1, 2. So izdraimos simbolico phendea de mai anglal o profeto Hagai că va avela ande amare ghiesa?

„ANDE chichiva minutea, le magazinea hai le purane chăra începosarde te peren sar iech pacheto lila chălimasco”. „Orcai dicheias le manușa daranas . . . Vi cana încărdea numai dui minutea, cadea sar phende but manușa, anda mande falas că ci mai terminil-pe”. Cadaia si so phende chichiva anda codola cai așile jiuvinde pala o izdraimos phuviaco cai sas ando Nepal ande 2015. Dacă avelas te naches prin iech buchi sar cadaia cai duchavelas-tu cadea de but, ci daștias te bâstres-la sigo.

² Aghies, andi lumea si iech aver felo izdraimosco cai ci si numai ande iech foro sau ande iech them, tha ande sea le națiuni. Cado izdraimos sas phendo de mai anglal catar o profeto Hagai: „Ita so phenel o Iehova le armatengo: «Încă iech data – pa țâra timpo – va avela te cherav te izdran le ceruri hai i phuv, i marea hai o șuco than»”. (Hag. 2:6)

3. Sar si diferime o izdraimos simbolico anda o lil Hagai catar iech izdraimos phuviaco ciacio?

³ O izdraimos anda savo dea duma o Hagai ci si sar iech izdraimos phuviaco ciacio cai cherel te aven numai ducha. Tha, cado izdraimos cherel te aven buchia lașe. Chiar o Iehova phendea amenghe: „Va avela te cherav te izdran sea le națiuni hai le barvalimata sea le națiunenghe va avena hai va avela te pherav gloriaia cado chăr”. (Hag. 2:7) Sar parudea cadai profeția i viața codolenghi cai trainas ando timpo le profetosco Hagai hai sar pherel-pe voi aghies? Mai dur, va avela te arachas o răspunso cadale pușimatande hai va avela te hachiaras so trebul te cheras vi amen cana o Iehova cherel te izdran le națiuni.

4. Sostar bișaldea o Iehova le profetos Hagai ca pesco poporo?

⁴ Te gândisaras-ame ca le buchia cai sas cana o Iehova phendea caring o Hagai te cherel iech buchi importanto. Cadea sar dichiol-pe, o Hagai sas-lo mașcar codola cai ando bărș 537 a.a.e., găle parpale ando Ierusalimo anda o exilo babiloniano. Țâra timpo pala codoia, le israeliți loialo începosarde te vazden o chăr le Iehovasco, adică o templo. (Ezra 3:8, 10) Tha, ci nachlea but hai anda codoia că aver așile lenghe contra, le evrei sas-le perade hai ci mai cărde buchi. (Ezra 4:4; Hag. 1:1, 2) Cadea că, ando bărș 520 a.a.e., o Iehova phendea caring o Hagai te zuriarel le evreien te avel-le pale zelo caște terminin o vazdimos le templosco. * (Ezra 6:14, 15)

5. Sostar zuriarde le israelițen le cuvintea cai phendea-le o Hagai?

⁵ O mesajo cai phendea-les o Hagai trebulas te zuriarel o pachiamos le evreiengo ando Iehova. Pherdo tromai, o profeto phendea le evreienghe cai sas-len o ilo duchado: „«Aven zurale, tumen, sea codola anda o them hai cheren buchi!», phenel o Iehova, «Că me som tumența», phenel o Iehova le armatengo”. (Hag. 2:4) Le cuvintea „o Iehova le armatengo” dea but tromai le israelițen. Le Iehovas siles tela leschi autoritatea iech bari armata îngerenghi. Cadea că, le israeliți trebunas te șion pengo pachiamos ande leste caște daștin te cheren mai dur penghi buchi.

6. So avelas te avel pala o izdraimos anda savo dea duma o Hagai?

⁶ O Iehova inspirisardea le Hagaios te phenel iech mesajo anda iech izdraimos simbolico sea le națiunengo. Cadai revelația zuriardea le evreien perade că o Iehova avelas te cherel ca i Persia, o mai baro zuralimos cărdo anda mai but națiuni anda codol ghiesa, te izdral. So avelas te avel pala cado izdraimos? Mai anglal, o poporo le Devlesco avelas te terminil o vazdimos le templosco. Pala codoia, chiar vi codola cai ci sas-le evrei, avenas te anen închinarea le Iehovasche co templo pale vazdino. Cado sas iech mesajo cai zuriardea but le poporos le Devlesco! (Zah. 8:9)

7. Ca so buchi las partea aghies? Explichin.

⁷ So însemnol anda amende i profeția cai phendea-la o Hagai? O Iehova cherel pale te izdran le națiuni hai de cadai data, vi amen las partea cadala buchiate. Ande 1914, o Iehova șiutea po trono le Isus Cristosos sar Rege lesche Regatosco cerisco. (Ps. 2:6) Andal coducători la lumeache sas iech vestea nasul că o Regato începosardea te rail. Cadaia sicadea că ‘pherdile-pe’ sau phandade-pe ‘le timpuri cai sas le națiunen’, timpo ande savo ci sas niciech conducătoro cai te reprezentil le Iehovas. (Luca 21:24) Cadea că, vi mai but anda o bărș 1919, le slujitori le Iehovasche phenen savorenghe că o Regato le Devlesco si i corcori speranța le manușenghi. Cadai predicarea ‘la vesteachi lași anda o Regato’ cărdea te izdral sea i phuv. (Mat. 24:14)

8. Cadea sar phenel-pe ando Psalmo 2:1-3, sar phiraven-pe le mai but națiuni cana așunen amaro mesajo?

⁸ Sar phiraven-pe le manușa cana așunen cado mesajo? But anda lende ci camen te așunen-les. (Citisar Psalmo 2:1-3.) Le națiuni „holiaren-pe”. Von ci camen le conducătoros șiuto le Iehovastar hai ci pachian  că o mesajo cai predichisaras-les si „iech vestea lași”. Chichiva guvernea chiar ci mechle te mai avel cărdi amari lucrarea de predicare. Chiar cana phenen că slujin le Devlesche, but conducători le națiunenghe ci camen te mechen pengo zuralimos hai autoritatea. Cadea sar le conducători anda o timpo le Isusosco, le conducători de aghies șion-pe contra codolesche cai silo machlo le Iehovastar hai persecutin lesche continuatoren loialo. (Fap. 4:25-28)

9. So răspunso del o Iehova ca o phiraimos nasul le națiunengo?

⁹ So răspunso del o Iehova ca o phiraimos nasul le națiunengo? Ando Psalmo 2:10-12 phenel-pe: „Hai acana, tumen regi, sicaven goghiaverimos! Mechen tumen ortosarde, judecători la phuviache! Slujisaren le Iehovasche pherde dar hai bucurin tumen astarde izdraimastar! Anen pachiv le Șiavesche, ca o Del te na holiavel-pe hai te aven șiudine tele pa o drom, că Leschi holi astarel-pe sigo. Fericime sile sea codola cai arachen pengo garaimos ande Leste!”. O Iehova sicavel lașimos codolenghe cai așen lesche contra hai del len timpo caște daștin te paruven pengo phiraimos hai te alosaren te aven tela o Regato. Tha o timpo nachel sigo. Amen traisaras andel „palutne ghiesa” cadale sistemosche. (2 Tim. 3:1; Is. 61:2) Le manușa trebun te sighiaren mai but sar oricana te prinjianen o ciacimos hai te alosaren te slujin le Iehovasche.

10. Anda so phiraimos lașio del-pe duma ande Hagai 2:7-9?

¹⁰ Chichiva manușen silen iech lașio phiraimos cana așunen o mesajo le izdraimasco cai phendea-les de mai anglal o Hagai. Vo phendea amenghe că pala o izdraimos „le barvalimata sea le națiunenghe [le manușa cai silen o ilo ujo] va avena” te anen închinarea le Iehovasche. * (Citisar Hagai 2:7-9.) Vi o Isaia hai vi o Mica phende de mai anglal că cadai buchi va avela te întâmplol- pe „andel ghiesa de palal”. (Is. 2:2-4, n.s.; Mica 4:1, 2, n.s.)

11. So cărdea iech phral cana așundea o mesajo anda o Regato?

¹¹ Te gândisaras-ame so cărdea iech phral po anav Ken, cai slujil co sedio mondialo, cana așundea cado mesajo izdraimasco. Vo încărel vi acana ande peschi goghi o momento cana așundea o mesajo anda o Regato, acana cam 40 bărșa. O Ken phenel: „Cana așundem i iechto data o ciacimos, somas bucurime te jianav că traisaras andel palutne ghiesa cadale sistemosche. Hachiardem că caște avav cuci andel iacha le Iehovasche hai te primisarav viața veșnico, trebulas te încleav anda cadai lumea cai ci jianel caring jial hai te așiav pașa o Iehova anda sea mânro ilo. Rughisardem-ma le Iehovasche hai cărdem sigo paruimata. Mechlem andel zăia cadai lumea hai garade-ma ande iech than siguro: o Regato le Devlesco, cai ci daștil te avel izdrano”.

12. Sar pherdiol-pe gloriaia o templo spiritualo le Iehovasco ande cadal palutne ghiesa?

¹² Dichiol-pe claro că o Iehova binecuvântil pesche poporos. Andel palutne ghiesa anda cado sistemo, dichas ce but bariol o număro codolengo cai alosaren te anen închinarea le Iehovasche. Ande 1914, samas numai chichiva mii, tha acana sam mai but sar ohto milioanea închinători le Devlesche. Ande fiesavo bărș, ca i Comemorarea aven ande iech than amența milioanea manușa. Cadea, le baria pa i phuv le templosche spiritualo le Iehovasche – le măsuri line lestar anda i închinarea uji – pherdion-pe ‘barvalimatanța anda sea le națiuni’. Mai but, prin le paruimata cai cheren-le ando timpo so len pe pende i nevi personalitatea, von anen gloria le anavesche le Iehovasche. (Ef. 4:22-24)

13. So aver profeții pherdile-pe anda codoia că o număro codolengo cai anen închinarea le Iehovasche barilea? (Dich i imaginea pa i coperta.)

¹³ O fapto că o număro codolengo cai anen închinarea le Iehovasche bariol cadea de but, pherdea vi aver profeții, sar avelas codoia cai arachas-la ande Isaia, capitolo 60. O verseto 22 anda cado capitolo phenel: „Codo țâno va arăsela iech mia hai codo vi mai țâno iech națiunea zurali. Me, o Iehova, va avela te sighiarav cadai buchi cana va  avela laco timpo”. Anda codoia că but manușa aven co ciacimos, vareso zurales șucar întâmplol-pe. Cadal slujitori, cai sile sar niște barvalimata, silen but talentea hai jianen te cheren mișto but buchia hai camen te predichin „i vestea lași anda o Regato”. Cadea că, sar phendea vi o Isaia, o poporo le Iehovasco „piel o thud le națiunengo”. (Is. 60:5, 16) Cadal cuci phrala hai pheia ajutin ca i lucrarea de predicare te cherel-pe ande 240 thema hai teritorii, hai i literatura sili cărdi ande mai but sar 1 000 șiba.

14. So trebul te alosarel fiesavo manuș?

¹⁴ Ande cado timpo le sfârșitosco, o izdraimos le națiunengo cherel le manușen te alosaren mașcar: te așen pașa o Regato le Devlesco sau te șion pengo pachiamos andel guvernea cadala lumeache. Fiesavo anda amende trebul te alosaras so te cheras. Chiar cana le slujitori le Iehovasche respectin le legi anda o them cai train, von ci șion-pe andi politica cadala lumeachi hai așen cu sea neutrii. (Rom. 13:1-7) Von jianen că numai o Regato daștil te rezolvil sea le pharimata le manușenghe hai cado Regato ci cherel partea andai lumea. (Ioan 18:36, 37)

15. Sar sicavel o lil Revelația că i loialitatea le slujitorenghi le Devleschi va avela zumadi?

¹⁵ Ando lil Revelația, phendea-pe de mai anglal că, andel ghiesa de palal, i loialitatea le slujitorenghi le Devleschi va avela zumadi. Cadea că, le manușa va avena contra amenghe hai va persecutina amen zurales. Le guvernea cadala lumeache va camena te das lenghe i devoțiunea cai trebulas te das-la le Devlesche hai va persecutina codolen cai ci camen te așen de lenghi partea. (Rev. 13:12, 15) Von va cherena „sea le manușen – țâne hai bare, barvale hai ciore, liberi hai sclavi – te primin iech semno po vast ciacio hai po cicat”. (Rev. 13:16) Andel puraimata, codolenghe cai sas-le sclavi sas lenghe cărdo iech semno cai sicavelas claro con sas lengo stăpâno. Sa cadea, ando viitorii va manghela-pe savorendar te avel-len iech semno simbolico po vast sau po cicat. Le manușendar va manghela-pe te sicaven prin o modo sar gândin hai prin so cheren că sile tela i autoritatea le guvernenghi hai că așen de lenghi partea.

16. Sostar trebul te sighiaras acana te zuriaras amari loialitatea caring o Iehova?

¹⁶ Va avela te camas cado semno simbolico hai va avela te așias pașa le guvernea le manușenghe? Codola cai ci camen te primin o semno, va nachena prin pharimata hai pericolea. Ando lil Revelația phenel-pe: ‘Chonic ci va daștila te chinel sau te bichinel, numai codo cai siles o semno’. (Rev. 13:17) Le slujitori le Devlesche jianen so va cherela vo codolenghe cai silen o semno phendo andi Revelația 14:9, 10. Von ci va camena o semno, tha ande iech modo figurato va avela-len scriime po vast: „Le Iehovasco”. (Is. 44:5) Acana si o timpo te jianas dacă amari loialitatea caring o Iehova sili zurali. Cadea, o Iehova va avela bucurime te phenel că sam lesche!

17. So ci trebul te bâstras ande soste priveal i răbdarea le Iehovaschi?

¹⁷ Ande cadal palutne ghiesa o Iehova sicavel but răbdarea anda codoia că ci camel ca vroiech manuș te merel. (2 Pet. 3:9) Vo del fiesave manușes timpo te căil-pe hai te alosarel te slujil lesche. Tha, vo ci va avela răbdatorii anda sea o timpo. Codola cai ci camen te așen pașa o Regato le Devlesco, va avena ande sa codoi situația ande savi sas o faraono andal ghiesa le Moisesche. O Iehova phendea le faraonosche: „Ji acana daisardemas te vazdav mânro vast caște bișalav iech plaga cai te distrugil tut hai che poporos  hai aveias choslo pa i phuv. Tha, ita sostar mechlem-tu andi viața: caște sicavav tuche mânro zuralimos hai mânro anav te avel phendo pe sea i phuv”. (Ex. 9:15, 16) Ji la urmă, sea le națiuni va trebuna te jianen că o Iehova si o corcoro ciacio Del. (Ezec. 38:23) Sar va întâmplola-pe cadai buchi?

18. a) Anda ce aver izdraimos del-pe duma ande Hagai 2:6, 20-22? b) Catar jianas că o mesajo cai phendea-les o Hagai va pherela-pe ando viitorii?

¹⁸ Bute bărșența pala so o Hagai scriisardea peschi profeția, o apostolo Pavel scriisardea tela inspirația că o mesajo anda Hagai 2:6, 20-22 va pherela-pe ando viitorii. (Citisar.) O Pavel scrisardea: „Acana vo phendea: «Va avela te cherav te izdral încă iech data na numai i phuv tha vi o cerii». Le cuvintea «încă iech data» sicaven că le buchia cai sile izdrane, adică le buchia cai sas-le cărde, ci va mai avena caște așen le buchia cai ci sile izdrane”. (Evr. 12:26, 27) Cado izdraimos silo diferime codolestar anda savo del-pe duma ande Hagai 2:7, hai va însemnola distrugerea veșnico anda codola cai sile sar o faraono hai ci camen te hachiaren că le Iehovas siles o drepto te guvernil.

19. So ci va avela izdrano hai catar jianas cadai buchi?

¹⁹ So ci va avela izdrano sau distrugime? O Pavel phenel mai dur: „Anda codoia că va avela te primisaras iech Regato cai ci daștil te avel izdrano, te avel amen mai dur o lașimos nemeritime prin savo daisaras te anas iech servicio sfânto le Devlesche caște avel cuci ande lesche iacha, pherde dar sfânto hai venerația!”. (Evr. 12:28) Pala cado palutno baro izdraimos, cana anda cado sistemo ci va mai așela chanci, numai o Regato le Devlesco va așela ande pânrănde hai numai vo va avela te existil anda sea o timpo! (Ps. 110:5, 6; Dan. 2:44)

20. So trebul te alosaren le manușa hai sar daisaras te ajutisaras-le?

²⁰ Ci mai așilea but timpo! Cadea că, le manușa trebun te alosaren: Va așena mai dur pașa cado sistemo, hai va avena distrugime, sau va cherena paruimata caște train penghi viața cadea sar camel o Del, hai cadea, te daștin te train veșnico? (Evr. 12:25) Prin i lucrarea de predicare, ajutisaras le manușen te alosaren de caschi partea camen te așen. Camas te ajutisaras chichi mai bute manușen, cai sile sar le cuci barvalimata, te așen pașa o Regato le Devlesco. Mai but, camas te încăras ande amari goghi le cuvintea cai phendea-le amaro Rai Isus: „Cadai vestea lași anda o Regato va avela predichime pe sea i phuv sar mărturia anda sea le națiuni. Hai atunci va avela o sfârșito”. (Mat. 24:14)