1-2. Ando kova tresibe vaćerđa o prorok Agej aso amaro vreme?

„ASO nekobor minutija, o prodavnice hem o purane zgrade počminđe te peren sar i kula ando karte.“ „O manuša but darandilje... But olendar phenđe so odova trajinđa samo nekobor minutija. Maje dićhilo so niked na ka ćhinavđol.“ Akala lafija phenđe disave manuša kola preživinđe o zemljotres, ko Nepal, kova hine ko 2015. berš. Ako bi tu oveja uduri, sigurno niked na bi bistreja odova so ulo.

² O tresibe kova amen akana doživinaja na desini pe ki disavi diz ja phuv. O Jehova tresini e manušen ko celo sveto hem odova već beršencar ćerela. O prorok Agej vaćerđa odolestar. Ov pisinđa: „Sose ađahar phenela o Jehova, o Komandanti upro sa o vojske: ’Pana jekh puti, hem odova pana hari ka ćerav, ka tresinav o nebo hem i phuv, o more hem o kopno‘“ (Ag. 2:6).

3. Sar o tresibe ando kova o Agej vaćeri tano averćhane ando doslovno zemljotres?

³ O tresibe ando kova o Agej vaćeri na odnosini pe ko doslovno zemljotres, palo kova tano sa uništimo. Akava tresibe anela diso šukar. Kokri o Jehova phenela: „Ka tresinav sa e narodon hem ka ćedel pe o blago ando sa o narodija hem akava ćher ka pherav slavaja“ (Ag. 2:7). Sose akava proročanstvo hine važno e manušenđe ko e Agejeso vreme hem sose tano važno amenđe avdije? Ko akava članko ka vaćera odolestar hem ka dikha sar amen učestvujinaja ko odova tresibe.

4. Sose o Jehova dinđa e Agejese jekh važno zadatko?

⁴ O Jehova dinđa e Agejese te ćerel jekh važno zadatko. Ama, najangleder te dikha sose o Agej dobinđa odova zadatko. Ov verovatno hine maškaro manuša kola ko 537. berš angl. n. e. irinđe pe ando Vavilon, ko Jerusalim. Sigate palo odova so reslje, odola verna manuša ćhivđe o temelji ando hram (Jezd. 3:8, 10). Ama, sigate palo odova, sebepi o protivljenje, on obeshrabrinđe pe hem ćhinavđe te ćeren o hram (Jezd. 4:4; Ag. 1:1, 2). Odolese, ko 520. berš angl. n. e, o Jehova phenđa e Agejese te ohrabrini e narodo te nastavinen te ćeren o hram (Jezd. 6:14, 15). *

5. Sar e Agejesi poruka ohrabrinđa e manušen?

⁵ E Agejesi poruka valjanđa te pomožini e Judejconenđe te ovel len pana pobari vera upro Jehova. O manuša hine obeshrabrime hem odolese o Agej phenđa lenđe: „’Oven zorale, sare tumen‘, phenela o Jehova, ’hem počminen te ćeren buti! Sose me hijum tumencar‘, phenela o Jehova, o Komandanti upro sa o vojske“ (Ag. 2:4). O lafija „o Jehova, o Komandanti upro sa o vojske“ sigurno but ohrabrinđe len. O Jehova isi le vlast upro but bari vojska ando anđelija. Odolese, ako o manuša manglje te završinen o hram, on morandilje te osloninen pe upro leste.

6. So ka ovel sebepi o tresibe ando kova o Agej vaćerđa?

⁶ Prekalo Agej, o Jehova vaćerđa sar ka tresini e narodon. Odola lafija but ohrabrinđe e manušen kola ćerđe o hram. On mothovđe so o Jehova ka tresini e Persija, koja ko odova vreme hine svetsko sila. So ka ovel sebepi odova tresibe? Najangleder, e Jehovaso narodo ka završini o hram. Palo odova, disave manuša ando avera narodija, ka služinen e Jehovase ko odova hram. Akala lafija sigurno but ohrabrinđe e Devlese narodo (Zah. 8:9).

7. Ko kova tresibe amen učestvujinaja? Objasnin.

⁷ Sose e Agejeso proročanstvo tano važno amenđe avdije? Pana jekh puti, o Jehova tresini e narodon. Ama, akava puti hem amen učestvujinaja ko odova. Razmislin akalestar: Ko 1914. berš, o Jehova ćhivđa e Isuse te ovel Kralj ko oleso nebesko Kraljevstvo (Ps. 2:6). Odija hine lošno vest aso vladarija ko akava sveto. Odova značinđa so nakhlja „o vreme soj tano odredimo e narodonđe.“ Avere lafencar, nakhlja o vreme ked ki phuv na hine vladari kova predstavinđa e Jehova (Luka 21:24). Sebepi odova, posebno ando 1919. berš, e Jehovaso narodo vaćeri so jedino e Devleso Kraljevstvo ka rešini sa e manušenge problemija. Akija „šukar vest ando Kraljevstvo“ tresini e manušen ki celo phuv (Mat. 24:14).

8. Premalo Psalam 2:1-3, sar o manuša reagujinena ked šunena i šukar vest?

⁸ Sar o manuša reagujinđe ki akija vest? But olendar na manglje te šunen. (Čitin Psalam 2:1-3.) O narodija buninena pe hem na prihvatinena okole kas o Jehova ćhivđa te ovel Vladari. Olenđe i poruka ando Kraljevstvo nane „šukar vest.“ Čak, ko disave phuvja i vlast zabraninđa te propovedini pe i šukar vest. Iako o vladarija  ko odola phuvja phenena so služinena e Devlese, on na mangena te odrekninen pe kotar pi vlast. Odolese, sar so ćerđe o vladarija ko e Isuseso vreme, hem avdije o vladarija suprotstavinena pe e Jehovase pomazanikose, ađahar so protivinena pe olese narodose (Dela 4:25-28).

9. Sar o Jehova pomožini e manušenđe?

⁹ Sar o Jehova reagujini ked o manuša na mangena te šunen i šukar vest? Ko Psalam 2:10-12 pisini: „Odolese, tumen so hijen kraljija, oven gođale! Šunen o upozorenje, tumen so hijen sudije ki phuv! Daran ando Jehova, poštujinen le hem radosno služinen olese. Mothoven poštovanje e ćhavese te na holjani o Devel upro tumende hem te na meren ko tumaro drumo, sose ov šaj sigate te holjani. Bahtale tane sare kase ov tano than kuri šaj te garaven pe.“ O Jehova tano šukar hem dela e manušenđe dovoljno vreme te anen ispravno odluka. On pana šaj te menjinen pe hem te prihvatinen e Jehovasi vlast. Ama, na aćhilo lenđe pana but vreme sose živinaja „ko poslednja dive“ (2. Tim. 3:1; Is. 61:2). Akana tano but važno o manuša te šunen i šukar vest hem te odlučinen te služinen e Jehovase.

10. Premalo Agej 2:7-9, sar disave manuša reagujinena ko tresibe?

¹⁰ Disave manuša šukar reagujinena ko tresibe ando kova o Agej vaćerđa. Sebepi odova tresibe, „ćedela pe o blago [o iskrena manuša] ando sa o narodija“ hem on služinena e Jehovase. * (Čitin Agej 2:7-9.) Isto ađahar, hem o Isaija hem o Mihej phenđe so akava ka ovel „ko poslednja dive“ (Is. 2:2-4; Mih. 4:1, 2).

11. So ćerđa jekh phral ked šunđa i šukar vest?

¹¹ Amaro phral o Ken služini ko amaro glavno sedište. Hajde te dikha sar ov reagujinđa  ked šunđa i šukar vest. Iako nakhlje 40 berš, ov pana na bisterđa o dive ked prvo puti šunđa i šukar vest. Ov phenela: „Ked prvo puti šunđum i šukar vest, hijum le but bahtalo ked šunđum so živinaja ko poslednja dive. Haljiljum so ako mangava te ovav paše e Jehovaja hem večno te živinav, na valjani te ovav deo ando akava sveto hem so valjani te ovav ki e Jehovasi strana. Molinđum man e Jehovase hem odmah ćerđum ko odova. Odolese više na mangljum te učestvujinav ko disave buća kola ćerena pe ko akava sveto. Haljiljum so jedino e Devleso Kraljevstvo šaj te pomožini man hem so odova Kraljevstvo zauvek ka aćhol.“

12. Sar ko akala poslednja dive e Jehovaso duhovno hram pherđola slavaja?

¹² Avdije dićhola so o Jehova blagoslovini pe narodo. Ko akala poslednja dive, amen dikhaja so but manuša počminena te služinen olese. Ko 1914. berš hine samo nekobor hiljade manuša kola služinđe e Jehovase. Akana isi prekalo ofto milionija manuša kola ćerena odova, a milionija avera svako berš avena ki Spomen-svečanost. Ko asavko način, ko zemaljsko deo ando duhovno hram – ki e Jehovasi organizacija ki phuv – ćedela pe „o blago ando sa o narodija.“ Isto ađahar, ked on ćerena promene ko po životi ađahar slavinena e Jehovaso anav (Ef. 4:22-24).

13. Kola avera proročanstvija ispuninena pe? (Dikh i slika ki naslovno strana.)

¹³ Sebepi so isi sa pobuter manuša kola služinena e Jehovase hem avera proročanstvija ispuninena pe. Jekh olendar tano o proročanstvo ando Isaija 60. poglavlje. Ko 22. stiho pisini: „Kotar tikno ka ovel baro hem kotar slabo ka ovel zoralo narodo. Me, o Jehova, ked ka avel o vreme, sigate ka ćerav odova.“ Sebepi so but manuša počminena te služinen e Jehovase, disave šukar buća desinena pe. Akava „blago“ ja akala manuša isi len različita sposobnostija hem spremna tane  te propovedinen „i šukar vest ando Kraljevstvo“. Ćaće tano odova so o Isaija pisinđa, so e Jehovaso narodo ka koristini o „thud ando narodija“ (Is. 60:5, 16). Sebepi olengo, i šukar vest propovedini pe ko prekalo 240 phuvja hem amari literatura ikljola ko prekalo 1000 ćhibja.

14. Koja odluka o manuša akana valjani te anen?

¹⁴ Ko akala poslednja dive, đi trajini o tresibe ando narodija, o manuša valjani te birinen da li ka podržinen e Devleso Kraljevstvo ja o manušikane vladavine. Sare amen valjani te birina ki kasi strana ka ova. Iako e Jehovase sluge poštujinena o zakonija ki phuv ki koja živinena, on tane neutralna hem na mešinena pe ki politika (Rimlj. 13:1-7). On đanena so jedino e Devleso Kraljevstvo ka rešini sa e manušenge problemija. Odova Kraljevstvo nane deo ando akava sveto (Jov. 18:36, 37).

15. Sar i vera ando e Devlese sluge ka ovel ispitimi?

¹⁵ I knjiga Otkrivenje mothovi amenđe so ko poslednja dive i vera ando e Devlese sluge ka ovel ispitimi. Sebepi odova, ka ovel amen baro protivljenje hem progonstvo. O vlastija ka zabraninen amare aktivnostija hem ka progoninen okolen kola tane verna e Devlese (Otkr. 13:12, 15). On „zorjeja ka ćhiven sa e manušen – e tiknen hem e baren, e barvalen hem e ćororen, okolen soj tane slobodna hem robija – te priminen o žig ko desno vas ja ko ćekat“ (Otkr. 13:16). O robija ko purano vreme hine len znak te šaj te đanel pe koj tano olengo gospodari. Isto ađahar, ando sare ađićeri pe te mothoven ki kasi strana tane. O način sar razmislinena hem odova so ćerena ka mothovi kas podržinena.

16. Sose tano važno akana te trudina amen te ovel amen pana pobari vera?

¹⁶ Da li amen ka prihvatina o žig hem ka podržina e manušenge vlastija? Okola kola na mangena te priminen o žig ka ovel len pharipa hem olengo životi ka ovel ki opasnost. Ki knjiga Otkrivenje pisini: „Niko našti ni te ćinel ni te biknel, osim okova kova isi le žig“ (Otkr. 13:17). Ama, e Devlese sluge đanena so ka ćerel o Devel okolenđe kola isi len o žig ando kova vaćeri pe ko Otkrivenje 14:9, 10. Umesto te prihvatinen odova žig, on ko po vas simbolično ka pisinen: „Me hijum e Jehovaso“ (Is. 44:5). Akana tano o vreme te trudina amen te ovel amen pana pobari vera. Tegani, o Jehova ka ovel bahtalo te phenel so hijam olese.

17. So na valjani te bistra ked vaćeri pe ando e Jehovaso strpljenje?

¹⁷ Ko akala poslednja dive, o Jehova mothovi soj tano but strpljivo. Ov na mangela nijekh manuš te merel (2. Petr. 3:9). Ov dela e manušenđe dovoljno vreme te pokajinen pe hem te odlučinen te služinen olese. Ama, ov na ka ovel zauvek strpljivo. Okola kola na mangena te podržinen oleso Kraljevstvo ka nakhen sar o faraon ko e Mojsijeso vreme. O Jehova phenđa e faraonese: „Đi akana već šajinđum te mukhav mo vas hem tut hem te narodo te mudarav, hem ađahar šajinđum te cidav tut kotar i phuv. Ama, aćhavđum tut te živine te mothovav tuće kobor hijum moćno hem te vaćeri pe kotar mo anav ki celo phuv“ (Izl. 9:15, 16). Tegani, sa o manuša ki phuv  ka đanen so o Jehova tano jedino ćaćutno Devel (Jezek. 38:23). Sar ka ovel odova?

18. (a) Ando kova aver tresibe vaćeri pe ko Agej 2:6, 20-22? (b) Sar đanaja so e Agejese lafija ka ovel len pana jekh ispunjenje?

¹⁸ Beršencar palo odova so o Agej mulo, o apostol Pavle pisinđa e Jevrejenđe so o lafija ando Agej 2:6, 20-22 ka ovel len pana jekh ispunjenje. (Čitin.) O Pavle pisinđa: „Akana ov dela po lafi: ’Pana jekh puti ka tresinav na samo i phuv nego hem o nebo.‘ Odova soj tano phendo „pana jekh puti“ značini so ka ovel uništimo odova so šaj te tresini pe, avere lafencar odova so o Devel na stvorinđa, te šaj te aćhol odova so našti te tresini pe“ (Jevr. 12:26, 27). Akava tresibe tano averćhane ando tresibe kova pomini pe ko Agej 2:7. Akava tresibe značini so okola kola, sar o faraon, na mangena te prihvatinen e Jehova sar pe vladare, ka oven uništime.

19. So na ka ovel tresimo hem sar amen đanaja odova?

¹⁹ So na ka ovel tresimo ja uništimo? O Pavle pana pisini: „Odolese so valjani te dobina o Kraljevstvo kova našti te ovel tresimo, hajde te da sa amendar te aćhova verna te šaj o Devel hem ponodri te mothovi amenđe po bizaslužimo šukaripe, sebepi kova šaj te ovel amen dar hem strahopoštovanje đi služinaja e Devlese premali olesi volja“ (Jevr. 12:28). Palo odova so ka završini pe o poslednjo tresibe, samo e Devleso Kraljevstvo večno ka aćhol (Ps. 110:5, 6; Dan. 2:44).

20. Koja odluka o manuša valjani te anen hem sar šaj amen te pomožina len?

²⁰ Na aćhilo amenđe pana but vreme! O manuša mora te odlučinen so ka ćeren. Ako hem ponodri ka oven deo ando akava sveto, on ka oven uništime. Ama, ako odlučinena te služinen e Jehovase hem ako menjinena disave buća ko po životi, on šaj večno te živinen (Jevr. 12:25). Ked propovedinaja, amen pomožinaja e manušenđe te anen odija važno odluka. Mangaja te da sa amendar te pomožina so pobuter manušenđe te oven ki e Devlesi strana. Isto ađahar, na mangaja te bistra o lafija ando amaro Gospod, o Isus kova phenđa: „Akija šukar vest ando Kraljevstvo ka propovedini pe ko celo sveto sar svedočanstvo sa e narodonđe, hem tegani ka avel o kraj“ (Mat. 24:14).