1-2. Waut fa een Schedren wia fa onse Tiet verutjesajcht?

AUNE 2015 jeef daut en Nepaul een grootet Ieedbäben. Eena, waut daut äwaläwd, säd: “Benna een poa Minuten fungen de Jeschafta un de oole Hiesa aun tooptokjeiwlen.” Een aundra säd: “Aule hauden sea Angst . . . Väle säden, daut dieed ojjefäa twee Minuten. Oba mie späad sikj daut no eene Eewichkjeit!” Wan wie soon schlemmet beläwen wudden, wudd wie daut secha kjeenmol vejäten.

² Wie aula beläwen nu jroz gaunz waut besondret. Daut es een Schedren, waut nich bloos en eene Staut ooda en een Launt es. Jehova scheddat aule Velkja oppe Ieed un hee deit daut aul joarenlank. Dit säd de Profeet Hagai verut, aus hee schreef: “Dit es waut de HAR, dee aules rejieet, sajcht: Daut es aul mau eene korte Tiet bat ekj dän Himmel un de Ieed, daut Mäa un daut drieeje Launt schedren woa” (Hag. 2:6).

3. Waut es bie dit schedren aundasch aus bie een Ieedbäben?

³ Daut schedren, wua Hagai von rät, es nich soo aus een Ieedbäben, waut bloos Schoden brinjt. Enne Städ daut brinjt daut goodet. Jehova sajcht: “Ekj woa aule Velkja schedren. Dan woaren aul äare Schaza häa jebrocht woaren, un ekj woa dit Hus groosoatich moaken” (Hag. 2:7). Waut bedied dise Profezeiunk fa de Menschen en Hagai siene Tiet? Un waut bediet dee fa ons? Daut woa wie nu seenen un wie woaren uk seenen, woo wie doabie methalpen kjennen, aule Velkja to schedren.

4. Wuarom schekjt Jehova dän Profeet Hagai no siene Deena?

⁴ De Profeet Hagai kjrieech eene wichtje Oppgow von Jehova. Wuarom? Hagai wia woomäajlich mank deejanje, waut aune 537 v. Chr. von Babel friekjeemen un trigj no Jerusalem jinjen. Nich lang nodäm aus dee doa aunkjeemen, fungen dise true Menschen aun Jehova sien Hus, dän Tempel, wada opptobuen (Esra 3:8, 10). Oba daut dieed goanich lang, bat dee mootloos worden un opphieeden met buen, wiels doa soo väl Jäajenstaunt wia (Esra 4:4; Hag. 1:1-2). Doawäajen schekjt Jehova aune 520 v. Chr. Hagai no siene Deena, om dee to halpen wada flietich to schaufen, daut see dän Tempel foadich moaken kunnen (Esra 6:14-15). *

5. Wuarom wia Hagai siene Norecht secha een Troost fa Gott siene Deena?

⁵ Hagai siene Norecht sull de Juden em Gloowen stoakjen. De Profeet wia äwanäment un säd to dee, waut mootloos wieren: “De HAR sajcht to junt aula, dee jie en dit Launt sent, siet uk mootich un oabeit. Ekj sie met junt, sajcht de HAR, dee aules rejieet” (Hag. 2:4). Dit mott dee sea jetreest haben. Jehova rejieet je äwa een deel majchtje Enjel un wan de Juden sikj opp am veloten wudden, wudd aules goot utkomen.

6. Waut wudd bie daut schedren rutkomen, wua Hagai von räd?

⁶ Jehova leet de Juden derch Hagai sajen, daut hee aule Velkja schedren wudd. Secha jeef de Juden daut väl Krauft, waut mootloos jeworden wieren un oppjehieet hauden dän Tempel to buen. Daut wees an, daut Jehova uk Persien schedren wudd, waut to jane Tiet de Weltmacht wia. Woo wudd daut utkomen? Ieeschtens wudden Gott siene Deena dän Tempel kjennen foadich moaken. Un tweedens wudden soogoa Nichjuden met an toop en dän foadjen Tempel Jehova aunbäden. Secha jeef siene Deena daut väl Moot! (Sach. 8:9).

7. Woo kjenn wie methalpen, aule Velkja to schedren? Laj daut ut.

⁷ Waut bediet Hagai siene Profezeiunk fa ons? Jehova deit wada aule Velkja schedren un ditmol kjenn wie methalpen. Aune 1914 stald Jehova Jesus Christus aun aus Kjennich von sien himlischet Kjennichrikj (Psa. 2:6). Daut wia eene schlajchte Norecht fa de Harscha von dise Welt. Wuarom? Wiels daut bediet, daut “de Velkja äare Tiet” aufjerant ooda to Enj wia, aulsoo de Tiet, wua daut oppe Ieed kjeenen Harscha jejäft haud, waut Jehova aunjestalt haud (Luk. 21:24). Doawäajen moaken Jehova siene Deena besonda vonne 1919 aun bekaunt, daut Gott sien Kjennichrikj de eensje Hopninj fa de Menschen es. Un derch daut prädjen von “daut Evangelium von Gott sien Rikj” doonen dee de gaunze Welt schedren (Mat. 24:14).

8. Waut haben de mieeschte Velkja no Psalm 2:1-3 no jedonen, aus see de goode Norecht hieeden?

⁸ Horchen de Menschen no dise goode Norecht? De mieeschte nich (läs Psalm 2:1-3). De Velkja sent wadaspanstich un wellen dän Harscha nich aunnämen, waut Jehova aunjestalt haft. Fa dee es de Norecht von daut Kjennichrikj, waut wie prädjen, kjeene goode Norecht. Eenje Rejierungen haben daut Prädichtwoakj mau rajcht veboden! Een deel Harscha von de Velkja sajen, daut see Gott deenen,  oba dee wellen äare Macht nich velieren. Doawäajen stalen dee sikj jäajen Jehova sienen Jesaulwden un gonen jäajen Jehova siene true Deena, krakjt soo aus de Harscha daut en Jesus siene Tiet deeden (Apj. 4:25-28).

9. Waut fa eenen Rot jeft Jehova de Velkja, waut nich horchen wellen?

⁹ Waut fa eenen Rot jeft Jehova de Velkja, waut nich horchen wellen? Psalm 2:10-12 sajcht: “Dan siet nu weis, jie Kjennichs, un lot junt trajchtwiesen, jie Rechta opp de Ieed. Deent dän HARN ut Forcht, kust dän Sän met zetren, daut hee nich doll woat, un jie dan opp däm Wajch omkomen, wiels sien Oaja es leicht aunjestekjt. Oba goot fa dee, dee äa vetruen opp Gott saten!” Jehova es leeftolich un jeft dise Jäajna Tiet, daut dee sikj fa daut rajchte entscheiden kjennen. Dee haben noch emma de Jeläajenheit sikj to endren un sikj opp de Sied von sien Kjennichrikj to stalen. Oba dise Tiet rant auf! Wie läwen “en de latste Doag” von dise Welt (2. Tim. 3:1; Jes. 61:2). Noch kjeenmol ea wia daut soo drinjent, daut de Menschen de Woarheit kjanen lieren un sikj fa daut rajchte entscheiden!

10. Waut fa goodet brinjt daut schedren, wua Hagai 2:7-9 von rät?

¹⁰ Waut fa goodet brinjt daut schedren, waut Hagai verutsäd? Hee räd doavon, daut derch dit schedren aule Velkja “äare Schaza [wudden] häa jebrocht woaren”. Daut sent de opprechtje Menschen, waut komen wudden toom Jehova deenen (läs Hagai 2:7-9). * Jesaja un Micha säden biejlikj soowaut verut, waut sikj en de latste Tiet erfellen wudd (Jes. 2:2-4; Micha 4:1-2).

11. Waut deed een Brooda, aus hee de goode Norecht von daut Kjennichrikj hieed?

¹¹ Eenen Brooda, waut Ken heet un en Jehova siene Zeijen äare Hauptoffiz deent, denkjt daut noch goot, woo daut wia, aus hee äwa 40 Joa trigj de goode  Norecht von daut Kjennichrikj hieed. Ken sajcht: “Aus ekj toom ieeschte Mol de Woarheit ut Gott sien Wuat hieed, wia ekj schaftich to weeten, daut wie nu en de latste Tiet von dise schlajchte Welt läwen. Ekj wort en, daut ekj mie von dise onsechre Welt loosmoaken must un mie gaunz opp Jehova siene Sied stalen, daut hee eenen Jefaulen aun mie haben kunn un mie eewjet Läwen jäwen kunn. Ekj bäd un deed daut fuaz. Ekj hieed opp, dise Welt to unjastetten, un socht Schutz bie Gott sien Kjennichrikj, waut nich jescheddat woaren kaun.”

12. Derch waut es Jehova sien jeistelja Tempel nu en de latste Tiet harlich jemoakt worden?

¹² Daut es kloa to seenen, daut Jehova siene Deena jesäajent haft. Nu en de latste Tiet sent dee bosich mea jeworden. Aune 1914 wia wie mau een poa Dusent, oba nu sent wie äwa acht Millionen, waut Jehova flietich deenen, un jieda Joa komen noch millionende mea no daut Owentmol. Opp dee Wajch woat Jehova veharlicht, wiels aule Velkja “äare Schaza” no dän irdischen Hoff von sienen jeisteljen Tempel jebrocht woaren. Dis jeistelja Tempel stalt aul daut väa, waut Jehova jedonen haft, daut wie am rajcht deenen kjennen. Un Jehova sien Nomen woat uk doaderch veharlicht, daut deejanje, waut no sienen Tempel komen, sikj endren un niee Menschen woaren (Efs. 4:22-24).

13. Waut vonne Profezeiungen haben sikj noch erfelt? (See daut Bilt oppe väaschte Sied.)

¹³ Derch aul daut, waut wie jroz jeseenen haben, haben sikj uk aundre Profezeiungen erfelt, biejlikj dee en Jesaja, Kapitel 60. Doa sajcht daut en Varsch 22: “De kjlansta enne Famielje saul een groota Staum woaren; de jerinjsta saul een stoakjet Volkj sennen; ekj, de HAR, woa dit haustich to de rajchte Tiet soo komen loten.” Wäajen doa soo väle aunfangen Jehova to deenen, jeft et waut wundascheenet. Dise “Schaza”, ooda Menschen, haben väl veschiednet jelieet un sent wellich reed, de goode Norecht von daut Kjennichrikj to prädjen. Opp dee Wajch kjemt Jehova sien Volkj daut togood, waut dee jelieet haben un waut Jesaja “de baste Malkj” von de Velkja nant (Jes. 60:5, 16).  Dise wieetvolle Mana un Frues halpen met, daut doa kaun en 240 Lenda jeprädicht woaren un daut et kaun opp mea aus 1 000 Sproaken Bieekja jäwen.

14. Waut motten de Menschen nu entscheiden?

¹⁴ Wiels nu en de Enjtiet aule Velkja jescheddat woaren, motten de Menschen sikj entscheiden: Woaren dee Gott sien Kjennichrikj unjastetten ooda woaren dee sikj opp de Rejierungen en dise Welt veloten? Daut es eene Entscheidunk, waut jieda eena moaken mott. Jehova siene Deena hoolen sikj aun de Jesazen von de Rejierunk en daut Launt, wua dee wonen, oba dee haben nuscht met de Politikj von dise Welt to doonen (Reem. 13:1-7). Dee weeten, daut bloos Gott sien Kjennichrikj de Menschen äare Trubbels fiksen kaun. Un dit Kjennichrikj es nich Poat von dise Welt (Joh. 18:36-37).

15. Von waut vonne groote Proow rät daut en de Openboarunk?

¹⁵ De Openboarunk wiest, daut Gott siene Deena en de latste Tiet woaren sea aufjeprooft woaren. Wie woaren väl Jäajenstaunt kjrieen un sea vefolcht woaren, wiels de Rejierungen velangen woaren, daut wie bloos an deenen sellen. Un dee woaren aule vefoljen, waut an nich unjastetten wellen (Opb. 13:12, 15). Dee woaren daut wellen bat doa brinjen, daut aulem, “kjlien un groot, rikj un oam, frie ooda veskloft, een Tieekjen opp de rajchte Haunt ooda aum Stiern jejäft” woat (Opb. 13:16). Ieeschtemma kjrieejen de Sklowen een Brenntieekjen toom wiesen, wäm dee jehieeden. Biejlikj soo woaren se en onse Tiet velangen, daut jieda eena soo to sajen een Tieekjen oppe Haunt ooda oppem Stiern kjricht toom wiesen, daut dee met siene Jedanken un Woakjen opp de Rejierungen äare Sied es un met dee toopschauft.

16. Wuarom mott wie nu doaropp schaufen, Jehova gaunz tru to sennen?

¹⁶ Woa wie ons dit Tieekjen jäwen loten un de Rejierungen von dise Welt unjastetten? Dee, waut dit Tieekjen nich aunnämen, woaren Schwierichkjeiten kjrieen un en Jefoa sennen. De Openboarunk sajcht, “daut kjeena kjeepen ooda vekjeepen kaun, dee nich daut Tieekjen . . . haft” (Opb. 13:17). Oba Gott siene Deena weeten, waut hee no Openboarunk 14:9-10 no met deejanje doonen woat, waut daut Tieekjen haben. Doawäajen woaren dee daut nich aunnämen, oba woaren soo to sajen opp äare Haunt schriewen, daut see Jehova jehieren (Jes. 44:5). Nu es de Tiet toom doaropp schaufen, daut wie Jehova en aules tru sent, wiels dan woat Jehova schaftich sajen, daut wie to am jehieren.

17. Waut sell wie äwa Jehova siene Jedult em Denkj hoolen?

¹⁷ Jehova wia en dise latste Tiet aul sea jeduldich, wiels hee nich well, daut doa wäa venicht woat (2. Pet. 3:9). Hee haft aulem de Jeläajenheit jejäft omtokjieren un sikj fa daut rajchte to entscheiden. Oba irjentwanea woat siene Jedult aula sennen! Dee, waut sien Kjennichrikj nich unjastetten wellen, woaren dautselwje beläwen aus de Farao en Moses siene Tiet. Jehova säd to dän: “Ekj haud junt aul kunt met eene Krankheit schlonen, daut jie doavon storwen, soo daut du un dien Volkj gaunz veschwinjen wudden von de Ieed, oba ekj hab die noch läwen jeloten, daut du met miene Macht räakjnen lieescht, soo daut mien Nomen oppe gaunze Ieed woat bekaunt  woaren” (2. Mo. 9:15-16). Tolatst woaren aule Velkja enseenen motten, daut Jehova de eensich woara Gott es (Hes. 38:23). Woo woat daut bat doa komen?

18. (a) Von waut fa een Schedren rät Hagai 2:6, 20-22? (b) Woo weet wie, daut Hagai siene Wieed sikj lota erfellen woaren?

¹⁸ Väl Joaren no Hagai sienen Doot schreef de Apostel Paulus de Hebräa un wees dee, daut de Wieed en Hagai 2:6, 20-22 sikj lota erfellen wudden (läs). Paulus schreef: “Nu oba haft hee vesproaken: ‘Noch een mol well ekj nich mau de Ieed schedren, oba uk dän Himmel.’ Dise Wieed: ‘Noch een mol’, dieden aun, daut dit bewäachliche, waut jemoakt es, omjeendat [ooda venicht] woaren saul, un mau daut, waut nich to bewäajen [ooda to schedren] jeit, bliewen kaun” (Heb. 12:26-27). Dit schedren es nich dautselwje aus daut, wua Hagai 2:7 von rät. Dit schedren, wua wie nu von räden, woat bedieden, daut aul deejanje fa emma venicht woaren, waut krakjt soo aus de Farao nich enseenen wellen, daut Jehova de hechsta Harscha es.

19. Waut woat nich jescheddat woaren, un wuahäa weet wie daut?

¹⁹ Waut woat nich jescheddat, ooda venicht woaren? Paulus sajcht wieda: “Wiels wie een onbewäachlichet Rikj kjrieen, well wie dankboa sennen un Gott deenen met Huachachtunk un Forcht, soo aus am daut jefelt” (Heb. 12:28). Wan daut latste groote schedren ieescht äwa es, woat bloos Gott sien Kjennichrikj bestonen bliewen. Daut woat faust un onbewäachlich sennen (Psa. 110:5-6; Dan. 2:44).

20. Waut motten de Menschen entscheiden, un woo kjenn wie dee halpen?

²⁰ Doa blift nich mea väl Tiet! De Menschen motten sikj entscheiden: Wellen dee soo läwen, aus dise Welt daut fa goot talt, un venicht woaren? Ooda wellen dee sikj aunstrenjen soo to läwen, aus Gott daut haben well, un daut eewje Läwen kjrieen? (Heb. 12:25). Derch daut Prädichtwoakj kjenn wie de Menschen halpen, sikj en dise wichtje Sach to entscheiden. Wie wenschen ons, daut noch väl wieetvolle Menschen sikj fa Gott sien Kjennichrikj eenich woaren. Un wie wellen emma Jesus siene Wieed em Denkj hoolen, waut doa säd: “Daut Evangelium von Gott sien Rikj woat en de gaunze Welt jeprädicht woaren, soo daut aule Velkja daut hieren, un dan woat daut Enj komen” (Mat. 24:14).