1, 2. ¿Canan wichan imacuna pasananpätaj Ageo wilacamurgan?

2015 WATA Nepal naciuncho Pacha alapa cuyucuycurgan, imano cashganpita runacuna cayno nipäcurgan: “Juc ishcay minutucunalachomi wasicuna talmacäcurgan”. “Runacunaga sicsicyarmi carcaycargan [...]. Waquincunapaj ratulacho pasashga carpis, nogapäga achca horacunachorämi pasargan”. Noganchipis chaypa pasarga manachi jucla gongaycushwanchu.

² Canan wichanpis cay Pacha cuyuycashgannomi caycan. Quiquin Jehovami achca watapana lapan naciuncunata cuyuycächishgan japuy caycan. Chaymi Ageo profetawan wilachicurgan cayta rurananpaj: “Manapis aycällatanami cuyurachishaj syëluta, munduta, lamarta, chaqui pachatapis” (Ageo 2:6).

3. ¿Ima nishwantaj cay Pachacho terremotopita y Ageo parlamushgan cay Pacha cuyunanpaj cajpita?

³ Cay Pachacho terremoto captenga ima desgraciapis canmanmi, cay Pacha cuyunanpaj Ageo wilacamushgan ichanga alipaj caycan. Taytalanchi Jehová cayno nergan: “Llapan nasyuncunatapis cuyurachishaj. Chauraga ima-aycanpis caymannami chayamongapaj. Chaynöpami Templöchöga ima-ayca bälejcunapis junta caycanga” (Ageo 2:7). Cay profeciaga Ageo cawashgan wichanpäpis y cay tiempupäpis caycanmi, chaypita canan yachacurishun. Y ricärishun imanotaj noganchipis cay Pachata cuyuycashganchi japuy caycanchi.

4. ¿Imata rurananpätaj Ageuta Tayta Jehová mandargan?

⁴ Jehovami profetan Ageuta nergan imata rurananpaj cajta. ¿Imataj pasaycargan chay wichan? 537 wata (J.m.sh.),  Babilonia naciunpita Jerusalén marcaman cuticaycämojcunachopis ichanga profeta Ageupis caycarganchi. Jerusalenman chayaycur ichic tiempo pasarcuptinmi Jehovapa wasinta sharcachir galaycärergan (Esd. 3:8, 10). Pero chiquicoj runacuna rabiapashpanga guelanäcurirganshi y aruynincunata jaguiripäcurganshi (Esd. 4:4; Ageo 1:1, 2). Chaychomi Jehová 520 watacho Ageuta mandargan laquishga caycajcunata shacyächinanpaj y aruynincunata ushapäcunanpaj (Esd. 6:14, 15). *

5. ¿Imanirtaj Ageo wilacamushganga Jehovapa marcanta shacyächergan?

⁵ Ageo wilacamushganga judiucuna Jehovaman yaracärinanpämi cargan. Jehovapa jutinchomi laquishga caycajcunata cayno nergan: “Valurcharcäriy cay Pachacho cawaj runacuna, chayno nin Jehová; y arupäcuy. Gamcunawanmi caycä, chayno nin tropacunata mandaj Jehová” (Ageo 2:4, TNM). Judiucunaga valurcharcärirganchi “tropacunata mandaj Jehová” nishganta wiyarga. Aumi, Jehovapa mandatunchoga caycan mana atipaypaj chaychicaj angelcunami, chayman yaracurmi judiucunaga caycanman cargan.

6. ¿Ima pasananpätaj Ageo wilacamurgan?

⁶ Jehovaga Ageuwanmi judiucunata wilachicurgan lapan naciuncunata cuyuycächishgan japuy caycänanpaj. Cuyuchinanpaj caj jatun naciunga Persia caycargan, Jehovaga munarganmi laquishga caycaj judiucuna chayta musyananta. Persia naciunta cuyuchishganraycurmi templutapis sharcachiyta ushapäcurgan y mana judío caj runacunapis shacäramunmanmi cargan Jehovata adurapäcunanpaj. Ali wilacuyta chasquirga mayraj cushicarcärergan judiucuna (Zac. 8:9).

7. ¿Ima ruraycunachotaj cushi cushila canan wichan yanapacuycanchi?

⁷ Unay Ageo wilacamushgantapis canan wichan ricaycanchimi. Jehovaga yapaymi naciuncunata cuyuycächimun, chaychoga jucninchi jucninchish yanapacuycanchi. Musyanchina 1914 watacho Jesús rey cananpaj Jehová churashganta (Sal. 2:6). Jesús Reyman ticrashganga cay mundo gobernanticunapäga mana ali wilacuy cargan. ¿Imanirtaj chayta ninchi?, ima pasananpaj cajta Jesús wilacamushganraycurmi. Chay watapitaga mananami canmannachu cargan cay Pachacho Jehová acrashgan maygan gobiernupis (Luc. 21:24). Chaymi 1919 watapita may chaycho wilachicuycashcanchi Diospa Gobiernunla ali cawayta apamunanpaj cajta. Diospa Gobiernunpita may chaychopis lapan runata yachachiycashganchiga cay munduta cuyuchiycashganchi japuymi cashga (Mat. 24:14).

8. Salmo 2:1-3 texto wilacushganno, ¿runacunaga chasquicäriycanchu apapashganchi ali wilacuycunata?

⁸ Diospa Gobiernunpita yachachicushganchicunataga waquin waquilanmi chasquicärishga (leiriy Salmo 2:1-3). Jinamanpis cay mundo runacunaga Jehová Dios churashgan reyta chasquicäriyta munanchu. Ali caway chayamunanpaj parlapashganchimanpis yaracärinchu. Y waquin gobiernucunapis pasaypa michäcärin Diospita yachachicunapaj. ‘Nogapis Diosta sirvï’ chay autoridäcuna niptinpis naciunnincunacho mandacuycarla cayta munapäcun. Jesús cawashgan wichan  pasashgannolami canan wichanpis, Jehová acrashganpa contrancho sharcur runacuna chiquircaycämanchi (Hech. 4:25-28).

9. ¿Imatataj Jehová ruran cay mundo runacuna chasquicuyta mana munaptinpis?

⁹ ¿Imatataj Jehová ruran runacuna mana chasquicärishganta ricar? Salmo 2:10-12 cayno nin: “Nacionkunapa mandaqnin reykuna, lapayki shumaq tantiyakäriy. Kay patsacho mandaqkuna, kay nishqäta shumaq chaskikäriy. Tayta Diosta mantsakur payta sirvipäkuy. Mantsakuypa adorapäkuy. Diospa tsurinta respitar qonqurpakäriy. Mana respitaptikiqa jinan höra rabyakushpanmi wanutsishunkipaq. ¡Payman yärakuqkunaqa kushishqami kawanqa!”. Jehovaga cuyacoj cashpanmi shuyaraycanraj chiquicoj runacunapapis shongun ñanpuyänanta, chaynopa Gobiernunta chasquicärinanpaj. Cay munducho lapan mana alicunaga ushacänanpäna caycan, “último tiempuchona” cawaycanchi (2 Tim. 3:1; Is. 61:2). Cananmi tiempo caycan lapan runacuna rasunpa cajpita yachacärinanpaj y Jehovalata sirvir galaycärinanpaj.

10. ¿Ima pasananpaj cajpitataj Ageo 2:7-9 texto wilacamun?

¹⁰ Ageo wilacamushganchoga parlaycämurgan ali shongu runacuna Diospa templunman yaycunanpaj y payta sirvir galaycunanpaj (leiriy Ageo 2:7-9). * Caypitapis Isaiaswan Miqueas profetacuna wilacärergan ‘ushanan junajcunacho’ pasananpaj cajta (Is. 2:2-4; Miq. 4:1, 2).

11. ¿Imatataj juc waugui rurargan Diospa Gobiernunpa ali wilacuyninta yachacushganlacho?

¹¹ Cay ali wilacuycunaga Ken wauguinchipa shonguntash cuyurachergan (payga Central mundial nishgancho yanapacun). Diospa Gobiernunpita yachacushganpita 40 watacunano pasashga captinpis manash gongaycunchu, cayno nin: “Cushicurgämi ushanan junajcunachona cawaycashganchipita cuentata gocur, chaytaga Diospa Palabranchomi  yachacurgä. Tantiarirgä Diospa bendiciunninta chasquinäpäga lapan mana alicunata jaguirinäpaj cajta y Jehovalatana sirvir cacunäpaj cajta. Mañacurishpäga ima yarpaycashgäta rurar galaycurgä. Guepaman mana cutiypa Diospa Gobiernunlamanna yarpar cawacurgä”.

12. ¿Ima nishwantaj canan wichan Jehovapa espiritual caj templunpita?

¹² Musyanchimi canan wichan quiquin Jehová pushaycämashganchita. Cushicuypämi, canan wichanga mana atipaypaj chaychicaj runacunami Diospa sirvejninman ticrarcaycan. 1914 watapäga walcajlami cargunchi, canan ichanga ocho millonespitapis masraj caycanchi y Conmemoración ruracaptin may chaypita ali shongu runacuna shacäramuptenga más achcarämi canchi. Chaymi rasunpa caycan Jehová cayno nishgan: “Templöchöga ima-ayca bälejcunapis junta caycanga”; canan wichanga espiritual caj templupäna parlaycanchi, chaytaga quiquin Jehovami camacächimushga chaycho pï maypis paylata adurananpaj. Ali shongu runacunaga unay caj cawayninta guepaman jaguiycurmi Jehovapa jutinta alabarcaycan (Efes. 4:22-24).

13. ¿Maygan profecía mastaj parlaycämun canan wichan ima pasananpaj cajta? (Garancho caycaj fotuta ricay).

¹³ Canan wichan ima pasaycashgancunaga tincunmi Isaías capítulo 60 wilacushganwan, 22 caj versiculun cayno nin: “Chay ichiclla caycajmi waranganpa mirangapaj. Wallcalla caycajmi munayniyoj nasyun canga. Nogami TAYTA DIOS cä. Nogami camacächishaj manapis aycällatana chayno cananpaj. Nishä diyapäga chaynönami canga”. Jehovapa templunman shacamoj ali shongu runacunaga imaycachomi yanapacaycämun y Diospa Gobiernunpitapis may chaycho yachachicur caycan. Chay shacamojcuna alapa yanapacamunanpaj parlarmi Isaías nin ‘lapan nistashganchicuna’ cashganta (Is. 60:5, 16). Yanapänacurmi 240 naciuncunacho Diospita yachachicuycanchi y publicaciunninchicunapis 1.000 idiumapitapis mascho traducicaycämun.

14. ¿Imataj caycan runacuna acracunanpaj?

¹⁴ Canan wichan runacunaga acracunanpämi caycan: Diospa Gobiernunlaman yaracärinanpaj o runacunapa cajlamancu. Jehovapa sirvejnincunaga casucunchimi autoridäcunapa leynincunata, ichanga cay munducho jaticäcunapaj nimaptinchega manana casucunchinachu (Rom. 13:1-7). Musyanchimi Diospa Gobiernunlawan lapanpis alchacänanpaj cajta, chay Gobiernutaga manami runacunacho camacächimushga (Juan 18:36, 37).

15. ¿Nacashpanchipis pilaman yaracunapätaj wilacamun Apocalipsis libro?

¹⁵ Apocalipsis libruchomi wilacun cay ushanan junajcunacho Diospa sirvejnincuna pruebacunapa pasapäcunanpaj, chaymi nacaycäshunrächi. Runacunapis gobiernucunapis chiquiycämäshunrächi Taytalanchi Jehovalata sirvishganchiraycur (Apoc. 13:12, 15). Biblia nin: “Yachaq runata y mana yachaq runatapis, rïcu runata y waktsa runatapis, ashmaykunata y mana ashmaykunatapis lapantami alawqa kaq makinman karpis o urkunman karpis” señalachinanpaj (Apoc. 13:16). Unaychopis esclavucunataga señalarachipäcojshi maygan patrunpäpis cananpaj. Chaynolami canan wichan runacunapis Diospa Gobiernunman mana yaracushganraycur maquinchopis urcunchopis señalta chasquircaycan. Ruraynincunachopis yarpaynincunachopis ricacaycämunmi maygan gobiernuta yanaparcaycashganta.

16. ¿Imanirtaj lapancho Dioslata casucunapaj calpachacushwan?

¹⁶ ¿Imatataj noganchicunaga rurashun? ¿Runacunapa gobiernunlata yanaparchuraj señalamänanchita jaguishun? Biblia nin chay señalta mana chasquicojcuna nacaytaraj Diosta sirvinanpaj, pruebacunapa pasar-raj Diosta sirvinanpaj. Apocalipsis libro cayno nin: “Señaläni kaq runakunaqa manami rantipakuyta ni rantikuyta kamäpakurqantsu” (Apoc. 13:17). Musyanchina señalashga caycajcunawan Jehová imata ruramunanpaj cajta (Apoc. 14:9, 10). Chay señalta apanapaj trucanga maquinchicho cayno escribiraycaj japuymi caycanman: “Quiquin TAYTA DIOSPAMI cä” (Is. 44:5). Cananmi ricacämunman imayca rurashganchicunacho Jehovalapaj cashganchi, chayno captenga payga cushishgalami chasquicamäshun.

17. ¿Imatataj musyanchi Jehová pacienciacoj cashganpita?

¹⁷ Jehovaga munan runacuna salvacunantami, paycunata cuyashpanmi cay munduta ushacächishgarächu (2 Ped. 3:9). Aumi, alicunata acrar arrepenticärinantami shuyaraycan. Diosninchi Jehová pacienciacoj carpis Moisespa tiempuncho faraunta ushacächishgannomi mana casucoj runacunataga lapanta ushacächenga. Jehová cayno nergan Moisesta: “Munashpäga faraonta, llapan Egiptucunatapis fiyu gueshyawan castigämanmi caran. Chaura canan ushacashanami caycanman caran. Ichanga faraón cawaycanraj noga munayniyoj cashäta musyachinäpämi, intëruchöpis noga munayniyoj cashäta musyananpämi” (Éx. 9:15, 16). Chauras cay mundo ushacaptenga lapan naciuncunami musyapäcunga Taytanchi Jehová rasunpa caj Dios cashganta (Ezeq. 38:23). ¿Imanoraj chayga canga?

18. 1) ¿Ima pasananpätaj wilacamun Ageo 2:6, 20-22 texto? 2) ¿Imanirtaj ninchi Ageo wilacamushganga shamoj tiempucho cumplicänanpaj?

 ¹⁸ Profeta Ageo wanushganpita tiempo pasaptenga, apóstol Pablo wilacurgan Ageo 2:6, 20-22 (leiriy) texto wilacushganga shamoj tiempucho cumplicänanpaj cajta. Pablo cayno wilacurgan: “Cananpis Tayta Diosninchëga palabrancho niycanmi: ‘Yapaymi munduta sicsicyachishaj. Cananga manami mundullatachu sicsicyachishaj, man’chäga syëlutawanmi’. ‘Yapaymi’ nerga musyachimanchi llapan camashancunata sicsicyachir illgarachinanpaj cashantami. Chayno ruraptinmi syëlucho caycaj mana ushacajcunallana quëdanga” (Heb. 12:26, 27). Yachacushganchinopis Ageo 2:7 textuga parlamun naciuncuna cuyuchishga cananpaj, pero caycaj textucunaga parlaycämun faraunnopis Diospa contrancho sharcoj runacuna ushacächishga cananpaj.

19. ¿Imataj mana ushacangachu y imanirtaj chayno ninchi?

¹⁹ ¿Imatataj Diosninchi Jehovaga mana ushacächingachu? Apóstol Pablo cayno wilacun: “Tayta Dios mandaykashqanqa imaypis manami ushakanqatsu. Tsay mandaykashqantaqa chaskiykantsinami. Tsaymi agradëcikushpantsi lapan shonquntsiwan payta alabashun. Payta mantsakur munashqanno imaypis kawashun” (Heb. 12:28). Aumi, runacunapa gobiernuncunaga ushacashgami canga, Diosninchipa Gobiernunta ichanga imapis ushacächingachu (Sal. 110:5, 6; Dan. 2:44).

20. ¿Imatataj runacuna acracärinman y imanotaj paycunata yanapashwan?

²⁰ Cay mundo ushacänanpäna caycaptenga, ¿imataraj runacuna acracärenga?, ¿jinalachuraj cay munducho mana alicunata rurar cacärenga?, ¿o ali cawayta chasquinanpaj cajman yarparchuraj Diospa munayninta rurar galaycärenga? (Heb. 12:25). Predicaciunwanmi runacunataga yanapanchi ali cajta acracärinanpaj. Chaynola calpachacuycäshun paycunapis Diosta adurar galaycärinanpaj. Yarparaycäshunla cayno Jesús nishganman: “Tayta Diospa maquincho cawananpaj cajtaga may-chaychöpis llapan runatarämi willapanga. Chayrämi ushacangaga” (Mat. 24:14).