wa Mulugu. Nihidduwalaga madhu asorihile Yesu egi: ‘Muthenga ola wapama wOmwene, ommadha olaleyiwe mwilaboni yatene yavati, wengo winafwanyeya athu, vano omakuthulo wifiye.’​—Mat. 24:14.