1-2. Ngera el omelmesim a lulemlaoch el kirel a Hagai?

“NGDI mle chelsel a sesei el bung e a stoang me a building a mongkangk.” “A rokui el chad a di mlo kaiuediu e katotaod . . . A rebetok el chad a dilu el kmo ngdi mle chelsel a eru el bung er a leduubech aika el tekoi. A renguk e ngmla er ngii el kemanget el taem.” Aika tekingir a rebebil el silobel er sel desiu el mlo er ngii er a Nepal er a 2015. A lsekum e ke mo chormii chouaitia el tekoi e nglocha diak el beot er kau el obes er ngii.

² Me nguaisei engdi chelecha el taem e kid a chelebangel er a ngodech el rolel a omelmesim. Ngdiak el omesmesim er a beluu me a lechub e ngmats. Ngbai omesmesim er a renged el ngii tia er a lolemolem el betok el rak. Tia el omesmesim a lulemlaoch el kirel a Hagai. Ngmilluches el kmo: “A RUBAK er a urrurt a kmo, ‘Ng di telkib kung e ak lmuut el mo simesmengii a eanged ma chutem, ma beluu ma daob.’”​—Hag. 2:6.

3. Ngmekera omelmesim el losaod er ngii a Hagai e ngodech er a desiu?

³ A omelmesim el losaod er ngii a Hagai a diak leua desiu el ngii a di uchul a tellemall. Tia bai mo uchul a ungil tekoi. A Jehovah a dilu el kmo: “Ak mo melmesim a rokui el renged, me a mekreos el klalo er a rokui el renged a mengai el mei. Ak mo mekekii tia el templo er a klebkall.” (Hag. 2:7, NW) Ngera mle belkul tia el ulaoch el kirir a rechad el kiliei er a taem er a Hagai? E ngera belkul el kired er chelecha el taem? Kede mo mesaod a nger er aika el ker e mo suubii a rolel e ngsebeched el mo teloi er tia el ureor el melmesim a renged er chelecha el taem.

4. Ngera uchul me a Jehovah ulderchii a Hagai el mora rechedal?

⁴ A profet el Hagai a ngiluu a kmal klou a ultutelel el ureor er a Jehovah. Molatk a tekoi el dilubech er a uchei er tiang. A Hagai a locha mle ta er tirke el liluut el mora Jerusalem er a 537 B.C.E. er a uriul er a blebaol er a Babilon. Sera lebora Jerusalem e a rechad a lilia uchetemel a templo. (Esr. 3:8, 10) Engdi ngdi mle telkib e te mlo mechitechut a rengrir e mlo stob loureor e le ngmlo er tir a odechelakl. (Esr. 4:4; Hag. 1:1, 2) Me a Jehovah ulderchii a Hagai er a 520 B.C.E. el mo melisiich er tir me lerekir a okedecherul a templo. *​—Esr. 6:14, 15.

5. Ngera uchul me a klemechel a Hagai a millisiich er a rechedal a Dios?

⁵ A belkul a klemechel a Hagai a melisiich a klaumerang er a Jehovah. Ngika mle bekeu a rengul louchais er tirka el mechitechut a rengrir el Chijudea el kmo: “A RUBAK a kmo . . . kemiu el mlo medechel el chad er a beluu me msisiich a rengmiu e moureor e ak ubengkemiu.” (Hag. 2:4) Tia locha kmal millisiich er tir. A Jehovah a kmal klou a urrurt er ngii er a rechanghel me a Rechijudea mle kirir el ultuil er ngii el mo kutmeklii a ureor.

6. Ngera mo rsel a omelmesim el lulemlaoch el kirel a Hagai?

⁶ A Jehovah a ulderchii a Hagai el mo ouchais er a klemechel el kirel a okesiul a omelmesim el bo loruul er ngii el mora rokui el renged. Tia el klumech a millisiich er tirka el Chijudea el mlo mechitechut a rengrir e mle stob lomekedechor. Ngulechotii er tir el kmo a Jehovah mo simesmengii a renged er a Persia el ngii a milengedereder er sel taem. Ngera mo duubech sel bo lolmesim er a Persia? A kot e a rechedal a Dios a mo rokir okedecherul a templo. Seikid e ngmo lmuut me a rechad el diak el Chijudea me te mo teloi er tir el mengull er a Jehovah er tia el templo el liluut el mekedecherur. Tia el klumech a kmal millisiich er a rechedal a Dios!​—Sek. 8:9.

7. Ngera el ureor er omelmesim a deteloi er ngii er chelecha el taem? Mosaod.

⁷ Ngera belkul a ulochel a Hagai el kired er chelecha el taem? A Jehovah er chelechang a dirrek el melmesim a rokui el renged e kid a sebeched el mo teloi er tia el ureor. Molatk er tiang: A Jehovah a tiltkii a Jesus Kristus el mo King er a Rengedel er a eanged er a 1914. (Psa. 2:6) Tia el Renged a diak lungil el tekoi el kirir a remengedereder er a beluulechad. E le tia belkul a kmo a “taem rar Chisentail” el ngii sel taem el diak a telutk el mengedereder lomtechei er a Jehovah, a mla mecherrungel me a lechub e ngmla mo merek. (Lk. 21:24, BT) Tiakid a uchul, tokubets er a 1919 el mei e a rechedal a Jehovah tirkaikid er a louchais er a rechad el kmo ngdi ta el Rengedel a Dios a uchul omelatk el kired a rechad. Tia el berkel a “ungil chais er a Renged” a mla simesmengii a beluulechad el rokir.​—Mt. 24:14, NW.

8. A doltirakl er a Psalm 2:1-3, e ngera uldesuir a oumesingd el renged er a beluulechad el kirel a klumech el domerk er ngii?

⁸ Ngera uldesuir a rechad el kirel tia el klumech er a Renged? Oumesingd el chad a diak el sorir. (Monguiu er a Psalm 2:1-3.) Tia mla ongasech a rengrir aika el renged er a beluulechad. Te kmal diak lekengei er a telutk el King er a Jehovah. Ngkmal diak lomes er a klumech el domerk er ngii el “ungil chais.” A bebil kabelment a merrob er a urered er a berkel a klumech! Alta betok er aika el renged a  kmo te mesiou er a Dios engdi ngkmal diak el sorir el loriid a klisiich el lolab. Te di ua remengedereder er a taem er a Jesus el lomtok er a telutk el King er a Dios me tirke el loltirakl er ngii.​—Rel. 4:25-28.

9. Ngera ngmeruul er ngii er chelechang a Jehovah el kirel aika el renged?

⁹ Ngera uldesuel a Jehovah el kirel aika el renged? A Psalm 2:10-12, NW a melekoi el kmo: “Mada kemiu el king mochotii a llomeserreng; mkengei omesmechokl kemiu el merreder er a chutem. Mosiou er a Jehovah loba omeluu e momritel er a deurreng. Modengesii a ngalek e le lak e ko mongesechii a rengul a Dios e mo mad e le ngdi mereched a ngesechel a rengul. Ngdmeu a rengrir tirke el mo er ngii el kirel a osebechakl.” A Jehovah a ungil a blekerdelel me ngmesterir a taem el mo melilt. Ngkmal dirk sebechir el ngodechii a uldesuir e mo kongei er a Rengedel. Me nguaisei engdi ngkedebengang a taem. Kid a kiei er a “uriul sils” er tia el mekngit el blekeradel. (2 Ti. 3:1, BT; Isa. 61:2) Ngkmal mla mo orechudel el bo lodengelii a klemerang a rechad e bo lengiltii el mo mesiou er a Jehovah.

10. Ngera el ungil tekoi a tuobed er a ureor er a omelmesim el losaod er ngii a Hagai 2:7-9, NW?

¹⁰ Tia el okesiul a omelmesim el lulemlaoch el kirel a Hagai a ngar ngii a ungil tekoi el tuobed er ngii. A Hagai ouchais er kid el kmo tia el omelmesim a uchul “me a mekreos el klalo er a rokui el renged a mengai el mei” el mo mengull er a Jehovah. * (Monguiu er a Hagai 2:7-9, NW. *) A Isaia me a dirrek el Mika ulemlaoch el kirel aika el osisiu el tekoi el mo duubech er a “uriul sils.”​—Isa. 2:2-4, ftn., NW; Mik. 4:1, 2, ftn., NW.

11. Ngera ngrirellii a ta el odam er a lerengesii a klumech er a Renged?

¹¹ Molatk er a rolel e tia el klumech a ngar ngii a lerirellii el mora odam el Ken el chelecha e ngmesiou er a klou el obis er kid. Ngdirk  sebechel dobedebekii sel kot el taem er a lerengesii a klumech er a Renged er a bekord el 40 el rak er a mla me mong. A Ken a melekoi el kmo: “Sera kkot el rongesii a klemerang er a Tekingel a Dios e ngkmal mle dmeu a renguk el suubii el kmo kede kiei er a uriul sils er tia el mekngit el blekeradel. Ak mlo mtebengii el kmo a lsoak el nguu a kengei er a Dios e mo kiei el mo cherechar, e ngkirek el mo diak chedal tia el beluulechad e mo dechor el kirel a Jehovah. Me ak di mle mereched el meluluuch el kirel tia el tekoi. Ak chilitii tia el beluulechad e di mle mereched el mo kongei er a osebechakl er a Rengedel a Dios el ngii a diak el sebechel mesim.”

12. Ngmekera templo er a Jehovah er a klereng e mla obekeek er a klebkall er chelecha el uriul sils?

¹² Me ngbleketakl el kmo a Jehovah a omekngeltengat er a rechedal. Chelecha el uriul sils e kede mesa el kmo te kmal betok a mesiou er a Jehovah. Sera 1914 e te di mle kesai el telael a mesiou er ngii. Chelecha el taem e kede betok er a 8 el miliol el mesiou er a Jehovah e betok el miliol a me teloi er kid el mengedaol er a kodellel a Jesus er a bek el rak. Ngoeak tiakid el rolel e a templo er a Jehovah er a klereng, el ngii sel rolel e a Jehovah a mla kutmeklii a bliochel el omengull, a mla obekeek er a “mekreos el klalo er a rokui el renged.” A ngklel a Jehovah a dirrek el mla mukebkall e le tirka el chad a mla melodech a klengar er tir e mla mukbail er ngike el beches el chad.​—Efe. 4:22-24, BT.

13. Ngera el ulaoch a dirrek el mla tmaut lengii el mla mo betok a ildisir a remesiou er a Jehovah? (Momes er a siasing er a medal tia el babier.)

¹³ Aika el tekoi a dirrek el mla otaut a lmuut el bebil er a ulaoch el uai a ulaoch el debetik er ngii er a 60 el bliongel er a Isaia. A 22 el kekerei el bades a melekoi el kmo: “Ng mo lmuut er a kot el kekerei e kot el ngariou el telungalek me ng mo chetengakl el ua tar a mesisiich el beluu! Ak mo otutii tiang el di mereched sel le mei sel kirel belsechel. Ngak a RUBAK!” Ngar ngii a ungil tekoi el mla duubech e le te betok a mla mo mesiou er a Jehovah. Tirka el “mekreos el klalo” a ngar ngii a duch er tir me a dirrek el reng er tir el sorir el teloi er a ureor el omerk er a “ungil chais er a Renged.” Me a rechedal a Jehovah a sebechir lousbech aika el  duch er tir el losaod a Isaia el kmo ng “milk er a renged.” (Isa. 60:5, 16, NW) Ngoeak a ngelsurir tirka el kmal mekreos el sechal me a redil e a berkel a klumech a meketmokl er a 240 el beluu me a babilenged a motobed el ngar er a kuk betok er a 1,000 el omelekoi.

14. Ngera el omelilt a kirir a rechad el meruul er ngii er chelechang?

¹⁴ A ureor el melmesim aika el renged er chelecha el taem er a ulebongel a mla oremelterir a rechad el mo melilt. Te mo ngiltii a Rengedel a Dios me a lechub e te mo otuil a klaumerang er tir er a kabelment er a beluulechad? Tiakid omelilt el kirel a derta er kid el meruul er ngii. Me alta rechedal a Jehovah a oltirakl a llach er a beluu el lekiei er ngii me nguaisei engdi te diak lomekbitang er a tekoi er a balatiks er tia el beluulechad. (Rom 13:1-7) Te medengei el kmo ngdi ta el Rengedel a Dios a sebechel sumechokl a mondai er tia el beluulechad. E tia el Renged a diak el chedal a beluulechad.​—Jn. 18:36, 37.

15. Ngmekera babier er a Ocholt e ochotii el kmo ngmo measem a blakerreng er a rechedal a Dios?

¹⁵ A babier er a Ocholt a mesaod el kmo a blakerreng er a rechedal a Dios a mo measem er a uriul sils. Tia el omeasem a mo uchul a meringel el ultok me a odechelakl el mei er kid. A kabelment er tia el beluulechad a mo mengeriil er a omengull er kid. Te mo oldechelakl er tirke el diak el kengei el mesterir a omengull. (Och. 13:12, 15) Te mo ‘orrimel er a rokuil chad, a re mekekerei, ma re meklou, ma re merau ma re mechebuul, ma re sibai ma re mimokl, el mo melecha olangch er a kadekmel a chimorir ma lechub e ng medal a bderrir.’ (Och. 13:16) A resibai er a ngar er a mo el taem a lulemlecha olangch er tir lomeketakl el kmo te kloklel techang. Ngdi osisiu, a rokui el chad er chelecha el taem er kid a kirel mo er ngii a ua lolengchelir el kmo te olab el mo er techang. A uldesuir me a omerellir a kirel lochotii el kmo te chedal e dirrek el lolab el mora kabelment er tia el beluulechad.

16. Ngera uchul me ngkmal klou a ultutelel el desisichii a blakerreng er kid el mora Jehovah er chelechang?

¹⁶ Kid kede mo kongei el nguu tia el okesiu el olangch e mo olab el mora kabelment er tia el beluulechad? Tirke el diak lekengei el nguu tia el olangch a mo chobangel a ringel el sebechel el mo uchul a klengar er tir. A babier er a Ocholt a melemolem el melekoi el kmo: “Ng diak a chad el sebechel el omechar ma lechub e ng olterau a lak tial olangch er ngii.” (Och. 13:17) Me nguaisei engdi rechedal a Dios a medengei aike el bo loruul a Jehovah el mo er tirke el oba tia el olangch el ua losaod er ngii a Ocholt 14:9, 10. Te diak el kengei er tia el olangch e bai mo ua llechesii er a chimorir a tekoi el “Kloklel a Jehovah.” (Isa. 44:5, NW) Chelecha ngmla mo taem el doterekeklii el kmo a blakerreng er kid el mora Jehovah, ngmesisiich? A lsekum a blakerreng er kid el mo er ngii a mesisiich e ngmo dmeu a rengul a Jehovah el melekoi el kmo, kid a kloklel!

17. Ngera kired el mo medengelii el kirel a kllourreng er a Jehovah?

¹⁷ A Jehovah a mla ochotii a kllourreng er ngii er chelecha el uriul el sils. Ngkmal diak el soal a ngii di el chad a leriid. (2 Pe. 3:9) Ngmla mesterir a rokui el chad a techellir el mo obult e ngiltii el mo mesiou er ngii. Me nguaisei engdi ngngar ngii a telkelel a kllourreng er ngii. Tirke el lotngeklii tia el techall el Jehovah omesterir a chobengelii a osisiu el tekoi el mlora Farao er a taem er a Moses. A Jehovah a dilu er a Farao el kmo: “Chomko ak mla odersii a chimak el ekor kau el oba rakt, e ng  kmal meketeketa er cho mngemed. Ngdi kmla mechikau me ke dirk chad el olecholt er kau er a klisichek, me bo le sebechel a chisek el oberk er a beluulchad el rokir.” (Exo. 9:15, 16) A rokui el renged a mo medengei el kmo a Jehovah a di ta el mera el Dios. (Ese. 38:23) Te mekera rokui el mo medengei?

18. (a) Ngera el ta er a bedengel a omelmesim a losaod er ngii a Hagai 2:6, 20-22? (b) Kede mekera medengei el kmo aika el tekingel a Hagai a ngar ngii a otutel er a ngar medad el taem?

¹⁸ Betok el rak er uriul er a kodellel a Hagai e a apostol Paulus a mlukreng el mouchais el kmo a tekoi el debetik er a Hagai 2:6, 20-22 a ngar ngii a otutel er a ngar medad el taem. (Monguiu.) A Paulus a milluches el kmo: “Chelechang e ng mla tibir a telbilel el kmo, ‘Ak lmuut el tal bo ksimesmengii a eanged ma chutem.’ Sel kmo, ‘Lmuut el tang’ a olecholt el kmo a ikel mo mesmesim el di rruul er a chim a mo mengai el mo cheroid, e ngii a mo medechel a ikel diak el sebechel el mesim.” (Heb. 12:26, 27) Tia el omelmesim a ngodech er sel losaod er ngii a Hagai 2:7, NW. Tia el omelmesim a belkul a kmo tirke el ua Farao el diak el kengei er a omengederederel a Jehovah a mo nguemed el mo cherechar.

19. Ngera diak bo el mesim, e kede mekera medengei?

¹⁹ Ngera diak el bo el mesim me a lechub e ngmengai el mo diak? A Paulus a melemolem el melekoi el kmo: “Ng kired el mereng a sulel a Dios ele kede mla nguu a rengedel el diak el sebechel el mesim. Dongull el meluluuch er ngii el ngar sel ungil er a rengul, el medakt e mengull er ngii.” (Heb. 12:28) Nguaisei, sel bo lemerek tia el ulebongel el omelmesim engdi Rengedel a Dios a mo medechel. Ngdi medechel el mo cherechar!​—Psa. 110:5, 6; Dan. 2:44.

20. Ngera el omelilt a kirir a rechad el meruul er ngii, e mekera dengesuterir?

²⁰ Ngkmal dikea taem! Ngkmal kirir a rechad el melilt: Te mo ngiltii a klengar er tia el beluulechad el ngii a mo uchul a tellemall me a lechub e te mo meruul a omelodech e mo kiei el oltirakl er a soal a Jehovah el ngii a mo uchul a diak a ulebengelel klengar? (Heb. 12:25) Ngoeak a berkel a klumech e ngsebeched el ngosuterir a rechad el rullii tia el klou a ultutelel el omelilt. Mada dengesuterir a rechad el ngiltii el mo dechor el kirel a Rengedel a Dios. E lak dobes a tekingel a Rubak er kid el Jesus el kmo: “Tial Ebangkelio el kirel ngii el Renged a mo mosisechakl er a beluulchad el rokir el kirel el mo ocholt el mor a rokui el chad, e sola e ng mochu er ngii a ulebongel er a beluulchad.”​—Mt. 24:14.