1-2. Itihtda dahieu me soukohp Akkai kohpada pahn wiawi nan atail ahnsou?

“EREIN minit keite, sidohwa kan oh ihmw laud kan tepida mweredi.” “Koaros masepwehkada . . . Me tohto nda me e wereiki mpen minit 2. Ahpw ong ie, e reireisang.” Ih met me ekei aramas ndahki rerrer en sahpw me wiawi Nepal nan pahr 2015. Ma mehkot kamasepwehk duwehte met wiawihong uhk, ele ke sohte pahn manokehla.

² Ahpw ahnsou wet, mie itihtda ehu me kin wiewiawi kaidehn nan kahnimw ehute, de sahpw ehute. Siohwa ketin itikadahr wehi kan koaros en sampah, oh e kin ketin wiewia met erein sounpar tohto. Soukohp Akkai kohpada duwen met. E ntingihedi dahme Siohwa ketin mahsanih: “Mwurin ahnsou mwotomwot I pahn itikada nanleng oh sampah, sahpw oh sehd.”​—Ak. 2:6.

3. Ia duwen itihtda me Akkai koasoia duwe eh weksang uhdahn rerrer en sahpw?

³ Itihtda me Akkai kohpada duwe kaidehn uhdahn rerrer en sahpw ehu me kin kauwehla wasa. Ahpw itihtda wet kin kahrehda soahng mwahu kan en wiawi. Pein Siohwa ketin mahsanihong kitail: “I pahn itikada wehi koaros, oh soahng kesempwal kan en wehi koaros pahn kohlongodo.” (Ak. 2:7, NW) Ia wehwehn kokohp wet ong irail kan me momour ni mwehin Akkaio? Oh ia wehwehn met ong kitail rahnwet? Kitail pahn koasoiapene pasapengpen peidek pwukat oh pil sukuhlki ia duwen atail kak iang kisehn doadoahk me itikadahier wehi kan rahnwet.

4. Dahme kahrehda Siohwa ketin poaronehla Akkai rehn sapwellime aramas ako?

⁴ Siohwa ketikihong soukohp Akkai doadoahk kesempwal ehu en wia. Medewehla dahme wiawi mwohn mwo. Akkai ele iang irail kan me pwurodo Serusalem nan pahr 537 mwohn Krais sang arail kalipilipala Papilon. Mwurinte arail lel Serusalem, irail tohnkaudok lelepek pwukat tepida kauwada sapwellimen Siohwa tehnpaso, de tehnpas sarawio. (Esra 3:8, 10) Ahpw sohte pwand, irair kansensuwed ehu pwarada. Irail uhdahn mworusala oh uhdihsang doadoahko pwehki uhwong sang meteikan me kin kousoan karanih wasao. (Esra 4:4; Ak. 1:1, 2) Eri nan pahr 520 mwohn Krais, Siohwa ketin mahsanihong Akkai en sewese oh kamwakid mehn Suhs ko ren pwurehng ngoangkihda oh kanekehla tehnpaso. *​—Esra 6:14, 15.

5. Dahme kahrehda ahn Akkai rohngo ele kakehlakahda sapwellimen Koht aramas ako?

⁵ Kahrepen ahn Akkai rohngo iei en kakehlakahda en mehn Suhs ko ar pwoson Siohwa. Ni eimah, soukohpo ndaiong mehn Suhs ko me mworusalahr: “‘Aramas koaros en sahpwet kumwail kehlail oh doadoahk,’ Siohwa me ketin mahmahsen. ‘Pwe I kin ieiang kumwail,’ Siohwa kaunen karis en sounpei me ketin mahmahsen.” (Ak. 2:4, NW) Lepin mahsen pwukat “Siohwa kaunen karis en sounpei” uhdahn kakehlakahda mehn Suhs ko. Siohwa ketin sapwellimanki manaman pohn karis en tohnleng ngedehrie, eri mehn Suhs ko anahne likih ih ma re men pweida.

6. Ia imwilahn itihtda me Akkai kohpada duwe?

⁶ Siohwa ketin poaronehla Akkai en padahkihong mehn Suhs ko me E pahn ketin itikada wehi kan koaros. Rohng wet kamehlelehiong tohndoadoahk kan en tehnpaso me Siohwa pahn ketin itikada Persia me ni ahnsowo kin kakaun wehi tohto. Oh ia imwilahn itihtda wet? Keieu, sapwellimen Koht aramas ako pahn kanekehla kokoudahn tehnpaso. Mwurin mwo, pil irail kan me kaidehn mehn Suhs pahn iangala mehn Suhs kan kaudokiong Siohwa nan tehnpas sarawio me onohnsapahldahr. Ia uwen met eh wia rohng kangoang ehu ong sapwellimen Koht aramas ako!​—Sek. 8:9.

7. Doadoahk dahieu me itikadahier sampah me kitail kak iang sewese? Menlau kawehwehda.

⁷ Ia wehwehn ahn Akkai kokohpo ong kitail rahnwet? Siohwa pil kin ketin pwurehng itikada wehi kan koaros, oh met kitail pahn iang sewese doadoahk wet. Medewehla ire mehlel wet: Nan pahr 1914, Siohwa ketin kesepwilda Sises Krais nin duwen Nanmwarki en Sapwellime Wehio nanleng. (Mel. 2:6) Kokoudahn Wehi wet wia rohng suwed ehu ong kaun akan en sampah. Met wehwehki me “ahnsou me kileldier ong wehi kan”​—de erein ahnsou me sohte kaun emen kin weliwelian Siohwa—​imwiseklahr. (Luk 21:24) Pwehki kahrepe wet, ahpw mehlel sangete nan pahr 1919, sapwellimen Siohwa aramas akan kin padapadahkihong aramas koaros me Wehin Koht kelehpw iei ihte koapworopwor ong aramas akan. Doadoahk en kalohki “rongamwahu en Wehio” itikadahier sampah pwon.​—Mad. 24:14.

8. Nin duwen me Melkahka 2:1-3 mahsanih, ia duwen pali laud en wehi kan ar mwekidki rohng wet?

⁸ Ia duwen aramas akan ar mwekidki rohng wet? Pali laud en aramas akan soikala rohng wet. (Wadek Melkahka 2:1-3.) Wehi kan  mwoarongadahr. Re sohte pwungki Kaun me Siohwa ketin idihada. Irail sohte medewe me rohng en Wehio me kitail kin kalohki wia “rongamwahu” ehu. Ni mehlel, ekei koperment kan kin keinapwidi atail doadoahk en kalohk. Mehnda ma tohtohn kaun en wehi pwukat nda me dene re kin papah Koht, irail sohte men pwilikihdi arail manaman en kaunda. Eri duwehte dahme kaun akan ni mwehin Siseso wia, kaun akan rahnwet kin uhwong sapwellimen Siohwa me Keidio sang ni arail uhwong sapwellime tohnpadahk lelepek kan.​—Wiewia 4:25-28.

9. Ia duwen Siohwa eh ketin mwekidki wehi kan ar soikala sapwellime Wehi?

⁹ Ia duwen Siohwa eh ketin mwekidki wehi kan ar soikala sapwellime Wehi? Melkahka 2:10-12 (NW) sapengala met: “Eri met, kumwail nanmwarki kan, kasalehda amwail dehdehki mwahu; kumwail sounkopwung en sampah kan, ale kopwung. Papah Siohwa ni lemmwin, oh peren ni amwail wie rerrer. Wauneki sapwellime ohlo, ma soh Koht pahn ketin engiengda oh kumwail pahn sohrasang ahlo, pwe E kin ketin mwadang engiengda. Meid peren irail koaros me kin wiahki Ih ar wasahn ruk.” Ni kadek, Siohwa ketikihong irail ahnsou en wiahda pilipil pwung. Irail kakete wekidala arail madamadau oh pwungki sapwellimen Siohwa Wehi. Ahpw ahnsou mwotomwotalahr. Kitail miher ni “imwin rahn akan” en koasoandi wet. (2 Tim. 3:1; Ais. 61:2) Laudsang mahs, e uhdahn kesempwal me aramas akan en esehla padahk mehlel oh pilada en papah Siohwa.

10. Imwila mwahu dahieu pahn wiawi pwehki itihtda me Akkai 2:7-9 kohpada duwe?

¹⁰ Ekei aramas kin pwungki itihtda me Akkai kohpada duwe. Akkai padahkihong kitail me imwilahn itihtda wet, “dipwisou kesempwal akan [aramas akan me ahneki mohngiong mehlel] pahn wisikdohng wasaht” pwehn kaudokiong Siohwa. * (Wadek Akkai 2:7-9.) Aiseia oh pil Maika kohpada soangen mwekid kan me duwehte met me pahn wiawi “ni rahn  akan me pahn kohdo,” de ni imwin rahn akan.​—Ais. 2:2-4; Maika 4:1, 2.

11. Ia duwen emen brother eh mwekidki rohng en Wehio ni ahnsou me e tepin rong?

¹¹ Medewehla dahme emen brother me adaneki Ken, me met kin papah ni poasen kaun en Sounkadehdehn Siohwa kan, wia ni eh rong rohng kaperen wet. E tamatamante ni ahnsou me e tepin rong duwen rohng en Wehio mpen sounpar 40 samwalahro. Ken nda: “Ni ei tepin rong dahme mehlel sang Mahsen en Koht, I uhdahn kalahnganki ei sukuhlki me kitail miher ni imwin rahn akan en koasoandi wet. I wehwehkihda me I anahne sohla iang wia kisehn sampah soh likilik wet oh kesihnenda teng oh uhki Siohwa pwe I en kak pwungla reh oh ahneki mour soutuk. I kapakap ong Siohwa oh kapwaiada met. I uhdihsang utung sampah wet oh rapahki mehn perepei sang Wehin Koht me sohte kak ohla.”

12. Ia duwen sapwellimen Siohwa tehnpas sarawio eh linganla erein imwin rahn pwukat?

¹² E sansal me Siohwa ketin kapaiahda sapwellime aramas akan. Erein imwin rahn pwukat, kitail kilang tohtohlahn nempehn irail kan me kin kaudokiong ih. Nan pahr 1914, kitail meh kid keite. Ahpw met, mie aramas dauliher welirar me kin kaudokiong Koht, oh aramas rar rar kei pil kin iang kitail kasarawi rahnen Katamano ehuehu sounpar. Ni ahl wet, tehnpas sarawio, me wehwehki sapwellimen Siohwa koasoandi en kaudok min, direkilahr “dipwisou kesempwal akan” sang wehi koaros. Mwaren Siohwa pil kin linganla pwehki wekidekla kan me irail pwukat wiahda ni arail pwuhriong nan mour kapwo.​—Ep. 4:22-24.

13. Kokohp dah teikan me tohtohlahn sapwellimen Siohwa tohnkaudok kan kapwaiadahr? (Menlau kilang kilel ni kilin Kahn Iroir wet.)

¹³ Mwekid laud pwukat pil kapwaiada kokohp teikan, duwehte me dierek nan Aiseia 60:22, me mahsanih: “Pil peneinei ehu me keieu tikitik oh sohte wede rehmwail pahn lapalapala rasehng wehi lapalap ehu. I pahn koasoanehdi pwe irair wet en kak pweida mwadang, ni ahnsawi eh pahn leledo. Ngehi me KAUN-O!” Pwehki me tohtohie tepidahr kaudokiong Siohwa, mehkot kaselel wiawi. Irail “dipwisou kesempwal” pwukat toukihda soangsoangen koahiek kan oh pil arail ineng  en iang kalohki “rongamwahu en Wehio.” Pwehki met, nin duwen me Aiseia koasoia, sapwellimen Siohwa aramas akan kak paiekihda “kepwe kesempwal en wehin liki kan.” (Ais. 60:5; 61:6) Sang sawas en aramas kesempwal pwukat, doadoahk en kalohko kin wiawi nan sahpw daulih 240 oh sawasepen Paipel kan kin wiawihda ni lokaia daulih 1,000.

14. Pilipil dahieu me aramas akan anahne wiahda ahnsou wet?

¹⁴ Ni ahnsoun imwi wet, itihtdahn wehi kan kin kahrehiong aramas akan en wiahda pilipil. Ia duwe, irail pahn uhki Wehin Koht, de irail pahn likih koperment kan en sampah? Met iei pilipil kesempwal me aramas koaros anahne wiahda. Mehnda ma sapwellimen Siohwa aramas akan kin peikiong kosonned kan en koperment en sahpw me irail kin mi ie, irail kin kolokolete arail soupoupali nan palien politik kan en sampah. (Rom 13:1-7) Irail ese me Wehin Koht kelehpw me pahn kihsang ahn aramas akan kahpwal. Wehi wet kaidehn kisehn sampah.​—Sohn 18:36, 37.

15. Ia duwen Kaudiahl eh kasalehda me loalopwoat en sapwellimen Koht aramas akan pahn lelohng kasongosong?

¹⁵ Pwuhken Kaudiahl kasalehda kasongosong ehu ong loalopwoat en sapwellimen Koht aramas akan ni imwin rahn akan. Kasongosong wet pahn pousehlahte kasongehki kitail uhwong laud kan. Koperment kan en sampah pahn idingkihong kitail en kaudokiong irail oh pahn kaloke irail kan me sohte kin utung irail. (Kaud. 13:12, 15) Irail pahn “idingkihong aramas koaros​—me tikitik oh me lapalap, me kepwehpwe oh me semwehmwe, me saledek oh lidu kan—​pwe irail pwukat en kileldi ni pehrail palimaun de ni temwarail.” (Kaud. 13:16) Lidu kan mahs kin kilelkihdi kilel kan pwehn kasalehda ihs me naineki irail. Pil duwehte met, aramas akan rahnwet pahn kasik me koaros en kasalehda ihs me irail kin uhki. Irail pahn men koaros en kasalehda sang arail madamadau oh wiewia kan me re kin iang wia kisehn koperment kan oh pil kin utung.

16. Dahme kahrehda e uhdahn kesempwal en kakehlailihala atail loalopwoat ong Siohwa ahnsou wet?

¹⁶ Ia duwe, kitail pahn kilelkihdi kilel wet oh uhki palien koperment kan? Irail kan me soikala iang kileldi pahn lelohng apwal oh keper. Pwuhken Kaudiahl doula mahsanih: “Sohte emen kak pwainda de netinet, ahpw ihte aramas me kilelo mi reh.” (Kaud. 13:17) Ahpw sapwellimen Koht aramas akan ese dahme Koht pahn ketin wiahiong irail kan me kilelkihdi kilelo me Kaudiahl 14:9, 10 mahsanih duwe. Irail sohte pahn iang kilelkihdi kilelo, ahpw re pahn mwomwen ntingihong pohn pehrail kan, ‘Sapwellimen Siohwa.’ (Ais. 44:5) Met iei ahnsou en tehk mwahu me atail loalopwoat ong Siohwa uhdahn kehlail. Ma ei, Siohwa pahn ketin kupwurperenki en wiahkinkitailla sapwellime!

17. Dahme kitail anahne tamataman me pid sapwellimen Siohwa kanengamah?

¹⁷ Siohwa ketin kasalehda kanengamah laud erein imwin rahn pwukat. E sohte ketin kupwurki emen en kasohrala. (2 Pit. 3:9) E ketikihong koaros arail ahnsou en koluhla oh pilada en papah ih. Ahpw e sohte pahn ketin kanengamah kohkohlahte. Irail kan me sohte kin uhki Wehin Koht pahn lelohng soangen irairohte me lelohng Parao ni mwehin Moseso. Siohwa ketin mahsanihong Parao: “Ma I kamwakid pehiet pwe en kalokei komwi oh sapwellimomwi aramas akan, kumwail uhdahn pahn mwomwla douluhl. Ahpw I mweidohng komwi en momour pwe I en kasalehiong komwi  ei manaman, oh mwarei en kipehla wasa koaros nin sampah.” (Eks. 9:15, 16) Wehi kan koaros pahn kedekedeo esehda me Siohwa kelehpw iei ihte Koht mehlel. (Esek. 38:23) Ia duwen met eh pahn wiawi?

18. (a) Soangen itihtda dahieu me Akkai 2:6, 20-22 mahsanih duwe? (b) Ia duwen atail ese me dahme Akkai kohpada pahn pweida ni ahnsou kohkohdo?

¹⁸ Sounpar tohto mwurin Akkai mehla, wahnpoaron Pohl ntingkilahng Kristian mehn Ipru kan me mahsen kan nan Akkai 2:6, 20-22 pahn pweida ahnsou kohkohdo. (Wadek.) Pohl ntingihedi: “Ahnsou wet e ketin inoukidahr: ‘I pahn pil pwurehng kamwakidada, kaidehk sampahte, pwe pil nanleng.’ Eri mahsen wet ‘pil pwurehng’ kasalehda kasohralahn soahng kan me mwekidida, me iei soahng kan me wiawihda, pwe soahng kan me sohte mwekidida en mihmihte.” (Ipru 12:26, 27) Itihtda wet weksang me Akkai 2:7 mahsanih duwe. Itihtda wet kin wehwehki me irail kan me sohte kin uhki sapwellimen Siohwa pwuhng en kaunda, duwehte Parao, pahn sohrala soutuk.

19. Dahme sohte pahn itihtda, oh ia duwen atail ese met?

¹⁹ Dahme sohte pahn itihtda, de sohrala? Pohl doula koasoia: “Pwehki kitail pahn alehdi Wehi ehu me sohte kak mwekidida, kitail en pousehlahte alehda kadek sapan, oh pwehki kadek sapan wet, kitail kak papah Koht nin duwen me e ketin kupwurperenki ni lemmwin oh wahu.” (Ipru 12:28) Ei, mwurin kaimwiseklahn itihtdao pahn wiawi, Wehin Koht kelehpw me sohte pahn mwekidida. E pahn mihmihte nan dewe!​—Mel. 110:5, 6; Dan. 2:44.

20. Pilipil dahieu me aramas akan anahne wiahda, oh ia duwen atail kak sewese irail?

²⁰ Ahnsou uhdahn mwotomwotalahr! Aramas akan anahne wiahda pilipil: Ma irail pahn pilada en pousehlahte utung sampah wet, irail pahn sohrala. Ma irail pilada en papah Siohwa oh wiahda wekidekla kan me anahn nan arail mour pwehn wia kupwure, irail pahn ahneki mour soutuk. (Ipru 12:25) Sang atail wia doadoahk en kalohk, kitail kak sewese aramas akan en wiahda pilipil kesempwal wet. Kitail en sewese me tohtohie ren pilada en uhki Wehin Koht. Oh kitail en ahnsou koaros tamataman mahsen en atail Kaun Sises: “Rongamwahu en Wehio pahn lohkseli wasa koaros me aramas kin mi ie nin sampah pwe en mie kadehde ong tohnwehi koaros, a mwuri, imwio ahpw pahn leledo.”​—Mad. 24:14.