1-2. Hágeiyai éí haʼátʼíí doogał níigo chʼíiníʼą́?

“TʼÁADOO hodiinaʼí biiʼ nidaʼiiniihí índa kin daʼałkʼidą́ą́ʼ yę́ę ahiih náheesdaaz. Diné tʼáá ałtso bił daayéeʼgo deílyeed. Ląʼí ádaaníigo éí naakidi dah alzhin bíighahjįʼ niʼ nahaasnááʼ. Ndi, nizaadjįʼ ádzaa shił nahalin.” Díí éí 2015 Nepaldi niʼ nahaasnááʼ yę́ędą́ą́ʼ yitsʼą́ą́dóó yisdaháskaii kódaaníigo yaa dahalneʼ. Kótʼéego yééʼ bił áhootʼįįhgo doo baa hoyooʼnéeh da łeh.

² Dííshjı̨́įdi adahwiisʼáágóó łah átʼéego naʼiiłnáanii hólǫ́ǫgo baa ákodaniidzin. Ląʼí nááhai tʼáá ałtso ałʼąą dineʼé nidabiiłná. Prophet Hágeiyai kóhootʼéego yikʼeʼashchı̨́: Jiihóvah kóní, “Tʼóó hodíínááʼígo yádiłhił áádóó nahasdzáán áádóó tónteel índa niʼda tʼááłáhídi náádeeshhał.”—Hag. 2:6.

3. Hágeiyai éí dahodiyeeshnááł níigi áádóó niʼ nahaʼnáago haitʼéego bił ałʼąą átʼé?

³ Hágeiyai éí niʼ nahaʼnáago doo yeinítʼı̨́į da, háálá éí atíʼiiłʼįįh. Ndi éí yáʼátʼéehgo áhodooníiłgoígíí ááhyiłní. Jiihóvah tʼáá Bí ánihiłní: “Ałʼąą dineʼé tʼáá ałtso bitah dahodiyeeshnááł áádóó . . . daʼjílíinii yah ahodooleeł.” (Hag. 2:7, NW) Hágeiyai bíyoołkááłdą́ą́ʼ díí haitʼéego íídą́ą́ʼ bił ahídéétʼiʼ ńtʼééʼ? Áádóó dííshjı̨́įdi haitʼéego ahídéétʼiʼ? Díí baa nídadíitʼįįł áádóó bídeíníilníshígíí éí ałʼąą dineʼé nidabiiłná níigi haitʼéego bee aniitah dooleeł.

4. Jiihóvah éí haʼátʼíí biniyé Hágeiyai Ízrel dineʼé yichʼįʼ ayííłʼaʼ?

⁴ Hágeiyai éí Jiihóvah naanish ílíinii bąąh niinílá. Tʼah doo naanish hąąh niilyéégóó Hágeiyai éí 537 B.C.E. yę́ędą́ą́ʼ  Jerúsalemgóó naʼoonéełgo atah níjoodááł. Éí Jerúsalemdi náʼíʼnáago tʼáá ákǫ́ǫ́ tsı̨́įłgo Jiihóvah bikin biiʼ sohodizinii bidazhdeeshnish. (Ezra 3:8, 10) Ńtʼééʼ doo ákǫ́ǫ́ áhóótʼįįd da. Hąąh nidahwiiskaadgo kin ádajilééh yę́ęgi tʼóó bikʼizdeeskai, háálá diné ákwii kéédahatʼínígíí hatsʼą́ą́ʼ deineestłʼa. (Ezra 4:4; Hag. 1:1, 2) Áko 520 B.C.E. yihahgo Jiihóvah éí Hágeiyai díí kin ałtso ádoolníiłgo diné yídaneedlı̨́į doogo bá ádíílííł yidííniid. *—Ezra 6:14, 15.

5. Hágeiyai bihaneʼ éí Jew dineʼé haʼátʼíí biniyé badaʼjólíi doogo áyiilaa?

⁵ Hágeiyai bihaneʼ éí Jew dineʼé bidaʼoodląʼ bidziil yá íidoolííł biniyé áyiilaa. Éí tʼáadoo tʼą́ą́ʼ jílínígo hodineʼé doo dabidziil daaígíí kóbijiníigo bichʼįʼ áʼjiilaa: “Kéyahdóó dineʼé danohłíinii tʼáá ánółtso, danihidziilgo ídaʼdíínółzingo nidaałnish, ní Jiihóvah, háálá nihił dahonishłǫ́, ní Jiihóvah diyingo bisiláo bee Bóhólníihii.” (Hag. 2:4, NW) “Jiihóvah diyingo bisiláo bee Bóhólníihii” níigi ayóó shı̨́ı̨́ baʼahódlí. Jiihóvah éí tsʼídá tʼóó ahayói diyingo bisiláo bee Bóhólníihgo bikʼeh dahółʼı̨́, áko Jew dineʼé éí Jiihóvah badaʼjólíigo bichʼįʼ dahoʼdilʼáhígíí łaʼdajíłʼı̨́į doo.

6. Hágeiyai éí dahodiyoołnááł níigo yaa chʼíhoníʼánę́ę bitsʼą́ą́dóó haahodoonííł?

⁶ Jiihóvah éí Hágeiyai Jew dineʼé bichʼįʼ hadiidzihgo éí ałʼąą dineʼé tʼáá ałtso bitah dahodiyeeshnááł bididííniił, yidííniid. Áko Jew dineʼé bąąh nidahwiiskaadgo kin ádeiléehgi tʼóó yikʼi deeskai yę́ęgi Jiihóvah kótʼéego haneʼ áyiilaago bidziil nídaasdlı̨́ı̨́ʼ. Éí íídą́ą́ʼ Pérzha world power danilı̨́, éí bí Jiihóvah hodiisnááʼ. Áko éí bitsʼą́ą́dóó haahóótʼįįd? Áłtsé éí, kin ałtso ádazhdoolííł. Áádóó kin ánályaaígíí doo Jew dineʼé hodidookahgo Jiihóvah worship ádajiłʼı̨́į doo. Diyin bidineʼé kótʼéego hoł hóoneʼgo ayóó átʼéego shı̨́ı̨́ baa hoł dahóózhǫǫd!—Zech. 8:9.

7. Haʼátʼíí bee naʼiilnáago baa haneʼii bee aniitah doo? Haʼátʼíí biniyé?

⁷ Hágeiyai kóhodoonííł níigo chʼíiníʼánę́ę haitʼéego dííshjı̨́įdi nihídéétʼiʼ? Jiihóvah éí tʼáá ałtso ałʼąą dineʼé ninááyiiłná, éí nihí atah bídeíníilníísh. Díí baa nitsíníkees: 1914 yę́ędą́ą́ʼ Jiihóvah éí yáʼąąshdi biNahatʼaʼ bił hazʼáanii Jesus Christ Naatʼáanii nilı̨́įgo áyiilaa. (Ps. 2:6) Díí Nahatʼaʼ niitáago bílaʼashdlaʼii dahwéeʼaahii doo bá yáʼátʼéeh da silı̨́ı̨́ʼ. Háálá éí “doo Jew dineʼé danilíinii bił hoolzhishígíí” bíighah azlı̨́ı̨́ʼ. Díí éí Jiihóvah bitsʼą́ą́dóó hooʼáał dooleełii ádin ńtʼéeʼgo hoolzhish góneʼ ááhyiłní. (Luke 21:24) Díí baa nitsáhákeesgo, 1919dóó wóshdę́ę́ʼ íiyisíí, Jiihóvah bidineʼé éí Diyin biNahatʼaʼ tʼéiyá bee bílaʼashdlaʼii bá bee ił chohooʼı̨́ daaníigo yaa nidahalneʼ. Díidi “yáʼąąshii bee bóhólníihgo bił hazʼáanii baa haneʼ yáʼátʼéehii” éí nahasdzáán nidahoneesʼą́ą́góó bee naʼiilnáago baa náháneʼ.—Matt. 24:14.

8. Psalm 2:1-3 éí diné bił nahaneʼgo ląʼí yikʼee haadaatʼée doo ní?

⁸ Diné díí bee bił dahaneʼgo haitʼéego yaa nitsídaakees? Ląʼí doo deinízin da. (Psalm 2:1-3 yíníłtaʼ.) Tʼóó ádá nidahalchįįh. Jiihóvah biNaatʼáanii áyiilaaígíí doo deinízin da. Diyin biNahatʼaʼ éí “haneʼ yáʼátʼéehii” átʼéegi doo dayoodlą́ą da. Łahgóó bílaʼashdlaʼii binahatʼaʼ  éí nidahwiilneʼ yę́ęgi nihitsʼą́ą́ʼ niʼ ádeeleʼ! Azhą́ ląʼí naatʼáanii dajílíinii éí Diyin bikʼehgo yishááł dajiníi ndi, dahojíʼaahgi índa óhólnííh hąąh naazláagi doo nahjįʼ kódeeshłíił da danízin. Áko Jesus biyoołkááłdą́ą́ʼ naatʼáanii ádaatʼéhę́ęgi átʼéego dííshjı̨́įdi naatʼáanii danilíinii Christ yikʼijįʼ danilı̨́įgo éí bikééʼ naazíinii yikʼi néijah.—Acts 4:25-28.

9. Diné éí Jiihóvah biNahatʼaʼ doo deinízin da, ndi haitʼéego haa nitsékees?

⁹ Áko diné kódaatʼéego Jiihóvah éí haitʼéego haa nitsékees? Psalm 2:10-12 ání: “Éí bąą aláahgo naatʼáanii danohłíinii, dahonohsą́; nahasdzáán bikááʼgóó ánihwiiʼaahii danohłíinii, nidanihidiʼnitin leʼ. Bóhólníihii dadíínóhsingo bichʼįʼ nidahohłá, áádóó nidanihiiłnáago nihił dahózhǫ́ǫ leʼ. Doo nihichʼįʼ báhodoochįįłígíí biniyé índa deínókááhgóó doo ádadoohdįįł da biniyé biYeʼ nilíinii tʼóó baa ádadiyohtʼaah. Diné éí Diyin God yaa deidzólíhígíí tʼáá ałtso bił dahózhǫ́.” Jiihóvah haa joobaʼgo hashtʼeʼ tsíńdazdookos hóʼníigo tʼah há hasʼą́. Hashtʼe nináʼdoodáałgo Jiihóvah biNahatʼaʼ nídazhdidooléełgo tʼahdii há bohónéedzą́ągo átʼé. Ndi, kʼadę́ę bíighah aleeh. “Nihoogháahjįʼ yoołkáałgo” kʼad biiʼ danihiyéełkááł. (2 Tim. 3:1; Isa. 61:2) Tʼáá aaníinii índa Jiihóvah bá deizdoozįįłgi tʼáadoo tʼah dazhnízinígo kʼad bíká ádajitʼı̨́į doo.

10. Haggai 2:7-9 éí diné haadaatʼı̨́į doo ní?

¹⁰ Hágeiyai yaa chʼíhoníʼánę́ę łaʼ bił yáʼádaatʼéehgo dayíistsʼą́ą́ʼ. Hágeiyai kótʼéego yaa haadzííʼ, ‘ałʼąą dineʼé tʼáá ałtso daʼjílíinii yah ahodooleełgo’ Jiihóvah worship ádeiłʼı̨́į doo. * (Haggai 2:7-9 yíníłtaʼ.) Aizéíyah dóó Máíkah ałdóʼ éí nihoogháahjįʼ ayííłką́ągo kóhootʼée doo níigo chʼíiníʼą́.—Isa. 2:2-4; Mic. 4:1, 2.

11. Brother łaʼ haneʼ tʼóó yaa hodiiztsʼą́ʼígo haitʼéego tsídeezkéez?

¹¹ Brother Ken wolyéego éí world headquartersgi  naalnish, éí haneʼ yáʼátʼéehii tʼóó baa hozdiiztsʼą́ą́ʼ yę́ędą́ą́ʼ kótʼéego baa tsídeezkééz. Éí 40dóó baʼaan nááhai yę́ędą́ą́ʼ Diyin biNahatʼaʼ tʼóó jidiiztsʼą́ą́ʼ yę́ędą́ą́ʼ ayóó bééjílniih. Éí ájíní: “Diyin Bizaad tʼáá aaníinii yaa halneʼgi tʼóó disétsʼą́ʼígo nihił hoogáłígíí éí bił nihodoogáałjįʼ ayííłką́ níigo yaa halneʼgi shił bééhoozingo ayóó baa shił hóózhǫǫd. Diyin ádíchʼįʼ kóshidoolíiłgo hoolʼáágóó iináa dooleełgo éí díí hoogáłígíí doo bohoníłdzilgo siʼánígíí bitsʼáʼdoodáałgo Jiihóvah bichʼijí niʼdoodááł. Áko sodeeszingo ákósdzaago bílaʼashdlaʼii bił hoogáłígíí bitsʼá níyá. Áádóó Diyin biNahatʼaʼ doo nidootʼihii tsı̨́įłgo biyaajįʼ ííyá.”

12. Jiihóvah worship álʼı̨́įgi haitʼéego bee baa haʼniihgo álʼı̨́?

¹² Bééhózinígo Jiihóvah éí bidineʼé yikʼihadlí. Worship ádabiłʼínígíí kʼeeʼąą nootʼı̨́ı̨́ł. 1914 yę́ędą́ą́ʼ 5,000dóó baʼaan áníidlą́ą́ʼ ńtʼééʼ. Kʼad éí 8 milliondóó baʼaan Diyin worship ádeiłʼı̨́, áádóó Memorial tʼáá nináháhááh bikʼeh ánáʼálʼįįhgo miil ánéelą́ą́ʼ yiniyé ahínéikah. Kótʼéego Jiihóvah dílzingo bił hazʼą́ągi ‘ałʼąą dineʼé tʼáá ałtso daʼjílíinii yah ahodooleeł.’ Diné éí átséédą́ą́ʼ ádajítʼéii yę́ę yitsʼą́ąjįʼ dahidiikaigo éí yee Jiihóvah bízhiʼ yee yaa dahaʼniih.—Eph. 4:22-24.

13. Haʼátʼíí ałdóʼ ádahodoonííł haʼnínę́ę bidahoolnííł? (Naaltsoos bikááʼdę́ʼígíí níníłʼı̨́.)

¹³ Kótʼéego ádahodoonííł haʼnínę́ę bidahoolníiłgo łahjįʼ ałdóʼ bidahoolníiłgo átʼé. Isaiah 60:22 ání: “Áłtsʼíísígíí éí miil nídoodleeł, áádóó aʼoh áníłtsooígíí éí dineʼé bidziilii dooleeł; shí Bóhólníihii [Jiihóvah] nishłíinii baa hoolzhiizhgo tsxı̨́įłgo ádeeshłííł.” Tʼóó ahayóí diné éí Jiihóvah worship ádeiłʼı̨́ daazlı̨́įʼgo tsʼídá nizhónígo hooʼaʼ. Éí ‘daʼjílíinii yah ahooleʼígíí’ ayóó átʼéego dayiichįįhii, índa “yáʼąąshii bee bóhólníihgo bił hazʼáanii baa haneʼ yáʼátʼéehii” baa nahashneʼ doo danízingo yah ahikááh. Isaiah ádííniid yę́ęgi éí “ałʼąą dineʼé bitsʼą́ą́dóó íłtʼoʼ doo,” díí ááhyiłníigo éí Jiihóvah bidineʼé daʼníłtsʼą́ą́dę́ę́ʼ dayiichįįhii yídahoołʼą́ʼígíí yee Jiihóvah yá chʼidaashnish. (Isa. 60:5, 16) Díí hastóí dóó sáanii dajoobaʼii áká  anájahgo nahaneʼ boʼoonishgi 240 kéyah dah naaznilgóó nahaneʼ índa 1,000dóó baʼaan saad ałʼąą ádaatʼéego nahaneʼgo bee naaltsoos ádaalneʼ.

14. Diné éí kʼad háájí bee akééʼ deizdoozįįł?

¹⁴ Nihoogháahjįʼ ahoolzhiizh, áko háájí bee akééʼ deizdoozįįłgi bee ádaa tsídazdookos biniyé díí nahaneʼ boʼoonishígíí éí ałʼąą dineʼé bee nidahoʼdiilná. Éísh Diyin biNahatʼaʼ doodaiiʼ bílaʼashdlaʼii binahatʼaʼ bikééʼ deizdoozįįł? Díí háájí bá yidiidzįįłgi tʼáá áníiltso nihidáahgi silá. Jiihóvah bidineʼé éí kéyah yiiʼ kéédahatʼı̨́įgi bibee hazʼáanii yikʼehgóó ádaatʼé, ndi politics ádaatʼéii doo yee akééʼ ninádaalwoʼ da. (Rom. 13:1-7) Háálá bił béédahózingo Diyin biNahatʼaʼ tʼéiyá bee bílaʼashdlaʼii bee bichʼįʼ nahwiiʼnáanii hashtʼéédoodlííł. Diyin biNahatʼaʼ éí bílaʼashdlaʼii doo bitsʼą́ą́dóo da.—John 18:36, 37.

15. Diyin bidineʼé háájí akééʼ asdzı̨́į dooleełígi bee nabídahonitaahgo Revelation haitʼéego yaa halneʼ?

¹⁵ Naaltsoos Revelation éí nihoogháahjįʼ ayííłką́ągo Diyin bidineʼé háájí bee akééʼ asdzı̨́į dooleełígi bee nabídahonitaah doo ní. Díí éí tʼáá yéigo bee nanihíhonitaah dooleeł. Bílaʼashdlaʼii binahatʼaʼ éí nihígo nihikééʼ nisoozı̨́ daaníi doo, áádóó dooda daanínígíí éí atídabiʼdilʼı̨́į doo. (Rev. 13:12, 15) Éí “aʼohgo ádaatʼéii índa ayóó ádaatʼéii, áádóó daʼatʼíinii índa badahojoobáʼíii, áádóó doo naalteʼ danilíinii índa naalteʼ danilíinii tʼáá ałtso dabílaʼ nishʼnáájí éí doodaléiʼ dabítáaʼgi bídadiʼdoodliłgo” yee nidahwiiʼaah doo. (Rev. 13:16) Ałkʼidą́ą́ʼ éí bídahólníihii éí díí shí shinaalteʼ nilı̨́ daaníigo yídaʼdiiłííd ńtʼééʼ. Tʼáá ákótʼé dííshjı̨́įdi diné éí háí bikééʼ nidzizı̨́į dooleełgi bee hodaʼdiidlid nahalin doo. Éí nitsídajikeesgi índa ádajooníiłgi bee hwéédahózin doo.

16. Jiihóvah yéigo bikééʼ asdzı̨́į dooleełgi haʼátʼíí biniyé ílíinii átʼé?

¹⁶ Nihiísh éí bílaʼashdlaʼii binahatʼaʼ nihídiʼdoołiłgo bá hodiilʼaał? Dooda daanínígíí éí achʼįʼ nahwiiʼná índa báádahadzidii biiʼ góneʼ adahwiiztʼiʼ. Revelation ání: “Łaʼda doo nizhdiʼyoołnih da áádóó doo haa nidiʼyoonih da, . . . hóʼdiidlidgo tʼéiyá.” (Rev. 13:17) Ndi Diyin bidineʼé éí hódaʼdiidlidígíí ádahodiʼdoolníiłgi bił béédahózin. (Rev. 14:9, 10) Doo bee shídiʼdoodlił da hwiindzin doo, ndi Jiihóvah “bííʼ nishłı̨́” jiníigo hálaʼ bee bikʼiʼasdzoh nahalin doo. (Isa. 44:5) Yéigo Jiihóvah bikééʼ siidzı̨́į doo, áko yaa bił hózhǫ́ǫgo bííʼ niidlı̨́į doo!

17. Haʼátʼíí biniyé Jiihóvah nihił haʼólní?

¹⁷ Jiihóvah ayóó átʼéego nihił haʼólníigo hoolzhish. Ndi, doo tʼáá hoolʼáágóó nihił haʼólníi da doo. Tsʼídá doo łaʼ ázhdoodįįł da nízin. (2 Pet. 3:9) Tʼáá ádzíłtso łahgo átʼéego tsíńdazdookosgo habąąhági átʼéii bitsʼáhizhdookahgo tʼáá ákogi éʼétʼééjí nihizhdookahgo há ashjaʼósin. Doo ákódajínééhgóogo éí Mózes biyoołkááłdą́ą́ʼ Féro ábiʼdiilyaa yę́ęgi átʼéego ádahodiʼdoolnííł. Jiihóvah éí Féro íidííniid: “Áko kʼad tʼáá íídą́ą́ʼ nihikʼijįʼ kʼídíshniiʼgo ni áádóó nidineʼé tʼáá bił naałniih bee atínihiishłaago nahasdzáán bikáaʼgi ánihisíłdįįd doo nítʼééʼ. Nidi tʼáá aaníí díí biniyé aláahgo naatʼáanii ániishłaa: ninahjįʼ shibee adziilii bééhózingo ádeeshłííł áádóó nahasdzáán bikááʼgóó shízhiʼ baa haneʼ doo.” (Ex. 9:15, 16) Tʼáá ałtso ałʼąą dineʼé éí Jiihóvah tʼéiyá  tʼáá aaníinii Diyin nilı̨́įgi hoł béédahodoozįįł. (Ezek. 38:23) Haitʼéego hoł béédahodoozįįł?

18. (a) Haggai 2:6, 20-22 éí haitʼéego nahideeshʼnáałgo dadeeshhał níigo haʼátʼíí ááhyiłní? (b) Hágeiyai yee haadzíiʼgi haitʼéego tʼáá aaníí bohodoolníiłgo nihił béédahózin?

¹⁸ Hágeiyai bíiníłką́ą́dóó ląʼí nááhaigo yilʼaadii Paul éí Haggai 2:6, 20-22 áníigi éí náasdi bohodoolnííł ní. (Yíníłtaʼ.) Éí ání: Diyin “kóníigo nihoníʼą́, Nááʼáłdóʼ tsʼídá tʼááłáhídi doo nahasdzáán tʼéiyá da, nidi yádiłhił ałdóʼ nahideeshʼnáałgo dadeeshhał. Díí saad, Tsʼídá tʼáá náánáłáhídi, hodooʼniidígíí, jó, éí nahaasnáʼígíí éí ádaalyaii tʼéiyá nahjįʼ kódoolníiłgo ááhyiłní, doo hidólnááł ádaatʼéhígíí tʼéiyá tʼáá dahólǫ́ǫ doo.” (Heb. 12:26, 27) Haggai 2:7 éí diné bitah dahodiyeeshnááł níigi doo éí ááhyiłníi da. Ndi nahideeshʼnáałgo dadeeshhał yiłnínígíí éí Féro nidahalinígíí, Jiihóvah nahaʼáii nilı̨́įgi doo deinízinígíí hoolʼáágóó ábiʼdidooldįįł.

19. Haʼátʼíí éí doo nahjįʼ kódoolníił da? Díí haitʼéego nihił béédahózin?

¹⁹ Haʼátʼíí éí doo nahjįʼ kódoolníił da? Paul ání: “Éí bąą haaʼíshąʼ aláahgo bee óhólníihgo bił hazʼáanii niłdzilgo doo hizhdółʼnááł átʼéii nihee dahazlı̨́ʼígíí baa ahééh daniidzin doo, áko haaʼíshąʼ baa hastiʼgo dílzingo baa bił hózhǫ́ǫgo Diyin God bichʼįʼ nidahwiidláa doo.” (Heb. 12:28) Áko díí tsʼídá akéeʼdi hidoolnáałii ásdįįdgo Diyin biNahatʼaʼ tʼéiyá doo náhidoolghąął da. Éí bohoníłdzilgo siʼą́ą doo!—Ps. 110:5, 6; Dan. 2:44.

20. Diné éí haʼátʼíí bee akééʼ deizdoozįįł, áádóó éí haitʼéego bee bíká adiilwoł?

²⁰ Tʼáadoo tʼah hwiindziní doo! Kʼad yeeʼ tsı̨́įłgo háájí shı̨́ı̨́ bee asdzı̨́į doo. Nihił hoogáłígíí ádooldįįł góneʼ bá ahóótʼiʼígíísh bikééʼ asdzı̨́į doo? Doodaiiʼ Diyin íinízinii bikʼehgo iináa doo, éí hoolʼáágóó iináa dooleeł góneʼ ahóótʼiʼígíísh bee akééʼ asdzı̨́į doo? (Heb. 12:25) Nidahwiilneʼgi diné bee bíká anéiilwoʼgo tʼáá bí éí binahjįʼ háájí yee akééʼ yidoozįįłgi yee ádá nihodidooʼááł. Ląʼígo diné éí Diyin biNahatʼaʼ yee akééʼ yidoozįįłgi bíká anéiilwoʼ doo. Nihibóhólníihii Jesus ádííniid yę́ę bénéiilniih doo: ‘Yáʼąąshii bee bóhólníihgo bił hazʼáanii baa haneʼ yáʼátʼéehii nahasdzáán nidahoneesʼą́ą́góó, ałʼąą dineʼé tʼáá ałtso bee hoł dahodoonih, áko áadi índa nihodoogááł.’—Matt. 24:14.