1-2. Саво симболично тресибе сине пророкујмо башо амаро време?

„БАШО само некобор минутија, о дуќане хем о пуране кхера почминѓе те перен. Сарине сине ки паника. Бут мануша вакерѓе кај трајнѓа околу дуј минутија. А манге сар те пхене трајнѓа саатенцар.“ Акала тане лафија таро мануша со преживинѓе о земјотрес ко Непал, со сине ко 2015 берш. Ако ту да доживинѓан нешто добором страшно, нане локхе те бистре ле.

² Ама, авдиве случинела пе јекх бут по јавер тресибе, хем нане само ки јекх диз или јекх држава. О Јехова тресинела са е народон ко свето хем адава керела ле бершенцар. Акава тресибе пророкујнѓа ле о пророко о Агеј. Ов пишинѓа: „Аѓаар вакерела о Јехова е војскенгоро: ’Панда јекх пути — хем адава панда хари — ка тресинкерав о небо хем и пхув, о море хем о копно‘“ (Агеј 2:6).

3. Сар разликујнела пе акава симболично тресибе таро дословно земјотрес?

³ О тресибе башо кова со керела лафи о Агеј, нане сар о дословно земјотрес кова со анела само штета. Наместо адава, акава тресибе керела те овен шукар буќа. О Јехова вакерела аменге: „Ка тресинкерав са е народон, хем ка авен о скапоцена буќа таро са о народија, хем ка пхерав мло кхер славаја“ (Агеј 2:7). Со значинѓа акава пророштво околенге со живинена сине ко е Агеескоро време? Хем со значинела аменге авдиве? Ки акаја статија ка дикха о одговорија башо акала пучиба хем ка дикха сар шај амен те учествујна ко тресибе е народонгоро авдиве.

4. Соске бичхалѓа о Јехова е Агее ко пло народо?

⁴ О пророко о Агеј добинѓа јекх важно задача таро Јехова. Те дикха со случинѓа пе англедер те добинел акаја задача. О Агеј веројатно сине машкар окола со ко 537 берш а.а.е. таро Вавилон иранѓе пе ко Ерусалим. Кратко откеда ресле ко Ерусалим, акала верна мануша чхивѓе о темели е Јеховаскере кхерескоро, или е храмескоро (Езра 3:8, 10). Ама кратко пало адава, ола обесхрабринѓе пе хем чхинавѓе те градинен о храми соске о мануша околу ленде противинена пе сине ленге (Езра 4:4; Агеј 1:1, 2). Адалеске, ко 520 берш а.а.е. о Јехова вакерѓа е Агееске те поможинел е народо те овел палем ревно хем те завршинел о храми * (Езра 6:14, 15).

5. Соске е Агеескири порака сине охрабрувачко е Девлескере народоске?

⁵ И цел тари е Агеескири порака сине те бајрарел е Евреенгири вера ко Јехова. Ов храбро вакерѓа е Евреенге, кола со сине обесхрабриме: „’Овен силна, тумен о народо‘, вакерела о Јехова, ’хем керен бути!‘ ’Соске ме сиум туменцар‘, вакерела о Јехова заповеднико е војскенгоро“ (Агеј 2:4). О лафија „о Јехова заповеднико е војскенгоро“ сигурно бут охрабринѓе лен. Е Јехова иси ле авторитети упри бут бари војска таро ангелија, адалеске е Евреен ваљани сине те овел лен доверба ки лесте ако мангена сине те успејнен.

6. Саво сине о резултати таро тресибе кова со пророкујнѓа ле о Агеј?

⁶ О Јехова бичхалѓа е Агее те вакерел е Евреенге кај ка тресинкерел са е народон. Акаја хабери охрабринѓа е Евреен кола со чхинавѓе те градинен о храми хем сикавѓа кај о Јехова ка тресинел е Персија, која ко адава време сине светско сила. Хем саво ка овел сине о резултати таро адава тресибе? Прво, е Девлескоро народо ка завршинел сине градибаја о храми. Пало адава, чак окола со нане Евреија ка авен сине те обожавинен е Јехова ко обновимо храми. Адаја порака сигурно бут охрабринѓа е Девлескере народо! (Зах. 8:9)

7. Ки која задача учествујнаја амен авдиве која со тресинкерела о свето? Објаснин.

⁷ Со значинела аменге авдиве е Агеескоро пророштво? О Јехова панда јекх пути тресинкерела са е нациен, хем акава пути амен да учествујнаја ко адава. Размислин башо акава: Ко 1914 берш о Јехова чхивѓа е Исусе те овел Цари ко лескоро небесно Царство (Пс. 2:6). Кеда адава Царство почминѓа те владинел адава на сине шукар хабери е светско водаченге. Адава значинела сине кај о одредимо време е народонгоро — јавере лафенцар о периоди кеда на сине владетели со претставинела сине е Јехова — завршинѓа (Лука 21:24). Тари адаја причина, посебно таро 1919 берш, е Јеховаскоро народо вакерела сине сариненге кај само е Девлескоро Царство ка решинел е манушенгере проблемија. О проповедибе акава „шукар хабери башо Царство“ тресинкерѓа цело свето (Мат. 24:14).

8. Спрема Псалм 2:1-3, сар реагиринѓе побаро дело таро народо ко акава хабери?

⁸ Сар реагиринѓе о мануша ко акава хабери? Повише џене негативно реагиринѓе. (Читин Псалм 2:1-3.) О народија вознемиринѓе пе. На мангле те прифатинен е Владетеле коле со о Јехова чхивѓа ле. Ола на дикхена ко хабери башо Царство  со проповединаја ле сар „шукар хабери“. Несаве владе чак забранинѓе о проповедничка активностија! Иако бут владетелија таро акала народија вакерена кај служинена е Девлеске, ола на мангена те откажинен пе тари пли моќ хем авторитети. Исто сар о владетелија ко е Исусескоро време, о авдисутне да владетелија противинена пе е Јеховаскере Помазаникоске, аѓаар со нападинена лескере верна следбеникон (Дела 4:25-28).

9. Сар о Јехова поможинела е народонге иако на прифатинена о хабери башо Царство?

⁹ Со керела о Јехова иако о народија негативно реагиринена ко адава хабери? О Псалм 2:10-12 дела амен о одговор: „Адалеске, тумен о царија, постапинен разумно! Прифатинен о укор, тумен о судие тари пхув! Даран таро Јехова хем служинен леске, хор поштујнен ле бахталипаја! Поштујнен е чхаве те шај о Девел те на хољанел хем те на мерен, соске лескири холи шај сигате те тхабљол. Бахтале тане са окола со о Девел ленге тхан гарајбаске“. О Јехова љубезно мукхела акале противниконге време те шај те анен и исправно одлука. Ола панда шај те променинен пе хем те прифатинен е Јеховаскоро Царство. Ама ачхило панда хари време. Живинаја ко „последна диве“ акале светоскере (2. Тим. 3:1; Иса. 61:2). Никогаш џи акана на сине добором итно о мануша те џанен о чачипе хем те биринен те служинен е Јеховаске.

10. Која позитивно реакција таро тресибе тани опишими ко Агеј 2:7-9?

¹⁰ Несаве мануша позитивно реагиринена ко акава симболично тресибе со пророкујнѓа ле о Агеј. Ов вакерѓа аменге кај о тресибе керела „о скапоцена буќа [о искрена мануша] таро са о народија“ те авен хем те обожавинен е Јехова. * (Читин Агеј 2:7-9.) Хем о Исаија хем о Михеј исто аѓаар пророкујнѓе кај акава ка случинел пе ко „последна диве“ (Иса. 2:2-4; Мих. 4:1, 2).

11. Сар реагиринѓа јекх пхрал кеда прво пути шунѓа о хабери башо Царство?

 ¹¹ Дикх сар влијајнѓа акава хабери кова со тресинкерела цело свето упро Кен, јекх пхрал со акана служинела ко светско седиште. Ов панда шукар сетинела пе кеда прво пути шунѓа башо Царство, англедер отприлика 40 берш. О Кен вакерела: „Кеда прво пути шунѓум о чачипе таро е Девлескоро Лафи, сиум сине бут бахтало со дознајнѓум кај живинаја ко последна диве акале светоскере. Халиљум кај те шај о Девел те дикхел шукар ки манде хем те овел ман вечно живото мора сине те цидав ман таро акава свето со нане стабилно, хем те ачховав одлучно тари е Јеховаскири страна. Молинѓум ман е Јеховаске хем керѓум адава. Мукхљум о свето пали манде хем гаравѓум ман ко сигурно тхан, ко е Девлескоро Царство кова со нашти те тресинкерел пе“.

12. Сар е Јеховаскоро духовно храми пхердило слава ко акала последна диве?

¹² Јасно тано кај о Јехова дела берекети пле народоске. Ко акала последна диве, бут мануша почминѓе те обожавинен е Девле. Ко 1914 берш, сием сине само некобор милја. Акана, повише таро 8 милиоња обожавинена е Девле хем панда бут милиоња секова берш тане присутна ки Спомен-свеченост. Аѓаар, о дворија сој ки Пхув таро е Јеховаскоро духовно храми пхердиле „скапоцена буќенцар таро са о народија“. * Исто аѓаар, кеда о мануша променинена пе хем уравена и неви личност славинела пе е Јеховаскоро анав (Еф. 4:22-24).

13. Адалеа со барило о број таро објавителија, саве јавера пророштвија исполнинѓе пе? (Дикх и слика ки насловно страна.)

¹³ Акала возбудлива настанија исполнинѓе јавера да пророштвија, сар сој о пророштво таро 60 поглавје таро Исаија. Ко 22 стихо таро адава поглавје пишинела: „Таро хари ка овел милја, хем таро тикно ка овел силно народо. Ме о Јехова ка сиѓаркерав адава кеда ка авел о време“. Адалеске со бут мануша почминена те обожавинен е Јехова, случинела пе нешто бут шукар. Адала  „скапоцена буќа“, или о мануша, иси лен различна способностија хем желба те проповединен о „шукар хабери башо Царство“. Сар резултати, е Јеховаскоро народо шај те користинен адала способностија коленге со о Исаија вакерѓа кај тане сар „о тхуд е народонгоро“ (Иса. 60:5, 16). Акала скапоцена мурша хем џувља поможинена те проповединел пе ко 240 пхувја хем те превединел пе литература ко повише таро милја чхибја.

14. Сави одлука мора акана те анен о мануша?

¹⁴ Ко акала последна диве, о тресибе е народонгоро теринела е манушен те анен одлука. Дали ка поддржинен е Девлескоро Царство, или ка овел лен доверба ко владе акале светоскере? Акаја тани јекх одлука која со секова јекх ваљани те анел ла. Иако е Јеховаскере слуге тане послушна е владенге ко пхувја коте со живинена, ола тане целосно неутрална кеда керела пе лафи баши политика акале светоскири (Рим. 13:1-7). Ола џанена кај само о Царство ка решинел е манушенгере проблемија, а адава Царство нане дело таро акава свето (Јован 18:36, 37).

15. Сар о лил Откровение сикавела кај ка овел испитими е Девлескере народоскири вера?

¹⁵ О лил Откровение керела лафи башо испит со ка овел е Девлескере народо ко последна диве. Адава испит ка анел аменге баро прогонство. О владе таро акава свето ка роден те ова ленге целосно послушна, хем ка прогонинен саринен со нане те манген те поддржинен лен (Отк. 13:12, 15). Ка чхивен силаја „са е манушен, е тикнен хем е барен, е барвален хем е чоролен, околен сој слободна хем околен сој робија, те овен обележиме ко десно вас или ко чекат“ (Отк. 13:16). О робија таро пурано време сине обележиме те шај те џанел пе кој сине ленгоро господари. Слично, саринендар авдиве ка очекујнел пе те овел лен акава симболично белего ко пумаре васта, или ко чекат. О размислување хем о постапке околенгоро со ка приминен акава белего ка сикавел кај ола поддржинена акава политичко систем.

16. Соске акана тано итно те кера позорали амари верност ко Јехова?

¹⁶ Дали ка прифатина акава симболично белего хем ка да амари поддршка акале владенге? Окола со одбинена те приминен о белего ка овен лен пхарипа хем ка овен ки опасност. О лил Откровение објаснинела кај „никој нашти те кинел или те бикинел, освен окова со иси ле о белего“ (Отк. 13:17). Ама, е Девлескоро народо џанела со ка керел о Девел околенцар со иси лен о белего сој спомнимо ко Откровение 14:9, 10. Наместо те прифатинен о белего, ленге ко васта ка овел пишимо: „Припадинава е Јеховаске“ (Иса. 44:5). Панда акана ваљани те сикава кај сием верна е Јеховаске. Ако кераја аѓаар, тегани о Јехова ка овел бахтало те вакерел кај припадинаја леске.

17. Со на ваљани те бистра баши е Јеховаскири стрпливост?

¹⁷ О Јехова сикавѓа кај тано бут стрпливо ко акала последна диве. На мангела никој те овел уништимо (2. Пет. 3:9). Ов денѓа прилика сариненге те каинен пе хем те анен мудро одлука. Ама лескири стрпливост иси ла границе. Окола со на мангена те поддржинен е Девлескоро царство, ка доживинен о иста последице сар о фараони таро е Мојсеескоро време. О Јехова вакерѓа е фараонеске: „Џи акана шај сине те пружинав мло вас хем те мукхав чума упри туте хем упро тло народо, те шај те бришинав  тут тари пхув. Ама мукхљум тут џивдо, те шај те сикавав мли моќ хем те објавинав мло анав ки цело пхув“ (2. Мој. 9:15, 16). Ко крајо са о народија мора те џанен кај само о Јехова тано чачутно Девел (Езек. 38:23). Сар ка случинел пе акава?

18. а) Саво јавер тресибе тано опишимо ко Агеј 2:6, 20-22? б) Котар џанаја кај е Агеескере лафија ка исполнинен пе ки иднина?

¹⁸ Веконцар пало Агеј, о апостол Павле пишинѓа е еврејска христијаненге кај о лафија таро Агеј 2:6, 20-22 ка исполнинен пе ки иднина. (Читин.) О Павле пишинѓа: „А акана ов ветинѓа: ’Панда јекх пути ка тресинкерав на само и пхув него хем о небо‘. А о лафија ’панда јекх пути‘ значинена кај ка овел цидимо адава со шај те тресинел пе, јавере лафенцар адава со на керѓа ле о Девел, те шај те ачхол адава со нашти те тресинел пе“ (Евр. 12:26, 27). Акава тресибе нане сар о тресибе таро Агеј 2:7. Ко Агеј 2:20-22, керела лафи кај окола со сар о фараони, на мангена те прифатинен е Јеховаскоро право те владинел, ка овен уништиме засекогаш.

19. Со нане те овел тресимо, хем котар џанаја адава?

¹⁹ Со нане те овел тресимо, или цидимо? О Павле понадари вакерела: „Адалеске со ваљани те добина о царство кова со нашти те тресинкерел пе, те ачхова достојна башо е Девлескоро шукарипе кова со на заслужинаја ле, преку кова со шај те служина е Девлеске аѓаар сар сој лескири волја, дараја хем хор поштујбаја“ (Евр. 12:28). Откеда ка завршинел акава последно тресибе, само е Девлескоро Царство ка постојнел. Понадари ка ачхол цврсто ко пло тхан! (Пс. 110:5, 6; Дан. 2:44).

20. Сави одлука ваљани о мануша те анен, хем сар шај те поможина ленге?

²⁰ О мануша мора акана те биринен соске на ачхило панда бут време! Ако биринена понадари да те поддржинен акава свето ола ка овен уништиме. Ако биринена те служинен е Јеховаске хем керена промене ко пло живото те шај те керен лескири волја, тегани ка живинен вечно (Евр. 12:25). Амаре проповедибаја шај те поможина е манушенге те анен акаја важно одлука. Адалеске, те поможина панда повише скапоцена манушенге те одлучинен те поддржинен е Девлескоро Царство. Хем никогаш те на бистра о лафија таро амаро господари о Исус: „Акава шукар хабери башо царство ка проповединел пе ко цело свето башо сведоштво са е народонге, хем тегани ка авел о крајо“ (Мат. 24:14).