1-2. Mudimo tshi wa gunyigisa profete Hagai wadiangela guzuela mukunda nu masugu etu?

MU 2015 mavu adigitshile gu Nepal. “Ba magasin nu jinzo jikulu jiasendesele gubuzumuga gifua muana muangana zungu jia mavu.” Mukatshi dia athu ahulugile, ako azuelele egi: “Athu agasue akhalele muvua woma . . . jinzo jiene jiamuanganele mu minuta mbadi phamba. Uvi ako akhalele muzuela egi, akhalele mumona gifua jinzo jiene mbajikhala mayilago.” Gula nga wakhalele guene tangua mavu adigitshile, nga wajiyilego gujimbila ndaga yene nga hazonda.

² Mangino mudimo wa gunyigisa ifutshi udi mukalegewa mu maluholo a gudisha mu mafundo avula ha mavu. Yehowa udi munyigisa ifutshi yagasue ha mavu. Wasendesele gale gukalagala mudimo wene mualeha. Profete Hagai wadiangele guzuela mukunda nu mudimo wa gunyigisa ifutshi egi: ‘Yehowa Nzambi wa ngolo jiagasue wazuela egi, “gualeha ndo mbangunyigisa dilu nu mavu nu kianga nu mavundo agasue alandu.”’—Hag. 2:6.

3. Luholo tshi mudimo wa gunyigisa udi muzuelela Hagai ushigo luholo lumoshi nu gudigita gua mavu?

³ Mudimo wa gunyigisa udi muzuelela Hagai, ushigo luholo lumoshi nu gudigita gua mavu, handaga gudigita gua mavu guana bolesa ima. Uvi mudimo wa gunyigisa udi muzuelela Hagai wana bata gubonga. Yehowa muene hakhenji udi gutuwambela egi: ‘Mbangunyigisa ifutshi yagasue, ima ya ndando ya ifutshi yagasue mbayiza mu inzo eyi; mbanguzalesa inzo yene nu lutumbu.’ (Hag. 2:7) Profesi eyi yakhalele mukotelesa itshi mukunda nu athu akhalele mujinga mu tangua dia Hagai? Idi mukotelesa itshi mukunda nu esue mangino? Tuza muheta mvutu ya mihu eyi mu longo edi. Tuza nji mumona luholo tuajiya gudihana mu mudimo wa gunyigisa ifutshi mangino.

4. Mukunda natshi Yehowa watumile profete Hagai gudi akombeledi enji?

⁴ Yehowa wahanele profete Hagai mudimo umoshi wa ndando ha gukalagala. Tutadilenu ndaga jiakalegewe gutuama egi Yehowa a muhane ginemo giene. Yajiya gukhala egi Hagai wakhalele mukatshi dia athu anyi akatugile mu uhiga gu Babilona mu givo 537 G.T.D. ha guvutuga gu Yelusalema. Tangua ahetele guene akombeledi a gujinginyina a Yehowa asendesele gutunga luko tempelo. (Ez. 3:8, 10) Uvi gungima akalegele ndaga imoshi ya gikenene. Alebele muila nu abembele gutunga tempelo, handaga enya ifutshi iko akhalele mujinga nawo hehi akhalele guasagesa. (Ez. 4:4; Hag. 1:1, 2) Hene mu givo 520 G.T.D., Yehowa wawambelele Hagai ha guhana enya Yuda gikhesa nu ha guakolesa ha gumanesela mudimo wa gutunga tempelo. *—Ez. 6:14, 15.

5. Mukunda natshi tudi muzuela egi mbimbi jia Hagai jiahanele enya Yuda gikhesa?

⁵ Profete Hagai wakalegele mbimbi jiakhalele naye gukolesa gutshigina gua enya Yuda gudi Yehowa. Wawambelele enya Yuda anyi alebele muila nu gikhesa giagasue egi: ‘“Yehowa wazuela egi, athu agasue a mu gifutshi, khalenu nu ngolo, tshitenu mudimo handaga ngudi n’enu;” Yehowa Nzambi wa ngolo jiagasue wazuela.’ (Hag. 2:4) Idi naye gukhala egi mbimbi “Yehowa Nzambi wa ngolo jiagasue” jia ahanele diago gikhesa. Yehowa udi fumu ya angelo udi nu ngolo jiavula. Hene, enya Yuda akhalele naye gumushila mutshima ha gumanesela mudimo wa gutunga.

6. Luholo tshi mudimo wa gunyigisa wakhalele naye gukuatesa enya Yuda?

⁶ Yehowa watumile Hagai ha guwambela enya Yuda egi mbawunyigisa ifutshi yagasue. Ndaga yene yahanele enya Yuda anyi alebele muila gikhesa. Yakhalele mumonesa nji egi Yehowa mbawunyigisa gifutshi gia Persia, ginyi giakhalele ngolo jia ha mavu a mudidi mu tangua diene. Gunyigisa guene guakhalele naye gukuatesa enya Yuda mu ndaga itshi? Thomo, guakhalele naye gukuatesa akombeledi a Nzambi ha gumanesa mudimo wa gutunga tempelo. Gungima, ikhale athu anyi akhalelego enya Yuda, akhalele naye gudibungisa nawo hamoshi ha gukombelela Yehowa mu tempelo. Mbimbi eji jiahanele diago akombeledi a Nzambi gikhesa!—Zak. 8:9.

7. Mudimo utshi wa gunyigisa akombeledi a Nzambi ana kalagala mangino? Kotelesa.

⁷ Profesi ya Hagai idi mukotelesa itshi mukunda nu esue mangino? Mangino Yehowa udi munyigisa ifutshi yagasue, esue nji tuana kuatesa mu mudimo wene. Tangiza ndaga jiabuile mu 1914, Yehowa wahagele Yesu Klisto Fumu wa Ufumu Wenji mu dilu. (Ngi. 2:6) Uvi mafumu a ha mavu awa asuangulugilego tangua Ufumu wene wasendesele guhinyina. Idi mukotelesa egi ‘tangua diatombewe mukunda nu ifutshi’ diabalegele gale. Mu mbimbi jiko, sungi yinyi yakhalelego nga nu fumu mumoshi watombewe gudi Yehowa yahuile gale. (Luka 21:24) Gishina giene, sendese mu 1919 akombeledi a Yehowa asendesele guwambela athu egi phamba Ufumu wa Nzambi mbawukatula malamba agasue ha mavu. Mudimo wa gulongesa ‘lukuma luabonga lua Ufumu’ udi diago munyigisa mavu.—Mat. 24:14.

8. Ha gutadila Ngimbo 2:1-3, luholo lutshi athu avula akhalele mutadila lukuma luabonga?

⁸ Athu atshiginyile lukuma luene luabonga ba? Ndo, athu avula atunyile. (Tanga Ngimbo 2:1-3.) Ifutshi yabuile tunga-tunga, atunyile fumu Yehowa watombele ha guhinyina. Atshiginyilego egi lukuma lua Ufumu tuana longesa ludi ‘lukuma luabonga.’ Mu ifutshi iko mafumu  a leta atunyishile mudimo wetu! Ikhale mafumu ako a mu ifutshi yene ana zuela egi ana kombelela Nzambi, uvi ana tshigina ndo gubembe ufumu wawo. Gifua luholo mafumu a leta akhalele mukalagala mu tangua dia Yesu, mangino nji adi muluisa muthu Yehowa wambile maji mu nyuma luholo adi musagesa alandudi enji a gujinginyina.—Makal. 4:25-28.

9. Ndaga tshi Yehowa wawambelele athu ana tuna gutegelela lukuma luabonga?

⁹ Ndaga tshi Yehowa wawambelele athu anyi atunyile gutegelela lukuma luabonga? Ndaga jiene jidi mu Ngimbo 2:10-12, jidi muzuela egi: ‘Luenyelu enue mafumu monesenu gutema guenu, enue manzuji a ha mavu tshiginenu malongo. Kombelelenu Yehowa nu woma nu suangulugenu nu gudigita. Tumbuisenu mona, gula ndo Nzambi mbawumivila khabu nu mbawumishiya, handaga khabu jienji jianaza muphushi. Athu agasue ana lengela gudi muene ana khala nu gusuanguluga.’ Yehowa wambembele mbalagaji jienji tangua nu gisemo giagasue hagula ajiya guzula desizio diabonga. Ajiya gusombegesa makalegela awo nu gutshigina Ufumu wa Yehowa. Uvi tangua diasala diazonda, tudi diago mu masugu a gisugishilo a mavu awa. (2 Tim. 3:1; Yesh. 61:2) Didi tangua diabonga dia gulonguga giamatshidia nu dia gutomba ha gukombelela Yehowa.

10. Luholo tshi mukanda wa Hagai 2:7-9, udi mumonesa egi athu ako mbatshigina lukuma luabonga mu mudimo wa gunyigisa ifutshi?

¹⁰ Athu ako ana tshigina lukuma luabonga, gifua luholo profete Hagai wadiangele guzuela. Wazuelele egi mudimo wene mbawutshita egi: ‘Ima ya ndando ya mu ifutshi yagasue [athu adi nu mitshima yabonga] mbayiza ha gukombelela Yehowa’. * (Tanga Hagai 2:7-9.) Profete Yeshaya nu profete Mika azuelele nji egi, ndaga ya luholo lumoshi mbayikalegewa mu ‘masugu a gisugishilo.’—Yesh. 2:2-4 mbimbi goshi’a diyiji, NWT; Mika 4:1, 2, mbimbi goshi’a diyiji, NWT.

11. Ndaga tshi phangi mumoshi wa yala wakalegele tangua avile lukuma luabonga lua Ufumu?

 ¹¹ Tutadilenu luholo mudimo wa gunyigisa mavu wakuatesele phangi Ken, wana kalagala gu biro diakoma dia Matemue a Yehowa (siège mondiale). Udi muwunguluga luko tangua diavile muene giamatshidia giatadila Ufumu wa Nzambi ivo hehi nu 40 yabalega gale. Udi muzuela egi: “Tangua ngavile giamatshidia gidi mu Mbimbi ya Nzambi, ngasuangulugile diago. Ngakotelesele egi tudi mujinga mu masugu a gisugishilo a mavu awa. Ngalongugile nji egi, ha gula ngusuanguluise Nzambi nu nguheta monyo wa mayilago, ngudi naye gutuna gudinyisa mu ndaga jia ha mavu awa nu gusala ya gujinyina gudi Yehowa. Ngakombelele Yehowa mukunda nu ndaga yene, gungima ngazudile desizio diabonga. Ngabembele gudinginyisa mu ndaga jia ha mavu awa. Ngatshiginyile ubambi udi mukatuga mu Ufumu wa Nzambi, handaga Ufumu wene wajiyilego gunyishiwa nga hazonda.”

12. Luholo lutshi mutango wa athu adi mukombelela Yehowa, udi mulandula gudivudisa mu masugu awa a gisugishilo?

¹² Yadiago Yehowa wakuatesele akombeledi enji. Mutango wa athu adi mukombelela Yehowa udi mulandula gudivudisa mu masugu awa a gisugishilo. Mu 1914 athu phamba azonda akhalele mukombelela Yehowa, uvi mangino athu gubalega 8 milio adi gumukombelela. Givo nu givo, ba milio a athu ana gudibungisa hamoshi nu esue ha guwunguluga gufua gua Yesu. Ndaga eji idi mumonesa egi mu masugu adi muza, mutango wa athu adi mukombelela Yehowa wajiya gudivudisa luko muavula. Jidi mumonesa luko egi, tempelo ya Yehowa ya mu nyuma idi ha mavu [gikombelelo gia phelegeta], yazalesewe nu ‘ima ya ndando ya mu ifutshi yagasue.’ Yadiago jina dia Yehowa dia tumbuishiwe tangua athu awa asombegesele makalegelo awo ha gumukombelela.—Ef. 4:22-24.

13. Luholo mutango wa athu adi mukombelela Yehowa udi mulandula gudivusa idi mutagenesa profesi jitshi jiko Biblia?(Tala gifuanesa holu dia gizula.)

¹³ Luholo mutango wa athu adi mukombelela Yehowa udi mulandula gudivudisa, idi gutusuanguluisa diago. Idi mutagenesa profesi jiko jia Biblia, gifua jinyi jidi mu Yeshaya mukhapho 60. Yeshaya 60:22, idi muzuela: ‘Athu azonda mbaabua athu avula, athu agituhu mbaabua giphuta giakola. Ame Yehowa mbangukalagala ndaga jiene muphushi mu tangua  diatagana.’ Ndaga imoshi yawaha idi mukalegewa tangua athu avula asendesa gukombelela Yehowa. Athu a mu ifutshi yagasue nga ‘ima ya ndando’ adi muza nu ndunge jia gudisha mu ulondegi wa Yehowa. Adi nji hehi ha gudihana muavula mu mudimo wa gulongesa ‘lukuma luabonga lua Ufumu.’ Ngenyi akombeledi a Yehowa ajiya gukalagela ndunge jiene, gifua luholo Yeshaya wajitamegele egi, ‘mele a enya gifutshi.’ (Yesh. 60:5, 16) Mu ukuateshi wa aphangi ene a mala nu akhetu, mudimo wa gulongesa udi mukalegewa mu ifutshi 240, mikanda nji idi muzolewa mu mazuelelo gubalega 1 000.

14. Desizio ditshi athu agasue adi naye guzula mangino?

¹⁴ Mu masugu awa a gisugishilo, mudimo wa gunyigisa ifutshi udi mushinjiga athu ha guzula desizio. Athu agasue adi naye gutomba gula mbatshigina Ufumu wa Nzambi nga mbasha mutshima wawo mu ufumu wa ha mavu awa. Ikhale akombeledi a Yehowa ana tumagela mikhuala mafumu a leta a mu ifutshi yawo anahaga, uvi ana gudinginyisago mu ndaga jia politike jia ha mavu awa. (Lomo 13:1-7) Ana jiya egi phamba Ufumu wa Nzambi mbawukatula malamba agasue ha mavu. Ufumu wene ushigo wa ha mavu awa.—Yone 18:36, 37.

15. Luholo lutshi mukanda wa Yatuwuwe udi mumonesa egi akombeledi a Nzambi a gujinginyina mbalolewa?

¹⁵ Mukanda wa Yatuwuwe udi muzuelela gulolewa gua akombeledi a Nzambi a gujinginyina mu masugu a gisugishilo. Gulolewa guene mbagukhala usageshi wakola diago mukunda nu esue. Mafumu a politike a ha mavu awa mbatushinjiga ha guakombela, mbasagesa nji athu agasue mbatuna gukhala gu khanda yawo. (Yat. 13:12, 15) Mbatuma athu ‘agasue gu ngolo, nu athu azonda, nu athu akoma, nu enya umonyi, nu phutu, nu ahiga, nu athu ashigo ahiga ha guhagewa njimbu gu koko diawo dia madia nga ha mbombo jiawo.’ (Yat. 13:16) Mu tangua dikulu akhalele muhaga muhiga njimbu ha gumonesa egi wakhalele muhiga wa fumi’enji mayilago. Luholo lumoshi nji mangino, athu mbakamba egi athu agasue amonese gula adi gukhanda ya nanyi. Mbatshigina egi athu agasue amonese mu luholo luawo lua gutangiza nu mu makalegelo awo egi, adi gukhanda ya mafumu a politike.

16. Mukunda natshi idi nu ndando egi tukolese khadilo dia gusala ya gujinginyina gudi Yehowa sendese mangino?

¹⁶ Mbatutshigina atuhage njimbu yene nu mbatutomba ha gukhala gukhanda ya mafumu a politike ba? Athu mbatuna njimbu yene mbasagesewa nu mbakhala mu gingonza. Mukanda wa Yatuwuwe udi muzuela egi: ‘Nga muthu mumoshi gasumbigo nu gasumbisago, phamba muthu munu udi nu njimbu.’ (Yat. 13:17) Uvi akombeledi a Nzambi adi mujiya ndaga Yehowa mbatshita athu adi nu njimbu. (Yat. 14:9, 10) Ha fundo dia gutshigina njimbu yene mbayikhala gifua asonegele gale ha koko diawo egi, ‘Ame ngudi muthu wa Yehowa.’ (Yesh. 44:5) Didi tangua dia gukamba gujiya gula tuana khala ya gujinginyina gudi Yehowa. Gula tuana khala ya gujinginyina gudi Yehowa, muene mbawuzuela nu gusuanguluga guagasue egi, tudi athu enji!

17. Itshi tudi naye gujiya mukunda nu khadilo dia Yehowa dia guhuiminyina?

¹⁷ Yehowa udi mumonesa diago muavula khadilo dia guhuiminyina mu masugu awa a gisugishilo, handaga gashigo mutshigina egi nga muthu mumoshi afue. (2 Phet. 3:9) Wabembela athu agasue tangua ha gula abalumune mitshima nu azula desizio dia gumukombelela. Uvi mbashigo mumonesa khadilo edi dia guhuiminyina mayilago. Athu anyi adi mutuna gumukombelela mbatagana nu ndaga jia luholo lumoshi gifua jinyi jiabuidile Farao mu tangua dia  Moize. Yehowa wawambelele Farao egi: ‘Nga ngathuphuile gale koko diami ha guguwasa aye nu athu aye misongo yakola, nga muatotele gale ha mavu. Uvi ngagubembele nu monyo ha gugudijiga ngolo jiami nu hagula jina diami ditumbuishiwe ha mavu agasue.’ (Guz. 9:15, 16) Gualeha ndo, ifutshi yagasue mbayijiya egi phamba Yehowa udi Nzambi wa giamatshidia. (Ezek. 38:23) Luholo lutshi ndaga yene mbayikalegewa?

18. (a) Mudimo tshi uko wa gunyigisa adi muzuelela mu Hagai 2:6, 20-22? (b) Luholo lutshi tudi mujiya egi ndaga jiazuelele Hagai mbajitagenesewa mu masugu adi muza?

¹⁸ Ivo yavula gungima dia gufua gua profete Hagai, nyuma ha Nzambi yakuatesa mupostolo Phaula ha gumonesa egi mbimbi jidi mu Hagai 2:6, 20-22 mbajitagenesewa mu masugu adi muza. (Tanga.) Wasonegele egi: ‘Henyaha udi mulaya egi: “Mu mbala eyi mbangushigo munyigisa phamba mavu, uvi mbangunyigisa nji dilu.” Mbimbi “mu mbala eyi” idi mumonesa egi ima inyi yanyigishiwe, inyi yalondewe, mbayikatudiwa hagula ima inyi yanyigishiwego isale.’ (Heb. 12:26, 27) Gunyigisa adi muzuelela mu verse eyi, gushigo luholo lumoshi nu gunyigisa adi muzuelela mu Hagai 2:7. Uvi gudi mukotelesa egi, athu adi mutuna gifua Farao egi Yehowa udi watagana ha guhinyina mbashiyiwa mayilago.

19. Itshi mbayishigo munyigishiwa? Luholo tshi tudi guyijiya?

¹⁹ Ima tshi mbayishigo munyigishiwa nga gukatudiwa? Phaula wazuelele egi: ‘Luholo tudi naye guheta Ufumu unu wajiyilego gunyigishiwa, tulandulenu guheta khenda jiavula jia Nzambi. Mu njila ya khenda jiene, tuajiya gukalegela Nzambi mudimo wa gijila nu woma nu gudigita unu wajiya gutshigina muene.’ (Heb. 12:28) Tangua gunyigishiwa gua gisugishilo mbaguhua phamba Ufumu wa Nzambi mbawusala mayilago!—Ngi. 110:5, 6; Dan. 2:44.

20. Ndaga tshi athu adi naye gutomba? Luholo lutshi tuajiya guakuatesa?

²⁰ Tangua diasala diazonda! Hene athu adi naye gutomba gula adi naye gudinginyisa mu ndaga jia ha mavu jinyi mbajiabata gugufua, nga gula adi naye gusombegesa makalegelo awo nu gukalagala gutshigina gua Nzambi ha guheta monyo wa mayilago. (Heb. 12:25) Tuajiya gukuatesa athu ha guzula desizio diabonga gula tudi mukalagala mudimo wa gulongesa. Tuajiya nji guakuatesa ha gukhala gu khanda ya Ufumu wa Nzambi. Tukhalenu muwunguluga tangua diagasue mbimbi eji jia Fumu Yesu, wazuelele egi: ‘Lukuma elu luabonga lua Ufumu mbalulongesewa nji ha mavu agasue gifua gijiyishilo gudi ifutshi yagasue, gungima gisugishilo mbagiza.’—Mat. 24:14.