1-2. Oshike shoka omuhunganeki Haggai a hunganeke tashi ka ningwa pethimbo lyetu?

“MUULE owala wominute oonshona, oositola nomatungo omakulu oga tameke okugwa.” “Kehe gumwe okwa li a tila . . . Aantu oyendji oya li ya ti kutya konyala ekakamo lyevi ndyoka olya li uule wominute mbali. Ihe ngame onda li ndi wete lya fa itaali hulu.” Shoka osho sha li sha popiwa kuyamwe mboka ya hupu sho moNepal mwa tukuluka ekakamo lyevi mo 2015. Andola nangoye owe endele monkalo ya fa mpoka, ando ito yi dhimbwa.

² Ihe tse kunena otu li mekakamo lyi ili, ano ekakamo ndyoka inaali guma owala oshilando nenge oshilongo shimwe, ihe uuyuni awuhe. Jehova ota kakamitha iilongo ayihe muuyuni, nokwa kala te shi ningi uule womimvo odhindji. Ekakamo ndyoka olya li lya hunganekwa komuhunganeki Haggai. Okwa nyola a ti: “Jehova mwene gwomatangakwiita ota ti, ‘Konima yokathimbo otandi ki inyengitha egulu nevi, uukukutu nefuta.’” — Hag. 2:6, NW.

3. Ongiini ekakamitho ndyoka lyopathaneko lya yooloka ko kekakamo lyevi lyo lyenelyene?

³ Ekakamo ndyoka Haggai a hunganeke kali shi ekakamo lyevi lyo lyenelyene ndyoka hali eta owala ehanagulo. Pehala lyaashono, okwa hunganeke kombinga yekakamitho ndyoka hali etele aantu uuwanawa. Jehova ote tu lombwele ta ti: “Otandi ka kakamitha iigwana ayihe, niinima iiwanawa lela yomiigwana ayihe otayi ke ya mo. Opo nduno otandi ku udhitha egumbo lyandje neadhimo.” (Hag. 2:7) Ehunganeko ndyoka olya li tali ti shike kaantu yopethimbo lyaHaggai? Otali ti shike kutse kunena? Otatu ka kundathana kombinga yomayamukulo gomapulo  ngoka, e tatu tala nkene tatu vulu okukutha ombinga mokukamithwa kwiigwana kunena.

4. Omolwashike Jehova a lombwele Haggai a kwathele oshigwana She?

⁴ Omuhunganeki Haggai okwa li a pewa oshinakugwanithwa sha simana kuJehova. Natu taleni kwaashoka sha li sha ningwa po manga inee shi pewa. Haggai otashi vulika a li gumwe gwomwaamboka ya li ya galukile kuJerusalem sho ya zi muupongekwa muBabilonia mo 537 K.E.N. Nziya sho ya thiki muJerusalem, aalongeli yaJehova mboka oya tameke okutungulula otempeli yaJehova. (Esra 3:8, 10) Ihe konima yethimbo efupi opwa holoka uupyakadhi. Oya etha po okutungulula otempeli, molwaashoka aantu yamwe yomoshitopolwa shawo oya li ompinge nayo. (Esra 4:4; Hag. 1:1, 2) Onkene mo 520 K.E.N., Jehova okwa lombwele Haggai a ladhipike Aajuda ya kale ye na omukumo, opo ya mane okutungulula otempeli. * — Esra 6:14, 15.

5. Omolwashike etumwalaka lyaHaggai lya li lya tsu omukumo oshigwana shaKalunga?

⁵ Elalakano lyetumwalaka lyaHaggai olya li okukwathela Aajuda ya kale ye na eitaalo muJehova. Haggai okwa li a popi nuulaadhi ta lombwele Aajuda mboka ya teka omukumo, a ti: “Jehova mwene gwomatangakwiita ota ti, ‘Inamu kala mwa tyololoka. Longeni, oshoka ondi li pamwe nane.’” (Hag. 2:4, NW) Uutumbulilo “Jehova mwene gwomatangakwiita” owu na okukala wa li we ya shilipaleke kutya Jehova ote ke ya kwathela. Jehova oku na etangakwiita enenenene lyaayengeli, ndyoka ha vulu okulongitha a gwanithe po ehalo lye, onkene Aajuda oya li ya pumbwa okwiikolelela muye, opo ya pondole.

6. Ekakamitho ndyoka Haggai a hunganeke olya li tali ka eta iizemo yini?

⁶ Jehova okwa li a nwetha mo Haggai a lombwele Aajuda kutya Ota ka kakamitha iigwana ayihe. Shoka osha shilipaleke Aajuda mboka ya li ya teka omukumo noye etha po okutungulula otempeli kutya Jehova ota ka kakamitha Persia, epangelo enankondo ndyoka lya li tali pangele iilongo oyindji pethimbo ndyoka. Ekakamitho ndyoka olya li tali ka eta iizemo yini? Shotango, oshigwana shaKalunga osha vulu okumana okutungulula otempeli. Opo nduno, naamboka kaaya li Aajuda oye ke ya wayimina mokulongela Jehova motempeli ndjoka ya tungululwa. Etumwalaka ndyoka olya li lela lya tsu omukumo oshigwana shaKalunga. — Sak. 8:9.

7. Iilonga yini yekakamitho hatu kutha ombinga muyo kunena? Shi yelitha.

⁷ Ehunganeko lyaHaggai otali ti shike kutse kunena? Nokunena Jehova ota kakamitha iigwana ayihe, notu na mo ombinga moshilonga shoka. Dhiladhila kwaashika: Mo 1914, Jehova okwa langeke po Jesus e li Omukwaniilwa gwUukwaniilwa We. (Eps. 2:6) Okutotwapo kwUukwaniilwa mboka kakwa li oshinima oshiwanawa kaapangeli yuuyuni. Shoka osha li sha ulike kutya “euthwathimbo lyiigwana” (NW) olya hula ko, ano ethimbo ndyoka Jehova a kala kee na omupangeli ngoka e mu lile po. (Luk. 21:24) Omolwoshinima shoka, unene tuu okuza mo 1919, oshigwana shaJehova osha kala nokuuvitha kutya Uukwaniilwa waKalunga owo owala tawu vulu okuhulitha po okumona iihuna kwaantu. Okuuvithwa ‘kwonkundana ombwanawa’ (NW) ndjoka okwa kakamitha uuyuni awuhe. — Mat. 24:14.

8. Shi ikolelela kEpisalomi 2:1-3, iigwana ohayi inyenge ngiini ketumwalaka ndyoka hatu uvitha?

⁸ Aantu ohayi inyenge ngiini ketumwalaka ndyoka? Oyendji ihaye li taamba ko. (Lesha  Episalomi 2:1-3.) Etumwalaka ndyoka ohali geyitha wo iigwana. Inayi hala okutaamba ko Omupangeli ngoka Jehova a hogolola, noinayi tala ko etumwalaka ndyoka hatu uvitha li li “onkundana ombwanawa.” Omapangelo gamwe oga indika nokuli iilonga yetu yokuuvitha. Nonando oyendji yomaapangeli yomapangelo ngoka ohaya ti kutya ohaya longele Jehova, inaya hala okweetha po oondondo noonkondopangelo dhawo. Ngaashi owala aapangeli yopethimbo lyaJesus, aapangeli yokunena ohaya ulike kutya oye li ompinge nOmugwayekwa gwaJehova, mokupataneka nokutula moondholongo aalanduli ye aadhiginini. — Iil. 4:25-28.

9. Jehova oku uvitile ngiini iigwana mbyoka ya tinda okutaamba ko Uukwaniilwa we?

⁹ Jehova oha kala e uvitile ngiini iigwana mbyoka? Episalomi 2:10-12 olya yamukula lya ti: “Pukulukeni, ne aakwaniilwa; londodhweni, ne aapangeli yevi. Longeleni Omuwa netilo; kakameni, ne mu nyongame koshipala she, ondjahi ye opo kaayi mu hwamene, nane e tamu si po ombaadhilila. Aanelago oomboka haa kongo egameno puye.” Molwaashoka Jehova omunalukeno, okwa pa iigwana mbyoka ethimbo yi itedhulule. Iigwana mbyoka otayi vulu okulundulula iikala yayo nokutaamba ko Uukwaniilwa waJehova. Ihe ethimbo ndyoka lya thigala ko efupi noonkondo. Otu li ‘momasiku gahugunina’ (NW) guuyuni mbuka. (2 Tim. 3:1; Jes. 61:2) Onkene aantu oya pumbwa okutseya oshili meendelelo nokuhogolola ya longele Jehova.

10. Ngaashi sha popiwa muHaggai 2:7-9, uuwanawa wuni tawu ka za mekakamitho ndyoka Haggai a hunganeke kombinga yalyo?

¹⁰ Ekakamitho lyopathaneko ndyoka Haggai a hunganeke ohali etele aantu yamwe uuwanawa. Okwe tu lombwele kutya okukakamithwa hoka otaku ka eta ‘omaliko [aanamitima omiwanawa] yomiigwana ayihe’ megumbo lyaJehova nenge tu tye melongelokalunga lyashili. * (Lesha Haggai 2:7-9.) Jesaja nosho wo Mika, nayo oya hunganeka kutya shoka osho tashi ka ningwa ‘momasiku gahugunina.’ — Jes. 2:2-4; Mika 4:1, 2.

11. Omumwatate gumwe okwa li i inyenge ngiini sho u uvu etumwalaka lyUukwaniilwa oshikando shotango?

 ¹¹ Ndhindhilika nkene omumwatate gwedhina Ken, ngoka ha longele koombelewa dhetu oonene a li i inyenge, sho u uvu etumwalaka lyUukwaniilwa oshikando shotango. Nonando opwa pita ngashingeyi omimvo 40, esiku ndyoka natango ote li dhimbulukwa nawa. Ken okwa ti: “Sho ndu uvu oshili yOmbiimbeli oshikando shotango, onda li nda nyanyukwa okuuva kutya uuyuni mbuka owu li pokuhulithwa po. Onda li nda mono kutya opo ndi kale nda hokiwa kuKalunga nondi ka mone omwenyo gwaaluhe, onda pumbwa okushilipaleka kutya kandi li oshitopolwa shuuyuni mbuka nokukala omudhiginini kuJehova. Onda galikana Jehova a kwathele ndje ndi shi tule miilonga. Mokweendela ko kwethimbo onda etha po okukala oshitopolwa shuuyuni mbuka nonda ninginithwa, oshoka onda li nda tompwa kutya Uukwaniilwa waKalunga kaawu na siku wu ka hule po.”

12. Otempeli yaJehova yopambepo oyu udhithwa ngiini neadhimo momasiku gahugunina?

¹² Oshi iwetikile kutya Jehova okwa kala ta yambeke oshigwana she. Momukokomoko gwomasiku ngaka gahugunina, otwa mona nkene omwaalu gwaamboka haya longele Jehova gwe ende tagu indjipala noonkondo. Mo 1914 aalongeli yaJehova oya li owala ye thike pomayovi gontumba. Ngashingeyi oya konda pomamiliyona gahetatu, naantu omamiliyona omumvo kehe ohaye tu wayimine tu dhimbulukwe eso lyaJesus. Kungawo, otempeli yaJehova yopambepo, ano elongelokalunga lye lyashili, olyu udhithwa ‘nomaliko gomiigwana ayihe.’ Uuna aantu mboka taya ningi omalunduluko nokuzala omuntu omupe, ohashi simanekitha wo edhina lyaJehova. — Ef. 4:22-24.

13. Okwiindjipala kwaalongeli yaJehova okwa gwanitha po omahunganeko galwe geni? (Tala ethano lyokombanda)

¹³ Iiningwanima mbyoka iihokithi oya gwanitha po wo omahunganeko galwe, ngaashi ndyoka tali adhika muJesaja ontopolwa 60. Ovelise 22 yontopolwa ndjoka otayi ti: “Aashuushuka yomune otaa ka ninga eyuvi, naashona otaa ningi oshigwana oshinankondo. Ongame Omuwa; otandi shi ningi methimbo lyo opala.” Sho aantu oyendji haye ya melongelokalunga lyashili oshi na wo uuwanawa wulwe. Aantu mboka ye li ‘omaliko,’ ohaye ya melongelokalunga lyashili ye na uunkulungu nenge  owino wontumba nohaya kala wo ye na ehalo lyokuuvitha “onkundana ombwanawa.” Onkee ano, oshigwana shaKalunga ohashi mono mo uuwanawa muunkulungu nenge mowino yooitaali mboka, ndjoka Jesaja a popi kutya oyi li “omahini giigwana.” (Jes. 60:5, 16) Omolwekwatho lyaalumentu naakiintu mboka, kunena onkundana ombwanawa ohayi uvithilwa miilongo 240, nohatu nyanyangidha iileshomwa momalaka ge vulithe 1000.

14. Etokolo lini kehe gumwe gwomutse e na okuninga?

¹⁴ Momasiku ngaka gopehulilo, okukakamithwa kwiigwana otaku ningitha oyendji ya ninge etokolo. Mbela otaya ka ambidhidha Uukwaniilwa waKalunga, nenge otaya ka tula einekelo lyawo momapangelo gomuuyuni mbuka? Kehe gumwe gwomutse oku na okuninga etokolo kombinga yaashoka. Nonando aapiya yaJehova ohaya vulika koompango dhomapangelo gomiilongo moka haya zi, ihaya kutha ombinga miinima yopapolotika yomuuyuni mbuka. (Rom. 13:1-7) Oye shi kutya Uukwaniilwa waKalunga owo owala tawu vulu okuhulitha po okumona iihuna kwaantu. Uukwaniilwa mboka kawu li oshitopolwa shuuyuni. — Joh. 18:36, 37.

15. Embo lyEhololo otali ulike ngiini kutya uudhiginini waapiya yaKalunga otawu ka makelwa?

¹⁵ Embo lyEhololo olya holola kutya momasiku gahugunina, uudhiginini wetu kuJehova otawu ka makelwa. Okumakelwa hoka otaku ka kwatela mo wo omapataneko nomathiminiko ga kwata miiti. Omapangelo gomuuyuni mbuka ohaga kala ga hala tu ga galikane nohaga pataneke mboka ya tinda oku ga ambidhidha. (Eh. 13:12, 15) Oga hala “aantu ayehe, aadhinwa naanenentu, aayamba noohepele, aapika naavalwa, ya kale ya ndhindhilikwa miikaha yawo yokolulyo nenge miipala yawo.” (Eh. 13:16) Pethimbo lyonale aapika oya li haya tulwa endhindhiliko ndyoka tali ulike kutya olye mwene gwawo. Sha faathana, aantu ayehe kunena otaya ka tegelelwa ya ulike kutya mwene gwawo olye. Aantu otaya ka kala ya hala ayehe ye shi ulike okupitila miilonga yawo kutya oya gama kombinga yomapangelo nosho wo kutya ohaya ambidhidha opolotika.

16. Omolwashike sha simanenena tu koleke uudhiginini wetu kuJehova kunena?

¹⁶ Mbela otatu ki iyetha tu tulwe endhindhiliko ndyono lyopathaneko nokwaambidhidha omapangelo gopapolotika? Mboka taya ka tinda oku shi ninga otaya ka taalela omaupyakadhi nonkalamwenyo yawo otayi ka kala moshiponga. Embo lyEhololo olya ti: ‘Aantu otaye ki indikwa okulanda nenge okulanditha, ngele kaye na endhindhiliko ndyoka.’ (Eh. 13:17) Ihe aalongeli yaJehova oye shi shoka Jehova ta ka ningila aantu mboka ye na endhindhiliko ndyoka, mboka ya popiwa Ehololo 14:9, 10. Pehala lyokwiiyetha ya tulwe endhindhiliko ndyoka lyopathaneko, otaya ka kala ya fa yi inyola nale pomake gawo, “Ngame ogwaJehova.” (NW) (Jes. 44:5) Ngashingeyi olyo ethimbo lyokukoleka uudhiginini wetu kuJehova. Ngele otwa kala aadhiginini kuye, ote ke tu tala ko tu li aantu ye.

17. Oshike tu na okudhimbulukwa kombinga yeidhidhimiko lyaJehova?

¹⁷ Jehova okwa kala ti idhidhimike ethimbo nuule, unene tuu momasiku ngaka gahugunina. Ina hala nando ogumwe a hanagulwe po. (2 Pet. 3:9) Okwa pa kehe gumwe ompito i itedhulule noku mu longele. Ihe ita kala ti idhidhimikile aantu sigo aluhe. Mboka inaaya hala okuninga omalunduluko otaye ki iyadha monkalo ya fa yaFarao gwopethimbo lyaMoses. Jehova okwa li a lombwele Farao a ti: “Ando nde ku dhenge pamwe naantu yoye noshivu, ando wa kombwa po nale kombanda yevi. Ihe opo ndi ku ulukile oonkondo dhandje, onde ku kaleke ko u na omwenyo, opo esimano lyandje li taandele nuuyuni  auhe.” (Eks. 9:15, 16) Iigwana ayihe mokweendela ko kwethimbo otayi ka tseya kutya Jehova oye awike Kalunga kashili. (Hes. 38:23) Shoka otashi ka ningwa ngiini?

18. (a) Ekakamitho lilwe lini lya popiwa muHaggai 2:6, 20-22? (b) Otu shi shi ngiini kutya oohapu dhaHaggai otadhi ka gwanithwa po wo nomonakuyiwa?

¹⁸ Konima yomathelemimvo sho Haggai a si, omuyapostoli Paulus okwa nwethwa mo a ulike kutya oohapu ndhoka tadhi adhika muHaggai 2:6, 20-22 otadhi ka gwanithwa po wo nomonakuyiwa. (Lesha.) Okwa nyola a ti: “Ngashingeyi oku uvaneke ta ti: ‘Itandi ka kakamitha owala evi lumwe ishewe, ihe negulu wo.’ Iitya mbika ‘lumwe ishewe’ otayi holola nawa kutya iishitwa ayihe otayi ka kakamithwa e tayi shitululwa, naambyoka itaayi ka kakamithwa, otayi ka kala yi li ngaashi yi li.” (Heb. 12:26, 27) Ekakamitho ndika olya yooloka ko kwaandyoka lya popiwa muHaggai 2:7. Ekakamitho ndyoka lya popiwa mAahebeli 12:26, 27 otali ulike kutya aantu mboka ya fa Farao, mboka inaaya hala okuzimina kutya Jehova oye e na uuthemba wokupangela, otaya ka hanagulwa po sigo aluhe.

19. Oshike shoka itaashi ka kakamithwa, notu shi shi ngiini?

¹⁹ Oshike itaashi ka kakamithwa nenge itaashi ka hulithwa po? Paulus okwe tu londodha a ti: “Tu hambeleleni, sho tu na oshilongo ihaashi kakama. Tu panduleni, tse tu longeleni Kalunga pamukalo ngoka gwe mu opalela, tu na esimaneko netilo.” (Heb. 12:28) Konima yokukakamithwa hoka kwahugunina, Uukwaniilwa waKalunga owo owala tawu ka kala ko, notawu ka tsikila okukala ko sigo aluhe. — Eps. 110:5, 6; Dan. 2:44.

20. Etokolo lini aantu ye na okuninga, nongiini tatu vulu oku ya kwathela?

²⁰ Aantu oye na okuninga etokolo. Ngele oya hogolola ya tsikile okukala oshitopolwa shuuyuni mbuka, otaya ka hanagulwa po. Ngele oya hogolola ya longele Jehova e taya ningi omalunduluko opo ya longe ehalo lye, otaya ka mona omwenyo gwaaluhe. (Heb. 12:25) Mokupitila miilonga yetu yokuuvitha, otatu vulu okukwathela aantu ya tokole kutya otaya gama kombinga yalye mompata ndjika ya simanenena. Natu kwathele oyendji ngaashi tashi vulika ya ambidhidhe Uukwaniilwa waKalunga. Inatu dhimbwa oohapu dhOmuwa gwetu Jesus, ndhoka tadhi ti: “Elaka ndika etoye lyOshilongo otali ka uvithilwa aantu ayehe, li ningile iigwana ayihe onzapo; notaku ya ihe ehulilo.” — Mat. 24:14.