1-2. Wanem nao profet Haggai sei Jehovah bae sekem?

LO 2015 wanfala big earthquake kasem Nepal. Wanfala man sei, “Mi seke for lukim olketa old building and olketa stoa kwiktaem foldaon.” Narawan sei, “Evriwan barava fraet fogud . . . Samfala sei datfala earthquake sekem graon for samting olsem tu minute nomoa, bat lo mi hem longtaem tumas.” Sapos samting olsem kasem iu, bae hem hard for iu forgetim datwan, iaman?

² Lo disfala study bae iumi no storyim wanfala taon or kantri wea seksek, bat iumi bae storyim hao Jehovah sekem evri kantri lo world, and hem bin duim datwan for staka year finis. Haggai nao profesi abaotem diswan. Haggai sei: “Hem nao [Jehovah] hu hemi garem evri paoa hemi tok olsem, ?I no longtaem, bae mi mekem heven, an disfala wol, an solwata, olketa evriwan i seksek.”​—Hagae 2:6.

3. Taem Jehovah sekem olketa kantri lo world, why nao iumi sei hem no olsem wanfala earthquake?

³ Taem Jehovah sekem olketa kantri lo world hem no olsem wanfala earthquake wea distroem olketa samting nomoa, bikos gud samting tu bae kamaot from datwan. Jehovah sei: “Bae mi [sekem] olketa narafala kantri, an tekemaot olketa gudfala samting blong olketa, an karim kam fo fulumap Tambuhaos ya long hem.” (Hagae 2:7) Hao nao disfala profesi affectim olketa wea stap lo taem blo Haggai? And hao nao disfala profesi bae kamap tru distaem? Disfala study bae ansarem olketa kwestin hia and bae storyim tu hao iumi insaed disfala waka for sekem olketa kantri.

4. Wanem nao Jehovah laekem profet Haggai for duim?

⁴ Why nao Jehovah talem Haggai for storyim disfala profesi? Tingim samting wea happen bifor datwan. Lo 537 B.C.E., olketa Jew kam bak lo Jerusalem bihaen olketa prisoner lo Babylon, and luk olsem Haggai tu witim olketa. No longtaem bihaen olketa kasem Jerusalem olketa wakem faondeson blo temple blo Jehovah. (Esra 3:8, 10) Bat no longtaem bihaen, pipol start for againstim olketa and datwan mekem olketa wikdaon and stop for duim waka. (Esra 4:4; Hagae 1:1, 2) Dastawe lo 520 B.C.E. Jehovah talem Haggai for encouragem olketa Jew for buildim bak datfala temple. *​—Esra 6:14, 15.

5. Hao nao toktok blo Haggai strongim olketa Jew?

⁵ Toktok blo Haggai hem for strongim faith blo olketa Jew wea wikdaon. Haggai sei lo olketa: “Mi [Jehovah, komanda blo olketa army] mi talem stret long yufala nao: Mi laekem yufala evriwan fo waka, bikos mi stap wetem yufala.” (Hagae 2:4) Masbi datfala toktok “Jehovah, komanda blo olketa army” strongim olketa Jew. Bae olketa tingim hao Jehovah garem bigfala army blo olketa angel wea hem komandim, so olketa Jew fit for trustim hem for helpem olketa.

6. Wanem nao happen bihaen Jehovah sekem Persia?

⁶ Jehovah givim Haggai wanfala message wea showimaot hao Jehovah bae sekem olketa kantri. Disfala message encouragem olketa Jew from olketa wikdaon and olketa stop for wakem temple. Haggai storyim hao Jehovah bae sekem Persia, wea hem nao world paoa lo datfala taem. Wanem nao kamaot from datwan? First samting, olketa Jew finis for buildim bak datfala temple. Then olketa wea no Jew joinim olketa Jew for worshipim Jehovah lo datfala temple. Profesi blo Haggai mas barava encouragem olketa Jew!​—Sekaraea 8:9.

7. Wanem waka nao iumi duim wea sekem world?

⁷ Wanem nao profesi blo Haggai minim for iumi distaem? Jehovah hem sekem moa olketa kantri, and iumi insaed lo datfala waka. Tingim diswan, lo 1914 Jesus kamap King blo Kingdom blo Jehovah lo heven. (Sams 2:6) Diswan hem nogud samting for olketa gavman blo man bikos Bible showimaot Jehovah no iusim eniwan lo earth or heven for rul, start lo 607 B.C.E. kasem 1914, bat taem Jesus start for rul lo 1914 hem “end lo taem wea olketa kantri rul.” (Luke 21:24) So start lo samting olsem 1919 pipol blo Jehovah waka hard for preachim datfala “gud nius abaotem Kingdom” and talem pipol Kingdom blo God nao hem hope for olketa man. Diswan hem barava sekem full world.​—Matt. 24:14.

8. Olsem Sams 2:1-3 storyim, hao nao staka ruler feel abaotem Kingdom message?

⁸ Staka pipol no hapi for herem datfala message abaotem Kingdom. (Readim Sams 2:1-3.) Olketa kantri kros and no acceptim ruler wea Jehovah appointim. Olketa no tingim datfala message abaotem Kingdom wea iumi preachim hem “gud nius,” and samfala gavman banim  preaching waka lo kantri blo olketa! Nomata staka ruler blo olketa kantri hia sei olketa worshipim God, olketa no laek for lusim paoa blo olketa. So olketa ruler hia duim sem samting olsem olketa ruler lo taem blo Jesus. Olketa attakim olketa faithful follower blo Jesus Christ.​—Acts 4:25-28.

9. Wanem nao Jehovah sei lo olketa wea no laek herem datfala message?

⁹ Wanem nao Jehovah sei lo olketa wea no laek for herem datfala message? Lo Sams 2:10-12 Jehovah sei lo olketa: ‘Yufala olketa king mas herem gudfala olketa toktok ya. Yufala mas waka fo Jehovah an yufala mas tinghae long hem. Hemi gud wea yufala barava tinghae long Jehovah, an long san blong hem. Sapos nomoa, bae hemi kros, an no long taem bae yufala dae nao ya. Evriwan wea go long hem fo hemi gadem olketa, olketa nao hapi.’ From Jehovah kaen tumas, hem givim chance lo olketa wea againstim hem for change and sapotim Kingdom blo hem. Bat olketa no garem staka taem bikos iumi stap lo “olketa last day” blo disfala world. (2 Tim. 3:1; Aesaea 61:2) Olketa need for hariap for savve lo tru samting and for disaed for worshipim Jehovah.

10. Olsem Hagae 2:7-9 storyim, taem Jehovah sekem olketa kantri, wanem gud samting nao kamaot from datwan?

¹⁰ Olsem Haggai hem profesi, taem Jehovah sekem olketa kantri gud samting kamaot from datwan. Haggai sei Jehovah bae “tekemaot olketa gudfala samting [pipol wea laek savve lo truth]” blo olketa kantri hia, and olketa bae worshipim Jehovah. * (Readim Hagae 2:7-9.) Isaiah and Micah tu profesi hao lo olketa last day samfala bae laek for joinim pipol blo Jehovah for worshipim hem.​—Isa. 2:2-4, ftn., NW; Mic. 4:1, 2, ftn., NW.

11. Wanem nao Ken duim bihaen hem herem message abaotem Kingdom?

 ¹¹ Tingim Ken, wanfala brata wea distaem hem waka lo world hedquarter. Hem storyim hao hem hapi tumas for herem datfala Kingdom message winim 40 year bifor, and gud samting wea hem kasem from datwan. Ken sei: “Taem mi herem truth from Bible, mi barava hapi from mi lanem iumi stap lo olketa last day. Mi luksavve for mekem Jehovah hapi and for kasem laef olowe, mi mas no followim tingting blo pipol lo world bat mi mas worshipim Jehovah. So mi disaed strong for duim datwan, and mi hapi tumas from mi stap anda lo Kingdom blo God distaem.”

12. Wanem nao showimaot Jehovah blessim pipol blo hem lo olketa last day?

¹² Iumi luksavve Jehovah blessim pipol blo hem distaem. Lo olketa last day iumi lukim staka pipol start for worshipim Jehovah. Samting olsem faev thousand Witness nomoa stap lo 1914, bat distaem iumi winim eit million Witness, and staka million moa savve joinim iumi lo Memorial evri year for rememberim dae blo Jesus. Olsem Haggai storyim, datwan showimaot Jehovah “tekemaot olketa gudfala samting” blo olketa kantri. Taem olketa hia lusim olketa old wei and garem olketa niufala wei, datwan mekhae lo nem blo Jehovah tu.​—Eph. 4:22-24.

13. Wanem nao samfala nara profesi wea kamap tru distaem? (Lukim piksa lo front page.)

¹³ From staka million pipol kam insaed lo truth, datwan mekem olketa nara profesi tu for kamap tru, olsem profesi lo Aesaea chapter 60. Verse 22 sei: ‘Nomata yufala smolfala, bae iufala kamap plande fogud olsem wanfala bikfala kantri. Mi nao Jehovah, an bae mi mekem olketa samting ya fo hapen kuiktaem, long barava taem blong hem.’ Olketa wea kam insaed lo truth willing for preachim datfala “gud nius abaotem Kingdom,” and samfala lo olketa hia garem savve for duim olketa difren kaen waka lo organization blo Jehovah. Isaiah profesi abaotem datwan and sei “olketa narafala kantri  bae i lukaftarem yufala, olsem mami hu hemi susum bebi blong hem.” (Aesaea 60:5, 16) Distaem olketa wea worshipim Jehovah duim preaching waka lo 240 kantri and transleitim olketa pablikeson lo winim 1,000 languis.

14. Wanem nao pipol mas disaedem distaem?

¹⁴ Lo disfala taem blo end, Jehovah gohed sekem olketa kantri and datwan mekem evriwan for mas disaed sapos olketa bae sapotim Kingdom blo God, or olketa gavman blo disfala world. Pipol blo Jehovah obeyim olketa law blo gavman lo ples wea olketa stap, bat olketa no teksaed lo politik. (Rome 13:1-7) Olketa savve Kingdom blo God nomoa bae stretem olketa nogud samting wea happen lo disfala world, and Kingdom blo God hem no from disfala world.​—John 18:36, 37.

15. Olsem Revelation storyim, wanem test nao pipol blo God bae kasem?

¹⁵ Revelation storyim hao lo olketa last day pipol blo God bae kasem test. Olketa gavman bae expectim iumi for sapotim olketa and bae againstim iumi and persecutim iumi sapos iumi no duim datwan. (Rev. 13:12, 15) Olketa gavman bae “forcem olketa man nating and olketa bigman, olketa wea rich and olketa wea poor, witim olketa wea free and olketa wea slave, for kasem wanfala mark long raet hand or long forhed bilong olketa.” (Rev. 13:16) Lo bifor olketa putim mark lo olketa slave for showimaot hu nao ownim olketa. Olsem tu, datfala tokpiksa mark lo hand and lo forhed minim olketa gavman bae expectim evriwan for showimaot hu nao olketa sapotim.

16. Why nao hem important for strongim faith blo iumi distaem?

¹⁶ Waswe, bae iumi acceptim disfala tokpiksa mark and sapotim olketa gavman? Sapos iumi no acceptim datfala mark bae iumi kasem hard taem, olsem Revelation sei: “Sapos eniwan hem no garem datfala mark, hem no savve baem or salem eni samting.” (Rev. 13:17) Nomata olsem, iumi savve lo wanem God bae duim lo olketa wea garem datfala mark wea Revelation 14:9, 10 storyim. Dastawe iumi laek for showimaot iumi sapotim Jehovah, olsem iumi raetem toktok lo hand blo iumi wea sei, “Mi nao blong Jehovah.” (Aesaea 44:5) So distaem nao iumi need for strongim faith blo iumi, then Jehovah bae hapi for sei, iumi pipol blo hem!

17. Nomata Jehovah hem patient, wanem nao bae happen lo olketa wea rejectim hem?

¹⁷ Lo olketa last day, Jehovah barava patient witim pipol bikos hem no laekem eniwan for dae. (2 Pet. 3:9) Jehovah givim chance lo evriwan for disaed for worshipim hem. Bat sapos olketa rejectim Jehovah, hem bae deal witim olketa lo sem wei hem deal witim Pharaoh lo taem blo Moses. Jehovah talem Pharaoh: “Sapos mi bin wande duim, mi save yusim bikfala paoa blong mi fo panisim yu wetem olketa pipol blong yu long wanfala bikfala sik an finisim yufala nao from disfala wol. Bat mi bin letem yufala fo laef, bikos mi laek fo somaot long yu dat mi garem paoa, mekem nius long paoa blong mi hemi kasem evriwea long wol.” (Eksodas 9:15, 16) So gogo evri kantri bae luksavve Jehovah nao hem datfala  tru God. (Esikiel 38:23) Hao nao bae datwan hem happen?

18. (a) Lo Hagae 2:6, 20-22 wanem nao Jehovah sekem? (b) Hao nao Paul showimaot profesi blo Hagae bae kamap tru lo future?

¹⁸ Staka handred year bihaen Haggai talem profesi lo Hagae 2:6, 20-22, aposol Paul explainim hao datwan bae kamap tru lo future. (Readim.) Paul sei, “Hem promis olsem: ‘Narataem moa bae mi mekem earth hem seksek witim skae tu.’ Datfala toktok ‘narataem moa’ hem showimaot God bae aotem olketa samting wea seksek, wea hem nao olketa samting wea God no wakem. Hem duim diswan mekem olketa samting wea no savve seksek hem gohed for stap.” (Heb. 12:26, 27) Lo Hagae 2:7, taem Jehovah sekem olketa kantri datwan helpem pipol for sev. Bat lo disfala profesi taem Jehovah sekem earth and skae, datwan minim Jehovah bae finisim pipol wea olsem Pharaoh and rejectim rul blo hem.

19. Wanem nao datfala samting wea no savve seksek, and hao nao iumi savve lo datwan?

¹⁹ Wanem nao Paul minim taem hem sei, “samting wea no savve seksek hem gohed for stap”? Paul gohed for sei: “From iumi bae kasem wanfala Kingdom wea no savve seksek, iumi mas gohed kasem love bilong God, mekem iumi savve worshipim hem long wei wea mekem hem hapi.” (Heb. 12:28) So bihaen God finisim pipol wea rejectim rul blo hem, Kingdom blo God nao datfala samting wea no savve seksek, and bae hem gohed for stap!​—Sams 110:5, 6; Daniel 2:44.

20. Wanem nao pipol mas disaedem distaem, and hao nao iumi savve helpem olketa?

²⁰ Klosap nao olketa samting hia bae happen! So pipol mas disaed sapos olketa bae sapotim disfala world wea bae lead go lo dae blo olketa, or disaed for changem laef blo olketa and worshipim Jehovah mekem olketa kasem laef olowe. (Heb. 12:25) Preaching waka wea iumi duim savve helpem pipol for disaedem hu nao olketa laek for sapotim, so iumi laek busy for helpem pipol mekem olketa disaed for sapotim Kingdom blo God. And iumi laek for tingim toktok blo Jesus wea sei: “Olketa disaepol bilong mi bae talemaot disfala gud nius abaotem Kingdom long evri ples long world mekem pipol long evri kantri mas herem. Bihaen datwan nao, world bae finis.”​—Matt. 24:14.